رواية المغرورة و الأعمى الفصل الثامن والعشرون 28 - بقلم بسمة البياتي

المغرورة-و-الأعمى-
(بقلم بسمة   البياتي )
- بارت السابع و العشرون -

أيلول... بابا أخذنا البيت سيف نبقة كم يوم الحد منأجر بيت
سيف وبان استقبلونة أحسن أستقبال

بان شافت حالتي اخذتني الغرفتها اول مدخلت انفجرت بالبجي

بان ... لولة فدوة اروحلج ليش هيجي تبجين شصاير

أيلول... الله عليج عوفيني وحدي

طلعت بان وعافتني
جنت كلما أذكر كلام خواتة اموووووت من القهر شلون انطا قلبة يحجيلهم ويشمتهم بيه وباأهلي ليشششش إياس ياربي راح اموت مجاي اكدر اتحمل

بقيت على هذا وضعي للمغرب بان وماما كل شوية يجون يشوفوني ويطلعون

من التعب والبجي نمت مكعدت غير ساعة 11 بالليل

بقيت بالفراش وهم رجعت اذكر الصار وأبجي

أجت بان للغرفة

بان.. صح النوم لولة يلا حبيبتي كومي غسلي وصحصحي حتى تتعشين وياي لان جنت انتظرج

أيلول... ليش انتظرتي اني ما أريد مو جوعانة

بان... شنو متريدين الخاطري كومي اكلي بس شوية اريدج تضوكين طبخي

أيلول.. على أساس مضايكة طبخج الرهيب

بان ... هههههه لا هاي أيام زمان جان رهيب وعجيب هسه تعلمت

أيلول.. كمت رحت غسلت جنت امشي بخطوات ثكيلة احس رجلي بالكوة شايلتني

دخلت للهول جانوا كلهم موجودين ماعدا بابا وماما
سيف جان يدرس ريان وادم وماري ديصفحون بالأيباد

سيف رفع راسة باوع عليه وابتسم

سيف... هلا لولة كل هذا نوم لعد شلون راح تكدرين ترجعين تنامين

أيلول...والله تعبانة كاعدة من الصبح لان جان عدنا سفر وطريق ومن وصلت للبيت ملحكت ارتاح وو
مكدرت اكمل كلامي سكتت 

بان صبت الأكل وخلتة كدامي
يربي ولا الي نفس اكل العسل ما أشتهي

بان ... يلا لولة اكلي وانطيني رأيج

أيلول... شنو هاي التطورات فدطفرة دجاج محشي
ضكتة جان صدوك طيب

ممممم والله طيب هاي شوكت تعلمتي اشو ماما وكع لسانها تعلم بيج وماكو فايدة

بان... ههههههه البركة بسيف جابلي كتاب طبخ واني هم اطلع طبخات من اليوتيوب

سيف... ردت اخلص من ابداعها رحت جبتلها الكتاب الله وكيلج معدتي خربت من طبخها

أيلول... اباوع عليهم يحجون ويشاقون مبين متأقلمين ويا بعض
بس ما أحس اكو تجاذب بينهم

بان حلوة وسيف هم حلو وشخصية بس تبقى قدر بينهم وصعب يعيشون حالهم حال اي ثنين مزوجين

بعد العشى اجت ماري يمي حجت بصوت ناصي

ماري... لولة المغرب بابا تخربط وسيف اخذة للمستشفى

أيلول.. فزيت من كلامها باوعت على سيف

شبي بابا هسه هو وينه

سيف ... الحمدلله مبي شي ضغطة شوية جان مرتفع وهسه هو زين ونايم بالغرفة

أيلول... اوووف اكيد ضايج واني السبب بس والله صعب اسكت وما أحجيلة  متحملت بجيت

سيف ... عمي حجالي على المشكلة لا انتي الج ذنب بالصار ولا إياس

أيلول...شلون مو ذنبة إياس فاضحني يم اهلة يعني اذا هو محاجي لعد منو حجة وشلون عرفوا

سيف ... جان سئلتي وفهمتي منه

أيلول... شسئلة والجواب واضح شلون انطا قلبه يكوللهم ابوها هو زوجها الي وهذا بيتي

يكولولي ابوج باعج والله لو ميتة ولا سامعة هذا الكلام جنت أحجي وابجي

سيف... على كيفج اهدئي ونصيحة لاتحكمين عليه قبل لاتسمعين اسبابة

أيلول... ماكو سبب ينطي الحق يرخصني وهو يعرف كلش زين اشكد خواتة يكرهوني

مرة امة بقت اذب كلام علمود البيت وكتلها إياس وبابا شركاء بالبيت

ورحت حجيت ويا إياس  فهمتة على الموضوع وطلبت منه لايحجي شي

وهو وعدني كال ميحتاج توصيني اني مستحيل احجي شي وهذا بيت ابوج قبل لايكون بيتي
وين راح وعدة وكلامة

بان... بابا راح يتنازل عن ال 200 متر الي بأسمة

أيلول .. اي احسن
والارض الي باسمي هم ارجعها البابا

سيف... شنو رأيج تببعيها
وأني سامع من عمي هم عندة خوش مبلغ لأن جان مسوي سلفة نجمع الفلوس ونشتري بيت بكد هذا بيتي ونفس المنطقة
اهنا البيوت رخيصة احسن من الأجار

أيلول... ياريت والله

سيف... قبل جانت قدر تتمنى يصير عدنا بيت ملك وهسه صار عندي بيت بس هي مموجودة راحت قبل لا احققلها امنيتها

ايلول... اباوع عليه شلون اختنك صوتة عافنة وراح

اووووف الله يصبرك ويصبرنا

بان ...زين انتي من ترجعين الإياس شلون راح تكدرين تعيشين بهذاك البيت وحدج

أيلول... بعد ما أرجع كلشي انتهى خلي يشوف حياتة وياخذلة وحدة تجيبلة طفل يسندة من يكبر على كولة خواتة

الكل راح نام بقيت افتر بالبيت اريد انام ما أكدر مختنكة كولش
طلعت كعدت بالطرمة شفت خيال احد وراية انداريت طلع أدم

ايلول... تعال حبيبي ليش بعدك منايم

أجة كعد بصفي وحجة

أدم ...اشتاقيت الماما

أيلول ... من كال هيج انمردت من كلامة

حبيبي ماما من تشوفك ضايج هي هم اضوج ومن تفرح هي هم تفرح

ادم ... لولتي تعرفين اني ليش مجنت احب اجي اهنا يم بابا

ايلول.. ليش ؟

ادم ... لأن ابقة اتخايل ماما بكل مكان وابقة ادورلها بكل البيت جان يحجي ويبجي

ايلول... حضنته وصرت ابجي ويا ياروحي كل هذا ضامة بقلبك
بس هذا مو نفس هذاك البيت الي جانت قدر عايشة بي

أدم ...اي اعرف بس اي مكان بابا وريان موجودين بي اعتبرة مثل هذاك بيتنا

أيلول... اريد اجاوبة ما أكدر ما اعرف شلون اوسي اشكد جنت مقهورة بسبب المشكلة الصارت بيني وبين إياس بس متجي نقطة بحر القهر الشايلة هذا الطفل بقلبة

ثاني العصر اجة ريان كال عمو إياس وعمو عيسى اجوي

من سمعت اسم إياس مدري شصار بيه بسرعة رحت دخلت للغرفة وقفلت الباب ماأريد اشوفه حاقدة عليه بكد الدنيا

بعد ساعة  اندكت باب الغرفة مجاوبت

بان... لولة فتحي الباب اني بان

فتحلها الباب
أيلول .. بعدة موجود لو راح ؟

بان... راح بس اشكد حجى ويا بابا وتوسل بي حتى يرجع بابا مقبل

بابا كال انت تبقة صديقي قبل لا تكون زوج بنتي والله يشهد عليه اشكد احبك ولاتتصور زعلان منك بس رجعة للبيت اعفيني منها

ايلول... هم جاب طاريي ؟

بان .. لا

أيلول بالليل اجت ود اخذتني كعدنا وحدنا

ود ... تعالي احجيلج اهل إياس شلون عرفوا بطريقة زواجج من إياس وموضوع البيت

تذكرين من جنتي زعلانة ويا إياس وهو سافر التركيا وجان اخو ياسين يمه

أأيلول.. اي اكيد اذكر كملي

ود...هذا ياسين باقي يسئل إياس شلون تعرف عليج لان عبالة انتي وإياس مزوجين عن حب من شايفة شلون يحبج ومتعذب على فراكج

وإياس واثق بي وحاجيلة

ومن راجع ياسين الأهلة اختة فاطمة سئلتة ليش ايلول ما أجت الفاتحة أمي وباقية تستفسر
وهذا ياسين الغبي حاجيلها كلشي ممبقي شي محاجي لان هاي اخته كلش قريبة منه وبينهم صداقة

ايلول.. أسمع ود واني طاكة بجي شفتي من اكول اكيد هو حاجي محد يصدك لج مو وعدني ميحجي الأحد ليشششش هيجي سوة

ود.. كافي حبيبتي ولج والله انتوا من طالعين من البيت إياس راجع الأهلة واصل باليل  ومتعارك ويا ياسين وحتى ضارب ياسين

وياسين معترف كايل اني بس حجيت الفاطمة واكيد هي ناشرة الموضوع مخابر على فاطمة وكايللها هسه تجين البيت اهلي ومن جاية لازمها مكطعها من الكتل
رايد يرجع نص الليل بالكوة اخو وسام مجلب بي ممخلي يرجع ومن الفجر راجع

ايلول... انتي منين عرفتي ؟

ود... إياس حاجي العيسى وطلب منه يجي ويا حتى يتعذر من بابا ويرجعة للبيت
بس بابا رافض

بس إياس زعلان منج يكول ايلول خربت بيني وبين ابوها

ايلول... ههههههه جنت ابجي واضحك مثل المخبلة يعني فوكاها هو زعلان

إياس... من رجعنا من أهلي طول الطريق ايلول جانت مو على بعضها من وصلنة للبيت راحت تسبح طولت بالحمام ومن طلعت جانت عيونها حمر سئلتها جنتي تبجين نكرت
ردت احضنها كلبت الدنيا اريدها بس تهدء وتفهمني شبيها
ومن حجتلي على كلام خواتي تخبلت حرت شلون ابرر موقفي لو شلون راح اكدر افهمهة
عافتني وراحت الأبوها حجت ويا اول مرة بحياتي احتقر نفسي وتخوني شجاعتي وما اكدر ادفع عن نفسي

طلعوا من البيت  واني شبيت نار
بسرعة صعدت سيارتي ورجعت سافرت البيت اهلي وصلت المغرب

دخلت البيت وصحت ياسسسسسسسين
طلع وسام ومرتة واولادة استغربوا من شافوني

سام... هاي شرجعك وشبيك متعصب

إياس...تجاهلت كلامة وصحت بصوت اقوى ياسسسسسسسسسسين
نزل ياسين من فوك اول ما شفتة هجمت عليه شبعتة بوكسيات بالكوة وسام سحبني منه

هو مصدوم ميعرف شبيه

وسام... هاي ششششبيك جاي متخبل علينا

إياس... اسئل اخوك العار عبالي رجال فتحتلة گلبي وحجيتلة كلشي عن حياتي وتالي يروح يطلع اسراري يم خواتة ماكو فرق بينه وبين المرة

ياسين ...كافي إياس ترة زودتها اني محترمك وساكت لان اكبر مني

إياس.. من سمعتة هيجي كال رجعت هجمت عليه لزموني وسام وابنة

وسام .. هسه غير يفهمنة شمسوي ياسين مو انفضحنا بالمنطقة

إياس... تعبت ومبقة عندي حيل كعدت وخليت ايدي على راسي

باوعت على ياسين انت الحجيت الخواتك عن طريقة زواجي من أيلول مو ؟؟

ياسين بقة جامد لونه انخطف

إياس ... احجي ليش ساكت

ياسين...والله بس الفاطمة حجيت لان بقت اجرجرني بالكلام

إياس... وتزعل من اكلك مرة مع الأسف عليك

باوعت  على وسام كتلة اتصل على فاطمة خلي تجي واذا ما أجت اروح اسحلها بيت عيالها

نص ساعة واجت فاطمة جانت خايفة وترجف لازمة أيد زوجها قووووي

اول مشفتها
رحت عليها جريتها من يم زوجها خلصت عليها من الضرب زوجها راد يلزمني
ياسين لزمة

هاي اول مرة بحياتي امد ايدي على وحدة من خواتي
كل هذا السويتة مو علمود أيلول بس منظر ابو قدر انحفر براسي بسببي رجال بهذا العمر ينذل وينهان

ردت ارجع باليل وسام مقبل اخذني ورحت بتت بيت اخوية حسن ومن الفجر رجعت الكركوك

رحت للمعرض وحجيت العيسى الصار وطلبت منه يجي وياي البيت سيف حتى احجي ويا ابو قدر اعتذر منه وارجعة

من رحنا ابو قدر رفض وكالي راح يتنازل عن حصتة بالبيت

بهذا اليوم حتى ايلول حقدت عليها لان هي الي كبرت الموضوع وراحت حجت الأبوها
من جنت هناك حتى مطلبت اشوفها

رجعت للبيت واني البيت يخنكني مابي روح رجعت وحيد مثل ما جنت قبل

أيلول... صارلنة اسبوع بيت سيف
لان قطعة الأرض بعدها ممبيوعة بابا كال اذا هذا الأسبوع منباعت ناجر بيت الحد متنباع

اني هاي الأيام كضيتها نوم ومرض   حرارتي هواية ترتفع اكل ما اكل عايشة على الحليب والبسكت وكل شوية اتقيئ

الظهر بالكوة سحلت نفسي من الفراش اخذت ملابس رحت أسبح
واني بالحمام  
تلمست صدري صارت عكدة جوة ايدي
بقيت جامدة احس انشليت من الخوف
بسرعة لبست ملابسي وطلعت من الحمام

اتصلت على ود واني ارجف

جاوبتني

ايلول... ولج ود لحكيني

ود... خير شبيج

ايلول... صارلي كم يوم مريضة وهسه تلمست صدري لكيت بي عكدة لج يمكن بية ورم خبيث

ود...شنووووووو....

يتبع

صباح العسل
اعذروني حبايبي البارحة مكدرت انزل بارت لأن نت مجان عندي اليوم اعوضكم وانزل بارت ثاني باليل
تحباتي 🌹🌹