انتَ أَقلام خَلصانة
أَلِم مِنك حَچي مِگطع
و مِثل اليعتذر ظَليت بَس أَسمع
أَنا المَفروض تِبچيلي
أَنا مو هيچ أَتوَدع
-صلو على محمد والِ محمد الأطهار
-متابعة للحساب+تصويتكم+تعليقاتكم⭕️
~~~~~~~~~~~~~~~~~~~~~~~~
دموع:بقت عيوني عليه گوة اسحب نفس وهوَ يباوعلي وحاط ايدة على جرحة الي ينزف
كمت ماعرف شسوي اسحل بروحي سحل توجهت لغرفة وهيب دگيت الباب ورجعت كعدت بالباب اناشغ بدون دموع
انفتح الباب وصار كدامي مصدوم
وهيب:دموع!! شبيچ شنو هالدم جارحة نفسچ
هزيت راسي اباوعلة بدوخة
دموع:ك كتلتة وهيب
لزمني من زنودي
وهيب:كتلتي منوووو؟؟؟
نزلت دموعي ودخلت بنوبة بكاء
دموع:كتلت كسار طعنتة بسچين اني كتلتة
بقى مصدوم تركني وركض لغرفتنة كمت ورة وكفت بالباب اباوع وابچي چان الكسار كاعد بس دايخ وهيب لزم بطنة ما مستوعب
وهيب:شصايرررر
محد حچة وهيب باوعلي بخزرة وهز راسة بتوعد سند الكسار ونزلة ماعرف وين اخذة وهوَ عيونة بس علية ويكول ما خنتچ
بقيت كاعدة بغرفتي مصدومة ومو كادرة استوعب الي صار
بطني لعبت بية لعب من الوجع واحس بنفسي انزف
باوعت لأيدي الي مليانة بدمة ودموعي تنزل بدون أي تعابير بوجهي گلبي يعصرني عصر وارجف بشكل فضيع
زوجي الي عشت ويا 18 سنة يسوي هيچ!!!
الحب هذا طلع تمثيل!!
طفلين وجنين ببطني وعايشة بسعادة
شنو صار!
ليش تغير؟ ليش غدر؟ ليش هانت دموع؟
ليش حطم گلبي ليش موتني واني عايشة
چنت دوم اسمي كساري وانكسرت دموع من كسارها...
منو دمر الثاني؟
هوَ دمرني لو اني دمرتة؟ شسوي هسة اخذ اطفالي واروح لخوالي لو ابقى
التفكير اكل راسي وگلبي حضنت نفسي واباوع لأيدي المليانة بدمة ارجف
دموع:شسويييت اني شلون عصبيتي سيطرت علية يارب ليموت بحق الحسن والحسين ماريدة يموت انفصل عنة وانتهت يارب حفظة لأطفالة مچنت متقصدة ماريد اقتلة اني
دخت كلش بطني لوتني لوي ماكدر اكوم بس جبرت نفسي وكمت گوة امشي روحي رايحة غلطت بتصرفي لو تاركتة بدون ما اضربة لو رايحة لخوالي
بس بعد متفيد اللو الي صار صار
وكفت بين الغرف من سمعت صوت خطوات
ثواني وشفتهم صعدو والكسار كلشي مابي يمشي بس ايدة بيها كانونة ولازم بطنة وعيونة ذبلانة من الوجع ووهيب يمشي ورة من شافوني هوَ ضل واكف ويباوعلي بحيرة وقهر
وهيب چان معصب وخر الكسار عن طريقة واجاني لزمني من ايدي بخفة خازرني اباوعلة شفايفي ترجف
وهيب:شلون تسوين هيچ دمعة بلا مات انتِ وين بيچ حيل السجن
الكسار:عوفها شي صار وانتهى
وهيب:واذا صار وانتهى ما چان لازم تطعنك همزين سچين مال فواكه وما مأذيتك لو ميت البس التهمة ببدالها
تقرب الكسار علية ابتعدت خطوتين ابچي بصوت
الكسار:تعالي دمعة خلي نحچي ونتفاهم
لزمت بملابس وهيب وحضنتة
دموع:ماريدة وهيب خلي يروح عني ماريد اشوفة
وهيب:اهدي دموع
دموع:اريد انام يمك ماريدة اكرهة لتعوفني لتعوفني وهيب
وهيب:ما اعوفچ اهدي حبيبتي
بعدني عن حضنة راد يحچي وصفن مصدوم على رجلية چنت لابسة ثوب جوة الركبة اسود
وهيب:دموع دتنزفين!!
دنگت اباوع ولگيت نفسي غرگانة بدمي التفتت للكسار لگيتة تقرب علية
الكسار:خلي ناخذها للمستشفى بسرعة وهيب
دخل جابلي عباية ويصيح
الكسار:ماكدر اخابر خوالك ولا اكدر اروح وحدي روح وهيب دگ الباب على وداد تجي للأطفال بسرعة
لبسني العباية واني رجفة عجيبة غريبة لزمتني وبرودة صار تنخر بعظامي شالني وهيب لأن الكسار دايخ مايكدر حطني بالسيارة وركض لبيت وداد دگ الباب عليهم بسرعة طلعتلة بس حچة وياها اخذت اختها وراحت لبيتنة
صعد وهيب يسوق والكسار كعد يمي لزم ايدي نترتها ودرت وجهي اتألم وحدي لزمها غصبًا عني دفعتها وعطت
دموع:عوووفنيييي اشمئز من لمساتك يا خاين خليني احير بطفلي
الكسار:مو وقت هالكلام دموع
ابتعدت عنة وصرت اصرخ من وجعي خفت يروح الطفل خفت يموت اذا مات اني انتهي وكلشي ينتهي
اخذوني للمستشفى استلمتني دكتورتي وبقت ترزل بية من عرفت عيطت وما التزمت بالتعاليم
الدكتورة:يعني اني كلتلچ ممنوع الصياح ممنوع الحركة اي شي ممنوع عليچ الربط خطر امي شلون هيچ تسوين
دموع:دكتورة فدوة ابني شبي
هزت راسها
الدكتورة:بعدة بس نبضة ضعيف ترى ونازل اكثر حنطيچ مثبتات ممنوع الصعدة والنزلة بعد ممنوع الحركة حدچ للحمام زوجچ خلي يبتعد عنچ ماكو علاقة بعد اقل شي ممكن يخليچ تخسرين طفلچ
انطتني مثبتات واني ميتة بچي
صاحتلهم ياخذوني اجة وهيب حطني بكرسي متحرك واحس الكسار عيونة علية فهمو كلشي من الدكتورة وطلعوني
نشفت دموعي بعيوني خليت راسي على الجامة
وصلنة للبيت وتوجهت للحمام جسمي يرجف نظفت نفسي من الدم
انفتح الباب رفعت راسي وغطيت جسمي دخل وسدة يعلگ ملابسي راد يلزمني ابتعدت اباوعلة بحقد
دموع:اطلع عني ما طايقة اشوف وجهك
ما چان مهتم تقرب ينشف بشعري ساكت اخذت المنشف ودفعتة
دموع:وخر لتلعب نفسك مني اكثر اطلع مالي خلگ لشي
الكسار:اهدي
دموع:ماكدر اعيط لتعصبني اطلع
سحب ملابسي يساعدني البس واني مطايقة قربة مني ابد
دموع:الله راح يعاقبك على كل كذباتك وياية وراح يعاقبك على خيانتك وعلى الزنا وكلامك
لبسني الدشداشة
الكسار:مزنيت اريدچ تهدين واحچيلچ كلشي
دموع:كلامك بعد لا يقدم ولا يأخر احنة انتهينة
تركتة بالحمام وطلعت لگيت وهيب بالصالة من شافني كام چلبت بملابسة
دموع:اريد انام يمك
باوع للكسار وحچة
وهيب:اكيد احطچ بعيوني بنتي اصعدچ فوك
هزيت راسي شالني بحضنة وصعدني
دخلني لغرفتة ووكف عاگد حواجبة نزلني على كيف
وهيب:شسوين هنا
باوعت بتورط
وداد:ها عتوي البزونة شردت من مريرة واخاف تروح للبزون مالتكم وتحبل ماريد بعد بزازين
وهيب:وين شردت هنا بالبيت؟
وداد:اي عفت مريرة نايمة واجيت ادور عليها دورت الحديقة ماكو انوب حتى البزون مالتكم مموجود
وهيب:مريره وين
وداد:ليش
وهيب:عفتيها وين بالبييت وحدها؟؟
وداد:هاااا لالا نايمة بغرفة الأطفال تمشي بنومها ماكدر اخليها وحدها
تركها تحچي وراح للغرفة شافها نايمة ابتسم
وهيب:خطية هسة ادورها الها خاف تكعد وما تلگاها وتزعل
سد باب الغرفة ومشاني على كيف نومني على چربايتة وكال
وهيب:رايح ادور البزونة نامي ارتاحي
طفرت على وداد
وداد:اروح وياك ادورها
وهيب:لا هسة اروح وحدي وارجع
وداد:حباب حتى اروح اشتري لمريرة حلويات
فرك وجهة بقلة صبر وهز راسة اخذها وطلعو
غمضت عيني اريد انام اريد بس اريح راسي
فتحت على النص من سمعت الباب انفتح ورجعت غمضت ماريد اشوفة
كعد على الچرباية وبظهر ايدة يمسح على خدي
بعدت وجهي ماعرف شنو هالقرف المفاجئ الي اجتاحني لناحيتة باوعتلة ببرود نزل ايدة
دموع:اريد انام
لزم ايدي باسها
الكسار:بس لو تفهميني كلشي يتصلح
دموع:ماريد شي يتصلح بعد من عرفت منومها بحضنك روحي لعبت منك
الكسار:والله ما صار بيناتنة شي خليتها تسكر واوهمتها انُ كملت ليلة وياها بس وحق هالطفل البريئ الي بطنچ ما صار بيناتنة تلامس بهذيك الليلة من طلعت منها بقيت استفرغ لعبت نفسي من نفسي لأن خليتها بحضني
كعدت شفايفي ترجف
دموع:باستك هنا؟
حچيت أشر على شفايفة
الكسار:تخسي وداعتچ
دموع:حضنتك ونامت بحضنك
هز راسة ونزلة ميباوعلي سحبت ايدي
دموع:لعد حضنك يحرم علية بعد
الكسار:چنت مجبور بس تفهمي وضعي
دموع:بس ممجبور تحضنها وتحچي علية ممجبور تكول لعبانة نفسك مني وتنطيني حقوقي مجبور بعمري مطالبتك بهالشي
الكسار:رجوع حسن اهم من روحي افهميني اريد ارجعة ماريد يبقى حسرة بگلبي رجوع حسن عمى على گلبي وردت ارجعة بأي ثمن
دموع:والثمن اني اوف شگد رخيصة طلعت عندك بعمري متخيلت حسن الي اني هم انتظر رجوعة حيصير سبب لدماري
الكسار:وصية امي هذا
ابتسمت امسح بدموعي
دموع:واني معندي احد يوصيك عليه لهذا كلت اكسرها منو وراها يطلع لا اهل براسهم خير وحتبقى غصبًا عنها بس انتَ نسيت اني عندي خوالي وعندي اخوية
الكسار:خوالچ يعرفون بكلشي باهر وياية هم
غمضت عيوني ورجعت ابچي
دموع:يعني السالفة مطبوخة من الكل عفية عليكم تستاهلون تصفيق بسبب شغلكم التافه رجعتو دمرتوني
سكت محتار مسحت دموعي وحچيت بجدية
دموع:كسار بدون كلام ولا شي اني بعد ماكدر اعيش وياك اريد تطلگني
فز جسمة وباوعلي يبلعم يحاول يهدأ نفسة عصر ايدة وهمس
الكسار:اولدي ويصير خير
دموع:يعني موافق؟
الكسار:كلشي تردينة يصير ورة ولادتچ
دموع:واذا حملي ما استمر؟
الكسار:اسم الله نامي دموع ولتفكرين بشي ومن باچر ارجعي لغرفتچ اذا تردين اني بعد ما ادخلها ماريد الأطفال يحسون بشي
مجاوبتة تقرب باس راسي وكام حتى يطلع فتح الباب صارو وهيب ووداد بوجهة يردون يدخلون للغرفة
الكسار:انتبه عليها زين واذا صار شي كلي
هز راسة وراح لغرفتنة دخلت وداد شايلة البزونة الي سموها مريره وتباوع للغرفة
وداد:غرفتك حلوة
تجاهلها واجة كعد يمي
دموع:وين لگيتوها
وهيب:لگيناها بوضع مخل للأداب ويا عتوي من الشارع الأدبسز همزين تلاحگنة للوضع
ضحكت على كلامة وهوَ ابتسم
وداد:بس خطية كسرت خاطري ليش قاطعنة خلوتها
وهيب:مو ما تردين بزازين بعد خاف تحبل
وداد:اي عدنة اثنين كافي
گلب عيونة بقلة صبر وهيَ تبوس بالبزونة والبزونة انزعجت منها طفري عليها وخرمشي وجهة ورگبتها وصعدت على ظهرها نبتت اظافرها بي وداد تعيط من الوجع لعبت بحالها لعب
كام وهيب يريد يلزمها وماكو خفت عليها مبين أذتها من فقد الأمل لزم وداد دفعها حط ايديها ورة ظهرها حتى لا تتحرك صار وجهة على الحايط وكف وراها يهدي بالبزونة وهاي عبالك انچلبت حتى وهيب ضربتة
حط ايدة على راس البزونة لحد ما هدأت شالها بحضنة
وهيب:لازم نگص اظافرها باچر اخذها للعيادة نلحقها ونخليها تتزوج مبينة طالبة تزاوج
خرمشت وهيب بصدرة ونزلت من حضنة وداد كعدت تبچي لأن أذتها هواية وجهة ينزف ورگبتها شهاليوم الي مليان دم
وداد:حقيرة بعد ولا احبها ولا اشيلها ااااخ يمة حموت وجع
دموع:عزا وجهچ بي دم
غطت وجهة تبچي ووهيب واكف يباوعلها ببرود
وداد:عيب عليها ممسويتلها شي اني
وهيب:هيَ شتفهم
وداد:حقيرة لتدافعلها عتوي
صرخ بوجهة
وهيب:لتكوليييييين عتويييي توبي منييي
خنست تباوعلة بخوف كسرت خاطري كامت تمشي بخجل ملابسها من ورة مشگگة من اظافر البزونة
وهيب:وين رايحة بهالمنظر
وداد:ها اروح اخذ اختي لبيتنة
راح للكنتور طلع جاكيت طويل ومدة الها
وهيب:لبسي اول ظهرچ طالع
بقت صافنة گلب عيونة وراح حطة على كتفها قلصت عيوني ورفعت حاجبي من شفت نظراتها لوهيب هوَ ولا باوعلها وهيَ بس تقرب عليها احسها نست شلون توكف وتتنفس وتباوعلة وعيونها تلمع
ابتعد عنها وهيَ مبتسمة
وداد:شكرًا
هز راسة مشت تتلفت وتباوعلة ضربتلي صفنة
دموع:هاي بس لا كرشت على وهيب عزا
طلع وراها حتى يوصلها لبيتهم ميصير تروح وحدها بس بنات
دقايق ورجعلي
وهيب:راح انام جوة اخاف ادفرچ كلشي يصير بس اول اريد امشط شعرچ
ابتسمت جاب مشط واجاني سرح شعري
وهيب:تذكرين شگد چنت احب شعرچ واحب امشطلچ لأن يطول يلا يتسرح احبة عكس شعر فرحتي چنت بس اخلي المشط بي ينزل مثل الشلال على ظهرها
دموع:فرح كلشي بيها حلو ومميز الله يرحمها
وهيب:اشتاقيت انومكم بحضني تدرين واكعد من النوم الگاكم تلعبون بشعري وتحطون بي قراصات هاي الملونات تذكرين
ضحكت
دموع:اييي وچنت تسوي نفسك نايم بس حتى نكمل وتكعد تسوي نفسك معصب علينة وتالي تضحك
تنهد ومسح عيونة بقهر
وهيب:ياريت من هاي الأيام كادر اخذكم واشردكم وياي چان لا ماتت فرح بحسرتي ولا احنة بقينة بحسرتها اتمنى لو بس شايفها وحاضنها فرح چانت اكثر من اخت چانت امي واختي وصديقتي
دموع:بس يصير عندي بنية اسميها ملاك ومن انتَ تتزوج ويصير عندك بنية سميها فرح كلش متحمسة تصير بنية تشبهة
وهيب:اذا الي ببطنچ بنية وتطلع تشبه فرح وداعتچ اخذها اربيها واكبرها على ايدي
دموع:لو عندك ولد چان خليتها تتزوجة من يكبرون
ابتسم
وهيب:عندچ ابن زياد مو مرتة حامل قبلچ وبيها ولد زوجيهم
دموع:يمةةةةة عوذة عوذة
ضحك يعرفني اشاقة
دموع:نام يمي متدفرني خلي نعيد طفولتنة
هز راسة وكام جاب دبدوب صغير حطة بنصنة بقيت صافنة
دموع:هذا مال فرح منين جبتة
عيونة صارت تلالي بالدموع
وهيب:رحت لبيت سياف لكيت كلشي باقي على حطتة حتى فراشنة باقي مفروش ودبدوب فرح على فراشها اخذتة بدون غسل حفت اغسلة وينعدم قفلت البيت ورجعت
حضنت الدبدوب ووهيب حضني وصرنة نبچي اخخخ شگد مشتاقتلها وبغرفة وهيب بكل مكان اكو صور الها والي
بيومها نمنة بمكان واحد وبنصنة الدبدوب كدرت اشرد من واقعي بالنوم بحيث هواية طولت واني نايمة لحد ثاني يوم العصر كعدت على بوسات حسونات وادومات
ادم:ماماااا كعدي انتِ مريضة
فتحت عيوني وهجمو علية يبوسون بخدودي
الحسنين:اخيراً كعدتي نمت 3 مرات وانتِ بعدچ نايمة اشتاقيتلچ والله
ادم:اني حتى شتاقيتلچ وبابا هم نايم شبيكم اليوم
اخذتهم بحضني
دموع:مابينة شي حبيبي بس ردت انام يم خالكم وبابا تعبان المهم هسة اكلتو؟
الحسنين:اي خالو جاب ريزو بس طلع مطيب وجابلنة مندي وضربنة بالخمسمة اكلت بيدي
اخذت ايديهم ابوس بيهم
دموع:اروح فدوة لأيديكم حبيباتي
ادم:كومي ماما خلي نكعد بابا
هزيت راسي وكمت وياهم امشي على كيفي فتحو باب غرفتنة ودخلو وكفو على راسة يكعدون بي
اباوع للغرفة نظيفة ماعرف وين راحت الهوسة مال البارحة
ادم:بابا كافي نوم كوم نريد نلعب طوبة وياك
فتح عيونة بتعب صارت عيونة علية نزلت راسي
سمع كلامهم وكام ما خلاهم ينتبهون لبطنة بسرعة لبس التيشيرت سحبو من ايدة لناحيتي ردت اطلع بس حسوني كال
الحسنين:ماما اوكفي خلي البابا يبوسچ
التفتت اباوعلة ببرود تقرب علية باس خدي
الكسار:وهسة ننزل؟
ادم:اي يلا
الكسار:انتِ ابقي هنا ميصير تنزلين
دموع:اريد انزل
دنگ علية وشالني بحضنة
دموع:لا هسة يجي وهيب وانزل بطنك تتأذة
الكسار:عادي
سكتت همزين برغم اكو روح بداخلي بس ابد مچنت ثگيلة لأن هالحمل دمر صحتي ونفسيتي ضعفت هواية بحيث عظام ظهري بانت عكس حملي بحسوني وادومي
نزلني من حضنة راح يغسل واني رحت غسلت هم وكعدت بالصالة
ادم:ليش ما بستي بابا بس هوَ باسچ
دموع:عادي مو لازم كل يوم نبوس بعض
الحسنين:لا ماما انتو كل يوم تبوسون بعض وتضحكون اليوم مدري شبيكم
ابتسمت بتصنع ماعرف شلون ننفصل وهمَ تعودو نعيش سويه بسعادة
من دخل سحبو ايدي لأبوهم الي چان ينشف بوجهة ويهمسون عود محد يسمعهم
ادم:بوسي بوسي
باوعتلة چان مبتسم على تصرفهم تقربت عليه بقلة حيلة رفعت نفسي ابوسة بخدة وهوَ اكيد مستغل للفرص حاوط خصري وحضني ردت اوخر حضني اكثر
الكسار:تصرفي طبيعي دموع ماريد الأطفال يحسون بشي
بستة بخدة وهمست
دموع:بس بالنهاية حيعرفون احنة حننفصل
سكت واكتفى يدنگ علية يبوسني بطرف شفتي ابتعدت بسرعة
دموع:ها وهسة قابلين لو لا
هزو روسهم وراحو يلعبون كعدت اتنهد كعد كدامي
الكسار:لازم ميحسون بشي ماريد اعيد طفولتي بيهم وادمرهم
ضحكت بستهزاء
دموع:دمرتهم بخيانتك انتَ
سكت طلع جگارة يدخنها ودگ تلفونة بسرعة باوعلي بقيت كاعدة جاوب
الكسار:خير شكو
وانتِ منو حتى اخاف منچ كلچ خلگ گـ*** شبعو بيها الزلم شبع واخذو منها معلومات واخوچ الگـ*** راح الزمة وادوسة برجلي مو عبالكم تشردون مني
اكلي تبن عاهرة حسن اطلعة من بين عيونكم
لا تهددين محد خاسر غيرچ
سكت شوي وخنزر بعيونة وكام يعيط
الكسار:والله اذااااا سويتووو بييي شييي دماركم على ايديييي اكلي نعل
سد التلفون وكعد يرجف من العصبية ورجع يدخن اكثر واكثر ماعرف شگالتلة حتى هيچ عصب بس يمكن شي يخص حسن لأن محد يخبل الكسار غير سيرة حسن
باوعلي بوسط عصبيتة
الكسار:ليش كاعدة هيچ تمددي ورفعي رجليچ
سكتت لأن هوَ معصب تمددت ورفعت رجلية على مخاد غمضت عيوني من كل عقلي اريد انام بس احس نفسي حيل نحلانة وجسمي خدران
دقايق وعبالة اني نمت حسيتة تمدد بصفي وحط وجهة برگبتي
الكسار:الگلب ما دگ لغيرچ
سويت نفسي ميتة مو بس نايمة اخذ شفايفي يبوس بيهم
الكسار:انتِ كاعدة باوعيلي
فتحت عيوني المدمعة نسيت هذا الكسار الي حافظ كل تفصيل عني
دموع:ابتعد عني
كعد يمسح على خدي
الكسار:شنو تردين انتِ
دموع:اريد اتطلق منك
سحب نفس عميق وزفرة
الكسار:بعد ولادتچ التردينة يصير
دموع:متاخذ اطفالي مني
الكسار:مستحيل لأن اني شفت الحياة بدون أم شيصير بحالك يبقون عندچ بهالبيت واني اطلع
دموع:لا حناخذ بيت اني واخوية ونعيش هذا بيتك وحيرجع بأسمك
الكسار:هالبيت مهرچ الثاني وموجود هالشي بعقد الزواج مالتنة من حقچ انتِ وبس
سكتت
اندگ الباب راح يفتحة شوي واجاني حط حجابي على راسي ودخل باهر درت وجهي عنة كعد يهز ايدة
باهر:خير خير الوجه مگلوب
محچيت شي سكتة الكسار بس باهر شيسكتة
باهر:صيري زينة علمود تزوجيني بيدچ
حچيت بزعل
دموع:ما ازوج احد ازوج بس وهيب على الأقل مغدر بية وميعرف بخيانة زوجي ويسكت
باهر:ترى شغل ورجلچ ما سوالها شي
دموع:وانتَ سويت مو اعرفك ادبسز واحد يضمضم للثاني
حط رجل على رجل
باهر:يعني خفايف بوسة بوستين لزمة لزمتين بس الفاحشة لاااااا اني شريف
دموع:انتَ عبالك الفاحشة بس من تصير هذيك السالفة؟ لا غلطان الفاحشة من تباوعلها ومن تباوع لجسمها الفاحشة من تحضنهاااا وتبوس بيها واكو اشياء عيب تنحچي بس هاي الفاحشة
باهر:مجبورين وهيَ عاهرة وبايعة نفسها ببلاش للرايح والجاي غير سترنة على وهيب چان هم لگفتة هسة
دموع:لا عيني اخوية شريف ما يبوس ببنات ولا يحضن بيهن ولا يباوعلهن معندة سوالف مكسرة
باهر:هسة شبيچ هونيها تهون كدامچ رجال مطلق منذ الاف السنين وشاف هيچ كدامة وين يصبر مو زين ومني ولعبت نفسي منها چان هسة حامل مني
الكسار دفرة برجلة يحچي وعبالك شي عادي اعرفة يشاقة بس لعبت نفسي انوب كل شوي وحچة شي
دخلو ادومي وحسوني يركضون
ادم:ماما اجت براد
دموع:دخلها حبيبي
باهر:هاي شنو عندكم براد بيت فرع النساء
دموع:بنت جوارينة ادوم يسميها براد عود وداد
ضحك
دخلت وداد شايلة كيكة شافها باهر وضربلة صفنة عليها ومن دخلت اختها وراها ضربلة صفنة ثانية على اختها
وداد:سويتلچ كيكة كلت خطية مريضة واني بس بالكيك افلح
دموع:عاشت ايدچ تعالي كعدي
وداد:لا عندكم خطار خلي اروح اخذ البزونة للعيادة
دموع:شلون صار وجهچ
باوعت للبزونة بغيض
وداد:بس لا ميروح الأثر ويخرب وجهي ميتة قهر
ردت احچي بس سكتت مصدومة من حچة باهر
باهر:حرامات يخرب وجهچ فدوة لهالوجه
الكسار خزرة وضل يگرص بي وهوَ يباوع ولا مهتم محتار يباوعلها لو يباوع لأختها
وداد:وجع لهالوجه گبر ان شاء الله عيونك واكع عليهن كلور يخوفن راسك مثلث چنة راس سومو الي بكلارنس صوتك صوت ثور اسود وعيونة حمر رگبتك شطولها چنك زرافة استقرررر
شگد چنت ضايجة بس ضحكت من كل گلبي على كلامها استلمتة حاصل فاصل وهوَ ضل صافن ما مستوعب شي
باهر:ومرض حتى مرض شحچيت هسة اني
وداد:ومرض المرضك سومو عيونك نزلهن عني وعن اختي لا افگسهن شتفهم هالطفلة وتباوعلها هيچ
أشر بصدمة
باهر:هاي طفلة!!! هاي مرة عشرينية شنو طفلة
الكسار:بااااهر انچبببب
حضنت اختها عيونها مدمعة
باهر:شحچيت هسة اني داكلكم البنية چبيرة مو طفلة
الكسار:انلصم البنية مريضة بيها توحد شتفهم من كلامك عنها عمرها 14 سنة لا تدني نفسك على طفلة مريضة
تحمحم وعدل كعدتة
باهر:اعتذر منچ ومنها چنت اشاقة
خزرتة
وداد:اني رايحة هذا ميستحي وبدون خجل بس اخوچ شريف ومباوع لهالطفلة بنظرة حرام امشي مريرة امشي
خلت وطلعت
دموع:انتَ شبيك لسانك متلزمة ليش تحچي هيچ
باهر:شمدريني متتحمل شقة شدعوة عليها
دموع:اسكت اسكت
ابتسم وسحب نفس من الجگارة
باهر:بس خرب والله حلوة شگد عمرها هاي الچبيرة
دموع:السنة تتخرج لتحط عينك عليها البنية شريفة
باهر:قصدچ اني مو شريف
دموع:والله الشريف ميبوس بنات ويحضن والله اعلم شمسوي بعد
باهر:بعد بعد ذليني عمي اني بايعها مايهمني احد بعد حتى ابوي مايكدر يوگفني لو اريد الحرام اسوي بس ماريدة
دموع:خلي الله بين عيونكم الزنا مو شي سهل
هز راسة وثواني وحچة بشرود
باهر:بس والله حلوة چنها جمارة مصبوبة صب
وهيب:منو هاي بعد
طفر لوهيب يحضنة ويبوس بي وهوَ يدفعة
وهيب:وخرررر لتلزگ
كعد بصفة
وهيب:عليمن تحچون
باهر:عن براد جوارينكم چنت اشوفها بس هسة صايرة تخبل بنت اللذين مو وجه گمرية
وهيب:لتحچي على عرض الناس حتى لحد يحچي على عرضك خلي الله بين عيونك عيب
باهر:هسة شحچينة شبيكم
وهيب:اسكت عيب
باهر:بس حتى اختها حلوة حرامات مريضة لو ما مريضة چان هسة كلتلكم اخطبوها الي
خزرة وهيب
وهيب:شبيك انتَ هاي طفلة مريضة شلون تحط عينك عليها ليش تصير فاسد وحتى المريض ميسلم منك كلش عيب عليك وما تستحي ابد
باهر:كلت لو ما مريضة اكيد ما حاط عيني عليها لأن طفلة
وهيب:لعد اسكت ولتحچي بيها
سكت باهر يفكر ضلو يحچون بغير موضوع وباهر كل شوي صافن لحد ما كال بضحكة
باهر:زين خلي اخطب اختها الچبيرة شو عجبتني
وهيب:يا طلابة البنات المتخلص اني طالع بس ابقى هنا ازوع عليكم وعلى مواضيع باهر الماصخة
جرة يضحك
باهر:سكتت خوية سكتت اكعد
گوة قبل يكعد
بقو يسولفون عادي بس الكسار عيونة علية انزل عيوني ماريد اباوعلة اني مدابالغ بس كسرني وقلل من قيمتي كدام وحدة عاهرة كال عني كلام محلو بحقي وسالفة الحضن تدق بيه مكدرت اتحمل حسيت نفسي حقدت عليه
چنت ناوية اروح لخوالي بس من عرفت يعرفون وخرت هالفكرة من راسي وهم ماكدر اخلي اطفالي يعيشون نفس الشي الي عشتة اني
بعد محد حچة ويا الثاني ناكل سوية نسوي الوضع طبيعي بس الگلب مجروح من عندة
صعدني وهيب لغرفتي وقررت انام بيها علمود الأطفال ميحسون بشي
دخلت لگيتة نايم على ظهرة وصافن على صورتنة الي بالحايط من شافني دخلت عدل كعدتة
دموع:حبقى هنا بس لتحتك بية ولا اني احتك بيك علمود الأطفال بس ومن اولد نحچيلهم ونفهمهم كلشي
هز راسة بهدوء رحت للكنتور طلعتلي ملابس وبدلت ورة الباب وتمددت على الچرباية ناطيتة ظهري
الكسار:نامي على ظهرچ
نسيت نومتي استغفرت ونمت على ظهري عمضت عيوني ثواني وحسيت برجلية تنرفع
دموع:شكووو
حط مخاد جواهم
الكسار:تردين هالطفل لو متردينة؟
دموع:اكيد اريدة شهالسؤال
الكسار:لعد انتبهي زين واذا ما انتبهتي اني انبهچ
ردت احچي وتلفونة دگ ركض حتى يجاوب
الكسار:ها مراد؟
شنووو منين جابت رقم زوجتك
شنو دزتلها
خرب سد سد هسة اتصل
سدة بوجهة ورجع يخابر واني بس اسمعة
الكسار:الو باهر خليهم يتحركون بأسرع وقت هاي حالفة تدمرنة كلنة
شنووو ما تكدر واذا عندها نعال طبة مرض محد كالة يذب نفسة هيچ كلنة ويا محد اخذ مخدرات منها بس هوَ چنة مطي
تحرك باهر تحرك انتبه تشرد منكم
دازة لمرت مراد فيديوهات طايح حظها تخص مراد هم طاح بيها شگد نصحتة بس ما سمع مني خلي ياكلها المطي روح هسة دقايق واجيكم
ذب التلفون وراح للكنتور مستعجل يلبس بسرعة بسرعة حط مسدسين بخصرة اخذ لثام وكفوف صار يخوف بس اني متعودة اشوفة بهالمنظر
راد يطلع باوعلي
الكسار:ادعيلي الزم ولو واحد منهم
دموع:ان شاء الله تلزمهم كلهم
رجع تقرب علية باس خدي وطلع من البيت بقيت بالغرفة ادعيلهم ...
.
يتبعع
كولو هالمرة هم اكو قفلة؟؟؟؟🫣
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!