رواية الكسار (سلاسل الغوث) الفصل الحادي وثلاثون 31 - بقلم لـ ميامي

انه بدونك أروح لوين؟
غريب متيه الخطوة
انه بدونك اخذني الماي
مثل أوراق ماتسوه .

قراءة ممتعة 🤍
............................................................

دموع:بقيت هادئة وعيني على باب البيت تقرب لأذني وهمس

:راح اشيل ايدي لتعيطين تخربين الأول والتالي

احسة يتحرك وقبل ليشيل ايدة رجع همس
:اني من طرف وهيب دزني عليچ لتعيطين

غمضت عيوني براحة شال ايدة والتفتت علية لكيتة ملثم
:امشي وياية قبل لحد يطلع

كلت بتوسل
:شنو صوت الطلق حباب بس اروح اشوفة

رد علية بأستعجال
:لااا ميقبل تشوفي بهالحالة امشي

مكدرت اروح بدون ما اطمئن علية غافلتة وركضت للبيت ابچي واحسة يركض وراية
دخلت للبيت وانصدمت من المنظر

وهيب ديعفس بالبيت وايدة تنزف دم وممهتم بيها اصلاً عطت بخوف

:وهييييب ايدككك

باوعلي فاتح عيونة على وسعهم ركضت دخلت بحضنة ابچي وعيوني على ايدة اريد اشوف منين ينزل الدم بسرعة ثبتني خايف

وهيب:ليييشش رجعتيييييي روحيييي دموووع روحييي راح يجووون

ممهتمة لكلامة لزمت ايدة افحص بيها
:م منووو سوة بيك هيچ دتتأذة موو دتتأذة

وهيب:مداتأذة اني رميت نفسي متقصد حتى من يجوني اكول دخلو علية مجموعة صاوبوني واخذو البنية روحي دموووع هسة الناااااس طلعتتتتتت من ورة صوت الطلقةةةة

بقيت اباوعلة وابچي حضني بكل قوتة يتنهد واسمعة يحچي ويا الشخص الي لزمني

وهيب:ليش ما اخذتها عفريت

جاوبة بستهزاء
عفريت:هي هاي تنطي مجال اريد الزمها ماكو واكف احچي وياها وما اشوفها الا ركضت چنها بيب بيب واني الذيب

ابتعدت عن وهيب وخزرتة
:ليش تلزمني هااا انوب اكسر ايدك

وهيب لزم وجهي وخلاني اباوعلة
وهيب:اشش كافي دموع يلا روحي ومن تصير أمان دزيلي رسالة انتظرچ

هزيت راسي ورجعت حضنتة بكل قوتي
:حشتاقلك وهيب عالج نفسك وطمني عليك

باس راسي بقوة
وهيب:اني وياچ حتى لو مموجود شخصياً يمچ اني يمچ روحياً وقلبياً روحي وتوكلي على الله

حاوطت وجهة بايدي وهمست بصوت يرجف
:حترجعلي؟

ابتسم ودمعتة نزلت
وهيب:اذا الله راد يجمعنة مرة ثانية ننجمع

باسني بخدي بوسة عميقة وابتعد عني
وهيب:يلا عفريت انزع اللثام وروحو

عفريت:ليش انزعة؟ خاف تشتكي علينة اروح بيها

ابتسم وهيب يمسح على راسي
وهيب:هاي اختي مستحيل تسوي شي يضر اخوها اطمئن

عفريت:ماكدر تعذرني

خزرة وكال بحدة
وهيب:الناس هسة طلعت من بيوتها تريد تعرف منين اجة صوت الطلق اذا شافوك طالع ملثم راح يشتكون علينة ونروح كلنة بيها وتعرف هاي المنطقة منو بيها بيها ضباط وبيها محامين وبيها قضاة تخيل كل هذول وبينهم اني المجرم انچب وروح

كفر منزعج وهيب نزع حذائة وشمرة وكع براسة
وهيب:لتكفر لا اشعلك شعل لتكفر مطي

كال بنتر وهو ينزع اللثام
عفريب:امشي امشي

مشيت ورا وعيوني على وهيب والوحلة بأيدي قبل لنطلع من البيت حسيت بعباية انحطت على راسي التفتت شفة العفريب خازرني

عفريت:لبسيها لحد يشوفچ بهالحالة ونتورط تصرفي طبيعي

عقچت وجهي واني اباوعلة وكلت بدون ما احس
:اييييع هذا وجهك

خزرني بسرعة نزلت راسي طلعنة من البيت نتصرف طبيعي شفنة ناس طالعين واحد يخابر واحد يسولف ويا الثاني عن موضوع الطلقة همزين محد شك بينة صعدت بالسيارة ورة وهو حرك

صار يسوق وحاط اغنية ويغني وياها بصوت يلعب النفس واني ارجف بمكاني باردة وخايفة بشكل خايفة على وهيب ينكشف وخايفة منوصل ويغدر بية

بعد فترة وكف بمكان بي شط وطلعلة 6 لفات فلافل مدلي وحدة

عفريت:اكلي ورانة انتظار طويل

رفعت حاجبي
:ليش انتظار طويل اخذني هسة؟

باوعلي من فوك لجوة مستهزء
عفريت:مو بايع روحي اخذچ هسة خلي تغيب الشمس يلا اوصلچ

:بسسسس احنننننةةة چااااان اتفاقنة توصلني وتولي

خزرني واني خزرتة
عفريت:شوفي مدري شسمچ ترة خلگي هالگدوتة داكول ميصير اوصلچ بالنهار وحتى وهيب كال هيچ اصبري بس تضلم الدنيا

استغفرت ورضيت بالأمر الواقع واللفة بعدها بأيدة
عفريت:اخذي انكسرت ايدي؟

باوعتلة بأشمئزاز
:ماريد

حطها بحلگة وكال ببرود
عفريت:طبچ مرض

ما عبالك اكلها بلعها بلع دقيقة ماطول بيها واكل غيرها 3 بقيت صافنة واني لفة وحدة ما اكملها

كمل اكل وكال بهدوء وهو يلعب بلياردو بتلفونة
عفريت:السيارة مضللة ويمچ شرشف اذا تردين تنامين

سديت خشمي لعبانة نفسي
:معندك عطر ترشة؟ السيارة صارت ريحتها عمبة وفلافل

بدون اي كلمة طلع عطر ورش رشتين بالسيارة وباسة ورجعة لمكانة
عفريت:حبيبي ليخلص مشتري بورقتين

بقيت صافنة ابد مو صاحي سكت وكمل لعب واني حطيت راسي على الجامة وغمضت عيوني افكر

هسة وهيب شسوة؟ بس لا مصدگو بي وصرت سبب لأذيتة
زين الكسار وينة؟ معقولة مدور علية ابد لو عجبة غيابي وخلص مني
زين وخوالي وينهم معقولة بعد ميريدوني

غفيت بوسط تفكيري وضياعي
فزيت من حسيت بشخص ينقر على راسي كمزت خايفة

عفريت:هذا اني شبيچ تبچين ؟

حطيت اصابعي على خدي مستغربة اصابعي تبللت زفرت نفس بضيق وعدلت كعدتي ما اباوعلة

:مو مهم بس وخر ابتعد يعني

كعد بالكرسي مالتة يباوعلي بالمراية
عفريت:بچيتي بچي مو طبيعي عبالي كاعدة بس صدمتيني من شفتچ نايمة

عدلت حجابي وتلفلفت بالعباية
:ماكو شي

سكت واني باوعت للشباك دايخة وجوعانة
:بيش الساعة؟

عفريت:بعدها ظهر هسة الساعة 2

صرت انافخ احسة مو أمان ابد رفع تلفونة يخابر واسمع صوت بنية وكلامة مقرف لعبت نفسي من عندة بقيت كاعدة على اعصابي

حاولت ارجع انام بس مكدرت صوتة مزعج
صرت اباوع للشط شفت مجموعة شباب يمشون لناحية الشط من وصلو نزعو ملابسهم ونزلو يسبحون بهالبرد من يمي جسمي ضل يكش كش

عفريت:خرب بعقلكم اكو واحد يسبح بهالبرد بالشط

بقيت اباوعلهم مستمتعين
ساعة كاملة وطلعو يتراجفون وراحو

مر الوقت واني كاعدة على اعصابي فوك توتري وخوفي عفريت زادها علية صار يغني لو يحچي بالتلفون لو يكرز

اخيراً بدت الشمس تغيب گلبي تسارعت دگاتة من راحت الشمس كلها شغل السيارة وكال

عفريت:اخيراً راح اخلص منچ

مرديت علية اريد بس اوصل حرك السيارة يدندن ردت اخنگة
بقيت اهز برجلي وافرك بأيدية متوووووترة

نص ساعة چانت اشبه بسنة كاملة وصلني لفرع چان بي بيت خالي فهد ردت انزل وگلبي يدُگ سريع بس استوقفني صوتة

عفريت:روحي بوجهچ لهالبيت راح اراقبچ لحد متدخلين لتجيبين سيرتنة

هزيت راسي وفتحت الباب احاول امشي بهدوء حتى الناس لتستغرب وتشك بية

وصلت لباب البيت دگيتة بكُل قوتي وباوعت لسيارة العفريت حركها بسرعة وراح بقيت واكفة انتظرهم يفتحولي دگيت بعد مرة وكعدت بالباب رجلية محملني مكدرت اوكف عليهم بعد

انفتح الباب وصار بوجهي باهر لازم جگارتة ومسدسة بأيدة بش شافني فتح عيونة على وسعهم وعاط

باهر:دموووووع!!

بلعت ريگ مكدرت انطق لزمني من ورة العباية كومني ودخلني لجوة وصار يحچي وياية بقلق
باهر:انتِ بخير دموع طمنيني عليچ

محچيت شي بس اهز براسي دخلني للصالة مچان اكو احد كعدني وهو يباوعلي مذهول من منظري هذا كعد كدامي

باهر:ه هاي شصاير بيچ

مجاوبتة هو خاف اكثر من سكوتي
باهر:فتحي حلگچ؟ گاصين لسانچ ليش مدتحچين؟

هزيت راسي بلا وحچيت بصعوبة
:ل لا مبية شي ب بس دايخة

كام طلع من الصالة دقايق معدودة ورجع بأيدة مي شربني وكعد يمي يحاول يستفسر مني

باهر:طمنيني عليچ دموع وين چنتي فرينة العراق عليچ فر كل 4 اشخاص بمحافظة يدورون عليچ وين اخذوچ

غمضت عيوني وهمست بتعب
:م مادري مكان مضلم وبي كلاب بس هذا الي شفتة

شافني تعبانة سكت عني يدخن ويهز برجلة وعيونة مشالهم مني
ربع ساعة ورفرف گلبي من سمعت صوت سيارات صرت ارجف وعيني على الباب متلهفة على شوفتهم كلهم

نزلت دموعي من دخل خالي يركض وكف يباوعلي بدون أي كلمة ركض حضني بكل قوتة حضنتة ابچي وعيني على الباب
دخلو ورة خالي جناح وزياد خالي اجة حضني يبچون ويبوسون براسي ابتعدو عني خايفين

فهد:راحت روحي وراچ ولچ دموع متت خوف وقلق عليچ وين چنت شصار بيچ

بقيت اباوع للباب ونطقت بخفوت ودمعتي نزلت
:ا الكسار ميريدني؟

كعدو بالأرض كدامي خالي جناح لازم ايدي ويبچي وخالي فهد يبوس بباطن ايدي وهم يبچي 

تقرب علية زياد مبتسم وكال
زياد:الحمدلله على سلامتچ

كلت واني اباوعلة بتوسل
:الكسار ميريدني بعد؟

مجاوبني نزلت عيوني لخالي
:ما اجة وياكم يعني ميريدني مو

راد يحچي واستوقفة صوت مهزوز
:دمعتي!

راحت عيوني للباب وبچيت اكثر من شفتة واكف بالباب لازم گلبة تقرب علية يعرج خوالي كامو عني وهو اخذني بحضنة حضني بقوة راد يدخلني بين ضلوعة ابتعد عني وصار يبوس بوجهي وبراسي ايدية وجسمة يرجف رجيف مو طبيعي

الكسار:ميت بغيبتچ دمعة عيوني ميت

رجع يحضن بية واني محچيت شي بس ابچي الكل انقهر علينة
ضاق نفسي وبدون سابق انذار تقيئت بالأرض وهو صار يمسح على ظهري

حسيت نفسي دخت وهو صاح بعلو صوتة
الكسار:بااااهر مي مي

راح باهر وهو حضني وبصعوبة لازم دموعة ميريد يبچي كدامهم اجة باهر حط المي بأيد الكسار والكسار غسل وجهي ورگبتي وخلاني اتمدد على القنفة ويحچي وياية بهدوء

الكسار:اخذچ للمستشفى؟

هزيت راسي بلا بدون ما اباوعلة بقيت متمددة وهمَ محاوطيني الكسار كاعد جوة ولازم ايدي وخالي فهد يمسد على راسي وخالي جناح يقرة قرأن بصوت هادئ وزياد وباهر واكفين والقلق واضح بعيونهم

ربع ساعة وارتاحيت كعدت من صار وقت المواجهة چنت متوترة وادعي ربي ما اغلط بشي

تقرب خالي كعد يمي وكال
فهد:اذا ارتاحيتي احچيلنة ميتين خوف عليچ

صارو يسألوني واني بصعوبة اجاوبهم خايفة يعرفون شي

فهد:الغضنفر اخذچ مو؟

:اي

فهد:وين اخذچ؟

غمضت عيوني ابلعم
:م ماعرف مكان ضلمة وبي كلاب ومن يجي يفتح الضوة چانت غرفة فارغة بس بيها صحيات والكلاب مربوطة يمي

عصر ايدي وعروگة نطت
الكسار:ربط يمچ كلاب وانتِ تخافين منهم شلون تحملتي

باوعت بعيونة تذكرت رسالتة الي دزها سحبت ايدي منة وكلت بحدة ودموعي تنزل

:كُلشي صار بسببك انتَ

بهت وجهة وحاوط وجهي بايديه
الكسار:اعرف كلشي صار بسببي اني كل أذيتج مني

دفعت ايدة عني وسكتت

فهد:زين بابا ما اخذوچ لغير مكان باعوچ؟

بلعت ريگ وبصعوبة خفيت توتري
:لا بس بهاي الغرفة بقيت

الكسار:شنو چان يسويلچ چان يضربچ

بدون ما اجاوبة رفعت ملابسي من عن رجلية وشوفتة اثار الضرب باهر وزياد دارو وجهم عني والكسار عيونة صارو حمر وصار يتلمسهم

كال بصوت يرجف
الكسار:بشنو چان يضربچ؟

صرت احچيلهم وامثل الي صار كلة
:چان يدخل علية بيدة جگارة وگهوة وبصفة بنات يحرگني بگطوف الجگارة ويذب الگهوة الحارة على صدري وچانت تأذيني وملابسي تلزگ على جسمي ومن تنشف بصعوبة ارفعهم
ومن يريدون يضربوني يخلي بنات اثنين يثبتوني زين والثالثة بيدها سوط وتضرب على رجلية بس وتدوس عليهم لحد ما انتهي من الألم يتركوني يطفون الضوة عني ويطلعون ومن يطلعون الغرفة تصير باردة علية وجسمي يصل صل وجع وبرد وجوع

طول كلامي يضرب على گلبة وعيونة تلالي بالدموع
الكسار:چان يجوعچ هم؟

:اي چان ينطيني وجبة وحدة وبس فاصولية بايتة وتمن بايت ومي حاااااار هواية حار الكلاب صارو من يشوفون الأكل ينبحون علية ف اني انطيهم نصة واخلي شوي الية بس اسند طولي بي

حط وجهة بباطن ايدية وصارت دموعة تنزل على ايدية بقيت صافنة اجة خالي فهد كومة كعدة يمي

فهد:اكعد وارتاح بعدك تعبان مو زين عليك

استغربت ردت اكول شبي بس بسرعة لزم ايدي وكال بخوف
الكسار:دموع والله اندمة الچ بس كولي سوالچ شي؟

بهت وجهي وصرت اباوع بعيونة من فهمت قصدة سحب راسي باسة وكال بتفهم

الكسار:بابا انتِ مينخاف منچ بس هذول الأنذال ينخاف منهم غدارين انتِ العفة والشرف كلة بس هذول ماكو انگس منهم

حطيت ايدي على خدة وكلت ببرود
:اذا مغتصبيني عادي عندك؟

فتحو عيونهم مصدومين وهو صار ينتفض مو يرجف
الكسار:ي يعني صاير شي ل لولا؟

:جاوبني واجاوبك

عصر ايدي بقوة
الكسار:بالنهاية هذا مو ذنبچ انتِ ضحية خطف ميهمني

دفعت ايدة وخليت عيوني بعيونة
:اني محد طخني غيرك  واذا چان صاير هالشي موتي اهون ما ارجع هنا انتحر

سحبني لصدرة وحضني بقوة يستغفر
ردت ادفعة بس مكدرت جزء بداخلي رايد قربة وجزء ثاني لا

ابتعد وصارو يسولفون وياية واني اجاوبهم بالحرف الواحد
جناح:زين شلون شردتي؟

صرت ابلعم خايفة وكلت بدون لا اباوعلهم
:رادو ينقلوني لغير مكان بس اني غافلتهم اخذت مسدس من البنية الي لازمتني رميت طلقتين ماعرف بمنو وكعت وطلعت للشارع اركض لحد ما ابتعدت ولكيت واحد ابن حلال وافق يوصلني وانطاني عباية هم

الكسار:زين مشفتي الشارع شلونة الولد وينة؟

:مشفت الطريق چانت ضلمة والولد ذبني على الشارع وراح چان خايف

سكتو ماعرف اذا اقتنعو او لا
اخر شي الكسار طلع رسالة خلاها بوجهي

الكسار:تعرفين هذا خط منو لو منو كتبها؟

باوعت للورقة چان مكتوب بخط چبير ثأري وثأرك وجوة بخط صغير مكتوب تصرف بالجثة بردت گلوب هواية

عرفتة خط وهيب بس سويت نفسي معرفتة
:لا شنو هاي

تنهد يباوعلهم رجعها لجيبة وكال
الكسار:ماكو شي يلا نروح لبيتنة؟

عگدت حواجبي وتكتفت بعناد
:لا ما اروح ابقى هنا اخاف يرجعون يخطفوني

غمض عيونة مثل الي اتأذة بكلامي ورجع فتحهم
الكسار:راح اخلي حراس بالباب وجهاز انذار بالبيت هم

هزيت راسي بلا
:ماروح وياك انتَ متصدگني لو مصدگني وجاي مچان صار كل هذا

تنهد وباوعلهم
الكسار:عادي تخلونة وحدنة

هزو راسهم وطلعو درت وجهي عنة مهظومة
طلع تلفونة يحاول يبررلي

الكسار:چنت قريب على بيتنة والله كاعد بسيارتي اخابر خالچ علمود الشغل ستوني سديتة من خالچ وانتِ دزيتي رسالة چان عبالي بس ترديني اجي بس من فتحت الكاميرات عرفت كلامچ صح شخطت سيارتي خايف عليچ وخابرت الكل يجون من وصلت للبيت لگيتهم بالحديقة وانتِ شايلچ واحد منهم جان سلاحي بأيدي رميت واحد منهم بصدرة بس بسرعة ردولي الطلقة بكتفي والثانية بزندي وكعت عبروچ كدامي وطلعوچ للشارع كمت روحي مفرفحة عليچ شفتهم صعدوچ بسيارتهم رجعت رميت عليهم بس الأنذال رموني برجلي فقدت بالشارع ولساني يلهج بأسمچ بس

طول كلامة ابچي بصمت طلع تلفونة وحطة بأيدي صرت اتابع تسجيل الكاميرات وطلع كل كلامة صح

دموع: بس همه يردوك ليش متركوني واخذوك

الكسار:لأن يردون يكسروني بيج يعرفون انتِ نقطة ضعفي

رجعت اباوع اخر شي شفتة الناس ملتمة علية بالشارع وهو واكع من طولة واجت هواية سيارات ضباط يخوفون وباهر وزياد خايفين حاطين ايديهم على روسهم

سد التلفون ونزع تيشيرتة شفت كتفة وايدة ملفوفات
الكسار:كل يومي والجروح مفتوحة ميطيبون خلصتها ركض عليچ مكدرت انام وانتِ مادري وينچ صارو صارو يحقنوني منوم حتى انام لأن حالتي تعبت لا نوم لا اكل بس جگارة وچاي

تلمست كتفة غمض عيونة يبلعم
الكسار:ايدچ مرهم لجروحي

همست بتعب من بين دموعي
:عبالي متريدني وعبالي فرحت لأن اخذوني

الكسار:اني روحي بيچ دمعتي شلون ماريدچ

سكتت شفايفي ترجف نزلت دمعتة يباوع لشفايفي غمضت عيوني من تقرب بهدوء وسحب شفايفي بين شفايفة اختلطت انفاسنة ودموعنة سوية

ابتعد ولزم ايدي يباوعلي بتوسل
الكسار:بيتچ ينتظرچ نروح؟

هزيت راسي بأيجاب ابتسم وكام يمشيني على كيف طلعنة من الصالة شفناهم كاعدين كلهم ن طلعنة كامو

فهد:ها خالو شلونچ هسة

:زينة اني

تقرب باسني براسي
فهد:اذا تردين تبقين هنا البيت مفتوح الچ

الكسار شدد قبضتة على ايدي باوعتلة ورجعت باوعت لخالي
:لا حروح لبيت الكسار

مكال شي ودعونة واحنة طلعنة صعدنة بالسيارة وحركها چان عندي فضول اعرف اذا خالي يعرف لولا نقرت على ايدة وكلت

:خالي يعرف بموضوع الحبوب؟

تنهد وكال وهو يورث جگارة
الكسار:لا ميعرف مچنت ناوي اكول اصلاً ردت بس اشوفچ حجم الألم الي حسيتة مستحيل اتركچ تروحين لخالچ

:بس انتَ كلت اچي ما الگاچ

الكسار:بس كلام ردت بس ابرد گلبي

باوعلي مبتسم بحزن ورجع باوع للطريق
الكسار:اصلاً اني اعرف بالحبوب قبل لتكول الدكتورة

صفنت ممستوعبة رجع كال بهدوء
الكسار:شفتة بالميز قبل يوم واخذتة للصيدلية وعرفت هذا حبوب منع حمل مردت اظلمچ ردت انطيچ فرصة تكولين بس مكلتي فضلتي السكوت واني چان الوضع عندي مو تمام چنت متهجم طلعت قهري بيچ

سكت يتنهد ثواني ورجع كال
الكسار:مچنت زعلان على الأطفال دموع چنت خايف عليچ خايف من العقم اذا صرتي عقيم تبقين طول عمرچ تتحسرين على الطفل وغير العقم چنتي راح تتأذين دموع چان ممكن يتضرر رحمچ ولا سامح الله تخضعين لعملية استئصال رحم لأن انتِ بعدچ شابة ورحمچ بعدة مصار بي حمل يعني نظيف اذا اخذتي هالحبوب تتأذين

منزلة راسي حاسة بحجم الغلط الي ارتكبتة
:اعترف هالشي غلط بس مردت اطفال بعدني صغيرة وانتَ كُلشي جبر عندك بس هم تندمت ومرتين صار شي بيناتنة وما اخذت

مجاوبني وكمل مشي

وصلنة للبيت دخل السيارة بالكراج شگد چنت مشتاقة لهالبيت دخلنة وهو حاضن كتفي

الكسار:نور بيتچ برجعتچ

صعدنة فوك اخذت ملابس ورحت للحمام قفلت الباب طلعت الرقم من صدري وحطيتة جوة علبة الشامبو خايفة يشوفة

سبحت زين وطلعت دخلت للغرفة ملگيتة رجعت للحمام اخذت الرقم خليتة بالكنتور جوة ملابسي

لبست تراكسود برمودة وكعدت امشط بشعري دخل بهالأثناء شايل صينية اكل حطها بالأرض وتقدم علية وكف وراية وعينة على شعري لزمة يتنهد

الكسار:انتهيت من وصلني شعرچ ودمچ رغم چنت متصاوب بس طلعت من المستشفى للبيت ولگيت باقة ورد بالباب وبيها شعرچ ودمچ

نزلت دمعتي وكلت بحزن
:چانت فرح تحب شعري هواية واني چنت احبة هسة صرت محلوة

باس راسي من ورة وهمس
الكسار:شعر قصير او طويل بالحالتين تخبلين

:بس شوف شلون صاير وحدة طويلة والثانية قصيرة

ابتسم وراح جاب مقص استغربت ثبت راسي وصار يعدل بشعري لحد مصار مرتب فرحت صح چان قصير بس صار مرتب وحلو

الكسار:وهسة ترتب يلا تعالي اكلي ونامي انتِ تعبانة

سحبني من ايدي وكعدني صرت اكل بشراهة جوعانة من الصبح ما اكلت شي وبالي عند وهيب خايفة صار بي شي

كملت اكل وراح نزل الصينية واني صرت ادور على تلفوني من دخل للغرفة كلتلة

:وين تلفوني؟

طلعة من جيبة حطة بأيدي
الكسار:عندي چنت اشحنة بس حتى اشوف صورچ

اخذتة من ايدة ماعرف شنو اكول رحت تمددت على الچرباية وهو اجة يمي سحبني لحضنة وضل ساكت مچنت اكدر انام اريد اطمئن على وهيب

نص ساعة واحنة الأثنين كاعدين بدون لا حركة ولا كلمة فزيت من دگ تلفونة باسني براسي وهمس

الكسار:اسم الله

اخذ تلفونة بس شاف الأسم كام
الكسار:هلا ريس زينة مابيها شي

كال هيچ وطلع من الغرفة بسرعة طفرت جبت الرقم وسجلتة بتلفوني والورقة شگگتها لقطع صغيرة وخليتها جوة المخدة

دزيت رسالة وعيني على الباب
:اني دموع انتَ بخير؟

بقيت بالمحادثة ارجف وعين على التلفون وعين على الباب رفرف گلبي من اجاني الرد

وهيب:اني بخير اخيراً دزيتي هسة اكدر ارتاح

:متأذي؟

وهيب:مبية شي حذفي المحادثة ليشوفها زوجچ واني لا راح اتصل ولا ادز من يطلع من البيت دزيلي رسالة حتى اعرفة مموجود واتصل عليچ

ردت اكتب ماشي بس دزلي رسالة غيرها خلتني صافنة
وهيب:بس طلع زوجچ يحبچ هواية عرفت اليوم لازم غضنفر بس مضروب طلقة وميت العار ومن ميت متخبل صار يضرب بجثتة ويصيح بأسمچ يعني راح اكدر أمن عليچ عندة بعد

بقيت صافنة وهو رجع در اخر رسالة
وهيب:يلا حذفي ليشوف

:باي

دزيتلة باي وحذفت المحادثة وسجلت الرقم بأسم ملاك
صار كل تفكيري بالكسار كمت خليت تلفوني على الشحن ودخل الكسار مبتسم بقيت واكفة صافنة بوجهة

بدون تفكير وتردد ركضت تعلگت برگبتة
چانت اول ليلة اني قابلة بكلشي بيها واول مرة احب قربة مني ولا مرة حسيت بهالأحساس ويا

دفن راسة برگبتي وانفاسة عالية
الكسار:احبچ دمعتي

مشيت ايدي على ظهرة  وبقيت ساكتة رفع راسة يباوعلي ابتسمت رفع نفسة باس خدي وهمس

الكسار:اسف على كلشي دموع واذا متردين اطفال اني قابل بس بعد لتاخذين الحبوب تتأذين

حطيت ايدي على خدة وكلت
:ما اخذهم ابد ومن توفت ملاك اني بعد ما اخذت ولا وحدة

الكسار:اعرفچ ذكية وتعرفين مصلحتچ

سكتنة گلب نفسة نام يمي وسحبني لصدرة ورث جگارة يدخنها بس سحب نفس سحبتها من ايدة ادخن بيها باوعلي مبتسم

الكسار:والله انتِ فد وحدة

راد ياخذها مني رفضت ورث غيرها وصرنة ندخن دقايق وكمت للحمام سبحت وطلعت وهو دخل وراية

غيرت الفراش وذبيت الورق بالزبالة واني ميتة نعس بس غيرتة تمددت وغفيت بس حسيت بي من دخل وحضني بعدها محسيت بشي

كعدت الصبح على صوت الكنتور شفتة ديخلي ملابس بالجنطة باوعتلة مستغربة

:شدتسوي؟

باوعلي وابتسم
الكسار:صباح الخير حبيبتي يلا كومي تريگي راح نروح

كمت وحچيت بعدم فهم
:وين نروح؟

سد الجنطة واجة علية
الكسار:نروح لبيت اهلي بس شكم يوم ونرجع

كعدت وكلت بأنزعاج
:اهوووو حنرجع لسحير الليل والفقمة

ضحك يهز براسة
الكسار:منو الفقمة؟

:هاي زوجة عمك المسمومة ماريد اروح كسار

سحبني من ايدي وكال
الكسار:بس شكم يوم ونرجع راح يجون يشتغلون بالبيت راح ازيد عدد الكاميرات وراح اعلي السياج اكثر

:تمام بس شكم يوم ونرجع ماريد ابقى هناك هواية

الكسار:تدللين حبيبتي

نزلنة تريگنة وبعدها رحنة لبيت اهلة چنت ضايجة بس يحاول يضحك وياية وصلنة للبيت نزلنة لزم ايدي بقوة وتقرب همس بأذني

الكسار:رفعي راسچ غير داخلة لبيتچ

ابتسمت ورفعت راسي دگ الباب وفتحة غيث صافح عمة واني سلم علية من بعيد

الكسار:غيوثي الجنطة بالسيارة جيبها

اخذ السويچ وراح للسيارة واحنة دخلنة للبيت لگيناهم بالصالة والوجوه مگلوبة بس روان تضحك ركضت علية حضنتني

روان:الحمدلله على سلامتچ حبيبتي اعذريني سويتي عملية ومگدرت اجيچ

باوعت للكسار مستغربة يا عملية وهو هزلي راسة يعني مشيها
سكتت والبقية سلمو علية من بعيد وزياد تحمدلي السلامة ويبتسم عادي صدمني زياد الحقير صاير حباب

بعدها تركناهم وصعدنة فوك بس دخلت كلت
:لا اخوانك ولا اخواتك سلمو علية شبيهم كارهيني

الكسار:طبهم مرض بعد سلوى امهم شترديهم يطلعون

ضحكت واخذت الجنطة سويت ملابسنة بالكنتور وهو طلع غيرت ملابسي وبقيت كاعدة بالغرفة

شوي ورجع نزع تيشيرتة واجة تمدد يمي
خلص اليوم يمي يسولف وياية ويحچيلي عن كلشي صار بغيابي

الكسار:الأربعين مال الشهداء مسوينها ولا زرناهم چنتي شاغلة بالنة وعقلنة

:عادي اروح ازورهم؟

الكسار:بمذهبي حرام النسوان تزور القبور بس عادي اخذچ للنجف

كعدت متربعة
:شوف كسار هو مَلِك الله يرحمة مو نفس مذهبك؟

الكسار:اي

:زين شلون دفنتة بالنجف؟

ابتسم وسحبني كعدني على بطنة
الكسار:احنة ربتنة الحنينة دموع والحنينة نفس مذهبچ من كبرنة چانت وصيتنة لبعض منو يموت اول يندفن بالنجف وهسة اني اوصيچ اذا صارلي شي ومتت خليهم يدفنوني بالنجف

نمت على صدرة حاضنتة
:اسم الله كسوري اسم الله

گلبني صار فوكاية يرفع شعري عن وجهي
الكسار:شگد مشتاق لكسوري ومكسرات وكسر وكسور وبعد

ضحكت بخفة
:وكسرسر ابو التسرسر هم

صار يمشي ابهامة على خدي طبع بوسة سطحية على شفتي
الكسار:مشتاقلچ هواية البارحة كلة ممصدك رجعتيلي مكدرت انام حتى

حطيت ايدي على رگبتة من ورة ودفعت راسة لصدري
:نام لعد يلا صار ليل تغدينة وتعشينة بعد ماكو شي نسوي نام

رجع رفع راسة عاض شفتة
الكسار:لا والله اكو

رجعت راسة وضربتة من ورة راسة
:لتتسرسر كسرسر نام يلا

اهتز جسمة يضحك ربع ساعة وانفاسة ثگلت عرفتة نام سحبت نفسي واخذت تلفوني ومشيت على كيفي للباب بس فتحتة صارت بوجهي سلوى فزيت منها ولزمت گلبي بخوف

:شدتسوين هنااا؟

باوعتلي من فوك لجوة
سلوى:والله دافتر ببيتي

تخوصرت وكلت
:قصدچ بيتي لتصعدين هنا اريد اخذ راحتي هنا احنة اثنين متزوجين شكو حاشرة نفسچ بيناتنة؟

باوعت لرگبتي تهز بأيدها
سلوى:حقة يسجل البيت بأسمچ اذا انتِ هارية الرجال هري

رفعت ايدي على الباب وميلت خصري
:وانتِ شنو الي قاهرچ رجل وعندچ وهم ماخذتة من مرتة وابنة روحي اهري هري شعليچ بية؟

سلوى:عيب عليچ بعدچ بطول ايدي شنو مشايفة رجال

فتحتلها الباب وكلت بدلع
:ادخلي جوة اشوفچ كُلشي مباشر لتزعلين

خزرتني ونزلت تدردم وتهز بأيدها گلبت عيوني اريد ارجع اطلع واجاني صوتة يضحك

الكسار:تعالي ولچ ابوس لسانچ

باوعتلة اضحك ورجعت دخلت وسديت الباب
:موتتني شافتني اسكتلها ودتزيد بس انوب ما اسكُت

فتحلي ايدة عاض شفتة
الكسار:عفية بمرتي عفية

تركت تلفوني ودخلت بحضنة  چنت انتظرة ينام حتى البس واروح للمطبخ احچي ويا وهيب بس تاليها نمت اني وهو ضل كاعد

ماعرف شكد بقيت نايمة فزيت من سمعت الباب يندگ تحركت منزعجة وكام الكسار غطاني لحد راسي وراح يفتح الباب اسمع صوت روان

روان:صباح الخير اعتذر اذا كعدتكم بس صديقك يريدك جوة

الكسار:دقايق ونازل

كال هيچ وسد الباب رفعت الغطة عني وانصدمت من شفتة بطرگ الشورت طفرت على حيلي

:طلعت هيچ؟

باوع لنفسة ورجع باوعلي حابس ضحكتة
الكسار:اي نسيت شسوي

تقربت ضربتة على صدرة اخزر بي
:چان لازم تنتبه طلعت كدامها هيچ عيب هيچ شي لازم مينسي

بس كلت اخر كلامي انفجر بالضحك ويأشر علية
الكسار:اي اي صح لعد انتِ ليش ناسية وانوب اتعس مني

باوعت لنفسي وضربت على خدي ركضت للكنتور طلعتلي ملابس ولبستهم على السريع عبرت من عندة اخوزر بي رحت للحمام غسلت وجهي ومن طلعت ملگيتة

عفست وجهي وتخوصرت
:عود ردت اكُلة يجيب الريوگ گيمر وكاهي وين راح

رجعت للغرفة لبست دشداشة وحجاب ونزلت ادور علية ملگيتة بمكان رحت للمطبخ شفت زوجة عمة رفعت حاجبي من ابتسمتلي

هيام:تردين غوث

:اي وينة

هيام:برة تلگي واكف بالحديقة

باوعتلها من فوك لجوة وطلعت للحديقة اركض من شفتة ركضتلة مبتسمة
:كسوري اريد گيمر وكا...

سكتت من شفت بصفة شخص اسمر طويل خليت اصابعي بحلگي وهو خزرني

:اسفة معبالي اكو شخص غريب هنا

ردت ارجع واستوقفني صوتة شفتة يطبطب على كتف هالشخص
الكسار:لا مو غريب هذا اخو اخواني

رفعت حاجبي ممفتهمة
:شلون؟

ضحكو واحد يباوع للثاني
الكسار:هذا شهاب ابن سلوى أخو أخواني...

..يتبعع..

توقعاتكم؟

.
.
.
.
.
.
.
.
.
.

6000 ونص كلمة🙂

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله