رواية الخامس من أكتوبر الفصل التاسع 9 - بقلم دانيا

رواية الخامس من أكتوبر

الفصل الثامن8

بقلم دانيا

بقيت واقف في قدام الموقف وبعاين بافي لاا عربيه فيهو وفجأة فكى هواء وغبار شديد غطيت عيوني بكم قميصي ... وتاني فتحت عيوني جاء زول ماري بي جنبي قلت ليهو لو سمحت وين عربات المنطقه الليله؟ قال لي في الجو دا بشتغلوا لأنو الشارع كعب ومشى من قدامي ،، قلت ياالله شكلي ح اتأخر هنا الليله دخلت تحت المظله وطلعت تلفوني من جيبي واتصلت لأمي قلت ليها الليله الجو كعب شديد مجتبى إن شاء الله قفل الدكان ؟ قالت لي قفل من قبل الهواء قلت ليها تمام اقفلوا الأبواب عليكم كويس انا يمكن اتأخر شوية بسبب الجو والمطر يمكن ينزل في اي لحظه.

قالت لي لا ياولدي م تجي في الطقس دا الليله بيت هناك مع ابوعبيده ... وم تشغل بالك بينا نحن الحافظ رب العالمين ،، قلت ليها مافي زول يطلع في الجو دا انا بحاول اجي عليكم إن شاء الله وبعد خلصت المكالمه عاينت للتلفون لقيت كم مكالمه من ابوعبيده رحعت ليهو قال لي وينك ياباش انا منتظرك خلي العناد وتعال قبل المطر ينزل ،، قلت ليهو جاي عليك ياخوه ... خلصت المكالمه ودخلت التلفون في جيبي بقيت بعاين لبنطلوني البقى لونو اغبش عقب كان اسود وقميصي البقى لونو بيجي عقب كان ابيض .

طلعت من المظله مشيت البقاله الجنب الموقف شلت منها كيس دخلت فيهو الورق وطلعت مشيت بخطوات اشبه بالجري .... لمن قربت للبيت المطر بدت تنزل بغزرة طوالي خفيت رجلي وبقيت بجري جري ... وصلت لقيت الباب فاتح دخلت وقفلت الباب لقيت ابوعبيده واقف قدام باب البرنده من شافني بقى يضحك قال لي لو سمعت كلامي من قبيل م كان دا حصل فيك ،، ضربتو في كتفو قلت ليهو تضحك فيني يارمه ، دخلنا جوا قعدت امو جابت لينا الشاي وقعدت تتونس معانا هو قام بعد شربنا الشاي وقف على حيلو وقال لي قوم ورح طلع ليك غيار عشان تبدل ملابسك دي.

طوالي امو قالت لينا المسافه ديك اجهز ليكم العشاء وقامت مشت على المطبخ ... بقيت قاعد وشارد طقطق لي باصابعو قال لي شردت وين ياباش ؟ قلت ليهو ااا مافي شيء بس فكرة إنو اخلي ناس البيت براهم دي م راكبه لي في راسي خاصةً إنو المنطقه جديده عليهم ... عاين لي وجاء قعد جنبي خت يدو في كتفي قال لي اودعهم لله ياصاحبي وان شاء الله م بحصل شيء الحافظ رب العالمين ،، قمنا خشينا غرفته طلع لي بنطلون وفلينه دخلت الحمام استحميت ولبستهم واتوضيت وصليت المغرب وطلعت برا.

لقيتهم ختوا العشاء اتعشينا وطوالي العشاء اذن قمت صليت وجيت قعدت بطبز في تلفوني وسارح .... ابو عبيده قال لي خليها على الله ياباشا ،، عاينت ليهو وابتسمت قلت ليهو ونعم باالله ،، في نفسي قلت ليهوو انت م عارف عجائب المنطقه ديك ياصاحبي ... امو بقت تحكي لينا حكاوي زمان وبقينا مركزين معاها ،، تلفوني ضرب عاينت للرقم قلت دي امي رديت جاني صوت مجتبى فجأة قلبي خفق قلت ليهو مجتبى إنو كويسين امي وين؟ قال لي يا عبدالله "بصوت متردد" كأنو ببكي قال لي عمتي فاطمه تعبت الربو قامت عليها وفتشنا البخاخ م لقيناهو نعمل شنو؟

قمت وقفت على حيلي حسيت الدم جمد في عروقي قلت ليهو يامجتبى اهدأ فتشو البخاخ كويس وانا هسي بطلع عليكم.... قال لي فتشنا م لقيناهو قلت ليهو خلاص اطلع امشي دق باب ناس حاج سالم واديني ليهو بالتلفون شيل التلفون معاك ... قال لي كويس وقفل الخط ابوعبيده قام وقف جنبي قال لي في شنو ياعبدالله ؟ قلت ليهو بصوت متردد امي تعبت قامت عليها الربو بسبب الغبار القبيل ،، ياالله ياامي ربنا يديكي العافيه هي على العليها السكري م مخليها الأيام دي .

ابوعبيده قال لي ربنا يكتب سلامتها إن شاء الله تلقى العافيه ... قلت ليهو إن شاء الله امو قالت لي ربنا يعافيها ويشفيها ،، تلفوني تاني دق فتحت الخط مجتبى كان ببكي قال لي م فتحوا لي قلت ليهو شوف الباب البعدو انا طالع عليكم ... قفلت منو وقلت لأبو عبيده هات مفتاح الموتر قال لي لكن المطر لسه شغال م ح تقدر تمشي فيهو ،، عاينت ليهو وعيوني مدمعه قلت ليهو مافي شيء اهم من امي ... سكت ومشى جوا جاب المفتاح وقال لي ورح انا بسوق قلت ليهو لا انت خليك قاعد مع امك واختك هنا م صاح تخليهم براهم وابوك مسافر ،، قال لي لكن بالحاله دي م بتقدر تسوق مديت ليهو يدي قلت ليهو بقدر والحافظ رب العالمين .

شلت المفتاح وطلعت قالوا لي انتبه على نفسك وربنا يحفظك ويستر عليك ... مشيت دورت الموتر وطلعت بقيت سايق بسرعه والمطره شغاله والشارع فاضي م فيهو بشر غيري ،، رغم المطر والشارع كعب بس كل ما اتزكر امي بزيد السرعه .... قربت للقريه قلت الليله لو وقفوني زاتو م بقيف ليهم واثناء مابفكر مع نفسي ظهرت قدامي حاجه لابسه اسود في اسود وقبل ما الف منها لقيت نفسي طقشتها ،، انا وقعت بإتجاه والموتر وقع بإتجاه من شده الضربه حسيت راسي تقيل.

عاينت لقيتها دي نفس البت الكنت بشوفها بتتجول في المنطقه انصاص الليالي ... عاينت ليها كانت واقفه فوق راسي وبتعاين لي ومغطيه جزء من وشها مظهرة عيونها بس ،، وفجأة حسيت بالرؤيه بقت طشاش .

بهناك مجتبى رجع بعد ما دق كل الأبواب القريبه وم فتحو ليهو رجع البيت جري جاء لقى دعاء لقت البخاخ امي بعد استخدمتو اتحسنت شويه .... طوالي قال نتصل ل عبدالله اتصل خشى جرس امي قالت ليهو دا عبدالله؟ قال ليها ااي قالت ليهو اديني انا برد ليهو ،، شالت التلفون لمن المكالمه فصلت مافي رد قالت ليهم ليهو شغلتو ليهو بالو .

بهناك ابوعبيده قال لأمو عبدالله بكون وصل الزمن دا ح اتصل ليهو عشان نطمئن .... شال تلفونو واتصل خشى كم جرس مافي رد قال ليها ح اتصل في رقم امو طوالي اتصل ،، بهناك قاعدين امي تلفونها اتصل رفعتو قبل تشوف الإسم ردت قالت اكيد دا عبدالله الووو عبدالله ،، قال ليها انا ابوعبيده ياامي بقيتي كيف؟ قالت ليهو احسن الحمد لله وين عبدالله؟ استغرب من سؤالها لكن قال ليها طلع عليكم هسي بكون قريب منكم ،، بعد قفل الخط عاين لأمو وقال ليها غريبه الفروض يكون وصل هسي الساعه تسعه جات.

قالت ليهو الشارع ما كعب عشان كدا قال ليها قريب ساعتين ياامي انا م مطمئن والله تاني اتصل خشى كم جرس مافي رد