رواية المغرورة و الأعمى الفصل الحادي والعشرون 21 - بقلم بسمة البياتي

المغرورة-و-الأعمى-
(بقلم بسمة   البياتي )
- بارت العشرون  -

أيلول.. كاعدة بالكاع ابجي واندب حظي وزجاج المرآيا داير مدايري بكل مكان

حجيت ويا نفسي اني المنو وليش عايشة معندي حظ بكولشي اشكد احاول اعيش حياة عادية يصير شي يخرب حياتي يمكن لو جان عندي طفل جان تحملت وصبرت علموده بس حتى هذا شي حرمتني منه ياربي

أخذت كزازة من الكاع وخليتها على وريدي غمضت عيني ردت انتحر خانتني شجاعتي مكدرت اسويها شمرت الكزازة بالكاع رجعت خليت رأسي بين رجلي وبقيت ابجي ما أعرف لشوكت بقيت على نفس كعدتي
اخير شي تعبت كمت تمددت على السرير
جنت ارجف مدري شبيه سحبت البطانية تغطيت واني بعدني أرجف صارت ساعة ستة صباحا

اندكت باب الغرفة لان جنت قافلتها
زادت الرجفة عندي احساسي يكولي هذا إياس

بقة الباب يندك واني جامدة بمكاني
شجعت نفسي وكمت فتحت قفل الباب ورجعت خطوة الورا

انفتح الباب وصار إياس كدامي جان شكلة يخوف من العصبية دخل للغرفة ورجع قفل الباب

جان كلما يتقدم خطوة اني ارجع لورا

إياس..ليش لونج مخطوف شنو انتي هم تخافين اي أيلول كوليلي منو هذا المأخذ راحتة ويا خواتج

ايلول.. لساني انشل اريد انطق حرف ما أكدر إياس الوحيد الأخاف منه من يتعصب

إياس.... صاح بصوت شبيج ساكتة جاوووووووووبي

أيلول .. فزيت وبتعدت عنه

إياس... يعني اني طلعت واحد ناقص وعديم شرف اباوع على خواتج موووووووو

ايلول... جاوبتة بصوت يرجف نصي صوتك اخاف أهلي يسمعون

إياس... خلي يسمعون
يمكن انتي حتى يم اهلج مطلعتني ناقص واني ما أدري

لج بس فهميني شنو شفتي عليه وهيجي حجيتي

أيلول... مجنت اقصد حجيت بساعة عصبيه

أياس...ليش اني شحجيت ويا اختج حتى تتعصبين سمعتيني اتغزل بيها لو شنووووووو

كافي ترة والله تعبتيني حرت شسوي وياج لو شلون ارضيج
شفتيني أحبج وما أكدر بدونج صرتي ادوسين عليه

تدرين ايلول اني جنت اعرف وحدة قبلج وجنت اضن نفسي اني احبها
بس من يوم العرفتج نسيت الدنيا كلها لج حبي الهذيج نقطة بحر حبي الج

تحملت منج هواية وسكتت مجنت اريد منج غير القليل ومكتفي
وانتي يوم بعد يوم وضعج يصير اسوء من قبل رغم هذا جنت انطيج الف عذر واكول عادي المهم هي موجودة بحياتي وجود ايلول يمي يسوى عندي الدنيا كلها

أيلول ...هو يحجي واني ابجي اخير شي قويت نفسي وجاوبت

انت على شنو هلكد متحملني لا اعذبك ولاتعذبني طلكني وخلي كل واحد يروح الحالة

من كلت كلمة طلكني إياس فتح عيني مصدوم اجة لزمني من زندي قووي

إياس... تريدين اطلكج لج احجي أكو غيري بالج وتريدين تتطلكين علمودة

أيلول... سحبت ايدي منه وصحت انت شبيك شنو غيرك شنو صخام ترة تعبت من شكك وغيرتك

اني ما اريدك ما أحبك من البداية جنت رافضتك بس الضروف جبرتني أخذك وعشت وياك لان جنت اشفق عليك طلكنييييييييي
جان يضربني رأشدي حسيت راسي فتر ومن قوة الضربة كعدت بالكاع ولازمة خدي

إياس... انتي طالك

أيلول ... من كال طالك بقيت مصدومة وهو هم مصدوم
هاي اني شسويت وشحجيت

فجأة فزيت اباوع إياس ديكسر بغراض الغرفة مبقة شي مكسرة
بهذيج الدقيقة حسيتة تخبل
ضرب مرآيا الكنتور بقبضة ايدة اباوع أيدة كامت تجري دم

أهلي يدكون بالباب بس يريدون نفتحة

إياس أخذ سويج سيارتة فتح الباب بدون ميحجي ولا كلمة ويا اهلي طلع بابا اشكد صاح ورا ابد مندار

أهلي يباعون للغرفة مصدومين يحجون وياي اني ولا اسمعهم
رفعت راسي شفت بان واكفة باوعت عليها بكل حقد هي واكفة تبجي

أجت ماما كومتني من الكاع تريد تنزلني جوة مقبلت رحت تمددت

بابا.. بنتي بس فهمينة شصاير

أيلول... اذا تحبون الله عوفوني وحدي غطيت راسي بالبطانية
جنت بحالة صدمة حتى دموعي بعد منزلت

بقيت جوة البطانية حسيت روحي بديت ادوخ وكانما رحت عالم ثاني ما ادري نمت او اغمى عليه ما أعرف الي اعرفة بقيت هواية على هاي الحالة

حسيت على لمسات أحد يلعب بشعري اي هاي حركة أياس المفضلة هو نقطة ضعفة شعري
فتحت عيني بسرعة واني فرحانة

باوعت هاي قدر مو إياس رجعت غمضت ودفنت وجهي بالمخدة

قدر... لولة ترة ساعة 3 كومي هواية نمتي اهلي خايفين عليج كل شوية يصعدون عبالهم بيج شي بس من يشوفوج نايمة ينزلون

أيلول... إياس وين

قدر .. والله ما أعرف ديتصلون عليه قافل موبايلة

أيلول... عفية أخاف بي شي ايده جانت تنزف

قدر .. اذا هلكد خايفة عليه وتحبي ليش تعاركتوا

أيلول... حطيت راسي بحضن قدر وصرت ابجي بصوت وشهكة

قدر أياس طلكني

سمعت شهكة قدر مال وحدة مصدومة

قدر... ولج شنو إياس طلكج احجي شصاير

أيلول... اني السبب أستفزيتة إياس ميستاهلني جنت احجي وأبجي

قدر... كافي بجي وفهميني شنو سبب المشكلة وبشنو استفزيتي

أيلول... فدوة لاتسئليني

قدر عافتني براحتي ملحت عليه اني بقيت بالفراش قدر نزلت جوة

عشر دقايق وجان تجي بان

بان... إياس صدوك طلكج جانت تحجي وتبجي

أيلول.. باوعت عليها واني لوبيدي اشرب من دمها
فرحااااااانة موووو اطلعي برا الله يلعنج انتي مو أخت انتي عدوة بحياتي مشفت وحدة بقذارتج وحقارتج

دخلت قدر للغرفة مستغربة أيلول شبيها بان وياج

أيلول.... رجاءا طلعيها ما أريد اشوفها كمت الطم ملخت نفسي
قدر اجت تركض لزمتني ثواني وفقدت الوعي

صحيت اباوع الكل يمي بابا ماما قدر ماري

بابا .. بخوف لبسوها شي فوك ملابسها خلي نأخذها للمستشفى

أيلول.. بابا حبيبي مبيه شي بس شوية دايخة

اجت ماما كعدت يمي وبقت تحجي وياي

ماما... بنتي لولة لاتنقهرين كلشي ينحل
ان شاء الله هاي المشاكل عادية وتصير بين اي ثنين مزوجين إياس من رمى عليج يمين الطلاك اكيد جان بحالة عصبيه ترة إياس يحبج وميكدر بدونج

اني جنت بس اسمع ماما واهز برأسي
كالت تعالي انزلي جوة يمنا مقبلت بقيت بفراشي
راحت ماما تسويلي اكل

بالكوة كمت من الفراش اخذت ملابس راحت اسبح

طلعت من الحمام دخلت للغرفة جانوا جايبيلي الأكل وبس قدر موجودة بالغرفة

قدر .. يلا تعالي اكلي شوية

أيلول.. محجيت شي وجيت كعدت يمها وأكلت شوية لان اذا ما أكل مراح يعوفوني بحالي
من خلصت حجت قدر

قدر.. ايلول ليش محجيتلي على السوتة بان ؟

أيلول... اذكرت هي سمعتني اتعارك ويا بان بس مجنا نحجي شي واضح

أنتي منو كالج ؟

قدر ... من تعاركتي وياها نزلت استفسرت منها وهي حجتلي

أيلول... هه اي مفتخرة بنفسها وتعترف

قدر .. ايلول جاوبي ليش محجيتلي

ايلول... انتي عصبية وحامل خفت عليج

قدر ... لا انتي غلطتي جان لأزم تكوليلي واني اتصرف
ثاني شي إياس شعلية هيج تسووين بي هو شنو ذنبة بصراحة ايلول انتي الغلطانة

أيلول.. والله أعرف اني الغلطانة بس صيري بمكاني لو تعرفين اختج تحب زوجج الاسامح الله شسوين واحنا عايشين بيت واحد وهو كدامها
ولج والله حتى اعصابي تعبت

قدر ... اعرف الموقف صعب وانتي حقج بس هاي المشكلة الصارت مألها اي داعي على العموم  الصار صار بعد الله يصلح بينكم

أيلول .. معرفتوا شي عن إياس؟

قدر... لا والله يمكن مسافر الأهله

أيلول.. فدوة من تعرفين شي كوليلي

ساعة ثمانية المغرب اجتني قدر

قدر .. لولة ابشرج إياس رايح للمعرض
وعيسى بالكوة قانعة حتى يأخذة ويا البيتة

أيلول... تنفست براحة الحمدلله هو بخير
بس بقيت حابسة نفسي بغرفتي الثاني يوم

الصبح اجتي ود البيتنا صعدت يمي جانت ضايجة حجت وياي شوية حسيتها تريد تحجي شي بس مرتبكة

أيلول.. ود شبيج إياس بي شي ؟

ود .. لا الحمدلله مبي شي بس إياس طلب مني اجيبلة ملابسة وجواز السفر

أيلول... شنووووووو ليش

ود... يريد يسافر التركيا يم صديقة

أيلول... بهاي اللحظة عرفت اني فعلا خسرت إياس بس شبيه ليش هذا الوجع بقلبي مو اني مجنت اريدة مو اني طلبت منه يطلكني لعد ليش احس روحي تريد تطلع
فززني من شرودي صوت ود

ود ... لولة قلبي لاضوجين اكيد كم يوم ويرجع
والله لو تشوفين حالتة البارحة شلون مكسور وضايج

كومي ساعديني نحظر جنطتة

أيلول... حجيت واني عيوني متروسة دموع معليه اني هذا الكنتور كدامج شوفي شيريد اخذيلة عفتها وطلعت للبلكونة

إياس صارلة شهر مسافر واني من السيء للأسواء الأشتياق دمرني من فقدتة يلا حسيت بقيمتة

بان كم مرة حاولت تحجي وياي منعتها وصرت اصلا ما ألتقي بيها

خواتي قاطعوها حتى ماري متحجي وياها صارت مثل المنبوذة

اجة بابا من المعرض جان ضايج

مياسة .. شبيك هيثم ليش راجع من وكت

هيثم ... أم إياس انطتج عمرها وخطية إياس ملحك يشوفها من مخابرين عليه جانت بلحظاتها الأخيرة

مياسة .. الله يرحمها الله يساعد إياس ويصبرة

هيثم ..باجر اتحظري نروح وشوفي منو من البنات تجي
باوع عليه بابا ايلول تعالي ويانة عيب اذا مرحتي

أيلول... لا بابا ما أكدر لاتنسى إياس مطلكني وجودي اهناك ماله اي معنى

عفتة وطلعت للحديقة كعدت بالمرجوحة

أنقهرت على إياس صارلة شهر مشايفها ماتت وهو بعيد عنها واني السبب بهذا الشي

إياس سافر بسببي هسه اكيد حاقد عليه اكثر من قبل
صح مشتاقتلة بس ما أكدر اروح للفاتحة وأشوفة لان مراح يتقبل وجودي

سافروا بابا وماما وعيسى وسيف وود

قدر مكدرت تروح لأن حامل اجت بقت يمنا

باليل اتصلت على ود اريد اسئلها على وضع إياس

أيلول.. ود الله عليج كوليلي إياس شلونة

ود.. ولج متخبل على أمه لان حتى بدفنتها مكدر يحظر ملاكي حجز قريب

ايلول.. الله يصبره
ود ممكن طلب

ود.. طلبي لولة

أيلول.. أخذيلة صورة بدون ميدري

ود.. خرب عقلج واني وين راح اشوفه هو بس مرة شفتة من اخذت من خاطره
هو كاعد ويا الزلم وبيتهم ازدحام

اهل إياس كلها سئلوا عليج يكولون ليش مجتي
يمكن ميدرون بالمشكلة البينج وبين إياس

أيلول.. وانتوا شكتولهم

ود.. معرفنا شنجاوب بس ماما كالت أيلول مريضة مكدرت تجي
مبين عليهم مصدكوا لان بقوا بس يتبسبسون

أيلول .. هم اكو بنات هوايه اهناك

ود ... ههههه شنو بدت الغيرة والله يا أختي ما أكدر اكذب عليج البيت متروس من جميع الأشكال والأعمار والأصناف

أيلول... كافي سكتي ولي راح اسد الخط لو ادري ماسئلتج بس باقي توصفيهن الي

ود... عابتلج واني ردت اسويلج عمل انساني واخلي عيسى ياخذ صورة للحب وادزها الج

أيلول .. ممممم خوش فكرة بس مو يروح عيسى يكوله

ود... دنجبي شيكولة ليش إياس بيا حال حتى واحد يطلب منه صورة

سديتة من ود صعدت انام بعد ساعة وصلتني صورتة

فتحتها وبقيت أباوع عليه خررب رغم حزين بس صاير يجنن متت من الغيرة

إياس من طلع أربعين امه هم رجع سافر وهسه صارلة اهناك اكثر من خمس أشهر
متت من اشتياقي وغيرتي عليه

جيت حجيت ويا بابا

أيلول.. بابا اريد اتوظف لو اكمل دراسة روحي طكت من كعدت البيت 

بابا... بنتي شلون يصير تطلعين من البيت وزوجج مموجود لازم اول شي  هو يوافق

أيلول.. على شنو يوافق هو طلكني بعد معليه بيه هو هناك عايش حياتة ومتونس واني اهنا محبوسة اذا اريد اتنفس لأزم أخذ موافقتة

بابا... إياس ممطلكج بشكل رسمي يعني تبقين كدام المجتمع والقانون زوجتة

واني الخاطرج راح اتصل عليه واحجي ويا بالموضوع ان شاء يصير خير

أيلول .. ثاني يوم اجه بابا كالي خابرت إياس ميقبل يكول هسه عندة شغل اهناك من يخلصة يجي للعراق يطلكج بالمحكمة  وبعدها سوي اليعجبج

من سمعت كلام بابا حيل مظل بيه بالكوة كدرت ابقة متماسكة كدامة

بسرعة صعدت فوك السطح بقيت افتر مثل المخبلة
يعني هاهيه إياس راح يطلكني بشكل قانوني
اذا جان عندي امل واحد بالمية ممكن يرجعلي هذا الأمل راح

إياس ... نساني وللأبد ......

الأغنية توصف حال إياس
يتبع ...