رواية القلب تواق لك يا خليفة الفصل الثامن 8 - بقلم بَحر

وعى خليفة على صوت المنبه
كان تعبان شوي و راسه يعوره
فتح عينه شوي شوي و لف صوب السرير و توق ما كانت موجوده

خليفة : "شكلها وعت من زمان"

قام خليفة و شل فوطه و راح الحمام ياخذ له شاور بارد عشان يخف عوار راسه و يصحصح
بالنص الشاور سمع احد يناديه
من صوتها الناعم عرف انها توق

خليفة : نعم ؟!

بس شكلها توق ما سمعته لانها تمت تنادي
سكر خليفة الماي و لف الفوطه على خصره و طلع لها

خليفة : كنتي تناديني ؟

توق تمت ساكته
كانت تطالعه من فوق لين تحت
عقب نزلت عينها على الارض
خليفة اول شي استغرب من تصرفها
بس عقب طالع نفسه و استوعب هي ليش مستحيه

خليفة تكلم بسرعة : تبين شي ؟
توق بحيا : كندورتك جاهزه

قبل ما يرد عليها خليفة مشت بسرعه

نزلت تحت و راحت الصاله مكان ما كان قاعد عمها
خذت نفس عميق و سوت عمرها طبيعيه

توق : السلام عليكم
احمد لف : و عليكم السلام

توق قعدت مقابله بهدوء

احمد : ها اليوم بتروحين الجامعة ؟
توق : هيه خلصت اجازتي
احمد ببرود : كل يوم خليفة بيوديج الجامعة و هو رايح الدوام ... مفهوم ؟
توق : ان شاء الله

توق كانت جاهزه و يالسه تتريا خليفة
احمد قام

احمد بصرامه : انا رايح الدوام ... قولي حقه لا يتأخر
توق وقفت : ان شاء الله

طلع احمد و توق تنهدت
الجو ما كان متكهرب بين خليفة و ابوه بس ... بعد كان متوتر بينه و بين توق

توق : "شكله يكلم كل الناس بهاذي الطريقة"

تنهدت توق مره ثانيه و رجعت تساندت على الكنبة
كانت شوي متوتره لكن ارتخت اعصابها لما شافت خليفة نازل من الدري و ابتسمت له

خليفة : يلا قومي

توق قامت و طلعت وراه
ركبو السيارة

خليفة : جامعتج قريبه من هني ؟
توق : مادري بس هي من صوب (.....)
خليفة في نفسه : "خيبه جامعتها عكس درب دوامي"

تردد خليفة شوي و لف صوب توق
عرف من نظرتها انها حست فيه

توق : بعيد عليك ؟
خليفة ابتسم : لا لا عادي مب مشكله
توق : اكيد ؟
خليفة : هيه هيه ما عليج

وصلها خليفة الجامعة
و عقب راح بسرعة دوامه
.
.
خليفة بالعادة يخلص دوامه متأخر
بعد ما طلع على طول ركب السياره و حرك
راح صوب جامعة توق

خليفة : من ساعة يالسه تنتظرني هي ....

سرع خليفة شوي عشان ما يخلي توق تنتظر اكثر
لما وصل دق حق توق

خليفة : الو
توق : ها وصلت ؟
خليفة : هيه انا برا
توق : تمام شوي و بطلع

سكر خليفة و تم ينتظر
شوي و طلعت توق بس ما كانت بروحها
كان شي واحد يمشي معاها
خليفة اول ما شافها تمشي مع واحد حس بشعور غريب داخله
تم يطالعها لين ركبت السيارة

توق : السلام عليكم

خليفة تم ساكت..
توق لفت عليه و شافت ويهه و ما كان يبشر بالخير
كان عاقد حواجبه و يطالعها و عيونه نار

توق رفعت حاجبها : فيك شي ؟
خليفة بهدوء : منو ها الي كنتي تمشين معاه ؟
توق : اوه ها ... زميلي فالكلاس كان عندنا بروجكت مع بعض عشان جي كنا نتكلم مع بعض

خليفة ما رد لان كان يعرف نفسه
لو قال كلمة زياده بيعصب عليها
حرك بدون كلام

توق في نفسها : "شو فيه ؟"

ما قالت توق كلمة زيادة
تمو على هالحال لين وصلو البيت
نزلت توق و نزل هو وراها
دخلو البيت و كان مافي احد لان احمد من بعد الدوام سافر لانه عنده شغله برا البلاد
راحت توق الغرفة و فصخت عبايتها و دخلت الحمام غسلت ويهها من الميكب الي كانت حاطته و رفعت شعرها
طلعت و شافت خليفة منسدح على السرير و مغمض
قربت منه و شافت ويهه
كان واضح عليه انه تعبان
ما حبت تزعجه اكثر
راحت صوب الكبت طلعت لها شيلة بيت و سكرت الليت و طلعت
.
.
صارت الساعة سبع المغرب و توق كانت بعدها يالسه فالصالة
رفعت ايدها و طالعت ساعتها

توق استغربت : "ها ليش بعده راقد ؟ غريبة"

اتريت توق بعد ربع ساعة بس خليفة بعده ما نزل
قامت توق و راحت الغرفة عشان تطمن عليه
دخلت و كان ظلام
راحت صوبه و فتحت الاضاءة الصغيره الي عدال راسه
تفاجأت توق لما شافته معرق و عاقد حواجبه
حطت ايدها على راسه و كان وايد حار

خليفة ارتخت ملامحه لما حس فيها
كانت ايدها بارده على راسه
فتح عيونه شوي شوي و شافها تطالعه

خليفة بتعب : برد
توق راحت : ويت ويت

راحت توق و خفت على المكيف شوي
و عقب رجعت عنده و لحفته عدل

توق : انتظر ها

كانت توق بتروح بس صوته وقفها

خليفة : وين
توق لفت : ها
خليفة : وين بتروحين
توق : بسير بيب لك كمادات بارده و بيي ... بسرعة ما بتأخر

خليفة بلع ريقه و غمض عيونه مره ثانيه
بعد خمس دقايق رجعت توق
يلست عنده و ساعدته يقعد و مدت له دوا

توق : خذ ها

خليفة كلا الدوا و شرب ماي بمساعدتها
رجع انسدح بشويش
و حطت توق كمادات بارده على راسه
تمت توق قاعده عنده و كل شوي تبدل الكماده و ما تحركت من صوبه
خليفة ما اعرف هي لين متى تمت قاعده عنده لانه رقد على طول
.
.
وعى خليفة لما حس بحركة عداله
فتح عينه شوي و شاف توق راقده على ايده
كانت بسابع نومه
تم ثابت عشان ما يزعجها بحركته لكن بعد فترة ايده تخدرت
حاول يقوم من عدالها بدون ما يوعيها بس اول ما تحرك توق فتحت عينها
على طول فزت لما شافت خليفة يطالعها

توق : اسفة...
خليفة : لا عادي عادي

توق حطت ايدها على ويهه عشان تشوف اذا خفت حرارته

توق : ها بعدك تحس في تعب؟
خليفة : شوي احسن عن قبل
توق : زين ... الحمدلله

قامت توق من السرير

توق : يوعان ؟

خليفة هز راسه "هيه"

توق : تمام انتظر شوي

طلعت توق من الغرفة و نزلت تحت
راحت صوب المطبخ و كانت نور واقفه

نور ابتسمت : صباح الخير
توق ردت الابتسامه : صباح النور ... امم نور
نور : تفضلي

توق فكرت اول شي تقول لها تسوي شوربة حق خليفة

توق في نفسها : "لا لا انا بسوي احسن"
نور : انسة ؟
توق : ها ؟
نور : كنتي بتقولي شي
توق : لا خلاص ولاشي
نور : تمام

طلعت نور من المطبخ
بدت توق تطلع الاغراض الي تحتاجها حق الشوربة و بدت تسويها
سوت جاي دافي بعد
بعد ما خلصت طلعت و حطته في غرفة الاكل
راحت فوق و و دخلت الغرفة
خليفة كان راقد

توق بصوت خفيف : خليفة

فتح خليفة عينه بشويش

توق : بتنزل تحت تاكل ؟
خليفة بصوت مبحوح : هيه

قام خليفة بمساعدتها
نزلو غرفة الاكل و قعد خليفة و هي عداله
كان خليفة بياكل بس توق وقفته

توق : ويت

توق بدت تأكله
.
.
مر كم يوم و خليفة اتشافى
بس لان توق تمت قريبه منه و ما فارقته وقت مرضه
استوا بينهم رابط قوي و بدا خليفة  يتقرب منها شوي شوي
.
.
1:30pm
الجمعة

خليفة توه طالع من الحمام كان ماخذ شاور
بدل ملابسه و راح قعد عدالها
هي كانت يالسه على السرير تقرا
فجأه من غير سابق انذار توق حصلت عمرها بين ايده
قرب خليفة ويهه
توق بسرعه وقفته و حطت ايدها على فكه

توق : شو تسوي
خليفة ابتسم : ماشي شو بعد حرام امسك حرمتي ؟
توق : ما تشوفني مريضة ... بتنعاد
خليفة ابتسم : انزين و يعني ... تراج انعدتي مني
توق : لا لا ما اباك تصير مريض مره ثانيه

توق تنهدت بشويش
كانت مستحيه وايد و الحمدلله انها كانت مريضه
عشان ما يقرب منها
خليفة مسك ايدها و شلها من صوب ويهه
رجع قرب مره ثانيه
كل ما هو يقرب ويهه هي كانت تبعد و ويهها احمر
حط ايده الثانيه ورا رقبتها عشان ما يميدها تبعد اكثر
غمضت توق عيونها و بلعت ريقها بتوتر لما حست بأنفاسه قريبه من شفايفها
قطع عليهم الجو صوت الباب و هو يندق
توق على طول فتحت عينها و حطت ايدها على صدره و حاولت تبعد عنده لكن ما قدرت

توق بتوتر : خليفة!

خليفة لف على الباب بعدين رجع لف على توق و اشر لها بعيونه انه ترد

توق بتوتر : اء... منو
نور من برا : انا نور
توق : نعم نور
نور : مستر احمد ينتظركم في غرفة الطعام
توق : ت..تمام الحين نازلين

راحت نور
خليفة لما سمع صوت خطواتها و هي رايحه ابتسم

خليفة : شو فيج ليش جي تتكلمين

توق ماعرفت كيف تتكلم
كانت متوتره من مسكته
كان ماسك ايدها و فالايد الثانيه ماسك رقبتها من ورا
و ما ننسى قربه لها

توق نزلت عينها : ينتظرنا....
خليفة هد ايدها : امممم

شهقت توق بخفة لما حست بايده على خصرها

خليفة يبتسم : مادري ... انتي شو رايج نخليه ينتظر ولا ننزل؟

حاولت توق انها تنطق لكن ماقدرت
خليفة كان عاجبنه الوضع لان عارف انها من الحيا و التوتر ما بتتكلم

خليفة : ها توق شو رايج ... ننزل؟

توق غمضت عيونها و خذت نفس

توق بصوت خفيف : ننزل
خليفة حب يستهبل : ماسمعت شو
توق : ننزل
خليفة ضحك : خلاص اوكي

هدها خليفة و قام

خليفة : يلا انا بنزل ها ... لا تطولين

طلع خليفة و خلاها بروحها مع افكارها
تنهدت توق بقوه
اول مره تشوف جرائته
حطت يدها على خصرها في نفس المكان الي هو كان ماسكنه
بلعت ريقها و قامت
راحت عند الكبت شلت مخوره و لبستها
لبست شيله و طلعت