رواية المغرورة و الأعمى الفصل الحادي عشر 11 - بقلم بسمة البياتي

لمغرورة-و-الأعمى-
(بقلم بسمة البياتي )
- بارت العاشر -

أيلول... إياس من كال البابا اذا رفضت انسى واحد اسمه إياس بصراحة انزرع امل بداخلي اتمنيت بابا يرفض

لكن بعد تفكير طويل وجانوا الكل يحاولون يقنعوا بابا يوافق

وبدو اهلي يجهزون للعقد مالتي
إياس قرر يجيب اصدقائة ومعارفة ويجي يطلبني رسمي وبنفس اليوم يعقد عليه

ود جانت بعدها زعلانة وباقية يمنا وأجتي قدر هم حتى يساعدون ماما
اما اني جنت بعالم ثاني كلما يقرب يوم العقد تسوء حالتي

قدر ... لولة ليش مطلعين يمنا تكعدين ماكو احد بالبيت بس اني وبان وماري والجهال

أيلول.. لعد وين البقية؟

قدر .. بابا بالمعرض وماما اخذت ود وراحت للسوك
تعالي مسوين شاي وبان سوتلنة بطاطا ويمكن فحمت بس هم تنوكل يلا كومي يمنا

.... أبتسمت الكلامها وكمت وياها بقيت كاعده ويا اخواتي فعلآ كدرو يطلعوني من جو الكأبة الي اني بي

صار المغرب اني وقدر وبان كاعدين بالحديقة على المرجوحة فجأة سمعنا صرخت ماري هزت البيت
رحنا نركض عليها ومن السرعة والخوف وحدة تنضرب بالثانية

شفنا ماري يم باب الغرفة كاعدة بالكاع وبس تعيط
قدر حضنت ماري بس تريدها تسكت لكن ماري  عيونها شاخصة على مكان الجرباية وتاشر بيدها
احنا لأزميها نريد نكومها ونفتهم منها شبيها

قدر.. ماري بس كوليلي شبيج من شنو خايفة شبيها الجرباية

اخير شي نطقت ماري

ماري... ججج جني وتأشر جوة الجرباية لزم رجلي

هي بس كالت كلمة جني
اني وبان نريد نوكف داننهزم وحدة نضرب راسها برأس الثانية

أشو هاي قدر كامت بكل شجاعة وراحت للجرباية دنكت راسها وشالت الجرجف وجان تمد ايدها وتسحب ريان من جوة

ماري من شافت ريان بقت تعيط بالزايد وتريد تكوم تهجم عليه واني بالكوة لأزمتها

قدر لزمت ريان شبعتة كتل بالكوة خلصنا من ايدها

من هدأت قدر اجيت كعدت يمها وسالتها انتي شلون عرفتي ريان جوة الجرباية

قدر .. لان اعرف سوالفة هذا فديوم يسوي بيه سكتة قلبيه

أيلول .. ليش شبي اني عبالي ديلعب غميضة وخاتل مو قصدة يخوفها

قدر .. لج يا على نيتة هذا من يروح البيت جدة ما ادري من منو معلمة هاي الحركات

قبل كم يوم الظهر كلت السيف اني اروح اغسل ملابس استغل نومة الجهال..

رحت للغرفة اجمع الملابس واجيت فتحت باب الغسالة داخلي الملابس بيها
وما اشوفلج  غير بس راس يطلع من الغسالة وبعلوا صوتة صاح بووووووووووووم
واني عطت ويا عيطتة وفقدت الوعي من صحيت لكيت نفسي على الجرباية وسيف و ادم يمي وجهي غركان مي وعطر قووي بخشمي
سيف من عرف موت ريان كتل

إيلول... ههههههههههههه خرب شرفك ريان والله سوالفة تجنن ولا عبالك عمرة خمس سنوات ههههههههه

لعد دسمعي هاي

باليل جنا سهرانين اني وسيف بالأستقبال ومسوين جو رومانسي مطفين الأضوية ودنتفرج على فلم رومانس وكرزات وفواكه واني مخلية راسي على كتف سيف وهو حاضني بثنين ايده ومندمجين ويا الفلم

اشو فجأة صار ضوء ليزر عليه وعلى سيف
واني ويا اخذنا وضع الأنبطاح بالكاع
كمت ابجي واكول يبووووو هذا قناص مصوبي علينا من الشباك
واحنا بهل وضعية ودنزحف نريد ننهزم من الأستقبال جان نسمع صوت كركرت طفل من جوة الطبلة كام سيف بسرعة شغل الضوه
ونباوع نلكي ريان جوة الطبلة وخربان ضحك علينا

أيلول... ههههههههههههه وشسويتولة

قدر من فشلتي اني وسيف على منظرنا مسويناله شي

ايلول ... فدوة العمرة شلون سوالف علية ههههههه

أيلول .. صار يوم العقد اجتي خالتي منى وبناتها وخوالي هم اجوي

اني لبست فستان بسيط لونة كريمي ههه ردت البس اسود مقبلوا 
وبالكوة قبلت اخلي شويه مكياج الوجهي

للعصر كالوا اجوي الزلم ودخلوا للأستقبال

اني بهاي للحظة صار عندي غثيان حسيت نفسي اريد اتقيئ بالكوة مسيطرة على روحي

شوية واجت خالتي وماما كالوا يلا كومي ابوج واياس والشيخ بالهول حتى تعقدون
خلوا شال على راسي وسحبوني من ايدي وطلعت
اجيت كعدت يم بابا واني افرك ايد بايد من التوتر والقهر

بدء الشيخ يعقدلنا سئلني على موافقتي

اريد انطق ما اكدر الكلام وكف بلاعيمي ميقبل يطلع

رجع الشيخ سئلني مرة ثانية وبالكوة كلت نعم

تم العقد وصرت على ذمة إياس

خوالي واصدقاء إياس راحوا بقت بس خالتي وبناتها وسيف وعيسى وإياس لان بابا مقبل إياس يروح قبل ميتعشى

رجعت للغرفة اريد اغير ملابسي اجت ماما

ماما... لاتغيرين شي تعالي حتى تلبسون الحلقات

أيلول.. شنو يا حلقات ؟

ماما .. اني اخذت الحلقة على ذوقي مو رفضتي تجين ويانة للسوك

أيلول.. اوك جيبيها اني البسها

ماما... تعالي بنتي ولا تشلعين قلبي

أيلول ... هفففف شنو هاليوم هذا الي مجاي يريد يخلص طلعت واني ادردم

رحت للأستقبال شفتهم كلهم موجودين 
هه الظاهر فعلا سيد إياس صار فرد من العائلة السعيدة

بابا ... كال راح اصير مثل الأتراك واني البسكم الحلقات
شفتهم شادين الحلقات بشريط احمر وكفوني  بصفة واني ممتحملة قربة مني

اجة بابا لبسنة الحلقات وكص الشريط كعدت شوية اخير شي متحملت عفتهم وكمت

دخلت للغرفة واني اروح واجي ولازمة ركبتي مختنكة اتمنى الكي مكان وحدي ابقة بي واطلع قهر قلبي

اجت سارة بنت خالتي وبيدها مكص

سارة .. لولة جيبي ايدج

...باوعت عليها خير شسوين بايدي ؟

سارة .. اريد الشريط يكولون البنية الممزوجة اذا اخذت من الشريط راح تزوج

ايلول... طيح الله حظج وانتي شكو مستعجلة على الصخام

سارة.. ترة عمري 22 سنة كبرت اريد ازوووووووج

ايلول...  لج نصي صوتج لايسمعوج

اجو باقي البنات للغرفة

سارة اخذت الشريط وكصكصتة قطع وانطت البان و اختها وسن كل وحدة قطعة وكالت الباقي انطي الصديقاتي

ايلول...  وسن وبان شنو انتوا هم تريدون تزوجون

بان.. لا عيني شسوي بالزواج خلي اكمل دراسة اول شي

وسن .. والله اذا اجاني واحد صاك مثل إياس اي اقبل

جان تجيها كفخة قوية على راسها خلتها تكمز من مكانها

أسماء .. لج وسن بعدها ريحة الحليب بحلكج ودورين صاكين وزواج

وسن .. بخوف لا لا جاي اشاقة شبيج

بعدنا نحجي وسمعنا صوت اسامة برا اول وحدة طلعت من الغرفة تركض هي البلبل الفتان

اني بقيت جامدة بمكاني لأن مبين صارت هوسة برا

ربع ساعة وجان يصير البيت هدوء

اجتني ماري
لج لولة صارت عركة بسببج

ايلول .. شنو شصار ؟

ماري تريد تحجي وجان تجي قدر اجر ماري من أذنها

قدر .. بعصبيه ماري اطلعي برا وحسابج وياي بعدين

أيلول.. دعوفيها تحجي هو البيت كلة سمع  قابل بس هي

قدر.. اني مو بس على هاي قبل شويه مسوية فتنة بين ادم و ريان ولكيت ادم نايم فوك ريان ومشبعة كتل حتى دم مطلع من حلكة

ايلول ..عزاااا بعينج ماري شسويتلهم

ماري.. مسويت شي هو ريان كسر رشاشة ادم
وسئلني منو كسرها كتلة ريان قابل تريدوني اكذب حتى الله يذبني بالنار

ايلول .. لا حشاج شلون تكذبين حرام بس اذا تفتنين عادي حلال

.. باوعت القدر شنو صار شبي اسامة الغراب

قدر ... خلي يولي يمعودة جاي سكران وبيدة المسدس ويتهدد يكول اليوم اكتلكم واكتل روحي شلون تنطون ايلول الواحد غيري

سيف وعيسى لزموا واخذو منه المسدس
ولج كعد يبجي مثل النسوان يكول احبها والله حرام عليكم

عيسى راد يضربة بابا مقبل

اخذة للحديقة انطة مي غسل وكعد بابا يحجي ويااا اخير  شي سكت وراح

ايلول.. خطية كسر خاطري بس اني الف مرة رفضته هو معندة كرامة مجلب بيه شسويلة

زين إياس من سمع كلام اسامة شكال

قدر .. مكال شي بقة ساكت بس مبين عليه ضاج

الليل راح إياس واخذ عيسى ويا

قدر هم راحت لان سيف عندة دوام

بس بقوا بيت خالتي فرشنا دنام

اجت اسماء سحبتني من ايدي واخذتني صعدنا للسطح

جان الجو حلو لان خريف والسما صافية وكلها نجوم وبس ضوء القمر عاكس على السطح

اكو قريولة قديمة كعدنا عليها

أسماء ... لولة طلعلي كل البگلبج لاتكتمين شي اعتبري نفسج كاعدة وحدج كدام مرآيتج

ايلول.. شبيج اسو شنو شحجي

اسماء .. ترة ادري بيج هواية ضامة بگلبج بس متكدرين اطلعينا كدام احد لج اني حافظتج اكثر من اسمي شنو نسيتي انتي صديقة الطفولة واني وياج رابين سوا

أيلول.. من سمعت اسو هيجي حجت انفجرت بالبجي

جنت احجي وابجي لج اسماء راح اموت محد يحس بيه ولج والله ما اريدة مطايقتة الناس عادي تنجبر على اكل متحبة على ملابس متريدها بس مو زواج هاي عشرة عمر شلون راح اكدر اعيش ويا بنفس البيت وبنفس الغرفة واني مطايقة وجودة

أسماء .. كوليلي لولة لان اعمى مدتتقبلي لو سبب ثاني

أيلول .. لا والله ابد مو لان اعمى هذا قضاء الله وقدرة بس ما أعرف شبيه لج  مجرد ينذكر اسمه اختنك
الكل يحسدني لان حالتة زينة عبالهم السعادة بالفلوس بس هذا الشي مو صح الفلوس 

اسماء .. لعد ليش قبلتي تتزوجي

ايلول .. انحطيت بموقف صعب شلون اكدر اتحمل اشوف اختي يضيع مستقبلها بسببي

تدرين من رفضت بابا زعل مني وميحجي وياي
بس كوليلي شلون راح اكدر اتحمل تأنيب الضمير واني اشوف اختي تأخذ واحد اكبر منها ب 20 سنة وتترك دراستها
يمكن الكل يشوفني جامدة ومعندي مشاعر متكبرة ومغرورة
بس اني مو هيج والله اني مو هيج  حضنت اسماء وبقيت ابجي بحركة گلب وهي تبجي وياي

اسماء .. سمعيني لولة انتي اكثر وحدة تعرفين وضعي اني ازوجت عن حب عاندت اهلي وكفت بوجهم وكلت اريدة

تالي شحصلت من هذا الحب بس الذل والاهانة منه ومن اهلة والله حسرة عليه الفلس ملابسي وملابس ابني واحتياجتنا كلها من اهلي

وياريت بس على هذا وخلص حتى ضرب يضربني واني مكصوص لساني وما اكدر احجي لان هذا اختياري

يشتغل ويصرف بس على نفسه  وعلى اهلة شيطلبون منه يجيبة الهم واني اذا طلبت منه شي  يكولي روحي الأهلج هما ينطوج

ابني يشوف اطفال حماية يشترون يجي يبجي يريد مني فلوس لج الف معندي انطي كل هذا واكول الحمدلله

اخير شي قبل يومين جان ديلعب بموبايلة بعدين عافة على ميز التواليت وراح للحمام اني بسرعة اخذتة قبل لا ينقفل الرمز وشفت بي صدمة عمري ديخوني علاقة بوحدة يمكن عمرها 16 سنة ومغركها بالهداية والفلوس

وهسة اني صار يومين زعلانة بيت اهلي

ايلول.. صافنة على كلامها وميتة قهر صدوك الي يشوف مصايب الناس تهون عليه مصيبته

بدت ماما تجهز العرسي وخواتي وياها معافوها اما اني عبالك الموضوع ولا يمي رافضة اطلع اجهز وياهم

أياس مقصر بشي دز مبلغ جبير حتى اشتري بي ذهب وملابس وباقي مستلزمات العرس
ماما راحت اشترتلي الذهب على ذوقها

اخذتلي طقم كامل شكلة يجنن بس ابد مفرحت بي

باقي المستلزمات جانت ماما يومية تروح تشتري شي وتأخذ ود وياها لان قياسي تقريبا نفس قياس ود

كلت الماما  ما اريد بدلة عرس بس بيومها ماما شبعت بجي  تكولي انتي تريدين تحركين گلبي مو جان هذا حلمج تلبسين احلى بدلة وتسوين احلى حفلة 
اعرف صعب نسوي حفلة مثل مجنتي تتمنين بس على الاقل خليني اشوفج بالبدلة البيضة لاتحرميني من هذا الشي

أيلول .. الخاطر ماما وافقت

بهاي الفترة عقدنا محكمة وإياس عندة معارف هواية كدر بسرعة يكمل اجراءات تحويل قطع الأرض

ماما كالت ابوج كال بعد العرس بفترة يلا نجي ننتقل يمكم

أيلول... لا ماما لازم قبل العرس تنقلون الغراض

ماما.. لا بنتي ميصير انتوا عرسان لأزم تاخذون راحتكم بعد العرس بشهر ننتقل

أيلول..  اني اذا ازوجت وانتوا بعدها بشهر انتقلتوا الناس راح تحجي عليه اشكال الكلام والاشاعات نسيتي جيرانة من يجون اول سؤال يسألوا هو ليش أيلول بعدها ممزوجة

اول وحده راح تحجي عليه هي مها وتشوه سمعتي

ماما بقت صافنة على كلامي

ود... خرب غيرتج ايلول شلون تفكير  والله اني لو ابقة الف سنة مراح افكر مثلج بس والله كلامج صح

ماما... ماشي يجي هيثم واحجي ويا

ايلول.. ماما كوليلة حتى لو هسه بس تنقلون الاغراض وتبقون فترة بيت قدر

ماما .. ماشي الله كريم

وافق بابا على اقتراحي وبدو ينقلون الاثاث

راحوا  ماما وخواتي حتى ينظفون البيت ويرتبوا ومن رجعوا جانوا مصدومين بجمال البيت طابقين
الطابق الارضي بي ثلاث غرف وأستقبال جبير  ومطبخ هم جبير هول داخلي يطل على الدرج والغرف
صحيات ومخزن

الطابق الثاني هم ثلاث غرف وهول وصحيات ومخزن
وحدة من الغرف بيها بلكونة تطل على الحديقة
اما الحديقة جانت تجنن رغم محد مهتم بيها بس متروسة اشجار من جميع الانواع حمضيات تين رمان تكي نبك وقمرية عنب جبيرة

إياس انطة الأهلي الطابق الأرضي وهو اختار الفوك

بعد انتقال اهلي البيت قدر اجه يوم الحنة.......