رواية الكسار (سلاسل الغوث) الفصل الحادي وخمسون 51 - بقلم لـ ميامي

و آنة ضايّع 
بيَّن إيديَك الباردات
و بيَّن گَلبي المحتَّرِگ .

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

~~~~~~~~~~~~~~~~~~~~~~~~

دموع:بقيت اباوعلة واحس صارت حرگة بگلبي صح ردت الطلاق بس متفقين اولد وننفصل ليش هيچ مستعجل

راح الرجال ردت اسد الباب وباوعت شفت واحد واكف كدام سيارة سودة فاتح الباب مالتها وواكف حاط ايد على الباب وايد الثانية بيها جگارة يدخن بيها لابس نظارات طبية وعيونة علية

بسرعة سديت الباب ودخلت
مبچيت ولا سويت أي شي توجهت لغرفتي مچان موجود
فتحت الكنتور واني اخابر خالي

بس رد سلمت عليه بكل هدوء وكلت
دموع:خالو تعال اخذني اني والأطفال لبيتك بدون لتسأل ليش تجيني لو اخابر وهيب ونروح

فهد:شكو شصاير غير افهم

دموع:من تجي افهمك راح الم ملابسي

سديت التلفون من عندة وطلعت جنطة وصرت اجمع بملابسي وبعدها رحت جمعت ملابس اطفالي وبس سمعت صوت خالو جوة نزلت

من شافني تقرب عليه وكال بقلق
فهد:شكو احچيلي

انطيتة الورقة
دموع:ورقتي وصلتني خالو يريد يطلگني قبل لا اولد حتى خلي نروح قبل ليجي ويكول ابقى هنا واني اطلع

خالي كلش عصب صعد جاب الجنط واني لزمت اطفالي وطلعنة من البيت بس صعدنة للسيارة وحرك اتصل على الكسار

فهد:هاي الأمانة ولك تطلگها تريد اسكتتت ولا كلمة شنوووو شمسويييي خلي يكون بعلمك اخذت دموع ولأطفال لبيتي وبعد تحلم تشوفها بس بالمحكمة مسموحلك

سدة بوجهة خليت راسي على الجامة وغمضت عيوني مشاعري ملخبطة
ماعرف شوكت وصلنة للبيت

ردنة ننزل وسمعت صوت حسوني
الحسنين:ماما ادومات نايم

فهد:هسة اني انزلة حبيبي

نزلت فتحلي خالو الباب واخذ ادومي نزلة من السيارة
فهد:ابنچ مصخن بابا حرارتة حيل مرتفعة

عگدت حواجبي وتقربت خليت ايدي على جبينة چان مشتعل نار
دموع:هاي البارحة سبح وطلع يلعب واكل ثلج ميتوب من الثلج ابد

فهد:روحي دخلي انتِ وحسوني خلي أخذة للمستشفى

دموع:لا خالو اخاف من المستشفى خلي العصر ناخذة للطبيب

هز راسة ودخلنة حط ادومي بغرفة باهر وراح جاب الجنط
فهد:والله بعد لو يموت ما ارجعچ يريد يطلگچ وانتِ حامل وبس تجيبين وتخلصين العدة ازوجچ واحد لقطة على ذوقي

دموع:لا خالو اذا اريد اتزوج اتزوج على ذوقي بعد لأن الكسار ذوقك

ابتسم وهز راسة
فعد:اموت على صراحتچ روحي ارتاحي رايح اجيبلچ ريوگ

دموع:ما اشتهي تسلم ايدك بس احچيلي شصار بموضوع وداد

كعد يمي
فهد:دفعولها تعويض وهم وقعو تعهد ميتقربولها بعد وراح ينسجنون شهرين

دموع:الحمدلله لأن والله حيل أذوها

فهد:دزيت وهيب وباهر وياها يفتحون ايدها خلي ترتاح من هالحمل

ردت احچي واندگ الباب راح خالو يفتحة بس سمعت صوت الكسار رحت لغرفة باهر وقفلت الباب علية كعدت بصف ادومي وأذني يمهم

الكسار:وينها واصلًا ليش اخذتهااااا

فهد:شنو ترديها تبقى وتنذل عندك؟؟؟

الكسار:استغفرالله شمسويييييي انييييي غير افهم

فهد:شنو شمسوي تضحك علية لو شنو؟ اليوم وصلت ورقة طلاق لدموع وتكول شمسوي

سكت ثواني وحچة ومن صوتة حسيتة مصدوم
الكسار:شنو؟ ورقتيش طلاقيش شتحچي انتَ!

فهد:لتسوي نفسك مصدوم ورقة عليها توقيعك مو عبالكم محد وراها وتقهرها لا ابني اصحى اكسرلك ظهرك علمودها سمعتتتتت

الكسار:شبيييييك انتَ ماعرف على شنو جاي تحچيييي وين دموع دموووع تعالي نحچي وفهمينيييييي

سمعت صوت وهيب وباهر بالبيت
فهد:لا متجي دموع ويلا نلتقي بالمحكمة

وهيب:شصاير

اخذت الورقة كمت فتحت الباب ومديت راسي عليهم بسرعة تقرب سحبني من ايدي وخلاني كدامة

الكسار:فهميني خالچ بدا يچفص

نترت ايدة عني
دموع:مالي كلام وياك

عصر زندي وعاط بوجهي
الكسار:لااااا الچ وغصبًا على راااااسچ سمعتيييي فهميني شكوووو

خليت الورقة كدامة
دموع:ورقة طلاقنة هاي والمحكمة الأحد الي جاي

اخذها من ايدي عاگد حواجبة يقرة والجگارة بين شفايفة دقيقة ابتسم وذب الجگارة وداسها بكل برود حط الورقة بأيدي وكال

الكسار:انتِ لو تعرفيني صدگ چان انتبهتي هذا مو توقيعي

عگدت حواجبي وباوعتلها
دموع:شنو مو توقيعك؟ مو اسمك بالأنكليزي؟

الكسار:بالفعل بس وين حرف k ؟ هوَ صح الي موقع جايب توقيعي بالضبط بس ناسي يضبطة اكثر وبعد اسمي هم غالط بي

رجعت اباوع وطلع كلامة صح بس الورقة مضبوطة حيل
دموع:اذا مو انتَ منو يطلگني؟

باهر:يمكن اكو شخص متزوجچ ويا الكسار

كلها باوعتلة بخزرة عدل وكفتة وتحمحم
باهر:احم معليكم كملو كملو

تجاهلو
الكسار:اكو واحد جاي يسوي اشياء غير قانونية ويريد يوگعني واني شاك بسحير الليل

دموع:سلوى؟ ليش وشلون تكدر تسوي هيچ

الكسار:لأن كلتلها ابنچ ميريدچ محد كالچ عوفي وتعاركنة كالعادة ومثل ما تعرفين ابنها الي هوَ اخوية محامي ف اكيد سوت هيچ بس والله يا دموع اذا ما اشعلها شعل هالبربوگة الساقطة لا ابوي كدر يضبها ولا ابو شهاب

راد يروح وخالي لزمة
فهد:اركد خلينة نتأكد اول وبعدها لكل حادث حديث

الكسار:بس اني متأكد

فهد:حتى لو اصبر واني اشوف شغلي وياها

ضل واكف على اعصابة واني افكر هاي شبيها عجزت وخرفت اذا ابنها ميريدها احنة شعلينة

واني واكفة دفرتي الملعون بس هالمرة تدغدغت وضحكت
دموع:وهيب تعال شوف مو تريد تشوفة يتحرك

اجاني يمشي سريع حط ايدة على بطني وهوَ مستمر يدفر بية
وهيب:شنو ولك أذيت اختي فارة اكعد واسكت

حسيت بأيد ثانية صارت على بطني باوعت لگيتة الكسار مبتسم ثواني وابتعد

الكسار:يلا دموع خلي نرجع للبيت

اختفت ابتسامتي
دموع:اريد ابقى هنا شكم يوم

الكسار:بس توضح كلشي مو اني الي دزيت الورقة

دموع:اعرف بس اريد ارتاح شوي وانتَ هم ترتاح بما انُ بعدي صار يريحك عوفني هنا شكم يوم

ضل ساكت ويباوعلي يريدني اغير كلامي بس احتاج ابتعد شوي
هز راسة وكال

الكسار:تمام ابقي واني هسة رايح لغيث

دموع:كلتولهم؟

فهد:من زمان وسوينة فاتحة

دموع:شلونها روان چان لازم اروحلها واساندها بهالأيام

الكسار:تعرف انتِ مريضة ان شاء الله شكم يوم واخذچ الها

هزيت راسي وهوَ راح لغيث يريدة
باهر:بوية مدام دموع هنا اني قررت اخطب

كلنة فتحنة حلوگنة بس وهيب يضحك
فهد:المسربت ابو النسوان يخطبببب؟

باهر:اي كافي عزوبية مليت من النسوان اريد بنية وحدة

فهد:ولك انتَ السربوت تريد تخطب؟ بس لا حاط عينك على وحدة مو زينة هالمرة والله طلقة براسك واموتك بمكانك

باهر يهز ايدة ووهيب حچة يضحك
وهيب:لا البنية زينة وانتَ أصلًا رايدها لباهر

خالو كعد ممستوعب
فهد:تريد روزا؟

باهر:اي هاي الي تكبرت علية وچانت مملخة نفسها بس حتى تحاچيني

دموع:هوَ هذا البشر من ينحگر ينراد

باهر:نچبي

وهيب:نچب انتَ

باهر:حبيبي تعال ابوسك

دفعة عنة
وهيب:احلف عليك منقص حنان منو لازمة بايسة

سمعت صوت ادومي يبچي دخلت اشوفة
دموع:شبيك ماما

بس فاتح عيونة يبچي ويرجف گلبي انخمش وجهة اصفر ومن تلمست جبينة فزيت بخوفة وركضت عليهم

دموع:وهيب ادومي حيل مصخن ويرجف

ركضو كلهم للغرفة واني وياهم وهيب شالة بحضنة
وهيب:ادومي خالو باوعلي تسمعني اذا تسمعني هز راسك

هز راسة ورجفة جسمة ابد مو طبيعية
وهيب:خلي ناخذة للمستشفى اخاف يشمر ابقي هنا عند حسوني ليخاف واحنة ناخذة ونرجعك ويانة

دموع:تمام بس طمنوني

اخذو وراحو كعد حسوني يبچي على اخو واني حاضنتة وادعي ميصيرلة شي لأن الصخونة تخوف

أذن الظهر رحت توضيت وصليت وبالي عندهم
ساعة ورجعو شاديلة مغذي والكسار وياهم هوَ شايلة رحت ابوس بي

دموع:شبي شنو طلع عندة

الكسار:يكولون بس حرارتة مرتفعة خلي يصير العصر واخذة للطبيب خاف يطلع بي شي

دخلة لغرفة باهر وكعد بصفة يلعب بشعرة واني كعدت من الجهة الثانية فتحت قميصة وخليت كمادات طبية جابهم وهيب اله خليت على جبينة وصدرة

ادم:ماما اني بس نعسان

دموع:نام حبيبي

ادم:اريد بحضنچ

باهر طلع من الغرفة والبقية طلعو ورة تمددت بصفة واخذتة بحضني العب بشعرة وهوَ مثل ممتعود من ينام بحضني يلزم ياخة ملابسي ويحط وجهة بصدري وينام

اشوف حسوني يباوعلنة ركض اخذ تلفون ابو وكال
الحسنين:ماما طالعة حلوة خلي اصورچ

ابتسمت وصورني اكثر من صورة وجاب التلفون يشوفني
اخذتة اگلب بالصور ومركزة چان الكسار عيونة علية والصورة الثانية عيونة على ادم وعاگد حواجبة واكو صورة ملين ملامحة ويباوعلي بحسرة

تحمحمت وخليت التلفون بيد حسوني
دموع:تنام يمنة؟

حط ايدة على فكة بتفكير وكال
الحسنين:اني انام بحضن بابا وادومي بحضنچ ها بابا تقبل

ابتسم وفتح ايدة
الكسار:اكيد تنام بگلبي انتَ تعال

ركض طفة الضوة وذب نفسة بحضن ابو وتمددو سوية اول مرة بعد كلشي صار ننام سوية بنفس الچرباية

ادم:ماما انتِ هالأيام متبوسين بابا ليش

بست راسة
دموع:لا حبيبي ابوسة بس انتو نايمين ومتشوفون

سكت وغمض عيونة شوي ونامو هوَ وحسوني فلتت نفسي على كيف وكمت  شفت الكسار نايم وياهم عجبني الوضع ورجعت نمت يمهم

فترة وكعدت على لمسات بوجهي فتحت عيوني عبالي ادم بس لگيت الكسار كدامي مبتسم بشكل خفيف وايدة تتحرك على خدي من شافتي كعدت بعد ايدة وصارت ملامحة باردة

الكسار:صح النوم مو قصدي اگعدچ بس چنت اشوف خاف بردانة

كعدت وفركت رگبتي
دموع:وين الأطفال

الكسار:وهيب اخذ ادوم للطبيب وحسون راح وياهم

هزيت راسي وكمت غسلت وجهي صايرة مغرب واحنة محاسين محد بالبيت بس احنة شفت شايليلنة غدة رحت صبيتلنة وردت لشيل الصينية بس اجة هوَ بدون ولا كلمة شالها وحطها بالصالة وبعدها كعدنة ناكل وساكتين

اني اكل لگمة وبعدها انتچي لأن يصير ثگل على ظهري
الكسار:احط وراج مخدة احسن؟

دموع:نفس الشي حيكسر ظهري

الكسار:مبين راح يطلع چبير لأن بطنچ كبرانة وانتِ ضعفانة

دموع:غير اخذ حيلي كلة اكيد يطلع چبير

رجعت اكل وصفنت اتذكر شلون چان يهتم بية من حبلت بـ ادم
چنت هم نفس الوضع يصير ثگل بظهري وهوَ انتبه صار يكعدني بحضنة وهوَ يوكلني حتى لا اتأذة

ابتسمت وتنهدت باوعلي وعبالك عرف شنو تذكرت
الكسار:تردين اجي اوكلچ؟

دموع:لا شكرًا اكدر اتحمل

سكت واني سكتت ومن كمل اكلة راح غسل وكعد يمي ينتظر ادم يجي لأن ادم مچلب بخالة هوَ ياخذة اعرف علمود شنو حتى يشتريلهم اندومي وهوَ ممنوع عليهم

سمعت اصواتهم شوي ودخلو يضحكون وهيب شايل ادم وحسوني لازم بطنة ويضحك ركض علية وكال

الحسنين:ماما ادم ضربو ابرة بمكان عيب

حچة هيچ وتمدد بالأرض يضحك وادم هم يضحك وهوَ تعبان حطة وهيب يمي وكال بكل ثقة

ادم:بس المهم الي ضربتني الأبرة بنية حلوة حتى تغزلت بية وباستني

باهر:اموت بالحلوات منو باستك ولك

بس سمع بسيرة النسوان دخل يركض
دموع:شنو طلع بي

وهيب:كلشي مابي حبيب خالو مثل الحصان فلاونزة عادية

ابتسمت وحضنتة
وهيب اخذ الكسار يحچون باوعتلهم يحچون بهمس گلبي نغزني ماعرف ليش

بعدها راحو واني بقيت عن خالي وهمَ يحبون من اجي عندهم لأن يتونسون لبيت دوم موحش عليهم محد بي وحتى ميتوصخ

اهتميت بأدومي زين لأن بعدة يصخن بالليل وابقى فوك راسة ما انام اخاف يصير بي شي عندة كل يوم أبرة لازم يضربها وهيب ياخذة وابوهم يجي يشوفهم بس اني ما اطلع احسن

بقيت 3 ايام على هالوضع
حاطة كمادات على راس ادوم واقرة على راسة

دموع:شصارلك يا حبيبي دتخوفني

ميحچي بس يرجف وصار بدون ميحس يدرر بفراشة وخطية يضل يبچي لأن ممتعود يبلل فراشة گوة اسكتة

كمت امشي على كيف دخلتة للحمام اسبحة بس ذببت المي عليه فز ومن فز انشمر بالأرض طبگن اسنانة وصار ينتفض صرخت بخوف

همزين عرفت اتصرف وحطيت شي بحلگة
على صوت صراخي اجو باهر وخالو يصيحون

فهد:شكو خالو شصاير

دموع:تعالوووو لحگوني ادم انصرع

انفتح الباب وباهر بسرعة ذب نفسة على ادم قيدة وحط ايدة جوة راسة بقيت ادگ على راسي وابچي

دموع:هذا الي چنت خايفة منة تورثون الصرع مني سودة بوجهي

خالو خابر للكسار يجي ومبين يعرفون كلهم
هدأ جسم ادم ذب باهر علية شوي مي وانوب لفة بالمنشف وشالة للغرفة رحت كدامة شلت الفراش وغيرتة يلا حطة كعدت كدامة ابوس ايدة وابچي وخالو يلبس بي

دموع:يا قهر گلبي ماريد تتأذون اعرف الصرع وشنو يصير بحالك بي ربي رحمتك وعفوك

فهد:اهدي بابا ليكعد ويشوفچ تبچين

دموع:خاف يتعب گلبة بابا خاف هم يضل گلبة يعصرة مثل ميصير عندي

فهد:استهدي بالرحمن وكولي يا الله بنيتي

بقيت اردد اسم الله وابچي
اجة ابو ميت خوف صار يبوس بي ووهيب حيل مقهور عليه

الكسار:ادم بابا حبيبي

بعدة فاقد صرت اعضعض بأصابعي لحد ما وهيب لزم ايدي يهديني من تلوعت بأدم عرفت معنى كسرة الگلب الحقيقية ماكو مثل الضنا وقهرة الأم والأب عليهم

فتح عيونة وابو سحبة بحضنة وصار يحچي ويا بغصة
الكسار:وليدي شلون صرت

چلب بملابس ابو وحچة بخجل
ادم:اريد الحمام

رفعة بحضنة واخذة للحمام ومن طلع حاول يمشي بس راد يوكع ميكدر يسيطر على نفسة هسة الدوخة وألم الگلب كلها بعدها بي ساطرتة سطر

رجع شالة وحطة بالغرفة شربة مي
دموع:ماما انتَ زين

هز راسة وابتسم
ادم:زين بس سني يأذيني

باهر:ولك بديت توكع سنون صرت رجال صفگولة

كلهم صفگو وهوَ يضحك
ادم:اذا صرت رجال زوجوني الي ضربتني أبرة لعد

باهر:ولك تتزوج وحدة شايفة ****

الكسار خزرة وهيب ضربة منحچي هيچ كلام كدامهم وباهر لسانة فالت فد مرة

ادم:بابا گلبي يدگ يسوي دوم دوم مثل الدمام صوتة ينسمع

الكسار:اي لأن مريض هسة تصير زين تريد نروح للبيت واليوم ننام سوية ونلعب

ضحك بطفولية
ادم:وتوكلنة اندومي بدون متدري ماما

سد حلگ ادم وعض شفايفة بسرعة باوعلي رافعة حاجبي
الكسار:فضحتنة اسكت

ضل يضحك مكدرت احچي شي شفتة مرتاح بس اني گلبي حينمرد
الكسار:يلا نروح لبيتنة دموع حتى اخذچ للطبيب حجزتلچ موعد باچر العصر

دموع:اروح للطبيب وارجع هنا

وخر انظارة عني وحچة ببرود
الكسار:لا نرجع لبيتنة اريد اطفالي يمي

دموع:اخذهم واني ابقى هنا وخالو ياخذني للطبيب

باوعلي حسيتة راد يعيط بوجهي بس هدأ نفسة وكال بهدوء
الكسار:تعوفين ابنچ وهوَ مريض؟ مثل ممحتاجني هوَ محتاجچ ارجعي للبيت كافي واني معندي غير هالكلام يلا جهزي نفسچ

بقيت اتأفأت كرهت هذاك البيت كلش طلعو وبقى هوَ ويا الأطفال كمت اجمع ملابسنة ودموعي تنزل ماريد ارجع هنا كدرت ارتاح شوي خالو وباهر هنا يسولفون ويضحكون وهسة من ارجع ابقى انتضر وهيب ووداد يجون گلبي راح يطگ

لبست صايتي ومسحت دموعي وقبل لا اطلع كلت
دموع:اني خلصت

قبل لا اسمع ردة طلعت وهيب وباهر طالعين وبس خالو ينتظرني اخذني على صفحة وصار يحچي وياية بحنية

فهد:الله ما رزقني ببنية بس انتِ بنتي اريدلچ الخير لتتعبين نفسچ بابا ابقي هادئة عصبية ماكو بعد واذا الكسار حچة وياچ كلمة وحدة غلط بس خابريني واني اشوف شغلي ويا

طلع الكسار بيدة الجنط
فهد:والكلام الك هم اذا تعبت بنتي وزعلتها لو نزلت دموعها حسابك چبير سمعت لو لا

الكسار:وصيها عليه هم

كال هيچ وراح حط الجنط بالسيارة وخالو يهز ايدة رجع اخذ ادم وطلعنة من البيت مخنوگة

وصلنة للبيت راحو الأطفال لغرفهم
وهوَ صعد الجنط فوك عود ردت اخذ جنطتي للغرفة الجوة بس هم ما اصعد عندي ملابس جوة

دخلت للغرفة اباوع لنفسي حيل هملت عنايتي الأسبوعية
صحت لحسوني يجيب بوكس العناية كلة وجابة الية وكعدت بالغرفة وبديت اعتني بوجهي وجسمي احس بشرتي ارتاحت من بعد الأهمال

كملت لبست ملابسي وطلعت للحمام
من طلعت لگيتة بوجهي يدخن ردت اعبر ولزم ايدي

الكسار:انتِ وقعتي على ورقة الطلاق؟

دموع:اي وقعت مرتين

الكسار:وخاب أملچ من طلعت مو مني مو

دموع:اي فد خاب أملي سلوى شصار بيها؟

الكسار:سلوى طردتها من البيت هيَ والقذارة مالتها الي يخطط ضدي ببيتي ادمرة على ايدي ضل ابوية هناك وحدة وعندة غيث

دموع:خلي يجي هنا

الكسار:ميقبل عفتة على راحتة بس سلوى اني الها

سكتت وهوَ تقرب علية
الكسار:نبقى على كلامنة ورة ولادتچ ننفصل بس تبقين هنا بهالبيت واني اطلع

دموع:لا ما ابقى هنا اخذ اطفالي واطلع

لزم زندي عصرة
الكسار:بعد ولادتچ نتفاهم هسة يلا صعدي فوگ

دموع:اريد انام هنا

سحبني من ايدي لناحيتة ودنگ علية صار وجهي بوجهة
الكسار:كلت صعدي فوگ يلا كدامي

دموع:ماااا اصعد

دفعتة ورحت للغرفة امشط بشعري وادردم
دموع:يتأمر عبالة مثل قبل اني

شهگت فازة من انفتح الباب بقوة ودخل يعيط
الكسار:ترديييين تخبليييينييي انتِ من احچي سمعي كلاميييييي

رجعت ليورة اباوعلة بخوف چان يخوف معصب حيل
دموع:شبيك انتَ

يريد يتقرب علية بس يلزم نفسة عني صار يدفر بالچرباية  لو بالباب لو يضرب الحايط حتى ليأذيني

الكسار:اگلچ صعدييييي ابنچ مرييييض تعاندبن لييييشش تردين تموتينيييي وصلت حدهاااا ترى

بقيت ساكتة اباوعلة سحبني من ايدي وصعدني فوك غصب عني مكدرت احچي شي لأن الأطفال بالغرفة وهوَ يحاول يبتسم ويهدأ نفسة

الكسار:يلا يا فلم تردون

تمدد بصفهم حاضنهم وهمَ يعددولة الأفلام وصارو يختارون واني واكفة اهز برجلي باوعلي بخزرة وأشرلي على الچرباية گلبت عيوني ورحت كعدت يمهم مكتفة ايدية

الكسار:تنامين بالبرنص؟

مجاوبتة وهوَ يدردم
الكسار:مادة البوز شبرين علية

دموع:الغرفة باردة وريحتها محلوة واخاف انام ويدفروني ببطني ماريد ابقى هنا الغرفة لعبان نفس

اخذ ريموت السبلت فتحة وسوة ابرد درجة باوعتلة
دموع:شبيك بردانة ترى

ما اهتم لكلامي كام قفل الباب وضم المفتاح خاف اطلع
الكسار:يلا تغطي وماريد اسمع كلمة وحدة

برطمت شفايفي اباوعلة بقهر رجع للأطفال مهامة شي كمت جبتلي بطانية تلفلفت بيها غطيت راسي وصرت ابچي قهرني الخبيث

غفيت ودموعي بعيوني
فزيت على صوت الأذان اريد اكوم مابية جسمي مكسر تكسر باوعت لگيتة يصلي واسمعة يدعي ويبچي على حسن موتة ترك أثر عميق بگلبة ومستحيل يطيب هالجرح

ردت اكوم اصلي بس راسي ثگيل الأطفال مموجودين والسبلت بعدة مفتوح حچيت بتعب

دموع:طفي السبلت لتخبث وياية

الكسار:طفيتة من زمان

باوعت شفتة مطفي بس الغرفة باردة
عدلت گعدتي

دموع:وين ادم وحسوني

الكسار:راحو ينامون عند خالهم

سكتت سد القرأن وكام تقرب علية تلمس جبيني
الكسار:مصخنة

دفعت ايدة
دموع:كلة منك چنت سابحة وفتحت السبلت علية الخبيث اني ماريد ابقى هنا اكرهك ايع حتى وجهك محلو والغرفة ايع كلشي ايع

الكسار:بديتي بالتمسلت

غطيت وجهي وبچيت
دموع:عوفني انام جوة

استغفر وكعد كدامي
الكسار:ماريد الأطفال يشكون بشي شبيچ دموع

مسحت دموعي
دموع:لعد جيب مخاد نحط بيناتنة ماريد اشوفك

راح جاب المخاد حطهم بالنص واني حتى الصلاة نسيتها من ورة الصخونة ورجعت نمت محاسة بشي حتى

ثاني يوم كعدت چان يشتغل بالابتوب رفعت شعري مغندبة وطلعت اغسل وجهي وكعدت بالصالة مكتفة ايدي مطايقة نفسي

نزل وراية باوعتلة بعناد وزعل
دموع:بعدين بس نرجع من الطبيب اريد اروح لخالي

كعد يمي يقيس حرارتي
الكسار:اي خوش

دموع:تطلگني وغصبًا عليك مو عبالك تاخذني بالصياح والعصبية

الكسار:تدللين

دموع:واروح اتزوج واحد حلو

عصر ايدي رادت تطگ دفعتة عني
دموع:ماريد اشوفك

بس يهز براسة وساكت
اللكسار:ام جمال طبخت الغدة ورتبت البيت بعدين نروح للطبيب علمود حملچ وعلمود سالفة الرحم وان شاء الله ماكو شي

درت وجهي عنة
الكسار:يلا كومي اكلي

كمت مادري شبية معصبة وكارهة نفسي
صبيتلي اكل كلهم متغدين بس اني وكعدت اكل

الغصر وهيب اخذ الأطفال واني والكسار رحنة لدكتورتي شافت الحمل كالت شوي متحسن ورجعت ضربتني ابرة تأخر الحمل لأن متريد اولد ولادة مبكرة وولادتي لازم عملية

بعدها رجعت سويت فحوصات للرحم وكلها تكول بعد الولادة نشيل الرحم لأن متضرر حيل

تضايقت بس حمدت ربي
للبيت بس نزلنة لگيت وداد كاعدة بباب بيتهم حاضنة نفسها وتباوع للأطفال الي يلعبون طوبة ومن ضمنهم اطفالي وباب بيتنة وهيب كاعد مدنگ راسة ويدخن

استغربت شعجب ما كامت اجت لوهيب وشعجب ما راحت تلعب ويا الأطفال ردت اروحلها بس شفت سيارة وكفت كدامها كامت تنكت بملابسها

نزل منها شاب مبين لاعب كمال اجسام سلم عليها وصارو يحچون وهيب وكف ذب الجگارة وورث غيرها يباوعلهم وكفت بصفة

دموع:منو هذا؟

وهيب:مادري خاف من طرف عمامها

دموع: ما اعتقد شوف تحچي ويا ومرتاحة

بقينة نباوع وهوَ ما طول ابد بسرعة صعد سيارتة وراح وهيَ شافتني واجت
وداد:هلاو دموع

دموع:هلاو بيچ شكو شبيچ احسچ ضايجة

ابتسمت
وداد:لا بس لگيت شغل بأربيل ابن عمي الميت راح يعيش هناك هم ف احنة راح ننتقل بعد كملت دراستي وتخرجت ماكدر ابقى هنا

دموع:لا وداد شلون تروحين واني تعودت عليچ هواية

وداد:ماكدر ابقى هنا دموع عمامي الشر بعدة بعيونهم ماريد ابقى وتكثر مشاكلي راح أأجر هذا البيت واروح

وهيب:ترى احنة موجودين محد يگدر يأذيچ

باوعتلة وداد وابتسمت اكثر بس مبين مقهورة
وداد:ماكدر اورطكم اكثر من هيچ بعد

راد يحچي وسكت
دموع:زين شوكت تنتقلون

وداد:بعدني بس حتى نرتب الموضوع زين وننقل الأثاث واشوف مركز تأهيل لمريرة يعني الموضوع بالأكثر ياخذ شهرين يعني تحملوني هالشهرين

دموع:ازعل منچ ترى شنو نتحملچ رجعي فكري زين اذا على الشغل نكدر ندبرلچ شغل هنا

وهيب:واحنة أصلًا نحتاج بنية لقسم النسائي

وداد:اريد اشتغل بتخصصي ادارة واقتصاد شكرا الكم يلا اني اترخص

عافتنة وراحت
باوعت لوهيب انزعج ودخل للبيت رحت ورة حتى احچي ويا بس كلت هسة خلي يفكر بينة وبين نفسة بلكت يوافق ويتزوجها حتى اني احچي وياها واذا رفضت فهذا حقها

اندگ الباب ودخل باهر يركض
باهر:وين الكسار وين وهيب يلا انتِ امشو خطبولييي

دموع:هاي شبيك يا

دخل ورة خالو ضربة وكال
فهد:خلي بالليل نروح اخذت موعد منهم وين اخوچ ورجلچ خلي يجهزون نفسهم حتى نروح نخطبلة واخلص من عندة

ضحكت كلش مستعجل نزلو وهيب والكسار انطوهم خبر وباهر يجرجر بيهم تجمعو الكل عدنة لأن بيتهم قريب علينة

لبست فستان حوامل طويل ومستور وخليت مكياج خفيف وبالليل رحنة كلنة زياد ومرتة وباهر وخوالي وسيدرا وهيب والكسار والأطفال كلهم ولأن همَ مو غرب ما اخذنة شخص غريب ابو روزا يصير ابن عم امي

وهيب راح ويا باهر وخالو فهد وخالو جناح بسيارة وحدة واخذو الأطفال وياهم واني والبنات سيدرا وسيلا وزياد والكسار بسيارة

زياد:سوق على كيفك مرتي لتجيب

كالت وعربيتها مكسرة
سيلا:اسكت انتِ عيب

زياد:عليمن عيب بعد گلبي لعد مو هاي دموع حامل وهاي سدرة صدك انتِ ما حبلتي ليش خطية جناح جيبيلة بعد جهال

دموع:سوالف العجايز بطلهن

زياد:سكتي خليني فرحان ماريد اغردلچ

فتح اغاني وصارو هوَ ومرتة يصفگون ورگصون هسة عرفت ليش حبو بعض لأن الأثنين نفس الخبال

وصلنة لأهل البنية وكعدنة كلنة سوية يعرفون زياد اكثر من باهر
دخلت روزا شايلة الصينية قدمت للكل ومن وصلت لباهر داست رجلة وهَو هز راسة بتحلف

وهيب يرد على گد السؤال ويضوج من هالأشياء بس باهر جبرة يجي
بدأ خالو يفتح الموضوع وياهم وروزا متوترة

رزوا حيل حلوة وحبابة شايفتها بالحجاب وبدونة يعني لايگة لباهر

طلعنة من يمهم وكالو يومين ويردون خبر
وصدگ بهاليومين ردو بالموافقة وبدينة نجهز لخطوبتة

.

يتبعع

ضيفو حساب الانستا وقناة التلي