رواية الكسار (سلاسل الغوث) الفصل الحادي عشر 11 - بقلم لـ ميامي

لو كسرة عظم
چان العذر مقبول
بس كاسرلي خاطر
بيش ترضيني ؟

قراءة ممتعة
.............................................................

دموع:نبضات گلبي تتسارع من الخوف
ترك راس الكسار وصارت عيونة علية نزع اللثام ونزل نفسة لمستواية مشة سلاحة على وجهي

:التقينة مرة ثانية يا حلو

حچيت بخوف
:م منو انتَ

ضحك بصوت مستفز گام وبرجلة دفر الكسار وخرة عني وسحبني من عبايتي وكفني كدامة صافن بوجهي ويبتسم مسح دموعي بأصبعة وحط اصبعة بحلگة حركاتة چانت مقرفة

لزم فكي بقوة وقرب وجهة لوجهي
:اني الثعلب شنو متذكريني؟

صفنت مصدومة وادركت كمية الخطر الي احنة بي بسرعة دفعت ايدة وركضت للكسار اهزة وابچي

:كوووم كسارر حباب لتتركني

رجع سحبني بقوة حسيت ايدي انخلعت
الثعلب:دتعالي حليانة ولچ وكبرانة چنتي زعطوطة

:وخر الكسار ميقبل تلزمني وخرررر

لعبت نفسي من نزل ايدة لخصري وجذبني لناحيتة
الثعلب:لازم مونسچ ومونستة حتى هيچ خايفة علية ترة احنة هم نعرف

فهمت قصدة شنو نزلت راسي ابچي
:حرام عليك والله دشوف عمرك شوف شيباتك اني بگد بنتك

الثعلب:عمري 33 وهذا الشيب وراثي ليغرچ بعدني بحيلي ترة

ردت احچي بس دفعني بقوة وكعني على الأرض وعاط
الثعلب:ربطو الكسار واخذو اريدة عاااااايششش والبنية اخذوها لغرفتي راح تكون ضيفة عدنة نكرمها وتكرمنة

كال اخر كلمتين وضحك والبقية ضحكو من كُل عقلي ختلت بسد الكسار وصرت استنجد بي وهو عبالك جثة هامدة

شفتهم جابو حبل وسحبو يربطون بي واني ادفعهم
:وخروووو لتربطوووو جبنااااء حتى وهو بهالحالة خايفيييين من عندةة

دفرني واحد منهم ببطني وكعني بمكاني اتلوى من الوجع وراحو يربطو بدون ميهتمون لشي واني الوب خايفة

ديربطو ودخل واحد يلهث
:لازم نطلع جماعتة اجووووو

كفر الثعلب وعاط
الثعلب:ولكممم يلاااا وكعععع بأيدي ماكدرررر اعوفةةةة

من التوتر صارو ميعرفون شنو يسوون كل ميربطو ينفتح اخر شي دفرهم الثعلب وكال بغضب

الثعلب:عوووفووووو اخذووو بس البنيةةةةة هيچ راح اكسرةةة

فتحت عيوني على وسعهم تركو الكسار وتقدمو علية بسرعة لزمت بملابس الكسار ارجف

:للااا لتاااخذووونييييي ماروح ويااااكمممم انيييي

سحبوني غصب واني مچلبة بملابس الكسار واتوسل بي يكوم شالني واحد منهم وطلع يتختل ويحاول يركض بية بس ميگدر لأن بالنهاية اني انسان وكلش ثگيلة

قبل ليطلع من الباب دخلو مجموعة زلم كلش چبيرة مسلحين وكف بية واحس جسمة يرجف شمرني بالأرض ورفع ايديه يعيط

:لكككك الثعلبببب ما انساهاااا الككككك طلعت نفسك وخليتنيييي

تقدمو علية لزمو يفتشون بي واني اباوع مصدومة شنو صار؟

حسيت بشخص لزمني من ايدي وكومني اباوعلة لابس قناع ميبين شي غير عيونة صار يباوعلي بنظرات عجزت افسرها عيونة تلمع انصدمت اكثر من باس راسي وهمس

:سبحان الله

دفعتة وحضنت نفسي خايفة
:انتووو منووو

حط ايدة على صدرة واردف
:احنة جماعة الكسار اطمئني اجينة ناخذكم الكسار وينة؟

مادري ليش ارتاح گلبي رجعت تقربتلة ابچي وايدي تأشر للبيت
:عمو الكسار ميتحرك

فتح عيونة وركضو كلهم لجوة واني وراهم دخلو للغرفة والي جان يحجي وياية حط الكسار بحضنة يفحص بي

:عايش الضربة بكتفة رفعو بسرعة وواحد منكم يجيب الطبيب

رفعو وايدة وكعت تهتز متت خوف لو شكد ميأذيني يبقى الشخص الي خلاني احس بالأمان ماكدر انكر فضلة علية

بدون وعي صرت امشي وراهم وعيوني علية گلبي مشلوع شلع عبالك يعصرني عصر من منظرة

طلعو من البيت دخلو بسيارة ركضت اريد اصعد ويا بس لزمني شخص دفعت ايدة وحچيت بتوسل

:اروح ويا ماكدر بدونة اضيع

زفر نفس بضيق وهز راسة نزلهم كلهم وصعدني ورة يم الكسار خليت راسة بحضني ابچي وابوس بي تحركت السيارة من تحركت هو تحرك ون بألم من ون احس روحي طلعت مني

:اسم الله ياريت بية مكسرات ولا بيك

رفعت راسي من نطق الي يسوق
:اسم الله عليكم

بقيت مستغربة بس چان همي بالكسار اكبر رجعت امسح بجبينة جسمة صار نار

فترة مرت عبالك سنة وكفت السيارة ونزلو يركضون چانو اثنين فتحو باب السيارة واخذو من حضني شالو اثنينهم واحد منهم كال

:دموع تعالي ورانة

بدون تردد نزلت ركضت وراهم دخلنة لبيت كُلش چبير بحيث حسيتة متاهة مو بيت اخذو لغرفة من الغرف حطو على الچرباية وصارو يخابرون معصبين واني واكفة بالباب ابچي نومو على بطنة وظهرة ينفر نفر دم

دقايق ودخلو باقي الزلم دخل واحد منهم للغرفة والبقية ضلو برة ردت ادخل مخلوني كعدت يم الباب ابچي اسمع ونينة واسمع عياطة واحس گلبي يتفتفت

فجأه راح الصوت طفرت خايفة دفرت الباب ودخلت
:شبيييي الكسااااار هااااا ليش سكتتتتت

تقدم علية واحد منهم لزم ايدي بقوة وكال
:مابي شي بخير اطمئني وراح يصير بخير اكثر

دفعت ايدة وعيوني متركزة على الكسار
:ليششش سكت عمووو هااااا ليييش

جاوبني يفرك بوجهة
:طلع الطلقات وارتاح اكيد يسكت هسة نايم هو هذا الدكتور كدامچ كال باچر يكعد كلشي مابي

چنت محتارة اصدگ لو لا چان الكسار ملفوف ظهرة والنفس مالتة ثگيل رحتلة لازمة گلبي وابچي كعدت بصفة روحي رايحة

:كسااار لتعوفني حباب ماكدر بدونك ماعندي احد غيرك بعد

التفتت من اجة صوت من وراية
:احنة طالعين اخذي راحتچ اي شي يصيرلة بس صيحي احنة برة ولتخافين البيت أمان

بدون ما اجاوب طلع وسد الباب
تمددت بصفة وصرت العب بشعرة واحچي

:متكدر تعوفني وحدي اني ما الية غيرك انتَ اهلي كسوري حتى لو أذيتني ابقى احبك

سكتت ودموعي الحارة تحرگ خدي
بدون ما احس نمت واني اشهگ وخايفة من القادم ماعرف شنو مصيري

كعدت على صوت ونين يمي طفرت خايفة شفت الكسار ينتفض ويون والعرگ ينزل من جبينة ورگبتة رفعت ايدي خليتها على جبينة وانصدمت مصخن بشكل

عدلت عبايتي وطلعت اركض من الغرفة شفت 3 زلم كاعدين بس من شافوني طفرو على حيلهم ركضت عليهم خايفه

:الكسار مصخن هواية وديرجف

تقدم واحد مسح على راسي وكال بهدوء
:رجعيلة هسة اجيب كمادات واجي

دفعت ايدة عن راسي خايفة
:لتلزمني مكسرات ميقبل

هز راسة يضحك علية خليت ورجعت للغرفة بس دخلت صرت اسمع كلام ممفهوم تقربت علية

الكسار:راحت هي و وحسن
ب بقيت وحدي

كعدت بصفة خليت ايدي على شعرة وگلبي رايح على حالتة هاي
:حتكون بخير كسار اني وياك

صار يبچي ويكول بصوت تعبان
الكسار:ر ربيتك ص صغيرون ححسن ليش ا انكرتني

قربت وجهي لوجهة وهمست بفضول
:منو حسن؟

ابتسم بنص دموعة وكال بغصة
الكسار:كسرة عمري

حتى وهو بهالحالة ميجاوب جواب يريح الگلب استغليت الفرصة ورجعت كلت بهدوء

:انتَ تحب وحدة مو؟

جاوب بهمس
الكسار:ميت على وحدة

ردت احجي وانفتح الباب عدلت كعدتي شفتهم دخلو ثلاثتهم
بدون اي كلمة انطوني الكمادات وبقو واكفين وتروني يهزون برجليهم وعيونهم علينة ايدي صارت ترجف من التوتر من حچة واحد فزيت

:ليش ايدچ ترجف جوعانة مو؟

هزيت راسي بلا
:لا بس انتو وترتوني اخاف انتو من جماعة الثعلب؟

واحد اشر للأثنين يطلعون وهو ضل كعد كدامي وحچة بهدوء

:احنة من الكسار لتخافين

ماعرف ليش كل كلمة يكولها ارتاحلها بسرعة هزيت راسي

وهو ابتسم وكام
:راح اجيبلج اكل اكلي وارجعي نامي وهذا البيت اعتبري بيتچ

:ماشي شكرا عمو

باوعلي وتنهد استغربت وضعة طلع واني رجعت اسوي كمادات للكسار لحد مانزلت حرارتة يلا ارتاحيت بستة بخدة وتمددت بصفة اباوع لوجهة التعبان

:صير بخير بسرعة كسوري مو تتركني

صرت العب بشعرة واباوعلة بقلق اندگ الباب رجعت كعدت زين دخل رجال بيدة صينية اكل خلاها كدامي بدون اي كلام بس باوع للكسار بخوف وطلع

چنت جوعانة والدكتور كال لازم تتغذين اكلت شوي وكمت طلعت الصينية ردت اوديها للمطبخ بس جفلني صوت

:وين رايحة؟

التفتت گلبي يدُگ بقوة
:ها لا ما شسمة اريد اخلي الصينية بالمطبخ

تقدم اخذها مني يباوعلي بحدة
:انطيني ارجعي يم الكسار لتركينة وحدة

هزيت راسي وركضت للغرفة مادري شبية خفت من عندة رحت تمددت بصف الكسار بس مكدرت انام ابد بقيت كاعدة لحد ماطلع الضوة چان اكو ساعة بالغرفة عيوني عليها

من صارت 9 ضبط اندگ الباب
:دموع الكسار كعد لولا؟

كمت فتحت الباب كال وهو يحاول ميباوعلي
:صباح الخير كعد الكسار؟

:صباح النور لا بعدة نايم

دخل للغرفة تقرب للكسار يمسح على راسة
:كوم كافي ماشبعت نوم؟

صار يهز بأيد الكسار لحد ما عقچ وجهة متألم وون بس سمعت ونتة ركضت فرحانة

:كسوري اني دموع

فتح عيونة باوعلي وابتسم
الكسار:دمعة عيوني انتِ بخير مو؟

:اني بخير بس خفت عليك

الكسار:ما اموت واتركچ من تكونين بمكان أمن عادي عندي اموت مرتاح

بچيت ولزمت ايدة بقوة
:لتكول هيچ كسار اني بدونك اضيع

راد يحچي وقاطعة صوت
:اطلع لو ابقى اتابع هالفلم الرومانسي

بس سمع صوتة لف راسة يضحك
الكسار:هاي شنو من شوكت هنا ريس

بس كال ريس طفرت اباوعلة بتمعن
:يعنييييي انتَ الريس موو؟ بلا خلي اشوف وجهك

كال بضحكة
الريس:ليش حتى تشتكين علية عند الشرطة وتنطيهم اوصافي؟

:لااا اذا اشتكيت ياخذون كسار وياكم بس اريد اشوفك

سكت عني يضحك باوع للكسار
الريس:الله يساعدك عليها
المهم ابقو هالفترة هنا خلي ننظف الطريق وغير بيتك صار معروف

الكسار:لا ريس راح نروح لبيتي

:الكسار ترة خطر عليكم اذا متفكر بنفسك فكر بدموع

غمض عيونة وكال بحدة
الكسار:راح اخذها لبيتي ريس مو لهذا البيت

الريس:متأكد؟ يمكن ينعرف كلشي؟

عصر ايدي وجاوبة
الكسار:محد يعرف شي بعدك متعرفني زين

چانو يحچون بغموض واني مثل الأطرش بالزفة طلع الريس وباوعت للكسار

:وين حتاخذني؟

جاوبني ببرود
الكسار:راح اخذچ لبيتي الثاني بس لازم تعرفين شي اريدچ تاخذين وضعية لا اسمع لا اتكلم لا ارى

:ليش؟

الكسار:افضل وماريد تسألين العصر نروح

هزيت راسي وهو صفن بوجهي تنهد تنهيدة شگت صدرة
الكسار:تأذيتي ها؟ تعالي يمي سولفيلي

كعدت بصفة وهو بسرعة سحبني صار كتفة فوك جسمي وراسة برگبتي نفسة حار

الكسار:شسوولچ؟

صرت اسولفلة وهو يستمعلي
:دفعني الثعلب واحد دفرني ببطني وتأذيت

عصر ملابسي بقوة وكال بفحيح
الكسار:وبعد؟

:لزمت بملابسك اريدك تكوم وانتَ متكوم ابد عبالي متت وبعدها هذا الي لزمتو شالني

رفع راسة يباوعلي وعيونة حمرة
الكسار:لزمچ يعني؟

:اي وها الثعلب كال اخذوها نكرمها وتكرمنة

الكسار:اصبري وشوفي اذا ما كرمتة كدامچ

حط ايدة السليمة على شعري يمسد عليه
الكسار:ما خفت على روحي خفت عليچ اني يطبني مرض انتِ شلون اذا اخذوچ ميرحموچ اذا سوو بيچ شي احط طلقة براسي واموت نفسي

:كسار اني خايفة انتو عصابات ودخلتوني وياكم اذا انتَ متت اني وين اروح؟

الكسار:ما اموت ولو كلمن ويومة

رفعت راسي اباوعلة رافعة حاجبي
:انتَ مؤمن ليش عرگچي؟

الكسار:والله موتيني اني مو مؤمن عمي اني واحد گو**د

:اي همزين اعترفت بنفسك من زمان حاسة

گرصني بأيدي عطت
:شبييكككك

الكسار:وجع بگلبي

مديتلة لساني رجع باس ايدي الي گرصها

الكسار:تعالي حضنيني ولچ گلبي راد يطلع حتى من تصاوبت وغبت عن الوعي بالي يمچ حتى حلمت بيچ

حضنتة وكلت
:شنو حلمت؟

غمض عيونة مثل الي يتذكر شي
الكسار:چنتي كاعدة يمي وبحضنچ طفل ابيض وعندة خدود كلتلچ منو هذا الي بحضنچ ابتسمتي وكلتي هذا ملاك الله خفت كلش خفت خفت رحتي مني وبعد ما اشوفچ خفت اخذچ الثعلب وسوة بيچ شي

:مسوة شي ميكدر خاف منكم هو حتى وانتَ فاقد راد يربطك خايف منك

ابتسم وراد يبوس شفتي درت وجهي متوترة
:لتبوس ماريد

الكسار:مو حرام

:مو حرام بس اني ماريد ترة لسة مناسية كلامك ولا حنسى بعدين انتَ شلون تريد تبوس وحدة مو طاهرة مثل حنينك؟

صفن بوجهي محتار
الكسار:كلامي ممقصود واعتذرت منچ

:اعتذارك ميفيدني بشي كلامك مثل السهم ودخل بگلبي كلتة بدون لتهتم بمشاعري كسرتني اني وگلبي من عيرتني

الكسار:اسف وداعت عيونچ اسف چنت شارب ومعصب ماعرف شلون كلت هيچ

:اكرهك تعرف؟

غمض عيونة ودار وجهة عني ضل ساكت يتحسر
طول الوقت ضل ساكت

دخلو الثلاثة عدلت كعدتي ونزلت راسي واحد منهم مادري شبي يخزرني يخوف كعدو بصفة يحچون ويا واني مثل الاطرش بالزفة يحچون بالالغاز

جابو الاكل عدلو كعدتة حتى ياكل واني عدلت كعدتي اريد اوكلة بس اخذت الخاشوگة انجرت من ايدي باوعت مصدومة طلع نفسة الي يخوف

:ليش اريد اوكلة؟

جاوبني بحدة
:اني اوكلة معليچ

عصبت رجعت اخذت الخاشوگة من ايدة
:انتَ شكو؟ وخرر اني اوكلة

سحبها الكسار من ايدي والبقية يضحكون
الكسار:عمي اني اكل بس استهدو بالله

:لا اني اوكلك وهذا الي يخوف خلي يطلع برة من البارحة بس يخوزر بية هم عصابچي وعرگچي وجاي يريد يخوفني اني عاشرت العرگچية ما اخاف منهم ترة

ضحكو بصوت عالي والكسار عضلي شفتة متحلف بية وهذا يهز بأيدة
الكسار:بنت الكلب بعد بعد فضحي

:خلي يروح عني متشوفة چنة نخلة فگر

جاوبني وهو يهز بأيدة
:هاي شبيها والله بيها مخزن مال طلع افرغة براسها عليمن شايفة نفسچ چنچ دبة غاز مدهربة

بس كال هيچ نزلت راسي وسكتت نقطة ضعفي وزني مادري شبيهم وياية عبالك مشايفين وحدة سمينة

انطيت الخاشوگة للكسار زعلانه مد ايدة لخدي وهمس
الكسار:لتزعلين تخبلين انتِ

برطمت شفايفي وكلت
:بس نرجع لبيتنة اسوي رجيم وتاخذني كل يوم اركض ماريد ابقى سمينة

الكسار:خلي ثقتچ بنفسچ چبيرة انتِ كلش حلوة وتخبلين

تقرب همس بأذني
الكسار:وجسمچ هم يخبل ولايگلچ وخدودچ اموت عليها

وخرت عنة وحچيت بصوت مسموع
:لتضحك علية بهالكلام ماريد اسمن بعد بس نرجع للبيت تضعفني واذا مضعفت ازعل وبكيفك بعد

تركتهم بالغرفة وطلعت مزعوجة اسمعهم يحچون
الكسار:ليش فكيت حلگك هي تضوج اذا احد جاب سيرة وزنها

يجاوبة بفشلة
:شمدريني زلة لسان

تركتهم وطلعت للحديقة چانت كلش حلوة زرع وشجرة اكو ومرجوحة تركت كلشي ورحت كعدت جوة الشجرة اباوع لأيدية چانو ايدية مطبگات من كثر السمن بدون ما احس صرت احچي وياهم من كل عقلي

:چنت ضعيفة ليش سمنت؟ صرت چني بقرة وكلها دتتنمر علية حتى ايدية يلعبون الروح

فزيت من اجة صوت
:تخبل ايديچ مال عض

عگدت حواجبي وكمت متحلفة
:حروح اكول للكسار هذا يريد يعض ايدية

ردت اعبر لزمني من ايدي
:كعدي راحة اني مو نفس الكسار ترة اني اكسرة لراسچ

دفعت ايدة وكلت بتحدي
:حتى الكسار يكسر راسك منو انتَ؟ وشلون تهددني اذا عرف الكسار محيحصل خير صدگني

ابتسم وعدل اللثام
:مروضچ الكسار هواي صايرة مثلة

خزرتة ورجعت للكسار معصبة دخلت چانو يسولفون كلت بعصبية
:كوووممم اريد اروح ما ابقى هنا

باوعلي مستغرب وأشرلي اجي
الكسار:شبيچ؟

رحتلة معصبة وحالتي حالة
:هذة چنة ضفدع عيونة زرگ ديزعجني من البارحة وهسة يكول ايديچ مال عض

فتح عيونة وراد يكوم
الكسار:تعااااال ابن الكلبب تعض منووو مطيييييي

دخل يضحك ويأشر على الزلم
:ترة ابوية يمك

ما اهتم چان اكو بصفة طفاية مال جگاير نايلون وستيل شمرها علية وكعت بصدرة وهو يضحك

الكسار:مطي اموتك ترة زمال

هز ايدة وكال ببرود
:متوازي اعض ايدها چنها جلي

باوعت للكسار وكلت
:شوفة شنو يكول؟

الكسار:ابن كلب ما عليه عتب

كام ابو وجر الكسار من شعرة
:لعد مو اني هنا ليش مطي انتَ

كال الكسار يهز بأيدة
الكسار:مرتك منغلة بي هذا مو ابنك حتى ميشبهك

ضحكو كلهم وشوي ونسو الموضوع اني كاعدة يمهم بس استمع

صار العصر صار وقت روحتنة لبيت الكسار ماعرف ليش چنت متوترة اجو هالثلاثة ويانة بنفس السيارة واحد يسوق وواحد كعد كدام وواحد كعد يمنة ورة وطول الطريق مسكتو ابد دخت فوگ دوختي من البارحة منايمة

مرت نص ساعة وتقرب الكسار يهمس بأذني
الكسار:ماريد ولا كلمة بهذا البيت كون تاخذين وضع الخرسة والصما والعمية ماريد حرف منچ من نكون بغرفتنة احجي وضحكي

ابتسم ابتسامة جانبية وكال بخدر
الكسار:وارگصي

:يعني حتسجني!

الكسار:وضع مؤقت من اطيب نغير بيتنة

سكتت وهو لزم ايدي يفرك بيها
فترة بسيطة ووكفت السيارة كدام بيت چبير طابقين نزلو الكسار واني نزلت وياهم چانو لازمينة من اليمين واليسار واني وراهم التفت علية وكال

الكسار:تعالي حبيبتي يمي

وخر واحد منهم ورحت وكفت جوة جناحة باس راسي وكال
الكسار:تحملي لخاطري

سكتت مفهمت شنو قصدة انفتح باب البيت صار مقابيلنة ولد يطلع عمرة 14 سنة انصدم من شافنة راح لجوة البيت يعيط

:اجة الغوووثثث

استغربت هو زفر نفس معصب ومبين گوة متحمل دخلنة جوة البيت وانصدمت اكثر من شفت مجموعة ناس واكفين مصدومين

الكسار:السلام عليكم

ردو بكل برود وهو گال
الكسار:فرغتو الطابق الثاني لولا؟

كالت وحدة
:اي وفرشنة غرفتك بس مكلتلنة اكو وياك ضيفة چان جهزنالها غير غرفة

اردف وهو يباوع بوجوهم
الكسار:ميحتاج تنام يمي

ضج المكان بأصواتهم مستنكرين الي سمعو كام وجال وكف كدامة معصب

:شتحچي انتَ باقييي بس تجيب نسوان للبيت

رد بهدوء
الكسار:اكعد اكعد هالسوالف طلعهم على مرتك مو علية اني ما اخاف

كز على اسنانة يباوعلة بغضب تقدمت وحدة يطلع عمرها بنص الاربعين

:منو هاي وشلون تنيمها يمك؟

رفع راسة وجاوب بصوت مرتفع
الكسار:هاي مرتي

شهگو بصوت واحد متت خوف ختلت ورة الكسار بس طلعت من سمعت صوت مرة مصدومة

:شنووووو مرتكككككك؟...

..يتبعع..

توقعاتكم؟

.
.
.
.
.
.
.
.
.
.

4000 كلمة وباچر اكو بارت

البارت تأخر بسبب الواتباد چان معلگ وبألف يا علي يلا رجع ف اعذروني ولحد ياخذ غيبة الناس اكو بنات غلطو بحقي بس هم حسامحهم

ضيفو حساب الانستا ضروري حتى تعرفون الاخبار اول بأول

والتلي هم حتى كلشي تعرفون مو تكولون ماكلت

اللهم صلِ على محمد والِ محمد 🦋

مها ال عبدالله