رواية الخامس من أكتوبر الفصل الثامن 8 - بقلم دانيا

رواية الخامس من أكتوبر

الفصل السابع7

بقلم دانيا

قلت لأمي كزيس إنو جبنا مجتبى معانا كدا ح اكون مطمئن عليكم لمن امشي الجامعه وكمان بمشي ويجي مع البنات المدرسه كدا هو زاتو يطلع من الصدمه شويه .... قالت لي ااي والله غايتو حال الدنيا ربنا يصبرو مسكين والله فراق الأم صعب لكن قدر مكتوب ،، ختيت ليهو اقراضو في الغرفه وخليتو بلعب مع البنات وامي كانت في المطبخ مشيت عليها قلت ليها انا طالع بالركشه على السوق بجي بعد العصر كدا قالت لي تمام ربنا يعينك.

دورت الركشه وطلعت ماشي في الشارع لقيت مرتين اشرو لي وقفت ليهم جو سلمو على وركبوا قالوا ماشين السوق ... اثناء ما نحن في الطريق كانوا بتونسوا مع بعض وحده قالت للتانيه إنتي الحاصل شنو لي كم يوم بسمع لي صوت رجلين ماشات في الحله دي بالليل شديد ؟ قبل ترد ليها تلفونها ضرب انا كنت منتظر الإجابه يمكن اكتر من المرأ السألت زاتو لأنو انا كنت محتار في الموضوع دا شديد ،، وقبل تخلص المكالمه وصلنا السوق وحاسبوني ومشوا من قدامي بقيت قاعد في الركشه وبفكر في الموضوع جاني زبون طوالي طلعت.

اشتغلت للمغرب وبعدها رجعت البيت اشتريت حاجات للبيت وديتهم رصيتهم في التلاجه امي كانت بتصلي بعد خلصت جات ... قالت لي اخت العشاء قلت ليها استحم سريع سريع واجي ،، مشيت استحميت وطلعت اتصل لي ابوعبيده سلم علي وسألني من ناس البيت وقال لي جدول الإمتحانات طلع ...قلت ليهو تمام بكره انا زاتي جاي قال لي تمام وقفلت على كدا طلعت لقيت امي ختت العشاء اتعشينا وقمت عملت لي قهوه شلتها ومشيت فتحت الدكان ومسكت الشيت حقي بقيت اقرأ واشرب في القهوه .

العشاء اذن قفلت الدكان ومشيت الجامع وبعد طلعنا من الجامع قمت راجع على البيت وقفني صوت واحد كان بنادي لي .... اتلفتت لقيتو دا عم كمال جارنا وقفت ليهو لمن جاء سلمت عليهو ومشبنا سوى اثناء ما ماشين في الشارع ،، قال لي والله ياولدي فكرة الدكان دي فكره رائعه جداً بس كمان انت حاول اشتغل بالنهار اكتر شيء عشان تقفل بدري لأنو ياولدي شغل الليل دا م ح يجيب ليك عاد غير السهر والتعب لأنو زي مانت شايف بعد العشاء تاني م بتلقى زول حايم برا .

استغربت من كلامه عاينت ليهو بدهشه وقلت ليهو طيب ياعم ممكن اعرف السبب شنو المخلي ناس القريه ما بطلعوا بالليل ؟ وكمان انا لاحظت كم مره في بت بتتجول في المنطقه بالليل شديد وبتكون براها في الشارع البت دي م عندها اهل ؟ بقى يعاين لي وحسيت ملامحه اتغيرت كأنو خايف يتكلم في الموضوع دا وقبل يرد لي جاء واحد سلم علينا ووقفو قال ليهو عاوزك في موضوع .... طوالي قال لي عن اذنك ياولدي عبدالله قلت ليهو إذنك معاك ،، خليتهم ومشيت فتحت الدكان كانت الساعه قريب 8م .

بقيت بقرأ في شيتاتي لمن نعست عاينت للساعه لقيتها جات تسعه ... ومافي زول جاء اشترى الليل بعكس النهار بالنهار حتى لمن اكون برأ الناس بجوا وامي بتفتح بتبيع ليهم لكن فكرت فيها بيني وبين نفسي قلت انا عندي جامعه وامتحاناتي النهائيه جات وكمان فوقها شغل الركشه ،، كدا م بجي لازم القى لي زول امسكوا الدكان لكن انا هنا معرفتي بالناس م قويه ،، اثناء ما انا بفكر مع نفسي جاني مجتبى ود خالي قلت ليهو تعال يا مجتبى خش جاء قعد في الكرسي قلت ليهو عاوز حاجه ، ناقصك حاجه قول؟ قال لي لالا بس م قدرت انوم عاينت ليهو مسافه خطرت في بالي فكره .

قلت ليهو يامجتبى بتعرف تشتغل؟ عاين لي وضحك قال لي اشتغل شنو؟ قلت ليهو هنا ... ختى يدو في خدو نظام بفكر تاني عاين لي وقال لي م صعبه فكره حلوه ،، ابتسمت وختيت يدي في كتفو قلت ليهو يااخوي مافي شيء صعب في الحياه الإنسان بتعلم وبأخد خبره تنفعه ... بقينا قاعدين بوريهو في طريقه الوزن وطلعت الدفتر وريتو الأسعار قعدنا للساعه عشره قلت ليهو خلاص من بكره بعد تجي من المدرسه اشتغل لأنو انا بكره عندي جامعه بس اوعك تهمل قرايتك قال لي سمح.

الصباح الساعه سبعه طلعت وصلتهم المدرسه وسجلتو وخليتو يواصل قرايتو وقلت ليهو نهايه اليوم سوق اخواتك وارجع معاهم البيت سوى .... رجعت الركشه البيت وجهزت وقلت لأمي يلا انا طالع قالت لي ربنا يوفقك ،، طلعت مشيت السوق ومنها ركبت العربيه لقيتها شاحنه خلاص عاوزة تطلع في الطريق اتصلت لأبوعبيده قلت ليهو الليله شايف الجو دا حاسيهو م طبيعي الله يستر م تجينا مطره ... قال لي إن شاء الله سألتو قلت ليهو الليله يوم كم؟ قال لي "يوم خمسه اكتوبر" قلت ليهو ياالله انا كيف نسيت عندي موعد مع بتاع البيت عشان الأوراق لازم بعد اطلع من الجامعه طوالي امشي اشوفو عشان تغيير الملكيه .

وصلت الجامعه لقيت ابوعبيده منتظرني دخلنا المحاضره وبعد خلصت مشينا المكتبه عندنا ورق عاوزين نطبعه .... لقينا زحمه شديد قلت ليهو م مشكله خلاص نرجع ليهو بعد المحاضرة الأخير رجعنا الجامعه صلينا الظهر ودخلنا المحاضره ،، بعد خلصنا من المحاضرات كان العصر اذن مشينا صلينا وقلت لأبوعبيده انت امشي المكتبه انا ماشي اقابل الزول دا وبعدها نتلاقى بينا تلفون ... مشيت منو لقيت الزول منتظرني قدام المركز دخلنا كملنا إجراءات البيت كانت الساعه جات خمسه بعد طلعنا والجو برا كان مقيم شديد اتصلت لأبوعبيده عشان اشوفو وين يجيب لي الورق عشان اتحرك على المنطقه لأنو الزمن اتأخر .

رد وقال لي تعال البيت م شايف الجو دا مقيم كيف يمكن شويه والمطر ينزل ... قلت ليهو ما عشان كدا انا اتصلت ليك عاوز اطلع سريع قبل المطر ،، قال لي ياباش اسمع كلامي م ح تحسن تمشي في الجو دا تعال البيت وانت خايف من شنو هناك ناس امك ود خالك معاهم اتصل ليهم قول ليهم م قدرت اجي بسبب المطر وقول ليهم قفلوا الدكان بدري واقفلوا الأبوب عليكم ... بقيت افكر في كلامه دا واتزكرت الحاجات الغريبه البتحصل في المنطقه قلت ليهو لا يامان م بقدر اجليهم براهم لازم امشي عليهم خلاص خلي الورق معاك بعد بكره بستلمو منك وقفلت على كدا .

مشيت الموقف لقيتو فاضي وقفت محتار الحاصل شنو وين عربات المنطقه ؟ واثناء ما انا واقف فك هواء قوي كتاحه وغبار ... وقفت لي زول جاء ماري بجنبي قلت ليهو وين العربات ؟ قال لي في

روايات عراقية