رواية الكسار (سلاسل الغوث) الفصل التاسع وأربعون 49 - بقلم لـ ميامي

ترا الوادِم بچَفة
و ضِيمك بچَفة
يَـ تابوت العِزيز
الضَال وَسط البِيت
عليّ ضَلتك كَلفة
و روحِتك كَلفة

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

بنهاية البارت اكو اشباه🤍
~~~~~~~~~~~~~~~~~~~~~~~~

دموع:تقرب وهيب يتأكد من جثة هالشخص ايدة ترجف وسمعتة همس

وهيب:لتموتين واني قاهرچ

جملتة فززت كل ذرة بية كمت بس اريد اشوف اريد بس استوعب مديت راسي وبس عرفت صاحب الجثة غطيت وجهي اصرخ من رهبة الموقف

دموع:لاااا وداد لاااااا

راد گلبي يطلع من مكانة متمددة بباب بيتنة الوجه كله ازرگ شعرها بي فراغات وبيدها طابوگة صغيرة جسمها مزورگ

رجعت اباوع وابچي وهيب لزمها يتأكد من موتها ايدها عبالك بدون عظم رفعها وصارت تتحرك راسها ينزف سودة علية

الكسار صار كدامي حتى لا اباوع وسحب راسي ضم وجهي بصدرة
الكسار:لتباوعين اششششش

بعدتة عني اباوع وارجف وهيب حط ايدة على گلبها
دموع:ميتةةة وهيب ميتة لو عايشة

حط ايدة على حلگة
وهيب:اشششش خلي اسمع

حط راسة على گلبها وصار يسمع بتركيز ثواني وفز شالها بحضنة
وهيب:عايشة گلبها ينبض بس انفاسها ضعيفة

يمة شصار بية بهذا الوقت افرح لو ابچي احتاريت الكسار جاب السيارة صعدوها واخذوها للمستشفى مكدرت اروح الأطفال وحدهم كعدت بالصالة واحس روحي رايحة عليها

دموع:شصارلچ وداد يمة وين اختچ منو مسوي هيچ ياربي ساعدها يارب

نص ساعة وسمعت صوت الشرطة باوعت للكاميرات شفت خوالي نسيت نفسي صعدت بسرعة لبست عباية وحجاب ونزلت فتحتلهم الباب ابچي دخل خالو يخابر حضني

فهد:احنة وصلنة انتو بس طمنونة عليها هسة ادزها ويا باهر

سد التلفون واني حچيت
دموع:خالو قتلوها مكسريها ممخلين شي بيها شعرها الحلو رايح عيونها مورمة همزين گدرنة نعرفها

فهد:اهدي انتِ مريضة البنية بالمستشفى وهسة يسوولها اللازم
تعاااال باهرررر

دخل باهر هم خايف
باهر:انتو متأكدين هيَ هاي ام لسان؟

هزيت راسي
باهر:واختها وبن بس لا هم مكتولة

دموع:ماعرف باهر هيَ صارلها 3 اسابيع مختفية يمكن عمامها سوو هيچ

فهد:من تكعد نفهم منها بابا بالمستشفى يحتاجوچ راح ياخذچ باهر الهم بس انتبهي على نفسچ البنية لازم تدخل وياها بنية اهدي وانتبهي على نفسچ يلا باهر اخذها وابقى هناك اي شي جديد احچيلنة

رحت ركض صعدت بسيارة باهر والطريق مطر ورعد يخوف
باهر:انتِ كلتي عمامها ليش؟

دموع:ما تذكر عمامها شسوو بيها؟ من كسرو ايدها بس حتى تتنازل كلشي يسوون خايفة على اختها المسكينة

ساق اسرع وآني ادعيلهم
وصلنة للمستشفى دخلوني يمها لأن يردون شخص وياها بس ياريت ما دخلت لگيتهم منوميها على بطنها ويعقمون ظهرها الي ميبين حرفيًا طگع كبار لونهن ازرگ وبنفسجي واكو جروح يابس عليهم الدم

دموع:طمنيني

جاوبت وهيَ تلف ظهرها
الممرضة:عايشة بس فاقدة الوعي تمامًا الي مسوي بيها هيچ هذا بدون رحمة بس ما عرفنة اذا معتدين عليها لو لا وماعدنة تصريح حتى نفحصها ننتظر تگعد ويصير خير

دموع:لا يمة اسم الله ان شاء الله ماكو هيچ شي

هزت راسها ورفعتها على كيف نومتها على ظهرها ورجعت حطت المغذي بالكانونة وبدت تنظف الجرح الي صاير من صدرها لحد بطنها والدم يابس 

تقربت خليت ايدي على راسها ابچي
دموع:بس الله اليعلم شنو عانيتي والله اخليهم ياخذون حقچ وحق اختچ

لفت جروحها وشدت راسها لأن هم متأذي وتركتها تصحى على راحتها كعدت بصفها حاطة ايدي على خدي وصافنة

كمت طلعت حتى اطمنهم لگيت وهيب بوجهي مو انفتح الباب مد راسة يباوعلها بس شاف جزء من جسمها ظاهر دار وجهة

سديت الباب وباوعلي
وهيب:ها دموع شلونها

دموع:ماعرف شكول وشحچي البنية حيل متأذية ظهرها عبارة عن جروح واكو جرح حيل چبير من صدرها لحد بطنها ومبين شخص متعمد يجرحها وانتَ شفت وجهة بعد

ابتعد عني حاط ايدة على راسة ويروح ويجي
وهيب:بسببي هاي بسببي صار هيچ بسببي راحت وصار بيها هيچ

حالتة صارت تخوف يضرب على راسة ويصيح
وهيب:اطللعععع من رااااسيييي بسببك انتَ خليتني اسوي هييييييچ

دموع:وهيب شبيييك

لزمو باهر والكسار يهدون بي ضرباتة على راسة حيل قوية دفعهم وكعد هادئ حاط ايديناتة على راسة ويتنفس سريع

مكدرت ابقى رجعت دخلت يمها انتظرها تكعد
اكو كراسي جمعتهم وتمددت عليهم ميصير ابقى هيچ

حسيتها تحركت طفرت على حيلي چانت تفتح عيونها وترجع تغمض
رحت اصيح للطبيب صارو كدامي كلهم

دموع:كعدت صيحو للدكتورة

راح باهر يركض واني رجعت يمها سودة علية عينها حمرة مبين مضروبة عليها صارت تبلعم تريد تحچي

اجت الدكتورة فحصتها وطولت يلا حچت
الدكتورة:لا الحمدلله زينة بس تعبانة خلوها شوي تصحصح حتى ناخذها تتجبر ايدها لأن مكسورة بس لتضغطون عليها

طلعت واني غطيتها زين وصحتلهم يدخلون بس دخل وهيب برطمت شفايفها ودارت وجهة عنة وهوَ بس صافن عليها

تقرب الكسار كعد كدامها
الكسار:تسمعيني؟

هزت راسها رجع كال
الكسار:شصاير منو سوة هيچ بيچ

صفنت ثواني وعبالك تذكرت شي رادت تكوم بخوف بسرعة لزمت الغطة حتى ليطلع منها شي

دموع:لتكومين وداد اهديي

لزمت ايدي بتوسل
وداد:د دموع مريام مريام عندهم بقت باچر يردون يعقدون قرأنها على ابن عمي

باوعت للكسار تبچي وتناشغ
وداد: ساعدوني الله يخليكم اني بشاربكم  ضربوني وضربوها متعرف شنو زواج والله شنو تردون انطيكم بس ساعدوني

باهر:بس اهدي رايح اجيب ضابط التحقيق واجي خلي ياخذ اقوالچ واحچي كلشي بدون متنقصين أي حرف

راح بسرعة يجيبة واني بس اغطي بيها
اجة ضابط وصار يسمع منها وهيَ تحچي وتبچي واني وياها دموعي تنزل

وداد:خابروني وكالو تعالي عدنة عرس ابن عمچ اخذت اختي ورحنة هناك بعد العشة تجمعو كلهم علية وجابو اثنين من ولد عمامي وصارو يختارون بينة اني مچنت فاهمة شي بس الصدمة من كال ابن عمي اني اريد الصغيرة قصدة على اختي والثاني كال يريدني اني هنا استوعبت ورفضت عيطت عليهم وضربتهم بس مكدرت كلهم تجمعو علية يضربوني اني واختي

بقو ساعتين يضربون بينة لحد ما تعبنة شالونة وحطونه بغرفة ظلمة وصارو كل يوم تعذيب شكل ضربو راس اختي بالأرض واني ما بيدي شي عليها كل ما ارفض يزيدون بالضرب وهيچ بقينة 3 اسابيع يحاولون يقنعوني واني ارفض

اليوم العصر دخل ابن عمي يضحك وكال باچر اتزوج اختچ كدام عيونچ بقيت الوب عليها نايمة بالأرض الباردة والدم ينزل من حلگها ماعرف شلون الله لطف بحالي وحنن گلب عمتي علية وشردتني نص الليل

اخذتني بسيارتها وذبتني بالمنطقة وكالت كولي للشرطة وارجعي لأختچ وراحت مكدرنة نشرد اثنينة لأن خفنة اذا اخذنة مريام تصرخ ويخرب كلشي

بس راحت عمتي برغم مابية امشي بس مشيت گوة ورحت لأول بيت اجة ببالي دگيت الباب من تعبي چانت دگاتي مو قوية اخذت طابوگة وهنا خارت قواي تمددت گوة اتنفس وصرت احاول ادگ بالباب لحد اخر شي فقدت وكعدت لگيت نفسي هنا

هيَ تحچي وعيوني على وهيب الي عيونة تسود شوي شوي حسيتة خطط لشي

باهر:انطينة عنوانهم فورًا

انطتهم العنوان خابر لخالو وراحو الشرطة
الكسار:وهيب تگدر تبقى هنا؟ لازم نروح ماكدر اخليهن وحدهن راح ادز زياد وياك

هز راسة بشرود وراحو الكسار وباهر
كعدت بصفها اهدي بيها وهيَ حطت ايديها الي بيها الكانونة على وجهة وصارت تبچي بغصة وقهر

وداد:دموع الدنيا شكبرها وما گدرت تلمني

اخذت راسها لصدري ابچي لبچيها
دموع:لتخافين تهون والله ياخذون حقچ منهم كلهم

وهيب:منو صاحب الفكرة؟

باوعنالة اثنينة
وداد:يا فكرة؟

تقرب حط ايد على مخدتها ونزل نفسة عليها يحچي بغضب
وهيب:منو صاحب فكرة زواجكم؟

وداد:عمي

وهيب:شسمة

وداد:رياض ابو علي

ابتسم وهز راسة
وهيب:نامي راح اخلي منين ميلتفت يشوف نار والله لصيرله جهنم واحرگة

مسحت دموعها وكالت شفايفها ترجف
وداد:رجعولي اختي

وهيب:راح يجبرون ايدچ وبعدها نامي من تكعدين تلگين اختچ يمچ

وداد:وعد يا عتوي؟

ابتسم ونقر على انفها
وهيب:وعد يا كاجو

اباوعلها بقت ترمش بعيونها وفاكة حلگها فك مو مبتسمة حلگها حينشگ ابتعد عنها وخابر وصار يحچي

وهيب:باهر تريد تتونس؟
تعجبني اني جاي الكم والله اليوم اونسكم كلش زين

سد التلفون وطلع بدون ميهتم لشي من الصدمة بقيت ساكتة حتى مگلتلة وين رايح وهاي الفطيرة نست شسوة وياها وتسرسحت

بقى يمنة زياد اخذناها جبرنة ايدها وانطوها مسكن ومخدر ونامت خطية بس نومتها تموت ضحك تحچي بنومها وكل شوي مكشفة نفسها واني اغطيها

تركتها وكمت رحت لزياد
دموع:ماكو خبر منهم

زياد:لا بعد ويمكن يطولون لازم ياخذون أمر تفتيش ومذكرة اللقاء قبض وعلى ما يروحون ويلزمونهم هوسة هوسة روحي نامي انتِ اذا صار شي اكعدچ

هزيت راسي ورجعت دخلتلها تمددت على الكراسي وصرت اسمع كلامها
وداد:عماد الخيخة لو تموت ما تزوج مريرة

سكتت شوي وسمعتها ضحكت تخوف
وداد:هنيالچ مريرة هنيالچ

عگدت حواجبي مفاهمة عليمن هنيالها والبنية محبوسة
دموع:عليمن هنيالها ولچ

بلعت ريگها مبتسمة
وداد:وهيب يحبها هنيالها يحچي وياها

فكيت حلگي بصدمة وهيَ عبست وجهة
وداد:بس اني يكرهني ماعرف ليش

كسرت خاطري واضح حاز بخاطرها تعامل وهيب وياها
خليت وغفيت ماكدر ابقى كاعدة اكثر من هيچ

فترة وكعدت على اصوات فتحت عيوني لگيت مريام ووهيب كدامي كاعدين بالأرض وهيَ تلعب بيدة وتردد

مريام: Yellow Tomcat

وهيب:انتِ تكولين القط الأصفر واختچ العتوي منين اتلگاها

ابتسمت وكمت
دموع:شوكت جبتوها

رفع راسة شافني وكام باسني بخدي
وهيب:صح النوم قبل ساعة جبناها

نزلت نفسي عليها مبتسمة حطيت ايدي على شعرها
دموع:مريومة شلونچ

سحبت ايدي تلعب بيها خطية چانت متأذية بس مو بگد وداد وداد حيل متأذية وفوك كلش صار ضغط نفسي عليها لأن يهددوها

اباوعلها صارت تلعب بأصابعي
مريام:lotus

ابتسمت اكثر
دموع:اني؟

مجاوبت ولا حچيت بعد چان قصدها اني زهرة اللوتس
وهيب:لو تكعد اختها تشوفها متقبل الممرضات يتقربن منها لازم يشوفون خاف جسمها متأذي

تركتة ورحت اكعدها نومها ثگيل ويضحك اكول اسمها وبس تتحرك واني لازمة غطاها لتتكشف

وهيب:اني طالع لبسيها لتنسين

خلة وطلع گوة مدرت اكعدها ومن شافت مريرة بقت ترفرف لبستها من الملابس الي جايبهم وهيب وهيَ طفرت على اختها تحضن بيها وتبوس لو تضربها مشاعرها معوقة

خليتها تاخذ راحتها وطلعت لگيتهم واكفين واحد بعيد عن الثاني بس وهيب كاعد وحاط رجل على رجل والبقية يباوعولة مصدومين

أشرلي الكسار اجي رحت مستغربة لزمني من ايدي بعدني عنهم شوي
دموع:شكو خوفتني

باوع لوهيب ورجع باوعلي
الكسار:دموع اخوچ بعدة عندة اضطرابات

دموع:شلوون!!

الكسار:لازم يكثر روحاتة للطبيب النفسي هوَ يسمع بس منچ من نرجع احچي ويا

دموع:ليش تكول هيچ شفتو شي على وهيب

الكسار:أصر يروح ويانة واحنة أصلًا مچان لازم نروح لأن هذا شغل الشرطة بس رحنة سأل عن اسم رياض ابو علي وطلعله رياض مكلبشين ايدة قنع باهر يحچي ويا الشرطة وباهر مخبل حچة وياهم ماعرف شنو وهزو روسهم يضحكون

چان المطر متوقف اخوچ جاب كراتين سواهم على شكل دائرة ورش عليهم بانزين وحط عم وداد بالنص وشعلهن بدون ما يحترگ بس هم ميكدر يطلع وكعد يدخن ويضحك وانوب كل ما يردن ينطفن باهر يحيب بعد وترجع تشتعل لحد ما الشرطة وقفو هالشي واخذو رياض للسجن هوَ وولدة والكل

هوَ يحچي واني حاطة ايدي على حلگي
دموع:اني اتعوذ اذا اجتمعو هوَ وباهر بس نرجع للبيت احچي ويا

الكسار:هوَ يمكن حالتة النفسية تتراجع هالفترة ما نريدة يرجع للصفر

التفتت اباوعلة يسولف ويا باهر وهذاك فرحان بسواية وهيب
دموع:لازم نقنع باهر هم يروح طبيب نفسي

الكسار:والله كلنا يرادلنة روحة للطبيب النفسي

باوعتلة
دموع:واني اولهم والفضل الك طبعًا

عض شفتة بتحلف تركتة ورجعت لوداد وهيب دخل وياية
وهيب:الحمدلله على سلامتكم

ابتسمت ابتسامة بشوشة
وداد:الله يسلمك

ثواني وعبست وجهة وبرطمت شفايفها
وداد:لا ماريد الله يسلمك چذب

تقرب عليها
وهيب:شنو هسة يلا تذكرتي الزعلة

حطت ايدها على حلگها تضحك
وداد:ايي

تذكرت الزعلة رجعت دارت وجهة عنة
وداد:وكعت من عيني انتَ

وهيب:عادي لخاطر كاجو نرجع نتسلق ونصعد لعينچ

البنية راحت بيها ماعت احتارت تبتسم لو تسكت
اندگ الباب ودخلت مرة يجي عمرها بداية الثلاثين نسخة عن مريام تجنن اني صفنتني

وداد من شافتها بچت وفتحت ايديها اجت المرة حضنتها تبچي وياها
منى:اجيت بالختلات شلونچ شلون صرتي

وداد:زينة كدرت اخلص منهم وهذا اهم شي

منى:تجهزي ترى وراچ محاكم وان شاء الله القضية تكسبيها انتِ

وخرت عنها وباوعتلي
منى:اني اتشكركم اخواني الطمع عمى عيونهم وانتو وكفتو ويا هاي اليتيمة شكرًا الكم محد يسوي الي سويتو و...

صارت عيونها على وهيب وسكتت قاطعة تنفسها استغربت شبيها بس استغربت اكثر من باوعت لوهيب ولگيتة متحمد بمكانة وعيونة عليها

وهيب:منى؟

ابتسمت وتقربت وكفت كدامة وعيونها تلالي بالدموع
منى:وهيب!! ممصدگة بعد سنين طويلة ارجع اشوفك

بلع ريگة ونزل راسة متوتر
وهيب:شخبارچ؟ اخر لقاء بيناتنة چنتي راح تنخطبين

منى:تزوجت وصار عندي 3 اطفال علي ومحمد وفرح

تجمد بمكانة من نطقت اسم فرح
وهيب:سميتيها فرح؟

هزت راسها
منى:بعدني عند كلمتي حتى لو مصارت بنتك بس وفيت بوعدي وبنتي صار اسمها فرح

سكتو واحد يباوع بعيون الثاني ناسيين وجودنة منى دموعها تنزل ومبتسمة بوجه وهيب وهوَ متصنم

باوعت لوداد عاگدة حواجبها رفعت ايدها وجرت ايد وهيب
وداد:اطلع يا عتوي يلا اطلع

فرك وجهة وطلع واني ورة تركتهم وحدهم لزمتة من ايدة واخذتة بعيد احچي ويا

دموع:منو هاي

رفع راسة ورجع باوعلي تنهد
وهيب:طلعت عمتها دموع منى عمة وداد

دموع:منو منى ومنين تعرفها

فتح قميصة من فوگ مختنگ وجاوبني
وهيب:عمتها چانت حبيبتي

دموع:شنوووو يعني هاي نفسها الي حچيتلي عنها!!

هز راسة
وهيب:مچنت متوقع راح نرجع نلتقي هيَ تزوجت واني انسجنت واحد نسى الثاني

دموع:متأكد نسيتها

وهيب:نسيتها

بقيت اباوعلة ماعرف اذا يحچي صدك لو يضحك علية عاف المستشفى كلها ورجع للبيت وخلاني بصدمتي عمتها راحت واحنة بس صار المغرب اخذنة البنات لبيتنة لأن ميصير يبقون وحدهم على الأقل شكم يوم

خليتهم بالغرفة الجوة نامو ورحت سبحت وصعدت انام حيل تعبانة نومة المستشفى ابد مو مريحة

بس وين اكدر ارتاح بس كعدت من نومتي شفت شي يقهرني حضنت نفسي وصرت ابچي مقهورة

دخل الكسار رفعت عيوني اباوعلة وهوَ عگد حواجبة
الكسار:شكو

ذبيت التلفون علية ورجعت ابچي
دموع:طلگني وريحنييييي ما اتحمل كل يوم يوصلني شي عنك حرام عليك الي بية مكفيني تجي عشيقتك تدزلي صورك تتغزل بيك وبجسمك

الكسار:يعني هذا الي قاهرچ؟ يطبها مرض خلي تتغزل المهم اني شنو اريد ومنو اريد

دموع:عوفني وحدي

الكسار:دموع

دموع:عوفني

هز راسة وطلع من الغرفة نشفت دموعي بعيوني اخذ تلفوني ويا
مليت من البچي والقهر كمت غسلت وجهي ونزلت رحت لوداد لگيتها كاعدة ضايجة واختها تلعب ويا البزونة

دموع:شلون صرتي عيني

ابتسمت
وداد:زينة بس ايدي تأذيني

دموع:طبيعي لأن مكسورة ان شاء فترة وتصيرين زينة

وداد:وينة اخوچ ابو النظرات

دموع:بالصالة تردينة

أشرتلي اتقرب تقربت وهمست
وداد:شنو اكو بينة وبين عمتي

دموع:مابيناتهم شي لتفكرين

وداد:بس نظراتهم كلها اشتياق چان يحبها؟

حركت كتفي يعني مادري ماريد اتدخل بهالأمور
اندگ الباب ودخل باهر مد راسة

باهر:هلا بالصاكات

وداد:اهوووو هم انتَ

باهر:اي نعم اني خاف معاجبچ

وداد:لا معاجبني ابد

باهر:صاگة بس لسانچ لسان حية دموع يلا تعالو تعشو

كال هيچ وطلع
دموع:اجيبلچ هنا لو تجين وياية

وداد:لا وياچ اني ما استحي عادي

ضحكت عليها كامت رادتني اشد شعرها شديتة الها خطيه من ورة كلة فراغات لأن يجروها من شعرها
اخذنة مريام وطلعنة كل واحد كعد بمكانة وباهر ميسكت

باهر:اكلچ حرامات عينچ مزورگة بس هاي حوبتي تتذكرين من حچيتي علية

وداد:اي اي حوبتك مو انتَ سيد اوووففف وداد بس النسونچية عليچ اوووف منچ يا وداد

باهر ابتسم وصار يطبل ويغني
باهر:على حسب وداد گلبي يبويا
راح اگول للزين سلامات
سلامات سلامات سلامات
على حسب وداد گلبي يبويا

اباوعلها ضحكت وصارت تطبل ويا
وداد:ضيعت عليه العمر يبويا
ده انا ليا معاه حكيات
حكيات حكيات حكيات
على حسب وداد گلبي يبويا

الكسار:ادومي اعقل منكم

وداد:لا اني عاقلة مو دموع

دموع:ماكو اعقل منچ حبيبتي

وهيب:منو يكول على نفسة مخبل؟

باوعت لوهيب رافعة حاجبها
وداد:قصدك اني مخبلة

ابتسم وحچة
وهيب:لا عاقلة نفسي

وداد ضحكت مفاهمة قصدة ورجعت تكمل اكلها اشرتلة براسي يعني شكو ابتسملي يعني ماكو شي

كملنة عشانة وباهر راح جاب تحلية متعود ورة كل وجبة لازم يحلي شفت وداد كعدت بصف وهيب تحچي ويا خفت يعصب عليها هوَ مدنگ راسة مرة يجاوبها ومرة ميجاوبها لحد ما مل وگام عنها رحت يمها

دموع:شكو

حچت بزعل
وداد:ميقبل يكول شعندة ويا عمتي

دموع:وداد خصوصيتة ميحچي بيها لتحاولين بعدين ما اعتقد هالموضوع يهمچ

وداد:لا دموع يهمني يهمني

عگدت حواجبي
دموع:ليش يهمچ؟

توترت وبقت ترمش بعيونها
وداد:ها لأن لأن اي لأن هاي عمتي اريد اعرف شكو

دموع:امممم گلتيلي عمتچ

هزت راسها وكامت
وداد:رايحة انام

قبل لا ارد اخذت اختها وراحت للغرفة والله مبين وداد وكعت بحب حبيب عمتها السابق وخايفة عليها تتعذب من هالحب

مر الوقت بسرعة وكل واحد صعد لغرفتة طبيعي
رحت جبت المخاد حطيتهم بيناتنة وتمددت بمكاني وصرت احچي ويا البنات بالتلي حسيتة نام والغرفة صارت هدوء نعستني اوف من الحمل شگد ينعسني

نمت ومادري بنفسي شوكت نمت
فزيت على صوت بالغرفة فتحت عيني لگيتة يلبس بملابسة ويخابر

الكسار:اكيد لزمتوها؟ جاي اني وكللها الكسار اليوم يشعل صفحتچ ويكسر راسچ

سد التلفون متحمس ما انتبهلي حتى طلع من البيت راحلهم انزعجت وصارت افكار محلوة تجي براسي

ثاني يوم وهوَ بعدة مراجع نتصل وميجاوب خالو كال عدنة شغل
وداد راحت لبيتها متقبل تبقى هنا خليتها براحتها

الأطفال اليوم بس يسألون على ابوهم لأن مشافو واني اكللهم شغل
صار الليل سمعت صوت سيارتة كلنة كاعدين بالمطبخ واني انتظرة حاسة اكو شي گلبي ديعصرني عصر

دخل للبيت عيونة حمر وگوة يمشي حيلة مهدود هد
كمت لازمة بطني الي كبرانة صرت بشهر السادس ودتكبر

لزمت ايدة بقلق
دموع:بيك شي

حط ايدة على گلبة مثل المصدوم وميكدر يحچي حاوطت وجهة
دموع:كسار بيك شي؟؟

كعد بالأرض ذب تلفون مو تلفونة وكال
الكسار:قتلو

باوعت لوهيب وهوَ يباوعلي مستغرب مثلي كعدت كدامة
دموع:قتلو منو

أشر على التلفون اخذتة وصارت كدامي صور من شفتها صرخت وذبيتة
دموع:منوووو هذااا منو مسوي بيييي هيچ شنو منتحر

رفع راسة وصرخ صرخة من كل گلبة
الكسار:حسنننن هذاااا اخوووي هذا قتلو اخوي قبل لا اشوفة حسن مات دمووووع شنقو شنق

شهگت ونزلت حضنتة
دموع:شدتحچييييي كسار

الكسار:4 سنوات صارلة ميت 4 سنوات دموووع واني مادري ومستمر ادور عليه بسببي ماااات بس حتى ينتقمون مني مات اخخخخ ياربييييي رحمتككك

صار يضرب بنفسة وهيب لزمة قوي وهوَ يبچي بحركة انعاد علينة يوم وفاة فرح وعائلتها

حضنت وجهة بيدي ابچي ويا
دموع:بس اهدأ اروحلك فدوة اهدأ

صك على اسنانة حيل وبشكل مخيف
وهيب:دموووع كوميييي خابري خواللللچ بسرعةةة

ابتعدت عنة واشوف ايدة انعوجت وهدأ كل جسمة ذبيت نفسي عليه وهوَ فاتح عيونة بمهل وتتحرك يمين ويسار

صرت اضرب على خدة واصرخ
دموع:كساااار شبيييييكك

تركة وهيب وراح يركض اخذ تلفونة وخابر واني مستمرة احاول اصحي فاصلة عن الدنيا كلها ما اشوف غيرة كدامي

فززني كلام وهيب الي خلاني اتجمد بمكاني
وهيب:باهر تعالوووو الكسار انجلط خابر للأسعاف...

.

يتبعع

اشباه البنات👇🏻

هاي البنية تشبه وداد وبالأخص رسمة عيونها بس وداد شفايفها اصغر بشوي وعيونها عسلية

تشيبه مرايم بس ملامح مريام انعم من هيچ

ضيفو حساب الانستا وقناة التلي