رواية المغتصب حقها الفصل الثامن 8 - بقلم زهراء جهاد 🤞

#المغتصب_ حقها
البارت -التاسع
...زهراء جهاد"

نزلنه للسوگ اسوگنه اشكال ماخلو شي ماخذوه ومبينين اهله ناس خيره وكل حاجه ياخذن منها اثنين كملنه الملابس والمكياج والنواعم ورحنه ع الذهب اخذولي گلاده اختاروها جبيره بس اني ماحبيتها رجعتها واخذت وحده ناعمه ونازكه گالو مدام اختاريتيها ازغيره اخذي محبس الثاني اخذت محبسين حلوات عجبني وتراجي كملنه كلشي جهازي كمل رجعنه للبيت وره اسبوع رحنه عقدنه  بالمحكمه جا كرار علينه رحنه اني وامي وابويه لازم ابويه لان اني بعمر قاصر وهو وامه وعماته اثنين سلم عليه ابرود اخخ يهل بورد مالتك اعلنه زواجنه شرعا وقانونا. من عاداتنه بيوم عقد المحكمه ايعزمونه اهل العريس وره ماطلعنه من المحكمه رحنه البيتهم بيتهم جان زين صح مو راقي متواضع بس مرتب ونضيف  يفتح النفس اتلگنه خواته زبيده وغسق ونجف استغربت من اسمها نجف اول مره اسمع هيج اسم گعدنه بالاستقبال اني وابويه وامي وكرار وخواته وامه وعماته  خوانه مشفتهم رحنه ورجعنه لا باوع عليه ولا گلي انتي شنو اوي وطبه مرض عساه لا باوع كاتله روحي عليي هو اني اخذته علئ عمات عيني رجعنه للبيت بعد ماحددنه يوم الزواج يعني من اليوم بعد عشر ايام. انخبصن خواتي وامهاتي بترتيب البيت والتجهيزات استغربت من شغله وامي هم لاحضت المفروض يجيبلي مبايل نتواصل يخابرني نتفق شنو هذا شبي هلرجال والله راح يخبلني رحت حجزت يم الصالون وأجرت بدلات وحده للحنه وحده للعرس كملنه كلشي علئ اتم وجه اجه يوم الحنه عزمنه گرايبنه وجوارينه واهلنه رحت للصالون ساعه 11 الصبح ضلت تشتغل بيه وكل اشويه اتگلي عليج الله عيونج لو عدسات تالي ضربتني علئ كتفي » خايبه دبتسمي. اشبيج جا اليوم مو يوم فرحج غير عروس

گلت ابگلبي اي ابتسم وافرح المن شو عريسي ماطايقني ولحد الان لا محاجيني ولا محاجيته كملتني باوعت علئ روحي بالمرايه ولا جن اني ضحكت بهستريه گتلها ولج ابو جاسم وين وديتي سوتلي شعري تسريحه نص مرفوع ونص نازل ومكياج قووي والبدله حمره نفش لبستني مرت عمي حارث الذهب هيه الوحيده الجتي ويايه ضلن النسوان الي بالصالون يصلن ع النبي خجلني 

عمتي » يلا يمه خابرني حمودي اخوج بالطريق

» محمد رضا

» اي

» ليش كرار وين غير هو يجي ياخذني

» ايگول كرار خابر ويتعذر ايگول اكو عمال بالبيت ديسوون الغرفه ومخبوص بيهم

خنگتني العبره وتفشلت گدام ام الصالون كل اشوي ايگولون العروس يلا جا عريسج ياخذج وتروح بس اني الوحيده اخويه اخذني رتبت عمتي الكبوس فوگ راسي ونزلنه ركبنه السياره

» الله يساعدك حمودي

» ياهلا ياهلا بعروستنه شلونج

» زينه

» علياء فدوه لفي نفسج زين ماريد شعرايه تطلع منج اهل المنطقه كلها تعرفني

» بدون متوصيني

» شبيج شو ضايجه

» ماضايجه بس تعبانه صارلي ساعات جوه ايد ام الصالون

وصلنه نزلتني عمتي وتلگني البنات بالهلاهل والصلوات طبيت گبل لغرفه امي نزعت الكبوس عدلت نفسي لبست الحذاء وكلهن ايسألن شبيج ليش ضايجه گتلهن تعبانه

طلعت گعدت.وهاي التبوس وهاي اتبارك البيت مزدحم بالموجودين عماتي وبناتهم وجناينهم وبيت عمامي وخالاتي واهل مرت ابويه والجوارين وناس غربه ماعرفهم اعتقد من طرف العريس علگو الديجي وبلش الرگص والهز انزول عليجن ولا يتعبن ذبن لحم جوي اهل العريس ماستغربت انهو كرار ما جا ولا خابر ولا سلم اتعودت علئ بروده وغيابه بالاوقات الي لازم يتواجد بيها گعدن خواته يمي زمرد منا ونجف منا حيل حبابات ومنطلقات بالحجي والسوالف عكس غسق المخطوبه هيه الثانيه مثل اخوها مو طايقتني اووي وطبهم مرض

زبيده » يالله هذا الجمال كله لاخويه العب بيها ابو حيدر

گلت بگلبي اي دربالج دربالج لتحسدي همداني اذا صدگ هو احتمال انتي معجبه بيه اكثر من اخوج

نجف » فدوه شلون عيون ولج خاف غاشتنه ويطلعن عدسات

علياء » لا حبي طبيعيات شوفي وفتحت عيوني ع. كبرهن ههههه

نجف » لا يابه صدگت صدگت هههه

خلصت الحفله وكلمن رجع البيته عدنه كامره بالبيت اخذنه صور كوومه طلعن ايخبلن ضليت ابتسم واسوي حركات وطز بالدنيا هو الواحد قابل كل يوميه مزوج صعدت نزعت البدله وفليت التسريحه ومسحت المكياج. ونزلت ركض داكل ميته جوع لا ريوگ لا غده وهسه دنيا المغرب الناس خفت بقن بس عماتي و عوائل عمامي كلها راحت بقن البنات يمي جلبت بيهن سجئ وبنات عمي حارث وبت عمي ضياء زهراء ماجتي استغربت متفوتها فايته  فضينه العشه ورتبن البيت وصعدنه ميتين من التعب سولفنه اشويه ونمنه گعدت ساعه خمسه الفجر ضليت اتگلب ميجيني نوم نزلت جوه باوعت علئ بيبي نايمه طلعت للحديقه البيت نضيف والحديقه تزهي وصوت العصافير هوايه حله البيت بعيني يمكن لان اخر يوم الي بي باوعت لگيت جدي گاعد بالحديقه رحت يمه

» صباح الخير جدو

» هلا بنيتي شمگعدج من هسه

» والله جدو گعدت وضليت اتگلب ماجاني نوم

» همزين جيتي لعد تعاي دحجي وياج

گعدت يمه » اي جدو اتفضل اسمعك

» باعي بنيتي المره مالها غير بيت رجلها والمره الزينه صيتها سابقها ديري بالج علئ بيت عيالج ورجلج طيعيهم حاولي اتكسبيهم من البدايه والكلمه الطيبه اطلع الحيه من الزاغور شيگلولج گليلهم صار احترميهم وصوتج لتخلي يعله وشوفي همه شلون راح يحترموج ويحافضون عليج والانسان اذا موزين اني اصير احسن منه حافضي علئ نفسج وعلئ سمعتج ورفعي راسنه لتصدگين طلعتج من هلبيت هينه عليه لو علئ اي واحد بهذا البيت  كبرناج وعلمناج وربيناج احسن تربيه وهسه جا الوكت اجازبين تعبنه. انج تبيضين وجهنه جدام رجلج وعيالج وخلگ الله

» انشالله جدو عند حسن ضنك الله كريم الكاتبه الله يصير وانشالله تعبكم ميضيع

» دگومي حبيبه گومي دنيا فجر واليوم يوم جمعه مبارك والصلات علئ محمد أديلج ركعتين تسهيل امر اليوم يوم زواجج ويوگفلج ابو الحسن علي

» انشالله جدو لتنساني بالدعاء

ودعت جدي ورحت توضيت وصليتلي ركعتين ودعيت الله يوفقني بحياتي
وينسيني ايام المضت وابدي صفحه جديده براحه واطمأنان ويوگفلي بهليوم وبكل يوم. كملت رحت سبحت ونشفت شعري وحطيت مكياج خفيف وكشخت وصعدت گعدت البنات وامي وگعدت شكو واحد بالبيت رحت الخواني وعلگت الاضويه وفتحت الشبابيك وگمت اجر بالغطويات

علياء » ولكم گعدو عاد شنو تنابل گعدو دشبع منكم راح اروح

مصطفئ گمز  » بيش الساعه لااا فاتتني صلات الفجر وين رايحه وتردين اشبعين منه

علياء » غير اليوم عرسي

مصطفى » ها اي اذكرت تعاي ولج تعاي ولله عمي كبرتي وراح. تزوجين وتعوفينه شبگني وگام يبوس بيه » مو هينه عليه طلعتج من البيت ديري بالج علئ نفسج حبيبه

» انشالله خويه  وبسته من خده

محمد رضا » اذا خلصتو من من المشاعر والعواطف طلعوا وسدوا الباب دنام

شمرت المخده عليي » ياخبيث يعني متريد تودعني

محمد » تعاي تعاي يعز عليه وداعج والله بس بعد هاي سنه الحياة بوسني وشبگني ووصاني

علي الاكبر » اهوك علياء نزلي البردات الليل كله مانايم

علياء » وليش مانايم شعندك سهران تفكر بالحب الجديد

اكبر » دنجبي انتي والحب الجديد

علياء » علينه لعد هاي الحاط عينك عليها ياهي

اكبر » ههههه اگلج بس متگولين لحد

» قابل المن اگول اني بعد جم ساعه اروح واعوفكم

همسلي يم اذاني باسم سجئ باوعت عليي عاگده حاجبي

»  منيه سجئ بس لا بت عمي فاضل

» اي هيه

» والله زين ماختاريت مادام گلتلي ماگول لاحد جا خل اروح اگوللها خطيه نايمه جوه.

» جرني وگعدني » لا بربج هيه جوه بايته هنا

» اي والله جلبت بيها وباتت يمي هسه اگوللها لو لا

» لا ولج ثوله شتگليلها اني اريد افاتح فهد بالموضوع.

باركتله مقدما ونزلتهم گوه اتلاثتهم طبينه للمطبخ لگيت سجئ تسوي ريوگ ويه امي غمزت الاكبر واشرتله عليها عضلي شفته وهزلي راسه بمعنئ سترينه لا ننفضح مصطفئ راح اتوضه وصله محمد رضا گبل ع التلفون رحت جريته منه

» گوم عاد ابو گرعه من الصبح ع التلفون دمشي غسل وجهك

» لا ولج عليوه جيبي مو الولد ديحاجيني

» هاك ع السريع

وشمرته عليي رحت بعد عبسي ماشفته ردت اودعهم كلهم لان راح اروح للصالون وبس ارجع تجي الزفه تاخذني مالحگ اشوفهم بعد الا وره السبعه فتحت الباب لگيته توه گاعد يتثاوب

» ها ولك گاعد

» توني گعدت

» شلون صرت

» الحمدلله احسن

» الحمدلله گضيت عمرك اتگلي شوكت اخلص منج راح تخلص مني

» ولج مخبله شعندي غيرج غير اختي واشاقيج لا والله علياء صدگ راح تزوجين

» لا والله بطلت

» انجبي لعد هلخبصه علمودمن  علمودي

» اي والله يعبسي راح اروح

ضلينه انسولف انطيته عكازته وطلعته التمينه كلنا بالمطبخ اتريگنه بوجه بشوش هاي اخر وجبه عائليه ويه اهلي الي كملنه وكلمن راح الشغله محمد رضا التحق الدوامه اكبر طلع عنده سفره بالبساتين ويه جماعته. صارت بال 11 تحضرت ورحت للصالون اني وزينب بت عمي ابراهيم وعمتي وسن وصلنه مصطفئ وراح جان عدها عروس تشتغل
بيها ب12  جتي زبيده علينه
ب 2 كملتني ام الصالون وسوت زبيده وزينب بت عمي ابراهيم مكبجتهن  باوعت علئ روحي بالمرايه  ولاجن اني لبست حجاب والبدله مستره كلشي ماطالع بس وجهي. واديه. ضليت مرخيه نفسي واباوع علئ شكلي الخوف ماكلني راح اروح يم رجال لسه ماعرف عنه شي غير اسمه يارب سهلي يارب اوگف وياي بهليوم يارب وفقني وسهلي امري كملنه وجا علينه كرار استغربت وحقي استغرب  لزمت باقه الورد ونزلت ساعدني البنات بمشيتي من وره البدله حيل طويله كنست الشارع صعدت بالسياره گعدت زبيده ليگدام وزينب يمي.

علياء » السلام عليكم

كرار وهو يشغل السياره » وعليكم السلام ها هيه نمشي

زبيده » اي هاهيه توكل التفتت عليه
ها علياء مرتاحه بگعدتج

» اي مرتاحه

ضليت اباوع بالمرايه عليي يباوع للشارع ويسوق ابد ماباوع عليه  لا اراديا نزلت دمعه مني نهضمت ليش هيج يارب ليش هيج مسحت دمعتي وصلنه ونزلت ع السريع بدون حتئ مانتضرهن يساعدني بنزلتي عفت باب السياره مفتوح ودخلت للبيت نزلن وجني عليه ركض

زبيده » ها علياء شبيج شكو نزلتي بسرعه

» مابيه شي بس معدتي گامت تگلب خفا لا ارد علئ راسي

» ماكو شي عادي هيج شغلات اتصير وياج يلا عيني اني اروح هسه وب 3 ونص تجي الزفه مرخصتجن بنات لوحت بيدها باي الخواتي وراحت استقبلني البنات ودخلت جوه وبدت الهلاهل تعله ماجان اكو هواي ناس بس احنه الگرايب گعدت بالستقبال وعدلت گعدتي فتحت القران قريتلي جم صفحه تسهيل امر وبلكي يروح الخوف والتوتر اشويه جابتلي مرت ابويه قرأن اصغير شلته بيدي هو والورد ضلن البنات ياخذن صور.ويايه ابويه وخواني كلهم طلعو اختفو مدري وين راحو احنه عاداتنه هيج البنيه ميحضر عرسها غير بس واحد جبير ايسلمها بيد العريس سالت امي منو من الزلم هنا گالت بس جدج ابوج يگول ماگدر اشوفها تطلع گدامي خنگتني العبره راح اعوف اهلي وناسي وحبابي صح هو اني مزوجه مارايحه للموت بس فرق وين اهلج وعايشه بنصهم وين راح ترحين بنص عائله كلشي متعرفين عنهم. گتلهم ماريد اگعد مابيه اگعد من التوتر والارتباك اجتي امي يمي

» ها يمه شبيج شو ترجفين وترحين وتردين

» مادري يمه متوتره هواي

» عادي يايمه كل ابنيه بيوم عرسها اتحس بهيج احساس لتخافين يايمه ادعي بگلبج وانخي ام البنين توگفلج بهليله وانشالله كلشي يعدي علئ خير

شبگتها وودعتها

» يمه ادعيلي ادعيلي محتاجه دعائج بهيج يوم

» محروسه بعلي يابعد امج روحي بنيتي راضيه عليج الله يرضه عليج

بستها من راسها واديه ورجعت بوست بيبي

» بيبي سامحيني اذا غثيتج بيوم خليني اطلع من هلبيت والكل راضي عليه

بيبي » انجبي ولج انتي بنيتي ماشيل بگلبي عليج روحي موفقه بحياتج انشالله

ودعت مرت ابويه وخواتي 
صارت بالاربعه الا ربع سمعت صوت الطلق والفرقه قرب فتحو باب الحوش كلهه. حيل انرعبت من سمعت صوت الطلق وهنا بده الخوف الحقيقي دقايق ودخل كرار عليه بقاطه الاسود مادري ليش حله بعيني بهذايج اللحضه فززني صوت الطلق گعد يمي وعدل گعدته لاول مره باوع بعيوني وبتسم ابتسامه خفيفه نقذني من الخوف المتملكني والتوتر المسيطر عليه احس هم ونزاح عليه ونسيت كل تجاهله وعدم اهتمامه الي  بهاي الحركه الخفيفه منه  بادلته النضره والابتسامه ودخلن عماته وخواته وامه وگرايبه ويصفگن ويهلهلن .....هاي الرادها وهاي التمناها بنت اشيوخ لابن الشيوخ جبناها ... ونشكر من گال اخذوها نشكر من عمها وابوها ... وووو كومه من هذن گولات اهلنه وره تقريب عشر دقايق دخل جدي ولزم ايدي وخلها بيد كرار

جدي » وليدي احلا ورده عدنه هديناها الك ياريت تصونها وتحفضها تراهه مو هينه طلعتها من بيتنه

كرار » لا بويه لا توصي حريص هيه بعد صارت منه وبينه وانشالله اكون گد الامانه

حضن ايده بأيدي من عكسي باوعت علئ اهلي كلهن عيونهن مغورگه ماسيطرت علئ روحي نزلن دموعي مسحتهن  وطلعنه الحوش متروس شباب وصوت الطبل عالي والطلق كلها تضرب علگو الجو علگ حطيت ايدي علئ اذني ودنگت ومشيت ويه كرار مطببين السياره بالبيت جانت عاليه وسوده اذكر اسمها جان مونيكا ومزينه بالورد ركبت وعدلي البدله وسد الباب التاف من الباب الثاني وگعد يمي جانت البسمه متفارگ وجهه ناطيته جاذبيه وغمازته بارزه وعطره سابقه شفت امه گعدت بالصدر وعبدالله يسوق باوعت عمتي وسن وخالتي أمل هم ركبن بسياره الضاهر هنه الي راح يرحن ويايه حتئ نسيت اسأل اهلي  منو يروح ويايه   اتحركت السياره وشويه شويه طلعت من البيت كلهم ركبو سياراتهم وطلعت الزفه ضلت عيني علئ بيت اهلي مو سهله اعوف هلبيت ربيت وكبرت ولعبت
بهل بيت وهل فرع انداريت ليگدام ومسحت ادموعي اجت عيني علئ امه اتصفگ وفرحانه بعرس ابنها ابتسمت
ويه ابتسامتها سمعت كرار حاجه اخوه

كرار » عبدالله صدگ جذب صعد الجامات الهوه لعب بينه

عبدالله » غير علمود صوت الفرقه ياخويه

كرار » دصعدهن معود صعدهن وعلگ  اغاني بالسياره 

شفته صعدهن وعلگ اغاني وعلئ كله جانت اغنيه حسام الرسام. هم عريس هم نشمي وهم ربعه يزفونه انداريت اباوع من الجامه.هوايه سيارات ودراجات والشباب والجهال مطلعه راسها من الجامات وترگص ماحسيت اله كرار عصر ايدي بقوه التفتت اله بصدمه

كرار بعصبيه » انداري ونزلي عيونج

خفت من عصبيته ونبرته الحاده گبل دنگت وصلنه لبيتهم وطبينه جوه بالاستقبال وضلن النسوان خواته وگرايبه يذبن هوسات ويرگصن وره تقريبا ربع ساعه گام كرار وطلع يم جماعته صعدني النسوان للغرفه وكل ماگول هده صوت الطلق يرمون من جديد وافز جني عماتي يمي وحاجني ودعلي بتسهيل امري خواته نزعني الحجاب وعدلن التسريحه الجوه الحجاب ونزعني الستريج والبدي بقيت بس بالبدله نزلن خواته اجت يمي عمتي.

» يمه علياء. طيعي رجلج ولتعاندي وسلمي نفسج ولتخافين يمة تصفه سوالف

خالتي »  عيني يمه ابد لتعاندينه ميصير ومحد يخسر غيرج تره تتاذين وترحين بيها 

كلامهن ماهداني بالعكس زاد خوفي ووترني اكثر نزلن وره خمس دقايق سمعت صوت شباب بلش يقترب وهوسات وتصفگ وضحك عرفت زفونه عدلت گعدتي شفته طب وقفل الباب وهنا دگت عندي  ساعة الصفر

وتستمر الحكايه 💞

زهراء... جهاد