رواية المغرورة و الأعمى الفصل الثالث عشر 13 - بقلم بسمة البياتي

لمغرورة-و-الأعمى-
(بقلم بسمة البياتي )
- بارت الثاني عشر  -

أيلول ...بعد الكلام  الكالة إياس انبنت حواجز  بينا بقيت أباوع عليه وهو ديحاول بعصبية ينزع ملابسة  والشرار يطلع من عينة يمكن لو يكدر يشوفني جان موتني
فزيت من سمعتة يصيح علية

إياس ... طلعيلي ملابس بسرعة

أيلول .. ماشي

نزع ملابسة وبقة بالشورت درت وجهي منه

اكو عصا قريبة من الجرباية الظاهر هو مخليها لان يندل مكانها أخذها وطلع

طلعتلة ملابس وخليتهم على الجرباية

بقيت افتر واتفرج على الغرفة رحت فتحت شوية من البردة جان اكو باب زجاج يطل على البلكونة باوعت من الجام منظر البلكونة رهيب واحلى شي الأشجار مظللة عليها سديت البردة ورجعت افتر بالغرفة فتحت الكنتور شفت ملابسه الوانة اكثرها غوامق بس بصراحة مبين علية جدا ذواق

على ميز التواليت انواع العطور كلها ماركة

انفتح باب الغرفة دخل إياس بس بالمنشفة من شفتة بهذا المنظر خجلت منه وجهي صار طماطة

راح يم الجرباية بقة يتلمس يدور ملابسة
لكاهم وكعد يريد يلبس لزم التيشيرت وبقة محتار يمكن يخاف يلبسة بالمگلوب كسر خاطري تقدمت عليه حتى اساعدة رغم جنت خايفة منه
بدون ما أحجي اي كلمة اخذت التيشرت من ايدة
هو فز ورفع راسة بس محجة شي ساعدتة يلبسة عدلت باقي ملابسة ونطيتهم اله لان الوضع جديد عليه ما اكدر اني البسة الباقي
اخذهم مني واني درت راسي

إياس ..  من حجيت وياها جنت صاير اعصاب رحت سبحت بلكي شوية تبرد نار گلبي

طلعت من الغرفة جنت حافظ اماكن البيت عيسى ممقصر وياي علمني على جميع الأماكن حتى الحمام دلاني كلشي بي
واني اخذت عصا حتى اكدر امشي بدون ما انضرب بشي

من رجعت للغرفة حاولت البس ملابسي بوحدي بس مكدرت وكرامتي متسمحلي اصيحها
أجت أخذتة من ايدي سادعدتني البسه
من جانت قريبة مني صح متعصب منها بس من ايدها لمسة جسمي ما اعرف ليش تأثرت بس قاومت نفسي

إياس .. وين راح تنامين ؟؟

أيلول.. انت نام على الجرباية واني افرش بالكاع

إياس .. لا انتي تعالي اهنا واني فرشيلي بالكاع

أيلول ..  عادي عندي ماكو اي فرق اني اريد انام بالكاع

اجيبلك عشى تتعشى ؟

إياس ... لا ما أريد

أيلول .. مو عندك علاج لأزم تأخذة

إياس ... كتلج ما أررررررررريد

أيلول .. اوك براحتك لاتصيح

اني هم رحت سبحت من خلصت دورت فراش  فراشتا ونمت جنت ميتة من التعب والنعاس

ثاني يوم ... فزيت على صوت قدر دتكعدني  فتحت عيني بالكوة
شفت قدر واكفة يم راسي
رفعت راسي ادور إياس ملكيتة جانت ود كاعدة على الجرباية

ابلوع على خواتي  بعيونهم الف سؤال يبوووو شراح يخلصني من تحقيقهم رجعت دفنت راسي بالمخدة

قدر ... كافي نوم ساعة عشرة ونص كومي كوليلي ليش نايمة اهنا ؟

أيلول .. لعد وين انام؟

قدر ... ايلوووووول لاتغشمين نفسج جاوبي عدل

أيلول .. شجاوب شبيج غير نايمة بغرفتي قابل نايمة بالشارع

قدر... بنفاذ صبر اللهم طولج ياروح أيلول لاتخليني اروح اصيح ماما هي تتفاهم وياج

ايلول ... وخرت البطانية وكمت جان تشهك ود

ود ... لج ايلول اكو وحدة بصباحية عرسها نايمة وهي لابسة بجامة

أيلول ... رحت كعدت يم ود
هاي شبيكم كل شوية طالعين بسالفة ليش نايمة بالكاع ليش لابسة بجامة اشو دتحسسوني العروس الها طقوس خاصة

قدر... ايلول لاظلين تلفين ودورين احجيلنا شصار البارحة ؟

أيلول.. جريت نفس اعرف مراح يعوفوني اذا ما احجي
..مصار شي مثل مدتشوفون

ود... عزااااا لولة بس لا مخليتي الرجال يتقرب منج

قدر ... بعصبيه عايزة تمنعة  مو هو مأخذها ع سواد عيونها

أيلول... ممنعتة هو مراد شنو تريدون اتوسل بي حتى يأخذني

قدر .. شنو هو مراد لج اكو رجال على الكرة الأرضية بيوم عرسة يكول المرتة ما أريد

قدر ... عزاااا بس لا متأذي بالحادث وميكدر

أيلول.. اني صافنة على خواتي وحدة تسئل والثانية جاوب بكيفها

هوب هوب هاي وين رحتوا اشو كمتوا تحللون بكيفكم ترة ماكو شي من هذا البالكم اصلا هو مطخني حتى يكدر او ميكدر

قدر .. ايلول ترة فتيتي مرارتي احجي مبقة عندي صبر

ايلول.. هو نفسة جازة مني عبالة احب اسامة

ود لطمت على خدها عزاااا وانتي ليش مفهمتي

ايلول ... حاولت افهمة بس رفض يسمعني كالي انتي محرمة عليه نبقة فترة وطلكج

قدر ... اليوم اكلب الدنيا عليه شنو بنات الناس لعبة

ايلول.. لزمت ايدها بداعت ادم لاتحجين شي اني من البداية مردت هذا الزواج وانتو اذا
حجيتوا راح يتقربلي غصبا عنه وبهاي الطريقة راح ترخصوني

قدر... واهلج شلون شراح انكوللهم

ايلول ..اي شي كولولهم بس المهم ميدخلون بيني وبينا الله عليكم ساعدوني فدوة

نزلت جوة شفت ماما جايبة الريوك شافتني بوستني بس مبينة ضايجة البنات كايللها

إياس جان متريك ويا عيسى

كعدت تريكت وياهم ومياسة كل شويه خازرتني طلعت الريوك زقنبوت من خشمي

أيلول. كافي مياسة خلي اتريك ترة حتى عشى ممتعشية

ماما.. ومتأكلين احد لأزمج ؟

ايلول .. دشوفي وجهج كل شوية منطيتني نظرة قاتلة هاي لو هيثم كدامج جان بس وزعتي ابتسامات

ماما ... ايلون سدي حلكج واشتري سكوتي احسنلج

ايلول.. خليت ايدي على حلكي اوك سكتت

خلصنا ريوك ماما خطية حتى غدة جايبتلنا

أيلول... فدوة ماما شوكت راح تجون

ماما .. هو هاليومين راح نجي قابل انتوا عرسان ونعوفكم براحتكم

ايلول .. مياسة يمكن دتقصفني

سالت ود هاي شكايلين  الماما اشو تريد تفترسني

ود ...هههههه قدر كالت كالتلها ايلول متفقة ويا إياس فترة وتطلك منه لان هي مجبورة على الزواج

أيلول .. بصدمة لادتتشاقين

ود ... اي بربي هيجي كالت وامج رادت تصعد تسحلج بالكوة لازميها

ايلول ... عزااااااا هاي شبيها قدر بلة هاي سوايه تسوتها

ود... ههههههههه صوجج انتي طلبتي مساعدة قدر بس للأمانة قنعت امج متدخل بينكم لا هي ولا بابا

ايلول... بس شنو الفايدة طلعت الصوج بيه وهسه ماما اكيد  راح تحجي البابا

يومين وأجو أهلي يمنا ومثل متوقعت بابا زعلان مني بس بمرور الأيام صار شوية احسن

بابا نقل مدارس البنات المنطقتنا الجديدة لان بدة الدوام
صح المدارس شوية بعيدة بس احسن بهواية من مدراسهم القديمة وشتركلهم  بخط يوديهم ويجيبهم

اني تعودت على وجود إياس وياي بالغرفة رغم الكلام قليل بينا على كد السؤال والجواب وصرت اساعدة بكولشي

إياس .. اجوي بيت ابو قدر يمنا فعلا ارتاحيت الوجودهم لان مجنت اريد ابقة وحدي ويا ايلول مهما يكون اني رجال وهي حلالي  خصوصا هي تساعدني بكلشي ويصير تلامس بينا مجنت اريد اضعف كدامها

حبيت الجو العائلي تقربت من عائلتهم صارت ميانة قوية بيني وبين بناتهم  بس جانت عندي مشكلة وحدة اصوات البنات كلش متشابهة ههههههه لازم أسئل منو انتي يلا أحجي حتى الاطفال حبيتهم

جنت اضوج من كعدت البيت ابو قدر حس بيه وصار ياخذني ويا للمعرض
بالبداية جان صعب عليه الناس تشوفني بهاي الحالة ما احب احد يشفق عليه لكن بعدين تعودت صرت اتقبل وضعي

بقت علاقتي بأيلول مثل ما هي بس بداخلي صرت افكر بيها اتمنى اشوف شكلها
من جان يجي طاري اسامة النار تصعد الراسي
اني من قبل طبعي غيور
صرت استغرب نفسي ليش هلكد اغار من اسامة معقولة اني بديت أميل الوحدة مشايف شكلها معقولة كلبي المغلق من سنين بدة ينفتح جانت هاي الأسئلة دوم محيرتني

ايلول .. جنت بالغرفة واكفة كدام المرآيا امشط
جان وقت عصر إياس مموجود رايح ويا بابا للمعرض

سمعت صوت ريان ديلعب قريب من غرفتي طلعت من الغرفة دانزل على الدرج وصلت النص الدرج جان يفوت شي من كدامي اسود و الوجه ابيض فزيت دارجع ليورة ألتوت رجلي ونزلت ادحرج على الدرج مثل الطوبة
والثقل مالتي صار على معصم ايدي

بقيت اعيط من وجع ايدي
ماري ذبت القناع من وجهة ونزعت العباية واجتني تركض

ماري .. وهي تبجي والله موقصدي اخوفج ريان خوفني واني هم ردت اخوفة

اجتني ماما وقدر كوموني من الكاع واني مفرفحة من وجع ايدي

قدر من شافت العباية والقناع بالكاع عبالها ريان هجمت عليه كتلتة

ريان .. يبجي وبكوللها والله مو اني هاي البلبل خوافتها

..اشكد جنت متوجعة وروحي مفرفحة ضحكت من كال بلبل ههههه حتى الاطفال تعلموا يسموها بلبل

ماري هم حصلتها كفخة من قدر

بقيت للمغرب الوب من وجع ايدي اخير شي متحملت بقيت ابجي

ماما كلما تريد تتصل على بابا امنعها لان اخاف يجي ياخذني للمستشفى

اجة سيف دياخذ قدر من شاف ايدي جبروني هو وقدر حتى اروح للمستشفى

اخذنا سيف اني وقدر
وصلنا للمستشفى فحصوا ايدي وسولها اشاعة طلع عندي  فطر بعظم الرسغ ولازم يجبسون ايدي

يبوووووو من جبسوها وسحبوها حتى تتعدل متت من الوجع
الحمد لله جانت ايدي اليسار مو اليمين

رجعنا للبيت واني مسطورة لان ضربوني ابرة مهدء حتى تسكن الألم 

دخلت للبيت بابا وماما وإياس جانوا كاعدين 

بابا ...اجة عليه بسرعة هاي شبيها أيدج حضني ويبوس بيه

إياس من سمع بابا كال هاي شبيها ايدج بسرعة دار راسة على مكان الصوت يترقب شراح اجاوب جان مبين عليه خايف عليه

اجتي ماما هم تبوس بيه يبووو عبالك جاية من الحج
كعدوني بوسطهم ويحيرون شيسولي عبالك طفلة عمرها سنتين

سيف... لاتخافون مبيها شي طلع عدها فطر بعظم الرسغ ان شاء الله على العلاج يصير زين

سيف يحجي بشقة الحمدلله هلمرة ابني براءة من وكعت المغرورة لو هو موكعها شجان خلصنا من لسانها

...باوعت على إياس ساكت ميحجي شي بس شكلة متعصب

بابا ... بس لو اعرف هاي ماريا شوكت تعقل حاطة عقلها بعقل الجهال منا وجاي راح استخدم الضرب وياها

أيلول .. والله يا هيثم هذا كلة صوج مياسة هوايه منطيتها عين من نحجي وياها متقبل تكول هاي اختكم الصغيرة

ماما... مو هيثم ومياسة جهالج الصغار حتى بهاي حالتج لسانج متبري منج

ايلول... فدوة الهيثم ومياسة اموت عليكم
يلا جيبلي فراش اريد انام مابيه حيل اصعد فوك

بصراحة خفت اصعد شكل إياس متعصب ههههه

كعدت من النوم تقريبا ساعة عشرة
ايدي شوية توجع ماما صبتلي عشى بالكوة اكلت من الوجع نفسي مسدودة
من خلصت جابتلي كلاص حليب ييييع اموت منه
وبالعركة والصياح يلا شربتة واخذت علاجي

الكل راحوا الغرفهم ناموا
جان لازم اصعد فوك دعيت بقلبي بلكي يكون إياس نايم

صعدت على اطراف اصابيعي فتحت باب الغرفة على كيفي حتى لايحس اول مدخلت سدت الباب انداريت جان اشوفة رافع راسة خرررررب حظي

مشيت عادي داروح افرش فراشي

إياس.. الحمد لله على سلامتج ست أيلول

أيلول.. من كال ست ايلول بلعت ريكي الله يستر
..الله يسلمك

إياس .. اي شخبار أيدج

ايلول .. الحمد لله احسن

إياس .. سمعيني زين بعد لو توصلين للموت مطلعين بدون علمي مفهوم ؟؟

أيلول.. اوك مفهوم

أياس .. وثاني شي هذا شقاج الزايد ويا سيف وعيسى بطلي لان اذا تكرر صدكيني مراح ارحمج

أيلول.. جنت واكفة اباوع عليه بصدمة هذا شديخربط
حجيت بنترة انت اشدتحجي هذولة مثل اخواني سيف ابن خالي وعيسى صديقنا من الطفولة

إياس ... هذا الكلام ميمشي عندي الي اكولة يتنفذ وممنوع تناقشيني بي

أيلول .. اوك اكو أوامر ثانية ؟

إياس... لا بس قلة ادب ويا اهلج بطليها

أيلول... ونبي شوية والزم هاي العصا البصفة واكسرها عليه متت من القهر من كلامة

اريد احجي وأتعارك اشو هذا تغطة ونام...

مر شهر أيدي صارت زينة وكدرت افتح الجبس منها
خلال هذا الشهر جانت حياتي عادية رغم وجع ايدي جنت اساعد إياس لان هو يستحي يطلب شي من أهلي

الصبح جنت كاعدة اتريك اجت ماما كالت اليوم خطوبة أسامة

أيلول.. ليش شوكت خطب ؟

ماما... هو اليوم هم مشية زلم وعقد وحفلة خطوبة

أيلول... هههههه خرب هذا شبي مستعجل كلهن بيوم واحد على العموم والله فرحتلة الله يسعده

ماما ... امين يارب.
تجين ويانة ؟

أيلول ... لا ما أكدر خطية خلي ناسيني

ماما ... اي احسن اني هم ما أريدج تروحين وجنت اخاف اذا اكولج لاتجين تزعلين

أيلول... لا شزعل هو اني اريد اخلص منه

كاعدين على الغدة

بان... لولة صدوك مراح تجين ويانة على الخطوبة

أيلول... لا ما أكدر

بان ..  لا لولة الله عليج تعالي ويانة

ماما... كافي بان لاتلحين

للعصر اهلي كلهم راحوا بس اني وإياس بقينا بالبيت

صعدت فوك رحت سبحت دخلت للغرفة لابسة البرنص جان إياس متمدد على الجرباية

رحت للكنتور داطلع ملابس لان متعودة عادي ابدل بالغرفة

إياس ... أيلول تعالي كعدي اهنا اشرلي على مكان بصفة على السرير

أيلول.. اوك بس دقيقة استحيت اكولة اريد البس ملابسي

إياس ... شنو مسمعتي شكلت داكولج تعالي

أيلول... لفيت نفسي بالبرنص زين وكعدت يمة بطارف السرير و هو متمدد

تلمس ايدي وجرني من ذرعي قووي وسحبني قريب عليه
حجة وهو صاك على أسنانة

إياس ... ليش مقبلتي تروحين للخطوبة متتحملين تشوفين حبيب الكلب مأخذ غيرج

إيلول ... حاولت ادفع أيدة واكوم لان كلامة ضوجني
اني شعليه بي يخطب يزوج الله يسعده

إياس ...  مقهورة مو متتحملين تشوفينا ويا وحدة ثانية الهدرجة تحبييييي

أيلول ... كافي ترة مصختها من البداية كتلك مبينا شي بس انت كذبت الكذبة وصدكتها مو مشكلتي اذا عقلك المريض يخليك تشك بيه المهم اني واثقة من نفسي

اني حجيت هيج لو هذا صار وحش سحبني بكل قوتة صرت فوكاه بحركة سريعة قلبني الوسط الجرباية وصار هو فوكاية
احاول ادفعة ولايزحزح عبالك صبة نايمة عليه  بقة يتلمس بجسمي خفت لايفتح البرنص واني ملابسة شي دفعتة قوووي اشو هذا هجم عليه .........

يتبع....