رواية الكسار (سلاسل الغوث) الفصل الخمسون 50 - بقلم لـ ميامي

غالي انتَ بس اخ شطحت؟
طيحة جگاره وبالسجن
رايدها بس ما دنگت
ما اعرف اشيل الطايح ..

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

بدون مراجعة نزلتة
~~~~~~~~~~~~~~~~~~~~~~~~

دموع:صرت من خوفي ماعرف شسوي احچي ويا اريدة ينتبهلي وهوَ بس يباوعلي وايدة تنعوج اكثر وحلگة بدا ينعوج شوي شوي

وهيب:وخري دموع ما ننتظر الأسعاف خلي اني اخذة

دموع:اروح وياك فدوة اروححح

هز راسة حاول يشيلة بس ميگدر الكسار حيل ضخم گوة كدر ياخذة للسيارة
وهيب:روحي صيحي لوداد تجي للأطفال وتعاي

بقيت واكفة بمكاني اتراجف هز راسة وركض يصيح لوداد صعدت ناسية نفسي لزمت ايدة وبس ساكتة ودموعي تنزل دقايق وحسيت بعباية وحجاب انذبن علية لبستهم وحرك وهيب السيارة متوجه للمستشفى

يسوق بشكل سريع
دموع:كسار الله يخليك لتموت اذا صارلك شي اموت وياك والله واطفالك منو الهم ياررررب باوع لحاله وسلمة الية ولأطفالة

طول الطريق ادعي ووهيب يخابر خوالي
لحد ما وصلنة للمستشفى نزل وهيب صاح للممرضين ساعدو واخذو ومجرد دقايق وتأكدنة الكسار ضربتة جلطة

كعدت ابچي وادعي بس هالشي بيدي اجو خوالي كمت على حيلي
دموع:خالووو كسار انجلط على اخو

سحب راسي لصدرة وخالو جناح يعدل حجابي الية
فهد:اششش بنيتي الله يطول بعمرة وان شاء الله يرجع سالم

جناح:انتِ اهدي وصيري قوية حتى من يصحى تعينينة على مصيبتة هاي

فهد:هسة يطلع الدكتور ونفهم ان شاء الله يطلع شي عابر

كدرت اهدأ شوي من كلامة
ساعة وطلع الدكتورتجمدت بمكاني خفت يكول شي مو زين

فهد:بشر دكتور

الدكتور:المريض تعرض الى حالة من الجلطات تسمى الجلطة الصغيرة الموضوع خطر صح بس مو اخطر من باقي الجلطات هاي من اخف الجلطات بس هالجلطة عبارة عن تمهيد للجلطات المستقبلية

دموع:يعني زوجي عايش

الدكتور:عايش بنيتي بس حاليًا حيل تعبان لازم يبقى بالمستشفى لحد متتحسن حالتة

دموع:اني شفت ايدة وحلگة انعوجو؟

الدكتور:اكيد ينعوجون بابا لأن هاي جلطة مهما كانت خفيفة تبقى خطرة

دموع:اكدر ادخل عندة الله يخليك

الدكتور:لازم يبقى شكم ساعة تحت المراقبة وبعدها ننقلة لغرفة

هزيت راسي وراح الدكتور وهيب حضني يبوس براسي
وهيب:الحمدلله على سلامتة متأكد راح يرجع يوكف على حيلة بس ادعيلة

چلبت بملابسة اشهگ
دموع:والله والله وهيب مدعيت عليه بچيت وتأذيت بس مدعيت على الكسار  بشر والله چنت اتمنى حسن يرجع مچنت قاصدة من كلت عسى ما رجع خاف بسببي صار هيچ

وخرني عن حضنة حاوط وجهي يمسح بدموعي وترجع تنزل بقهر
وهيب:اهدي دمع اهدي ليصيرلچ شي يروح اخوچ انتِ مسمعتي شنو كال؟ مو كال صارلة 4 سنوات ميت يعني انتِ معليچ قدر وصار

دموع:باوع اني م مو عصبت كلت عسى ما رجع والله مچنت اقصد شي اسفة اسفة اني دعيت على اخو وأذيتة وطلع ميت من صدگ وهيب گلبي حيوكف

ضل يبلعم سحبني كعدني جاب مي وغسل وجهي
وهيب:دموع انتِ حامل لتجيچ نوبة صرع ميصير بس اهدي لخاطر هالطفل

شربني مي وصرت اخذ نفس وازفرة اهدأ نفسي
بس مكدرت فقدت ابچي والوم بنفسي

ساعة ساعتين مرت ومحد يخلينة نشوفة رادو يقنعوني اروح للبيت بس ماكدر اعوفة هنا وحدة

للصبح وانفتح الباب طفرت على حيلي خايفة طلعو الكسار بسدية محاس بشي لزمت السدية وصرت امشي وياهم وايدي على خدة وابچي

حطو بغرفة واني حضنتة ابچي
الدكتور:اول شي سلامتة الحمدلله تخطى مرحلة الخطر بس يرادلة انتباه هالفترة

فهد:يعني مابي شي

الدكتور:نكدر نكول هيچ

طلع الدكتور سحبني وهيب عنة
وهيب:دموع خلي اخذچ للبيت هسة اطفالچ يخافون وانتِ متصيرلچ الوكفة

دموع:لا ماروح اكعد والله وما اتحرك حتى بس خلوني عندة

سكت شيريد يحچي چان اكو سدية ثانية حتى ينام بيها مرافق المريض اخذني وهيب نومني عليها

وهيب:لعد حاولي تنامين حتى من يكعد يلگاچ زينة ومينقهر

فتح شالي وحطة بصف راسي وغطاني بعبايتي كعد بصفي يلعب بشعري ويردد بأيات من القران لحد مغفيت وكلهم متركونة ولا لحظة

فترة وكعدت چان نايم لبست شالي والعباية واخذني وهيب اغسل ورجعت كعدت بصفة اباوع لوجهة

تنهدت ولزمت ايدة
دموع:كسار انتَ كاعد باوعلي

بلع ريگ ومفتح عيونة تقربت ابچي
دموع:مثل ما انتَ تعرفني اني اعرفك باوعلي كسار

فتح عيونة الي صايرات حمر يباوعلي بس حسيت شي انطفى بي نظراتة باردة مو نظراتة الأولية الي تچوي الروح

نظراتة صارت مثل جمرة چانت ملتهبة بس وصلت حدها وانطفت

مسحت على خدة بهدوء
دموع:انتَ بخير شنو تحس

ما رد اكتفى يباوعلي احتاريت شنو اسوي جابو الأكل ردت اوكلة دار وجهة وغمض عيونة ومن دخل الدكتور يلا حچة بثگل

الكسار:دكتور شوكت اطلع

الدكتور:بس انتظر يومين نچيك حالتك زين

سكت يحاول يحرك ايدة بس چانت يابسة الدكتور كال شكم يوم وترجع ويا العلاج

اضطريت ارجع للبيت لأن حيجون اصدقائة وبيت جُنيد هم ماكدر ابقى بس يروحون ارجع

دخلنة للبيت اني و وهيب وكفنة بمكانة نباوع
چانت وداد حاطة ادومي وحسوني واختها والبزازين بالصالة لابسة قناع مال غوريلا وحتى تثبت انوثتها لابسة فيونكة براسها وتلاعبهم

باوعت لوهيب عاگد حواجبة
وهيب:راح تخبلهم

انتبهت لوجودنة ونزعت القناع تضحك تقربت علينة تطفر هزيت راسي بعدم رضى بعدها مطايبة وتطفر مهامها شي

وداد:ها دموع ها عتوي شلونة ابو حسوني

هزيت راسي
دموع:الحمدلله احسن

وداد:ترى كلت للأطفال بابا شوي مريض مكلتلهم هواية خاف يزعلون وشوي نسيتهم حتى راقصة صرتلهم

ابتسمت
دموع:مشكورة اني تعبتچ وياية

لزمت ايدي تمشيني
وداد:ياااا شنو تتعبيني اصلا عادي واحب اجيكم واني احب الأطفال يلا بسرعة روحي سبحي وارتاحي على ما عتوي البطل يجيبلچ شي تاكلي لأن اني مكدرت اطبخ حتى الأطفال جبتلهم كباب اكلو

هزبت راسي ورحت اريد اصعد التفتت شفتها وكفت كدام وهيب تعددلة وهوَ عاگد حواجبة ويهز برجلة

وداد:جيبلها اكل تاكل وجيبلها لبن لأن اعتقد ضغطها منخفض وجهة اصفر وجيبلها شي حلو خاف سكرها هم نازل

رفعت حاچبي من صارت عيونة على زنودها رفع أصبعة السبابة حطة على زندها وكال

وهيب:منو عاضچ هنا

باوعت لأيديها چان ردن التيشيرت مرفوع بسرعة نزلتة
وداد:من يوم ضربوني شكم يوم ويختفي عادي

وهيب:اييي منو عضچ؟؟

حكت رگبتها بأنحراج راد يحچي وحطت ايدها على حلگة
وداد:لتحچي شي وانسى حباب

دفع ايدها حيل واني كعدت على الدرج اباوع شنو يصير عبالك مسلسل
وهيب:انتِ شبيچ لتلزمين وجهي

ابتعدت خطوتين حاطة ايدها على حلگها
وداد:يااااااا نسيت همزين مبستني چان هالمرة بأيدي الي عبالك صخرة واكسر راسك الك مو كل مرة اسكت اني

وهيب:هوَ انتِ شوكت سكتتي بس تهذرين

وداد:انتَ شبييييك حاط عينك على هالكلمتييييين

وهيب:قصدچ جريدتين؟

برطمت شفايفها وضربتة بصدرة
وداد:خلوني احچي شبيكم وياية هوَ اني ممصدگة لگيت شخص احچي ويا شو مريرة ومتعرف تحچي

وهيب:هسة كوليي منو عاضچ

رجعت تقربت عليه تحچي وتأشر بيديها
وداد:شوف قبل لا اطلع من بيتهم اجة هذا الهتلي الي يريد يتزوجني هددني وعضني هنا حتى العضة نزفت دم الحقير الله ياخذة

وهيب:وشسمة هذا الهتلي

ابتسمت بخباثة
وداد:حتى تحرگة؟ حباب اذا تحرگة اروح وياك اشوف

وهيب:انتِ شبي عقلچ بوية

وداد:كوكب زمردة كلة بعقلي

عض شفايفة وما تحمل دمغها على راسها وراح
وداد: عتوي فلشت راسي بس تجي امردغك تمردغ

هزيت راسي وصعدت اخذتلي ملابس ودخلت سبحت محتارة وافكر شبي؟ليش ميحچي وياية معقولة حملني سبب موت حسن

طلعت مبية حيل لشي مشطت شعري ولبست عبايتي ونزلت جوة لگيت وهيب جايب اكل و وداد فوك راسة تحچي وهوَ يهز براسة

وداد:اي ونسيت هم چانت عندي اخت بس ماتت خطية وامي وابوية ماتو بكورونا وتركنة بيتنة بالشمال واجينة هنا بس تدري دا اخطط بس اخذ شهادتي اخذ اختي واروح اعيش هناك بعيد عن عمامي ايع

وهيب:عندي طريقة مجربة وفعالة حتى اسكتچ بيها ارجع اسويها؟

وداد:اي شنو

تقرب عليها وهيَ ابتعدت برطمت شفايفها وخزرتة
وداد:متستحي دمووووع تعالي اخوچ العتوي طالب تزاوج

هزيت راسي مبتسمة وهوَ يضحك عليها
اجاني كعدني وخلاني اكل

دموع:مخابرو خوالي الكسار اكل لو لا

وهيب:لتخافين اكل حبيبتي

نكتت ايدي وكمت غسلت
دموع:ها نروح؟

هز راسة وكام
وهيب:گرگة انتبهي للأطفال ولو هوَ يراد واحد ينتبه عليچ

مدتلة لسانها
وداد:روح روح المتعصب

سدت الباب وهوَ عض شفتة
وهيب:مال واحد يلزمها ووين اليوجعك

دموع:عوفها شبيك وياها ترى حبابة مدري شبيك انتَ

سكت وبعدها توجهنة للمستشفى
همزين چان الكل رايح بس باهر بالغرفة ومن شافني طلعو هوَ ووهيب

رحت كعدت بصفة
دموع:شلون صرت

ميباوعلي
الكسار:اريد ارجع للبيت

دموع:بس شد حيلك يومين وان شاء الله نطلعك

باوعت لصدرة غطيتة وتحمحمت
دموع:ليش متباوعلي

رفع عيونة علية ونظراتة باردة ابد مو نظرات الكسار هاي
الكسار:فرحانة؟

عگدت حواجبي
دموع:ليش حتى افرح؟ چنت انتظر رجوع حسن مثل مچنت انتظر رجوع اخواني بكل صلاتي ادعيلة يرجع

الكسار:بس دعيتي ميرجع وحسن مات

حسيت حرارتي ترتفع من كلامة
دموع:يعني دتحملني سبب موت حسن؟ اني صرت سبب بموتة

الكسار:ادعي هم ان شاء الله يموت الكسار حتى تخلصين مني

اباوعلة وعيوني مدمعة كلامة حيل قهرني
كمت وحچيت بالسان ثگيل

دموع:اذا دعائي مستجاب من صدگ ان شاء الله اموت اني واخلص من كلشي

ضل يباوعلي بنظرات باردة وگلب بارد مشيت من عندة بخيبة ورجلية گوة حاملتني احس نفسي صرت حيل ثگيلة

طلعت ومديت ايدي لوهيب بدوخة
دموع:وهيب الزمني لتخليني اوكع ويتأذة ابني حتجي نوبة الصرع

ركض علية خايف لزمني وشوي شوي نومني بالأرض حط راسي على رجلة ونزع تيشيرتة حطة بحلگي وباهر اجة لزم ايدية وكعد على رجلية

ثواني وگلبت عيوني وصرت انتفض واسمع صوت وهيب
وهيب:دكتوووور بسرعةةة اختي حامل وبيها صرع

ارتخى جسمي وحسيت بالدم يسيل من خشمي
فقدت الوعي وصرت بس اسمع كلام بعيد

فترة بسيطة وكعدت اذب من راسي وارجف برغم چانت الغرفة حارة ماعرف ليش ارجف

وهيب:الحمدلله على السلامة

هزيت راسي وحچيت بتعب
دموع:ابني مبي شي مو

وهيب:لتخافين الطفل بخير وتدرين كالولي يمكن ولد ممتأكدين لأن جاي على مقعدة بس تكملين السادس يبين

ابتسمت
دموع:نعمة من الله ولد لو بنية

دخل باهر وهيب عدل شالي
باهر:شلون صرتي

دموع:زينة اخذوني للبيت

باهر:متردين تشوفين رجلچ؟

هزيت راسي مبتسمة بقهر
دموع:رجلي ميريدني ماكو داعي لبقائي هنا

باهر:بس ديسأل عنچ لأن يدري وكعتي وميكدر يجي هنا روحي شوفي دموع ترى هوَ مريض ونفسيتة تعبانة ويحچي كلام بس مو من كل گلبة الدكتور كال وضع نفسيته ومراجه يتقلب اعذرو

تنهدت وكمت ساعدني وهيب امشي ورحنة لغرفتة چان كاعد يباوع لأيدة ويحاول يحركها من دخلت رفع راسة يباوعلي

الكسار:ليش تضغطين على نفسچ هيچ؟ شوفي شصاير بحالچ وجهچ اصفر وشفايفچ لونهن ابيض انتِ حامل ميصير تنصرعين

كعدت والدوخة بعدها بية
دموع:مبي شي ابنك لتخاف وهم وهيب يكول شاكين ولد بس ممتأكدين

ضل يباوعلي واني اباوعلة الطفل چان يتحرك موتني من يدفر تضل روحي تشوغ خليت ايدي على بطني وكلت بألم

دموع:وهيب خلي نروح للبيت

الكسار:شبيچ شنو متأذية؟

بلعت ريگي
دموع:ديدفر بية يموت

وهيب:هاي يريدچ تتمددين اليوم كلة مرتاحيتي لازم ترتاحين امشي اخذچ للبيت

الكسار:اذا تردين تبقين تعالي تمددي يمي ونامي

باوعتلة بحيرة ماعرف شنو قصدة ميريد اروح يريدني ابقى عندة شسوي هسة اني اروح لو ابقى

تنهدت وهزيت راسي
دموع:ابقى هنا الليلة بس وهيب شلون بالأطفال

وهيب:اني ابقى عندهم لتشيلين هم بنتي

سكتت بقو لليل وبعدها راحو واجة خالو فهد بقى برة واني عندة جابو الأكل صرت اوكلة بدون ولا كلمة ولا حتى احط عيني بعينة

حيل نعست حرك نفسة شوي وكال بهدوء
الكسار:تعالي نامي

دموع:لا اكو چرباية ثاانية انام بيها ارتاح

الكسار:لتخافين مو بحال اطخطخ بيچ وهم كدامچ مشلول يعني ما اسويلچ شي ادري محرمة حضني عليچ بس هم ما احضنچ

بقيت محتارة نام على جانبة وغمض عيونة تشجعت ونمت بصفة صار وجهي بوجهة بسرعة رجعت غمضت حتى انام

شوي شوي من التعب ومن العلاج كدرت اغفى
للصبح يلا كعدت لگيتة يحچي ويا صورة حسن ومبين يبچي

الكسار:راح ابقى طول عمري عايش بندم لأن ملگيتك صح متت بس انتَ عايش بگلبي وروحي اوعدك يا حسن راح افني حياتي كلها واني اتصدقلك واصليلك وبس اعرف وين مدفون اخذك ادفنك بالنجف بصف امي الحنينة خلي يرتاح گلبها المشتعل عليك واحجز بصفك قبر ومن الله ياخذ امانتة واموت اندفن عندكم لأن انتو اهلي

كمت من عندة طفى التلفون ومسح وجهة سويت نفسي ممنتبهتلة وصبحت علية وحاولت اعدل نومتة

الكسار:لتدنگين اني اعدل نفسي

هزيت راسي وابتعدت لكيت جايبين كلينكس مرطب مسحت وجهة بيهم ورطبت ايديناتة

الكسار:ان شاء الله بس اصير زين نرفع دعوة طلاق

توقفت عن الحركة ثواني معدودة هزيت راسي ورجعت امسح ايدة
الكسار:نبدي هسة بالأجرائات ومن تولدين بعد الأربعين ننفصل

سكتت محچيت شي طلعت من عندة للحمامات غسلت وحهي ورجعت كعدت على الكرسي وحطيت ايدي على خدي صافنة

الكسار:خلي اتأكد اذا بالقانون عادي نتطلگ وانتِ حامل حتى ننفصل محكمة وبعد ولادتچ الشيخ يطلگنة

دموع:ما اعتقد يصير بالقانون لازم اولد

الكسار:ادفع شكم فلس وكلشي يصير

دموع:الي يريحك سوي

مادري شبية بقيت ارجف يمكن انقهرت لأن يريد الطلاق بأسرع وقت لأن محملني موت حسن واني ما الية أي ذنب

دخل خالو تقرب باسني براسي چلبت بيدة
دموع:اخذني للبيت خالو اختنگت

مسح على راسي
فهد:اجيت اخذكم اثنينكم الدكتور سمحلنة نطلعك للبيت بس لازم حركتك قليلة ونفسيتك تتحسن وهم منعت كل الزيارات عنك ماريد احد يغثك

عدلت حجابي وكمت طلعت وكفت بالباب كلت خاف يخجل مني اذا كعد على الكرسي المتحرك واسمع خالو يحچي ويا

فهد:اوصلك لبيتك واخذ دموع واطفالها لبيتي

الكسار:ليش؟؟

فهد:مو متريدها؟ مو مستعجل على الطلاق چنت متوقع حالكم راح ينصلح بس ما اسمحلك تقهرها بعد اكثر من هيچ افهم البنية مريضة بيها صرع وحامل وگلبها من البارحة ممستقرة دگاتة أي قهرة تنقهرها تنصرع ويمكن مندري بيها من يصير هيچ وتوگع على بطنها لو ظهرها والطفل يموت واذا عضت لسانها تموت راح تبقى طول عمرك تاكل بنفسك عليها

الكسار:اني محچيت شي جديد هيَ تريد تنفصل عني ومتفقين ننفصل ليش نأخر الموضوع

فهد:انتَ غبي؟؟؟ دموع حامل هرموناتها هسة لاعبة بيها لعب ومرات تتصرف بدون متعرف الصح من الغلط ليش توافقها الرأي بالأنفصال ومن هسة اكلك اذا صدگ تطلگتو راح اخليك تطلگها 3 مرات حتى بعد تحرم عليك واخذها تعيش عندي وتحلم تشوفها وازوجها احسن واحد

الكسار:بعد احنة مننصلح انتهينة

فهد:گد كلامك؟
تمام طلگها وحق الله يا غوث اخليك تتحسر عليها ومن هسة اكلك خطبوها مني تخلص عدتها منا وازوجها منا

سكت محچة شي مسحت دموعي وبقيت واكفة
دقايق وطلعو مباوعتلة مشيت كدامهم بتعب شگد مرهق هالحمل ياربي اصعب حمل مريت بي ماعرف ليش

صعدنة بسيارة خالو وتوجهنة للبيت
فهد:اشتريت الكرسي الك فترة لازم تبقى عليه لحد متتحسن رجلك وهم دموع عندك تساعدك ولو هيَ روحها متكدر تساعدها

بلعت ريگي وضربت كتف خالو ماكدر احچي احس بشي مثل الصخر صار على صدري باوعلي بالمراية وصف السيارة ونزل حول يمي حط ايدة جبيني

فهد:شبيچ خشمچ طگ دم وجهج انگلب اصفر

حچيت بصعوبة واتلعثم بالكلام
دموع:ب بس اختنگت

حط كلينكس على خشمي وانوب وخرها غسل وجهي ورجعها
فهد:شبيكم فهموني ليش انگلب حالكم گلب

دموع:هسة اصير زينة حبيبي لتخاف

فتح شالي ذبة على شعري بأهمال وبلل رگبتي حسيت نفسي حيل دخت تچيت راسي وصارت عيوني على الكسار يباوعلي بخوف وايدة لازمة ايدي

الكسار:خلي ناخذها للمستشفى شنو منتظرين

مكدرت احچي رجعنة للمستشفى ماعرف ليش صار الموت كدام عيوني وصرت افكر بأطفالي شلون بيهم اذا متت

وصلنة دخلوني للطوارئ والدوخة مستمرة عندي سوو الف فحص والف تحليل وطولنة ساعتين اخر شي طلعوني ولگيت وهيب هم موجود ركض حضني يرجف

وهيب:شبيچ دمعة گلبي راح يوگف عليچ

مابية احچي اكتفيت اطبطب على ظهرة ابتعد عني وصرنة نستمع للدكتورة
الدكتورة:المريضة دتظهر عندها مشاكل هواية بسبب حملها والي بوضعها خطر تحمل چان لازم تراجع قبل الحمل وتچيك وضع الرحم عندها

الكسار:شطلع عندها شبيها

الدكتورة:بعدنة ممتأكدين بشكل نهائي بس اكو شي غريب داخل الرحم وشاكين هذا ورم وخطر يصير حمل بوجودة اذا تأكدت شكوكنة ف ولادتها راح تصير عملية وبعد الولادة بـ6 اشهر نقرر اذا تستأصل الرحم او لا لأن ممكن يكون مسرطن

هيَ تحچي ودموعي تنزل وعيوني تتنقل عليهم
الكسار:زين وهذا الحمل خطر عليها يعني ممكن يأذيها نكدر نخليها تجهضة

باوعتلة بصدمة
دموع:لووو اموووت ما اجهض ابني بصعوبة صار عندي وهسة تكولون اجهضة لا مستحييييل اسويهااا

الدكتورة:حاليًا منكدر نسوي هيچ شي الطفل چبير واذا سوينة عملية الأجهاض بالعكس ممكن تتأذة الأم اكثر من هيچ لازم تتستمر بمراجعة الطبيب وتستمر بعلاجها

الكسار:بس هيَ دتتأذة؟ تدوخ وخشمها ينزف وتختنگ

الدكتورة:اشتريلها هالعلاج صح غالي بس سلامتها اهم

اخذ الورقة منها بس وهيب اخذها من ايدة
وهيب:اخذوها وروحو للبيت اني اجيبة كلة بس انتبهو عليها

لزم ايدي يمشيني على كيف للسيارة وخالو يدفع بالكسار صعدني بالسيارة باس راسي وراح واحنة رحنة للبيت قبلة

الكسار:تحسين بنفسچ احسن؟

هزيت راسي برغم اني ابد مو زينة
وصلنة للبيت چانو خالو جناح وباهر واكفين بالباب وبصفهم داني اخو سيدرا باهر راح للكسار وخالو نزلني حاضن اكتافي ساندني

دخلنة للبيت وبس شافونة حسونات وادومات ركضو علينة يحضنون ويبوسون بينة

وداد ماكو يمكن راجعة لبيتهم
صعدونة فوك وتمددنة بمكانة صار اكو وجع بخاصرتي خفيف

صعد وهيب خلاني اكل وحتى الكسار وكلة ابتسمت عليهم بعدها انطانة علاجنة وطلع من الغرفة

الكسار:بعد الأنفصال اكدر أأمن عليكم بوجود وهيب

هزيت راسي وهوَ انطاني ظهرة وبقى ساكت برغم منايم
دموع:احم اذا الطفل لا سامح الله مات راح تحزن لو عادي

الكسار:ان شاء الله ميموت ويكبر اريدهم يبقون لكبرتي اني معندي احد

دموع:ان شاء الله ورة مننفصل تزوج وخلي مرتك تجيبلك ولد وبنات

الكسار:وانتِ هم بما انُ راح تزوجين قبلي خالچ شايفلچ رجل

دموع:اي بيها الخير

بقينة واحد يحرگ بالثاني
اخذ تلفونة يخابر

الكسار:ها مراد ما اعترفت هالساقطة اريد اعرف حسن وين مدفون
شنو يمكن مقابر جماعية؟؟؟ حسن يندفنننن بمقابر جماعية خليها تعترف وين حسن قبل لا اطيب لأن اذا اجيتها اشلع عيونها واعلگها من **** اريدددد قبر اخوييييية لو حتى من هالشي تريد تحرمنييييي

زعلتني حالتة هواية تأثر بموت حسن انهد حيلة هد
سد التلفون غطى راسة وضل هادئ اعرفة منايم واعرف دموعة دتنزل خليتة براحتة مو هين الي صار ابد

فترة وحسيتة نام هدأت انفاسة واني ردت اغفى بس فزيت على صوتة يحچي بنومتة

الكسار:حسن والله معايفك لتروح حسن ارجعلي

خليت ايدي على زندة فز يصيح بأسم حسن ومن استوعب هذا حلم ضل صافن راد يكوم سند نفسة على الميز وكعد على الكرسي

دموع:وين رايح

حچة بصوت مبحوح
الكسار:رايح اسبح

دموع:تريد اساعدك؟

هز راسة كمت اخذت ملابس اله ومنشف ودفعتة للحمام الفوك جبت كرسي حطيتة جوة الدوش سند نفسة وكعد على الكرسي وطلعت المتحرك برة الحمام علگت ملابسة وساعدتة ينزع

فتحت مي الدوش غمض عيونة بديت اغسل شعرة وبعدها اليف جسمة وهوَ بس ساكت تبللت مي

كملت جبت منشف نشفتة جسمة وثاني نشفت بي شعرة ساعدتة يلبس الملابس وبعدها اخذتة للغرفة مشطت شعرة ورشيتلة عطر

الكسار:تبللتي

دموع:هسة اغير ملابسي

قبل لا ارجعة للچرباية غيرت الفراش ورتبتة يلا رجعتة وبعدها لبست ومن هاليوم الكسار تغير تغيير جذري بس صافن بفراشة ويصلي مرات اكعد من النوم الگى يبچي تدمرت نفسيتة دمار

اكعد الصبح يسوي نفسة نايم وهوَ كاعد بالأكل هوَ ياكل ميريد احد يوكلة بس اني اسبحة لأن ميكدر ويبقى طول الوقت معصب وضايج

بعد اسبوع وضعة شوي تحسن بس بعدة ميكدر يمشي يكول رجلة تأذي حيل وهوَ متعود الظهر يسبح كل يوم اخذة اسبحة

اليوم ومثل كل يوم بدون ولا كلام اخذتة حتى اساعدة يسبح
الكسار:اعرف داتعبچ وياية ادعي بلكت الله اموت

توقفت عن الحركة
دموع:ليش تحچي هيچ

الكسار:حتى تخلصين مني

دموع:ماريد اخلص منك منين تستنتج هالشي

سكت غسل جسمة بسرعة وسحب المنشف
طلع من الحمام بالكرسي المتحرك واني ورة حاطة ايدي على ظهري گوة امشي دخلت للغرفة

دموع:شبيك

مجاوبني لبس اي شي مزعوج وراد يروح للچرباية
دموع:مزعوج مني لو شنو

الكسار:اريد هدوء

دموع:دااااحچييييي وياااااك

بسرعة باوعلي بخزرة
الكسار:لتعيطييييييينننن

حيل عصبت سحبت اول شي صار كدامي ڤازة صغيرة وذبيتها بالأرض تطشرت وصرت اعيط

دموع:معليييييةةة بمووووت اخووووك تريييد تموتنيييييي انتَ صارلة 4 سنوات ميييييت اني شعليةةةة قابل اني قتلتة

اني اعيط وهوَ يباوعلي ساكت ومن راد يحچي انتبه لرجفة جسمي سحب نفس وزفرة بكل برود

الكسار:ماريد اشوفچ

بهتت ملامحي ودموعي بسرعة رادن ينزلن ومنعتهم سحبت نفس عميق وباوعتلة ارجف من القهر والعصبية وگلبي يأذيني

دموع:ادعي الله كون بالعملية واموت واخلص من هالعيشة الي جبتها ضيم بضيم وحتى الي ردتة عون خان وهسة صاير ابو الراهي اذا مو بهاي العملية ان شاء الله بعملية الرحم اموت حتى بعد صدگ متشوفني

رحت للكنتور ارجف وگوة واكفة اخذت ملابس البسهم وبطانية تلفوني وعلاجي وباوعتلة قبل لا اطلع

دموع:ادعي انتَ هم وياية بلكت اموت واخلص مليت من هالعيشة ومن كلشي ديصير اني تعبت كون هسة انام وبعد ما اصحى

خليتة ساكت بس يباوعلي طلعت وسديت الباب نزلت للغرفة الي نامت بيها وداد دخلت وقفلت الباب بيومها دعيت على نفسي وابچي اريد موتي يتحقق

صح هذا يعتبر جزع بس من تعبي مكدرت اتحمل
اخذت علاجي وبقيت كاعدة گلبي يعصرني عصر

اخذت تلفوني ودخلت على كاميرات غرفتنة وشفتة بعدة بمكانة صافن سديتهم وبقيت بالغرفة مطلعت منها بعد

للمغرب وصلتني رسالة من عندة كاتب بيها
الكسار:ما احملچ ذنب مو ذنبچ انتِ معليچ بموتة حسن كل قصدي چان ماريد تبقين يمي خايف تتأذين مني بكلامي وافعالي اني بفترة صعبة ماعرف الصح من الغلط اريدچ ترتاحين مني لتجين يمي

بس قريتها سديت التلفون ونمت مشاعري ملخبطة وتعب گلبي يزيد
ثاني يوم طلعت من الغرفة اخلص شغلي وابد مصعدتلة اشوفة من الكاميرات  يحاول يمشي ويطلع من الغرفة يروح للحمامات ويرجع

من صار وقت اكلة خليت حسنين يصعدة اله وخليتة ياكل مو ميريد يشوفني اني اقوم بواجبي بدون ليشوفني

بس كمل اكلة راح يسبح ومن رجع للغرفة بقى صافن وبس
العصر اجت وداد جايبة كيكتها العالمية الي متعرف تسوي غيرها بس كلش طيبة

وداد:تدرين دموع قررت اخذ اختي وارجع للشمال بس لازم اول اخلص من قضية عمامي

دموع:لا لتروحين ابقي يمي ليش رايحة

وداد:مو اعرف عمامي مراح يتركوني براحتي وهناك مجمع سكني محد يگدر يأذيني

دموع:ترى حتى هنا حيخلوهم يكتبون تعهد ميحتكون بيچ بعد ولا بأختچ

حركت كتفها يعني مادري دخل وهيب مستعجل وهيَ باوعتلة ودارت وجهة
وداد:حبيب عمتي العتوي

باوعلها وگلب عيونة
وهيب:عود بوسيها الية خوش

شهگت وكامت تلعلع
وداد:يمتستحي يا حقير بدون خجل تريد عمتي المتزوجة عيب عليك

ابتسم تك خد وتقرب علينة حاط ايدة بجيبة
وهيب:هسة دتشوفين اني بحال عمتچ؟ هيَ أصلًا محبتني مجرد ونسة بقت وياية واول رجال راحت تزوجتة اني صح حبيتها بس من فكرت بغيري طلعتها من گلبي لأن اني ما اصير احتياط

راحت وكفت كدامة
وداد:يعني نسيتها ومتحبها بعد

وهيب:لا احبها ولا احب غيرها اني عايش لنفسي ولدموع

عبست وجهة ورجعت كعدت راح وهيب رجعت كعدت يمها وهيَ كلش ضايجة حتى مبقت عندي شوي وراحت كالت اريد اروح اشر الملابس على السطح

دخلت للبيت لگيت وهيب يكتب ماعرف شنو ويخابر
وهيب:نحتاج حليب وچبس ليز وماكس هالأثنين بسرعة يخلصون ونوصي لحم وصدور دجاج ومثلجات روح چيك بعد بالمخزن وشوف شنو محتاجين

سد التلفون واني لزمت ايدة
دموع:اكلك تصعد وياية للسطح؟

وهيب:ليش

دموع:شسمةةةة ااا مادري اريد اشتم هوى تصعد وياية

انطيتة نظرة بريئة ابتسم وهز راسة
صعدنة اني ويا للسطح چان الجو حلو شوي

باوعت لبيت وداد وابتسمت من شفتها ندست وهيب بأيدة
دموع:شوفها شلون حلوة وحبابة

راحت عيونة عليها هادئ چانت لابسة تراك هيلوكيتي ورافعة شعرها ومبينة رگبتها وتحاول تشر الملابس بيد وحدة

سند ايدة على السياج وورث جگارة يدخنها وعيونة عليها
دموع:شنو رأيك بيها ترى هيَ بنية حبابة

وهيب:وين تردين توصلين دموع

دموع:يعني اكول بلكت يحن گلبك وتحبها ترى حيل لطيفة وتنحب وانتو لايگين على بعض

وهيب:دموع تردين اظلم البنية وياية؟ اني مريض افهمي هالشي

دموع:وداد تحبك

وهيب:اعرف اني مو غبي بس صعبة نرهم حيل صعبة البنية حلوة وحبابة بس اعرف بنفسي راح اأذيها وهيَ مو فار تجارب حتى اجرب بيها مرضي نظراتها فاضحتها وضحكتها وياية ورجفتها من اتقرب عليها حلها تدل على حبها الية

دموع:واذا هيَ قابلة

وهيب:اني مستحيل اقبل شوفيها شلون تضحك شلون اخذها واطفي ضحكتها على ايدي حتى حرام علية خليها تحبني شكم يوم وتنساني ولا تتعذب وياية وتخلص حياتها بقهر

باوعتلها لگيتها ترش مي على مريرة وتضحك
دموع:انتَ شنو تحس اتجاه وداد

وهيب:حسبتها حالها حالچ اختي اعرفها محتاجتنة

گرصت ايدة
دموع:واختك تبوس بيها من حلگها

ضحك ورجعلي الگرصة
وهيب:بس حلوة بوستها

فتحت عيوني بصدمة
دموع:بعد ممنوع تمشي ويا باهر سمعت لولا فسد اخلاقك كلش

ضل يضحك واني ضحكت على ضحكتة
وهيب:شوفي جبتلها كاجو اذا اجت انطي الها چنها سنجاب بس الفرق هيَ تاكل كاجو

هزيت راسي ونزلنة
مرت الأيام بعدها مثل الجحيم مصعدت فوك ابد بس اشوفة بالكاميرات وادز الأطفال علية ياخذولة اكل ويسولفون ويا وهوَ لو ينام لو صافن وكل يوم يطلع يسبح ويرجع

چنت اشوف عيونة دوم على الباب حسيتة منتظرني بس مكدرت اروح اكتفيت اقوم بواجبي من بعيد

من ينام ادز اطفالي يجيبون ملابس الية واخليهم يرتبون الغرفة ويعطروها حسيت هيچ افضل النة

مر اسبوع وحالتة تحسنت بس چان مكتئب وكاره نفسة وحقة محد يلومة
دخلت للغرفة وقفلتها حتى انام باچر احد وخوالي حياخذون وداد للمحكمة علمود قضية عمامها

كعدت ثاني يوم على صوت الجرس يرن باوعت للساعة چانت عشرة الصبح محد بالبيت وهيب راح للمحكمة وياهم

لبست حجابي وكمت باوعت بالكاميرات شفت رجال لابس بنطرون وقميص وبيدة اوراق استغربت منو هذا

طلعتلة بعد ما غسلت وجهي فتحت الباب سلم وكال
:هذا بيت 17 بيت السيد غوث اياد

هزيت راسي مفاهمة شي قدملي ورقة وكال
:وقعي هنا انُ انتِ استلمتي

اخذت الورقة ووقعت
دموع:ورقة شنو هاي ممكن افهم

:هذي دعوة طلاق رفعها السيد غوث اياد...

.

يتبعع

ضيفو حساب الانستا وقناة التلي