رواية المغتصب حقها الفصل التاسع عشر 19 - بقلم زهراء جهاد 🤞

المغتصب حقها
زهراء جهاد
_______________________________

هہضـيمـه آتحآسـب علئ آلمـآ مـسـويهہن ♥
_______________________________

نزلوني اتكفخ وشمروني بغرفه بيبي اجني امي وخواتي يخلصني ماخلوهن دفعوهن وطلعوهن ماگدرت انطق اي كلمه ضليت بس اشهگ وابجي انتهيت من الضرب عافوني وطلعو ضليت لازمه الاماكن التوجعني واعاتب رب العالمين ليش يربي ليش شنو السويته اني وديعاقبوني عليي الله ليوفقك انشالله يكرار الله لا يمهلك كل هلسنين اتحملتك وصبرت عليك في سبيل متسوي هلشي وتالي سويته الله ليوفقك الله ياخذ حيفي منك اسمع صوتهم بره الغرفه الكل تحجي وتزگح نقاش. حاد وبعصبيه فقدت كمت ادگ بالباب واعيط اريد ابني جيبولي ابني ولكم اريد ابني ياضلام اررررريد ابني

تعبت ووگعت للگاع حيلي انهد وره دقايق
فتح الباب ابويه طب وسدها اتقدم
بهدوء وتعب گعد ع الجربايه ودنگ راسه بانكسار مرد گلبي واني اشوفه بهلحال بس والله مو ذنبي گعدت يم رجلييه ولزمت ادي ابوس بيهن وابجي

» يابه وغلاتك مامسويه شي
يابه صدگني وواگف وياي لتصير انت والدنيا عليه والله بريئه من كل التهم الي وجهلياها فدوه يابه لتضلموني

» ليش هيج يابه ليش ليش كسرتيني طول عمري رافع راسي بأخلاق ولدي وبناتي ليش هيج هجمتي بيتج بيدج عوفينه احنه اهلج يطبنه الف مرض هذا ابنج مو ورده والله ينحط بالگلب مافكرتي شراح يكون مصيره

» يابه فكرت والله فكرت اني واجهت كلشي علمود ابني اتحملته 6 اسنين شفت الويل وسواد الليل في سبيل ميتهمني بشرفي وتالي تهمني يابه والله اتأذيت هوايه اذاني هلشخص

» يعني ديتهمج وانتي بريئه ماعندج شي

» اي والله يابه والحسين ديتهمني احلفلك بداعت ابني ديتهمني

» اششش اششش صوتج ما اسمعه واذا خطيتي الباب الله ميخلصج مني واني اعرف دبارج ماراضي عليج الله ليرضه عليج

عافني وطلع ورگع الباب ضليت يومين محبوسه اجيبلي امي اكل ما اكله بس ابجي واندب حضي كل اشويه وانهار واكوم اصيح وادگ بالباب اريد ابني صارلي يومين مادري بي بردان دفيان جوعان شبعان گلبي مثل النار عليي خصوصا اني ابد ما امفارگته هاي اول مره افارگه شبعت كتل من خواني محمد واكبر
هواي اتوسلت ونذليت بالجبير وبالزغير بس محد سمعني ولا صدگني كلها صارت ضدي حتئ خواتي وامي ويا شماتت زهراء بيه الي صارت تجي وتروح البيتنه وتتعمد توگف يم الغرفه المحبوسه بيها اني اذبلي حجي يسم البدن ضليت مده هيج مقرفصه ونايمه بالگاع ابجي. واشكي الربي
لشكوئ لغير الله مذله وجهي كله جروح وزراگ عيني مورمه من ضربه كرار جسمي كله اثار ضرب ويون عليه مابيه ارفع ايدي گلبي مفرفح علئ ابني اريده ارد اشمه ابوسه احضنه اكيد هسه ديبجي عليه عمت عيني عليك يمة كل الصار بجفه وفراگ ابني بجفه طبت عليه مرجان گالت ابويه وعمامي يصيحولج بالاستقبال گلت هاهيه اكيد قررو يذبحوني مابيها مجال

حطيت شي علئ راسي وطلعت لازم اقوي نفسي لازم ادافع عن روحي نفسي الها حگ عليه اني صاحبه حگ وصاحب الحگ مدلل فتحت الباب عمامي وولدهم وابويه وخواني كلهم موجودين دخلت بكل هدوء وراس مرفوع گعدت مقابيلهم بدون كلام مرت دقايق من السكوت عمامي صافنين ويجرون حسرات ولد عمي كل واحد مورث جگاره ويهز برجله بعصبيه كلهم دمهم يغلي انتبهت فهد ماكو بنصهم. كسر السكوت عمي حارث

عمي حارث » اي يابه علياء احجي دنسمعج

رديتله بقوه

علياء » اتفضل عمي اسألني واجاوبك

عمي حارث » امين جبتي هلجرئه الي خلتج تسوين كل هلمصايب
.
» شـوف عمـو للمـره آلآلف. اگولها الكم ما مسويه شي وماراح اسوي طول عمري
لان هاي العمايل مو ثوبي، وداعت ابني لو جنت فعلا مسويه هلشي جان اني انطيتكم رگبتي وكتلكم ذبحوني

ابويه » يهني انتي هسه ما امسويه شي

علياء» لا يابه ما امسويه ومستعده احلفلكم ابيش متردون

رضاا » يعني جذب كرار ما لاگيج بغرفتج انتي وحماج وحدكم وبالليل

» لا صدگ جان بغرفتي بس.....

ماحسيت الا راشدي طير وجهي لزمني من شعري وصاك. اسنونه عليه ويحجي بعصبيه

رضاا » وتعترفين جان بغرفتج تعترفين فلتت من ايدي مسحت ادموعه وحجيت بقوه وانهيار

كاافي ذله كااافي
جان بغرفتي صدگ وبالليل عمتي صعدته ديسويلي الاگلوب مصار شي من اللبالكم ست اسنين عايشه وياهم بالبيت مافديوم رفع عينه وخلها بعيني حتئ من يحاجيني هو ومدنگ اعتبرته اخويه حاله حال مصطفئ
كافي ذله يابه اتحملت هوايه بعد ماگدر اتحمل وحق ابو الحسن علي شفت الي ماشافته مره ضگت الويل علئ ايد هلشخص طول المده الي اني بيها يمه اگوم بكفخه واگعد بكفخه لگمه ما ماكله مثل العالم والناس ثوب مالابسه مثل البنات اتشوفوني اسولف واضحك ومحد يعلم بالي بداخلي

اكبر » انجبي ورجعي المكانج

» ما انجب ولا ارجع المكاني لازم تعرفون الحقيقه

التفتت علئ عمامي

» تردون اذبحوني اذبحوني هيان رگبتي جدامكم بس والله ما خايفه علئ نفسي خايفه عليكم باجر عگبه اذا واجهتو رب العالمين راح تلگون نفسكم ملطخين بدم روح بريئه وطاهره حرام عليكم حرام

عاط بيه عمي فاضل گعدت ضليت ابجي بصوت مسموع كلهم گاعدين اگبالي بس محد يصدگني

علياء » اريد ابني

رضا » انسي ماعندج ابن

» شنووو هو بكيفك هذا ابني اريده وغصبن علكل فهمت

رضا » تاكلين خره وتكعدين وسكتين باجر ترحين تطلگين وتتنازلين عن ابنج وعن كل حقوقج. وممنوع اسمع حرف منج مو كافي العار الجبتي النه

» مو بكيفكم مو بكيفكم ابني ما اعوفه لو علئ گطع رگبتي ماسويت شي علمود تحرموني من ضناي ماسويت گمت ابجي واصرخ

ابويه » هذا كلامنه وياج وميتثنه گومي من گدامي ع السريع.

وگعت علئ رجلي

» يابه ابوس ايدك لتحرمني من ابني
ما املك بالدنيا غيره هو النفس اليصعد وينزل عاقبني بأي طريقه تختارها بس عوف ابني لا تاخذه مني يابه ابوس رجلك

» رضااااا

» ها يابه

» اخذها من يمي لا بعلي ادفنها هنا واغسل عاري ماريد لا اشوفها ولا اسمع صوتها واذا لمحتها جدامي ماحاسب غيرك

» لا يابه لا فدوه يابه لسوي هيج اريد ابني لتاخذوه مني ولكم اني ام خافو الله بيه ماسويت شي حتئ تعاقبوني عليي والله ماسويت ضليت اصيح واعيط وابجي بيدين رضا وهو يحاول يطلعني لكن لا حياة لمن تنادي

. فقدت صرت ادعي عليهم وانخه اهل البيت ياخذون حقي منهم شمرني بالغرفه وقفل الباب ضليت ادگ بالباب بقوه وابجي واشهك. تالي افترت بيه الدنيا ووگعت حسيت علئ امي وهيه تهز بيه وتعيط

» يمةة علياااااء علياء جاوبيني يمة ولكم لحگولي بنتي مدري شبيها يمةة راح اتروح من ايدي ولك رضااااااا اجوي كلهم خواني ونسوانهم كلها التمت فوگ راسي جنت اشوفهم بغواش واسمع صوتهم بس لساني انعگد ماكدر احجي ولا افتح اعيوني اغمئ عليه مره ثانيه حسيت علئ مرت ابويه كاعده يم راسي وتهدي بيه جنت اهلوس بنومي واصيح علئ ابني
حطيت راسي بحضنها رابجي واتوسل بيها اجيبلي ابني گلبي مثل النار عليي مرت فتره هيج حابسه روحي اكل ماكو السمه ماشايفتها اشلونها كل اشوي يغمه عليه علاء ابن عمي ابراهيم طلگني غيابي وبعد كتل وتحلف خلوني اتنازل عن ابني لان كرار مهددهم اذا ما اتنازل عنه يفضحنه بالمنطقه هه وهمه عدهم اهم شي سمعتهم عادي اروح بالرجلين المهم سمعتهم بس حاجاني القاضي وكال حتئ لو اتنازلتي الج حق اشوفي شوكت متردين واذا ما خلاج اتشوفي تكدرين تشتكين عليي انطاني امل رفيع انو لسه اكو خيط يربطني بأبني بس اهلي ماخلوني اطالب بي وبشوفته جانو يعاقبوني بي جنت گاعده واباوع من الشباك عل النهر وافكر بأبني معقوله نساني معقوله مابجه عليه ماخبصهم ايريدني بس هو متعلق بيه هوايه ميحب يكون ويه غيره دخلت سجئ بطنها الخشمها باوعتلي من فوگ ليجوه اتجاهلتها مادرتلها بال

سجئ » مينلام بيج فهد الحمدلله الي ماتورط بيج وكشف حقيقتج شگد حلفتي ما امسويه شي شوفي هسه وبعد هلسنين عدتيها لنفس الشغله وكتها شگد لمت زهراء بس طلع كلامها كله صدگ حيه من تحت التبن

باوعتلها بصدمه معقوله سجئ هيج تحاجيني كل يوم انصدم بعزيز وبعد وبعد شيشوفني الزمن صدگ الانسان ينعرف بالمواقف

اتجاهلتها مارديتلها درت وجهي ع الشباك كلها اتغيرت عليه امهاتي خواتي نسوان خواني خواني بنات عمي كلها صارت ضدي محد وگف ويايه كلها داست علئ اجروحي محد طايقني ولا احد يباوع بوجهي واني هم انعزلت عن الكل التزمت بالعده مشت الساعات الايام والاشهر بمرار انتهيت ضعفت صرت جلد وعضم الحزن صار عنواني هاي الغرفه شهدت علئ كل دمعه نزلت مني شهدت علئ كل ليله سهرتها شهدت علئ كل الي صار ويايه ماعرف اني شنو ولا شنو مصيري وشنو فايدة حياتي لو جان الله محلل الانتحار جان من زمان خليت التراب يغطيني خلصت العده ثلاث اشهر وعشر ايام اني بالغرفه وحدي الوحده موتتني شعور الضلم لا يوصف نذرت عمري اصلي واقره قران وادعي الله ياخذ حقي ويرجعلي اوليدي لو اشگد ما اوصف فراگ ابني عذبني ما انطي حگه حيل صعبه اشوف اهلي وناسي محد يباوع بوجهي حتئ ابويه كم مره اروح ادخل غرفته اريد احاجي بلكي يقبل يسمعني لكن بكل مره اترزل وانطرد بيوم جنت گاعده ع السجاده اقره قران ودموعي تنزل مافديوم وگفت ع السجاده اذا مو اخشع فتح الباب مصطفئ وگف وكتف ادييه استغفرت وباوعتله

مصطفى » ابويه ايريدج

» شيريد

مصطفئ » كرار خابره ويريد يحاجيج

» شنووو منو يريد يحاجيني

» ابويه وكرار ثنينهم يردون يحاجوج

كمت خليت القران بمكانه وتقربت عليي

» شوف خويه ابويه لو مهما صار علئ عيني وراسي اروحله اذا رادني بس كرار مستحيل مستحيل اخلي يلمحني لو بطيف والاسباب هوايه ومنهن انهو طليقي وميحقله يشوفي محرمه عليي

» شوفي محد من عدنه رايد اتشوفي لو اتقابلي بس مبين عنده شغله مهمه

» ماعنده شغله كلعاده راح ايذب عليه تهمه وراح اصدگو وتكفخوني گدامه وهو هذا الي يريده.

» احتمال عنده غير شي

» لا غير شي ولا هم يحزنون هذا العندي ماريد اشوفه لا هسه ولا بعدين لا بدنيا ولا بأخره روح وصل هلحجي لابويه

طلع وطبگ الباب ضليت گاعده وافكر شيريد مني صار ست اشهر من شمرني وحرمني من ابني وطلگني وتهمني بشرفي وهسه جاي بكل قباحه عين يريد يحاجيني لا والله لو تثاقل الدنيا ماشوفه خيالي الله ينتقم منه شر انتقام

وره فتره ابويه حكم عليه الا اشوفه لان صاير حجي ومشاحنات والشغله كبرانه عمامي هم ضغطو عليه احاجي سلمت امري لله وقبلت اشوفه بس تحت شرط وهو ان يجيبلي ابني اشوفه واشبع منه شوف يلا اشوفه هو الثاني ردلي خبر مصطفئ انهو وافق اشوف حيدر وباجر الصبح يجيبه متت من الفرحه من بعد ست اشهر من الحزن والدموع ضحكن عيوني الدنيا مسايعتني من الفرحه واخيرا راح اشوف ابني واشمه واحضنه مانمت الليل كله اشكرا ربي واخيرا استجابلي دعائي وراح انجمع بأبني صار الصبح دخلت سبحت وبدلت گاعده علئ نار كل اشويه اوايگ بالطرمه وماكو لاعشره ونص دخل مصطفئ گايده وهو يضحك ماصدگت اعيوني طلعت اركض عليي حسيت الطرمه صارت شارع ما عولت اوصله گعدت علئ اركبي شبگته بقوه واشم بي وابوس جكو الف بوسه بسته ماگدرت الزم نفسي صرت اشهگ وابجي مامصدگه صارلي ايام وليالي واشهر انتضر هلملگه

خطيه من شافني ابجي برطم وگام يناشغ

امي » ولج علئ كيفج خبلتي للولد

بيبي » علئ كيفج يمه الولد انرعب

صدگ شفته استغرب الوجوه والنوب شابگته وابجي هديت اشويه ومسحت ادموعي شلته وطببته جوه گعدت بغرفتي وگعدته بحضني واتلمسه واتفحصه خمو بي شي لو مجروح حيل ضعفان عفته مدبدب وصحته كلش تمام هسه ضعفان وذبلان سوده عليه

» ماما حبيبي حيدوري باوعلي ماشتاقيتلي

» بله استاقيتلج بس انتي عفتيني

» والله مو بيدي يماما غصبن عليه بعدوك عني الضلام انت ليش متجيني ليش متكول ليمه لبابا يجيبوك الي

جان شايل لعبه بايده يلعب بيها ويحاجيني نطقه متعدل صاير يحجي عدل بس عنده جم كلمه يلفضها بالسين

» بله گتلهم بس همه ميقبلون كالو هيه متريدك وعافتك وراحت واني
بجيت عليج هوووايه هووايه هلگد وايشرلي بأييدي.الاثنين شگد بس انتي ماجيتي واني كل يوم ابجي عليج واريدج

مرد گلبي وهو يعاتبني هيج ضميته الصدري واشم بشعره

» حبيبي ولله اني هم بجيت عليك هوايه وسهرت الليالي وهم ماخلوني اشوفك

شگد حقراء گايلين اله هيه عافتك ومتريدك يردون يكرهو بيه بس هو مانساني مو ازغير عمره راح يصير ست سنوات حليبه رده

طيرني بالسمه بسوالفه ونساني كل عذابي بضحكه من ضحكاته زاح كل همي الله ليحرمني منك وليحرم كل ام من ابنها

مر الوقت وياه ركض ركض العصر جا دياخذه مصطفئ گال ابوه بره ايريده شبگته وودعته واخذه مصطفئ سوده عليه طگ من البجي

ايريد يبقئ يمي ميريد ايروح گطع گلبي وهو يتوسل بيه يگلي هلياء خليني يمج اني احبج ماريد اروح يم بابا ملخت روحي وراه لان طلع يبجي ويصرخ اتمنيت لو كرار اگبالي اذبحه وميرفلي جفن مثل ماحارم طفل من امه بالگوه طببتني جيلان جوه ماهديت من البجي لليل جا ابويه وگال باجر نسوي گعده اني وعمامج وهذا الكلب هم يجي صليت ونمت شگد فرحت بشوفه حيدر شگد انقهرت لان طلع يبجي من يمي ثاني يوم جانو بيت خالي ابيتنه معزومين وعرس مرجان هم مخبوصين بي اسبوع اليجي اتعرس خواني اخ يا خواني كلها اتغيرت عليه جانت مرجان متخليني نايمه زعلانه جانت ام اليه مو اخت هيه الثانيه هم اتغيرت جهزت ورتبت لعرسها وبالجذب ما اخذت رائيي بشي وكلهم بالبيت يعاملوني كغريبه مكروهه منبوذه مذنبه عدو الهم مو جن اختهم وبتهم دمهم ولحمهم الله ع الضالم متاكده الله يطلع برائتي بيوم من الايام ساعدتها ماراح اسامح احد لان الكل جرحني كل شخص منهم رماني بسهم اذا مو بفعل بكلام صار الليل فضينه العشه وعمامي التمو كاعدين بالاستقبال ينتضرون هلضالم سمعت بي جا ضلو كاعدين وره مده صاحو عليه گالت بيبي دخليني اني هم وياج دفعتها گوه دخلتها حتئ حيل ما ضل بيه بعد ما جنت اضن روحي فراشه وطايره اروح هيج واجي هيج دخلنه سلمت ورتبت گعدت بيبي وگعدت يمها صار مقابيلي فهد شفتهم كرار وامه واخوانه كلهم گاعدين لعد حيدر وين

كسر السكوت كرار

للحكايه بقيه

زهراء جهاد