رواية الكسار (سلاسل الغوث) الفصل السادس وأربعون 46 - بقلم لـ ميامي

شكد رماد بروحي منك
شكد حزن و شكد احبك !

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

~~~~~~~~~~~~~~~~~~~~~~~~

دموع: ماعرف شصارلي ردت اتخبل رجعت اباوع

مسح وجهة وابتعد خطوتين وصار يستفرغ بنص الشارع ولازم بطنة

ماكدرت اتحرك كعدت بمكاني گوة اتنفس واردد
دموع:اتحمل كلشي منك بس الخيانة لا لا تكسرني كسار

رفع راسة للسماء اتنچى على السيارة ساكن بطريقة غريبة
دقايق ووكف على حيلة ومشة لناحية بيتنة

بقيت بمكاني منزلة راسي واهز برجلي اريد افهم كلشي قبل لا اتسرع
دخل للصالة باوعت لگيت عيونة علية عرف شفت الكاميرات كعد كدامي من الجهة الثانية ونزل راسة

دموع:سؤال واريد جواب واضح شنو تسوي ببيت علاء بنص الليل؟

سحب نفس قوي وزفرة
الكسار:شغل

ضحكت بستهزاء
دموع:شغل ويا علاء ابو النسوان؟ علاء الي قتل مرتة ودخل للسجن علاء الي اختة المطلقة تعيش ويا بنفس البيت؟

الكسار:المقصد؟

كمت وعيوني حارات من العصبية وبسبب دموعي الحابستهم
دموع:اتحمل كلشي بس الخيانة لا اعيدها كسار اتحمل كلشي بس الخيانة لااااا اخذ اطفالي وانفصل عنك

غمض عيونة بقهر وتمدد على القنفة تجاهل كلامي كلياً
وگفت كدامة ولزمتة من قميصة باوعلي بتعب

دموع:كوم احچيلي

الكسار:انتِ هسة معصبة الصبح نحچي روحي نامي

ضربتة بصدرة وبچيت
دموع:كسار تخوني؟

سحب نفس وكعد مركز عيونة علية
الكسار:اني اخونچ؟

طلع خنجر صغير من جيبة وحطة بيدي وسحب ايدي خلاها على رگبتة متت خوف چان كلش حاد بحيث بس طخ برگبتة انجرحت

ردت اسحب ايدي بس هوَ شدد لزمتة وقربة لرگبتة اكثر
الكسار:موتي اهون اذا متت اموت بشرف ما اموت واني خاين

بلعت ريگ اريد اسحب ايدي بس ميتركها
دموع:كسار دم دم عوفني رگبتك انجرحت

جرح نفسة اكثر وعيونة صارت دم
الكسار:اذا افكر اخونچ يعني راح اخون اطفالي هم واطيح من عين نفسي 18 سنة دموع 18 سنة وعيوني ما تشوف غيرچ وجسمي ما طخ غيرچ ايدي ما مسدت راس غيرچ گلبي ما دگ بس الچ روحي ما رجفت بس عليچ شلون اخونچ

دموع:عوفنبيييي انجرحت دتنزففف

ترك ايدي وكع الخنجر مليان دم واني اباوعلة روحي رايحة
الكسار:روحي دمعة روحي نامي

دموع:اذا مدتخوني شديصير

رجع تمدد واني عيوني على رگبتة
الكسار:شغلي يستوجب كلشي اسوي بس حتى اكملة

دموع:لا تعوفني بنار احچيلي

فرك وجهة بقلة حيلة
الكسار:هالمرة شي اكبر مني ومنچ وماكدر احچي

دموع:ممرتاحة

الكسار:ولا اني بس مجبور

دموع:خايفة تسكن غيري بگلبك

الكسار:اذا گلبي حاول يدخل غيرچ اخلي طلقة بنصة واموت

مسحت دموعي رجع غمض يريد ينام ورگبتة تنزف صح الجرح مو كلش چبير بس ينزف
رحت للمطبخ جبت معقم وقطن ولاصقات جروح
كعدت كدامة اعقم جرحة وهوَ ما فتح عيونة بس يتنهد ويفرك بصدرة

دموع:ان شاء الله يطلع كلامك صح احاول اكذب نفسي واصدگك خلي اشوف وين توصل

خليت لاصقات الجروح وتقربت حاوطت وجهة
دموع:بس صدگني تخون اني اخون

فتح عيونة مصدوم راد يصيح واني سبقتة
دموع:لا مو الي ببالك ما اخونك بالحرام مو دموع الي تنزل نفسها لهيچ مستوى وبالحرام بس راح اخونك واخون 18 سنة وبالحلال

حچة كاز ععلى اسنانة بغضب
الكسار:المقصد؟

دموع:اخلعك وبس تخلص عدتي اتزوج اول واحد يصير كدامي

خزرني ورفع ايدة عصر شفايفي
الكسار:سدي مچبوحچ سدييييي لا تچفصين

دفعت ايدة
دموع:اذا سويتها اتحمل الي يصيرلك

كمت گلبي متفتت لزم ايدي وعصرها
الكسار:ما خاينچ عندي شغل عند علاء وبسسسس

سحبت ايدي بدون ما اباوعلة
دموع:ان شاء الله يكون الموضوع هيچ ان شاء الله

تركتة محترگ وطلعت من الصالة اخخخخ يا وجع گلبي ماعرف شبي يأذيني

واني وامشي مچنت منتبهة دموعي منعت الرؤية عندي ومادري بشنو ضربت ورجلي انلوت وكعت على بطني بس احس روحي شاغت

لزمت بطني بقوة احاول اتنفس بس الألم يموت يروح ويجي مكدرت اتحمل صرخت من وجعي صوت متألم مو عالي

صار الكسار كدامي فاتح عيونة بصدمة مايعرف شيسوي
الكسار:دموع شصار وكعتي

لزمت ايدة ابچي
دموع:كسار بطنييييي لا يموووت ابني لا يموووت

وجهة صار ينطي اللوان شالني بين حضنة وتوجه بية للمستشفى
دموع:كسار ابني لتخلي يموت تعبت واني انتظرة

الكسار:المهم انتِ دموع انتِ اهم من الف طفل

الوجع خف بس دقايق ورجع اقوة
وصلنة للمستشفى وللطوارئ فحصوني واسمعهم يحچون

:همزين ما نازفة بسرعة حولوها لغرفة السونار

اخذوني بكرسي متحرك للسونار وكسار وياية متركني
سوت السونار وتهز براسها

الدكتورة:هاي الوكعة خير الكم ترى حتى تعرفون الطفل من زمان نازل ومهدد بالأسقاط وزوجتك تحتاج ربط بشكل عاجل

الكسار:وهيَ شلونها خو ما تبقى متأذية

الدكتورة:تتحمل الوجع شكم ساعة ويروح بس انتبه عليها لباچر وما يصير نتأخر لأن هيَ بشهر الرابع وهالشهر لازم عندها اجهاضات سابقة يلا نكدر نسويلها الربط

الكسار:عندها اكثر من اجهاض وهذا الحمل من بعد سنين طويلة

الدكتورة:عظيم يعني احنة مسيطرين حاليًا رجعها للبيت وخليها تنام على ظهرها وترفع رجليها وباچر تجون لعيادتي وان شاء الله خير

اسمعهم واكل بشفايفي الوجع مينحمل مجربة الأجهاض بس هالوجع اقوة ببهواية

سندني على كيف واخذني للسيارة وصار يمشي على مهل يخاف من الطسات

على ما وصلنة للبيت الوجع خف شالني للغرفة ما خلاني اصعد حتى نومني على ظهري وحط مخاد جوة رجلية تمدد بصفي يمسد على شعري

الكسار:لا تبچين دميعة اذا الله قاسمة راح يبقى وينور حياتنة

باوعتلة دموعي بعيوني
دموع:اخاف يموت

الكسار:يعني راحلچ فدوة

دموع:ماريد يروحلي فدوة اريدة ينولد ويكبر خاف تطلع بنية وتروح وابقى اكل بروحي عليها شلون ما انتبهت لبايسكل ادومي شلون

الكسار:كافي يبعد عيوني نامي وارتاحي باچر نسويلچ ربط ويرجع كلشي بخير بس كولي يا الله

بس ابچي وهوَ يمسح بدموعي وحدة وحدة
رفع راسي حط ايدة حتى انام عليها واني اجتني فرصة ابقى اشمشم بعطرة الساطرني  شوي ارتاحيت من كلامة

نمت ومن كعدت لگيت وهيب يمي حاضن ايدي وصافن علية من شافني كعدت طفر على حيلة

وهيب:ها دموع شلونچ

هزيت راسي
دموع:مابية شي حتىى وجع ماكو لتخاف

وهيب:شنو ما اخاف ردت اموت من زوجچ كال وكعتي

دموع:ان شاء الله ماكو شي اليوم اروح حتى نسوي ربط ماريد هالطفل يروح والله اموت من القهر

وهيب:سلامتچ من القهر دمع والله متأكد الله ما يكسر بخاطرچ وراح يتمم هالحمل وتجيچ بنية وتصير عزيزة خالها

ابتسمت
دموع:ان شاء الله هم تتزوج واني اصير عمة

ابتعد عني مزعوج
وهيب:ويني وين الزواج

دموع:ليش؟ متأكدة حتصير احسن زوج بالعالم واحسن أب

وهيب:شبيچ دموع اني مريض چنت مسجون سنين طويلة عندي امراض نفسية ما اتحمل شخص شلون اتزوج واني متقرف حتى من العلاقة الزوجية واكره حتى اتخيل نفسي بهيچ شي

عدلت كعدتي ولزمت ايدة اطبطب عليها
دموع:بس انتَ دتتعالج وما ضل شي وتصير زين لتخلي افكار محلوة تجي براسك اني احلم ازوجك وافرح بيك واشوفك مرتاح

وهيب:اني مرتاح هيچ وياچ وويا حسوني وادومي ماريد غيركم بحياتي

دموع:هذا مو كلام وابد ما اقبل بي متريد تشوف اطفالك

وهيب:انتِ بنتي وادومي وحسوني اولادي ماريد شي بعد

دموع:افهمني اذا تعالجت بعد معندك مانع

مسح وجهة ونزل راسة ميباوعلي
وهيب:اخاف تصدگين

دموع:شلون تخاف

وهيب:اخاف اتزوج وتتأذة مني اخاف يصير عندي طفل واطلع مثل سياف ماكدر اتزوج واحمل نفسي ذنب بنية ما الها ذنب خليني مكتفي هيچ

دموع:انتَ دتتعالج

وهيب:زين تعالجت وصرت زين منو تقبل بية؟ خريج سجون قاتل اهلة رجل عصابة وفوكها متشوه وجهة وظهرة الي تتزوجني شنو تشوف بية ؟ كلني تشوهات وجهي جسمي حتى عقلي تشوه بأفكار حقيرة وخبيثة

دموعي نزلت كسر گلبي حضنتة ابوس بكتفة
دموع:لتحچي هيچ اروحلك فدوة

وهيب:فهميني دموع منو تقبل وتتقبلني لنفرض قبلت بية شلون تعيش وياي؟ ما اطيق لمسة وحدة من جنس حواء اتقرف من كل العلاقات وانتِ تردين يصير عندي اطفال شلون بهالحالة

دموع:بس ان شاء الله تصير زين

وهيب:اصير زين بكلشي بس بهالموضوع لا مستحيل اشارك فراشي ويا بنية مستحيل

ابتعدت عنة ضربتة على ايدة
دموع:لتحچي هيچ كدامي عيب

ابتسم
وهيب:غير اوصلچ فكرة اني ما اطيق روحي اذا حچت وياي بنية مو انوب انام وياها

رجعت ضربتة وهوَ ضحك
وهيب:تلعب نفسي من الزواج عيع انوب تعال بوس وتغزل واني روحي مطايقها

دموع:اهوووو وهيب اسكت عيب اخجل اني اختك لتحچي هيچ

وهيب:ههههه يلا كومي ننزل سويتلچ ريوگ ترى اني ورجلچ تساعدنة والف مرة تعاركنة يلا كملنا

ضحكت على ضحكتة وكمت على كيفي غسلت وجهي ولزم ايدي ساندني حتى ينزلني

اباوعلة يعرج لأن بعدها رجلة تأذي بسبب الصرع
شافني الكسار وابتسم وهيب دخل للمطبخ

تقرب علية حاوط وجهي يبوس بخدودي
الكسار:صباح العافية عافيتي

دموع:صباح النور

رجع يبوس بخدودي واباوع لوهيب ينافخ
وهيب:ادومي اريد گرون من الثور مالتك خلي اشدهن كدامي ويبوس اختي

باوعلة
الكسار:احمد ربك ابوسها بخدها

وهيب:باستك حية ان شاء الله وخر عنها خلي تجي تاكل

بقيت اضحك مثل الفاهية
كعدت اكل الكسار منا ووهيب منا يسوولي لفات ويتسابقون منو يوكلني اول لو من الكسار يريد يمسح حلگي وهيب يدفع ايدة ويمسح بداله واني متونسة عليهم

باوعت لرگبتة وتذكرت كلشي صار البارحة انسدت نفسي
الكسار:اكلي هاي بعد

دموع:ماريد شبعت

مسح حلگي مبتسم
الكسار:العصر نروح لا تشيلين هم لشي حبيبتي

دموع:والأطفال وين يبقون

وهيب:اني اخذهم وياية وانطيهم راتب شتكول حسوني

حسوني:من هسة اريد راتبي انام يمك

وهيب:تدللون علية

فرحو همزين يحبون خالهم وهوَ حيل يحبهم
كامو ينظفون واني ميخلوني اتحرك

بعد محچي ويا الكسار شي حتى شغلة تركة اليوم علمودي
العصر رحت سويت الربط وكالت الدكتورة لازم حركتي تصير قليلة جدًا وابقى رافعة رجلية

تأخرنة لليل لأن چان لازم ابقى تحت الرعايه وبعدين طلعت على مسؤولياي لأم ماگدراترك الأطفال وابات

وصلنة للبيت بس شفنة الشارع مخبوص خبص وصوت بچي الكسار اخذ سلاحة ونزل يركض نزلت ورة خايفة

شفت وداد كاعدة بالشارع تبچي وتضرب على وجهة باوعت لوهيب الي واكف عاگد حواجبة

دموع:شصاير؟

وهيب:اختها صار 3 ساعات ضايعة گلبنة عليها الدنيا وماكو

دموع:عزا

كعدت يمها اهديها والكسار يخابر اجت دورية انطتهم صورتها وبدو يدورون وخطية موتت نفسها من البچي

خابرت لعمامها سدو التلفون بوجهة ضلت تغلط عليهم
اخذتها لبيتنة كعدنة بالحديقة ننتظر

دموع:شنو صار شلون ضاعت

وداد:تركتها نايمة ودخلت اسبح ومن طلعت ما لگيتها مادري وين راحت دموع راحححح امووووت

دموع:اهدي هسة ترجع قابل وين تروح

ضلت تلطم على خدودها اريد الزمها ماكدر
دخل وهيب وهيَ طفرت

وداد:ها ماكو شي؟

هز راسة لا رجعت كعدت تبچي
دموع:صبري خاف احد لاگيها ويرجعها

باوعتلي بخوف
وداد:لا دموع لا اخاف يلگاها ولد ويسوي بيها شي اختي حلوة ومن يشوفوها ما فاهمة شي كلشي يسون يمة اموت اذا صار بيها شي هاي امانة

صدمتني فتحت عقلي لشي مچنت مستوعبتة باوعت لوهيب هوَ هم خايف راح جابلها ماي يشربها

وهيب:راح نلگاها قابل وين تروح ابقي هنا هسة نجيبها ونجي

هزت راسها وهيب طلع من البيت واني وياها اهديها
المنطقة انخبصت خبص شرطة ودوريات حتى خوالي اجو لأن عرفو بيها توحد الكل تعاطف وياها

ساعة وماكو خبر بديت اخاف واتذكر كلامها
اختها صدگ كلش حلوة جسمها انثوي ولأن وصلت لمرحلة البلوغ صارلها سنتين بدت معالم جسمها تتغير وتكبر عيونها كبار مكحلة حلگها يجنن حقها تخاف عليها

صرت الوب وياها
ساعتين ودخل الكسار شايلها تبچي وتصرخ ماتحب احد يلزمها وداد من شافتها كامت تبچي نزلها وهيَ اخذتها بحضنها

وداد:وين رحتييييي وين ردت اموت ولچ مريام شلون تسوين هيچ بية

دموع:وين لگيتوها

الكسار:لگيناها بالسوگ تلحگ بزونة همزين وهيب شافها

وداد:والله ماعرف شلون اشكركم

الكسار:ماكو داعي اخذيها خلي تسبح كلها طين ويمكن جوعانة ولد بالسوگ ناطيها لفة بس خايفة وشاردة

تأشر على وهيب وتبچي استغربت التفتت وشفت وهيب بحضنة بزونة بيضة وبيها اسود كاعد بالأرض يوكلها

دموع:شتريد شبيها تأشر

عافت اختها وراحت كعدت كدام وهيب تمسح على راس البزونة وتضحك وهيب ضحك على ضحكتها

وهيب:تحبينها؟

هزت راسها وتكول
مريام:قطة

وهيب:اي قطة مو چنتي تركضين وراها تردين تاخذيها

بس تهز راسها حطها بحضنها وهيَ تضحك ومبين ارتاحت لوهيب تاخذ ايدة وتخليها على راس البزونة

وداد:خلي نروح مريره

ولا تسمع منها البزونة چانت وحشية بس صغيرة
وهيب:يلا اخذيها وسبحي ونامي

ما فهمت كلامة ماعرف بس بقت كاعدة اجت اختها وكفتها وهيَ ذبت نفسها بحضن وهيب تأشر على البزونة وتحچي كلام ما مفهوم

وداد:تكول اخذها يعني متريدها

وهيب:اخذوها بس خطية بعدها صغيرة انتبهو عليها وكلوها اعتبروها امانة

هزت راسها مابيها حيل لشي اخذتها وراحت لبيتهم
دموع:انتَ نقطة ضعفك البزازين وهاي صغيرة شعجب انطيتها

ابتسم
وهيب:شفت شي بهالطفلة يشبهني وهوَ حبها للحيوانات اعرف مراح تأذيها لهذا انطيتها الها

الكسار:يكولون الحنون يحب الحنون عاشت ايدك

تعشينة وكل واحد صعد لغرفتة والكسار بالغرفة يخابر باهر ويشتغل باللابتوب

باهر:كويسر علاء باچر مسافر يومين لازم بهالفترة القليلة نجمع كل المعلومات والأدلة

باوعلي وهز راسة يطمني
الكسار:باهر انتَ استلم اختة اني ماكدر تلعب نفسي منها

باهر:تلعب نفسك منها لو متريد تخون حبيبة الگلب

الكسار:معليك انتَ استلمها بعدني عنها كلش

باهر:لينا تحب تجدد مو حتى وهيب حطت عينها علية

طفرت على حيلي
دموع:نعم نعممم حاطة عينها على عرضيييييي

سحبني كعدني على رجلة
الكسار:لا تصيحين

باهر:دموع ام الكناكر شلونچ وانتَ هيو ما تدري شغلنة سري شلون تخليها تسمع

الكسار:ماكدر اخليها تشك واتعبها ولي هسة اذا صار شي جديد حاچيني

سدة بوجهة وباس رگبتي
دموع:حاطة عينها على عرضي كلة عليك وعلى وهيب وباهر هم من البداية مرتاحيتلها هذاك اليوم طالعة مصلخة ايع

الكسار:هذاك اليوم منتظرة وهيب يطلع فلفلت على وهيب كلش باهر واحمد ما مكفيها

باوعتلة بصدمة
دموع:يعني يسون حبشكلات وياها!!!

الكسار:لا خفايف ما يدخلون بالغميج ما تشوفينها ميتة عليهم

دموع:من تروحون شتسون عندها

رفعني بحضنة واخذني للچرباية نومني على ظهري ونزل نفسة علية
الكسار:نسوي نفسنة نشرب وياها ومن تسكر نسحب منها كلام بس وداعتچ محد منهم شرب ولا طخهابس  يمكن نقيب مراد بس هيَ گـ*** بعد اخت علاء

دموع:زين شلون الها نفس لهيچ

الكسار:عاهرة شنسويلها نخليها تسكر على الأخر ومن تصحى نكللها عود صار فد شي حتى تأمن واحنة مشغولين نسحب كلام منها ونفتش البيت بس نريد نلگة غرفة سرية لعلاء

دموع:داضوج والله

الكسار:تروحلچ فدوة اقل شي شهر وتوكع هيَ واخوها بين ايدينة وينتهون وخلي بالسجن تتأدب

دنگت راسي لعبانة نفسي شگد ايع حتى وهيب حطت عينها علية شگد بدون شرف ولا اخلاق

الكسار:حچيتلچ حتى لتبقين تفكرين وتأذين نفسچ وحتى تتأكدين كسار مستحيل يخون دموع لچ انتِ روحي من الدنيا اخسر العالم كلة وما اخسرچ

دموع:بس ممكن كلشي يصير گلبي ممرتاح خصوصًا هيَ حلوة وجسمها حلو ما استنقص من نفسي ابد وما اقارن نفسي ويا هيچ وحدة بس داكلك جمالها يوكع الف رجال

الكسار:بس ميوكع الكسار حزني متهز شعرة مني محد هزني غيرچ

دموع:ان شاء الله يخلص هالشهر على خير

الكسار:ما ضل شي

هزيت راسي حط وجهة برگبتي يتنفس
الكسار:تتذكرين قبل 18 سنة مثل هاليوم نمتي بحضني ترجفين وبنص نومچ  تدفرين بية وكناكيرچ تدخل بعيني

دموع:حييييل 18 سنة وين تتذكر كسار

الكسار:ما ناسي ولا لحظة مريت بيها وياچ

دموع:شوكت حبيتني انتَ

ضحك بحماس باس شفتي وحچة
الكسار:من عمرچ 15 سنة بديت اميل الچ واضيع بتفاصيلچ صح چنت ما مؤدب وياچ بس تدرين چانت هاللحظات اسعد لحظات حياتي ما چنت اريد اعتبرچ غير شي بس مادري شبي گلبي ذاب بعيونچ

دموع:بهالعمر ابد مچنت حلوة

الكسار:بعمرچ مصرتي مو حلوة انتِ چنتي ولا زلتي اجمل نساء العالم بنظري بس ضحكتچ چانت كافية تذوبني

ردت احچي بس دگ تلفونة كام اخذة
الكسار:ها باهر
هسة تريدنة!! شنوو فلفلت ررحو ماكدر اروح
باهر لا تخبلني روحو انتو عود من تسكر العينتين اجي

سدة بوجهة ورجعلي
الكسار:ابن خالچ هذا يرادلة جرة أذن المطي

فتحتلة ايدي
دموعي:عفية لتروح عفية ابقى يمي

نام بحضني يبوس بعظمة كتفي
الكسار:اكيد ابقى يمچ منو يفيدني غيرچ

دموع:ليش متترك هالشغل عدنة خير من الله اتركة خلي نعيش براحة

توقف عن الحركة وهمس
الكسار:من الگي حسن اعوف هالشغل لأن اني باقي علمودة

مسحت على ظهرة
دموع:ان شاء الله تلگة

سكت لحد ما نام واني هم نمت بس مطولت بالنومة فزيت من كام مني واسمعة يتهامس سويت نفسي نايمة

الكسار:وهيَ وينها صاحية لو سكرانة
اني جاي ماريد دموع تسمع خاف تكعد وتبقى تفكر گوة كدرت اقنعها ماردت احچيلها بس اذا تبقى تفكر تموت من التفكير
اي حچيتلها كلشي ما اتحمل اشوفها متأذية عوفنة من هالكلام اني راح اجي

حط التلفون على الميز وراح للحمام ماعرف شنو اجة بعقلي من سويت هيچ بس اخذت تلفونة وفتحت تسجيل صوتي وخفيتة

رجعت سويت نفسي نايمة شوي وحسيتة يدنگ يبوسني بخدي
الكسار:ترى حافظچ واعرفچ من تنامين ومن تگعدين خلي يرتاح گلبچ وارجعي نامي والخلقچ ماا اباوع لغيرچ

فتحت عيوني اريد ابچي
دموع:ماريد تروح لهذاك البيت كسار

الكسار:لازم اروح حتى نخلص بسرعة

هزيت راسي اتنهد رجع باسني وطلع
كمت اباوع من الشباك واكل بأظافري ماعرف شلون حتحمل هالشهر ماعرف

شفتة دخل لبيتهم واطمئن گلبي من صرت اشوفهم بالحديقة مادري شنو يدورون لو فوك السطح بقيت بس واكفة ناسية موضوع حملي من القهر

جبت كرسي وكعدت حاطة ايدي على خدي واباوع
لحد ما طلع من البيت يلا كدرت ارتاح

دخل للغرفة نزع الكفوف
الكسار:مو كلتلچ نامي

دموع:مكدرت شسوي

هز راسة وراح فتح الابتوب ماعرف شنو حط وطلعت قائمة كلمة كلها كلام ما فهمتة تقربت اباوع ويا

الكسار:دموع الشغل سري

أشرت على الصور الي طلعت
دموع:هذول علاء واختة

هز راسة
الكسار:اي هاي اخذوهم بتهمة مخدرات ومادري شلون طلعو منها هذول عصابة دموع عصابة خطيرة اذا وكع علاء توكع اختة وكل العصابة

دموع:كسار

الكسار:اممم

دموع:اكو شي بعد ما اعرفة؟

توقف عن الحركة ثواني ورجع يكتب
الكسار:لا كلشي حچيتلچ ماكو شي بعد ارتاحي

هزيت راسي وابتعدت عنة
دموع:نصبر ونشوف تاليها

تجاهل كلامي ورجع يشتغل واني رحت نمت كعدتي ما الها فائدة بعد

مرت ايام وليالي والكسار على نفس الحال وازيد صار مجرد يجي ينام ومادري شوكت يطلع من البيت

بعد اسبوع واحد ويخلص الشهر الي كال عنة ومبين شغلهم ماشي زين صرت اشوف بالليل هواي زلم بملابس مدنية يفترون بالمنطقة واضح الموضوع اخطر من هيچ

العصر كاعدة ودخل وهيب شايل بزونة شيرازية حاط فيونكة وردية على عنقها ويبوس بيها

دموع:هاي شنو فدوةةةةة

كعد يمي يبوسها ويلاعبها
وهيب:اشتريتها لهاي البنية لأن شفت البزونة الصغيرة مرتاحة عندهم جبتلها هاي هم خليها تفرح خطية يتيمة

برطمت شفايفي وسحبت خدودة ابوس بيهم
دموع:اروح فدوة لگلبك الطيب فديتككككك شگد حنون

وهيب:حبيبتي دمع نروح ناخذها الها وجبتلها اكل واحتياجاتها كلها

هزيت راسي لبست عبايتي على السريع واخذناها لبيتهم
دگيت الباب دقايق وانفتح وداد كدامي حاطة القلم بشعرها ولازمة كتاب وتاكل كاجو

وداد:هلاو دموع هلاو اخو دموع تفضلو

دموع:لا بس نريد مريومة جبنالها شي

وداد:وينها مريره مگابلة البزونة وكاعدة عبالي يومين وتمل منها بس ولا ملت شلونچ شلونك اخو دموع ان شاء الله زينين ردت اجي اتشكركم بس مريرة ما تكعد وتسكت اعرفها ان شاء الله شكم يوم واجيكم

سمعت وهيب همس
وهيب:شيسكتها بعد

لزمت ايدة حتة يسكت دخلتنة وداد بقينة واكفين بالحديقة شوي واجت مريام شايلة البزونة شافت وهيب نزلت البزونة الأرض وراحت لوهيب عبالي علمود البزونة بس صدمتني من حضنت وهيب وغمضت عيونها وعبالك تحس بالأمان عندة

مريام:Yellow Tomcat

بقينة صافنين كالت القط الأصفر
وهيب:منو اني؟

وداد:موتتني كل يوم تكول هيچ وتالي طلع عليك انتَ طلعت عتوي اختي عبالها انتَ بزون چبير

حطيت ايدي على حلگي اضحك
دموع:زين ليش اصفر

وداد:لأن اخوچ عيونة صفر

سكت وهيب قدملها البزونة وهيَ فرحت بيها كعدت تلاعبها
حچيت ويا وداد ووهيب كاعد كدام مريام يحچي وياها وهيَ ماكو بالسانها غير القط الأصفر

وداد:اخوچ بعد اسمة العتوي

دموع:سكتي لا يسمعچ

وداد:خلي اسكت اخوچ يخوف

گرصتها
شوي وطلعنة من البيت احس وهيب فرحان

وهيب:اختها حبابة اكثر منها هاي من صدگ تحسها خطية مو هاي براد

دموع:اسمها وداد انتَ وادوم خبلتوني

حضن كتفي مبتسم
مر الوقت عادي انتظر جية الكسار ومثل كل يوم انعس وهوَ ماكو

ردت انام وسمعت صوت رسائل تجي وحدة ورة الثانية طفرت على حيلي خايفة حسيت اكو مصيبة جاية

فتحت التلفون چان رقم غريب صرت اقرة الكلام وفاتحة عيوني من الصدمة

لينا:اني لينا تاج راسچ وراس رجلچ شوفي لچ اذا رجلچ ميعرفني خلي يسأل عني زين وخلي ينتبه لصيت لينا والله الا ادمركم عبالچ ما اعرف بخطتهم الفاشلة؟ لا اعرف كلش زين وعقابهم راح يكون بعوائلهم مو لينا الي ينلعب وياها وعيوني الغالية الا اشتت شملهم وموتهم على ايدي

بقيت ارجف من الخوف كلامها كلة غلط وتهديد طلعت كاشفتهم واكو شي چبير بعقلها الشيطاني

دزتلي تسجيلات صوتية وكتبت جواهم
لينا:خلي يستقبلون جحيمهم كل واحد شارك بخطتهم الفاشلة راح ادمرة وهسة بديت منچ ومن رجلچ

بعد هالكلام حظرتني اريد افتح التسجيلات بس ايدي تمنعني اخر شي فتحتهم وبديت اسمع والصدمة تنخر بعقلي

لينا:زين انتَ ليش باقي وياها؟

يرد عليها
الكسار:علمود الأطفال اكيد ولأن حامل تريد تلبسني بالأطفال حتى لا اطلگها متدري روحي لعبانة منها

لينا:طلگها واخذ اطفالك واني اساعدك

الكسار:بس خلي تولد اخذهم منها واطردها لخوالها واخذ تاج راسها

بلعت ريگي وباوعت للباب من دخل سمع الصوت وتقرب حطيت ايدي كدامة وكملت اسمع

الكسار:بس والله ما شفت بترافتچ ولا بجمالچ چنت ظالم نفسي وياها واجبر نفسي بس حتى انطيها حقوقها

لينا:بس الكل يكول انتَ تحبها

الكسار:چنت احبها قابل الحب يبقى اني احب اجدد واكيد اجدد ويا وحدة بجمالچ وجمال جسمچ روحي شوفيها باقية بالغرفة وحدها واني هنا بغرفتچ وبحضنچ الدافي

سحب التلفون مني وسدة واني دموعي تنزل من كلامة عني
الكسار:چنت مجبور احچي هيچ كدامها دموع لا تصدگين كلامي كلتلچ اني بشغل والشغل كلشي يتطلب مني؟

كمت افرك بصدري اريد الهوى يجيني
دموع:بحضنها؟ تلعب نفسك مني؟

لزمني يبلعم يحاول يفهمني
الكسار:كلام چذب بس حتى اوكعها صدگينييييي

دموع:بحضنها يعني نايم وياها يعني حاضنها بايسها لامسها

الكسار:لا والله لااااا ما لمستها بس انجبرت اسوي هيچ انجبرت احضنها انجبرت احچي هيچ

دفعت ايدة عني وابتعدت خطوتين
دموع:نمت وياها خنتني ونزلت من قيمتي بكلامك

الكسار:انجبرت

صرخت بوجهة وركضت دفعتة بقوة
دموع:اسكتتتتتت شنوووو الي جبركككك تسويييي هييييچ شنو يجبرك تخوني شنو يجبرك تحچي عليه بقرفففف

سكت لزمتة من ملابسة وصوتي عالي
دموع:شنوووو يجبركككك تحچي عليةةةة بكلام غلط عنيييي شنو يجبرك تكول لعبانة نفسييييي منهاااا وتكول انطيها حقوقها مجبووور بس فهمنيييي شنووو يجبررررك

حط ايدة ورة راسي وايدة الثانية سد حلگي بيها وعاط
الكسار:الييييي جبرنيييي اخبااااار حسننن

هدأت اباوعلة وارجف تركني
دموع:شبي حسن؟ احچييييييي

الكسار:عندهم اخبار عن حسن ردت اتقرب منها استغلها بس حتى توصلني لحسن دموع شفت صورتة عندهم

دفعتة من صدرة
دموع:علموووود حسنننن تخونييييي علمووود حسن تحچي علية بكلام غلط وحقير لكككك عسى حسن ماااا رجع عسى ما رجع

رجع سد حلگي
الكسار:اسوي كلشي بس حتى حسن يرجعلي ويرجع لعائلتة

ابتعدت عنة وحچيت بقهر
دموع:تريد ترجع حسن لعائلتة على حساب عائلتي؟

صفن ايدة ترجف
دموع:خلي حسن يرجع لزوجتة وابنة وانتَ مبروك عليك خسرت زوجتك واطفالك الثلاثة

الكسار:اكدر اصلح كلشي دموع بس يرجع حسن كلشي يتصلح

دموع:لككككك استوعبببب حسن ميييييت استوعببب خسرت عائلتك علمود شخص ميييييت

سمع كلامي وتخبل دفر القنفة وصاح
الكسار:سكتيييييي حسن عايش وراح يرجعلييييي

دموع:صارلة فوك العشرين سنة وما رجع تريد هسة يرجعلك افهم واستوعب حسن مات حسن مات من عشرين سنة واكثر

ثار من كلامي الي ما عجبة دفعني متخبل انضربت ايدي بالميز شفت اكو صحن فواكه وعليه سجين

بقيت اباوعلها واتذكر كلامة عني والنار الي بداخلي تزيد اخذتها بأيدي باوعلي وتقربت

الكسار:ياريت تسوينهاااا ياريت اني كدامچ ذبحينييييي وخلصيني

دموع:لا ما اذبحك بموتك راح اذبحك بطلاقي منك

ذبيت السجين بالأرض
دموع:طلگني زواجنة غلطة عوفني

الكسار:عوفي هالكلام بس من يرجع حسن لكل حادث حديث

دموع:حسنننن ما يرجعععع حسن مااااات

رجع دفعني
الكسار:مااااا مات حسن عايش وينتظرنييييي اوصلة وصية اميييي عايش اني متأكد عايش

دموع:وصية امك مات قبل لا تموت هيَ

الكسار:سكتيييييي لا تزيدين بالحچي وتخليني اأذييييچ

دموع:شگد تأذينييييي بعددددد شگددد خنتنييييي وحدة غيري نامت بحضنك وحچيت عني كدامها قللت من قيمتي كدام وحدة بنت شواااارع

الكسار:انجبرتتتتتتتتت

ماكدر اتحمل نزلت اخذ السچين وعطت بي
دموع:لتكوووووول انجبرت لتكووووول كااافيييييي

ركضت وبحركة مستعجلة نبتتها بجسمة ماعرف وين اجت بالضبط كل نظراتي تحولت لعيونة وهوَ ما شال عيونة عني

ذبلت عيونة وبان الألم بيها حاوط وجهي ونطق
الكسار:ما خ خنتچ د دموعي

ابتعدت عنة مصدومة من فعلتي وكع بالأرض يشاهگ واني اباوعلة واباوع لأيدي الي انملت بدمة

وجه نظرة علية واخر جملة نطقها بوسط تعبة
الكسار:ما خنتچ...

.

يتبعع

ضيفو حساب الانستا وقناة التلي