رواية المغرورة و الأعمى الفصل الثاني عشر 12 - بقلم بسمة البياتي

لمغرورة-و-الأعمى-
(بقلم بسمة البياتي )
- بارت الحادي عشر -

أيلول .. بيوم الحنة اخذتني ود للصالون وهناك استلموني حف صبغ مكياج رادت ام الصالون تسويلي تسريحة مقبلت عفت شعري نازل على طولة وخلتلي علية تاج ماروني بالون البدلة

لبست الفستان وباوعت على شكلي بالمرآيا كان شعري مصبوغ لون سلفر ملائم ويا بياض بشرتي
اما سواد عيوني وكبرها ويا الرسمة زايد عيوني جمال تلمست وجهي بيدي
وهمست بداخلي المنو كل هذا وهو اصلا مراح يشوفني

اجة عيسى رجعنا من دخلت للبيت تفاجئت بوجود اقاربنا كلهم نسوانهم وبناتهم
جانوا مزينين البيت ومسويلي كوشة ويمها كيكة جبيرة وصينة الحنة جان منظرها تحفة

من دخلت بدت الهلاهل والكل يصلي على النبي البنات شغلوا الديجي وكاموا يركصون

فرحت بهاي وكدرت اندمج وياهم ركصت ويا البنات وجانت هاي أحلى اللحظات عندي

قبل لايحنوني راحت سارة جابت كرسي خلتة وسط الأستقبال واجت سحبتني من أيدي

أيلول.. ولج هاي وين مأخذتني ؟

سارة .. تعالي اكعدي اهنا وخلي هذا الشال الاحمر على وجهج وابد لاتشيلي واحنا الممزوجات نجي نفتر داير مدايرج لان يكولون الممزوجة وراج راح تتزوج

أيلول ... ههههههههه خرب ببليسج اشكد متأثرة بالمسلسلات التركية

راحت سارة شغلت اغنية ليلة الحنة التركية وجمعت البنات الممزوجات واجت تفتر وتغني ويا الأغنية
واني من جوة الشال خربانة ضحك
كل شوية تجي ترفعة وتريدني ابجي

سارة .. الله عليج ايلول ابجي بس هلمرة مو راح اوغف على كلب أمي أريد ازوووووووووج

أيلول ... يبوووو هي تحجي واني اضحك يمكن هي بجت واني مبجيت

والحلوة مندمجين ويغنون ويا الأغنية وهما ولا يعرفون شنو معناها لو شنو كلماتها
هلكد مضحكت على سوالف سارة عيوني دمعت وهي الثوله فرحت عبالها بجيت فعلا تونست بيومها ...

خلصت الحفلة واقاربنا كل واحد رجع البيته لأن بيت قدر صغير وثاني شي احنا منسوي حفلة عرس فماكو داعي البقائهم بس خالتي منى وبناتها بقوا

اني والبنات فرشنا بغرفة ادومي وريان حتى انام جنت كولش تعبانة
تمددت بالفراش دانام اجت راما يمي سويتلها مكان ونومتها بحضني

سارة.. رمرم حبيبتي هذا اخر يوم الج تكدرين تنامين بي بحضن لولة

أيلول.. بصدمة شنو قصدج ولج

سارة ...قصدي شريف حضنج راح يصير ملك عمو إياس

أيلول... انجبي لج اشو صايرة ادبسسز ومتخجلين

سارة ... عشتو ومن شنو اخجل هو اكو أحلى من هيجي حضن احنا الحدايق النة الله

ايلول ... تعالي نبدل انتي صيري بمكاني واني مستعدة ابقة حديقة طول العمر

أسماء ... لولة مدتلاحظين خواتي طالعة عينهن ؟؟

ايلول .. اي والله هاي منى ملتهية بأبوج وناسية تربيهم

أسماء .. اي صح كلامج والله

أيلول .. يلا كافي سكتوا اريد انام

أسماء .. نامي خية نامي باجر وراج تعب وسهر

أيلول.. رفعت راسي من المخدة وباوعت عليها كتلها طلعتوا عيلة واطييييبة
غمضت عيني جان اسمع صوت خالتي

منى... ولج ايلول هاي على منو تحجين اني ملتهية وياعبدالله وناسية اربي بناتي

أيلول فتحت عيني مصدومة خررب هاي شلون سمعتني باوعت لكيت مكان ماري فارغ
يعني اشك هدومي وتالي ويا هاي البنية

ايلول..منوش شبيج جنت اشاقة ويا البنات ليش وين اكو مثل تربيتج فديتج خالتو

منى .. والله لو ما اكول عروسة جان سحلتج من هذا شعرج المتباهية بي

..لا لا كولشي ولا شعري سكتت بعد ما احجي طلعت خالتي

صحت بعلوا صوتي مااااااااااااااري وحق ربج اذا وصلتي الباب الغرفة اخلص عليج

ثاني يوم البنات بالكوة كعدوني حتى اسبح واتريك واروح للصالون

...هفففف والله نعسانة يعني ضروري لازم اروح صالون والبس بدلة

ود.. ايلول كومي وبدون كلام زايد

...اوك كمت وامري لله

اخذوني قدر و ود للصالون وكالعادة مكياج وتسريحة اني طلبت منها تسريحة بسيطة لان خفت لاينتفون شعري

ام الصالون ..ما شاء الله شنو هالجمال اليوم زوجج يتخبل من يشوفج

أيلول ... ابتسمتلها ومحجيت شي
اندريت على خواتي ييوووو لكيتهن طاكات بجي مشيت وصلت يمهم هاي شكو شبيكم ترة راح ازوج مراح امووت
حضنتهم ثنينهم سوا

اكو مرة صافنة علينا كالت شنو الدنيا صارت بالمكلوب جنت اعرف العروس تبجي وخواتها يسكتوها اشو انتوا بالعكس هي دتسكتكم وانتوا تبجون
ضحكنا على كلامها

رجعنا للبيت اول مشافتني ماما حضنتي وتبجي متحملت اشوف دموعها بجيت وياها

أيلول.. كافي بجي مياسة ترة اني باقية على قلبج تحلمين تخلصين مني

ماما .. وهي تمسح دموعها وتبتسم ربي يحفظج بنتي ويكتبلج السعادة وافرح بشوفة اطفالج

أيلول. بست ايدها ربي لايحرمني منج انتي وبابا
صدوك لعد وين بابا ؟

ماما... تعرفي ميحب هيجي مواقف حتى بعرس خواتج هم طلع قبل لايجون

كعدت شوية وبقيت اخذ ويا البنات صور
دخل أدم كال اجة عمو عيسى وعمو إياس

من كال هيج جسمي كلة بقة يرجف اريد اسيطر على نفسي ما أكدر

أجة إياس كعد يمي من التوتر حتى مباوعت عليه

كالوا يلا كوموا دنروح
ايلول.. بصراحة انقهرت على إياس من شفت عيسى اجة يساعدة حتى يروح للسيارة لان ممتعود على اماكن البيت ميكدر يمشي وحدة لايروح ينضرب بالحايط او الأغراض

عيسى هو جان يسوق سيارة إياس ود كعدت بالصدر يمه واني وإياس ليورا

وجانوا ماجرين سيارة ثانية صعدوا بيها ماما وخالتي والبنات

طول الطريق ساكتين لا اني احجي ولا هو رغم ود وعيسى أبد مسكتوا

دخلنة المنطقة كلش حلوة وكفت السيارة كدام بيت يجنن نزل عيسى حتى يفتح الباب ويدخل السيارة للكراج

ود ساعدتني انزل من السيارة لان البدلة جبيرة وضوجتني دخلتني للأستقبال جان إياس كاعد واني رحت كعدت بمكان ثاني اجوا ماما وخالتي كعدرا يمنا

البنات كل وحدة راحت المكان ديتفرجون على البيت

عيسى ... المصور فد ربع ساعة ويجي

أيلول.. همست بداخلي والله عندج سوالف يا مياسة هي مال صور

جاي ادردم بيني وبين نفسي رفعت راسي وجان اشهك وانصدم وبقيت اباوع الخالتي

أيلول... خالة راح اكولج شي بس لاتخافين
من حجيت هيج الكل اندار عليه

خالة ترة اكو ابو بريص فوك راسج على الحجاب

اني بس كلت ابو بريص اشو خالتي صارت تهز هجع تروح منا وتجي منا وتكمز صارت مثل بيب بيب خطية تريد تنزع الحجاب بس مخليتلة كوومة دنابيس وعاصي براسها

اني وماما متنا من الضحك البنات اجو على صوت كمزها
اخير شي عيسى اجة وخرة منها وكتلة بس شنو عيسى لازم بطنا من الضحك

وربي كلما أذكر منظرها اشبع ضحك هههههههه

خطية من فايتة من جوة قمرية العنب واكع عليها

أجة المصور والظاهر جان يعرف بحالة إياس الهذا بقة يساعدة باللقطات أخذنا هواية صور

بعد مخلصنة صور اجت ساعة الصفر
أخذوني قدر و ود واسماء للغرفة
جانت الغرفة تحفة

ساعدوني البنات نزعت البدلة وفكيت التسريحة انطوني سيت نوم ابيض بالبداية مقبلت البسة بعدين اذكرت هو وين راح يشوفة اخذة لبستة

اجت ماما وخالتي وبقوا يوصون بيه واني بس اهز براسي بالموافقة ودعوني وراحوا

انفتح الباب دخل أياس الظاهر متعلم على طريق الغرفة جان يمشي بخطوات بطيئ
وصل للسرير دنك تلمسة حتى يتأكد هو وصل يمه وكعد
فرك وجهة بيدة وكال

إياس ... أيلول

أيلول ... نعم

إياس ... تعالي كعدي اهنا وأشر على مكان بصفة

أيلول... من كالي تعالي متت من الخوف والتوتر مدري شبيه بالكوة رحت كعدت

إياس ... عندي سؤال واريد اجاوبيني بصراحة

أيلول .. اوك

إياس .. شنو بينج وبين أسامة ؟؟

أيلول.. بقيت مصدومه من كلامة هذا كل عقلة بهيجي يوم ديسئلني هذا السؤال
جاوبتة ماكو شي بينا

إياس .. بعصبية احجي ولاتكذبييييييين

أيلول ... فزيت من صوتة وبتعدت عنة بسرعة
كتلك ماكو شي بينا

إياس .. لج كافي تمثيل اذا جنتي تحبي ليش قبلتي تزوجيني مو جيت بنفسي وسئلتج اذا اكو احد ضاغط عليج كوليلي
بس الظاهر انتي عادي عندج تحبين واحد وتأخذين غيرة

أيلول.. كافي ما أسمحلك اني مخايفة منك حتى أكذب عليك واذا هو يحبني هاي مشكلتة مو مشكلتي

إياس..ههههههه طلعتي ممثلة بارعة مع الأسف انتي بنت أبو قدر هذا الرجال الطيب

أحب أكولج ترة أسامة قبل العرس بأربع أيام أجة عليه اهنا وطلب مني اعوفج لان انتي ويا تحبون بعض بس اهلج ميقبلون تأخذي وأبوج جبرج حتى تتزوجيني

أيلول .. إياس يحجي واني مصدومة حرف منطقت

إياس .. أشو سكتي والله لو ما أبوج وأكف بعيني جان نفس الدقيقة طلكتج بس الخاطرة سكتت وكملت هذا الزواج

من هاي اللحظة انتي محرمة عليه راح ابقيج على ذمتي فترة وبعدها انطيج حريتج وهذا الشي لا عبالج اسوي الخاطرج كل هذا الخاطر ابوج
من هاليوم انتي حالج حال اي ممرضة او مساعدة تقومين بكل واجباتج ماعدا شغلة وحدة ماكو فراش بيني وبينج لان مو إياس ياخذ وحدة گلبها يم غيرة

أيلول.. اوك واني موافقة

إياس .. غصبا عليج توافقين معندج حل ثاني

أيلول .. هواية استفزني بكلامة بس سكتت من كال انتي محرمة عليه بعد احسن اصلا اني مطايقتة وراح اتحمله الحد ميطلكني

إياس... من عرض عليه ابو قدر ازوج بنتة مكدرت ارفض وافقت بس طلبت اسمع موافقتها بنفسي لان ما اريد اظلمها وياي

حجيت وياها وبداخلي جنت اتمنى ترفض
بس انطتني جوابها موافقة

عرضت على أبو قدر يجون يعيشون ويانة لأن فعلا بهذا وضعي محتاج تكونلي عائلة وأعتبر نفسي واحد منهم

بالكوة وافق أبو قدر ومن هذا اليوم قررت أفتح صفحة جديدة بحياتي وأنسى الماضي وانطي البنية كل حقوقها لان هي مالها ذنب بتجاربي الفاشلة وحالي حال اي رجال تمنيت يصير عندي اطفال يشيلون اسمي ويسندوني من اكبر

بيوم العقد سمعت بصوت واحد يهدد ويكول اني احبها وراح اكتلكم واكتل نفسي

وسمعتة شلون يبجي بحرگة گلب

سكتت ومحجيت شي لكن الشك دخل گلبي
حاولت بيني وبين نفسي الگيلها الف عذر كلت يمكن هو يحبها وهي متريدة مثل مكالي عيسى

قبل العرس بكم يوم من اجة عليه واحد كال اني أسامة أخو عيسى

كعد يحجيلي عن حبه هو وأيلول
كال أبوها جبرها حتى تقبل بيك طلب مني أعوفها
اني متحملت كلامة وطردتة

وبقيت بين نارين اذا اتركها راح تخسر سمعتها
واذا كملت وياها راح اعيش طول عمري مخدوع
بس مجان عندي غير حل لأزم. اتمم الزواج الخاطر ابو قدر

عاتبت ربي ليش اني هذا حظي شنو الشي المسوي بحياتي وهيجي داتعاقب عليه لا عندي حظ باهل ولا حظ بزواج و لا بحب حتى نور عيوني اخذتة مني تعبت وهموم الدنيا كلها صارت على اكتافي وما اعرف الدنيا شضامتلي بعد..

يتبع........