رواية الكسار (سلاسل الغوث) الفصل الثامن وأربعون 48 - بقلم لـ ميامي

أضُم چم ليل من روحي
واسيرلك گُمر مَتعوب

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

~~~~~~~~~~~~~~~~~~~~~~~~

دموع:بقيت على نار كاعدة وادعي يلزموهم لأن واضح عصابة خطرة هذول ومعندهم لا ذمة ولا ضمير

أذن الفجر كمت توضيت وصليت وكعدت ادعيلهم طول ما اجة الشمس بدت تطلع مكدرت انام رلا ارتاح

سمعت صوت سيارة رحت باوعت للشباك شفتها سيارتة مردت يكول كاعدة وتنتظرني خليت هالشي بيني وبين نفسي ماعرف شبي تفكيري هالفترة

تمددت وسويت نفسي نايمة
لحد ما دخل الغرفة ظلمة بس ضوة الشباك منورها

فتحت عيوني على كيف اشوفة فزيت وحطيت ايدي على گلبي من لگيتة بوجهي

دموع:فززتني

مادري شبي حضني حيل ويتنفس عطري
الكسار:چنتي تنتظريني

دموع:لا ليش انتظرك هسة كعدت

وخر عن حضني فتح الضوة وصار ينزع بالكفوف وملابسة انصدمت من لگيت جسمة كلة مشخط وبالأخص صدرة اكو جروح هواية من صدرة لحد بطنة وظهرة نفس الحالة

كمت خايفة
دموع:هاي شنووو

نزع البنطرون وچانت رجلة تنزف دم من ركبتة لحد الكاحل
دموع:شصاير لازم تروح للمستشفى

الكسار:ماكو داعي بس جروح سطحية

دموع:شلون هيچ صار

كعد يدخن
الكسار:داهمناهم بس طلعو مسوين كمين هاي البربوگ اذا تصير بيدي اخلي صراخها ماله والي بنت الكلب

دموع:شصار يعني

الكسار:بعد اشتباكات عنيفة ماتو منهم 7 و غيرهم مصابين بس غدرونة لزموني اني وباهر وبعد واحد ويانة صعدونة بالسيارات بس همَ اغبياء مايدرون احنة بكل مكان بجسمنة اكو سلاح ابيض واحنة أصلًا خططنة اذا انلزمنة نحاول نضرب بيهم

دموع:وشلون طلعتو منهم

الكسار:كدرت احذ السچين الي بحذائي واطعن علاء بر جلة وفتحت باب السيارة شمرت نفسي منها همزين ما اخذت سلاحي الأساسي اخذو البقية

دموع:وباهر وهذا الولد

الكسار:هم دبرو نفسهم وطلعو لا تخافين

كعدت على الچرباية عقلي يوجعني
دموع:شغلك هذا صرت اخاف من عندة اخاف اطفالي يتأذون

الكسار:محد يكدر يلمس شعرة من روسهم اني حتى بداخل مدرستهم حاط شخص يراقبهم أمني

تمدد على الچرباية مهامتة جروحة هاي لو اني چان ماعت روحي من الوجع
دموع:روح للطبيب

الكسار:جروح سطحية وخالچ عقمهن الي اريد انام تعبان نامي انتِ هم منمتي چنتي تنتظريني خطية

گلبت عيوني ورحت نمت
ثاني يوم ملگيتة رايح للشغل كلت انزل شوي شوي ميأثر اذا ابقى فوك اموت

لگيت خالة ام جمال جوة مبين الكسار دزها سلمت عليها خطية مرتبة البيت ومسوية الغدة خلتة يتهدر وراحت لبيتها الله يجزيها الف خير

الأطفال اجو ينگزون فوك راسي واني راسي حينفجر ونفسيتي تعبانة التفتت عليهم خزرتهم وعطت بيهم

دموع:كااااافيييي روحو صعدو لغرفكمممم

وكفو صافنين علية فركت وجهي اجة ادوم اخذ راسي بحضنة
ادم:ماما شبيچ

من كال هيچ وعبالك كال ابچي وابد لتسكتين غطيت وجهي وصرت ابچي وهوَ واخو محتارين بية لو يبوسوني ويحچون وياية لو يمسدون على راسي

الحسنين:منو مزعلچ احنة؟ بعد منصيح ابد لتبچين ماما

يمسحون بدموعي واني اناشغ دخل وهيب تنهد وقنعهم يروحون يلعبون بالحديقة اجة كعد يمي يرفع شعري

وهيب:خفي على نفسچ دموع لتأذين نفسچ اموت قهر من اشوفچ هيچ

دموع:ماكدر احس نار بگلبي والله لعبانة نفسي من البيت ومن الكسار ومن الأطفال اتمنى اموت لشنو عيشتي اني

عصر ايدي وحچة بحنية
وهيب:اه؟ واني؟ لتكولين لشنو عيشتي اني عايش علمودچ عيشي علمودي واكو اطفالچ وزوجچ وخوالچ الكل يحبچ

دموع:لا وهيب محد يحبني بس انتَ واطفالي البقية حبهم طلع كذب لعبو علية كلهم كسرولي گلبي ورجعو دمروني

وهيب:كولي حسبي الله ونعم الوكيل اذا صدگ متقصدين يأذوچ فـ الله سبحانه وتعالى راح يعاقبهم

سكتت امسح بدموعي
وهيب:بس تدرين اني زعلان منچ

دموع:ليش؟

وهيب:شنو ليش دموع اني ماريد ارزلچ كدام رجلچ واقلل من قيمتچ بس سوايتچ زعجتني شلون تطعني؟ لو ميت راح تسامحين نفسچ؟ افرضي السچين چبيرة ومات

حچيت بغصة
دموع:من حرگة گلبي عصبت ومعرفت شلون اتصرف ملگيت نفسي غير واني ضاربتة بس والله متندمة گد شعر راسي شلون سويت هيچ

وهيب:شي صار وانتهى بس اتمنى متنعاد بعد يبقى زوجچ وابو اطفالچ وانتِ حامل ومعذورة

ردت احچي واجة ادم يركض
ادم:مامااااا اجو خالو فهد وخالو جوجو

برطمت شفايفي كمت واشوفهم جايين بتجاهي درت وجهي وصعدت على كيفي خليتهم يعيطون وراية ماريد اشوفهم بعد سوايتهم وياية حيل أذوني

دخلت لغرفتي وقفلت الباب كعدت اهز برجلي
ما طولو وهمَ يدگون الباب علية

فهد:دموع فتحي الباب

محچيت شي
فهد:فتحي الباب عيب تصرفچ شنو يعني نروح مطرودين من بيتچ؟

تأفأفت وكمت فتحت الباب لگيتهم كلهم ملتمين بالباب طلعت متجاهلة الكل وكفت بظهر وهيب ما اباوعلهم

جناح:اجينة نحچي وياچ خالو وجبت سيدرا وياقوت جوة ينتظروچ

ابتسمت بفرحة عفتهم بمكانهم ونزلت لگيتها واكفة رحت حضنتها
دموع:مشتاقتلچ حتى متراسلين

سيدرا:سكتي خالچ كسر تلفوني

ابتعدت عنها
دموع:ليش؟

سيدرا:تعاركنة بسبب هاي العاهرة وشلت المزهرية وضربتة براسة

دموع:حتى انتِ!!!

هزت راسها
سيدرا:بعدين احچيلچ كلشي

نزلو وياقوت شافت وهيب وتسرسحت راحتلة تمشي بدلع دنگ عليها اخذها بحضنة وشالها

وهيب:هلا بياقوتة شلونچ

حچت بدلع وهيَ تلعب بقميصة
ياقوت:زينة ڤهيب تقبل ابوسك؟

وهيب:اي بس بالأول اني ابوسچ

باسها بخدها بوسة قوية وهيَ تضحك وانوب باستة
جناح:بنتي الك ومتصير لغيرك

حچة حسوني بغيض
الحسنين:لا توتة الية اني احبها متتزوج خالو تتزوجني

ياقوت:مااااا ماااا اني اريد ڤهيب

ضحكو كلهم وحسوني ضاج رجع وهيب باسها
وهيب:يروحلچ فدوة ڤهيب غير اذا كبرتي اني شايب

حركت كتفها بعناد نزلها راحت تلعب ويا الأطفال
وهيب:لتخلي بعقلها هيچ شي وتعلقها بشي مراح يصير من الأساس ياقوت بنية وبعض البنات بسرعة تتأثر من اقل كلمة ياريت تطلع هالشي من عقلها

باهر:خربيومك شگد فاهم منين تجيب هالكلام تعال ابوسك

ابتعد خازرة
وهيب:باهر فك ياخة عني اني ابوس بس الأطفال ودمعة

غمة وراح لأبو حضنة وكعد يبوس بي
جناح:زوجة بسرعة ابنك ناقص حنان

وهيب:مو بس حنان حتى عقل

باهر باوع لوهيب احسة يكول والله بي دفرة
فهد:مو اكلة تزوج روزا بنت صهيب بنية مححترمة وحبابة وحلوة بعد شيريد

باهر:شالفايدة امها حية متعجبني وبعدين اني مكفي نفسي لتدخلون

فهد:البيت وحشة  لك مطي تزوج وجيب اطفال تلاحگ لنفسك بعد 5 سنين اكثر وبعد يوگف المحرك

ضربت گصتي وهمَ يضحكون
باهر:يعني هسة انتَ واكف المحرك عندك

دفرة ابو ذبلة بوسة بالهوى
باهر:لتخاف علية ميوكف واذا وكف اكو الف حل ابنك نچر

اشوف وهيب واكف بعيد ويدخن بس يباوعلهم
جناح:وانتَ وهيب متزوج؟

وهيب:شبيكم على الزواج اني أيسو مني كلش ولتفتحولي هالسيرة

جناح:امداكم ابقو ابقو بردانين بالشتاء ولا اطفال ولا شي

وهيب:عفوًا منك بس المرة مو محرك حتى اتزوجها  بس حتى تحبل وتجيب الزواج مسؤولية وحب وتفاهم تحب شخص يدلعها يتغزل بيها يحبها الزواج مو بس فراش واطفال من وجهة نظري بالعكس الزواج مبني على الحب المتبادل بين الطرفين والثقة والتفاهم أصلًا حرام شخص يتزوج بس حتى تجيبلة طفل ويذبلها وينساها

بقيت مبتسمة بكل مرة وهيب يثبتلي شگد هوَ شخص عاقل وفاهم بس بسبب اهلي تدمر عقلة

فهد:عفية عليك ابني هذا الكلام الحلو والناضج

ذب الجگارة وداس عليها وكال وهوَ يمشي
وهيب:اني مو ابن احد

راح كعد بالصالة وهمَ تعودو على وهيب وعرفو شنو يحب وشنو يكره والكل يحاول يكسب رضاه وهوَ متجاهلهم مرات احسة يكرهم ومرات لا احسة يحبهم

اباوع لخالو راسة بي زراگ حصرتني الضحكة
دموع:اكلچ احنة معنفين ازواجنة

سيدرا:ليش انتِ شسويتي

دموع:طعنتة بسچين فواكه

حطت ايدها على حلگها وصرخت
سيدرا:چذاااابةةةة

گرصتها الكل ضل يباوعلنة تجاهلنة نظراتهم ورجعنة نحچي
سيدرا:عود صدگ طعنتي ولچ اني مزهرية ومتندمة لأن ضربتة

دموع:مكدرت اشوف بعيوني من عصبيتي محسيت بنفسي غير واني طاعنتة هسة المهم احچيلي شكو

سيدرا:خالچ العفيف الشريف النظيف رايح لهاي لينا تريد تزوجة وحدة ثانية وهوَ قابل سمعت صوتة يضحك وياها ومن عصبيتي ضربتة

باوعتلهم گاعدين واحد بصف الثاني خزرتهم اثنينهم
دموع:هوَ الزلم ميملي عينهم غير التراب كومي سوسي كومي نصب غدة الله ينتقم من كل الزلم

الكسار سكت بس خالو كام لزم ايدي ولواها يگرص بية
جناح:حزب النساء استقرن گلبتن الدنيا علينة بسبب كلام كلة كذب بكذب

جرة عني الكسار
الكسار:عوفها حامل لتتأذة

تركني وكعد يهز راسة بتوعد اخذت سيدرا ورحت اصب الغدة واني محاچية وياهم اجة خالو فهد عود يتحرش يريدني احچي ويا ولا نطقت كلمة

كعدو يتغدون ومن كملنة ردنة نكوم نغسل المواعين وحچة وهيب
وهيب:عوفيهن كوم باهر يلا اني وياك نغسل المواعين

باهر:عفوًا!!

وهيب:ما اعيد كلامي وانتَ سمعت كلش زين يلا كوم البنات تعبانات

سحلة كوة للمطبخ وغسلو المواعين ورتبو المطبخ برد گلبي بباهر وفوكاها سوالنة چاي

فهد:هسة نگدر نحچي دموع

اباوع للچاي واهز رجلي
فهد:اجيت بس حتى افهمچ كلشي بابا انتِ بنتي وخوفي عليچ اكبر من خوفي على ابني تتوقعين اني اكدر اتسبب بقهرتچ؟ كل ما بالموضوع احنة شغلنة يتطلب هيچ بس وحق ربچ ما سوينة شي يغضب الله

دموع:ميهمني بعد وشغلكم دمر هواية عوائل مع احتراماتي الكم

فهد:بوية افهمي لا رجلچ سوالها شي ولا نظرلها بنظرة حرام

دموع:خالو اني وزوجي اتفقنة على شي وهاي هيَ كلامكم ميفيد بعد

كام وهيب طلع من البيت ولحگة باهر
فهد:يعني شنو؟

دموع:يعني لتخافون اذا انفصلنة ما اجي اعيش عندكم

وكف على حيلة مصدوم
فهد:ليش احنة شوكت تعاجزنة منچ شنو هالكلام عيب عليچ اني خالچ احترميني على الأقل

نزلت راسي وهوَ يحچي
فهد:انتِ واخوچ اغلى من روحي لا تتوقعين بيوم من الأيام اتعاجز منچ بيتي مفتوح بكل وقت الچ صدمتيني بكلامچ

دموع:اني مقصدي شي بس حيل زعلانة من فعلتكم چنتو تكدرون تبعدو عنها وچنتو تكدرون تحچولي بس مسويتو شي بالعكس كعدتو تراقبون وساكتين

راد يحچي وسمعنة صوت وهيب معصب طفرنة كلنة ردت اركض ولزمني الكسار مستعجل

الكسار:لتركضين

عافني وطلع واني مشيت على كيفي وطلعت انصدمت واني اشوف وهيب وباهر واحد لازم الثاني ويضربون بعض

وهيب:نذلللل انيييي احططط عيني على طفلةةة بريئةةة ومريضة اني مو قذر مثلكم

ضربة وعاط
باهر:ومرضضض ما حچيت شي چنت بس اسأل

دفرة ببطنة وكع باهر ونزل وهيب فوكة يضرب بي رادو خوالي يرفعو عنة وميكدرون خالو جناح لزمة عود يهدي بس وهيب لزم ايدة لواها ودفعة عنهم ورجع يكمل على باهر

صرت ارجف يضربون بعض بأجرام الأثنين متدربين واحد متدرب ويا العصابات والثاني ويا الدولة

وهيب:انيييي ما احط عيني على طفلةةة سمعتتتت

راحولة ثلاثتهم رفعو عنة وجهة صار احمر شفايفة انجرحت چتفو حتى ليفلت منهم

فهد:شصااار ليش تتعاركوووون

كعد باهر يتفل دم ولازم گلبة
باهر:امداك ليش تدفرني على گلبي تطشرن نسواني

تحرك وهيب يريد يدفعهم وميخلو
وهيب:ليش تخليني اطشر عقلك كدامك

باهر:اوف حتى صور نسواني تتطشر من راسي لا ماريد

الكسار:باهر انلصمممم احچو شصاير

فلت نفسة منهم وطلع جگارة يدخن ايدة ترجف من العصبية
وهيب:اجت هالطفلة شايلة البزونة حتى اشوفها شلون ضحكت وياها هالنذل يكول انتَ حاط عينك عليها وهيَ بنية مريضة عمرها 14 سنة لو متزوج چان عندي بنية بگدها

باهر:انتَ شايف نظراتك

وهيب:نظراتي مابيها شي انتَ عقلك وصخ ومستحيل يتنظف مو غلط اذا هالبنية تكسر خاطري

عصر الجگارة بيدة رحت لزمتها
دموع:وهيب اهدأ احترگت ترى

وهيب:يطبني مرض

بعدني عن طريقة يريد يطلع
دموع:وين رايح

وهيب: لجهنم الحمرة

طلع من البيت معصب باوعت لباهر بلوم
دموع:ليش سويت هيچ مو تعرفة ميتحمل

باهر:اني مچان قصدي شي مو زين قصدي اذا يريدها خلي يتزوجها

دموع:باهر شبيك شنو يتزوجها البنية مريضة افهم وين تعرف شنوو زواج شلون يعقد عليها اصلاً وهيَ مفاهمة شي حتى حرام

سكت ينافخ
الكسار:بعد انتبه لنفسك من تحچي ويا

هز راسة دخلو للبيت يرزلون بباهر شوي وراحو
تمددت بالصالة رافعة رجلية والكسار يلاعب الأطفال

سمعو صوت وداد تلعب طوبة  بالشارع طلعولها يركضون ابد متتوب من الطوبة برغم هيَ چبيرة مو صغيرة بس من الوحدة متعرف شتسوي اني عاذرتها لا اهل لا عمام براسهم خير حتى يحتووهم بس هيَ واختها بالبيت

مرات اصيحها تجي يمي وخطية تفرح تسولف وياية واختها بس ساكتة اني مريت بهالشعور وكلش مُر وصرت احاول بكل الي اكدر عليه اخليها صديقتي ومتحس بالوحدة

الكسار:احم شنو متنامين؟

باوعتلة
دموع:ليش؟

الكسار:لا ماكو شي علمودچ اني نامي ارتاحي الأطفال طلعو محد يزعجچ

هزيت راسي وكلت خلي انام بس دقايق ومحسيت بشي بعد
من كعدت ملگيتة بس غسلت وجهي صعدت اخذت اللابتوب وطلعت تسجيلات الكاميرا الي بالصالة

ومثل ما توقعت نايم بصفي ويبوس بية
دموع:ابقى على هالحال بعد حتى بنومتي ما اخليك تطخني

سديت الابتوب ونزلت كعدت بالحديقة افكر
دخل ادومي ويا وداد ابتسمت

وداد:دموعة شلونچ عيني

دموع:تمام تعالي كعدي يمي

راح ادوم جوة وبا حسوني وهيَ اجت كعدت يمي مبتسمة
وداد:اجيت اعتذر منچ لأن حچيت هيچ على هذا الرجال الي چان عندكم بس زعجني

دموع:هذا ابن خالي وعادي مصار شي حقچ هوَ قلل أدب وياچ

وداد:يعني مزعلانة؟

دموع:ابد ليش حتى ازعل

ذبتلي بوسة بالهوى اباوعلها شكد حلوة عيونها كبار عسلية وشعرها بني طوخ رافعتة بأهمال البنية حلوة مثل كل البنات

وداد:شوفي حلو صبغ اظافر التركواز على ايدي؟ لو اغيرة

دموع:يجنن لتغيري بشرتچ تلوگلها هيچ اللوان

رجعت تباوع لأظافرها فرحانة
دخل وهيب همزين شوي هادئ نزلت راسها

وهيب:السلام عليكم

ردت السلام بدون مترفع راسها راد يدخل جوة وطفرت
وداد:اوكفففف نسييت شيييي رايحة اجيبة واجي لتروح

بقى واكف بمكانة مفاهم شي ولا اني فاهمة وهيَ راحت تركض
وهيب:شبيها هاي

حركت كتفي يعني ماعرف دقايق واجت شايلة الجاكيت مال وهيب تركض ركض وكل شوي تعثر بس تتوازن

وداد:هذا الجاكيت مالتك غسلتة وعطرتة الك ورجع نظيف مو تكول اني وصخة لا اني نظيفة اذا اخذ شي لازم اغسلة يلا ارجعة حتى من البس من ملابس مريرة اغسلهم عادي برغم احنة خوات واكو اشياء ما البسهم هواية بس...

اخذة من ايدها كاز على اسنانة
وهيب:افتهمت مشكورة

حچة وياها بحدة ارتدت ليورة منزلة راسها
وداد:اسفة اعرف اني احچي هواية

وهيب:الحمدلله تعرفين بنفسچ

سحبت نفس وزفرتة بغصة وتفرك بأيديها
كسرت خاطري مبين انهضمت لأن تعامل وهيب وياها ابد محلو

دموع:لتاخذين بخاطرچ ميقصد

هزت راسها تبلعم
وداد:يلا اني اروح للبيت خاف مريرة تگعد

رادت تطلع لزمتها واضحة الغصة بصوتها
دموع:شبيچ وداد

باوعتلي عيونها مليانة دموع وتجبر نفسها تبتسم
وداد:مبية شي بس تعبانة اريد اروح

دموع:بس عيونچ بيها دموع ونبرة صوتچ ترجف معليج بوهيب احچيلي

نزلت دموعها وضمت وجهة تبچي بسرعة باوعت لوهيب بلوم وهوَ عيونة عليها ومبين متندم على تصرفة وياها

حضنتها اطبطب على ظهرها
دموع:هاي شنو ولچ تبچين واني احب ضحكتچ يلا يلا مسحي دموعچ

وخرت ايديها عيونها على وهيب
وداد:انتَ ليش تكرهني شسويتلك

تقرب وكف كدامها
وهيب:اني ما احب احد ولا اكره احد احب دموع واطفالها بس

وداد:بس انتَ حيل تكرهني تحچي ويا الكل حتى ويا مريرة الي متفهم لكلامك واني من احچي تتجاهلني لو تعيط علية ليش؟ سويتلك شي اني والله مقصدي شي

تنهد ودنگ عليها يباوعلها وكفت دموعها تباوع لملامح وجهة وتبلع ريگها بتوتر

وهيب:ابتعدي عني احسن اني أأذي الكل بدون ما اتندم احسن الچ

ابتسمت بفطارية ورفعت ايدها بدون قصد خلتها على خدة
وداد:بس اني اعرف گلبك طيب ويا الكل

دفع ايدها بعنف وعصب لزمها من ملابسها هيَ خافت
وهيب:انتٍ ماااا تتوبين منييييي

ردت اوكف بيناتهم بس ماكدر وداد لزمت ايدة بخوف
دموع:وهييييبب عوفها شبيك شسالفة

بقت ترجف مثل السعفة هالمرة لزمها مو مثل المرة الي فاتت
وداد:ع عوفني ما اعيدها و والله وبعد متشوفني ما اجي هنا عوف عوفني

وهيب:شتردييييين منيييي انتِ

وداد:ما ماريد شي حموت خوف خليني اروح

اسحبة عنها وماكو عيونة حمر اول مرة اتمنى تجي نوبة صرع حتى يعوفها حرفيًا تخبل عليها
سحبها من ملابسها ودفعها على الحايط صارت گوة تتنفس نست شلون تبچي صرت اضربة على ظهرة بلكت يعوفها

وهيب:احچيييي شترديييين مني منو دازچ علية منوووو انتِ

وداد:محد والله محد خليني اروح بعد متشوفني حباب

لزم فكها عصرة وحچة بغضب
وهيب:الي كدامچ مجرم قاتل وهذن السوالف كلهم مطگطگات جواية تحچين منووو انتِ لا والله اشوفچ جهنم واقتلچ بمكانچ

كلت حتتخربط من الخوف هيَ كلش جبانة
وداد:اني اني وداد الي حتموت من الخوف خليني اروح

تقرب عليها اكثر
وهيب:بس احچي شتردين نظراتچ ملعبة شتردييييين مني

سكتت متكدر تحچي خايفة ترك فكها وحط ايدة على رگبتها
وهيب:اني اعرف شنو تردين

شهگت وحطيت ايدي على حلگي من اخذ شفايفها بين شفايفة هيَ تجمدت بمكانها وبقت بس دموعها تنزل

صدمني وهيب بفعلتة
ابتعد عنها هيَ دفعتة وكعدت بالأرض صافنة وتسمح بشفايفها

رفعت عيونها وباوعت لوهيب بنظرة استحقار وقهر وممزوجة بقرف هاي النظرة بعمرة وهيب مراح ينساها

كامت تمشي على كيف بدون لتلفت فتحت الباب وطلعت درت وجهي لوهيب
دموع:هالفعلة تطلع منك انتَ!!! انتَ الي دوم تدافع عن البنات وتتقرف من مواضيع التحرش لو مشايفة بعيني صدگت مع الأسف عليك

ردت اروح لزم ايدي
وهيب:غلطت وتقاذرت وياها اعتذر اني غلطان مراح اكول من عصبيتي سويت هيچ لأن فعلتي متتبرر

دموع:اكيد متتبرر مستوعب انتَ شسويت!! كسرت خاطرها اكثر من مرة وسويت شي حرام بيها شي يهتز العرش عليه

نزل راسة خجلان من نفسة
وهيب:شسوي واصلح غلطي

دموع:روح اعتذر منها واستغفر ربك مع الأسف عليك شلون كدرت تسوي بيها هيچ وهاي يتيمة مظلومة من عمامها ومحافظة على نفسها برغم عايشة ويا اختها وحدهم معندها احد وياها تكدر تسوي كلشي بدون متهتم بس اختارت تبقى محافظة على نفسها وتجي انتَ بكل سهولة تسوي هيچ

غمض عيونة بندم وسمعتة همس
وهيب:فأما اليتيم فلا تقهر

دموع:عفية واتمنى ترددها هواية حتى تفهم حجم غلطك مو لأن شفتها تضحك ويا الكل وتسولف يعني بنية مو زينة وبالها شي قذر افهم غلطك وفكر وهيب

تركتة بدوامة الندم ومشيت قبل لا ادخل التفتت لگيتة حاط ايده على شفايفة وماعرف شنو يهمس تركتة ودخلت الأطفال يلعبون بليستيشن وحدهم كعدت يمهم صافنة

تصرف وهيب ابد معجبني
اجة الكسار كعد بصفي يخابر

الكسار:طبگ مرض وحيل وابو الزايد شگد نصحتك ولك مراد كلتلك ليش تهدم حياتك كاملة علمود ليلة وما سمعت مني وسويت سوايتك ما الومها لأن رفعت عليك دعوة طلاق ولو تخلعك بعد احسن همزين ما عندكم اطفال

سكت يستمع للمقابل ورجع كال
الكسار:خلي تخونك تقبلها؟
هاي هيَ لعد اسكت ولتلوم بيها ولتكول باعتتي احنة نستاهل الي صار بينة

كال اخر جملة وباوعلي سد التلفون
دموع:مرتة حتنفصل عنة؟

هز راسة ابتسمت
دموع:كفو عليها لتبقى ويا رجال مستعمل وان شاء الله بعد فترة اني هم انفصل بس اولد

بقى ساكت چنت احچي بهمس حتى الأطفال ليسمعون
الكسار:اخوچ شبي واكف برة

دموع:خلي عقلة مشوش اريدة يرجع لمكانة

الكسار:خاف ينصرع اليوم عصب وانقهر روح بابا حسوني صيح لخالو

كام حسونات شوي ورجع لازم ايد وهيب وبدون ولا كلمة كعد صافن بالفراغ اندگ الباب راح الكسار يفتحة دقايق ودخل عاگد حواجبة وشايل بزونة حطها بحضن وهيب وكال

الكسار:وداد جابتها كالت انطيها لوهيب وكلة مشكور

وكف مصدوم
وهيب:وينها؟

الكسار:منو

وهيب:وداد وينها

الكسار:ماعرف صعدت بسيارة هيَ واختها

نزل البزونة وطلع من البيت يركض
الكسار:شصاير

تنهدت
دموع:سالفة متسولف ابد وهيب غلط وياها وكسر بخاطرها حقها كلشي تسوي حقها

الكسار:ليش هيچ وياها خطية

انقهر عليها واني ازيد رجع دخل وهيب سحب تلفوني
وهيب:عندچ رقمها؟

هزيت راسي
دموع:مسميتها نحلة

صار يدور على رقمها لحد ما اتصل ثواني ونزلة بحيرة
وهيب:مغلق وين راحت

دموع:راحت لعمامها الله يعينها عليهم

كعد وحضن راسة محتار شنو يسوي يباوع للبزونة ويهز برجلة

من بعد هاليوم وداد اختفت ماكو لا حس ولا خبر عنها

استمرينة بحياتنة اني والكسار واحد مبتعد عن الثاني وحتى واني نايمة ما اخلي يحتك بية خليت بيناتنة حاجز

مر اسبوع الأول واسبوع الثاني وداد ماكو عبالك فص ملح وذاب وهيب احسة راح يموت لأن هوَ السبب بأختفائها والندم حياكلة من اكعد للصلاة الگة بالحديقة فارش يصلي ويدعي ويستغفر ومن سوة هالشي ويا وداد زادت روحاتة للطبيب النفسي

حسيتة صار انطوائي اكثر ويجامل الأطفال من يضحك وياهم

واني متغير شي بوضعي الطفل بعدة بخطر وممكن تصير عندي ولادة مبكرة بشهر السادس لو السابع دكتورتي صارت تضربني ابر حتى تأخر الولادة وكالت مية بالمية ولادتي عملية 

بالأسبوع الثالث الكل نايم والبيت هدوء الكسار كاعد يشتغل بالابتوب وچانت مطر نهاية الشتاء وتمطر مطر قوي

فزيت من نومتي على صوت دگ الباب باوعت للكسار بأستغراب وهوَ مستغرب اكثر مني

چانت الدكات صوتها قوي بس متباعدة كل دگة تجي وراها الثانية بعد ثواني انرعبت من الوضع الكسار اخذ سلاحة واني لبست الروب فوك ملابسي وطلعنة من الغرفة صار كدامنة وهيب لازم سبحتة

وهيب:تسمعون؟

دموع:اي ماعرف شنو بس لا هذول العصابة اجو يمة اطفالي

الكسار:اشششش الزم وهيب

ذب علية سلاح ثاني ونزلو واني وراهم امشي توقف الدگ ع الباب
چان المطر عالي والجو كئيب يخوف

الكسار فتح الباب وتصنمو بمكانهم ماعرف شنو شافو بقو واحد يباوع للثاني بصدمة تقربت حتى اشوف سبب صدمتهم وكفت وراهم ومديت راسي

فتحت عيوني وضربت على صدري من رهبة الموقف محسيت بنفسي غير واني كاعدة اتراجف

جثة كدام باب بيتنة والمطر مبللها!!...

.

يتبعع

القفلة خفيفة ترى بس انتو متتحملون🤡

ضيفو حساب الانستا وقناة التلي