رواية المغرورة و الأعمى الفصل التاسع 9 - بقلم بسمة البياتي

المغرورة-و-الأعمى-
(بقلم بسمة البياتي )
- بارت الثامن -

أيلول ..بعد منطيت موافقتي الماما حتى تبلغ بابا رجعت نمت لان جنت طول الليل سهرانة مكعدت غير ساعة 3 الظهر باوعت بالغرفة البنات مموجودات كمت من فراشي رحت غسلت

دخلت للهول شفت ماما والبنات كاعدات بس بابا مموجود رحت يم ماما خليت راسي على رجلها وهي ظلت تلعب بشعري

أيلول... لعد بابا وينه ؟

ماما   بتردد هااا ابوج يم إياس

.. من كالت اسمة ما اعرف ليش بطني مغصتني

ماما.. بان كومي صبي اكل الأختج

أيلول .. لا ما أريد مو جوعانة

... ترة ميصير تبقين بدون اكل جرت حسرة وكالت بنتي انتي بعدج بالبداية وهذا حالج لعد من تزوجين شلون

أيلول.. شفت ماما مقهورة خفت على صحتها

... يلا بنونة كومي صبيلي بعد راح ادلل عليكم لأزم شطلب تسوو الي

بان .. موتدللين قابل كم لولة عدنا

... أيبااااااه معرفتج قبل اذا اطلب كلاص مي ورا ساعة يلا تجيبي

بان .. اوووي اني شسوي ميعجبج والله حرت وياج

ماما .. بان بدون لغوة زايدة روحي صبيلها

بعد ربع ساعة اجتنا ود اول مشافتني ولج ايلول هاي صدوك راح تتزوجين إياس

...غمضت عيني بقهر وحجيت ويا ماما هاي شبسرعة رحتي كتيلها..

ماما.. ولج شنو امج فتانة وتروح تكوللها اني لا كايلة ولا حاجية

باوعت الماري شفتها دتسوي روحها مشغولة بالأيباد والموضوع مو يمها

ود .. هسه تحجون لو ارجع البيتي

أيلول.. اي راح ازوج هسه ارتاحيتي

ود.. الف مبروك حبيبتي والله فرحتلج صدوك انتي وإياس لايكين البعض

أيلول... اشو هاي اجتني بسرعة احضان وبوس وفرحانة هاي عود كل عقلها

..جاوبتها بنبرة استهزاء هه الله يباركلج يوم الراما

ود ... شبيج لولة ليش ضايجة شنو انتي متردينة ؟

باوعت الماما وحجت عزااا بس لا انتي جبرتيها

..  ماما بعصبية ياطلابة امكم اليسمعج يكول اني أكرهكم و ماكو رحمة بقلبي عليكم 

عافتنا ودخلت الغرفتها ..

ايلول.. هاي ليش هيجي حجيتي ترة ماما مموافقة ومقهورة خطية

ود.. لعد احجيلي شنو صاير احس الوضع ابد مو طبيعي 

ايلول .. اريد احجي الود وجان يندك الباب راحت ماري فتحتة وجان تدخل علينا قدر مثل العاصفة مفووولة من العصبية

حتى سلام مسلمت  صاحت ولج أيلول هاي صدوك راح تتزوجين
؟
هاي تاليتج تأخذين واحد اعمى اريد اعرف اهلي شبيهم بس يريدون يزوجوج
هاي اكيد سوالف ماما جبرتج

من هاي اللحظة لمي ملابس وتعالي وياي متبقين اهنا اذا الهدرجة صرتي ثقيلة عليهم تعالي يمي اني وسيف نخليج على راسنا

ايلول .. اشكد فرحت بكلام قدر فدوة العمرها

.عاد اني والبنات بالكوة كدرنا نسكتها

ايلول.   ولج خطية والله ماما معليها مموافقة ومن البارحة بس تبجي 

قدر .. من سمعت كلامي هدأت

...اني بقت عيني ادور على ماري اريد اكطعها بأسناني وهي عبالك فص ملح وذاب

..كلت  الود و قدر تعالوا احجيلكم احسن ما كل شوية وحدة جاية ومسويتلها حفلة

وبديت احجيلهم كولشي ..
قدر رجعت تعصبت على بان

قدر. لج بان  انتي منو صخم وجهج وطلب منج ادخلين نفسج بشي ميخصج عمرج 17 سنة ودورين زواج
بهذا تصرفج الارعن ايلول انجبرت تتزوج حتى لاتضحين بمستقبلج

جانت بان مخلية ايدها على وجهة وصوت  بجيها وشهكاتها توصل السابع جار

قدر راحت الغرفتة ماما حتى تعتذر منها

الاجواء كولش متوترة بقينا ساكتين بس صوت ادم وراما وريان يلعبون...

ود..لولة تعالي احجيلج اليوم شصار بيت عيالي

...خير شصار ؟

ود.. البارحة اسامة أشترى اربع حمامات ولج ياعيني شكلهم يجنن وغاليات سعرهم بالاوراق

ايلول....يااا صلوات أسامة صار مطيرجي هي بس هاي جانت ناقصتة هنيال عيسى على هيجي  أخو

..لا ولج هو لان شكلهم حلو اشتراهم
المهم اليوم اني خلصت شغلي من وكت وصعدت ارتاح بغرفتي وعمتي بقت تسوي
الغدة ومها كالعادة كاعدة بغرفتها وقت الأكل  والمشاكل تطلع

صار الظهر ونزلت حتى نتغدة  اني ومها وعمتي واكفين  بالمطبخ دنحظر السفرة
بس اشو عمتي مو على بعضها

عمتي اول مسمعت صوت سيارة اسامة بسرعة طلعت  استقبلتة من باب المطبخ

ام عيسى ... يمة هلا توة نور البيت الله يساعدك وليدي فدوة الطولك اكيد تعبان حضرتلك الحمام وملابسك هم خليتهم الك بالحمام وبس تطلع تلكي الغدة جاهز شلون غدة مسويتلك

خطية اسامة مصدوم من ترحيب امه أشرلنا كال شبيها ؟!!
كلنا والله علمنا علمك مندري

صبينا الغدة واسامة اجة كعد جان تجي عمتي بيدها ماعون وتقدمة الأسامة ومن نباوع نلكي الأربع حمامات شاويتهم اله

ولج لو تشوفين اسامة يمكن شوية تضربة جلطة فرفح بهل ظهرية بحيث الحمامات وهنا مشويات طارن بالهوى

ايلول.....  ههههههههههه حل يستاهل والله عاشت ايدها عمتج متنلام بي

..تدرين اذا يسمع بيج راح تتزوجين يمكن يتخبل

ايلول... اوووي وشسويلة مو اني ناقصة هو هذا حظي ياهو الأضوج منة وما اطيقة مجلب بيه

ود... ولج والله يحبج صارلة سنوات ينتظر موافقتج اشكد تقدم عليج وانتي ترفضين من جان يجوج خطابة ويسمع يحرك البيت علينا ويرجع يدز عمتي تخطبج وانتي الله يسلمج قافلة ..

ايلول...خلي يطلعني من راسة ويعيش حياتة كلشي قسمة ونصيب

ود ...ههههه حتى مها اذا عرفت راح تاخذين إياس تنجن

أيلول... بتعجب ليش؟

ود ... لج من زمان عينها عليه من قبل لايسوي الحادث وكم مرة راحت للمعرض بحجة تشتري غراض وعيسى كم مرة تعارك وياها ومنعها توصل للمعرض

وحتى من سوا الحادث يومية تلمح العيسى بحجة خطية إياس منو اله والأزم احد يعتني بي وانت الى متى تبقة عايف بنتك ومرتك وتبات يمه لأزم تجي وحدة تبقة ليل ونهار يمه

لج عيني ولا شفت وحدة بصلافتها ولا تستحي هيجي تحجي كدام اخوها اشكد يرزلها عيسى وماكو فايدة 

أيلول... اووووف ياريت تاخذة  والله راح اكوون ممنونه منها طول عمري

ود .. دنجبي والله خوش قسمة واذا محبيتي ومتي بي فلا اتسمى ود

..هه بحلمج ...

ابو قدر .. كاعد بيت إياس اباوع علية خطية حالتة من السيئ الأسواء
كملنا غدة وجيت كعدت بصفة

...اكول إياس الى متى تبقة على هذا وضعك لاتقبل تروح تسوي العملية ولاتقبل تجي تعيش يمي انت على شنو ناوي بس فهمني ؟؟

إياس .. واليرحم والديك ابو قدر سد الموضوع كتلك شوفلي وحدة تجي تساعدني لان ادري بنفسي ثقلت عليك  و على عيسى

ابو قدر... هاي تاليها إياس هيجي تحجي وياي وبعدين منو كالك انت مثقل علينا ليش شنو شايليك على اكتافنا
اني حجيت هيج لان اريد مصلحتك وراحتك

إياس.. بحسرة ادري والله بس اريدك تعذرني اني هاي الأيام صاير كلش عصبي وما اعرف شسوي .

ابو قدر .. مبقة عندي غير حل ثالث الك وبكيفك تقبلة او ترفضة لان هاي حياتك واذا قبلت او رفضت بكل الأحوال اني وياك ومستحيل اتخلى عنك الى أن الله يأخذ امانتة

إياس ... عمرك طويل ان شاء الله كفووو منك ابو قدر ادري بيك قول وفعل صدكني الله يحبني لأن انت موجود وياي بس مكلت شنو هو الموضوع ؟

ابو قدر .. والله ما أعرف شلون ابدي بالكلام بس ثق بالله لو ما انت غالي عليه بغلات بناتي مجان خطيت هاي الخطوة
اني ...

إياس ... اي ابو قدر كمل انت شنو ليش سكتت ؟

ابو قدر ... اني اريد ازوجك بنتي حتى تسندك وتوكف وياك بهاي محنتك...

إياس ... اني بحالة صدمة ما اعرف شنو اجاوبة

ابو قدر ..ما أريدك اجاوب هسه فكر براحتك.وبعدين انطيني جواب

إياس .. احس الكلمات ضاعت مني وحتى صوتي اختفى بس لأزم اجاوبة

بصراحة ابو قدر انت فاجئتني واني اتشرف بيك وبنتك بس انت دتشوف حالتي شنو ذنب بنتك تربطها بواحد اعمى مثلي

ابو قدر ... شبيها حالتك ترة انت مبيك شي الحمدلله بعدك بصحتك واذا على عينك ترة اكو امل ترجع تشوف

إياس .. واذا مرجعت فتحت شلون اكيد راح تنظلم بنتك وياي

ابو قدر ...  لا بنتي مراح تنظلم وياك اني واثق من هذا الشي

إياس .. زين منو يكول بنتك راح تقبل بية ؟؟

ابو قدر .. اني لوما واثق من موافقة بنتي مجان جيت فتحت الموضوع وياك

إياس .احجي بداخلي معقولة اكو بنية بهذا الزمن ترضى تأخذ واحد اعمى

فزيت من صفنتي من حجة ابو قدر

....اني هسه رايح عندي شغل وانت فكر وباجر ان شاء الله من اجي اريد جوابك

إياس .. راح ابو قدر وخلاني حاير ما أعرف شسوي اني اخر شي ممكن افكر بي هو الزواج

وهسه انحطيت بموقف صعب اذا رفضت اخاف يزعل ابو قدر مني واذا وافقت اعرف البنية راح تنظلم وياي

راح احجيلكم عن نفسي...

اني إياس كل الناس تعرفني وحيد معندي احد بس بالحقيقة اني عندي اهل واقارب يسدون عين الشمس
ابوية رجال هيبة وشخصية الكل يهابة ويحترمة
وأمي نفس شخصية ابوية قووية وكلمتها تمشي على الجبير قبل الصغير

احنا اربع اخوة وثنين خوات ثلاثة اكبر مني وثنين اصغر مني عايشين بقضاء تابع الأحد المحافظات ابوية عنده خير من الله اراضي زراعية وحلال
وحالتنة بهذاك الوكت رغم الحصار جانت ممتازة

عمي الصغير مزوج خالتي وعدهم بنية اصغر مني بسنتين
خالتي من ولدت فرح قبل الأربعين ادهورت صحتها وتوفت
عمي جان يعشق خالتي من سمع بيها ماتت خلى طلقة برأسة ومات

من خلصت الفاتحة اهلي قراروا فرح تعيش يمنا ابوية وامي  يحبوهاومدلليها  حتى اكثر من خواتي شذى وفاطمة

أخواني حسن شذى وسام مزوجين وطبعا مأخذين كرايب

لان قانون والدي مناخذ ولا ننطي للغريب

اني الوحيد بأخواني جنت احب الدراسة هما للثالث متوسط ويبطلون
كملت سادس وطلعت كلية ادارة واقتصاد بغير محافظة ولأزم اروح قسم داخلي

ابوية.. تزوج  فرح يلا اخليك ادوم كلية

إياس ... انصدمت من هذا القرار لان فرح رابية ويانة واعتبرها مثل اختي  بس والدي كدر يقنعني من كالي اشتريلك سيارة اذا وافقت
جنت مراهق وفرحت بالسيارة

ازوجت فرح جانت مدللة كلمة ما اكدر احجي وياها بسرعة تروح تشتكي الأهلي وهما عدهم فرح شي مقدس

تخرجت من الكلية ردت اتعين بس رجع حضرت الوالد رفض كال لازم تشتغل ويا اخوتك

وبيوم اجة عليه وسام اخذني وطلعنا نتمشى

وسام .. شوف إياس عندي موضوع وياك وما اريدك تخجل مني اني وياك اصدقاء قبل لا نكون أخوة

إياس .. منو كلك اني اخجل منك

وسام.. لعد ليش محجيتلي على العجز العندك حتى اساعدك وأشوفلك طبيب زين يعالجك

إياس.. وسام احترم نفسك صح انت اكبر مني بس ما أسمحلك تهيني هذا يا عجز الدتحجي عنه

وسام.. يعني انت مبيك شي ؟؟

إباس ... اللهم طولج ياروح تحجي لو ابتلي بيك

وسام ... كافي لك لا ترفع صوتك لعد اذا مبيك شي ليش فرح وين متكعد تكول إياس مبي خير لعد متشوفوني لهسه مصار عندي حمل  لك العشيرة كلها صارت تعرف بسالفتك

إياس ... اسمع واني مد استوعب الكلام دين مبقة براسي ركضت للبيت واني ناوي على موت فرح
عفت وسام يركض وراية
شفتها كاعدة ويا امي واختي سحلتها من شعرها وهي تعيط ودخلتها للغرفة نزعت الحزام وكطعتة عليها
اسمع صوت امي تلطم وتعيط برة
اخير شي انكسر الباب ودخلوا سحبوها مني اجت امي تسب وتغلط وتريد تهد عليه

ابوية شاف فرح مدماية كًلب الدنيا عليه

والأحلى من هذا كلة أبوية وامي يكولون بنت عمك اكيد متكذب وطعنوا برجولتي

كرهت اهلي وكرهت الدنيا كلها
ثاني يوم اخذت اخوية ورحت فحصت يم احسن طبيب

جبت التقرير وشمرتة كدام ابوية

إياس .. اذا هم عندك شك بهذا التقرير  مستعد هسه اخذها كدامك

ايوية.. احترم نفسك حتى لو مبيك شي هسه تروح تعتذر من بنت عمك على هذا ضربك الها وحسابك وياي بعدين

إياس .. بنت اخوك خليها يمك ورميت عليها يمين الطلاق ابوية انجن  كال اذا طلكها لا انت ابني ولا اعرفك اتبرة منك 

إياس...واني مراح انتظر تتبرة مني لان من البوم اني راح اعتبر نفسي معندي اهل

قبل لا يحجي شي عفتهم وطلعت ومن هذاك اليوم وقطعت علاقتي بيهم حتى ويا اخواني معندي تواصل

بعت سيارتي وجنت جامع جم فلس وقررت اسافر خارج العراق
وبوكت النظام السابق جان السفر صعب فطلعت تهريب التركيا ...

وصلت التركيا ومجنت اعرف احد اشتغلت هواية شغلات حتى اكدر اعيش وبهذا الوقت تعرفت على شاب عراقي اسمة احمد وصرنا اصدقاء
اشتغلنا هواية شغلات وجنا نجمع الفلوس حتى نكدر نفتح بيهم مشروع صغير
وفعلا كدرنا نجمع ونفتح كافتريا صغيرة وبعدها طورنا شغلنا وفتحنا مطعم وصار عدنا زبائن والحال تحسن وكدرنا نكبر المطعم  
واكثر الزبائن جانوا عراقيين وبعد فترة صار عدنا مطعم ثاني والحالة المادية الحمد لله صارت ممتازة

جانت اكو عائلة عراقية من القومية التركمانية دائما يجون للمطعم وجانت تجي وياهم بنية اسمها أيبك ناعمة وملامحها حلوة ونازكة اول متشوفني تبتسم واني تعودت لازم يومية اشوفها ونتبادل النظرات اخير شي غصب عني لكيت نفسي احبها
صارت علاقة بينا وتواصل 
اني وضعي المادي زين ومكون نفسي لهذا قررت اخطبها بس ابوها رفض بحجة ما أكدر انطي بنتي الشخص ما اعرفة واحنا مصيرنا نرجع البلدنا

رجعت خطبتها اكثر من مرة بس بقة  ابوها مصمم على الرفض لكن هي جانت متمسكة بيه وحبنا يوم بعد يوم يزيد مينقص

بعدها صار السقوط بالعراق واكثر الناس بدت ترجع ومن ضمن هاي الناس اهل ايبك
اني تخبلت ورحت الأبوها وهم طلبتها
جاوبني مستحيل اعوف بنتي وحيدة بهذا البلد

رجعوا اهل ايبك للعراق هي راحت واخذت روحي وياها ودعتها واني النار تاكل بقلبي  انطيتها ارقامي حتى من يصير عدها تلفون تتصل بيه ونبقة على تواصل

لكن من راحت مسمعت اي خبر عنها لمدة سنة وبهاي السنة حالي جان بالضيم من فراكها واني ما اعرفلها اي عنوان حتى اروح ادور عليها كل الي اعرفة هي من محافظة كركوك

وبيوم كاعد بالمطعم واجاني اتصال وجان منها من سمعت صوتها انجنيت

عاتبتها ليش هلكد كطعتي بيه
أيبك ... حبيبي والله هسة يلا كدرت احصل موبايل واول شي سويتة اتصلت عليك

بقينا اني وهي نتواصل اني بعد ما اكدر  اتحمل اشتاقيتلها وقررت اجي اشوفها اخذت العنوان منها
وحجزت واجيت للعراق ..
صديقي عندة كرايب من كركوك خابرهم حتى واحد منهم يستقبلني من اوصل ويساعدني لان اني ما اندل اي مكان بهاي المحافظة

من وصلت فعلا الولد جان ينتظرني ساعدني حتى احجز بفندق ونطاني خط عراقي حتى اذا احتاج شي اتصل عليه او اذا اريدة ياخذني المكان 

بقيت بالفندق للعصر ارتاحيت شوية من تعب السفر
بعدها كشخت وقررت اروح اشوف حبيبتي
استحيت اتصل على اقارب احمد حتى يأخذني المنطقة ايبك كلت اني أخذ تكسي واروح اكيد.مراح اتوه اتصلت على ايبك واخذت العنوان المضبوط منها وطلعت من الفندق اجرت تكسي ودليتة على العنوان
وصلت للمكان بس بصراحة هوايه شوارع وفروع متشابهة تهت

رجعت اتصلت على ايبك وهي ظلت توصفلي المكان واني اطلع من فرع ادخل بفرع ثاني وللمغرب بقيت على هاي الحالة اخير شي لكيت البيت وكحلت عيني بشوفة حبيبتي صح من بعيد ما اكدر اقترب منها واحجي  وياها واني كاطع مسافة طويلة حتى اجي عليها بس عادي حبيبتي تستاهل التعب المهم شفتها

بعدها ردت ارجع للفندق لان الدنيا صارت ظلمة والوضع موزين وساعة 12 يصير حظر تجوال مشيت للشارع دانتظر تكسي
جان تطبك يمي سيارة مشفت منها شي لان الدنيا ظلمة والضوه مالتها قوي على عيني
نزلوا منها ثلاث شباب  مبين من مشيتهم سكرانين
تقدموا علية اجوا يريدون يلزموني هما اصلا مابيهم حيل يوكفون دفعت واحد منهم والزمت الثاني شبعتة ضرب بس فجأة اجتني ضربة قوية على راسي بشي حديد وكعت وبعد محسيت بالدنيا ......

بالبارت القادم راح تعرفون شلون تعرف إياس على  أبو قدر .. تحياتي للجميع وشكرا على التعليقات الحلوة والتصويت فديتكم 🌹🌹بسمة البياتي