رواية المغرورة و الأعمى الفصل العاشر 10 - بقلم بسمة البياتي

المغرورة-و-الأعمى-
(بقلم بسمة البياتي )
- بارت التاسع -

إياس ....أجتني ضربة قوية على رأسي بعدها فقدت محسيت غير على صوت رجال يحاول يكعدني بالكوة كدرت أفتح عيني من الدوخة والثقل البرأسي..

باوعت الدنيا ظلمة ماكو غير ضوه السيارة
مكدرت أركز على شكل الرجال بالبداية عبالي هذا واحد من التهجموا عليه رجعت اليورا بسرعة

أبو قدر ،،لاتخاف اني اريد اساعدك بيك شي تحتاج اخذك للمستشفى

إياس .. باوعت يمين و يسار الشارع فارع جاوبتة لا الحمدلله مابية شي بس اريد أرجع للفندق

..سالني ليش انت اهلك وين ؟

إياس .. اني مو منا جاي زيارة

ابو قدر.. بعد ربع ساعة تصير ساعة 12 وممنوع تجوال شنو اسم الفندق ؟

إياس .. انصدمت معقولة كل هذا الوقت اني بالشارع ومحد اجة ساعدني

ابو قدر  ... هسه تعال اصعد للسيارة وبالطريق نكمل كلامنا لأن مظل وكت

...صعدت وياا واني متردد  بعد الي صار بيه مبقتلي ثقة باحد بس معندي غير حل  الوقت متأخر وماكو سيارات وما اكدر ابقة وحدي بالشارع

مديت ايدي الجيبي لكيت جيوبي فارغة

لا يا الله المحفظة والموبايل وحتى الساعة والنظارات مأخذيها واني كل فلوسي بالمحفظة

صعدت للسيارة واني محتار شسوي الرجال سالني على أسم الفندق من كتلة الاسم
خطية الرجال بقة محتار

ابو قدر، ، الفندق بعيد واذا وصلتك مراح اكدر ارجع الببتي

إياس .. بقلة حيلة كتلة نزلي هنا وانت أرجع الببتك قبل لاينسد الطريق رحم الله والديك مقصرت سويت التكدر عليه

أبو قدر.. وانت شلون ؟

إياس .. الله كريم بلكي تجي دورية شرطة هما يوصلوني

ابو قدر...  لا شلون أعوفك والوضع موزين تعال صير ضيفي اليوم والصبح ان شاء الله اوصلك للفندق

إياس .. تعجبت منه شلون يامن يأخذ واحد غريب البيتا اصلا لو غيرة واحد حتى من شافني فاقد بالكاع يعوفني ويكمل طريقة لان هاي مسؤولية

ابو قدر ... اعرف بشنو تفكر ترة الدنيا بعدها بخير هواية اكو مثلي واحسن مني اني من شفتك مشمور على الرصيف فكرت اذا اعوفك واكمل طريقة يمكن تطلع عايش وخطيتك تبقة بركبتي
كلت اشوف اذا بيك روح اساعدك واذا لا سامح الله ميت راح اضطر ارجع السيارتي واكمل طريقي

بس انت شطلعك بهيجي وقت ومنو ضربك ؟

إياس . استحيت اكلة جاي علمود حبيبتي
كتلة جاي ازور اصدقاء وتيهت الطريق

وحجيتلة شلون هذولة الشباب ضربوني وسرقوا محفظتي ونقالي

وصلنة المنطقة قريبة على منطقة بيت أهل ايبك ..

طبك السيارة كدام بيت عبالي بيته نزل ودك الباب بعد دقايق طلع رجال من البيت حجة وياا هذا  الساعدني

واني الحد الان ما اعرف شنو اسم هذا الرجال

اجة عليه للسيارة وطلب مني انزل كال تعال هذا مضمد خلي يشوف راسك لان دينزف

اني استحيت منه لان فلوسي كلها اخذوها بقيت واكف

أبو قدر .. شبيك محتار امشي يلا موزين جرحك بعده ينزف يمكن محتاج خياط

...جاوبتة واني منحرج منه مو كتلك انسرقت محفظتي

ابو قدر .. امشي وياي انت اليوم ضيفي ما اريدك تحجي شي

المضمد عقم الجرح بس الحمدللة مجان محتاج خياط

من خلال كلام المضمد ويا هذا الرجال عرفت يسموا ابو قدر

اخذني ابو قدر البيتا دخلني للأستقبال جان بيت بسيط بس نظيف ومرتب وبكل ركن مبين بي لمسة نسائية من طريقة الترتيب

ابو قدر ستأذن مني وطلع  بقيت وحدي

بعد دقابق اجة شاب عمره بداية العشرين
عبالي ابن ابو قدر بس من عرفني عن نفسه طلع خطيب بنتة اسمة عيسى اني هم عرفتة عن نفسي لان لهسه ميعرفون اسمي

بقة يمي سوالف وشقة عبالك اعرفة من سنين شاب درة مال الله

جابوا العشى استحيت منهم  لأن أّنخبصوا بسببي بهل ليل...

بقينا نسوالف اني و أبو قدر و عيسى
سئلني. ابو قدر انت من وين؟

إياس .. اني عايش بتركيا وحدي معندي أحد وجيت للعراق زيارة ويمكن عن قريب أرجع اعيش هنا
ابو قدر ..  امانة اذا جيت استقريت هنا اي شي تحتاج اني موجود اعتبرني مثل اخوك الجبير
إياس ... ونعم منك ابو قدر والله هاي وكفتك وياي وضيافتك الي جميل ما انسى طول عمري
بقينا سهرانين شوية بعدين ابو قدر ستأذن وراح نام

اني هم جنت دايخ وتعبان بس خليت رأسي على المخدة نمت

ثاني يوم الصبح بعد الريوك اخذني أبو قدر للفندق واني جنت محتار وصافن شلون راح أكدر أرجع التركيا واني و لا دينار عندي
حتى رقم أحمد صديقي و كرايبة.ماحفظة

الحمدللة جنت دافع فلوس الفندق مقدما وجوازي بالفندق عفتة يمكن هذا الشي من حسن حظي

وصلني أبو قدر للفندق
قبل لا انزل من السيارة  تفاجئت بي طلع فلوس ونطاني وحلف لازم اخذهن

فعلا هذا الرجال الله دزة الي حتى ينقذني
بصراحة ماعرف شلون راح اكدر اردلة هذا معروفة وياي
   وعدت نفسي من ارجع للعراق لازم ازوره وأرجعلة فلوسة

رجعت التركيا وقررت اصفي شغلي هناك واجمع فلوسي وأجي أعيش بالعراق حتى أكدر أزوج أيبك

كرايب أحمد عندة بيت بكركوك جان يريد يبيعة بمنطقة حلوة وهادئ دزلي صوره البيت مساحتة 600 متر والبناء جديد عجبني والسعر جان مناسب لان الولد يريد يبيعة ويسافر
رجعت للعراق اشتريت البيت
وجنت دائما على تواصل اني وأيبك وهي شجعتني على الرجعة مر على رجوعي للعراق ثلاث أشهر
كرايب احمد أسمة علي عندة معرض يبيع بي اثاث تركي أقترح عليه أدخل ويا شريك

  عجبتني الفكرة وشاركتة وبسرعة كدرت اتعلم على الشغل وحبيتة اكثر من شغلي بالمطعم

من بداية رجوعي للعراق كلما اكول الأيبك خلي اجي اخطبج تأجلها وتكول لا هسه مو وكتها

بس اني مكدرت اصبر اكثر أخذت علي وكم صديق ورحنا البيت اهلها

أبوها تفاجئ من شافني  بقة مستغرب
حجوا اصدقائي ويا وكالولة جايين نخطب بنتك الإياس واعتقد انت تعرفة وماكو بعد سبب يخليك ترفضة
ابو ايبك .. طبعا اني اتشرف بإياس بس للاسف اجة متأخر بنتي مخطوبة صارلها شهرين وعاقدة وعرسها هذا الشهر

إياس..عفتهم وطلعت بدون ما أحجي أي كلمة يعني معقولة اني الهدرجة مضحكة ولعبة بيد النسوان وحدة تطعن برجولتي و الثانية على ذمة غيري وتضحك علية وتمثل الحب

ردت أرجع التركيا بس علي قنعني ابقة

علي ... أياس ليش تخلي مرة تكسرك انت أسست نفسك أهنا وشغلك زين و عندك بيت وحياتك وأمورك المادية صارت أحسن من قبل انساها و عيش النفسك ترة محد يموت ورا أحد والضربة التوجعك أكيد تقويك

وفعلا قررت أبقة وأعيش النفسي وبس  شلت من قاموس حياتي شي اسمة حب و زواج  بعد مبقة عندي ثقة بجنس حواء

رحت زرت  ابو قدر وصار من اعز اصدقائي

علي راد يسافر اني أشتريت حصتة وصار المعرض الي

  عيسى ازوج وجان محتاج شغل
شغلتة وياي لان مستحيل الكي وأحد بأمنتة واخلاقة ويكفي هو نسيب ابو قدر

أيلول.. صارلي يومين ما اطلع من الغرفة بس للضرورة مالي خلك اسوي اي شي وماما عايفتني براحتي

والشي الغريب بابا ديتهرب من شوفتي ويحاول ميلتقي بيه ابد ..

دخلت ماما للغرفة

ماما.. لولة ابوج يريد يحجي وياج

أيلول ..شعجب اليوم يلا اذكرني
هه صاير بينا رسميات يستأذن
ويدز وسيط حتى يشوفني

ماما.. ايلول احترمي نفسج عيب تحجي على ابوج بهاي الطريقة

ايلول .. طلعت من الغرفة رحت للهول شفت بابا كاعد من شافني باوع علية

شفت لمعة بعينة عرفت بي مشتاقلي مثل ما اني مشتاقتلة بس الظاهر صعب علية يواجهني
كام من مكانة تقدمت علية جان يسحبني الحضنة وباس راسي

بابا.. تعالي لولة كعدي بصفي سحبني من ايدي وكعدني سحب نفس عميق وحجة

لولة باجر إياس راح يجي ويريد يحجي وياج

كمزت من مكاني بسرعة كمت وكفت

أيلول.. ليش يجي شيريد يحجي  اني مو انطيتك موافقتي وخلص

بابا صافن علية و على ردت فعلي
رجع سحبني من ايدي وكعدني

بابا..  إياس يريد بنفسة يجي يسمع منج الموافقة

إيلول .. همست بيني وبين نفسي اوووف ياربي هاي شراح يفضها

اوك بابا هسه اكدر اروح

اشرلي برأسة يعنى اي

عفتة ورجعت للغرفة
ياربي شسوي ساعدني مجرد اسمع اسمة معدتي تقلب هاي شلون راح اكدر اعيش ويا بيت واحد والله صعبة دخيلك ربي ساعدني

بقيت بالغرفة للعصر سمعت صوت هوسة برة بس ابد مالي مزاج اروح اشوف شكو

والبليل الفتان هل مرة ماكو  ماجتي تنقلي الأخبار

بقيت بمكاني بس من سمعت صوت ود تبجي متحملت طلعت اشوف شبيها

باوعت لكيتها كاعدة يم بابا وماما  وميتة بجي

بابا.. تعالي ايلول كومي ود تغسل وجهة واخذيها للغرفة ترتاح

راحت ود غسلت واجت للغرفة وتمددت على الجرباية ودفنت رأسها بالمخدة وبقت تبجي واني مثل الاطرش بالزفة

أيلول .. اجيت كعدت يمها ود شبيج ليش تبجين. شنو متعاركة ويا عيسى؟ 

هزت رأسها بمعنى لا

... هففف لعد شبيج اذا متحجين اصيح ماري تحجيلي

ود مسحت دموعها وعدلت كعدتها وحجت

..اليوم الظهر جنا اني و عيسى نتغدة

عيسى .. اليوم من جنت يم إياس سمعتة خابر عمي وكالة يريد يحجي ويا أيلول على موضوع الخطوبة

لج عيسى بعده ممكمل كلامة سمعنا صياح مها.

مها.. طلعت هيجي السالفة اختج البايرة حاطة عينها على إياس وشافتة صار اعمى جلبت بي لان هي بعد منو يأخذها بس،تحلم اخليها تاخذة

عيسى لزمها من شعرها ويضرب بيها وهي ولا سكتت
اجة اسامة بالكوة كدر يخلص مها من ايد عيسى

مها .. اسامة بارك الود اختها البايرة راح تتزوج

اسامة .. باوع علية شنو منو راح تتزوج

اني سكتت
جاوبتة مها ايلول راح تتزوج

اشو هذا انكلب وحش اليوم احرك بيتكم عليكم ليش انتو بكيفكم تنطوها وجان يضاربون هو وعيسى

ولج ايلول حتى اني هد عليه هذا الناقص يريد يضربي
اني وعيسى عفنا البيت وطلعنا

ايلول .. لعد عيسي هسه وينة؟ 

.. راح يبقة يم إياس

أيلول .. كافي لاتبجين اسامة ومها ثنينهم طايح حظهم وبس لسان اوووووف ياربي بعدني بالبداية والمشاكل على راسي

ثاني يوم اجة إياس تغدة يمنا
اني حبست روحي بالغرفة وبقيت الوب مثل الطير المذبوح القهر يعصر بقلبي

خلصوا غدة اجت ماما كالت امشي يريدوج بالاستقبال 

دخلت للاستقبال شفت بابا وعيسى وإياس كاعدين جريت نفس وكلت السلام عليكم ..

إياس من سمع صوتي رفع رأسة وندار على المكان الي اجة منه الصوت و رد السلام

بابا.. تعالي بنتي لولة كعدي اهنا

..اجيت كعدت بصف بابا وابد  مباوعت على الطرف الكاعد بي إياس

بابا وعيسى كاموا ديطلعون جلبت بيد بابا همست بصوت ناصي عزااا هاي وين عايفني وحدي

بابا .. بنتي إياس استأذن مني يحجي وياج وحدكم واني وافقت هو مو غريب وراح يصير من اهل البيت وجان يعوفني وياخذ عيسي ويطلع

رفعت راسي وباوعت علية شاب نهاية الثلاثين وسيم جدا وانيق بشكل عطرة تارس الأستقبال بس رغم هذا ما اطيقة وما اعرف شنو السبب

احم احم
إياس.. شنو اسمج؟ 

... ايلول

إياس .. عاشت الأسامي ايلول

أيلول .. تسلم

إياس .. اسمعيني زين ايلول انتي دتشوفين هاي حالتي ويمكن راح ابقة طول عمري بهذا وضعي اني ما اريد اظلمج وياي اذا تشوفين نفسج صعب تتقبلين واحد اعمى تكملين حياتج وياا من هسه كوليلي وعوفي الباقي عليه ومعليج باهلج لان هذا زواج مو لعب

ايلول .. اني مدنكة راسي،واسمعة تلمست خدي دموعي دتنزل غصب عني سمعتة يكولي جاوبي ايلول ليش ساكتة

رفعت راسي ومسحت دموعي وجاوبته

اني وافقت باردتي ومحد جبرني ومن البداية اني اعرف بحالتك وعادي معندي اي اعتراض عليها

ايلول ما اعرف ليش شفته من سمع هذا جوابي ضاج

إياس ... اوك لعد واني ان شاء الله ما اقصر وياج بشي وشتطلبين اني حاضر

ايلول ..  معندي اي طلبات

إياس .. بتعجب ليش؟

أيلول .. بنفاذ صبر اني متهمني الامور المادية

إياس .. اهاا. بس اني قررت اسجل باسمج 200 متر من مساحة بيتي

أيلول .. عزاااا هذا شديحجي يريد يربطني بي للابد

كمل كلامة عندي اقتراح الج

ايلول .. شنو هو؟ 

إياس .. شنو رايج يجون اهلج يعيشون ويانة؟

أيلول.. فتحت عيني مصدومة الله عليك صدوك دتحجي

إياس .. اي صدك البيت جبير واني وحدي من زمان محاس بالاجواء العائلية واتمنى اهلج يكونون مثل عائلتي

أيلول .. اشكد جنت ضايجة بس فرحت من هيجي كال
لكن اذكرت بابا اكيد مراح يوافق

إياس .. اشو هم رجعتي سكتي

ايلول.. بابا اكيد ميوافق

إياس نحاول اني وياج نقنعة. روحي صيحي

ايلول .. صحت بابا. واجة هو و عيسى
إياس فتح ويا الموضوع بس للاسف رفض رفض قاطع

إياس.. زين اني عندي حل يرضيك

ابو قدر ..والله يا إياس كل الحلول مرفوضة

..هسه اسمعني وبعدين قرر ترفض او لا
انت قبل فترة مو استلمت ارض باطراف كركوك وردت تبيعها بس مجابت سعر زين

ابو قدر .. اي صح بس شجاب هاي على هاي

إياس .. شوف انت راح تسجل قطعة الأرض باسم ايلول مهرها

واني اسجل 200 متر الي هي مساحة الحديقة  باسمك

ابو قدر .. لا هم مترهم صعبه

إياس .. هي شنو الصعبة ترة انت راح تكعد بملكك مو يمي وشوكت ما اني صار عندي اطفال وحتاجيت باقي البيت عود انت ابني بيتك بالارض مالتك الي هي الحديقة حتى بنتك واحفادك يبقون كدامك

ايلول ... عزاااا بعينة هذا شديلوص هسه اذا اكوم وادفرة علي هذيج المنطقة واخلي يكطع الخلفة هم احد راح يلومني هو اني ما اطيق اسمع صوتة وهذا جاي يدور اطفال امدة حظي الأغبر 

بابا .. ما ادري خلي افكر بالموضوع وانطيك جواب

إياس .. ماشي بس تأكد ابو قدر اذا رفضت انسى إياس للأبد

اني من سمعتة هيجي يكول بداخلي تمنيت بابا يرفض حتى اخلص من هاي الزواجة الكشرة لكن تجري الرياح بما لا تشتهي السفن ........