رواية الكسار (سلاسل الغوث) الفصل الأربعون 40 - بقلم لـ ميامي

مو بيدي صدّگ يا حِلو
جابتني غصباً روحّي .

قراءة ممتعة
...............................................................

دموع:فتحت عيوني على رنة تلفوني كعدت احك براسي شفت الكسار نايم وحسنين هم والوضع هدوء

اخذت تلفوني شفتها سيدرا غمضت عيوني وجاوبتها بنعس
:ها سوسو

سيدرا:لك ها دودو شلونك حبيبي

:حياتي اني بخير انتَ شلونك ضلعي

سيدرا:زينة هواية اكلچ كومي لبسي يلا اليوم نروح نختار بدلات اني وياچ

فتحت عيوني مفاهمة
:بدلاتيش اشتري بس فستان وشرط احمر حتى الكسار يغنيلي يا ام الثوب نص ردان دفيني بحضنچ بردان

ضحكت بعلو صوتها وردت علية
سيدرا:خدودچ ذني لو رمان وخلي اشرب منهم ميه

تحمست صرت اطگ اصبع وياها بعدين استوعبت اطفالي نايمين طلعت عنهم ورحت للصالة

:طاح حظچ خليتي اتحمس ووليداتي نايمين

سيدرا:هو واحد دموعة

:لعد والكسار حرام عليچ هذا ابني بس شنو ابني مولود قبلي

سيدرا:فهمت عليك حبيبي المهم يلا كومي كعدي رجلچ خلي نروووح وانتِ غصباً عليچ تختارين بدلة عروس

:ولچ يا عروس ابني حيتخرج من الجامعة

سيدرا:دمووووع شكد تحمييييين مو باچر يطلع من الاربعين ولچ ثولة خلي نتونس بهاليوم هو يوم بهالعمر يلا يلا لتكسرين واهسي اريدچ وياية

تأفأفت وكلت
:ماشي حروح اكعد زوجي

سديتة منها خليت تلفوني بالصالة فتحت القليل من سحاب الصدر ومشيت اتمايل بمشيتي بهالشهر نزلت شكم كيلو وفرحانة

فتحت الباب اعدل بنفسي ورحتلة چان نايم على بطنة وظهرة عاري كعدت بصفة وحطيت ايدي على ظهرة وصرت احركها بهدووووء

:كسوري كسرسر مكسرات

تحرك منزعج تقربت لأذنة وهمست برهاوة
:مكسرااااتيييي

فتح عيونة الحمرة بسبب أثار النوم عاگد حواجبة
الكسار:دمدم

خليت ظهر ايدي على خدة وحاوبتة بدلع
:عيونها

ابتسم وهو نادراً مايبتسم وهو ستوة كاعد من النوم
الكسار:ابوس عيونها

نام على ظهرة واني حطيت اصابعي على بطنة
:شوف سيدرا اتصلت علية حتى نروح نختار الفساتين

الكسار:مغيرتي رأيچ؟

نزلت راسي بخجل
:غيرتة غيرتة موافقة البس بدلة بس شوف ماريد احد يعرف مجرد نصور وانزع

الكسار:اي عادي المهم غيرتي رأيچ يلا روحي بدلي ولبسي حسنين وجهزي خلي اخذة عند روان

باوعتلة معاجبتني الفكرة
:اخاف من سلوى تسويلة شي؟

الكسار:لا لتخافين هاي بوخة متسويلة شي وحتى نطمنين اكول لروان تقفل باب الغرفة ولتخلي احد يتقرب علية

ايتسمت مرتاحة وكمت طلعتلي ملابس وهو راح للحمام يسبح

بعد فترة كملنة اخذة حسنين وطلعنة اول شي رحنة لبيت اهلة خلينة حسنين عند روان ووصيناها بي وهمزين چانت سلوى مموجودة

رحنة للسوگ للمكان الي كالتة سيدرا ومن وصلنة مباشرةً صرنة نختار چان نازل موديلات البدلات الخليجية الي كلها تلمع اختارت سيدرا وحدة تكون فخمة بس بسيطة هم رادت تقيسها بس كالت استحي لأن خالي هنا

اني بقيت ادور وادور اخر شي وكعت عيني على بدلة تلتها خفيفة وكلشي بسيط بيها كلش حبيتها باوعت

:شنو رأيك حلوة؟

باوعلها وهمس
الكسار:تخبل عليچ

ابتسمت حجزناهم ودفعنة فلوسهم وبعدها رحنة للصالون اتفقنة عروستين ورجعنة اخذنة حسنين ورحنة البيت چانت اكو فرحة بگلوبنة رغم اني مچنت حسوي عرس بس تصوير وانزعها

مرت الايام واني وحسنين طلعنة من الأربعين

اليوم كعدت الصبح غسلت وجهي ورتبت نفسي واباوع لحسنين محتارة حسيت بشخص حضني من ورة وباسني من رگبتي

الكسار:شبيها عروستي ضايجة؟

:منو حيبقى عند حسوني خايفة علية

الكسار:لتخافين حبيبي لتخافين يمي وزياد وباهر وغيث موجودين روحي ولتهتمين وكل شوي اتصلي بية واطمنچ

التفتت دخلت بصدرة
:انتبه علية ماشي؟

مشة ايدة لنهاية ظهري وهمس
الكسار:بعيوني بس اكلچ

رفعت راسي اباوعلة
:شنو

دنگ باس حنچي وعصرني بحضنة
الكسار:صارلچ ايام من طلعتي من الأربعين ومانعتني منچ عود ليش؟

دفعتة اضحك
:معلييييك سوالف نسوان يلا اخذني لا اتأخرر

عض شفتة و ضربني جوة ظهري
الكسار:سوالف برا**يگ

باوعتلة من فوك لجوة وكلت
:والله ماكو بر**گ غيرك

كلت هيچ وشردت واسمعة يتحلف بية واني اضحك

لبست وطلعنة من البيت واني اوصي على حسنين طول الطريق اوصي
وصلنة اني نزلت وهو اخذ حسنين وراح دخلت لكيت سيدرا جاية ومبلشين بيها واني هم بس دخلت بدو بشعري

مردت تسريحة او شي مجرد شسوار وسوت شعري ويفي لأن چان شعري قصير يوصل لكتفي

وبعدها بدت بالمكياج من الاخير طلعنة نخبل

كملنة وكعدنة ننتظرهم يجون
:اكلچ اغير الحمرة اسويها حمرة؟

سيدرا:اي تطلع حلوة عليچ لأن شفتچ مليانة

اقتنعت وغيرت لون الحمرة چانت وردية بس خليتها حمرة وصارت احلى بعد

بعد نص ساعة واجو اول دخل خالي متوتر هواية باوعلها عيونة تلمع وتقرب باسها براسها

جناح:الف مبروك

سيدرا:الله يبارك بيك يوم الالك

ضحك يهز براسة باوعلي وغمزلي
جناح:شهالجمال دميعة

رجعتلة الغمزة وكلت بضحكة
:جمالك شيخي

اخذها وراحو للتصوير چان قريب بس طلعو دخل الكسار لابس قاط طالع يجنن اشوف العاملات الي بالصالون عيونهم صارت علية ويتهامسون بيناتهم

تقرب علية باسني بخدي
الكسار:طالعك تخبل ولك وين اضمك اليوم

حطيت ايدي ع صدرة
:بگلبك هنا

رجع باسني بخدي فرحان وعيونة تلمع
اخذني للسيارة وطاير بية طير يتغزل ويبوس بأيدية

وصلنة للتصوير وبدت تصورنة چانت لقطات حلوة هواية ومن كملنة نزعت البدلة ولبست فستان مال حفلات رغم رفضة بس ماعرف اني استحيت طلعنة من التصوير وهو ينتفخ حط البدلة ورة واجة صعد كدام ساكت ويدخن

لزمت ايدة وكلت بهدوء
:هسة شبيك لتزعل مني اليوم والله استحي

الكسار:شتستحين دموع قابل ناهبة ترة اني زوجچ على سنة الله ورسولة وهم محد راح يجي لبيت خالچ بس اقاربكم وشوي من اقاربي

باوعتلة مفاهمة
:اقاربنة؟

الكسار:اي نسوان من عندكم ولد عم امچ ونسوانهم

:بس اني ماريد يشوفوني!!! هسة يكولون علية بنت شاهيناز ويعيروني ماروح رجعني للبيت

الكسار:شبيچ دموع طبهم عمى الي يحچي اگُص لسانة تصرفي طبيعي ومعليچ

سكتت اهز برجلي متوترة من هاللقاء احسة غلط ماريد التقي بيهم
وصلنة لبيت خالي اني دخلت جوة وهو ضل برة يم خوالي والبقية ركضت ملهوفة على ابني

دخلت للصالة چان اكو نسوان ما اعرفهم كلت السلام عليكم ودخلت چانت روان كاعدة بصف سيدرا وبيدها حسنين رحت اخذتة من ايدها ابوس بي

:احححح اشتاقيتلك هواية نمولة

ضحكت روان وكالت
روان:نمولة شنو؟

:هاي غوث يسمي النملة واني دلعتة نمولة

روان:حتخبلون الولد والله جيبي وروحي نزعي هاي يلا خلي نرگص حفلة واجت قابل نبقى كاعدين

انطيتها حسنين ورحت لوحدة من الغرف نزعت الصاية وعدلت شعري رغم چان جسمي مليان بس مليان بأماكن صح مچان مخربط

طلعت اتطلع بمشيتي من دخلت للصالة لگيت سلوى وبنتها ورود جايات مهتميت مالي خلگ كلامها المسموم رحت لروان اخذت حسنين خليتة على القنفة وعيني علية و فتحت اغاني واني من اسمع اغاني ساجدة افصل عن الدنيا هزيت هز اكبر رقاصة متلحگني بي

مر الوقت واحنة نرگص وكومنة سيدرا ويانة واني كل شوي رايحة لحسنين شفتة نايم اخذتة للغرفة وقفلت الباب علية وصرت كل ربع ساعة اروح اشوفة وارجع

رجعت ارگص واسمع همسات واسمي واضح بينهم مهتميت ماريد شي يعكر مزاجي

بعد العشة كالو حيزفونهم كمنة دخلنة سيدرا لغرفتها ورجعت اهلهل لخالي دخلو هو والكسار وخالو فهد وباهر دخلو لغرفتة يهوسون من سكتو سمعت صوت رجال واحس اني سامعتة

:ولك غووووث يلا نريد نروووووح

باوعت للكسار شفتة يباوع لسلوى عرفت هذا شهاب ابنها ترك كلشي وطلع رحت لبست صاية وحجاب واخذ ابني وطلعت وراهم شفتهم واكفين يحچون

سلمت علية وهو نزل راسة ورد السلام باوع لحسنين وكال بابتسامة
شهاب:غوث انطيني ابنك رجل بنتي

اخذة من ايدي وحطة بأيد شهاب وكال بضحكة
الكسار:الله اكبر كلها تريد ابني زياد وجناح وهسة شهاب والمشكلة محد منكم عندة بنية

كال وهو يبوس بي
شهاب:تصير تصير معليك وبنية تخبل هم بس لازم الگة امها

هز راسة يضحك وهذا رجع يبوس ويشمشم بحسنين كال الكسار بهدوء
الكسار:مناوي تشوف امك!

گلب عيونة بأنزعاج ورجع حسنين لأبو
شهاب:غوث صارلك فوك الشهر تحچي بهالموضوع ما مليت؟ ماريد اشوفها ولا اريدها فكني منها انه مرتاح بحياتي وتصالحت ويا ولد عمي هم يعني ما محتاجها بحياتي خليها بعيدة عني افضل

سكت الكسار واني كلت
:بس هاي امك! خطية تبچي عليك

جاوبني بكل برود
:امي بالبيت وماعندي غيرها يلا اودعناكم امي تريدني

كال هيچ وطلع يركض والكسار يهز براسة مرات اكول حقة يكرها لأن تركتة وهو طفل وتعرض للتعذيب بس هم منكدر نحكم واحنة منعرف شنو صاير

رجعنة دخلنة للصالة باهر كاعد منزل راسة وشفت وحدة من البنات الي جايات اكلتة اكل بنظراتها

كام خالي حاوط كتفي وباس راسي
فهد:ليش ما بقيتي بالبدلة يا بابا چان سوينالچ عرس هم

:لا خالو ماريد خلص فات اوان العرس بعد

سكت يهز براسة راحت عيوني على باهر چان لازم تلفونة ويحچي رحت وكفت كدامة وهمست

:ها بهوري ابو قوري شوكت تزوج انتَ

رفع راسة يباوعلي ويهز ايدة
باهر:من يبيض الديچ اتزوج

نصيت صوتي اكثر وحچيت
:هاي البنية دتباوعلك بس لتلتفت لتخليها تنتبه

نزل عيونة يضحك
باهر:ادري ادري هاي بنت ابن عم ابوي زعطوطة بطول ايدي عمرها 16 سنة واني راح ادگ الثلاثين

:اوكف هسة اجي

ركضت للمطبخ جبت من كيكة العرس خليت صحنين ورجعت انطيت باهر صحن وكلت بصوت عالي اضحك

:يكولون الي ياكل من كيكة العروس يتزوج بعدها اكل باهر اكل واذا تريد اجيبلك الكيكة كلها

بس كلت هيچ حطها كلها بحلگة واني اكعدت اكل واضحك من كمل مالتة سحب الصحن من ايدي

باهر:دجيبي انتِ مو متزوجة شنو تردين تتزوجين

غميتة وكمت اضحك
راحو الناس كلهم وهمزين محد سأل عني
بعدها احنة هم رجعنة لبيتنة واني متحمسة اسولف للكسار

:رگصت هواية واحس ارتاحيت

الكسار:ومن اكلچ اني تكولون اووووي استوحيييي اوييي اميرة الانحراف

عضيتة بأيدة وبستها
:وانتَ سلطان المنحرفين

سكت عني متحلف بية وصلنة لبيتنة جان حسنين نايم اخذتة ونزلت خليتة بغرفتنة التفتت اريد اطلع ودخل الكسار بأيدة البدلة ومبتسم

الكسار:يلا لبسيها خلي نسوي عرسنة

:اهوووو كسووور

عض شفتة متحلف واجة سحب الصاية يريد ينزعني الفستان بسرعة دفعت ايدة

:موافقة موافقة بس اطلع واني البس

الكسار:عفية يلا بسرعة

اخذ مفتاح الغرفة وطلع خاف اخدعة استسلمت للامر الواقع ولبستها طفيت الضوة على حسنين وطلعتلة للصالة بس طلعت كام مبتسم وتقرب علية

الكسار:جمالچ هدلي حيلي رحمي بحال متعوبچ

حاوطت رگبتة خجلانة مشاني للقنفة واخذ تلفونة شغل اغنية تامر عاشور بيت كبير وصرنة نتمايل وياها

واجمل بارت بيها

عمري ما انسى انا قبلك كنت بأيه ومعاك بقيت انا أيه
انا باقي ليك ولحد ما عمري ينتهي حفضل يحبيبي معاك
واعيش واموت بهواك انا ليه مين غيرك حبيب عمري

بقينة نرگص عليها لحد ما انتهت طبع بوسة بطرف شفتي وهمس
الكسار:احبچ

ابتسمت وبستة بخدة ورجعنة نرگص من أذن يلا طفينة الاغاني وهو راح توضى واني نزعت البدلة وغسلت وجهي ورحت توضيت وكعدنة بالصالة نصلي

چانت صلاة مليانة بالدعاء والحب احب صلاة الفجر هواية

من كملنة اني كمت نزعت الاحرام ورحت لغرفتنة وهو دخل وراية مبتسم

چان يوم كلش حلو فرحانة هواية

كعدنة ثاني يوم متأخرين وخطية حسنين كعد مرتين يبچي ونسكتة
جسمي مكسر تكسر وبعدني نعسانة رحت سبحت ورجعت للغرفة غفيت بس كعدني صوت حسنين ردت ابچي من النعس

اخذتة وفللتة نزعتة حفاضتة حتى يرتاح منها وخليتة بأيدي اطبطب على ظهرة بهدوء واغنيلة

:لعيونك انتَ يا حلو يا حلو العيون
تسلم يا فرحة من العمر يا ضي العيون

دخل الكسار جايب غدة يباوعلنة مبتسم كعد يمي واني حطيت حسنين على الچرباية

الكسار:اي والله انتو فرحتي بهالعمر وانتو ضي العيون

ذبيتلة بوسة بالهوى تركت شعري مبلل واخذ حسنين حتى اسبحة وهو اجة وياية كل ما اسبحة لازم هو وياية

سبحتة ولفلفتة زين واخذتة للغرفة لبستة وگمطتة والكسار راح يجهز الغدة على ما ارضع الطفل

رضعتة ومن شبع تركتة على چربايتنة وكمت طلعت لگيتة ينتظرني كعدنة نتغدة ونسولف على البارحة

:چان اكو نسوان معرفتهم منو بس تالي باهر كال اكو وحدة تصير بنت ابن عم ابو بس البقية معرفتهم

الكسار:كلهم نسوان عمام امچ لو نسوان ولدهم وبناتهم

سكتت چنت ناسية عندي أم كل ميذكرها لازم اصفن وتالي يلا اتذكرها
من كملنة هو راح لحسنين واني رتبت البيت وكعدت بالصالة چنت ناوية اتصل على سيدرا بس استحيت خاف بعدهم نايمين لأن بيتهم وحدهم محد يزعجهم

مرت الايام وسيدرا وخالو وداني سافرو لتركيا واحنة بدينة نسوي جنسية لحسنين وبعدها الجوازات والحمدلله معارفة هواية بسرعة طلعت الجنسية وطلعو الجوازات

2015 / 1436

صعدنة بالطيارة وبحضني حسنين الي صار عمرة 5 اشهر وصاير يجنن يشبه ابو هواية بس بالسمن يشبهني

بعد ساعات وصلنة للسعودية
چانت من احلى الأيام بحياتي حرفياً حجينة اني والكسار وحسنين والكسار دفع فلوس لناس حتى يحجون لحسن والحنينة ومَلِك وفرح وحسن الصغير

زرنا مرقد الرسول صلى الله عليه واله وسلم والبقيع وچان الكسار يلوب على الجگارة وممنوع يدخن بالحرم

كعدنة بالحرم وبيت الله كدامنة نشوف الأطفال يمشون والناس من كل الاجناس والمذاهب شفت الكسار رفع ايدة وصار يدعي بغصة

الكسار:اللهم وأن كثرت ذنوبي وأن كثرت معصيتي لك اغفر لي كُنت في ضلال المغريات واصبحت عبداً مطيعاً ذليلاً لك اغفر لي ذنوبي وارحمني وانتَ ارحم الراحمين

حطيت ايدي على ظهرة مبتسمة
:الله غفور رحيم وانتَ رجعت للطريق الصح انتَ مزنيت ولا سويت فد شي حرام غير الشرب وهسة تبت اكيد حيغفرلك

تنهد ونزل راسة
الكسار:ندمان هواية وين چان عقلي بس الحمدلله هسة اني رجعت لطريق الصواب بفضل الله وبفضلچ محد غيرني غيرچ چنتي ام الية عوضي انتِ

بقيت مبتسمة واباوعلة حسنين بحضني كاعد ويباوع للكعبة الشريفة بتمعن طفل بريئ بس نظراتة تكول الله شكد عظيم حتى بيتة بهالعظمة

بقينة للفجر كاعدين والكسار كل شوي يصلي ويدعي بهمس حتى الأمن صارو يباوعولة اخر شي صار يبچي وهمَ واحد صار يباوع للثاني مكسور خاطرهم علية چانت حالتة تبچي الندم يأذي ويقهر هواية

اخر شي تعب ضل كاعد ومدنگ راسة
شوي وشفت ايد انمدت بيها مي رفعت راسي شفتة واحد من الأمن

:تفضل اشرب مويه يا أخ

أبتسم واخذة من ايدة
:مشكور يابة

هز راسة وراح شرب من عندة وشرب حسنين

بعد أيام انتهى الحج ورجعنة للعراق الكسار وحسنين لابسين دشاديش بيض واني صاية وحجاب ابيض رجعنة عبالك تطهرنة من كل ذنوب مرتاحين وفرحانين

وصلنة للعراق وطلعنة چان اكو حجاج هواية اهلهم ينتظروهم احنة بالبداية اجو باهر وزياد سلمو على الكسار وحضنو وحسنين هم واني سلمو علية من بعيد اخذو الجنط ومن طلعنة انصدمنة بهالكم الهائل من الناس ناس هواية عراضات اهازيج هلاهل وكلها فرحانة

اخذ حسنين ووكفت على صفحة لأن اجو زلم يسلمون على الكسار شوي واجو خوالي وسيدرا وروان وابو الكسار

حضني خالي فهد يتحمدلي بالسلامة
فهد:حج مبرور وسعي مشكور حجية

:حبيبي ان شاء الله اشوفك حجي

باس راسي واجة خالي جناح حضني بقوة وبعدها سيدرا وروان واخر شي تقدم ابو الكسار باس راسي وكال

اياد:حج مبرور بابا الحمدلله على سلامتكم

ابتسمت وحچيت
:الله يسلمك عمو ان شاء الله السنة الجاية انتَ حجي

اخذ حسنين يبوس بي انتبهت كلش يحبة هواية هواااااية طلع من جيبة ميدالية ذهب خلاها بملابس حسنين ورجعة الية

اياد:انتبهي علية زين البنات يمچ رجلچ ساعة يلا يخلص من السلام بعد

:ان شاء الله

راحو هو وخوالي واني والبنات وكفنة على صفحة عيني على الكسار يسلم ويرجع ليورة شفتة سلم على شهاب وبعدها على 4 اشخاص يشبهون شهاب بشكل مو طبيعي عبالك اخوة الضخامة والشكل نسخة بس واحد منهم چان اضخمهم

اجة باهر وكف يمي يهز بحواجبة
باهر:دعيتيلي؟

:دعيت الله يريح بالك وگلبك وتتزوج الي تحبها

نزل راسة يتنهد
باهر:راحت بعد تزوجت

اختفت ابتسامتي وكلت بصدمة
:شنووو تزوجت؟

باهر:بعدين احچيلك ماكدر هسة

سكتت ضايجة علية ورجعت اباوع للكسار باهر اخذ حسنين مني وراح شفتة حطة بأيد شهاب وهذا ميت عليه يبوس بي وصار كل شوي واحد من الي يشبهون شهاب  ياخذة

نص ساعة ورجع شايلة وشهاب اجة ويا
شهاب:ها مرت اخو اخواني الحمدلله على السلامة

:الله يسلمك يوم الألك ان شاء الله

شهاب:ادعيلي اتزوج وحدة حلوة بعد حجية انتِ

:هواية اكو حلوات بس اختار ويا الجمال الاخلاق هم

شهاب:صح كلامچ حجية

ضحكت ورجعت باوعت للي يشبهو وكلت
:اكلك خوية منو ذولي كلش يشبهوك

باوعلهم ورجع يباوعلي يضحك
شهاب:هذول ولد عمي واخواني هم هذا الضخم كلش اشهب حيدري والي بصفة ايهاب اخو والثاني ايمن هم اخو والثالث شاهين ابن عمنة

:الله يحفظهم

راح يمهم واحنة بقينة واكفين تعبانة ونعسانة اريد بس يجي حتى نروح

بعد ساعة ونص اجة اخذونة بسيارة باهر احنة كعدنة ورة وباهر يسوق وخالو كاعد كدام همَ يحچون واني خليت راسي على الجامة اريد انام بس ما اكدر سووها زفة شهاب وزياد وابن عم شهاب ايمن وياهم كل واحد بسيارة يدگون هورنات ويطبلون وزياد كل شوي رايد يدعمنة لأن يرگص وياهم

خالو طلع من الجامة وعاط بيهم يضحك
فهد:المن الدگ والرگص ولكم جايين من الحج مو حتى حجتهم طيرتوها

ضحكت عليهم مستمرين رغم كلشي
وصلنة للبيت چان اكو طبخ اني دخلت جوة والكسار والباقي بقو برة لأن ناس هواية جايين

حسنين نايم خليتة بالغرفة وطلعت بس طلعت صار بوجهي زياد يهز ايدة
زياد:طالعة چنچ علبة زبادي

:وانتَ طالع چنك واحد مسجون لابس مخطط شبيك

دخل باهر شايل صينية اكل
باهر:لا مو مسجون طالع حمار وحشي

زياد:دوخر لك قرد عيونك يجدحن بالظلمة

باهر:تغار لأن عيونك لونهم اسود

زياد:عسلي مو اسود

:هسةةة كافي فوك مدايخة دوختوني اكثر روحو برة تعاركو عجيب انتو

زياد:طالعين حجية امشي احول

حط الصينية بالمطبخ وطلعو واني رحت للصالة گوة فاتحة عيوني من شافتني سيدرا هيچ نعسانة جرت راسي وحطتة بحضنها

سيدرا:نامي هنا هدوء محد

قبل لا تكمل كلامها غمضت عيوني ونمت
فترة وفتحت عيوني بنعس من حسيت بشخص رفعني شفتة الكسار رجعت نمت محاسة بشي

واني نايمة حسيت بطيف ابيض تقرب يمي وحط ايدة على عيوني خلاني اغمضهم وسمعت همسة طلعت من عندة

:سيعوضك الله بما هو افضل

لساني انربط لزمني من ايدي بقوة واني فتحت عيوني مچان يبين شي بس بياض حتى بصعوبة اكدر اشوف جسمي جمد شفتة راح لحسنين مشة ايدة على راسة ورجعلي يباوعلي ويهمس

:ملاك من ملائكة الله الواحد

لا ارادياً صرت ابچي شفت هالطيف فتح باب الغرفة وطلع وصوت بچيتة بعدها بأذني

فتحت عيوني لكيت خدي مبلل من الدموع وكمت ارجف ادور على حسنين نفس المخبلة وتخبلت اكثر من مشفتة بمكانة صرت اعيط مفجوعة

طلعت من الغرفة اعيط
:ويييييين ابنييييي وينةةةة حسنيييييين

رحت للصالة شفتهم واكفين والكسار شايل حسنين يريد يطلع من الصالة والخوف واضح بعيون من شافني بهالحالة فتح عيونة على وسعهم واجاني يركض يريد يغطي شعري اني مهتميت اخذت حسنين من ايدة ابچي وبصعوبة اتنفس غطاني بجسمة حتى لحد يشوفني بهالحالة

مكدرت اتحمل انرفعت عيوني وجمدت اطرافي واسناني انطبگو هو مبين عرف اجتني نوبة بسرعة اخذ حسنين من ايدي وحط ايدة ورة راسي واني وكعت انتفض

اكثر شي اخاف من عندة الفقدان وفكرة فقد حسنين مكدرت اتحملها

كعدت بعد فترة جسمي يأذيني التفتت وگلبي صار يرفرف من شفت حسنين نايم يمي بنومتة الحلوة مبرطم شفايفة ورافع ايديه تقربت علية ابچي حطيت اصبعي بباطن ايدة بسرعة طبگ ايدة على اصبعي

:ما اعوفك لتعوفني انتَ بعد ماكدر والله بعد ماكدر كافي علية خالتك وابنها وكافي علية فراق خالك

نمت على ظهري اباوع للسقف وابچي دموعي صارت تنزل على رگبتي
:ربي لتفجعني بأبني گلبي ميتحمل خلي من عمري على عمرة خلي ياخذ عمري كلة

انفتح الباب ودخل الكسار تعبان بس شافني تقرب علية وحضني بقوة
الكسار:شصارلچ يحيلي شبيچ فهميني

دفنت راسي بصدرة اشهگ
:واحد اجاني بالحلم كال عن حسنين ملاك من ملائكة الله خايفة يروح مني هم ليش مدافرح اني بشي هااا فرحت برجعة فرح وماتت فرح وعائلتها فرحت برجعة وهيب هاي وهيب صارلة سنة بالمصحة العقلية وهسة حسنين هم يريد يروح مني وانتَ هم حتروح ومحد يبقالي

باس راسي يهديني
الكسار:قل لن يُصيبُنا الا ما كتب الله لنا الكاتبة ربچ يصير وان شاء الله مجرد حلم ماكو شي وحسنين هياتة يمنة يضحك ويلعب وقبل نص ساعة نام لتوسوسين تتعبين

ابتعد عني يمسح بدموعي واني عيونة مورمة من البچي كومني على كيف لبسني حجاب وطلعني من الغرفة دخلني للحمام وضل واكف برة غسلت وجهي وهديت نفسي وطلعت اخذني للصالة بعدهم كاعدين والقلق واضح بوجوهم

كام خالي فهد حضن اكتافي وكال
فهد:شلونها بنتي

هزيت راسي وهمست بصوت تعبان
:اني بخير لتخافون

اخذني كعدني وكعد يمي والكسار كعد يمي بالجهه الثانية
فهد:بوية سيدرا بلا زحمة بس حطيلهة شي تاكلة

رادت تكوم واني هزيت راسي وكلت
:ماريد ما اشتهي لعبانة نفسي

الكسار:ميصير لازم تاكلين حتى لو شي بسيط اني كايم اجيبلچ ومجبورة تاكلين

قبل لا اجاوب كام راحو ويا سيدرا وروان شوي ودخل شايل صينية مليانة حطها بالأرض واجة سحبني من ايدي كعدني وكعد بصفي صار يلفلي لفات ويوكلني واني گلبي يلوب على ابني باوعت لروان وكلت بصوت يرجف

:روان حبابة جيبي حسنين

الكسار:خلي نايم خطية

باوعتلة ابلعم
:خاف مات؟

فتح عيونة على وسعهم وهو طفر خايف شوي واجة شايلة يبوس براسة حطة بحضني وكال

الكسار:مبي شي چنة وردة

بقيت اباوعلة والكسار يوكلني
اخر شي كلها راحت وخالي يوصي الكسار علية واحنة اخذنة حسنين ورحنة لغرفتنة بيومها نومتة بنصنة وكل شوي افز خايفة عشت رعب مو طبيعي

مرت الأيام واحنة كل يوم عدنة كومة ناس بقيت خايفة على حسنين بس الحمدلله چان زين وكلشي مبي وصار يضحك وينام على بطنة شوي كدرت ارتاح

بعد مرور شهرين الحمدلله عرفت اني حامل بطفلي الثاني وچان حسوني عمرة 7 اشهر فرحنة هواية والكسار صار يوزع چكليت بالشارع واكيد رحت لوهيب وبشرتة بالخبر فرحلي هواية

چانت نساوتي نفس من چنت حامل بحسنين هم هرموناتي موتتني وصرت اعشق الكسار اكثر واكثر مرات امنعة يروح للشغل

من دخلت بشهر الخامس انعزمنة ببيت خالي جناح على العشة وچان بيومها حنروح اسوي سونار اخذنة حسنين العصر ورحنة لدكتورتي

فحصتني اول شي وكال
الدكتورة:حملچ ممتاز بس انتبهي على نفسچ انتِ شوي حيتعبچ

:ان شاء الله

كومتني للسونار وصارت تحرك الجهاز على بطني ونفس يوم حملت بحسنين الكسار واكف على راسي شايل حسنين ومتحمس

الدكتورة:جايكم أخو لهالحلو

ضحكت اباوع للشاشة
:ولد؟

هزت راسها تنزع بالكفوف باوعلي الكسار وحط ايدة على راسي فرحان
الكسار:يلا بعد البنية على الجايات المهم سلامة الطفل

:الحمدلله والشكر الف الحمدلله المهم الخلقة التامة

طلعنة من يم الدكتورة فرحانين والكسار حاط حسنين بحضنة ويسوق رحنة لبيت خالي جناح چانت مغرب ولكينة خالي فهد وباهر موجودين كلنالهم على جنس الطفل وفرحو هواية

كعدنة بالصالة وكال باهر
باهر:مبين مراح يصير عندك بنات

عگد حواجبة الكسار وكال مزعوج
الكسار:راح ارمي عليك تفال ترة؟ اريد بنية حتى لو وحدة

كال خالي جناح مبتسم
جناح:يمكن اني تجيني بنية

طفرت بكل ثقة وكلت
:انتَ حامل؟

صفنو بوجهي كلهم باوعت لسيدرا وكلت
:اقصد سيدرا حامل؟

جناح:بعد لتتحمسين اي سيدرا حامل البارحة عرفنة

ركضت بطني شكبرها وحضنتهم ثنيناتهم سوية اباركلهم
:اوووووي الف مبروووك حنولد سوية اني وياكم

گرصني خالي بزندي خربان ضحك
جناح:تولدين ويانة شلون اقنعچ اني مو حامل شلووووون

ضحكو كلهم واني ابتعدت عنهم اضحك
:المهم النية شبيكم

بيومها هواية فرحنة
ورة العشة كعدت بصف خالي وهو حضن اكتافي

:خالو عادي اسأل شي بس متضوج؟

فهد:اضوج من نفسي ولا اضوج منچ حبيبتي كولي

:ليش طلگت زوجتك انتَ مو اخذتها عن حب

ابتسم ونزل راسة يتنهد
فهد:مو الكل يستاهل الحب

:شسوت؟

بلع ريگ يهز براسة
فهد:خليها على الله بابا ماضي مو مهم

هزيت راسي متفهمة
:زين ليش مخليت باهر يتزوج جمان؟ خطية ضل بحسرتها

فهد:ليش باهر مكالچ؟

:شنو؟

فهد:خلي هو يحچيلچ بس اني راح اكلچ الي اعرفة شوفي بابا اهلها يشتغلون بالدعارة اذا امها تغني بالملاهي وابوها يدخل زلم على مرتة واخواتة واخوانها يخلوها تلبس لبس خلاعي كدام الزلم ويدخلون عليها زلم بيتهم بس باهر مچان يقتنع بهالشي واهلها يردون واحد مگرن يتزوج بنتهم حتى يشتغل وياهم وهسة يلا عرف كلامي صح

بقيت صافنة نفس شغل سياف لعبت نفسي منهم
:شلون عرفهم على حقيقتهم؟

فها:خلي هو يحچيلچ

هزيت راسي والتفتت ادور على باهر خليت حسنين بحضن خالي واخذت الكسار ورحنة ندور علية هناك ولگيتة بالحديقة يسمع اغنية ويغني وياها بصوتها الخشن

باهر:طفاچ القدر يا شمعتي خلاني اجر بحسرتي
شلي بهالعمر يا دنيتي محسود على حظي وقسمتي

الكسار حط ايدة على كتفة هو عدل وكفتة وطفة الاغنية حضنة الكسار يطبطب على ظهرة

الكسار:كول الحمدلله الله خلصك باهر

باهر:الحمدلله الف مرة الحمدلله والشكر راضي بحكم الله

ابتعد عن الكسار ورث جگارة وكال يضحك بمجاملة
باهر:اني من شفتچ كعدتي بصف ابوية كلت حيشتغل فضولها وتسأل عني

:اي عفية احچيلي شكو شصاير؟

نزل راسة يدخن وايدة ترجف
باهر:طلعت تضحك علية بنت الكلب

:شلون؟

باهر:طلعت گحـ** الا اكول هيچ

ضربة الكسار على علباتة
الكسار:لسانك ادبسز

:شلون عرفت هي هيچ؟

باهر:تزوجتها وطلع ملعوب بيها لعب

شهگت بصدمة
:تزوجتهاااااا!!

باهر:تزوجتها بالسر كلت اكيد راح تطلع شريفة بس طلعت بايعتها من زماااااان اذا هي بليلة زواجنة عليها علامات قذرة كرهتها وحقدت عليها تحچي بكل برود على خطتها هي واهلها عبالهم اني شخص هين وشخص عادي طشرتهم هي واهلها خليتهم يشردون چانو ناويين يبتزوني وتالي سجنتهم كلهم بتهمة الدعارة وطلگتها الحمدلله الله خلصني عرفت كلام ابوية كلة صح

:الله يعوضك اخوية بالجنسية ان شاء الله تلگة بنية مؤدبة وحلوة ولطيفة وتخبل وتستاهلك وتستاهلها

باهر:دولي ماريد ابقى هيچ احسن

سكتت واضح شكد متأذي منها

رجعنة للبيت طايرين فرح بالطفل لأن ديتحرك

مرت الأيام والأشهر واني دخلت بالشهر التاسع وسيدرا نهاية الشهر الرابع دينتظرون تدخل بالخامس حتى يسوون سونار

بس دخلت بالتاسع بدينة نجهز للطفل وبدينة نختار اسماء چان عاجبني اسم ادم هواية والكسار عاجبة اسم سيف

بيوم كاعدة وكدامي حسنين الي يلعب

اجاني مغص الولادة عطت وحسنين صفن علية
متت من الألم اخذت تلفوني واتصلت على الكسار اخذ شهيق وزفير بس جاوبني عطت

:تعااااال حووووولدددددد

الكسار:جاي جاي

ضل الخط مفتوح واني حسيت نفسي حموت ومن نزل المي صرت ارجف ارجف ماعرف اذا خوف او برد

ربع ساعة ودخل الكسار خايف ويلهث جاب الچنطة وشال حسنين ومشاني للسيارة صرت اعض بأصابعي

وصلنة للمستشفى نزلني وسلمني للممرضات
ولادتي تعسرت ساعتين ونص يلا نزل الطفل شالو ونزلت رجلية احمد ربي لأن منعميت وحشوفة بس ضربتة بچة من سمعت صوتة ارتاحيت نزلت رجلية گلبي يدُگ سريع وبدون ما احس من التعب غفيت

بعد فترة كعدت على صوت بچي طفل شفت الكسار حاطهم اثنينهم بحضنة والصغير يبچي بس شافني كعدت طفر

الكسار:الحمدلله على سلامتچ وسلامة الطفل

مديتلة ايدي وكلت
:الله يسلمك انطيني ابني

حطة بحضني هو مبين چان جوعان باوعت للكسار وكلت
:شنو نسمي؟

ابتسم وگرص خدي
الكسار:ادم مثل متردين

ابتسمت بعمق كلت بتعب
:خلي نرجع للبيت!

هز راسة وراح سجل خروج وطلعنة للبيت
ونفس يوم ولادتي بحسنين كلها اجت وفرحانة على فرحتنة حسيت حياتي دتتعدل

يوم ثاتي سبحنة أدم وحسنين متونس على المي وعلى أدم عبالة لعابة چان أدم عيونة بيهم لون

بعد مرور 3 اشهر
2016/11/19

چنت كاعدة بالصالة حاطة أدم بحضني وحسنين كدامي ديلعب بالطوبة واغني لأدم

:نام نام يا حلو باچر يوم كلش حلو
نضحك ونلعب ونغني
نام نام يا حلو باچر يوم كلش حلو

دخل الكسار شايل اكياس ومبتسم بس دخل ركض حسنين لأبو وحضنة والكسار شالة يضحك يموت على أبو اجة الكسار باسني اني وادم وكعد يمي

الكسار:شلونهم ولدي؟

:زينين ولدك وأم ولدك متسأل عنها؟

باسني جوة أذني وهمس
الكسار:هوَ انتو كلكم ولدي

ابتسمت وهو صار يطلع بالاغراض الي جابهم
واحنة كاعدين حسيت بشعور محلو ابد گلبي صار يأذيني اباوع للكسار مغموتة غمت

صارت ليل صبيت عشة وكعدنة بالصالة نتعشة ونضحك ادم بحضني وحسنين كاعد بحضن أبو يوكلة

بعدها الكسار أخذ حسنين وطلع يشتريلة مثل ممتعود كل يوم واني نومت أدم بالصالة ورحت اغسل مواعين

واني اغسل حسيت بسي صلب صار على خصري ضحك عبالي الكسار يشاقة وياية كالعادة التفتت اضحك بس اختفت ضحكتي من شفت 4 اشخاص لابسين اسود ووياهم بنية

قبل لا استوعب اجت البنية دفرتني ببطني خلتني اوكع واحد منهم لزمني من شعري ونزل لمستواية وكال واني ارجف

:رجلچ وينة؟

حچيت بخوف واني لازمة بطني
:م منو انتو

ضربني راشدي بكل قوتة ودفرني بالأرض نومني على بطني وربطني واني اعيط عليهم ميتة خوف سدو حلگي وراحو دورون بالبيت متت خوف على أدم منو هذول شنو يردون من الكسار

صرت ادعي بداخلي وابچي اتوسل بربي ميصير شي

10 دقايق ورجعو بأيدهم چنطة سودة والبنية بيدها أدم هنا انجنيت صرت اصرخ بداخلي اريد احد ينقذ ابني منهم

كالت البنية
:شنسوي بالطفل والأم ناخذة ونقتلها

ضحك بعلو صوتة وكال بدون رحمة
:اقتلو الطفل وخلي الأم تشوف ...

..يتبعع..

توقعاتكم؟

.
.
.
.
.
.
.
.
.
.

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله