رواية المغتصب حقها الفصل الثامن عشر 18 - بقلم زهراء جهاد 🤞

المغتصب حقها
البارت التاسع عشر
زهراء جهاد

:::::: علياء

انصدمت من سمعت الخبر اتهسترت گمت ابجي واللطم بلا وعي
مادري اشلون لبست ورحت وياه
وصلنه الفرع مينطب من الناس والهوسه
ردت انزل ماقبل لزم ايدي
گلب الدنيا بالهورنات يلا سووله مجال وصلني للباب ماعولت اوصل
نزلت بسرعه من السياره حتئ عثرت ردت اوگع بس اتماسكت نفسي
دخلت. للبيت لگيته مگلوب بالنسوان غربه وگرايب كلهن يبجن ويعيطن
من شفت حالهن وشلون املخات نفسهن فقدت صرت ابجي واعيط واللطم مالحگت اشوفه گبل ما اوصل بدقايق طالعه الدفانه
. الي فهمته من البنات انهو الضهر جان ديصلي هو وعلئ السجاده واگع
ماخذي للمستشفئ طالع عنده جلطه بالدماغ ونزيف قوي وره ساعه مات انگلب البيت اجواء حزن
كلها لبست الاسود
الكل يبجي وينحب زلم ونسوان لان جدي صدگ انسان ميتعوض دومه صاحب حگ وانسان طيب ياهو الي ينذكر اسمه جدامه گال ونعم طيب واصل
بحياته ماضلم واحد ولا اذه واحد
يعني انسان بمعنئ الكلمه اگولها حرام ينام جوه التراب.
اباوع علئ بيبي حالها يبجي تعبانه وگوه كرسيها شايلها
رحت غسلت وجهي ولبست ثوب اسود لان جنت لابسه رصاصي مالحگت ابدل صحت الحنين ورحت البيبي دگومها ترتاح شويه

» يلا بيبي گومي ارتاحي اشويه تعبتي

» لا عوفني

» بيبي ميصير ياعيني انتي مريضه ارتاحي اشويه ورجعي گعدي

صارت عصبيه علينه
عفتها وطلعت طبيت للمطبخ
لگيت ولد عمي ابراهيم ديطلعون مي مخبوصين حتئ سلام ماكو مجال اسلم عليهم دخل عمي حارث سلمت عليي وعزيته وگتله علئ بيبي گال جيبيها دحاجيها دخلت من بين النسوان طلعتها وديتها يم عمي گعد حجه وياها وثنينهم گامو يبجون واني هم علئ بجيهم بجيت گدر يقنعها اخذتها للغرفه غيرت ثوبها ونطيتها علاجها ونومتها گلبي اتگطع واني اسمعها اتگول ( جان الموت الي مو اله)

من تفقد بشر عزيز علئ گلبك وهيج فجأة بدون مقدمات گلبك وروحك وكل ذره بجسمك يبجي عليي راح اضل اتفكر راح بعد ماكو لا سوالفه لا ريحته لا ضحكته لا حركاته اتضل بس ذكرياته الي اتأذيك الي اتشيل بروحك من السمه وتشمرها للگاع غصه ووجع بگلبك مايروح للابد الموت قاسي ع الاحياء الي راح تموت روحهم بليوم الف موته وره الشخص المات الموت ميأذي الميت بگد ميأذي الناس العافهم وراه بگلوب مفجوعه اللهم ارحم من اشتاقت لهم قلوبنا وهم تحت التراب رحم الله روحا رحلت عن الدنيا وما زالت حيه في داخلنا

خلصت ايام العزه من اصعب الايام العشناها البيت كأيب الكل يبجي وينوح حقنه فقدنه شي ميتعوض فقدنه خيمتنه وعامود بيتنه
وره اسبوع رجعت لعيالي كرار هلفتره اشويه ابتعد عني لان يدري بيه نفسيتي تعبانه وموت جدي هواي اثر بيه ومنا حملي معذبني لا بالگعده ارتاح لا بالگومه لا بالمشي تعبانه
. صرت ما اعول اجيب وخلص
وره جم يوم هم لحيت علئ كرار ووداني وهو گعد يم الولد اشويه وراح
شويه هدئنا گدرنه نجاوز هلايام الصعبه بيبي حالتها حيل تعبانه والله اني گلت ماصدگ تعيش وره جدي اتموت مرت فهد ماشفتها بالفاتحه سمعت من البنات هيه زعلانه يم بيت اهلها بالليل جاني كرار ورجعت. قبل الاربعين بيوم اتعاركنه اني وكرار وهم نام فوگايه موتني راجديات وبوكسيات بالگوه امه خلصتني منه اسمعها اتگله
» يلمسودن عوفها لا اتموت

وهو فاقد وبس يصيح

»اني اريد اموتها اريد اخلص منها

» ولك وابنك خل اتجيب واخذ ابنها منها لا تموتها وتبتلي بيها

عافوني وطلعو الله لا يوفقكم ثنينكم

وره ساعه من البجي والالم گمت اباوع وجهي كله زراگ وحمار ومورم اشلون يربي ليش هيج خابرو اهلي علمود انروح لاربعين جدي كرار اتعذرلهم بحجه حامل والدنيا حاره ومريضه متگدر اتروح اني لو اريد اروح غصبن عليي بس بيا وجه اروح اذا شافو اهلي هلضرب شگللهم حتئ الاعذار خلصت جنت گبل اخفي الاثار بالمكياج هسه حزينه وغزگانه بالاسود ماگدر. اخلي راحو اهلي ورجعو سمعت فهد امطلگ مرته

:::::::: فهد

قررت ازوج واستقر. كملت بيتي  واخذت وحده من منطقتنه خوش ابنيه حبابه وهادئه اهلها ناس خوش نعرفهم وسمعتهم سابقتهم والله صارت القسمه وازوجنه اني واكبر سوه من دخلت بالحنه انصدمت بشوفه علياء گدامي استغربت من وجودها بعرسي بس بعدين اذكرت هذا عرس اخوها هم مو بس عرسي حيل متغيره ضعفانه وجهها ذبلان والنوب اشتعلت بنار من عرفتها حامل مادري شنو احساسي تجاها من باب اكرها وماريد اشوفها ومن باب بس اشوفها احن الها استغفرت ربي شنو دباوع علئ حلال غيري البنيه بعد ازوجت وشافت حياتها وفرحانه
خلصت هوسه العرس
ورده حيل حبابه هادئه وفقيره وسباعيه وحلوه هم
من كلهن كامله طايعتني ومهتمه بيه وبالبيت
. وره فتره لاحضتها تتعب بسرعه اذا تشيل شغله اتگوم تنهت وتتلاگف النفس الح عليها اخذها للطبيب متقبل وطلعلي حجج واعذاز صارت تروح لاهلها من تجي شايله دوه وياها اسالها مال شنو اتگول هيج عندي التهابات واخذهن
. صارت تتخربط هواي مره تخربطت حيل رادت اتموت لگفتها بدون عبا خليت شي علئ راسها شغلت السياره وطرت بيها للمستشفئ اخذوها فحوصات وتحاليل خابرت اهلها هم جوي امها وابوها وخوانها طلع الدكتور كال علاجها وين

» اي علاج دكتور

» اكيد البنيه تستعمل علاج لان حالتها حيل متأزمه بهلفتره

» عفوا دكتور ليش شبيها ؟
زوجتي متشكي من شي.

اذكرت العلاج الي تاخذه رحت للبيت ع السريع جبته ورجعت انطيته اله وهنا انصدم بحجي الدكتور وهو يخبرني انها بيها صرع وحالتها متأزمه متعيش اكثر من شهر اجيت اتخبل شلون هيج وليش ماگالولي مريضه ليش غشوني  حجيت ويه اهلها وعرفت هيه مريضه من اربع سنوات ومنتهيه حالتها فد مره وتاخذ علاج گمت اصيح عليهم ماگدرت اتماسك اعصابي اني فهد يغشوني گتلهم هاي بتكم اخذوها ماريدها وباجر ورقه طلاگها توصل رجعت للبيت الدنيا طالعه من عيني ماجان لازم يضمون عليه هيج شي باجر عگبه اذا ماتت توگع براسي والف سالفه تطلع
طلعت من البيت گبل للمحكمه ماخليها بعد علئ ذمتي صح هيه خوش ابنيه وماشفت عليها شي مداريتني ومهتمه بيه بس اني عندي كرامه مستحيل اقبل علئ ناس مثلهم يغشوني رفعت قضيه طلاگ صارت وفات جدي اثرت بيه هواي وشغلتني عن دوامي وعن طلاگي وهواي امور طلع الاربعين هواي انخبصنه بهلفتره اجواء حزن وكأبه داومت لگيت الشغل متراكم عليه احير امين التفت گدرت اضبط وضعي وره فتره طلگتها بموافقتها. هيه طلعت من المستشفئ راحت لاهلها دزيتلها كل حقرقها مؤخرها وخليت سجئ تلم كل اغراضها وملابسها وهم دزيتهن

اهلي ضلو يلحون ويحجون عليه علئ تصرفك غلط واذا مريضه هذا مو بيدها هذا ابتلاء من الله هيه مالها ذنب بس اشلون مالها ذنب الذنب راكبها من راسها لرجليها جانت تگدر اتكلي قبل الزواج علئ يابه تره اني مريضه هيج وهيج السالفه مو صارلها اربع اسنين مريضه واصله للموت وتاخذ دوه من ورايه واني مادري شنو طرطور اني

وره تقريب فتره
جنت گاعد اني  وحمزه انراجع ملف اقوال واعترافات متهم دگ تلفوني شفته اخوو ورده استغفرالله شيريد هذا هسه فوگ شينهم گوات عينهم رفعته

فهد » خير شرايد احجي بسرعه

حسين » فهد الغراض......

فهد » مو دزيتهن بعد شتردون

حسين » فهد انطيني مجال احجي الدنيا مگلوبه

فهد » ليش شصاير ونگلبت يمكم

حسين » فهد مو وكتك لتكفرني بالله

گام يصيح ويغلط ويكفر بس اريد افهم شبي ماكو بس يصيح تالي عطت بي يلا هدئ

فهد » صوتك لا اكسر سنونك اسكت وفهمني شكو شصاير

حسين » ماتت فهد
ورده ماتت فهمت شكو هسه
فهمت ليش الدنيا مگلوبه ماعندي مجال اخذ ونطي بالكلام
. فهد  من الاخير شهادة الجنسيه عندك جيبها بسرعه

» انصدمت من الخبر  ورده ماتت معقوله بهلسهوله رغم تحذيرات الطبيب ان حالتها متأزمه ومتگدر اتعيش گلبها تعبان لاكن نسيت اجيت اتخبل صح اني طلگتها وابرادتي  بس تبقئ عشره بيه رغم ماعشنه اكثر من شهرين سوه بس ماشفت عليها شي ولا قصرت ويايه بشي ابد

طلعت من الدوام بسرعه رحت للبيت اخذن الاوراق

لان اذا مو الجنسه لو شهادة الجنسيه ميقبلون يدفنوها.
لاگوني الولد بره شافوني مستعجل
وطبيت وطلعت بسرعه
ضلو يصيحون شبيك ما شبيك اني. واسوق خبرتهم
وطلعت گبل البيت اهلها
صدگ لگيت البيت مگلوب
مافهم شي بس عياط وصياح مال النسوان
اخذت اخوها علئ صفحه وحجالي اشلون ماتت
مثل هذيح المره هم حالتها متأزمه فد نوب
بالگوه حاجيه ويه اهلها وناطيتهم ورقه محلفتهم ينطونياها

انطيتهم اللاوراق وطلعناها من بعد التغسيل ودوها للبيت ملخن نفسهن امها وخواتها وكرايبهم موقف يفطر الگلب كلهن يصرخن ورده بعدج صغيره صدگ بعدها زغيره علموت بس بعد هذا الموت ميعرف جبير وزغير اتندمت لان طلكتها لو مبقيها ومداريها مداويها اكسب اجرها اباوعهن موتن روحن تهسترن يردن يفتحن التابوت گبل اشرت لخوانها شلناها وطلعنه. طلعت امها تتوسل بيه  نزلوها بس احضنها واشمها. گتلها عمه ميصير  حرام اسوون هيج هاي ارادة الله علي ابن ابي طالب يگول عجلو بدفن الميت بالگوه طببوها جوه

  طلعه گبل لكربلاء. اباوع اخوتها يبجون وينوحون اسمع اخوها يحجي

» ولج ورده عمت عيني عليج خويه ماشفتي شي من حياتج گضيتها گومه بوگعه التفتلي فهد والله ماقبلت تزوجك گالت ماريد ابلي ابن الناس بعلتي شبگته وضل يبجي كسر گلبي وهو ينوح علئ اخته  بعد ساعات عديده وصلنه دفناها يم ابوها وگرايبها بالگوه شلعت خوانها من ع الگبر رجعنه للبيت بالليل باجر تنصب الفاتحه رجعت للبيت الدنيا طالعه من عيوني اتندمت هواي ع السويته بيها انبني ضميري هواي واني اشوفهم ينزلوها للگبر خابروني اهلي ديتأكدون من الخبر ثاني يوم نسوان عمامي وامي وكل گرايبنه راحن للفاتحه واني هم اخذت اجازه ووگفت وياهم بالجادر تمشي الايام والاشهر بسرعه والعمر يركض قررت اعوف الزواج مافكر بي ابد خليني هيج احسن غلطتي وي ورده وعتني علئ هواي اشياء. من بعدها وبعد جدي عرفت الدنيا متسوه برمشه عين العشره تنتهي

::::: علياء

حيل انقهرت من سمعت بخبر ورده متستاهل خوش بنيه وفقيره الكل يحمد باخلاقها وأدبها ردت اروح للفاتحه بس كالعاده ماقبل بطني بلشت تكبر والحمل معذبني بالگوه اگوم واگعد طبيت شهر السابع امي دجهزلي جهاز الطفل احنه هيج عاداتنه اول طفل للبنيه امها تحضر جهازه كرار نفسه نفسه ماتغير والمصبرني علي هلطفل وشرفي ماريد يتعذب بسببي وماريد اهلي يتأذون مرت الشهرين عادي ماكو شي

جنت متمدده ع الجربايه واباوع ع التلفزون صعد كرار شمر نفسه يمه

» كررار علئ كيفك مو خضيتني خض شبيك اليوم بس تحوص يمي

» اريدج

تقرب وكام ايبوس واني بطني واصله لخشمي واحس روحي دتطلع رغم هو ما شارب بس نفسي تلعب منه ومن كل الروائح

» ولك كرار وخررر بعد مابيه اتنفس اختنگت

» شبيج انتي شبيج كل ما اتقربلج اختنگت

» اي قابل جذب حامل وبطني هل علاتها وروحي ماطايقتها وانت كل ساع جاي تحضن وتبوس

» هذا حقي تنطينياه غصبن عليج بعدين مو حبن بيج متقربلج 

» ادري مو حبن مجرد اسد رغباتك وشهواتك كرار گوم مني راح اموت وعلي

گام يتأفف ويغلط ويسب بت الكذا وبت الكذا  اخذ هدومه ودخل للحمام

والله يا الله اني وين وهو وين اكو واحد مرته حامل بشهرها علئ وشك ولاده تعاي اريدج شگد حلو

نزلت گعدت يم عمتي طبعا هلفتره شالت الشغل عني شويه يعني خلتلي السهلات واخذت الصعبات وتگولياها وجه بوجه مو حبن بيج علمود حفيدي بس اجيبين ترجعين لشغلج جانت دتفلس باگله

» اگولج عمه

» گولي

» عمه مخنوگه شوكت اجيب والله راح اموت صارلي. عشرة ايام  بشهري

» ماضل شي هسه علئ دقيقه تگومين تطلگين عادي اني كملت شهري بعبودي يلا جبت حضرتي جنطتج جهازج

» اي حضرتهن انشالله الله يسهلي گمت منها سحلت روحي سحل وطبيت للحمام حاره الدنيا هوايه وعرگانه كملت وطلعت مابيه امشي حتئ شعري مابيه امشطه بالگوه لفيته ليفوگ لبست دشداشه عريضه مال حوامل وتمددت جوه السبلت حسيت بوجع خفيف بمحاشمي وبعدين راح ضليت صافنه ع الكركوت والملابس الي مرتبتهن ومجهزتهن غفيت شويه وحسيت علئ الم قوي ابطني اريد اگوم ماگدر اصيح علئ عمتي ونجف ميسمعن لان غرفتي فوگ والباب مسدوده وهنا فتح الباب ودخل كرار

» هاها شبيج

» كرار الحگلي راح اجيب اخخخخ

» ولج خاف ماعندج ولاده خاف هيج مدري شيسموهن هذني

» ولك اگلك دطلگ راح اجيب وديني صاح الامه وخواته جانن هنا لبسني وسندني اني دگوم وجان حسيت شي نزل عليه باوعت علئ عمتي واشرتلها وجان تصيح طگت ماي الراس ولك كرار شيلها بسرعه كلامها وترني وخوفني بالزايد شالني وطلعو بيه للمستشفئ اني بس ابجي وجهي احمر واعض بثونبي من الالم والخوف وصلنه واخذوني وكلها تصيح علياء حسين وضعها خطر دخلوها عمليه دخلوني ع الخاص وكل اشوي وحده تجي تفحصني واني اصرخ ولدني راح اموت دخيلك ياعلي صرت اصرخ ياعلي ياعلي امي علمتني من اولد انخه علي ابو الحسن علمود تتيسر

سوولي بنج نصفئ وبعد الم وصراخ ومحاولات وبجي جبت شگد جان بيه وجع بس من سمعت صوته وهو يبجي رجعلي الروح بس شفته اخذوه وطلعو اني ذبيت روحي من التعب بعدهن يشتغلن بيه غفيت صحيت من البنج لكيت روحي بغرفه بيضه واكو تخم كاعدات علي امي وعمتي ومرت ابويه وزبيده ملتهيات يسولفن. التفتت للصفحه الثانيه شفت ابني اي ابني يمي نايم ع السديه معقوله جبت معقوله ابني نايم يمي ماصدگت من الفرحه گمت ابجي جني يمي وكلهن يبوسن ويباركن الي. جابلي الولد رضعته شعور حلو انج صرتي ام ودتغذين ابنج منج قطعه من روحج بين اديج صرت ابوس بي بوسات خفيفه اخاف لا يتأذه لان حيل ترف

وره ساعات جوي اهلي خواني وابويه وحمويني جوي ايباركولي اخذه من حضني كرار شاله وكام يشم بي حسيته صدك يحبه وجان منتضر جيته اذن بأذنه وسماه حيدر وكلها گام اتصيحلي ام حيدر

بعد مرور خمس سنوات

بقلمي زهراء جهاد