رواية الكسار (سلاسل الغوث) الفصل السادس والعشرون 26 - بقلم لـ ميامي

" لوُ ادرِي هيچ انسِحب من اولهَا
عَافيتي ، صوُتي ، شكلِي هذا الذبلان
هَاي الخساير ياهوُ يتحمَلها ؟ .

قراءة ممتعة🤍
.........................................................

دموع:ابتسم وهز راسة بأيجاب واني ممصدكة باوعت لفرح مصدومة نفسي

:فرحح تذكرييين ؟ الشيخ الي چنت اشوفة وشكم مرة انتِ هم شفتيييي

بقت ساكتة عاگدة حواجبها مهتميت رجعت اباوع لملامحة وهو عيونة تلمع تجمدت بمكاني من سحبني لحضنة يبوس براسي معرفت شنو اسوي خفت من ردة فعل الكسار بسرعة فلتت نفسي من حضنة وباوعت للكسار

خفت اكثر من شفت مَلِك لازمة وهو معصب ويباوعلي بخزرة طگطگت اصابعي وكلت بخوف

:هو حضني اني معلية

راد يتقدم علية بس لزمة مَلِك زين وماعرف شنو همس بأذنة
اجة خالي فهد وكف كدامي مبتسم وحط ايدة على كتفي

فهد:عادي بابا مو حرام هذا خالج اخوية يعني

صفنت ممستوعبة الي سمعتة صدمة جديدة نزلت على راسي احسهم ديتفننون وهم يصدموني بكل مرة رجع حضني بكل قوتة وكال

جناح:كبرانة بابا وكلش متغيرة

مجاوبت بقيت ساكتة احاول استوعب تركني وراح لفرح هم حضنها يسلم عليها وهي عيونها عليه مصدومة

الشي الوحيد الي مداستوعبة شلون خالي وهو ميشبه خالي فهد ابد خالي فهد عيونة ملونة وابيض بس هو عيونة سود واسمر حرت

ترك فرح ورجع علية حضني ويبوس بخدودي
شوي وكمزنة من عاط الكسار

الكسار:كاااافييييي بوس وتشبگ كافي

ضحك ورجع باسني بعنادة خزرة وكال
الكسار:جنح اموتك ترة

يجاوبة يضحك ويطبطب على كتفي
جناح:بنت اختي معليك

سكت يهز بأيدة حسيت حينفجر من العصبية بس من انتبه علية ساكتة وصافنة هدئ وتقرب علية نزل لمستواية وكال

الكسار:انتِ بخير؟

هزيت راسي بأيجاب مسح على خدي
الكسار:مچنت اريدة يجي اليوم ردت امهدلچ الوضع بس صار كلشي بسرعة  سمعيني صوتچ شبيچ انتِ واختچ انخرستو؟

دفعت ايدة عن خدي وكلت
:مبية شي ب بس دخت كل يوم دتصدموني اكثر اذا اكو بعد صدمات كولوها هسة بعد ما اتحمل ترة؟

اجة خالي فهد لزمني من ايدي ولزم فرح ودخلنة للصالة كعدنة وكعد بنصنة حاضن اكتافنة

فهد:اني چنت دازة عليكم رغم رفضة لأن چان حاقد على امكم بس اصريت هو يروح چان كل يوم يجي يحچيلي عنچ انتِ بالذات چان يكول فاهية وخوافة بس فضولية ومن شاف اختچ اجاني يركض يكول فرح تشبه شاهيناز ووهيب يشبهني

چنت ساكتة بس استمع لكلامة من وصل لذكر وهيب ابتسم يهز براسة
فهد:وصدگ وهيب يشبه خالة جناح بسمارة وضخامتة وبسحبة عيونة

رفعت راسي اباوعلة
:واني اكول ليش حسيتك قريب علية من اول مشفتك وبسرعة ارتاحيت بالكلام وياك طلعت خالي؟

ابتسم وعيونة تتنقل علينة اني وفرح
جناح:من اول مشفتكم گلبي الحاقد رف عليكم طولت لحيتي سمرت نفسي اكثر ثخنت حواجبي في سبيل محد يعرفني حتى امچ الي هي اختي من شافتني معرفتني اتمنيت اضمكم ثلاثتكم بگلبي واتمنيت اخذكم وياية ولو كدرت چان سويتها بس اعرف اذا سويتها سياف راح يروح لعصابتة وعصابتة يدورون عليكم وتنكشف الخطة كلها

فرح:عدنة بعد غيركم لولا؟

واحد باوع للثاني ونزلو روسهم بأسف
فهد:عندكم خالكم هود

لزمت ايدة وهمست
:وينة خلي يجي نشوفة هم

ابتسم وباس راسي
فهد:الله يرحمة

حطيت ايدي على حلگي رغم مشايفتة بس زعلت علية
:الله يرحمة شلون مات

تغير شكل وجهة وكلهم واحد صار يباوع للثاني
فهد:اتركي هالمواضيع عنچ

رفعت حاجبي بفضول
:بس اريد اعرف

كام جناح سحبني من ايدي يضحك
جناح:كلشي تغير بيچ بس فضولچ هو نفسة

ابتسمت اباوع لملامحة واتذكر هذيچ الأيام من چنت اشوفة بالشارع من چنت انتظر وهيب

كعد يمنة وصار يسولف ويانة اني وفرح احس فرحانة شوي شوي ديلتم شملنة بس ناقصنة وهيب وحنكون اكثر سعداء چنت حابة اشوف وهيب بيناتنة وانسان طبيعي مثلنة مو مطلوب

طردت هالافكار من راسي وصرنة اني وفرح نحجي ويا خوالنة چان شعور حلو من تحس انتَ بعد عندك اهل واشخاص يحبوك چنت اباوع للكسار بفرحة وهو فرحان لفرحتي

صار الليل والكل كعد بالصالة ورة العشة يحچون بموضوع سيدرا بدون ليجيبون طاري الزواج
اندگ الباب وراح باهر يفتحة شوي ودخل هو وزياد گلبت عيوني من شفتة انوب كعد كدامي وهو يباوعلي بحقد بسرعة بعدت انظاري عنة لأن اذا بقينة هيچ نتعارك

الكسار:اني جمعتكم هنا علمود موضوع البنية سيدرا واخوها

فهد:مستحيل نكدر نتوسطلها ونسويلهم جواز محتاجين اب الطفل

الكسار:ولهذا اني جمعتكم لازم نلگة حل ماكدر اخليها يم هاي العجوز بعد فهموني من تمرض اخوها تكعد بيها ومتكعد وعبالها ميتة من سمعت صوت شخيرها يلا مطمئنة ومن اخذنة داني للمستشفى رجعنة وهي متعرف شنو صاير

كال زياد مبتسم بخبث
زياد:تزوجها واستر عليها

عگدت حواجبي وباوعت للكسار چان يهز بأيدة
الكسار:الله الساتر مو اني الي استر عليها البنية مستورة الحمدلله اني اريد بس نأمن عليها

كمل كلامة واجت عينة بعيني عضلي شفة يعني طنشي طنشتة لأن عبالة يضوجني

فهد:لازم واحد من الموجودين يتزوجها والطفل يتسجل بأسم الي راح يتزوجها

الكسار:بس منو ريس؟ اني محتار اريد واحد ثقة

نزل راسة الريس وكال
فهد:باهر

بسرعة راحت عيوني على باهر چان صاك على اسنانة ومغمض عيونة كام يباوع للموجودين وعيونة حمرة

باهر:دمرتوني تريدون تزيدون بدماري؟

كام ابو لزم كتفة ويحچي بهدوء
فهد:زواج مؤقت بابا

قاطعة وهو يبتعد عنة
باهر:عادي اموت وما اتزوج غيرها سمعتو؟

كلش ضجت على باهر وعلى اصرارهم مكدرت اتحمل كمت وكفت بصفة وحچيت بأقناع

:خالو اذا يحب وحدة متكدرون تجبرو يتزوج غيرها؟ جبرتو ميتزوجها بس لتجبرو يتزوج غيرها باهر عاشق ورجال چبير مو احنة الي نقرر عنة

تقرب خالو فهد علينة ولزمني من كتفي
فهد:كلامچ عين العقل بس احنة نكول زواج مؤقت

:شنو يجبرة يتزوج ويسجل طفل مو ابنة بأسمة؟

نزل راسة وهمس
فهد:هاي هي ما اكول شي بعد هو رجال ويعرف لقراراتة

رجع كعد بمكانة واني باوعت لباهر وكلت بهمس
:افرهم فر الك بهوري الطولول

خزرني وهو يحاول يخفي ضحكتة رجعت كعدت بمكاني ورجع الحديث عن منو يتزوج سيدرا

الكسار:ريس ليش متزوجها انتَ؟

كلنة باوعنة للريس منتظرين ردة هو رفع حاجبة وكال بأستنكار يأشر على نفسة
فهد:اني؟

الكسار:اي انتَ شنو ناقصك وهم لا متزوج ولا شي

فهد:شبيك دتحچي صدگ؟ يعني اني بعد كل هالسنين اتزوج وحدة اصغر من ابني؟

كعد باهر وحط رجل على رجل
باهر:اي شكو بيها بعدين احسن بنية صغيرة وحلوة هم انتَ ترجع شباب وهم اني اريد اخوان

خزرة وشمر علية المخدة لزمتني الضحكة بس مو مال اضحك
فهد:ترة البنية صغيرة اني وين وهي وين ظلم بحقها

رجع كال باهر وهو ناوي يعصب ابو
باهر:بس انتَ هم حلو عيون زرگ وابيض بس شعرك بي شيبات شوي نصبغهم الك مو مشكلة

فهد:باهر تسكت لا تعرف شسوي

غطة وجهة يضحك وسكت رجع كال الكسار
الكسار:ياجمااااعة ترة زواااااج مؤقت

كام زياد وكال عبالك مسوي منية
زياد:اني اتزوجها اذا هيچ

كلها باوعتلة ومحد قابل
فهد:انتَ اكعد ممشمول بهالكلام

زياد:وليش ممشمول؟ هي تريد تتزوج حتى تطلع من العراق انوسها وتونسني بهالفترة وبعدها انتهت راحت

بس كال هيچ كام الكسار دفرة
الكسار:حيوان شوكت ترجع خوش ادمي؟ البنية يتيمة وبعد متتحمل هالشي بعد الاشياء الي صارتلها

زياد:شبيييك ترة داسويلكم زين

فهد:منريد زيناتك انطمر واكعد

كعد يهز برجلة واني منقرفة من عندة تقربت همست بأذن فرح
:سمعتي شكد قذر؟

فرح:لعبت نفسي من عندة ومن تفكيرة ايييع

هزيت ايدي ورجعت استمع لكلامهم
فهد:عندي حل يرضي الجميع واحد لا متزوج ولا يحب ولا چبير بالعمر وشخص زين

الكسار:منو؟

فهد:بس كون يقبل

مَلِك:يمكن عرفتة

ابتسم الريس وكال بهدوء
فهد:شنو رأيك جناح؟

تحولت انظارنة للشيخ چان مصدوم
جناح:فهد

فهد:مؤقت والله بس فترة حتى يطلعلهم جواز ويسافرون

نزل راسة يتنهد
جناح:والبنية موافقة؟

الكسار:البنية اذا شي لمصلحتها توافق بس كول انتَ موافق؟

سكت ثواني ورحع كال
جناح:موافق اذا شي بي عمل خير اكيد اوافق

بانت الفرحة بوجوهم واكثر اثنين ارتاحو خالي فهد وابنة باهر رجع المي لوجههم والكسار اطمن

من صارت الساعة 11 بالليل ودعنة الكل ورجعنة للبيت طول الطريق أحاول استوعب مرة اضحك ومرة اصفن لحد مفززني صوت الكسار

الكسار:ها اجت الحالة؟

باوعتلة مفاهمة
:يا حالة؟

الكسار:دتضحكين وحدچ شكو

ابتسمت ورديت
:داكتشف اشياء حلوة ديصير عندي عائلة چبيرة

سكت مجاوبني حسيتة ضاج بس اني چان قصدي هو منهم هو عائلتي هماتين اصلاً لو ما هو اني بحالة يرثى لها لأن هو الي كبرني ودرسني ودللني فهمني غلط

رجعنة للبيت غيرت ملابسي ودخلت بفراشي اريد انام وهو دخل وراية شاد النونة نزع ملابسة ضل بالداخليات واجة تمدد يمي يتنتور

الكسار:باچر معندي دوام وانتِ هم معندچ اريد انام ماريد ازعاج

كال هيج وحط ايدة على عيونة واني رفعت حاجبي وگرصتة بأيدة
:اني اسوي ازعاج مو؟

باوعلي بخزرة
الكسار:اريد انطمر انطمري هم

تكتفت وكلت بعناد
:ماريد انطمر اريد ابقى كاعدة اتابع فلم لو ارگُص لو اريد اكُل معليك

حط ايدة على شواربة مبتسم
الكسار:يلا لعد كومي رگصي

عضيت شفتي بفشلة رجعت تمددت وغطيت راسي وكلت بهدوء
:تصبح على خير

همس ومبين يضحك
الكسار:وانتِ بخير

سكتنة احنة الاثنين اني منمت وهو بس يدخن
التفتت علية باوعلي ببرود نزلت عيوني عنة وحچيت بهمس

:ترة اني قصدت انتَ هم من اهلي هو انتَ صح مرات تسوي اشياء تأذيني وتجبرني على اشياء بس هم ما انكر وجودك بحياتي

ابتسم وصار يمشي اصبعة على رموشي
الكسار:انتِ تكرهيني دموع؟

نزلت راسي ماعرف شنو اجاوبة لا كدرت اكرهة ولا كدرت احبة مثل ميريد احس نفسي ضايعة وخايفة تلوحني نارة

تنهد وسحبني لصدرة
الكسار:مومهم حبچ ولا مهم كرهچ المهم عندي اني احبچ

سكتت وهو هم سكت نمت على صوت تنهيداتة
كعدت على صوتة

الكسار:اششش شبيچ فهميني

فتحت عيوني اباوعلة مستغربة
:شكو؟

الكسار:دتبچين دموع رجعتي تبچين وانتِ نايمة

:اني چنت ابچي؟

هز راسة يمسح بدموعي
الكسار:هاي الحالة دتتكرر وداخاف عليچ

:مبية شي يمكن چنت احلم

الكسار:كومي غسلي وجهچ واخذي علاجچ

خزرتة وكلت
:لا ما اخذة

رفع حاجبة واردف
الكسار:وليش

:بس اخذة تسوي اشياء مو حلوة اعرفك

كال وهو يحاول يخفي ابتسامتة
الكسار:لا ماسوي شي لتخافين اريد انام

اطمنت كمت غسلت وجهي ورجعت لگيتة مجهزلي العلاج والمي اخذتهم وحدة وحدة ورجعنة نمنة وهو مبين قلق علية

مر اسبوع كامل وبهالاسبوع كل يوم وحدة تجي للثانية اني وفرح ومرات نتجمع كلنة خوالي يجون وباهر
البچي واني نايمة ديتكرر ويزيد علية بس اني لا احلم ولا احس بشي ماعرف ليش دابچي

اليوم الكسار راح جاب سيدرا العصر فرحت بجيتها حضنتها عبالك اختي صارت كعدت يمها نسولف واطمئن عليها شوي والكسار فتح الموضوع وياها

الكسار:شوفي خوية سيدرا جواز مايصير يطلعلكم لأن اخوچ بعدة قاصر يحتاجون الأب او شهادة وفاتة ردت اخذها من عمامچ بس رفضو رفض قاطع ف راح اكول شي واتمنى تثقين بية

سيدرا:شنو كول

الكسار:اكو واحد مو غريب وشخص طيب وزين يريد يتزوجچ

بس كال هيچ نزلت راسها منزعجة
سيدرا:عمو اني مداطيق الزلم كلهم ماكدر اتزوج

الكسار:زواج على الورق ومؤقت

رفعت راسها تباوعلة وكالت بحدة
سيدرا:هو كال على الورق بس الزلم مو امان

هز ايدة يضحك
الكسار:مشكورة

عضت شفتها من استوعبت شنو كالت
سيدرا:مداقصدك داقصد الزلم

مكدرت تمددت على القنفة اضحك وهو منزل راسة يضحك حسيت بالأنتماء من لگيت وحدة تچفص مثلي

كالت وهي تحاول تعدل كلامها
سيدرا:اقصد باقي الزلم وهاي انتَ لا ممحسوب عليهم

مكدرت وكعت بالأرض اضحك وكلت عود اصححلها
:تقصد انتَ مو زلمة نفس باقي الزلم

وكف يغم بنفسة
الكسار:امداني اذا اتناقش وياچن امداني وهاي عود تريد تصحح كومييي

رجعت كعدت على القنفة خليت وجهي بظهر سيدرا اضحك

الكسار:كافي دموع خلي نحچي

هدئت نفسي وكعدت زين وهو رجع يحچي وياها
الكسار:شوفي خوية الرجال يصير خال دموع اسمة جناح وهو معندة مانع والبارحة هو خابرني عليچ يكول جهزت البيت والغرفة مالتها هي واخوها واذا توافق اليوم يجيب الشيخ يعقد عليچ

سيدرا:بس عمو اخاف يطلع نفسهم؟

الكسار:اني اضمنة الچ

سكتت منزلة راسها تفكر بالموضوع واحنة تركناها براحتها بالنهاية هالشي حقها والي مرت بي مو شوية

ربع ساعة ورفعت راسها متوترة وكالت
سيدرا:موافقة بس عندي شروط

الكسار:كولي واحنة بخدمتچ

رجعت نزلت راسها خجلانة
:احچيهم الدموع ودموع تكُلك

هو فهم الموضوع اخذ داني وطلع
بس طلع تقربت عليها وازمت ايدها

:كولي كُل شروطچ ولتخجلين

كالت بتوتر
سيدرا:دموع اني ماريد زواج حقيقي ماريدة يلمسني اريد اني بغرفة وهو بغرفة وكون ميرفع عيونة علية ماريد ارجع احس بأحساس الخوف

:حقچ ومحد يكدر يلومچ

سيدرا:وماريد ينزعج من داني لأن داني دوم يبچي وهم ماريد يعيرني بالماضي وهو يعرف اني صار عندي طفل بالحرام ميت؟

:يعرف اكيد ومعندة مانع بالنهاية هذا مو ذنبچ وخالي اكيد لا حيعيرچ ولا حينزعج من طفل

كالت بتنهيدة
سيدرا:اذا هيچ موافقة

ابتسمت وكمت عنها رحت ادور الكسار لگيتة بالمطبخ مكعد داني على الطاولة وهو كدامة يحچي ويا وياكلون

الكسار:اي واجة الذيب اكل جدة ليلى ونام بمكانها ومن اجت ليلى تفاجأت بوجود الذيب وراد ياكلها بس ليلى شردت و

راد يكمل وانتبه لوجودي بسرعة اختفت ابتسامتي وحكيت راسي
:كالت شروطها

الكسار:تعالي احچيلي لعد

كعدت يمهم وحچيتلة شروطها كلها وهو يهز راسة بتفهم
الكساز:سهلة واضمنها الچ خالچ موافق على كل هالشروط

:ان شاء الله

انطاني داني وطلع يجيب عشة لأن حيجون فرح وعائلتها وخوالي وباهر واني رحت كعدت يمها نسولف طبيعي

صار المغرب واجو فرح وزوجها وابنها عرفتها على سيدرا وبسرعة اندمجو سوية وحسن تونس على داني
شوي شوي واجو كلهم وهم عرفتهم على سيدرا شفت التوتر الي بعيونهم هي وخالي هي متوترة وخجلانة احسها تريد تبچي

قبل العشة دخل الكسار سلم عليهم وكال
الكسار:الشيخ اجة حتى يعقدلكم

بسرعة نزلت دمعتها ولزمت ايدي بقوة خالي انتبه عليها تقرب علينة وكال

جناح:هالزواج لمصلحتچ ومصلحة اخوچ معندي غاية سوء عليچ انتِ بمكان واني بمكان فترة وانتو تسافرون وينتهي كلشي

كالت بدون مترفع راسها
سيدرا:اخاف تخلف بكلامك

حط ايدة على صدرة وكال بثقة
جناح:افااا مو زلمة ولا على وجهي شوارب اذا خلفت بكلامي وبدر مني فعل انتِ رافضتة

هزت راسها مطمئنة لكلامة
طلعو كلهم وهي كعدناها يم الباب تنتفض واني وفرح نهدي بيها اجة الشيخ وعقدلهم وصارت بالشرع زوجتة

هنا كعدت تبچي خايفة على اخوها خايفة يطلع مو زين وياها ويأذي داني واحنة نحاول نقنعها مراح يصير شي من هذا

دخلو ولگوها تبچي اجة خالي كعد كدامها يحچي وياها
جناح:مو قبل شوي نحچي واتفقنة بوية؟ والنبي تنعمي عيوني وتنكسر ايدي اذا مديتها عليكم وانخرس اذا رفعت صوتي بوجهكم انتِ وداني

الكسار:يابة اني اضمنة الچ ترة اني وجناح عشرة عمر اعرفة اكثر من ميعرف نفسة واني ودموع اهلچ لتنسين هالشي

من سمعت كلامهم هدئت بس متباوع لوجه خالي ماعرف خجل خوف توتر وحتى خالي مچان يباوعلها طول الوقت منزل راسة

صبينة عشة وكعدنة اني صرت بين خالي جناح والكسار وخالي كل شوي يحچي وياية والكسار ينافخ لأن مداحچي ويا ردت اضحك بس اعرف يدفني

من كملنة عشة الزلم راحو للصالة سوينالهم چاي وقدمنة الهم واحنة بقينة بالمطبخ ننظف

:سيدرا يعني شلون شفتي خالي كـ نظرة اولية؟

سيدرا:ماعرف بس مبين طيب ماكو داعي اني احچي ان شاء الله يبقى زين هيچ

فرح:ترة حسب الي شفتة من عندة هالفترة جناح حنون وطيب وحتى عيونة مرفعهم عليچ ف اطمئني

سيدرا:الله كريم بس اريد اروح للبيت هسة تعبانة

:هسة خالي ياخذكم

بس كلت هيچ تجمدت بمكانها
سيدرا:اليوم؟

عگدت حواجبي
:لعد شوكت كُلشي جاهز غرفتكم والبيت

سيدرا:ل لا دموع مو اليوم ماريد

فرح:بالعكس روحي من اليوم حتى يومين وتتعودين عليه

سيدرا:بسسس اخاف

سكتنة منعرف شنو نگول تركت الي بيدي ورحت للكسار باوعلي مستغرب
:عادي نحچي شوي؟

هز راسة واني طلعت كعدت على الدرج انتظرة دقايق معدودة وطلع وكفت على حيلي

الكسار:شكو بيچ شي؟

:لا بس سيدرا متقبل تروح اليوم ويا خالي

عگد حواجبة واردف
الكسار:ليش متقبل تروح ترة كلشي جاهز حتى اغراض بغرفتها جهزلها

:تكول خايفة

حط ايدة على فكة يفكر شوي وكال
الكسار:روحي كعديها على المرجوحة بالحديقة اخلي خالچ يحچي وياها افضل عندة اسلوب يقنع الميقتنع

بدون تفكير رجعت للمطبخ غمزت لفرح بس مفهمت شنو
:سيدرا تعالي نطلع شوي للحديقة الجو حلو

سيدرا:اطلعو انتو

سحبتها من ايدها واخذتها للحديقة وهو مستغربة مني كعدتها على المرجوحة وكلت بأبتسامة

:كعدي هنا اني وفرح رايحين نجيب اشياء ناكلهم ونجي

قبل لتحچي سحبت فرح ودخلنة جوة صار خالي بوجهنة غمزتلة وكلت

:سوسو برة شيخي

ضربني على راسي بخفة يضحك وطلع لبرة واني فهمت فرح الموضوع ورحنة للصالة كعدنة يمهم كل وحدة كعدت بصف زوجها

تقرب الكسار وهمس
الكسار:ديسولفون؟

هزيت راسي بأيجاب باوع يمين يسار شاف الكل ملتهي غمزلي وكال
الكسار:بعدين اريدچ بفد شغلة

گلبت عيوني وگرصتة بأيدة ضحك بخفة ورجع يسولف وياهم
نص ساعة ودخلو جناح وسيدرا

جناح:يلا يابة احنة رايحين

كام الكسار سحب جناح على جهة يحچي ويا واحنة ودعنة سيدرا وبعدها اخذها هي وداني وراحو والباقيين هماتين راحو واحنة صعدنة فوك نريد ننام اني تمددت على الچرباية وهو راح للكنتور شوي واجاني مبتسم

الكسار:كومي يلا

رفعت حاجبي وجاوبتة
:وين

همس بصوت راهي بهز بحواجبة
الكسار:رگصي

فتحت عيوني وهزيت راسي بالرفض
:ماريدد

سحبني من ايدي وكفني كدامة وحط بأيدي بدلة رقص بيها ليرات مثل مال المصريات

الكسار:چنتي ترگصين عادي وهسة متقبلين؟

:اي ماريد وخر نام باچر ورانة دوام

الكسار:نلحگ على الدوام دكومي ونسي نفسچ شخسرانة

عاندت وهو يحاول يقنعني اخر شي طفح الكيل عندة راح فتح اغنية وجبرني البسها وارگُص واني كلعادة بسرعة اندمجت بالرگص صرت ارگُص ومحاسة بشي

موكفت لحد ما انطفت الاغاني الهث وعيوني راحت على الكسار چان يباوعلي مبتسم

الكسار:لوحة فنية انتِ مو بنية كلشي بيچ داخل بگلبي قبل عقلي

:تعبت ترة

حك طرف حاجبة وتفاحة ادم تصعد وتنزل
الكسار:واني تعبت عليچ

كام تقدم علية رجعت لورة خطوتين بسرعة سحبني من خصري وقربني لناحيتة راحت ايدة على سحاب البدلة وهمس بأذني

الكسار:باچر العصر عدنة مراجعة للدكتورة

هزيت راسي متوترة فتح سحاب البدلة وكال
الكسار:تقبلين نحاول؟

خليت ايدي على صدرة دفعتة بخفة
:اريد انام وراية دوام

هز راسة وباسني بطرف شفتي
الكسار:براحتچ يلا غيري ملابسچ وتعالي

اخذت ملابسي ورحت للحمام بدلت ورجعتة بس دخلت فتح ايدية ابتسمت بخفة ورحت دخلت بحضنة اعرف اذا رفضت حيحضني غصب

نمنة وثاني يوم داومنة طبيعي اني مچان عندي صديقات چنت انطوائية بالدوام بعد موضوع رونق مكدرت اصادق بنية فقدت ثقتي بالكُل

من انتهى الدوام اجة اخذني وطول الطريق منطلق يسولف وياية

الكسار:ادعي نروح وتبشرنة انتِ متحسنة حالتچ ولو شوي

چنت بس اهز براسي مجاملة لأن مداحس نفسي جاهزة للطفل على الاقل خلي يخليني ادخل 20 سنة ماعرف ليش مستعجل

رجعنة للبيت تغدينة ونمنة والعصر اخذني للدكتورة كعدنة ننتظر سرانة چان اكو اطفال ونسوان حوامل ندسني وكال بحماس

الكسار:تخيلي دموع تصيرين حامل وبطنج تنتفخ وترجعلي عجينتي

:لااا كون ميصير عندي عجينة على كولتك گوة تخلصت منها

ضحك يهز براسة
الكسار:انتِ بكل حالاتچ حلوة هي گوة

ابتسمت ونزلت راسي
اجو دورنة دخلنة اني ويا اول شي سوتلي سونار وهو وكف على راسي ويهز برجلة متوتر دقايق وكالت الدكتورة

الدكتورة:امسحي بطنچ وتعالو كعدو

راحت كعدت على مكتبها واني مسحت بطني ورحنة كعدنة
الكسار:ها دكتورة بشري؟؟

الدكتورة:اكو تحسن بسيط بحالتها واذا تستمر على العلاج والمراجعات تتحسن كُلياً

لزم ايدي فرحان
الكسار:الحمدلله

الدكتورة:ماما دموع بعدچ تحسين ببرود من العلاقة الزوجية؟

هزيت راسي
:اي لسة

الدكتورة:لتخافون المهم اكو تحسن بحالتها مدام تحسنت بشكل بسيط حتتحسن اكثر وينور طفلكم بس ها اذا صار عندكم طفل اريد البشارة

الكسار:بعيوني والله احسن هدية الچ بس يجي او تجي

ضحكت ورجعت كتبتلي حبوب جديد وكالت
الدكتورة:ارجعو حاولو اكثر ترة هالشي هم يساعد وهذا الحبوب حيساعدچ انتِ قبل نص ساعة من العلاقة لازم تاخذي

باوعت للكسار چان متونس عرفت شنو ببالة صرت الطم بداخلي
طلعنة من يمها كعدني بالسيارة وركض اشترة الحبوب واني العن حظي وافكر شلون اتخلص من هالشي

رجع يوزع ابتسامات واني انزل راسي ماريد اباوعلة
وصلنة للبيت تركتة بالسيارة ودخلت جوة وهو دخل وراية يغني

الكسار:اويلي عيونها تموت تكتل هاي البنية
اويلي احترگ گلبي بنار جيبولي الاطفائية
مادري البنية منين واتصور عراقية

تأفأفت مزعوجة اجة كعد يمي يتحرش دفعتة وكمت
:روح جيب عشة م مابية اسوي شي

الكسار:نطلع نتعشة برة؟

:لا تعبانة اقصد نعسانة رايحة انام مو تكعدني

رفع حاجبة عرف داتهرب كام لزمني من ايدي بخفة
الكسار:لتتهربين دموع خليني فرحان بتحسنچ

ابتعدت افرك بأصابعي
:مداتهرب بس نعسانة

هز راسة مبتسم
الكسار:تمام روحي نامي مو مشكلة

تركتة وصعدت فوك مچنت نعسانة ولا اريد انام بس داتهرب شكد نصحتني فرح بس مداكدر ابد

غيرت ملابسي وتمددت غطيت راسي سويت نفسي نايمة واني اتصفح بالتلفون احاول انسى

مرت ساعة واني مندمجة اتابع فيديوهات مكياج وسمعت باب الغرفة انفتح طفيت التلفون وغمضت عيوني اتماثل النوم
حسيتة رفع الغطة ونام وراية حاضني من ورة بقوة وتقرب لأذني وهمس

الكسار:اعرف منايمة ماريد شي منچ ترة كومي بس اكلي

زفرت نفس خجلانة من افعالي ويا
:ماشتهي

ابتعد عني وكال ببرود
الكسار:كومي اكلي دموع جبتلچ كباب ولبن مو تحبي؟

التفتت اباوعلة وهزيت راسي ابتسم وباسني بخدي
الكسار:لعد كومي يلا

كام ومدلي ايدة لزمت ايدة ونزلنة سوية وكعدنة ناكل وهو يضحك وياية وممهتم للموضوع صفنت بيها اذا يريد هالشي مو من حقي امنعة وحتى بالدين ممنوع وصرت اتذكر كلام فرح وتوصياتها

قاطع تفكيري وهو يقرب لگمة لحلگي
الكسار:يلا اكلي زين

ابتسمت واكلتها من ايدة وكلت
:كسوري؟

صفن بوجهي اول مرة اكولها بعد الي صار قبل شهر عيونة لمعت واضح چان مشتاق يسمع لقبة بصوتي

الكسار:يا سواد عيونة

لزمت ايدة بتوتر ردت احچي ودگ تلفونة تأفأف وجاوب
الكسار:خييرررر حتى بالليل ما ارتاح منكم
وينة باهر يعني

كمز بصدمة وعاط
الكسار:چذااااااااااب

كمزني وكفت على حيلي مشغول بالي على باهر وهو يروح ويجي شوي سدة وكال مستعجل

الكسار:نامي لتنتظريني

مشيت ورة
:وين شكو شبي باهر

عض اصبعة والتفت علية
الكسار:باهر رايح بنص الليل يخطب حبيبتة وحدة وصايرة عركة ومتجمعين على باهر ومضروب بس احنة رايحين ونعلمهم شلون يضربون شخص اعزل اذا ما حظهم تطيحه ما اطلع غوث

كال هيچ وطلع يركض كعدت بالصالة بالي مشغول كمت شلت الاكل ضميتة واخذت تلفوني اتصل بي وماكو خفت عليهم كلهم

3 ساعات النوم ما اجة لعيوني خايفة وبس كاعدة واهز برجلي من التوتر والخوف
اخيراً دخل بس دخل معصب وميتحاچة كعد بصفي يدردم بصوت ممسموع بقيت ساكتة ليلوحني شرار من نارة

انتبه اهز رجلي بسرعة لزمها وعاط
الكسار:لتهزيييييين ذيل الچلب موتييييينيييي

كمزني بحيث جمدت بمكاني حتى النفس صرت اجرة بصعوبة حتى لا اطلع صوت واني اتنفس
نص ساعة وهدئ بس يستغفر حط راسة على رجلي ومد ايدة لخدي

الكسار:اسف بس معصب وانتِ صرتي بوجهي

مجاوبتة عود زعلانة بسرعة كام واخذ ايدية يبوس بيهم ويعتذر
الكسار:حقچ تزعلين بس والله محسيت بنفسي من عطت بوجهج

:وخر وخر اني شعلية لو اني كيس ملاكمة وعياط تجي معصب من فلان تعصب علية

الكسار:تمام شنو تريدين وتسامحين زوجچ حبيبچ ابو بيتچ

رفعت حاجبي وكلت اهز بأيدة
:اريد اضربك كون هيچ بالحزام وعلى ظهرك على ظهرك ازورگك تزورگ

غرس اصابعة بخصري وكال بغمزة
الكسار:شنو رأيچ ازورگچ بغير طريقة اني شاطر بيها

گلبت عيوني ودفعتة عن رجلي
:احچيلي شنو صار وياكم

ورث جگارة وكعد
الكسار:ال**** رايح عود يخطب منهم لازمي بالباب متجمعين علية 7 نفرات وضاربي بس رحنالهم خلينة امهاتهم تبچي عليهم ولو ما الريس جاي چان بعدنة نضرب بيهم

ضربتة على ايدة بخفة
:بس لتفشر زين وباهر شلونة هسة؟

الكسار:مابي شي چنة حصان هذول مايعين ميعرفون يضربون زين تخيلي ولا كدمة بجسمة

:ايييع اتخيلهم هسة لازگين شعرهم بتفلة وريحتهم ليمون من گد ما حامضين

جسمة اهتز يضحك علية واني على الواهس ضحكت
الكسار:يولون كومي نامي ورانة دوام يلا

تركتة وصعدت قبلة وهو اجة وراية ونمنة
ثاني يوم هم اخذني للدوام ومن انتهى رجعني للبيت وهو راح مچنت اشتهي اكل ولا اريد انام اتصلت على سيدرا وبسرعة ردت

:هلا بزوجة خالي الموقرة شلونچ

كالت بخفوت
سيدرا:هلا دموع تمام اني انتِ شلونچ

:ماشي الحال شلونكم انتِ وخالي

تحمحمت وسكتت ثواني واجاني صوتها
سيدرا:ها رحت للغرفة احسن

:خالي يمچ چان؟

سيدرا:اي واستحي احچي كدامة

:امداچ تعالي احچيلي يلا حچيتو لا

سيدرا:كلامنة محدود هيچ افضل بس للأمانة عيونة ميرفعهم علية بس من يطلع يوصيني على داني ويقفل الباب ويروح يعني مشفت من عندة شي مو زين

:يعني مرتاحة؟

سيدرا:الحمدلله والشكر

ارتاحيت من سمعت كلامها صرنة نحچي شوي وراحت
بس سديتة اتصل الكسار جاوبتة بتململ

:الو؟

الكسار:وجع بگلبي كولي امين

سكتت مكلت امين وهو ضحك
الكسار:شعجب مچفصتي وكلتي امين فاتتچ هالمرة

:اني مو شريرة نفسك

كال بستهزاء
الكسار:اوي منچ اوي المهم ست دمدم اخذتي علاجچ؟

خليت اصابعي بحلگي نسيت هو من سكتت عاط
الكسار:ما اخذتيهمممم ان شاء الله ؟

:نسيتهم

الكسار:استغفرالله استغفرالله دمووووعععع اني جاي بالطريق اذا لگيتچ مماخذة علاجچ اموتچ ترة حاسبهم وحدة وحدة ومحمد افنيچ

:حاخذهم شبيك اصبر

الكسار:يلا كومي وهااا اخذي الحباية الجديدة

رفعت حاجبي مفاهمة
:يا جديدة؟

كال واحس گوة حابس ضحكتة
الكسار:الحبوب الي وصفتة الچ الدكتورة يلا اني جاي مع السلامة

فهمت قصدة صرت انافخ عود صرت قوية دفرت الطاولة برجلي انوب تأذت رجلي والطاولة متحركت

كمت اخذت العلاج كلة حتى الحباية بس حبيت انتقم واخبث عليه شوي اجتني فكرة جهنمية فتحت شعري ونزعت ملابسي  ونزلت جوة للمطبخ كسرت بصل ومسحت جسمي بي رگبتي وبطني وحتى شعري صارت ريحتي بصل وهو ميحبها

ضحكت بشر تركت البصل ورجعت صعدت فوك انتظرة يجي اريد انتقم بشي بسيط حخلي يتركني وميتقربلي

سمعت صوت سيارتة اجت طفرت لبست دشداشة تسحل وراية ولونها فسفوري لزمتني الضحكة على نفسي اخذت تلفوني سويت نفسي مشغولة بي دقايق ودخل حابس ضحكتة

الكسار:هلا ببصلايتي

فتحت حلگي مصدومة تقرب علية وانفجر بالضحك
:شبيك

كح وتقرب يشتمني
الكسار:حتى ريحة البصل تخبل عليچ

احتقن وجهي
:شنو

ضحك اكثر وطلع تلفونة وحطة كدام وجهي وصدمني صدمة عمري چان تصوير بالمطبخ واني طالعة بدون ملابس وامسح جسمي بالبصل حطيت ايدي على حلگي ممستوعبة

:هاي شنو!!

كال مستهزء بية
الكسار:هااااا نسيت اكلچ اعذريني حبيبي بس البيت بي كاميرات

ضربت على خدي
:عزا العزاني

نزل لمستواية عاض شفتة
الكسار:المطبخ بي الصالة بيها الغرف بيها الشارع بي الممر الي بي الحمامات هم بي

رجعت ضربت على خدي
:صخام الصخمني

صرت اتذكر شكم مرة طلعت من الحمام بدون ملابس وشكم مرة ادخل لغرفتنة انزع ملابسي مأمنة لو من ادخل للغرفة واسوي اشياء غريبة ارگُص لو احچي ويا المراية ومرات العب ويا الدبدوب مالتي وامثل

باوعتلة اريد ابچي
:بالحمام هم اكو؟

دخل شفايفة لجوة حلگة واردف
الكسار:لا مع الأسف بس افكر بيها

كمت ضربتة على صدرة
:شگد اييييييييييييع انتَ منحرف

كعد وحط رجل على رجل
الكسار:والله اني رجال شغلي خطر لازم كاميرات ببيتي

خزرتة وهو يحاول يخفي ابتسامتة كام وشالني
الكسار:امشي نسوي سبيحة وبعد لتعيديها

جريتة بقوة من شعرة وعطت
:نزلنيييييي

ولا اهتم اخذني للحمام قفل الباب وحط المفتاح فوك الدوش اريدة يعتقني وماكو سبحني غصب ويضحك علية وهنا ادركت انقلب السحر على الساحر

چان كُل ميشوف الحروق الي بظهري يبوسهم وجسمي يكزبر
كملت لفني بالمنشف وخلاني انتظرة يسبح درت وجهي عنة ادردم

:خليني اطلع اريد ارووووح
شبيك انتَ مخبل؟
اريد اطلع ارييييييييييد اطلعععع

ولا عبالك يسمعني استفزني بشكل
من كمل يلا طلعنة لا ملابس ولا شي بس المنشف ساترنة ردت ادوس بطنة غثني ضجت من نفسي كل ما اريد اسوي شي يزعجة انزعج اني

رحت للكنتور اريد اطلعلي ملابس بس سحبني باوعتلة رافعة حاجبي
:شكو؟

حاوط وجهي بأيدة وكال بصوت راهي
الكسار:اخذتي علاجچ كلة؟؟؟

هزيت راسي بأيجاب ابتسم وجذبني لناحيته
غمضت عيوني من فهمت قصدة
بعد ساعة حط راسة برگبتي يبوس بيها

الكسار:احبچ

بلعت ريگي وكلت بهدوء
:وخر خلي اسبح وانام

رفع راسة يباوع بوجهي وكال بحدة
الكسار:كل مرة لازم تسوين هيچ؟ قبل شوي مبيچ شي شبيچ هسة؟

معرفت شنو اسوي ابتسمت وحطيت ايدي على راسة
:مبية شي اني داخذ بنصائح اختي وداتحسن بس خليني اتعود على هالشي اذا اتعود كُلشي يتغير صدگني

تنهد وهز راسة بتفهم كام وسحبني للحمام
نص ساعة وطلعنة لبسنة ملابسنة وهو كعدني كدامة يمشط بشعري

الكسار:راح يكون كلشي بخير وراح نكون عائلة صغيرة نعوض نفسنا على كل الي عشنا من اهلنة اطفالنة اذا اجو حيكونون محظوظين هواية

نزلت راسي محچيت شي كمل شعري وباس راسي من ورة
الكسار:يلا تعالي نامي دمعتي

هزيت راسي كمنة سوية تمدد وفتحلي ايديه بسرعة تمددت على صدرة وهو حضني بقوة عبالك حطير من ايدة

مرت 3 اشهر على هذا الحال كل اسبوع مراجعة للدكتورة وچان وضعي ديتحسن هواية
واني واختي استمرينة نزور بعض وسيدرا بعدهم مطلعو جوازاتهم لأن صارت عرقلات بيها چان الوضع هادئ بشكل وداحاول اتأقلم ويا الوضع الجديد وللأمانة طول هالفترة الكسار مجبرني على شي اذا كلت ماريد بسرعة يقتنع وبتصرف طبيعي وياية صح علاقتنة مرجعت نفس قبل بس تحسنت شوي

بدلت حتى اروح للدكتورة عندي مراجعة وهو لزم ايدي ونزلنة من الدرج وطول الطريق حاط اغنية ويغني وياها

الكسار:بس انتَ وحدك ليه اغمرني بالحنية
ضمني حبيبي لصدرك اضمك بين ايدية
داعبني وتغازلن وابد متزعلني
تغنيلي وتفرحني واسهر اني وياك

يغني وعيونة علية وكل شوي رفع ايدي باسها حسيت صرنة صدُگ متزوجين

وصلنة وهم كعدنة ننتظر دورنة ربع ساعة ودخلنة وكالعادة اول شي سوتة هو السونار بس هالمرة طولت هواية خفت بية شي صرت اباوعلة وهو وجهة اصفر خايف

اخر شي مسحت ايدها وانطتني كلينكس امسح بطني مسحتها بسرعة ورحت كعدت كدامها ارجف

الكسار:خوفتيني دكتورة مرتي بيها شي؟

ابتسمت تباوعلنة
الدكتورة:لا ابد بالعكس ماكو شي يخوف

باوعتلي ورجعت كالت
الدكتورة:رحمچ جاهز للحمل

فتحت عيوني على وسعهم وباوعت للكسار مصدوم نفسي محچيت شي مشاعري مخربطة فرحانة ماعرف زعلانة محتارة مكدرت احدد مشاعري

الكسار:يعني صارت زينة؟

الدكتورة:التكيس ميختفي نهائياً لازم تعرفون بس حالياً رحمها جاهز وهذا انسب وقت لأن قبل يومين مخلصة شهريتها ابدو بأسرع وقت

باوعلي فرحان سلم على الدكتورة وطلعنة واني بعدني ماعرف شنو اسوي افرح لو ازعل ابچي لو اضحك احس نفسي مجاهزة للطفل بس داشوف الفرحة بعيونة

صعدني بالسيارة واخذني بحضنة
الكسار:فرحتي فرحتين دموع انتِ تعالجتي وابني حيجي ماعرف شنو اسوي وشلون اعبر بس بس اني فرحان هواية

بادلتة الحضن ودمعتي نزلت ديقرر عني ميكول اني قابلة او رافضة حتى مسألني اذا اريد طفل او لا المهم هو يريد

مسحتها بسرعة وبينت نفسي طبيعية
بيومها فرني بغداد كلها فرحان بية ترك شغلة علمودي

ثاني يوم رحت لدوامي باقيلي امتحانين گوة كدرت امتحن زين قررت قرار ممكن يأذيني بس مچان عندي غير حل
بس كملت امتحاني چان بعدة مجاي استغليت الفرصة وطلعت من الجامعة چان اكو صيدلية رحتلها ارجف دخلت واني اراجع قراري چنت خايفة واتذكر فرحتة وكلامة بس ماكدر اسوي طفل هسة احنة بعدنة علاقتنة ممستقرة ولا اني اكدر اتحمل مسؤولية طفل خفت من هالموضوع

شافتني البنية واكفة كالت مبتسمة
الصيدلانية:تفضلي؟

تقدمت عليها وكلت بهدوء
:السلام عليكم

ردت السلام وگوة كدرت انطق صوتي يرجف
:اريد حبوب منع حمل

الصيدلانية:اكو انواع عندچ نوع لو انصحچ بنوع

:لا معندي اول مرة اشتري بس اريدة ميأثر علية

هزت راسها وانطتني شريط بي 30 حباية
الصيدلانية:هذا النوع زين هواية واني اخذ من عندة

اخذتة ودفعت فلوسة واخذت ويا حبوب وجع راس ورجعت خايفة وممرتاحة
خفت من شفت سيارتة كدامي ونزل منها معصب تقرب علية كاز على اسنانة

الكسار:ويييييين چنتييييي

:ه هنا بالهذا ب

لزمني من زندي بقوة وصعدني بالسيارة وانهد بية
الكسار:وييييين چنتييييي بنت الكلب محتار بيچ وبحمايتچ وانتِ تطلعين وحدچ بلا اجاچ واحد من هالأنذال

طلعتلة حبوب وجع الراس ارجف
:ر راسي أذاني هواية و ورحت للصيدلية جبتلي حبوب

خزرني وحرك السيارة وطول الطريق يرزل بية لحد مبچيت يلا سكت عني وصلني للبيت وراح عني واني خايفة من كلشي مداحس بأمان ابد ارتكبت خطأ بكامل ارادتي خطأ ما منة رجعة بعد

امتحنت امتحاني الأخير وبديت اخذ بالحبوب قبل ليتقربلي اطلعلي حجة اكوم اخذ حباية وارجعلة واني ما اباوع بعيونة واقنع نفسي هالشي مؤقت ومحد حيعرف بي بس اصير مرحلة ثانية نسوي طفل اعترف هالشي غلط وچان لازم اخذ رأيه بس اعرف مراح يوافق

استمر الوضع هيچ اسبوع كامل واني اخذ بالحبوب وورة كل حباية الندم ياكلني اكل

بتاريخ 2014/7/22

چنت كاعدة العصر على التلفزيون مسوية گصايب وفرحانة بيهم و انتظر الكسار يجيني راح يجيب كيك ويجي بس تأخر مليت واني انتظرة

الساعة 6 ونص بالضبط سمعت صوت سيارتة طفرت فرحانة رحت للمطبخ شفتة دخل سيارتة طلعتلة مبتسمة

:هاااا جبتلي؟

اختفت ابتسامتي واختل توازني من نزل من السيارة وشفت شكلة
نازع قميصة وباقي بس بالكيمونة والكيمونة البيضة ملياااااااانة دم وجهة بي دم وكفوف ايدية بيهم دم وعيونة حمرة بشكل

بلعت ريگ وكلت بخوف
:ش شنو هذا الدم كسار؟

تقرب علية يشهگ وخطواتة ممتوازنة وبطيئة اني احس رجلية بعد ميحملني وكف كدامي ووكع على ركبتة حاني ظهرة گلبي صار يلعب وبدون ماعرف شنو صاير دموعي نزلت كعدت كدامة واحتضنت وجهة ارجف

:ش شصاير!

رفع عيونة بعيوني وعيونة عبارة عن فص احمر نطق كلمات هدت حيلنة هد

الكسار:انطفت شموعي وانكسر ظهري فوگ كسرة حسن

..يتبعع..

توقعاتكم؟

.
.
.
.
.
.
.
.
.
.

7000كلمة يابة😉😂🫶🏻

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله