رواية الكسار (سلاسل الغوث) الفصل الخامس وثلاثون 35 - بقلم لـ ميامي

الـ خلصها وياي محبته تمثيل
مو صعبة عليه دور الضحية ..

قراءة ممتعة 🤍
.......................................................

دموع:بقيت صافنة عليهم وشفايفي ترجف خالي خاف من سكوتي تقرب علية يضرب على خدي بخفة

فهد:دموع تسمعيني!

باوعت بعيونة وساكتة شفت الكسار كعد بصفة خايف
الكسار:باوعيلي فتحي حلگچ لتعضين لسانچ

عگدت حواجبي ودفعت ايدة عني وحچيت بتعب
:و وخر انتَ

ولا اهتم لزم معصم ايدي يقيس حرارة جسمي اذا صاعدة يعني اكو نوبة صرع قادمة واذا طبيعية ماكو شي نترت ايدي من عندة اخزر بي

:كلت وخر عني شجابك احنة دنحچي بموضوع عائلي

رفع حاجبة بستهزاء
الكسار:هسة صرت غريب؟

كمت من كدامة امشي بدوخة رحت للمطبخ وكلهم اجو وراية مثل البطة من كتاكيتها يمشون وراها

شربت مي وغسلت وجهي واجة خالي رجعني للصالة كعد يمي يحچي وياية

فهد:بابا اهدئي حتى نكدر نحچي وياچ

ابتسمت مجاملة
:مبية شي حبيبي هادئة

اجاني صوت زياد باوعتلة لكيتة يهز ايدة
زياد:تلكوها ضاربتلها بطل عرگ مدوخها لتشيلين هم شكم يوم وتتعودين

ضحكت بعز قهري
:والله انتَ مشكلة فد مكروه

زياد:الحمدلله المهم عندچ مشاعر اتجاهي حتى لو كره

بس كال هيچ باوعلة الكسار بخزرة وزياد نزل راسة يضحك

اني كلت بأبتسامة
:لا انتَ صاير حباب حبيتك شوي

باهر دار وجهة ميت ضحك والكسار احتار يخزر منو احسة يريد ينفجر مهتميت باوعت لخالي

:اي خالو احچي

فهد.اي بابا اخوچ مع الأسف صار عندة اضطرابات عقلية بعد كلشي صار ويا من الطفولة لحد هسة وعرفت محاول اكثر من مرة ينتحر

تنهدت ونزلت راسي
:حچالي من اخذونة محاول ينتحر بس بكل مرة يفشل

جناح:الأحد محاكمتة الأولى اعتقد هالشي راح يساعدة

عگدت حواجبي ممفتهمة
:شلون يساعدة؟

اجاني صوت الكسار وهو يدخن ويفر الگداحة
الكسار:يعني عدنة اوراق تثبت اخوچ عندة مشاكل بعقلة والجرائم الي ارتكبها مكانت بوعيه ممكن يتخفف الحكم ويدخل مصحة عقلية او ممكن يدخل مصحة عقلية شكم سنة وينسجن شكم سنة ويطلع بس المهم مينعدم ومينسجن مؤبد

صرت اكل بشفايفي وافكر
:عظيم يعني وهيب ممكن يصير زين ويطلعلي

زياد:احتمال چبير يتعالج وينحكم بسنوات قليلة

باوعتلة وكلت بفضول
:زين شكم سنة ينسجن القاتل؟

زياد:والله يا دمعة الي بوضع اخوچ ينحكم اعدام او مؤبد بس اخوچ عندة مشاكل عقلية ولو بس مخدرات چان انحكم 50 سنة بس الحمدلله وعسى  تكرهو شيءٍ وهو خير لكم

هزيت راسي وعدلتلة
:عسى أن تكرهو شيءٍ وهو خير لكم

زياد:مو مهم المهم الفكرة شوفي رغم مرض اخوچ صعب بس خير اله

ارتاح واحترگ گلبي بكلامهم سودة علية حقة يصير عندة مشاكل بعقلة الي تحملة علمودنة محد يكدر يتحملة

اشتغل بالحرام علمودنة احترگ علمودي تحمل التنمر تحمل الضرب تحمل كلشي في سبيل راحتنة وفي سبيل نرجعلة

:زين خالو يتعالج مو؟

ابتسم وباس ايدي
فهد:كولي أن شاء الله

:ان شاء الله

غمضت عيوني حسيت محتاجة اصلي بس مو بالبيت محتاجة مكان يريح گلبي فتحت عيوني وباوعت لخوالي بترجي

:عادي تاخذوني لكربلاء والنجف؟

هز راسة مبتسم
فهد:بعيوني تجهزو الفجر نطلع للنجف نزور الأمام علي والقبور وبعدها نطلع لكربلاء

زياد:جا خوش اروح وياكم

الكسار:واني اروح اريد ازور مَلِك

مهتميت حتى مباوعتلة باهر كال اروح وخالي جناح باوع لسيدرا بخزرة وكال اروح خلص هالايام يخوزر بيها وهاي ترجف من عندة

كمت من يمهم جهزت ملابسي متحمسة اول مرة اروح للنجف والكربلاء حطيت راسي ونمت

بعد فترة حسيت بشخص يكعدني فتحت عيوني منزعجة شفتها سيدرا

:ها منو مات بس لا اني

ضحكت تهز بأيدها
سيدرا:لا الحمدلله بعدچ عايشة يلا كومي لبسي حتى نصلي ونطلع للنجف

طفرت بستها بخدها وركضت بس استوقفني صوتها
سيدرا:لتركضيييين ترة حامل

باوعتلها وحطيت اصبعي على شفتي
:اشششش محد يعرف بس وهيب وانتِ لحد يعرف

هزت راسها بأسى واني اخذت ملابسي ومنشف ورحت للحمام سبحت بسرعة بسرعة وطلعت بس طلعت وكفت متصنمة بمكاني

شفت خالي لازم سيدرا من خصرها ومقربها علية وحي حاطة ايديها على صدرة خايفة تنتفض

جناح:عاقبيني واعاقبچ شنو نبقى هيچ

سيدرا:و وخر لحد يطلع ح حباب

قربها اكثر ومشة انفة على انفها
جناح:مسويتلچ شي والله فهمتي غلط

سيدرا:ت تمام بس و وخر حباب اني خايفة منك

طبع بوسة بطرف شفتها واني حطيت اصابعي بحلگي وصوفرت فزو اثنينهم مصدومين

:هلا هلا هذا عملك الخيري جنوحي؟

مسح على جبينة متوتر
جناح:شكو شبيچ انتِ

غمزتلة اضحك
:حبيبي هنا اكو ناس اختلو بغرفتكم وبوسها وانتِ روحي غسلي صرتي طماطية وها اصبر عليها ترة رايحين زيارة مو بحال السرسرة

عض شفتة خافي ضحكتة ونزع نعالة
جناح:تولين لغرفتچ تجهزين لا العبة عليچ

ذبيتلة بوسة بالهوى ورحت للغرفة اضحك عليهم

بدلت بسرعة صليت وطلعت انتظرهم بالصالة اول الناس اني كملت
وبعدها كلهم اجو وطلعنة اني وسيدرا وداني ورة وخوالي فهد وجناح كدام وجناح يسوق وباهر والكسار وزياد وحدهم بسيارة الكسار

مشينة بطريق واحد سيارتهم وسيارتنة بصف بعض چنت اباوع من الجامة من تتقرب سيارة الكسار اسوي نفسي ممنتبهة واباوع للمراية الي كدام اشوفة يباوعلي

اخر شي نعست حطيت راسي على الجامة ونمت
واني نايمة حسيت بشخص لزم ايدي بس عيوني ما اكدر افتحهم سمعت صوت مألوف علية

:مشتاقتلچ

ابتسمت وكدرت افتح عيوني وشفت وجهة الملائكي كدامي ردت الزم وجهة بس مكدرت ارفع ايدي اكتفيت اباوعلها

:ملاكي جايتچ

فرح:دموع بسرعة انتظرچ

ردت احچي بس حطت ايدها على حلگي سكتتني ونزلت باست بطني بهدوء ورفعت نفسها تمسح عليها

فرح:انتبهي على هالروحين الي عندچ

بست ايدها وخرتها وكلت مستغربة
:روحين؟

فرح:روحچ وروح الي بطنچ

رجعت باست بطني وكامت نزلت من السيارة وكفت بصف شخصين وثلاثتهم صارو يلوحولي عرفت هذول مَلِك وحسن

فتحت عيوني ميتة عطش واتلفت يمين ويسار تنهدت من عرفت چنت داحلم رجعت خليت راسي على الجامة اباوع للطريق ولازمة بطني محتارة بعد متأكدت اني حامل اكيد شلون حربي وحدي حيبقى بدون أب بأسم منو يتسجل اذا اني وابو متزوجنة محكمة شلون حيتربى بيناتنة

صرت اكل بروحي اكل راحت عيني على سيارتهم شفتة مطلع ايدة من الجامة وايدة بيها جگارة ضربت ريحتها بخشمي حسيت نفسي اريد اكلها مو بس ادخنها باوعت لخالي وكلت ابلعم

:خالو انتَ تدخن؟

باوع علية رافع حاجبة
فهد:اي ليش

:دخن خلي اشوفك حباب

ضل مستغرب ورث جگارة وفتح الجامة وصار يدخن هو يدخن واني اتنفس بس ماعرف ليش جگارة الكسار چانت اطيب ريحتها بس المهم شميت ريحة دخان وارتاحيت

بعد فترة وكفت السيارة كدام مطعم نزلنة كلنة دخلنة للحمامات غسلنة وسيدرا غيرت لداني وبعدها كعدنة كلنة سوية نتريگ اني كاعدة بين خالي فهد وسيدرا وخالي جناح كاعد بصف سيدرا والبقية صايرين كدامي

شميت عندهم گيمر وكاهي طلبتهم وصرت اكل متلذذة وزياد يضحك علية

زياد:بس لو اعرف سر حبچ للگيمر والكاهي ارتاح

ضحكت واكلت لگمة
:انتَ هم تحبة لأن طلبت نفسي

زياد:اي اذواقنة متشابهة مادري شعجب

خزرة الكسار وكال بحدة
الكسار:اكل واسكت زياد

رفعت حاجبي وهو باوعلي وسوة نفسي گلبت عيوني ورجعت اكُل

من كملنة رجعنة كل واحد لمكانة اني چنت شبعانة نوم اخذت داني من سيدرا وخليتها تنام چنت اشوف نظرات خالي الها وهي نايمة دعيت من كُل گلبي ينصلح حالهم

اخيراً بعد معاناة الطريق وصلنة للنجف اول شي رحنة للأمام علي علية السلام زرنا وصلينة اني وسيدرا وبعدها رحنة للمقبرة احس روحي صارت ترفرف ودموعي تصب قبل لنوصل لقبورهم مشتاقتلها اريد افضفضلها

وصلنة لمكان والسيارة بعد متكدر تدخل اكثر ركنو السيارات ونزلنة كلنة صرت امشي ضايعة ادور على قبورهم والكسار يركض ويصيح

الكسار:اجيتك يا حبيب روحي اجيتك خوية

شفتة ذب نفسة على قبر وحضنة يبچي ويعاتبة عرفت هاي قبورهم تقربت عليهم صافنة اباوع عليهم ودموعي تنزل

چان عبارة عن قبر بصف قبر وحسن صاير بنصهم كعدت بين قبر حسن وقبر ملاك اشهگ بالبچي

:ها ملاكي اجيتچ مو مشتاقتلي هاي اجيتچ اخخخخ ميتة على شوفة وجهچ الحلو ميتة على سوالفچ وضحكتچ بعدني مشبعت من شوفتچ والله

صرت ابوس بأسمها الي محفور على القبر وابچي بحرگة عليها
انحرمت منها هواية متهنيت برجعتها ولا كدرت اشبع منها ومن ابنها صرت احچي وياها وكأنما هي كدامي

:فرحة وهيب رجع تدمر من عرف بموتچ واخذ ثارچ يا بعد روحي چان مشتاقلچ مشتاق لصندوق اسرارة مشتاق لأختة وأمة

مديت ايدي لصدري وطلعت گلادة فضية
:شوفي شوفي شنو انطاني كال مكدرت ازورها بقبرها خليلها شي من ريحتي حتى تعرف اني رجعت وبخير

حفرت حفرة صغيرة ودفنت الگلادة بيها باوعت لقبر ملك ابتسمت من بين دموعي چان الكسار حاضنة ويبچي رحت كعدت كدامة ابچي

:اختي بكثر متحبك ماتت وياك قصتكم راح احچيها للكل حتى يعرفون حبكم وثمرة حبكم ويترحمولكم

قريتلة الفاتحة ورجعت قريتها لحسن وملاك وبقيت كاعدة ابچي بنص دموعي لزمني خالي من اكتافي وكال

فهد:كومي بابا كومي زوري اهلچ

نشفت الدموع بعيوني وباوعتلة
:اهلي؟ اني هذول اهلي انتو وفرح وهيب حسن وحتى مَلِك هذول بس اهلي

فهد:ميصير بابا يبقون اهلچ بس اترحميلهم واقريلهم الفاتحة

:اهلي الي باعوني ودمروني ؟

صار يلح علية هو وخالي جناح كوموني واخذوني الهم چانت المسافة مو بعيدة بينهم وبين قبر فرح قبرين بس كعدوني بنصهم بقيت اباوع لأسمائهم بحقد وكره بدون ما احس كورت ايدي وضربت قبر سياف وعطت

:ان شاء الله تحترگ بنار جهنم ممسامحتك على كُلشي بسببك اختي ماتت وبسببك وهيب مريض وقاتل وهسة مسجون دمرتة بأفعالك دمرتة بكلشي طلع منك من طفولتة وهو يشوف قذارتكم الله ينتقم منكم حسبي الله ونعم الوكيل

باوعت لقبر شاهيناز ودمعتي نزلت چنت احبها رغم كُلشي ماعرف هي مظلومة او مذنبة بس ذنبنة برگبتها ليوم الدين هي السبب الأول لدمارنة اني واخواني اكتفيت بكلمتين

:الله يرحمچ

كمت عن قبورهم دايخة ورحت لقبر فرح احس الدنيا تفتر بية وشي حار نزل من خشمي وصلت لقبرها كعدت وحطيت راسي عليه شوي شوي فقدت الوعي

اسمعهم يعيطون واحس بيهم يضربون على خدي بس ماكدر لا افتح عيوني ولا احچي حسيت نفسي داموت موتة بطيئة

فتحت عيوني دوخة قوية براسي
لكيت الكسار حاطني بحضنة بسرعة كمت وحصرت نفسي بالباب مال السيارة

:ل ليش حاضني ح حرام

كال وهو يلهث ويريد يلزمني
الكسار:انتِ بخير؟ خشمچ بعدة ينزف

خزرتة مجاوبتة باوعت لخالي وكلت
:خالو رايحين لكربلاء

جاوبني خايف
فهد:يا كربلاء بابا رايحين للمستشفى و

بس سمعت آسم المستشفى انخمش گلبي
:لااااا ما ارووووح مااارووووح مبيييةةة شييييي

ولا اهتمو صرت ابچي واعيط وهمَ عبالهم خايفة من الأبرة بس اني خايفة يعرفون حامل والكسار يرجعني لبيتة غصب

وصلنة للمستشفى عاندت مردت انزل اخر شي عصبو علية اثنينهم هدئت بس ابچي نزلت وشفت البقية وصلو ورانة

دخلوني للطوارئ صارو يفحصوني واني ارجف خايفة بشكل مو طبيعي سحبو من عندي دم وخالي والكسار واكفين والقلق واضح بعيونهم

بقيت ساعة كاملة ينتظرون التحليل يطلع واني ميتة من الخوف ماريد الكسار يعرف

دخلت دكتورة وبدخلتها فز گلبي صرت ابچي بحركة انصدمو بية حتى الدكتورة صارت تريد تهدئني وتحچي وياية بلطف بس اني منفجرة بالبچي

اجة خالي يحاول يسايسني
فهد:شبيچ باباتي ليش تبچين ان شاء الله ماكو شي

اشرت على الكسار اناشغ
:خلي يطلع من هنا ماريد اشوفة خلييييي يطلع

فهد:بس ممسوي شي؟

:ماااااريدةةةة يمييييي احسة يكرهني يريد يريد يضربني طلعةةةة

استغفر خالي وراح للكسار الي صافن علية يبلعم مادري شنو حچو وطلع الكسار شوي هدئت اجة خالي يمي

فهد:راح وهسة لازم نعرف شبيچ

خليت اظافري بحلگي خايفة باوع للدكتورة وكال
فهد:شبيها بنتي؟

ابتسمت الدكتورة وگرصت خدي
الدكتورة:بنتك حامل ببداية الشهر الثالث الف مبروك

غمضت عيوني ماعرف اذا چنت فرحانة او مكسور خاطري وحزينة رجعت فتحتهم اباوع لخالي مصدوم

فهد:حامل؟

الدكتورة:أي حامل بس ضروري تروحون لطبيبة نسائية حملها قوي يعني راح تتعرض لهواية اشياء نزيف الادرار المتزايد والنزيف  الي بأنفها وتقلصات دوخة لعبان نفس قوي اخذوها لطبيبة مختصة وشاطرة حتى تأمنون عليها

سكت خالي يباوعلي واني ملت راسي ابچي راد يحچي ودخلت الممرضة تلهث

الممرضة:دكتورة الهام المريض رقم 68 وضعة سيئ

بس كالت هيچ طلعت الدكتورة تركض واني لزمت ايد خالو بترجي

:حباب خالو حباااااب لتكول للكسار اني حامل

كال بخفوت
فهد:ي يعني چنتي تعرفين انتِ حامل

هزيت راسي ابچي
:قبل ليطلگني بساعة عرفت

فهد:لازم يعرف من حقة يعرف

:لا ابوس ايدك لتكول حيرجعني غصباً عني لبيتة

فهد:باباااا انتِ تعرفين نفسچ شنو دتطلبين منيييي؟ هذا ابو الطفل شلون متريدي يعرفففف شلون ترديني اكذب على الكسار

صرت ابوس بأيدة واتوسل بي بس ولا اقتنع اخر شي نتر ايدي وكام معصب

فهد:ماكدر اكذب على الكسار هيچ كذبة من حقة يعرف هذا الشخص اعز من روحي علية

التفت يريد يروح حچيت ودموعي تنزل
:اذا هو عزيز روحك اني شنو؟

باوع علية واني رجعت گلت
:متريدني اعيش وياك؟ اذا متريدني روح كول للكسار بس بوقتها تنساني اذا رجعتلة مجبورة تنسى وحدة اسمها دموع

غمض عيونة يهز براسة
فهد:صبراً جميل وبالله المستعان

رجع تقرب علية لزم ايدي بقوة
فهد:بابا شنو ماريدچ؟ انتِ قطعة من گلبي انتِ روحي بس هذا ابو الطفل لازم يعرف يا بابا يا حبيبتي

حچيت بهدوء ودموعي تنزل
:بابا يجبرني ارجعلة اذا عرف تقبل ارجع مجبورة؟

هز راسة بلا راد يحچي وانفتح الباب دخلو كلهم باوعت لخالو بتوسل ميكول شي

باهر:ها يابة شبيها؟

عصرت الفراش ابلعم وخايفة من جوابة هو باوعلي ورجع نزل عيونة للأرض

فهد:مبيها شي ضغطها صاعد وبس

اقتنعو صارو يتحمدولي السلامة أما الكسار بس اطمئن وطلع من الغرفة
طلعت من المستشفى دايخة خليت راسي بالسيارة ونمت شوي مرتاحة لأن الكسار ماعرف اني حامل

بعد فترة وصلنة لكربلاء أجرنة فندق اني وسيدرا وداني بغرفة والبقية كلهم بغرفة وحدة اني سبحت وحطيت راسي ونمت من التعب والدوخة

لليل يلا كعدت لگيت سيدرا كاعدة وجاهزة بس تنتظرني رحت غسلت واجيت لبست عباية وكعدنة ننتظرهم يطلعون

سيدرا:شلون صرتي شو احسچ مو تمام؟

:لا زينة زينة بس الحمل ديتعبني

سيدرا:خالچ عرف انتِ حامل

هزيت راسي بأيجاب وهي رجعت كالت
سيدرا:وزوجچ؟

باوعتلها بحدة
:طليقي

سيدرا:دموع ترة انتِ حامل الطلاق باطل الكسار بعدة زوجچ على سنة الله ورسوله

تنهدت بضيق
:اعرف باطل اعرف مو لأن حامل بس لأن بالحظة عصبيه هم  بس اولد اجبرة يطلگني ماريدة بعد

سيدرا:يعني عرف؟

:لا

سيدرا:حرام دموع والله حرام لو تشوفين شصار بي من وكعتي كسر گلبي

بقيت ساكتة بس احچي شي انهار
بعد ربع ساعة اجة خالي جناح وطلعنة لكيناهم كلهم موجودين وزياد كاشخ على اخر حبة بس شافني ضحك

زياد:هااا ام الوكعات شلون صرتي

باوعت للكسار لكيتة يباوعلي بقلق ابتسمت وكلت
:الحمدلله زينة

رحت لزمت ايد خالي فهد وهو ابتسم بحزن ولزم ايدي نزلنة كلنة ورحنة للأمام الحُسين عليه السلام تفتشنة فوك الألف مرة يلا كدرنة ندخل للضريح اول مرة اجي هنا

زرنا چان اجمل شعور احسة صليت وكعدت اقرة الزيارة واتأمل المكان واني دا اباوع للمكان لفت انتباهي منظر جميل

خوالي والكسار وباهر وزياد كلهم متكتفين ويصلون اول مرة اشوف الكسار يصلي وبخشوع هم

كملو كلهم وهو ضل يصلي هواية
اجة خالي كعد يمي خليت راسي على كتفة اباوع الكسار

:خالو مراح تكول مو؟

تنهد يهز براسة
فهد:ما اكول للكسار اطمئني

حضنت ايدة وصرت اباوع على المكان هذا الي يصلي وهذا الي داخل يزور وهذا الي يبچي ويدعي وهذا الي يلعب ويا اطفالة راحة نفسية

بعدها طلعنة زرنا الأمام العباس عليه السلام ورحنة كعدنة على النهر (العلقمي) ورحنة اشترينة اشياء بسيطة

رجعنة للفندق نمنة حتى الفجر نزور ونصلي ونرجع لبغداد

مر الوقت ورجعنة لبغداد تعبانين بعد يومين على الجلسة الأولى لوهيب طول الوقت ادعيلة ربي يسهل امره ويقر عيني برجعتة

اخيراً اجة هاليوم وانه وسيدرا لازم نروح نشهد چنت خايفة وارجف خايفة اغلط بكلمة

اخذونة للمحكمة وطول الطريق ادعيلة
وصلنة وشفتهم كلهم هناك المحكمة چانت ترهب كل شوي ودخلو مجرم الوضع يخوف وخالي يطمني ماكو شي حقهم متعودين

اجة المحامي الي متوكل قضية وهيب صافح الكل وكعد وصارو يحچون ربع ساعة وفرفح گلبي من شفتة دخل لابس ملابس برتقالية ومكلبچين ايديه طفرت على حيلي اباوعلة وابچي

رغم چان مقيد بس يمشي مرفوع راسة ويباوع للكل بحدة

من وكعت عينة علية ابتسم وكفو كدامي لا اكدر اتقربلة لأن لازمي بس اخذني خالي وكفت كدامة بس بيناتنة مسافة

حچيت ودموعي تصب
:شلونك يروحي

ابتسم وعيونة تلمع
وهيب:بشوفتچ صرت زين

:رحت زرت فرح وحچيتلها عنك وطمنتها عليك

راد يحچي وسمعت واحد عاط
:ابتعدو خلو بينكم وبين المجرم مسافة

باوعت بغضب شفتة واحد يجي عمرة نهاية الثلاثين شكلة يخوف وجهة مجروح ضخامتة تخوف

هو من شاف خالي ضحك واجة اكل خالي اكل بالسلام بقيت بمكاني صافنة شوي وحسيت نفسي انجريت بقوة باوعت لكيتة الكسار اخدني كعدتي معصب

الكسار:لشوكت تبقين فاهية هذا عينة نگسة من شفتي ليش مبتعدتي عنة؟

دفعت ايدة خازرتة
:انتَ شعليك وخر اريد اروح لأخوية

الكسار:اخوچ واكفين هو والمحامي اتركيهم

باوعت وشفت صدك واكف ويا المحامي بقيت ساكتة واهز برجلي وكف كدامي حتى هالشخص ليباوعلي عجيب امره

صار وقت الجلسة دخلو وهيب والمحامي وخوالي واحنة بقينة برة ميتة خوف وهلع

نص ساعة وصاحو اسمي كمت ارجف اخذو جنسيتي ودخلت شفت وهيب واكف ابتسملي

القاضي:انتِ دموع فهد علوان؟

هزيت راسي ارجف
:اي

القاضي ليش خايفة ماكو شي يخوف بس تعالي حطي ايدچ على القرأن ورددي وراية

رحت ارجف حطيت ايدي على القرأن وهو كال
القاضي:قولي اقسم بالله لا اقول غير الحق والله على كلامي شهيد

رددت الي كالة وطلب مني احچيلة عن الوقت الي بقيت عند وهيب بي صرت احچيلة

حچيت كلشي عندي وبعدها طلبو سيدرا دخلت وهم اقسمت بالحق

سيدرا:هو چان يحميني وهم شردني من عصابة ومو بس اني وياية بنات واطفال هم وهو يشتغل ضد العصابات حتى يشرد اطفال وبنات من قبضتهم يعني وهيب بريئ هو الي انقذني اني واخوية

بس كملت كلامها وكف المحامي قدملة اوراق وكال
المحامي:هاي اوراق تثبت صحة وهيب سياف ناجي العقلية مو تمام والجرائم الثلاثة من سواهم مكان بوعيه

اخذ الاوراق يدقق بيهم دقايق وكال
القاضي:يرجعون يفحصون صحة عقلة والاوراق توصلني اني اول شي انتهت الجلسة

خلص هاليوم بخوف الجلسة الثانية بعد اسبوع رجعت ادعي وادعي وادعي اريد من ربي يرجعلي وهيب

رجعنة للبيت واني دايخة بس دخلنة اشتميت ريحة برياني عضيت شفتي وركضت للمطبخ لكيت ام سلمان مكملة طبخ بدون اي كلمة رحت فتحت الگدر وصرت اشتم بالأكل

دخلو خوالي وباهر
فهد:على كيفچ لتركضين بعد

باوعتلة فاتحة عيوني على وسعهم وهو ضحك
فهد:يعرفون بابا انتِ حامل بس الكسار ميعرف وعدتچ اني

تخوصرت وباوعتلهم ثلاثتهم
:اذا واحد منكم نطق بحرف اترك البيت واروح عنكم

باهر:منكوووول عمي بس فضينة جوعان

كال هيچ وراح دخل ام سلمان راحت لبيتها واني وسيدرا صبينة الغدة وكعدنة ناكُل بأثناء مدناكل كال خالي

فهد:جهزي نفسچ العصر اخذچ لدكتورة نسائية

كلت واللگمة بحلگي
:ليش؟

فهد:علمود صحتج وصحة الجنين لازم دكتورة تستلم حالتچ لتنسين الصرع ممكن يأثر على الطفل لا سامح الله

هزيت راسي بالقبول وكملت اكلي
بعدها تساعدنة اني وسيدرا ورتبنة البيت واخر شي ذبيت نفسي على الچرباية ونمت نومة عميقة

فترة وسمعت صوت يكعدني كمت بتململ سبحت ورحنة للدكتورة ونفس كلام المستشفى حملي قوي وحيتعبني

طلعنة من يمها وخالو يوصيني على نفسي وعلى والطفل

وصلنة للبيت لگينة سيارات بالباب دخلنة وچان الكل موجود الكسار وزياد وزوجتة سارة وروان وغيث

دخلت سلمت على الكل وكعدنة اني وروان وسيدرا سوية نسولف بس سارة بقت ساكتة گلبي كسرني عليها

صارو يسولفون بالسغل اني اخذت البنات ورحت لغرفتي البنات منطلقات بالكلام بس سارة خجلانة وبس تفز متحملت لزمت ايدها وكلت

:سارة انتِ بخير؟

صفنت بوجهي وهزت راسها بأيجاب عصرت ايدها ورجعت سألتها

:لا تمثلين انتِ بخير؟

رجعت باوعتلي وهالمرة حطت ايديها على عيونها وبچت بحرگة خفنة عليها واضح متأذية تجمعنة عليها قلقانين

:شكو شبيچ؟

مجاوبتني مادري شلون نزلت اكمام ايديها وانصدمت من المنظر ايديها عبارة عن زراگ

بسرعة سحبت ايديها مذهولة
:هاااااي زياااااد هيچ مسوي بيچ؟

هزت راسها بأيجاب
سارة:كل يوم يضربني كال اندمچ وندمني من صدگ

:وانتِ شلون ساكتة كولي لأهلچ؟

سارة:اهلي تركوني وطلعو بيت وحدهم شنو متدرين؟ حتى ما اندلهم وين

باوعت لروان شفتها منزلة راسة
:روان احچي ويا اخوچ شوفي شمسوي بيها والله يعلم شكم ضربة بجسمها بعد

روان:لساني تعب واني احچي ميسمع مني بكول لحد يتدخل بيني وبينها وهي متجي وتكول ديضربني

سارة:ماكدر اطلع من الغرفة يربطني ويضربني ويسد حلگي حتى لا اطلع صوت جسمي متكسر تكسر وخافية الكدمات الي بوجهي بمكياج

:احچي للكسار هو يوكفة عند حدة

سارة:حتى يذبحني

سكتت اباوعلها بحيرة ماعرف شنو اسوي
اجة صوت زياد هي فزت خايفة وكامت تبلعم طلعت ربع ساعة ورجعت ملابسها مخربطة وعيونها مليانة دموع

سارة:روان يكول اخوچ يلا

كامت تهز براسها مقابلة على تصرفات اخوها كمنة وراهم واني اخزر بزياد باوعلي مستغرب

زياد:ها اليوم علگن سوادينچ؟

مجاوبتة الكسار سحبة ينافخ وطلعو اني نزعت حجابي وكعدت بالصالة وسيدرا اخذت داني تنومة

تمددت على القنفة امسح على بطني عود كبرانة
فزيت من سمعت صوت

الكسار:شنو جوعانة وتلعبين ببطنچ؟

بلعت ريگ وسحبت حجابي لبستة ضحك بطريقة غريبة وكال
الكسار:شايف كلشي وهسة تلبسين حجاب يمي؟

خزرتة ونزلت راسي رجع كال برهاوة
الكسار:لازم كل شبر بيچ من عمرچ 12 سنة وهسة راح تدخلين 20 شايف وعايف وشابع بيچ

بقيت اباوعلة وگلبي يدُگ سريع
:لتحچي هيچ وياية حرام انتَ طليقي هسة

عض شفتة وكام تقرب علية صرت ارجف سحب حجابي ومد ايدة لشعري ردت ادفعة واحچي بس ضربت بخشمي ريحة الشرب صرت اباوعلة فاتحة عيوني على وسعهم

:شاررررب؟؟؟

ضحك وعيونة تنسد وتنفتح دفعتة بكل قوتي وكمت لبست حجابي مصدومة بي بعد ماترك الشرب كل هالسنين هسة رجعلة

كعد على القنفة دايخ
الكسار:كلتلچ مرة ارجع للشرب بحالة وحدة من تكونين مموجودة بحياتي

دخل خالي عاگد حواجبة واني عطت
:يعنييييي انتَ مخاااايف من الله خايف من عبدتة شنوووو من بشر فهمني شلون تكدر تعصي ربك بسهولة

مجاوبني بس يباوعلي خالي اخذة وراح لغرفة باهر اني كلش ضجت دخلت لغرفتي وكعدت على الچرباية اعصابي تلفانة كمت للثلاجة طلعت كلشي بيها وصرت اكل ومعصبة من عندة

بعدها نمت ماعرف اذا راح او لا

مرت الأيام واني ما اشوفة بعد على الدوام اسبوع اداوم مرحلة ثانية

اليوم الجلسة الثانية لوهيب لحيت عليهم اروح وبصعوبة وافقو
رحت واني حاطة ايدي على گلبي دخلنة للقاعة باوعلي وهيب مبتسم هزيت راسي اطمنة

طول الوقت اباوعلة وابچي خايفة من القادم
كام المحامي قدم الاوراق للقاضي

المحامي:هاي الاوراق الي نسختهم الأساسية عندك وهالاوراق تثبت موكلي وهيب سياف ناجي عندة مشاكل عقلية واضطرابات وحشية اطلب من حضرتك العدل

صورو الاوراق وصار يحچي ويا المستشار واني احس راح اموت

الكل وكف من صار وقت النطق بالحكم واني اتنفض وابچي

القاضي:بحسب التقارير والشهود قررنا كالأتي

باوعت لوهيب دموعي تصب وهو يهز راسة يطمني

القاضي:حكمت المحكمة حضورياً على المتهم وهيب سياف ناجي بالـ...

..يتبعع..

توقعاتكم ؟

.
.
.
.
.
.
.
.
.
.

6000 كلمة

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله