رواية الكسار (سلاسل الغوث) الفصل السابع والعشرون 27 - بقلم لـ ميامي

گعدت من الصُبح خايف
أحِس خطواتي ما يمشَن
دِرت وجهي إعله المرايه
مَلامح وجهي مو هيه !
أمس خَليتهن عِدمَن ؟
انه لا شاب لا شايب
ولانه بگد البحِلي
حِرت وياي ، انا بگدمَن ؟

قراءة ممتعة 🤍
.............................................................

دموع:وقفت حائرًا أمام فقدي هل رحلو؟
هل عُدت وحدي؟ ما كُنت لأعيد لكن
عودو وأن كنتم طيف يمُر في احلامي

كلماتة چانت اشبه بجبال انهدت على راسي اتمنيت احساسي غلط اتمنيت مو الي بالي لزمتة امسح بوجهة ارجف خايفة

:ك كسار ل لتكولها انتهي

نزلت دمعتة وسحبني لحضنة يبچي بصوت عالي واني تخبلت صرت ادفع بي ابچي واعيط

:لااااااا كساااااار لااااا اموت كول مو هي كول

ابتعد عن حضني وحاوط وجهي بأيديه يشهگ وكال
الكسار:قتلوهم دموع قتلو اختچ واخوية وابنهم

بس گال هيچ دفعتة بكل قوتي الطم على وجهي
:لاااااااا كذااااااببب لتشاقة حباب ابوس ايدك هستوها رجعتلييييييي مشبعت منها كسااااارر الله يخليك كول كذببببب

نزل راسة يبچي بصوت مكسور وحيل مهدود واني فقدت مصرت اعرف شنو اسوي الطم اصرخ شعري من كثر مفقدت صار يوكع بأيدي

لحد مجتني نوبة صرع خلتني افقد الوعي
الخبر چان قوي علية اختي الي صبرت سنين وتعذبت بغيابها ماتت بعد لقائي بيها بأقل من 4 اشهر

فتحت عيوني عبالي حلم زفرت نفس براحة وحركت جسمي
صرت اباوع بأرجاء الغرفة مستغربة
هاي مو غرفتنة؟ اني وين؟

تذكرت هاي غرفتنة مال بيت اهلة واستغربت اكثر
فزيت من سمعت صوت صريخ نسوان وتكبيرات لبست حجابي ونزلت جوة اركض خايفة

چان الكل موجود نسوان هواااااايةةة خوالي باهر زياد محاوطين 3 توابيت نزلت ارجف ودموعي تنزل ماريد اصدگ ماريد استوعب

وصلت للتوابيت وشفت الكسار كاعد بنصهم لابس دشداشة سودة وشاگها من الطول للطول ويضرب على راسة

الكسار:ثاااااركممم محد ياخذة غيريييييي ثارك يا مَلِك محد ياخذة غيري اذبحة نفس ما ذبحك

رحتلة بصعوبة امشي كعدت كدامة اشهگ
:ك كسار مچنت احلم؟ ر راحو؟

باوعلي وضرب على صدرة بقوة
الكسار:راحو دمووووع راحوووووو قتلوووهم

ضربت على وجهي اعيط
:فرحتيييييي وملكها وحسنها راحوووو الموووتتتت اليةةة اليةةةة

بس كلت هالكلام صار يلطم مثل لطم النسوان ويبچي بحرگة گابلتة وصرنة نلطم فاقدين وحتى الي يكرهنة صار يبچي على حالتنة 3 بيوم واحد

الكسار:تستاهل الطملك ولك خوية مَلِك

ذبيت نفسي على التوابيت اصرخ واضرب نفسي
:معندييييي غيرچ فرحححح والله مشبعت منچ والله ضگت الويل يلا رجعتيلي وييييين عايفتنييييييييي اخخخخخ

اجة خالي فهد لزمني يبچي وخالي جناح وباهر راحو للكسار الي حضن تابوت مَلِك يحچي ويا ويبچي

الكسار:ب بعدة حسن ما اجة مو ردت تشوفة؟ مو كلت من يجي نبشر الحنينة بگبرها؟

جناح:اقرالة الفاتحة خوية وترحملة لتأذي بجزعك

دفع خالي جناح وصار يضرب على التابوت
الكسار:لكككك مَلِك وين رايح وعايفنيييييي منووو بقاليييي يا خوييةةة حسن راححح وانتَ تريد تروح اخذني وياك خليني اروح وياككككككككك

بصعوبة كتفو لأن التابوت انكسر صارت عيونة علية واني نايمة على التابوت ذايبة روحي وبس اباوع وابچي نطق بشهگة

الكسار:عافونة دموع اخوانة عافونة حسن ابو السوالف الحلوة راح

حسيت بوجع بگلبي رفعت نفسي وبدون ليحسون فتحت تابوت فرح وحضنتها بكل قوتي چان الچفن مغطي راسها صارو يحاولون يسحبوني عنها بس مگدرو ابد فتحت الچفن من فوك وطلع وجهة صرت ابوس بيها اخيراً تركوني اودعها وجهة الملائكي چان شاحب واكو كدمات على وجهة

عيونها چانت مفتوحة صرت ابوسهم واعيط
:فاااااتحة عيونها متريد تعوفني متريددددد

لزمني خالي يحاول يسحبني
فهد:كافي بابا اروحلچ فدوة كافي

دفعتة ورجعت ابوس بعيونها ودموعي تنزل على وجهة
:فاتحة عيونچ للدرب ملاكي

چان جلدها بارد وعيونها الزرگة ذبلانة
صار لازم ياخذوها اجو خوالي اثنينهم سحبوني منها بصعوبة واني اضرب بيهم اريد ارجعلها رجعو لفوها بالچفن وغطوها رفعوها باهر ووزياد واثنين زلم معرفتهم واجو عمام الكسار والكسار رفعو مَلِك وحسن واخذوهم

من اخذوهم عبالك انتزعو روحي مني

بچيت ضربت نفسي ضربتهم عطت بس مرجعو خالي جناح راح بس خالي فهد حطني بحضنة يبچي وينعى عليهم انهد حيلي حسيت حياتي رجعت لسوادها

صرت احچي ويا خالي وابچي وهو يبچي ويمسح دموعي
:والله مشبعت منهم راحت وبعدها مشافت وهيب حسن خالو حسن مشاف خالة وهيب بقت متحسرة علينة وهسة احنة حنبقى نتحسر عليهم طول عمرنة

باسني على راسي
فهد:ادعيلهم بابا ادعيلهم

لزمت گلبي وصرخت واني ادخل بحضنة
:اخخخخخخخخخخ بابا اخخخخخخخخخخ سلبو روحي مني

رجعت الطم على وجهي وهو يلزم ايدية جزعت بشكل
اتذكر چانت الدنيا ليل الساعة 9

باد جسمي وفصلت عن العالم كلة صرت بس اتذكر فرح وزوجها وابنها وعيوني على الباب متمنية يجوني

رفعني خالي اخذني للغرفة مالتنة وطلع شفت روان وغيث اجو يمي حاولت وياية احچي بس منطقت ابد بس دموعي تنزل واتذكرهم لحد مملت وطلعت عني بس طلعت غمضت عيوني

ومن غمضت اجة طيف فرح لازمة ايد ابنها وزوجها واكف يباوعلي ويبتسم تقربت علية مبتسمة حطت ايدها على خدي وهزت راسها مفهمت شنو چنت اريد احچي بس لساني معگود ولا هي حچت
بعدها اخذت ابنها وبدون لتلتفت طلعو

رجعت فتحت عيوني لگيت نفسي اشهگ بالبچي
مچان احد يمي رجعت وحيدة مثل قبل ضايعة وبس دموعي تنزل

راحت عيوني على الباب وبچيت اكثر من دخل الكسار حاني ظهرة ومترب وحالتة حالة سد الباب وتقدم علية بدون ميباوعلي

كعدت اناشغ وحچيت من بين دموعي
:دفنتهم؟

باوعلي بعيونة الحمرة والمورمة ونزلت دمعتة
الكسار:دفنت روحي وروحچ دفنت روحنة دموع

حطيت ايدي على حلگي ابچي وهو كعد كدامي ظهرة مكسور
الكسار:دفنتهم بالنجف مثل ميريد ياريت اندفنت وياهم

:منو قتلهم كسار شنو يريد منهم ليش قتلهم وحرمنة منهم

ضرب على صدرة وكال بحدة
الكسار:الثعلب قتلهم واني ماخذ الثار

:كسار انهد حيلي عليهم

حضني يبچي وصرنة نواسي بعض
:والله مشبعت منهم حتى حسن قتلو طفل شلون گدرو

الكسار:اخخخ يا دمووووع ربات الحنينة بسرعة يروحون بقيت بس اني اريد اموت وارتاح

:احچيلي شلون ماتو بس لا عذبوهم

ابتعد وحط ايدة على عيونة وصار يحچي بس ويا كل كلمة تنزل 10 دموع من عيونة

الكسار:چانو رايحين للطبيب حسن مريض على اساس يطلعون ويجون لبيتنة بالرجعة مَلِك اتصل علية وكال غوث ديلحگونة دخلونة بطريق متروك حاولت افهم وين هو بالضبط بس انقطع الاتصال انتشرنة ندور عليهم لحد ما وصلني فيديو من رقم غريب من فتحتة انفجعت چان سيارتهم مگلوبة فتح باب السيارة يضحك اخخخخخ يضحك واني ابچي عليهم راح لأختچ ضربها طلقة برگبتها ماعرفت اذا چانت عايشة لو ميتة بس من ضربها ارتخى جسمها وبعدها راح لحسن الي يجالع وضربة طلقة بعينة هنا ردت اموت مات كدامي قتلة بدون ليرفلة جفن ويكول طفل بريئ
واخر شي راح لملك اخوية عزيز روحي چان فاتح عيونة بس ميكدر يتحرك والدم ينفر نفر من جبينة تدرين شسوة دموع

سكت يضرب على راسة واني فاصلة احس گلبي حيوكف خلص كمل كلامة وهو يضرب نفسة مهدود حيلة

الكسار:ذبحة دموع من الوريد للوريد شلع راسة كدامي چان عايش من ذبحة  وعيونة على الدرب ينتظرني بس مكدرت الحگ مكدرت

كلامة چان كُلش قوي علية صرت اغمض عيوني وافتحهم راسي ثگل والدنيا افترت بية فقدت الوعي تاركة كلشي وراية

ملاكي البريئ من المذنب في رحيلكِ

چنت كاعدة بمكان بي هوى قوي من كثر قوتة الأشجار تريد توكع صافنة بالمكان عبالك دانتظر احد فجأه ايد انحطت على كتفي ردت التفت بس مكدرت صارت تجيني همسات بأذني مفهمتها لكن لفت انتباهي كلمة

:ستبشرين

مكدرت لا انطق ولا اتحرك انحطت ايد ثانية على كتفي الثاني وانهمس بأذني

:ستبشرين بما كتبهُ الله

مفهمت المعنى شنو من راحو عني رجعت اتحرك طبيعي بس الهمسات مراحت مدافهم شي منهم

فتحت عيوني من حسيت بوجع قوي بگلبي صرت اباوع للمكان مستغربة وبس صوت انفاسي تنسمع رفعت ايدي چانت بيها كانونة ريگي ناشف وجسمي متكسر

فزيت من سمعت صوت تعبان يمي
:اششش لتتحركين

وكعت عيني على شخص مستحيل يكون الكسار
عيونة حمرة وجواهم اسود شعرة مخربط وجهة ذبلان بشكل وصوتة صاير يخوف حط ايدة على خدي وايدة ترجف

الكسار:الحمدلله على سلامتچ

بلعت ريگي وعيوني تتنقل على ملامحة
:ك كسر ش شبية

الكسار:ماكو شي ارتاحي لتعبين نفسچ

:ل ليش اني بالمستشفى ك كوم رجعني اريد احضر فاتحة اختي

صفن بوجهي يبلعم ومشدد قبضة ايدة
الكسار:الفاتحة انتهت

فتحت عيوني ممستوعبة
:شلون؟

مسح وجهة محتار انفتح الباب ودخل خالي وباهر بسرعة كام لبسني حجابي اجة خالي باسني براسي

فهد:الحمدلله على سلامتچ

مهتميت لشنو كال لزمت ايدة وهمست بصوت يرجف
: خ خالو كسار يكول الفاتحة انتهت ديضحك علية حتى لا اروح مو

تنهد بقهر وأشر للكسار كام واجة خالي كعد بمكانة لازم ايدي يطبطب عليها

فهد:قل لن يصيبنا الا ما كتب الله لنا فاجعتنة چبيرة وكسرتنة اكبر كولي الحمدلله باباتي هذا اختبار من ربچ اختچ توفت العفو استشهدت في قوله تعالى ولا تحسبنَّ الذين قتلوا في سبيل اللّه أمواتاً بل أحياءٌ عند ربِّهم يرزقون * فرحين بما آتاهُمُ اللّه من فضله زوج اختچ مَلِك الله يرحمة استشهد وهو يخدم وطنة اما اختچ وابنها استشهدو ابرياء الله يرحمهم لازم نستوعب هالشي ونترحملهم بنيتي

رفعت ايدة بستها ارجف
:اعرف ماتو ب بس اريد احضر فاتحتهم اريد ابچي والطم

رفع ايدة صار يمسح على راسي
فهد:بابا الفاتحة صارلها اسبوع منتهية وانتِ انجلطتي جلطة قوية لأن الخبر قوي عليچ ومكدرتي تتحملين چنتي تگعدين تبچين محاسة بنفسچ وبالأبر يلا تنامين اليوم الصبح كعدتي هادئة ورجعتي نمتي وهسة يلا استقرت حالتچ

تركت ايدة مصدومة واحس گلبي حيوگف بس هو دنگ على راسي باسة وهمس

فهد:بشر الصابرين بالصبر شدي حيلچ يا بعد حيلي صيري زينة وكومي صلي وادعيلهم صيري قوية وحاربي حزنچ الحياة تستمر اسندو بعض انتِ وزوجچ والله يعينكم

هزيت راسي وكلت بتنهيدة
:الحمدلله والشكر

فهد:عفية عليچ اعرفچ قوية اكيد مراح تنسين اختچ ولا زوجها وابنها بس استمري بحياتچ مثل متركتيها الشهداء بقلوبنة

باوعت للكسار ومديتلة ايدي تقرب علية يمشي حاني ظهرة انكسر ظهرة اكثر واكثر لزم ايدي وكال بتعب

الكسار:يمچ اني

كلت وشفايفي ترجف اريد ابچي
:لتعوفني انتَ هم

ابتسم يمسح على راسي ومكال شي خالي وباهر ترخصو يلا گدر يحچي

الكسار:معندي غيرچ بعد دموع اني ماعوفچ بس لتعوفيني

:ماروح لمكان بدونك

حط راسة على رجلي يتنهد وكال
الكسار:حسن راح ماعرف وينة الحنينة ماتت مقهورة على ابنها وهسة مَِلك راح واخذ زوجتة وابنة حسن بعد مابية حيل

خليت ايدي على راسة ودموعي تنزل
:اني وياك نصبر بعض على فراگهم الله يرحمهم والله يرجع حسن بالسلامة لا اعتراض على حكم الله

سكت واني سكتت صرنة نبچي بصمت اشوفة تعبان وايدة ترجف

:نام كسار

باوعلي يمسح بدموعة
الكسار:النوم طاير من عيوني صارلة اسبوع ساعة وحدة انام بس

:تتعب هيچ كوم روح نام حتى نرجع لبيتنة ولحياتنة ندعيلهم ونصليلهم

هز راسة وكام يريد يروح للقنفة الي موجودة بالغرفة قبل ليروح دنگ وباس بطني بهدوء

الكسار:ان شاء الله يجي حسن الثالث يعوض مكان الحسنين الراحو

كال هيچ وراح تمدد على القنفة بس عيونة علية غمضت عيوني ضميري يأنبني واحس الله عاقبني لأن داخدعة وهو دينتظر مني طفل حسيت نفسي أنانية داحرمة من ابسط حقوقة وهو طفل

ثاني يوم العصر خرجني من المستشفى واخذني لبيتنة بس عبالك الدنيا باهتة صارت ومحلوة الضحكة فارقت وجوهنة والدموع صاحبت عيونة

مر يوم يومين اسبوع واسبوعين وشهر رجع لدوامة  بس نمشي جسد بدون روح كلشي صار يخنگنة وبكل مكان اكو ذكرة الهم وبكل يوم نكعد نتذكرهم ونبچي

چان فراگهم اشبه بالموت البطيئ

الحبوب تركتهم بعد ما اخذت 10 حبايات فقط اذا يريد يجي الطفل يجي واذا لا حكمة ربي

كاعدة العصر اگلب بصورنة اني وفرح وحسن وابتسم ماريد ابچي قريت البچي على الميت يأذيه بعد 10 ايام على اربعينهم وبعدة جرحهم يلچم

صرت ابوس بالصور واحچي وياهم
:اي ملاكي صرتي ملاك من صدُگ بعد اوعدچ بعمري ما انساچ حبقى انتظر اليوم الي نجتمع بي كل يوم ابوس دمكم الي بملابس الكسار عرفت من حرگة گلبة حتى جثتچ حاضنها باهر يكول يكول راحت اختي

حركت الصور طلعت صورة بيها ضاحكة مكدرت اتحمل نزلت دمعتي بس بسرعة مسحتها

:اروح فدوة لضحكتچ

غيرت الصورة وطلعت صورة جماعية اني وياها وازواجنة وحسن كاعد بنصنة اني حاضنتها ومَلِك الله يرحمة حاضن الكسار ونضحك وحسن صافن علينة

بهالأثناء دخل الكسار تعبان وضايج كعد بصفي يطحن بالجگاير اني بس شفتة دخل طفيت التلفون ماريد يشوف الصور بس يشوفهم يتعب

مرت ربع ساعة وكال بنتر وبدون ليباوعلي
الكسار:باچر رايحين للدكتورة مالتچ خلي نشوف ليش بعدة مصار عندچ حمل

بلعت ريگ متوترة
:بعد وكت كالت الدكتورة حاولو ودنحاول

باوعلي بحدة وكال
الكسار:خاف بعدچ تنزفين والتكيس رجع عليچ؟

:لالا والله بس لازم نصبر شوي بعد

اردف ببرود
الكسار:حجزت بعد باچر نروح وين الله وتكول حامل

كلت امين بداخلي لأن صار مرتين يتقربلي وما اخذهم تركتهم نهائيًا لأن هو مُصر على الأطفال ويلح ويريد بـ اسرع وقت طفل

وكالعادة نمنة بدون عشة صرنة ناكُل وجبة وحدة باليوم لو ريوگ لو غدة وهو اصلاً مصرت اشوفة يجي بالليل ويطلع من الصبح

من صار الصبح كعدت قبلة نزلت سويتلة ريوگ هواية لأن اعرفة مراح ياكل شي غير الريوگ اريدة يسند طولة ليتعب اكثر
كملت الريوك وصعدت اكعدة دخلت على كيف وتقربت بس لزمت زندة فتح عيونة عاگد حاجبة من شافني ارتخت ملامحة

الكسار:هاي انتِ

:صباح الخير كوم غسل وتريگ

هز راسة تركتة ونزلت صبيت چاي دقايق ونزل يخابر وكلامة ممفهوم كعد ياكل ويحچي بالتلفون شوي يعصب وشوي يهدئ

كمل المكالمة شمر التلفون على الميز معصب وصار يفشر مادري على منو هو مچان يفشر كدامي هيچ فشرات قويات بس من عصبيتة مصار يحس بشي

من كمل الريوگ صعد فوگ سبح وبس خلص راد يطلع باوعلي وكال

الكسار:جهزي نفسچ العصر نروح من اجي انتِ مخلصة

عضيت شفتي وكلت بتوتر
:خلي نأجل انتَ تعبان

رفع حاجبة بشك
الكسار:يهون التعب حزن يهون مو مهم تعبي يلا مع السلامة

كال هيچ وراح قفل الباب علية
كعدت بالصالة خايفة يعرف بشي

نظفت البيت وسويت غدة واني اباوع للساعة كل ما تمر ساعة اخاف اكثر واكثر
ونفس كل يوم سويت الغدة وضميتة بالثلاجة لأن محد اكل من عندة

من صارت الساعة 4 العصر صعدت لغرفتي لبست ملابس سودة وادعي ميعرف بشي
گلبي صار يدُگ من سمعت صوت سيارتة وفتح الباب ماكو مفر اخذت جنطتي ونزلتلة وجهي اصفر تقابلنة بالباب

الكسار:ها مكملة يلا لعد

صعدت بالسيارة والندم ماكلني تسرعت بقراري ومكلت لأحد ينصحني تصرفت من كيفي

وصلنة للدكتورة وربع ساعة ودخلنة وهم سوتلي سونار وانتبهت لخوفي وتوتري من كملت السونار خلتني اكعد وصدمتني من صارت تلزم بصدري اباوع للكسار عيونة صارت بگصتة وهي مستمرة عاگدة حواجبها وتفحص بصدري دقايق وكالت للكسار

الدكتورة:ممكن تطلع دقايق؟

الكسار:ليش اكو شي؟

الدكتورة:لا ابد بس انتبهت زوجتك تخجل من احجي وياها كدامك اريد اعرف منها اشياء اذا تسمح اكيد

هز راسة وطلع قلق والدكتورة بس طلع كالت
الدكتورة:تحسين بوجع بصدرچ؟

:خفيف

الدكتورة:دتصير عندچ لعبان نفس؟

هزيت راسي اي سكتت تنافخ راحت كعدت على مكتبها واني رحت كعدت كدامها وصدمتني من كالت

الدكتورة:دتاخذين حبوب منع حمل؟

بلعت ريگ وكلت بتوتر
:لا لا مداخذ

الدكتورة:ماما كولي الحقيقة لتنتكس حالتچ ترة يصير عندچ عقم

مجاوبتها بقيت افرك بأيدية وهي تحاول تخليني احچي
الدكتورة:ترة الموضوع خطير عليچ بنتي كولي دتاخذين لولا حتى اعرف اتصرف واذا مگلتي اكول لزوجچ يتصرف

بس كالت هيچ متت خوف
:لالا اكول والله بس لتكولين لزوجي شي حبابة دكتورة

سكتت منتظرة احچي صرت اكل بشفايفي واحچيلها وصوتي يرجف
:داخذ حبوب منع حمل

الدكتورة:غلط ماما كُلش غلططط شكم حباية اخذتي؟

:عشرة اخذت

الدكتورة:لا حول ولا قوة الا لله بنتي انتِ هسه تعالجتي علمود الحمل ليش حتى تاخذين حبوب

:لتكولين لغوث

باوعتلي بحيرة
الدكتورة:ماكدر ما اكول يكدر يسويلچ تحليل دم ويكدر ياخذچ لغيري واذا اكتشفو اني ضميت هيچ شي حخسر مهنتي جداً اسفة

قبل لا احچي كامت فتحت الباب وصاحت للكسار ودخلت وهو وراها صارت عيونة علية وعلى حالتي خاف اكثر حط ايدة على راسي وكال

الكسار:انتِ بخير

نزلت راسي ابچي كلتلة الدكتورة يكعد وكعد كدامي
الكسار:فهموني شكو مرتي بيها شيييي؟

الدكتورة:بس اهدئ حتى اكدر احچي وياك

مسح على وجهة يستغفر
الكسار:وهاي هدئت بس طمنوني

خليت ايدي على حلگي اباوعلها ونظراتي تتوسلها متكول نزلت راسها عني

الدكتورة:زوجتك رحمها بعدة جاهز للحمل چنت اتصور اذا اجيتو لهنا بعد متحسنت تكون حامل بس المهم بعدة جاهز بس

كالت بس وسكتت والكسار تخبل
الكسار:بس شنوو بيهاااا شييي

الدكتورة:بس زوجتك دتاخذ حبوب منع حمل

من كالت هيچ باوعلي مصدوم نزلت راسي عنة ابچي نظراتة قتلتني

سمع منها باقي التفاصيل وكام بدون أي كلمة واني كمت ويا خايفة وابچي طلعنة من يمها هو يمشي سريع

صعدنة بالسيارة وهم ساكت سكوتة قلقني
:كسار حبا...

حط ايدة على شفايفة وهمس
الكسار:اششششششش

خفت اكثر واكثر چان يطحن بهالجگاير ويسوق سريع
وصلنة للبيت وكف السيارة وكال بهدوء

الكسار.وراية

نزل قبل لا انطق نزلت ورة ارجف وادعي بداخلي ميسويلي شي ويسمع مني
دخلت للصالة شفتة كاعد على القنفة وهم يدخن وكفت كدامة مثل المجرم الي ينتظر القصاص

دقايق وكام سحبني من ايدي ودفعني على القنفة ومادري وين راح ثواني ودخل شايل كرسي حطة كدامي وكعد علية يباوعلي ببرود ويدخن عبالك ديفكر شلون يعاقبني

مرت دقايق طويييييلة هواية وهو بس يباوعلي ويقلص عيونة احسة بـ أي لحظة يهجم علية

كال وهو يزفر الدخان
الكسار:ليش ترجفين؟ خايفة؟

هزيت راسي بأيجاب وبچيت بسرعة عصر فكي ىقرب وجهة لوجهي وكال بغضب
الكسار:لوووو تخافيييييين متسويييين هيييييچ

:والله م

قبل لا اكمل لزم شفايفي وعاط
الكسار:بري منچ الله برييييييي تشتغلين من وراية ولچ؟؟

ترك شفايفي ولزم زندي بقوة
الكسار:چنت اكول عرفت اربيچ بس تربية سياف وشاهيناز بعدها بيچ طلعتي وحدة حقيرة وأنانية

:حباب خليني احچيلك وجهة نظري بس اسمعني

الكسار:اششششش جاوبي على اسألتي من شوكت بديتي تاخذين حبوب؟

بلعت ريگي وحچيت برجفة
:م من انتهت ا امتحاناتي

بس كملت كلامي ضربني راشدي فر وجهي فر صارت وشه بأذني ودخت من قوتة قبل لا استوعب جرني من ايدي رجع كعدني زين واني اشهگ خايفة

الكسار:شكم حباية اخذتي

سكتت اباوعلة بتوسل فززني من عاط
الكسار:جااااووووبيييييي

جاوبت واني اتلعثم بكلامي
:ع عشرة

رجع ضربني الثاني وهالمرة اقوة ومن اوكع يرجع يكعدني
الكسار:متردين طفل مني مو؟

قبل لا ارد اجاني بالثالث صرت اشهگ بالنفس گوة اجرة صار يضربني راشديات هواية وانوب قوية كل راشدي تسود عيوني وترجعلي يسألني وقبل لا اجاوبة  يضرب لحد موكعت بايدة روحي وگوة اتنفس

رجع سحبني من رگبتي وقرب وجهة لوجهي
الكسار:انتِ متستاهلين تكونين أم صلاتچ وصيامچ ذبيهم بالشط

تقرب باسني بوسة قوية بشفتي صدمتني اكثر من الراشديات ومن ابتعد دفعني بكل قوتة وكام قبل ليطلع كال بدون ليباوعلي

الكسار:لمي غراضچ انتِ بعد متفيديني راح اتصل على خالچ يجيچ هذا التردي من البداية فـ اجي ما الكاچ بالبيت

طلع عني واني حضنت نفسي ابچي خسرت الأول والتالي بسبب جهلي وانانيتي

كمت بصعوبة اشوف دايخة وعيوني تغوش خفت ارجع انعمي ومحد يمي صعدت فوك اناشغ والندم اكلني اكل نظراتة متروح من بالي

رحت لغرفتي وتمددت على الچرباية اريد انتظرة يجي وافهمة كلشي بس احس نفسي دايخة وجسمي يرجف عبالك روحي دتطلع مني بسبب البچي وضرباتة

سمعت صوت حركة بالبيت نشفت دموعي بعيوني عگدت حواجبي
:يمكن خالو اجة

كمت اتطوطح باوعت من الشباك وانصدمت من شفت 4 اشخاص ملثمين يطفرون من فوك السياج نزلت الستارة ميتة خوف واول شي سويتة ركضت للباب قفلتة وشلت المفتاح

صرت اسمع خطواتهم تتقرب شوي شوي احتاريت وين اروح شفت تلفوني على الچرباية مشيت على اطراف اصابعي الهث اخذتة وصرت ادور مكان اختل بي مچان كدامي غير الكنتور فتحتة وختلت بي وغطيت نفسي بالملابس وبسرعة اتصلت على الكسار بس طلعلي مشغول

سمعتهم يريدون يفتحون الباب بس لكو مقفول صارو يكسرون بي كمية الرعب والهلع الي عشتهم ما اتمناها لعدوي

رجعت اتصلت على الكسار ابچي خايفة وهم مشغول تركت رقمة ورحت على رقم خالي فهد اتصلت وكذالك مشغول

صرت انتفض نفض من سمعت الباب انكسر ودخلو يتهامسون
:متأكدين بعدها هنا؟

يجاوبة الثاني
:اي متأكدين رجعها للبيت وطلع وحدة بعيوني شفتهم

:دورو زين

غمضت عيوني ادعي الله يحميني من شرهم رجعت لتلفوني محتارة شنو اسوي دزيت رسالة للكسار

:تعال اكو اشخاص بالبيت يريدون ياخذوني

انفتحت الرسالة بس مارد عبالة اكذب بچيت بحرگة ورجعت دزيتلة
:مداكذب عليك تعال الله يخليك حموت خوف

بس وصلت دزلي رسالة محتواها كلمتين
الكسار:ماصدگچ بعد

انكسر گلبي وتعبت صرت ماكدر اتنفس رجعت دزيتلة
:شوف الكاميرات الي بغرفتنة

فتحها سويت تلفوني صامت وصارت خطواتهم تتقرب علية اكثر واكثر عرفت مراح يلحگني نزلت دمعتي الحارة وانقطع اخر أمل عندي من انفتح باب الكنتور وشافوني عاط

:هايييييي هي تعالووووو لزموهاااااااا

ركضو كلهم عبالك وحوش چتفوني وذبوني بالأرض
:ع عوفونيييييي وخرو عني كساااااااااار

ما اهتمو لعياطي نوموني على بطني وصارو يربطون بية چنت رغم تعبي والدوخة الي بية قاومتهم من حلاوة روحي مكدرولي ابد

:بسسسس سكتيييي لو ما روحچ غالية وتجيب راس الكسار چان طلقة بوسط يافوخچ

دفرتة برجلة ابچي
:والله يموتكم الكسار عوفونيييييي

ربطوني بأحكام واني اعيط مچان بالساني غير اسم الكسار اريدة يجي وينقذني

:ركدييييي لچ گـ***

:وينكككككك كسااااار ويننننككككك تركتنيييييي الهممم

لزمني من شعري وصار يضرب راسي بالأرض
:سديييييي حلگچ

صرت اعيط اكثر واقاوم اكثر مكدرولي ملو من عندي ضرب راسي ضربة قوية بالأرض خلتني ادوخ بزيادة حسيت بيهم شالوني غمضت عيوني متحملت فقدت وكلام الكسار يرن ببالي

(اجي ما الگاچ)
ومن صدك مراح يلگاني بعد

..يتبعع..

توقعاتكم؟

.
.
.
.
.
.
.
.
.
.

5000 كلمة🤍

الفاتحة على روح الشهداء
مَلِك وفرح وحسن 💔

تاريخ استشهادهم
2014/7/22

تعالو لقناة التلي حنشر صور للأبطال الساعة 5 العصر

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله