رواية المغرورة و الأعمى الفصل الثالث والعشرون 23 - بقلم بسمة البياتي

المغرورة-و-الأعمى-
(بقلم بسمة   البياتي )
- بارت الثاني العشرون -

أيلول... الدنيا ظهر  بابا وماما راحوا نامو واني وماري كاعدات بالهول وبان بغرفتها

جان يندك جرس الباب طلعت ماري تشوف منو

ثواني وسمعت صوت صياح بالحوش بسرعة طلعت أشوف منو

جان تصير كدامي مها وزوجة أسامة سجى اشو هذن من شافني استلمني صياح وغلط

مها ... الله لاينطيج ام الزلم هجامت البيوت تريدين تهجمين بيت اخوية

سجى ... اليوم افضحج بين الناس ياساقطة يا كح....

اني من سمعتهن هيجي كالن عيوني صعدت الكصتي

هستوني اريد اهد عليهن سمعت صوت بابا
صاح بيه أيلول فوتي جوة

مها وسجى من شافن بابا انخرسن

بابا... فوتوا جوة اريد افتهم شكو

دخلوا للاستقبال

بابا... يلا فهموني شنو السالفة وشنو هذا الغلط السمعتة

مها.. عمو ترضاها بنتك أيلول تهجم بيت أخوي

بابا... بتعجب شلون تهجم بيته؟

مها...عدها علاقة ويااا

أيلول... من سمعتها هيجي كالت انجنيت
اريد احجي سبقتني ماما

ماما... احترمي نفسج وسدي حلكج بنتي تاج راسج

بابا... مياسة سكتي خلي يكملون كلامهم للأخير

مها... احجي سجى ليش ساكتة

سجى ... عمو اني البارحة فتشت موبايل زوجي ولكيت بي صورة بنتك هاك شوفها
انطت الموبايل البابا

أيلول... بابا وربي كذب اني من جان بعده ممزوج ما اطيقة يعني معقولة اجي هسه بعد ماهو ازوج وصارلة طفل واني هم مزوجة اسوي علاقة ويا

بابا جان ديباوع بتركيز على الصورة

بابا... اشرلي اسكت

أيلول... اختنكت معقولة بابا صدك كلامهم ويشك بيه

بابا.. ماريا روحي جيبي تلفوني

مها .. عمو لاتكبر السالفة احنا جينا ننطيك علم حتى انت توكفها عد حدها وخلص

بابا مهتم الكلامها اخذ الموبايل من ماريا واتصل على عيسى

بابا... عيسى اريدك هسه تجيني للبيت وتتصل باسامة هم يجي

ماكو شي من تجون راح تعرف

مها وسجى لونهم انخطف

سجى ... عمو فدوة لاتكول شي الاسامة والله اذا عرف يطلكني

بابا.. ومن شنو خايفة انتوا مو اصحاب حق وجيتوا بهل ظهرية تتعاركون وصياحكم سمعة سابع جار وتهمتوا بنتي بشرفها ليش عبالكم هذا الأتهام سهل وراح اخلي الموضوع يعدي بسهولة

نص ساعة مها وسجى يتوسلون بابا حتى لايحجي شي

اجوي عيسى واسامة و ود

من شافوا مها وسجى انصدموا

بابا.. أسامة صورة أيلول شسوي بموبايلك

أسامة انخطف لونة وميعرف شيحجي

أسامة ... عمي راح احجيلك والله شاهد على كل كلمة اكولها هاي الصورة قديمة عندي من قبل لا ايلول تزوج اني اخذتها من موبايل ود بدون متعرف

بس والله من هي ازوجت اني شلتها من بالي
وهاي الصورة يشهد الله ناسيها جنت

ود اخذت الموبايل من بابا شافت الصورة

ود.. بابا فعلا هاي الصورة عندي اني اخذتها الأيلول وراما وحتى شوف الصورة مقصوصة

بابا... لعد شنو هذا كلام مرتك واختك اجوي فضحونا بهل ظهرية غلط ومسبة يكولون ايلول عدها علاقة بيك

اتسعت عيون أسامة

أسامة ... وداعة ابني ماكو هيج حجي ايلول اشرف من الشرف

بابا... اني راح اسكت مو الخاطرك لو الخاطر مرتك واختك بس عيسى واكف بعيني
من اليوم ديربالك اشوفك  كدامي حتى لو بالصدفة 

عيسى مدنك رأسة ويحرك برجلة من العصبيه

عيسى ... عمي والله ما اعرف شلون اعتذر منك ومن أيلول

أسامة اشكد حاول يتعذر بس بابا منطة مجال
أخذ مرتة وطلع وأسمع صوت صياحة عليها بالحوش

وعيسى هم أخذ مها الله يستر شراح يسوي بيها بس والله تستاهل

كمت داصعد الغرفتي صاحني بابا وأجه وكف كبالي وحضني

بابا... تدرين ليش ردت منج تسكتين من حجيتي لان مردت تبرريلي شي اني مجان عندي شك بيج لو واحد بالمية

أيلول.. فدوة اروحلك بابا حبيبي

ود كالتلي اسامة مشبع مرتة كتل ودازها الأهلها

وعيسى هم كاتل مها مدميها وهسه راح يزوجوها حتى يخلصون من مشاكلها

اكو واحد كرايبهم مطلق وعندة بنات اثنين رايدها وعيسى موافق عليه

صار أسبوعين من راسلني إياس وكال انتظريني اجي اطلكج

اعرف بي يومية يتواصل ويا بابا علمود الشغل
بس أبد ميفتح موضوعي ولا يكول شوكت يجي

اليوم ود وقدر يمنا اني بس من انجمع ويا خواتي واطفالهم شوية اغير جوو واضحك

باليل جنت بغرفتي ويا ادم وريان وراما جنت مكعدتهم يمي ويأخذ وياهم سيلفي

اجوي البنات يمي

قدر ... اليوم نتعلل بغرفتج

ود... لج شوفي هو شباقي بالغرفة عبالك طاكة بيها مفخخة ممبقين شي ممكسري

قدر... يلا فدوة الهم من يرجع إياس يجيبلها احلى منها ما شاء الله بالمعرض عندة غرف اجنن

أيلول... هه البيني وبين إياس انتهى هو بس يجي يطلكني

ود... لولة عدنا موضوع وياج
  صح انتي اختي واحبج بس الي سويتي بإياس حتى الله ميقبلة
ماكو رجال يتحمل الي اتحملة إياس منج

أيلول... أعرف وكتلكم ادري بنفسي اني غلطانة

لهذا فدوة سدوا الموضوع

قدر... لا منسدا ترة ندري بيج تحبي وتموتين عليه بس كبريائج ميخليج تعترفين بهذا شي
لولة ترة ماكو كرامة بين الزوج وزوجتة

اذا كل اثنين مزوجين دورو كرامة نص الناس تطلك

وانتي مثل ما زعلتي إياس وجرحتي لأزم انتي تراضي

أيلول... يعني اتوسل بي حتى يرجعلي لا ما أكدر
ومبين إياس عايش حياتة ومتونس صارلة اشهر اهناك لو يحبني جان رجع

ود.. شيرجع وانتي كلامج ويا جان مثل السم

أيلول.. لعد انتوا مو تكولون ماكو كرامة بين المزوجين اذا ماكو كرامة لعد ليش مرجع

قدر... الوضع يختلف أيلول انتي كتيلة ما اريدك وانجبرت اخذك واشفق عليك تدرين كلمة أشفق عليك اشكد تجرح

شوفي حبيبتي مبقه عندج غير فرصة وحدة حتى ترجعين إياس الج واذا رفضتيها انسي  للأبد

أيلول.. وشنو هي ؟

ود ... شنو رأيج نسافر نغير جو

أيلول... اني وين احجي وهي وين تحجي

قدر... تسافرون التركيا شبيج وهناك تشوفين الحب وحاولي تتقربين منه

أيلول... ليش منو يريد يسافر ؟

ود .. كلنا بس قدر متكدر تجي

أيلول... بس بابا وين يكدر يعوف الشغل ويسافر

ود... عيسى راح يبقة وصديق إياس هم يساعده

أيلول.. كل هاي التطورات والاتفاقات واني اخر من يعلم

ود... ترة هاي فكرة بان

أيلول.. بتعجب بان

ود... اي ولج محاميتنا طلعت ذكية
جان بابا واعدها بالعطلة نروح الأربيل هي اقترحت على بابا بدال اربيل نروح تركيا

طبعا بابا بالبداية رفض بحجة الشغل بس من حجينا ويا وكنالة بلكي اهناك إياس ولولة يتراضون

أيلول.. عزااااا فضحتوني

قدر.. على شنو انفضحتي ترة هو زوجج مو صاحبج

أيلول.. وهسه بابا وافق لو لا

ود .. اي وافق وراح يخابر إياس حتى ياجرلنا شقة صغيرة لمدة اسبوع منريد نكعد بفندق

أيلول.. شعجب عيسى وافق تسافرين

ود.. اريد ارجع دكتورة هناك علمود الحمل اريد اعرف شبيه ليش بس راما صارت عندي وبعدها مصار حمل 

بان... لولة والله مشتاقتلج لاتبقين زعلانة مني

أيلول.. فتحت ايدي وكتلها تعالي بسرعة اجت حصنتني وتبجي

ابد ما أكدر اطول بالزعل ويا خواتي بان رغم السوتة ما أكدر ابقة زعلانة منها

حجزنا التركيا الرحلة تقريبا ثلاث أيام لان بالسيارة مو طيران خواتي هيجي عجبهم يكولون منظر الطريق حلوو

قبل السفر رحنا اني و ود للصالون لان صارلي هوايه ممهتمة بشكلي غيرت لون شعري سويتة اسود جان هوايه كاعد ويا شكلي

اجة موعد السفر وسافرنا بس دخيل الله شصار بحالي ثلاث أيام عايشة على البسكت والعصير جنت بالكوة اكلهم معدتي من أسافر متتقبل اي اكل والطريق طويل الحد ما وصلنة اسطنبول انتهيت اول منزلت من السيارة لزمتني دوخة قوية

جانت الدنيا مغرب بابا  عندة رقم إياس التركي راح اتصل عليه حتى يجي علينا

اني جنت كاعدة وخواتي يمي

ماري أجه عمو إياس
من كالت اسمة ردت اموت قلبي مداسيطر على دكاتة حسيتة راح يطلع من مكانة

خواتي راحو يسلمون عليه اني جنت منطيتة ظهري وكاعدة بمكان ما ابين

جنت اسمع صوتة شلون فرحان ويرحب بأهلي
كال يلا جيبو الجنط وتعالوا للسيارة

ايلول غمضت عيني وصارت عندي خيبت أمل حتى مسئلهم عليه

صاح بابا يلا بنتي لولة دنروح

اريد اكوم اوكف ما أكدر بالكوة كمت

انداريت صارت عيني بعينه من بعد اشهر  فراق وعذاب اخيرا شفتة

بس اني لهنا وخلصت طاقتي افترت الدنيا بيه وصار غواش على عيني وبعدها محسيت على شي  .

إياس...من صارت المشكلة بيني وبين أيلول كرهتها وكرهت نفسي سمعتني كلام جان جدا جارح كالت طلكني بدون وعي طلكتها

من شويه اعصابي هدأت رحت سئلت شيخ عرفت الطلاك بحالة العصبيه و ماكو شهود ومو بثلاث باطل
شوية ارتاحيت بس جنت بعدني حاقد عليها وقررت أسويلها درس عمرها متنسى واذا بقت على قرارها وتريد تطلك انطيها حريتها مستحيل اجبرها تعيش وياي وهي متحبني

سافرت لان اعرف بنفسي اذا ابقة قريب منها راح اضعف كدامها

بس القدر جان ضاملي مفاجأة فوك طاقتي ماتت امي واني بعيد عنها
القهر والحزن دمروني بالفاتحة اجوي اهلها وهي ما أجت وهذا احسن شي سوته بقيت بالعراق الحد اربعين أمي

رجعت سافرت والشهر صار اشهر جنت اشتاقلها واريدها بس مستحيل اذل نفسي هلمرة الها

من كالي ابو قدر أيلول تريد تتوظف او تكمل دراسة تخبلت ورفضت

شفتها موجودة بالفيس نزلتلها اغنية سمعتها وانطتني أعجاب

راسلتها بس للأسف بعدها نفس عنادها وغرورها حتى متكلف نفسها وتعتذر

ابو قدر كالي راح أجيب ام قدر والبنات ونجي سياحة يمك
فرحت جنت هوايه مشتاقلهم ظليت افكر ايلول هم راح تجي لو لا اعرف بيها عنيدة مستحيل تقبل تجي وتشوفني

من وصلوا تركيا اتصل عليه ابو قدر بلغني بوصولهم رحت استقبلتهم

شفت ابو قدر وأم قدر والبنات ماعدا ايلول
كلت بنفسي أكيد المغرورة مقبلت تجي

و من كال ابو قدر يلا لولة بنتي ما أعرف شصار بيه

صارت كدامي وعينها بعيني دخيل الله أشكد مشتاقلها اشكد هي حلوة صايرة بعد احلى بس مبين عليها التعب

فجأة فقدت الوعي وتمددت بالكاع

حسيت گلبي ركض عليها قبل رجلي
تخبلت من شفتها بهذا المنظر شلتها وأخذتها للسيارة

خليتها على الكشن وامها بقت تصحي بيها

ام قدر... اكيد ضغطها نزل صارلها ثلاث ايام بدون أكل على البسكت والعصير

من سمعتها هي حجت فقدت اعصابي

إياس ..صدك كذب ثلاث أيام بدون اكل وانتوا ساكتين ليش مأجيتوا بطيارة هي هاي مال سفر بسيارة

انتبهت النفسي عليت صوتي على ام قدر سكتت

صحت أيلول ردنا نأخذها للمستشفى بس عنادها موتني مقبلت تروح اخذتهم ورحت للبيت

اني عايش بيت صديقي هو مسافر وسفرتة طويلة خلى البيت بأمانتي  اني اخذت الأذن منه حتى اجيبهم البيتة هو خطية كال البيت بيت ميحتاج اتكلي

أيلول... من فتحت عيني جنت بالسيارة رادوا اروح للمستشفى مقبلت كتلهم بس اكل وارتاح اصير زينة

إياس أخذنا للبيت العايش بي
دخلنا للبيت جان يجنن والمنطقة كولش حلوة

البيت بي ثلاث غرف فوك اخذنا اني والبنات غرفة وماما وبابا غرفة والإياس غرفة

صعدت تمددت لان مبيه حيل
اجت ود
ود.. لولة اخو إياس هم اهنا هسه اجة جان جايب العشى راد خطية يروح للفندق بس بابا مقبل كالة احنا مثل اهلك والبنات اعتبرهن خواتك ولاتستحي احنا باقين بس أسبوع وراجعين

نزلت اتعشى وياهم جان إياس ولا يباوع بوجهي

يحجي ويشاقة ويا خواتي بس اني لابسني
جان مكيف على راما لان هوايه يحبها مخليها بحضنه وكاعد

صار ثلاث أيام احنا بتركيا وإياس نفس وضعة أشكد حاولت الفت انتباهة ماكو فايدة

باليل جنت مختنكة طلعت للحديقة كعدت على الدجة اليم الباب
جنت صافنة شفت خيال أحد وراية اندريت طلع ياسين

ياسين... اشو كاعدة اهنا ؟

أيلول... ضوجة كلت اطلع اشم هوا

أجة ياسين  كعد يمي بس بعيد عني

ياسين ... ولو ما احب ادخل بأمورج الخاصة بس مو كافي زعل انتي وإياس

أيلول.. اني وأياس الظاهر قصتنا انتهت وكل واحد راح الحالة ما شاء الله أخوك عايش حياتة ومرتاح

ياسين... ومنو كالج مرتاح ؟

أيلول... ميحتاج احد يكولي مبين عليه

ياسين .. لا انتي غلطانة أخوية واعرفة زين يريدج بس ديكابر

أيلول...يمعود يا يريدني من اجيت لليوم حتى ميباوع بوجهي

ياسين... أيلول انتي تحبين إياس؟؟

أريد اجاوبة شفت سيارة إياس وكفت وهو دينزل منها جان تطلع وحدة من البيت المقابيل بيت إياس

أجت تقدمت عليه وحجت ويا بالتركي جانت مرأة اربعينية بس حيل حلوة ومهتمة بنفسها
لابسة شورت وكيمونة

دتحجي ويا جان تحضنة

اني وياسين بقينا مصدومين

باوعت على ياسين وحجيت بصوت مخنوك هو هذا التكول عليه يريدني

عفتة اريد ادخل للبيت ياسين صاح أيلول

إياس بسرعة التفت وشافني بقة جامد بمكانة ........

يتبع...