رواية المغتصب حقها الفصل الرابع 4 - بقلم زهراء جهاد 🤞

#المغتصب _حقها
البارت _الخامس
بقلمي ...زهراء جهاد

علياء ...

....اني طلعت الباب وانصدم بشوفه عباس اخويه وجان وجهه كله جروح ورجله تجري دم ولازمها وگوه يمشي وكله تربان اتخبلت من شفته

علياء : عزززه العزاني هاي شبيك ولك عباس شصاير

كلها گمزت من غرفها لان جان صوتي  عالي وبصدمه اتلگيته ونزلته للگاع كلهم التمو امي كامت ادگ وتلطم

ابويه:  ولك ابني احجي شبيك شصاير

( حجه بألم )

عباس : يابه اندعمت انگلبت بالدراجه ويه صاحبي

خابر ابويه رائد حتئ يودي للمستشفئ لان هو ميگدر يسوق رجله تخدر وميسيطر وخواني كلهم بالدوام وره دقايق جوي

فهد ورائد اتخبلوا من شافوه همه الف مره مانعي من الدراجه شاله رائد وطلع وفهد ساق السياره وابويه وامي راحو وياهم

طلعنه كلنه وراهم اتخبلت من شفته هيج اكلتلي هبطه هدت حيلي. ركبوا السياره واني وخواتي ومرت ابويه

  واگفين بالباب صارت عيني بعين فهد خزرني واشرلي طبي جوه انتبهت اني ملابسه حجاب عزززه هاي شلون غفلت ع

نفسي رأسا طبيت جوه رحت لگيت بيبي گاعده ع كرسيها والكليجه ع حطتها وهوستها باوعت لمرجان واشرتلها ع الكليجه

علياء. : استلمي هلمنضر منو راح يسويها هسه

مرجان : انجبي مو وكتج

رحت يم بيبي

علياء : بيبي محتاجه شي اذا تحبين اوديج لغرفتج ترتاحين لبين ميجون

بيبي : اي والله وديني مفاصلي هاجن عليه خل اتمدد اشويه امين جانت مضمومه النه هل هبطه علئ وجه العيد

علياء : انشالله ماكو شي بيبي ليضل بالج اطمأني اول ميجون اگعدج

اخذتها البيبي ومددتها بفراشها ورحت لملمت البيت ورتبت الاستقبال اخاف يجي احد علمود عباس

والكليجه گعدن عليها خواتي ومرت ابويه كملنها بال 1 بالليل يله رجعوا طببوا لغرفته وبدت الملامه والحساب

ابويه : اني اجم مره مانعك من الدراجه ومن صاحبك هذا ليش متاخذ كلامي

فهد :  هيج احسلك ضل مكسر ونايم مادام متاخذ كلام تستاهل وابو زايد

عباس : دكافي شبيكم هسه اني بحالكم
حمدو الله اني جدامكم ومكسر باجر عگبه انجبر واگوم لعد صاحبي شيگول انشل ونكتب مستقبله علئ كرسي متحرك

حيل انقهرت من سمعت بصاحبه مشلول خطيه بعده زغير توه عمره 15 هذا. شراح يفتهم من حياته راح يتبهذل طول عمره

اووف الله يعين اهله اتحمدت الله من شفت اخويه هيج صدگ اليشوف مصيبه الناس تهون عليي مصيبته راحو ولد عمي

فاضل عباس نام لان الدوه بي مسكن الم ومنوم  وبعدين كلمن استقر بفراشه مرت فتره ماكو شي وجا العيد ومو مثل كل

عيد بالنسبه لاهلي  علمود عباس لان اندعم ومكسر ونايم وكل اشوي جاي واحد شايفه من الاقرباء والمحبين

ومـن جهہة طـلآگ علي الاكبر من بنت
  خالي وبالنسبه الي بالي مشغول بمصيبتي وشنو حلها واسأله هواي ابالي مادري وين الگه اجوبتها.

مو مثل كل عيد احسه كأيب عاده عدنه كل عيد الكل تنجمع يمنه ع الغدة بيت عمامي وعماتي واولادهم وجناينهم لان

احنه البيت الجبير يعتبر بيت الجد لان الحمدلله جدو وبيبي عايشين الله يحفضهم ويخليهم خيمه فوگ روسنه  وهمه السبب بلم شملنه كلنه واحد گلبه ع الثاني كلها التمت جنت كاعده بالهول طبوا

بيت عمي ابراهيم طبت زهراء
تتمضحك ولا جن مسويه شي حيل حاقده عليها. سلمت ع مرت عمي وبنات عمي

المزوجات وعايدتهن ومشيت اما زهراء فا ما باوعت ابوجها ولا كتلها انتي شنو عفتها ومشيت وره اشويه جنت

بالمطبخ اني ومرت ابويه طبت هيه وكامت تحجي ويه مرت ابويه اني رأسا انطيتها ضهري وگمت اغسل مواعين

ع السنگ جتي يمي

زهراء : اي علوشه شلونج شنو متعايديني متسلمين تنطيني ضهرج وتمشين ولاجن شايفتني وين راحت الخوه والصداقه تره مبالغه بالسالفه حيل متستاهل

علياء : مو كل شخص يستحق السلام وگفت گدامج وگتلج زهراء اذا تردين تخسريني روحي گوليله بس انتي ماهمتج خسارتي وماهمج كلامي وسويتي الي براسج ومادري شنو غايتج بي روحي من يمي ماكو اي كلام بيني وبينج عشرتنه صفحه ونطوت خل تفيدج اسوالفج امشي شوفي ابن عمج شلون نضره ماخذ عني زهراء رجائا وخري من يمي ولتتقربين ناحي ابد

زهراء : اهااا صرت ماستحق السلام  موو هيج صارت مع الاسف عليج ماوگفت العشره بعينج 

باوعتلها بعصبيه ودمي فاير

علياء : بس گليلي شمصخمه شگايله الفهد حتئ هيج يعاملني واحد منكم يفهمني تره راح اتخبل كلشي مادفتهم زهراء اكو شي غير الگلتي الي

اتغيرت ملامحها بسرعه
اتقربت عليه وباوعتلي بحقد وجن مو زهراء تؤام روحي الي گدامي حسيتها عدوي بذيج اللحضه

زهراء : اي اكو گلتله اشياء عنج  لدرجه بوجهج بعد ميباوع ولو بنص العالم كلها اسلمين علي ميردلج

(ابتسمت بطارف شفتها بستهزاء)

ماسويت شي غير انهو عرفت هو حاطج أباله وشلتج من باله

ومشت لزمتها من امتونها واباوع بعيونها واريد استوعب شدتحجي

علياء. : اوگفي اوگفي شگلتي شنو طلعتج من باله شنو ميردلج السلام شبيج زهراء واعييه للي دتحجي انتي لو تشاقين
انتي مو گلتي اني گتله علياء تحبك بعد شهلحجي

زهراء :  مو اني غبيه اروح للشخص الاحبه اگله صديقتي تحبك وادري بي انتي اباله واجمعكم سوه غبيه وهيج اسوي
(عتت ايدي بقوه ووخرتها وگالت) 

زهراء : فهد الي وميصير لغيري فهمتي

عافتني ومشت جان گلاص بيدي جنت اغسله ومن الصدمه والحجي ضل بيدي وگع وتكسر واني ع وگفتي واحاول

استوعب الحجي يعني شنو زهراء تحب فهد وهيه ماگالتله علياء تحبك يعني شنو مشوهه سمعتي گدامه لدرجه ميردلي

السلام وميباوع بوجهي اذكرت السواه فهد والحجاه والي گالته زهراء هسه فهمت كلشي يعني هاي لعبه من زهراء

واني وگعت الضحيه زين ليش اني شسويتلها وهيج سوت بيه حتئ لو هيه تحب فهد تدري كلش زين هو ميحبني

يعني ماجان اكو داعي اسوي هيج
خيانه وغدر زهراء الي جانت مثل الصاعقه ووگعت علئ راسي ابد ماجنت متوقعه

ايصير بيه هيج بيوم من الايام ومن منو من زهراء من صديقتي بت عمي اختي الي فضلتها علئ خواتي وحجيتلها الي

ابگلبي وامنت بيها حسيت علئ مرت عمي ضياء وامي يحجن وياي ومرجان تلم بالگزيز واني بغير دنيا علئ وگفتي

واحاول استوعب الي صار صحيت من افكاري علئ امي لزمتني من امتوني وتهز بيه وعاطت بوجهي

امي : ولج شبيج يمصخمه جاوبيني

باوعتلها ودموعي ماصيطرت عليها خانتني وسالت شبگتها وگمت ابجي بصوت وشهگات امي اتخبلت اول مره اتشوفني بهاي الحاله واني لا اكدر الزم

نفسي ولا اكدر احجي الي صار ويايه والصدمه الي اكلتها من اقرب شخص الي  طبوا مصطفئ اخويه وقيصر ابن عمي ابراهيم. وكلها اتريد تفهم اشبيه تالي گومتني مرجان وغسلت وجهي.

مرجان : حبيبتي اهدي اسكتي كافي تبجين متگوليلي شبيج توج اسولفين وضحكين

سكتت وماجاوبتها حاولت اتماسك ماريد الكل يعرف بلي صار وماريد زهراء اتشوفني بهذا الضعف بعد الي سوته

علياء. : مابيه شي مرجان عوفيني راح اروح ارتاح اشويه

مرجان. : ولج هو شنو مابيج شي وهذا البجي جنج وحده ميتلها ميت امشي بالغرفه احجيلي اشبيج امشي

حاجيتها واني ابتعد عنها

علياء : عوفيني مرجان الخاطر الله لتلحين عليه البيه كافيني

عفتها وصعدت ركض للغرفه طبيت وقفلتها وگعدت وراها ودموعي ماگدر اصيطر عليهن شلون گدرت اسوي هيج

اشلون اجرئت اشوه سمعتي ما دصدگ ولله لحد الان مادصدگ زهراء يطلع منها هيج شي يربي هسه ابن عمي اشلون

ماخذ نضره عني ليش هيج ياربي ليش والله بحياتي ماذيتها ولا غثيتها بشي جانت اقرب انسانه الي اكثر من خواتي

فتحتلها گلبي وامنت بيها وحجيتلها كلشي اخ فهد اخ اشلون صدگتها ليش ماجيت فتحت الموضوع ويايه

وحاجيتني بي  ليش اكتفيت بالكلام عني وما قبلت حتئ تسمعني بس حقه والله حقه لو يذبحني هسه محد يگله ليش علئ

الي سمعه عليه بس لالا مو اني الي تعوف حقها يضيع مو اني
اني دومي راسي مرفوع وراح يضل

مرفوع اني ماسمح لوحده مثلها اتشوه سمعتي وتطعني بشرفي ولا اسمح لأي احد يضلمني فتحت الباب ونزلت ع

السريع اتلگتني امي والبنات يم الدرج يحاجني ماهتميت فتحت باب الاستقبال ع السريع ودخلت اول مدخلت كلها

باوعتلي جانو كلهم ملتمين زلم ونسوان گعدتهم سوه باوعت الفهد يباوعلي بكره وحقد لافهد لا مو هاي النضرات الردتك تنضرلي بيها باوعت لابويه الي اجه ووگف يمي

ابويه. : يابه علياء شبيج ليش عيونج حمر شنو باجيه

باوعتله لابويه لا يابه مابيه شي بس غسلت  وطب صابون بعيني  شبيكم شو هيج تباوعون عليه توجهت لزهراء وگفت گدامها گامت باوعتلي بنضره وكانها اتگلي شراح اسوين ...

علياء : گومي ويايه
زهراء. : وين شرايده مني
علياء : انتي اكثر وحده تعرفين شريد منج همست گومي لو احجي للكل ع الصار واسوي كارثه بعلي شفتها گامت ومشيت وراها

التفتت باوعت الفهد الي جان يباوع بتلفونه ومتجاهلني عفتهم وطلعت سحبتها من ايدها وصعدتها لغرفتنه وقفلت الباب كلها جانت تسال شكو وشبيج وتريد تفهم شنو السالفه وهذا حقهم بس اتجاهلتهم كلهم  وجان كل همي اخله بيها باوعتلها تباوعلي بنضرات ماگدرت افسرهن گعدت ع طارف الجربايه وجريت حسره فركت وجهي واحاول اتماسك

زهراء بتأفف. : اوي شتردين مني ساحلتني هنا وقافله الباب ماطايقه اگابل خلقتج فتحي الباب خل انزل

باوعتلها ونطقت بكلمه وحده
:ليش
: شنو ليش
: ليش سويتي بيه هيج ليش خنتيني غدرتيني طعنتيني بضهري ليش ماگتيلي اني احب فهد ليش رحتي شوهتي سمعتي گدامه ليش ليش فهميني شسويتلج اني ها شسويلج

: ماسويتي شي بس اني حبيته

: وليش ماكتيلي ولج انتي مخبله لو عاقله انتي مو تدرين هو ميدري اني احبه مو تدرين ميحبني ولا مهتملي يعني ماجان اكو داعي اتشوهين سمعتي گدامه لو گايلتلي ومصارحتني جان ضحيت علمودج والله والله جان عفته الج وشلته من گلبي

: اني ماسويت هلشي عبث ومو مخبله حتئ اسوي هلشي بدون ما تاكد

: شتتاكدين ؟

: ان فهد يحبج

: شلون يعني  مافهمت احجي بوضوح

: مو بس انتي اتحبين فهد هو هم معجب بيج ورايدج وحاجي لعلاء اخويه يعني اني من سويت هيج اتاكدت هو هم يريدج مثل متردي يلا سويت جنتي انتي دائما تحجين بفهد وحبج اله وعنه وعن شخصيته اني حبيته من خلال كلامج عنه گدامي وگلت هيه باجر عگبه تزوج وتروح وتنسه فهد وتعوف كلشي وراها وتطلع وبقيت ماكتلج لان ماردت اخسرج ولا اخسر صداقتنه بس من سمعت علاء شلون گايله فهد انهو انتي عاجبته ورايدج وبنت عمه مو غريبه وبس يكمل بيته يخطبج شبت نار ابگلبي واگلت اذا اسكت انتي راح تاخذين فهد وراح تزوجون واني الي راح اخسر حبي واني ماسمحلج تاخذين سعادتي ضليت افكر اشلون احلها وشسوي حتئ متنجمعون بعد تفكير طويل وصلت النتيجه. وهاي من اتعاركنه اني وياج وگتلج علئ اساس اني كتله انهو انتي  تحبي لا اني ماگتله هيج رحت حاجيته بلسانج وره كم يوم دخلتله وحاجيته وگتله انهو انتي ماخذه تلفوني ومحاجيته بدون مادري وانهو انتي عندج تلفون سري وشوفته هذن المحادثات الي الي فبركتهن اني وحده وياي وشوفتهن اله وگدرت ابكل مهاره انزلج من عينه واكرهة بيج ماهميتيني انتي شستفاد منج مستقبلي وسعادتي اهم منج وشوفي بعد كم يوم يجيج خبر خطوبتي من فهد

: ضليت استمعلها واني بحاله صدمه وذهول كل كلمه تطلع منها سجين ينغز ابگلبي معقوله زهراء يطلع منها هيج معقووووله والله مادصدگ شنو هل انانيه هل كره

: اشلون گدرتي اسوين هيج بيه شلون طاوعج گلبج مافكرتي فهد  اذا سمع
بهل حجي شيسوي  مافركتي يذبحني يگل لاخواني توصل العمامي ولج هذااا شرف وماكو اغلئ من الشرف ولج شلون ماخفتي تتلطخين بدم روح بريئه شلوووون ولج زهراء اني اختج ااختج امنت بيج اكثر من خواتي وفتحتلج گلبي وانتي بوجهي ملاك وبضهري تحفرين

: ميهمني ومتهميني افتهمتي متهميني فهد وحده يهمني وماقبل وحده مثلج اتبوگ سعادتي كرهتج وحقدت عليج لمن سمعت هو يريدج وسويت هلشي بدون تردد ولو يرجع الزمن اسوي الف مره بدون ندم

: حسبي الله ونعم الوكيل عليج 
الله يشوفني بيج يوم صدگيني حوبتي متتعداج صدگيني مع الاسف عليج روحي

لا محاللة ولا ماهوبه الله ينتقم منج فقدت ردت املخها دفعتها بكل قوتي وطلعتها وقفلت الباب شبعت بجي

واني كل همي فهد شلون اباوع بوجهه بعد شلون احط عيني بعينه وهو هيج حقد عليه رغم كل الصار حاولت اتماسك

غسلت وجهي ورتبت حجابي ونزلت كلها تسالني شبيج نوبه اتحجج نوبه اتهرب مدو السفره وكلها اتعايد وتسولف وتضحك

واني بغير عالم انسانه مخذوله مخدوعه اكتشفت اني شگد غبيه شلون ماحسيت بيها شلون هيج غفلت عن تصرفاتها ولو

هيه ابدد ماحسستني بشي گمت دغسل لگيت فهد ع المغسله ديغسل التفتت درجع  لان مالي عين اباوع بوجهه رغم اني

ممسويه شي بس زهراء كرهتني بروحي بعد عمايلها وياي عفته ودخلت للمطبخ غسلت ع السنگ وگعدت بالگاع ونتجيت

بالكاونتر وحاطه راسي بين رجليه وابجي بصمت سمعت صوت احد جاي بتجاه المطبخ رأسا مسحت دموعي وگعدت عدل

طبن البنات يسولفن ويشاقن هاي الي تحجي برجلها وبعيالها وبجهالها وهاي الي تمدح بالطبخ وهاي الي اسوي جان سحبت

روحي بهدوء وصعدت لفيت راسي وبعد تفكير طووويل نمت گعدت العصر كل الخطار رايح البيت نضيف وهدوء مرت

ابويه رايحه لبيت اهلها خواني ماكو صار العشه تعشينه وطبعا ماخلصت من الاسأله وعباس ضل يسال شبيج گمتي تبجين

  گدرت اتهرب من اسالتهم بحجه عيوني يوجعني ونعست صعدت فوگ  توني غفيت حسيت علئ جيلان تگعدني جيلان مو جبيره عمرها 12 _13.

: علياء علياء گعدي

: هممم شكو

: ولج گعدي بسرعه

: ولي من يمي خل انام

: ولج گعدي فهد يصيحلج

هيه گالت هيج اني گمزت من فراشي

: ش..شكو  شيريد

: والله مادري بس گلي. صيحيلي علياء خل تجي البيتنه بس گوليلها  بدون محد يدري

: ها أأأ منو جوه

: بس احنه ماكو غريب

: زين روحي بدلي وتعاي انروح اني وياج بس مثل ماوصاج فهد لتگولين لاحد زين انگللهم رايحين يم سجئ ماشي حبيبتي

: ماشي يلا

نزلت وضليت گاعده وافكر شيريد مني شراح يسوي خاف هم يرجع يضربني النوب بعد ما عرفت السالفه والله لو

شيسوي حقه اتوكلت علئ الله وگمت بدلت ولفيت شالي لبست عباتي ونزلت اتلگتني جيلان متحضره همستلها

: مثل ماوصيتج الي يسألج احنه راح نروح علئ سجئ وهو صدگ راح انروح علئ سجئ لان يجوز هيه گايله الفهد يصيحلي ماشي حبيبتي

: ولج ماشي فهمت

اتعمدت احجي هيج گدامها علمود مشك ولو هيه كل الغباء. متجمع براسها طبيت الهول سمعت ابويه يحجي وكلهم گاعدين
وگفت اسمع

ابويه. : والله همه الناس خوش ناس وهذيج المره گلي وهسه هم

جدي. : بالاول اسال ع الزلمه شوفه شلونه سمعته وحاجي خوانك خاف ولد اخوتك يريدونها وبعدين انقرر لتتسرع اللبنيه بعدها اصغيره

بيبي. : يااا شمصغرها انه بگدها عندي حسين وفاضل وحارث ابطني

امي. :  عمه والله صغيره لسه اشوفها بگد جيلان گلبي مينطيني ازوجها

عرفت خطابه بس علئ منو مادري اني مرجان اجتي جيلان شاورتها گتلها روحي سالي مرت ابويه ع كيفج گوليلها المن

الخطابه هذول طبت وره شويه اجتي حجت وهيه تتمضحك الج عيني الج راح نزوجج ونخلص منج غميتها وطبيت من

طبيت سكتوا عساس مادري
رحت گلتلهم ورحنه اهلي ميعارضون ابد اذا اطلع لبيوت عمامي لان احنه واحد يم

الثاني نعتبر بيت واحد كلنه اهل بين بيتنه وبيت عمي فاضل بس بس بيت عمي حارث طبينه جوه ماكو احد رائد

ومرته رايحين لزياره عمي ماشفته مرتضئ بدوام المهم ماشفت احد بس سجئ وفهد احتمال هو مطلعهم من

البيت لان ممعقوله بالمرتين يخلاله الجو
سلمت علئ سجئ وفهد اصلا ما گدرت اباوع بوجهه حتئ اسلم عليي شويه
وشفت سجئ گامت اخذت جيلان

سجئ. : ولج جيلان همزين جيتي تعاي ويايه دنغسل امواعين العشه هوايه مابيه وحدي

گامت جيلان ببتسامه وراحت وياهه

باوعت الفهد جان. گاعد ع التخم گبالي مرجي ايدي علئ أركبه ويباوعلي وعاگد حواجبه ويفتح ويسد بالجداحه باوعت بعيونه بدون كلام تقريبا عشر ثواني ماحسيت غير عيوني غورگن دنگت ومسحت دموعي.

: ليش تبجين

:  ليش صحتني شتريد مني

: برائيج شريد

:  انت مو. دزيت عليه احجي العندك وخليني اولي

: صوتج نصي لو اگص اللسانج
فوگاها  تراددين

وگفت وباوعت علي حجيت بعصبيه

: گوم اضربني هيني اتهمني مثل ذيج المره گوم .

گام بعصبيه وتجه الي انطيته ضهري جنت متوقعه راح يسوي مثل ذيج المره

: انداري

ماندريت وضليت ع وگفتي
جرني من متني قوي ودارني علي

: من احاجيج حطي عينج بعيني مو زعطوط جدامج اديريلي ضهرج

: كافي فهد كافي لخاطر محمد اني بحياتي مارافعه صوتي بوجه احد ولا متجادله ويه احد وانت اكثر شخص شايف تعاملي وياك شلونه احساس الضلم ديموتني انت ضالمي من السمه للگاع

لزمني من زندي قوي ويحجي بعصبيه

: اني ضالمج اني ولج وهذا الشفته بعيوني شنو

: فهد والله مضلومه والله اني شريفه بحياتي ماحطيت عيني بعين شخص مو النوب اسوي وياه علاقه اني وين وهلسوالف وين ليش مترضه تسمعني خليني افهمك

صار عصبي حييل خفت منه قبضته علئ ايدي كلش قويه گامت توجعني ايدي احاول اوخر ايده بس ماگدر

: ولج شفهم گليلي شفهم. ولج غيري يذبحج بليل اسود وحق ابو الحسن علي حمدي ربج لسه ماحجيت وبعدج اشمين الهوه  كلشي الا الشرف والعرض يلعب بي  انتي داركه لحجم المصايب الي مسويتها والي يكتلك مو واحد وثنين اكثر من شخص علياء من الاخير جيبي المبايل خل اسد سالفتج لا بعلي ابتلي بيج

لزمني من حنكي بقوه وايده الثانيه بعده لازم بيها زندي حيل دياذيني ومستمر يحجي ويصيح بعصبيه عتيت نفسي منه وهو تركني وگعت بالگاع رفعت راسه اله

: كافي تضلمني مالك حق تحاسبني علئ شي مامسويته

: اشلون مامسويه شي ولج شلووووون ...
وهذا كله شنو

:فهد اني انغدرت ونطعنت بضهري خانتني اعز صديقه الي اقرب انسانه عليه ماسويت شي ماجرمت طول عمري امشي بسد الحايط محافضه علئ نفسي وعفتي وشرفي واخلاقي كل الي سويته حبيتك اي حبيتك اگللكياها بالقلم العريض حبيتك وثقت ابنت عمي وحجيتلها وطمعت بحبي الك وخانتني فهد صدگني اني مو مثل ما متوقع اني علياء شنو متعرفني صح اني اسولف واضحك واشاقه ويه الكل ولساني طويل بس متوصل لدرجه اسوي كل هذا.

: هلحجي كله ميهمني بعد ولدورين حجج اجيبها الج من الاخير  لو تنطيني المبايل واسد السالفه لو اروح لخوانج وابوج اشوفهم المحادثات وحجيلهم كلشي وهمه يصرفون وياج

گمت وگفت گدامه وحاجيته بهدوء

: ماعندي تلفون حتئ انطي الك وروح گوللهم مادام ادري بروحي ممسويه شي  ماخايفه من احد لا منك ولا من اهلي ولا من الموت بس خايفه عليك انت وزهراء صدگوني خايفه عليكم  راح اتقابلون الله وانتو ملطخين بدم روح بريئه مضلومه
هذا حدي وياك شتريد اسوي سوي بعد ميهمني اعز شي عندي هو الشرف وطلعتوني مو شريفه....

: لا حول ولا قوه الا لله ولج اني وين وانتي وهلمصايب وين مين طلعتيلي وشبليتيني امشي روحي ولي خلصيني منج خلقتج بعد ماريد اشوفها گدامي لان ماضمنلج شيبدر مني..

گال كلامه الاخير ودفعني بخفه بتجاه الباب ماگدر اوصف الذله والاهانه الحسيتها بهذيج اللحضه اتمنيت اموت بمكاني ولا واصله لهيج مرحله انفعلت التفتت اله بعصبيه

: متريد اتشوف خلقتي مووو ...
اتريد اخلصك.. مني سهله فهد سهله اني اعرف اشلون اخلصك مني ....

للحكايه بقيه

زهراء جهاد

🌟🌟🌟🌟🌟