رواية المغتصب حقها الفصل السابع 7 - بقلم زهراء جهاد 🤞

# المغتصب _حقها
البارت الثامن ،
.....زهراء جهاد

» ومنو گلج اني ماريد ازوج

التفتنه كلنا بتجاه الصوت.
شفته علي الاكبر بهدومه العسكريه توه جا رحت تلگيته وسلمت عليي

علياء » هلا خويه هلا يابعد گلبي شلونك مشتاقتلك وعلي

اكبر » هلا بعروسته شلونج والله عمي كبرتي وصرتي مره وراح تعرسين

امي » ياهلا يابعد عمري حمدلله ع السلامه طولت هلمره. ليش يايمه تخلي بالي نوب اتصل ماحصلنك ..

اكبر » اي والله يايمه شسوي شغل فوگ راسي شلونج انتي يالحبيبه

وباسها من راسه واديها وسلم ع بيبي وع مرت ابويه وع الكل وگعد

بيبي » ها يبعد جدتك سمعت تريد تعرس

اكبر » اي والله ياجده اريد ازوج وهلمره اني اختارها بنفسي

بيبي » اي يابعد جدتك عاد بهاي حگك. صفنت عليي »جنك لاگيلك وحده ياعليشان
( بيبي اتصيح االعلي الاكبر عليشان من) يومه

اكبر » اموتن علئ اليفهمني قبل ماحجي

امي » يعني لاگي وحده

اكبر » مو لاگي بس حاط عيني علئ وحده

بيبي » ومنهي عاد هاي جريبه غريبه

علي وهو يشرب مي » بعدين بيبي بعدين
اگوم اسبح ورتاح من رخصتكم

بيبي » غالي يبعد جدتك غالي

امي » والله لو منهي تكون اخذها اله مادام هو اختارها علمود باجر عگبه مايرجع عليه مثل ذيج المره هو يتحمل

بيبي » علئ كيفج يامره المفروض اطيرين من الفرح لان ماقفل ع الزواج من بعد سوايه بت اخوج

امي » هاهيه ليش انه شگايله مو توني اگلج ابوس ايد الله اذا واحد منهم راد يزوج

مرت عمي » انشالله اتعيشين وزفيهم علئ ايدج كلهم وشوفين وليداتهم يتراكضون بالبيت بس جريلهم خلگ

امي » امين رب العالمين جا انه شمسويه صابره والله كريم گومي مرجان يمه
هدري التمن ونتي عليوه گومي شوفي الباب

» اهوووك يمه هم عليوه توكم اتگولون مره وراح نزوجها دعوفوه هلاسم شجلبتو

»  هو بعد مشه عليج ولج گومي گومي الباب اتكسرت

گمت واني اتأفف باوعت البيبي » كله من سوالفج حجيه وصفه

رحت ركض حوشنه حيل جبير فتحت الباب

علياء » اي اي جيت شبيكم خبصتو الدنيا

» متفتحيها لعد

» دفوتو فوتو اهلا وسهلا

دخلو ولد عمي حارث علي وحسن وحسين ولد عمي براهيم شهم ويوسف وعلاء وكلهم

علي» ها ولج يالزقجه گالو راح تزوجين.

علياء » استغفرالله هم زقجه وهناك عليوه والله كفرتوني شبيكم اي راح ازوج وتخلص مني

حسين » اعصابج عيني اعصابج

علياء » انت اسكت ابو البلاوي

حسين » يايابه ليش يابلوه ذابهه عليج ولج

علياء » همممم علساس متدري. طب جوه وشوفها.  ( جنت اقصد علئ مرجان گلت بلكت يحس) 

سدو الباب وراكم

يوسف » منسدها الفتحها يسدها

علياء » والله دواكم ذبح

شهم » علئ قبله اليهود

علياء » والله لو عدهم قبله من زمان مكلفتهم بذبحكم

رجعت ارجوع اسد الباب صرت وراها واسدها حسيت احد لزمها وفتحها باوعت. لا يالله ابد ابد مو وكتك فهد ابد اجابك متگلي اجابك واني حالفه ماشوفك وجهي فتح الباب وطب صارت عيني بعينه بعدت نضراتي عنه سديت الباب ودخلت قبله

اسمع خطواته يمشي ورايه ويحجي بالتلفون حسيت المسافه من الباب للبيت صارت شطولهاااا دخلت جوه وصعدت گبل فوگ ماريد اشوفه ولا اريده يشوفني اني حلفت ماشوفه نفسي بس مدري شلون هيج صار اوووف صاحت عليه مرجان دنصب عشه دست علئ گلبي مجبوره انزل امرلي لله نزلت دخلت للمطبخ احنه مطبخنه حييييل جبير اصلا البيت كلشي بي جبير ف احنه مسوين مكان للگعده بالمطبخ شفتهم كلهم ملتمين باوعت منا زهراء ومنا فهد لا هلا هسه حلت الگعده. يارب صبرني وخليني مسيطره علئ اعصابي وتصرفاتي
رحت يم الطباخ اگلب بالاكل احنه عادي عدنه هيج كل اسبوع كل فتره كلها تنجمع لو ع العشه لو ع الغده اجتي زهراء وگفت يمنه

زهراء » تحتاجون مساعده

عجبتني مرجان بردها بصوت عالي

مرجان » همزين توج من العصر ليهسه گاعده اگبالي وطگين بعلجج ماگمتي اساعدينه هسه يلا اتندرتي

اويلي يابه زهراء ضاعت بهدومها بعد متعرف شترد اتقربت من مرجان وهمستلها

علياء » ياخيتي جا غير فهد گاعد لازم نتلوگ اشويه

باوعتلي مرجان وحجت بصوت مسموع

مرجان » يعني البالي ابالج

حجيت بصوت عالي واتجهت للمجمده اطلع خبز

علياء » جا شعبالج غير كلها منتبهه بس ابد مو حلو هيج هيانها الشغله مبينه

زهراء بعصبيه » اگللجن اشو انتن گمت اشمرن بالحجي. مو صوجن صوجي جيت اساعدجن

اني ناطيتها ضهري وارتب بالخبز

مرجان » لا حبيبتي لا سلامتج ممحتاجين مساعده ماشالله بنات عمي حارث ممقصرات روحي انتي گعدي بمكانج هناااك مقابيلهم أقصد مقابيل الگاعدين

اويلي يابه ع البسامير.مرجان من يوم يومها متحب زهراء ومطيقها ودائما جانت تحذرني منها بس اني جنت غبيه
شفت زهراء تفر بيدها وراحت گعدت بمكانها مقابيل فهد والضحكه شاگه وجها بصراحه غرت عليي منها ومن نضراتها بعدين ضربت گصتي بقوه واحجي بداخلي ( ياغبيه شيليهم من بالج المفروض اتغارين علئ كرار مو علئ فهد ضحكت بصوت عالي لا اراديا هوه وينه كرار دغار عليي اشو هيه لسه مالتقت عيوني بعيونه
حجت حنين بت عمي حارث

حنين » خايبه كافي مو هلستيها للبنيه وگعتي ماي وجهها

مرجان » ختولي تستاهل من يومي اكرها ماطيقها وذاك اليوم تشمرلي حجي اتگول  مو مثل بعض الاشياء انحجزت بعدين انشمرت صارت حالها حال الزبايل هلادبسز

علياء » هاي اشوكت اشو اني مادري

مرجان » من زمان ابيت.
عمي ضياء ختولي شيلنها من بالجن

حنين » معودات ليش انتن متدرن بيها شگد تغار وسمانيه من جوه الجوه

رقيه » وهاي الزلاطه كملت

مرجان » كملنه كلشي يلا فرشن النايلون

انطيت السفره المصطفئ فرشها وبلشنه اناوشه وهو يرتب

حنين » درتبن شبيجن واگفات

علياء » ميقبل مصطفئ خيه عود لدنگن

رقيه » ولجن اخوجن مصطفئ شگد عاجبتني اخلاقه وادبه

علياء » ضربت كتفي بكتفها » ههههه خاف اكو شي عاجبج غير اخلاقه

رقيه بخجل وصارت حمره » لا ولج علياء ليش تاخذيها بغير قصد خررب بيومج

علياء » لا يابه لا مو عليه اني الگفها هيه وطايره

مرجان » يمةة اسم لله شوف البنيه شلون احمرت اصفرت يايابه شيسوي الخجل

رقيه اهوووك انجبن انتن مو مال واحد يحاجيجن بسالفه

وعافتنه وراحت گعدت يم حسن اخوها

مرجان » هههههه جبانه

علياء » دمشي امشي اليوم مدري شبيج ولا جن مرجان الاعرفها

مرجان » لا والله اصلا طبيعيه

رحنه گعدنه اني گعدت بين اكبر وبين محمد رضا وفهد گاعد يم اكبر يعني بيني وبينه اكبر ضلينه نتعشه ونسولف ونضحك كملنه وشلنه السفره وگفن حنين وفاطمه بنات عمي يغسلن امواعين ومرجان ورقيه يلملمن المطبخ واني اسوي جاي كملته ورحت ضيفتهم انطيت الاكبر گتله انطي الفهد ضلينه گاعدين سوه ولمه تخبل بين الاهل

عمي حارث » اي ابو الاكبر اسويتوا علئ ذوله الناس

ابويه » انطيناهم بعد موافقه الكل وانشالله يوم الاثنين يجون الزلم ونگطع مهر سيد

عمامي » انشالله الله يتممها علئ خير

اني استحيت ضعت بهدومي جنت گاعده يم مصطفئ وحاطه عكسي علئ رجله باوع عليه

مصطفئ » عود خجلت

علياء » اسكت مصطفئ

عمي ابراهيم »  حرام بيتكم ميسوه فلس اذا طلعت علياء منه

نطت مرجان من يمها واديها كلها وغف مال الجلف
مرجان وليش عود عمو

عمي ابراهيم » يابه والله هيه الي ناطيه روح لهلبيت

باوعت علئ فهد يباوعلي بنضرات مدري شلونها ياربي ليش ماگدر افسر نضرات هل بني ادم درت وجهي عنه

مرجان » ها عبالي اي طبعا لان ماكو مخبله بالبيت غيرها اصيح وتهوس والا من هيه ماكو حرام غير هدوووء وسنطه وراحه بال باوعت عليها وگمت بعصبيه وضوجه

علياء » راحه بال مو اصلا الكل ايريد يخلص ويرتاح مني مادري شمسويتلكم معقوله هاي الضحكه حاسديني عليها لتخافون راح تخلصون ماضل شي تحملوني هل اجم يوم. وعفتهم وصعدت للغرفه ع السريع نمت بفراشي وغطيت راسي كلها تريد تخلص مني بيبي ومرجان وفهد واهلي وحتئ زهراء سوت هذا كله علمود تخلص مني ويبقئ فهد بس اللها دخل ازوج واني اعلمكم بعد بحلامكم مشوفوني خاف من عيد العيد. وره اشويه جني البنات عود ديرضني ويجرن بالغطه ويشاقن والنوب گامن يفكرن بالمهر مال السيد وشلبس
جا يوم الاثنين وتحضريرات وتجهيزات بيت عمامي كلهم التمو بنات عمي بس ينضفن ويرتبن اتغدينه ونص لزمني يرتبني ونص يلا يلحگن ع التحضيرات طبعا غصبن عليه حفلي وجهي صار احمرررر لبست فستان وردي فاتح طويل مخصر ع الجسم وارداناته كيبور يعني زنودي مبينه شعري هديته علئ طوله وشسورته وهو طويل ولبست تاج ناعم وحلو ونزلت گذله صفح ومكيجتني زينب بت عمي ابراهيم هيه مزوجه وخبيره بالمكياج بس ماقبلت طووخ ماحبه
شي خفيف وتنازك بس برزت لون اعيوني بلون اسود وذهبي ولبست كعب المهم كملت كلها اتگول طالعه حلوه بس اني احس نفسي كلشي مو بعيني وما مهتمه ولاجن عروس وفرحانه. بس مجبوره ابتسم اجوي اهله وگرايبه واحنه هم كلها التمت الاقرباء والجوارين والاهل ماجابو ديجي جابو ملايه اسوي مولود گالو خلي الديجي عود من انسوي حنه ماعترضت ولا فتحت حلگي البنات ضاجن وگامن يتأفأفن كلها التمت جا السيد گعدو الزلم بالحديقه والنسوان بالاستقبال طب السيد بالهول وصاحولي من وره الباب حتئ يعقد ردد الشيخ ايات قرأنيه واحاديث عن الزواج سأل كرار ونطاه الموافقه سالني حطيت ايدي علئ گلبي وغمطت بقوه وگلتله موافقه وانت وكيلي اعلنه زوج وزوجه شرعا وبدت الهلاهل تعله رجعت گعدت بمكاني وجني البنات عدلني گالو راح يجي العريس وكلهن لبسن حجابات وتسترن  وره خمس دقايق دخل اني دنگت گال السلام عليكم وجا گعد يمي

كرار » مبروك علياء

علياء » الله يبارك بيك

بس هلكلمتين حجينه حجاهن وهو مدنك لسه يبعد نضره عني غير اعرف ليش لبسني الحلقه ولبسته حلقته الي عرفته همه جايبين بس الحلقات گايلين الذهب هيه العروس تختاره علئ ذوقها وبالحنه يلبسه الها مجرد ما لبسني الحلقه وخواته بوسنه وباركن النه  گام وطلع حيل انقهرت من تصرفه شنو هاي هو بارد لو مارايدني شسالفه شويه شويه خفت الناس اهل العريس سلمو عليه وبوسني وباركلي وراحن
الگرايب اكثرها راحت بقو بس بيت عمامي يروشن بالبيت ويرتبن صعدت فوگ بدلت لبست گلابيه يسموها هاشمي كلش حلوه مخصره لونها بنفسجي غامق وشعري سويته ( ذيل احصان عالي) علئ گولتنه ومكياجي خففته ونزلت گعدت جوه باوعت الحلقه تلمع بيدي ضليت افر بيها وافكر يعني هسه اني صرت مرتبطه ماكو اي خط رجعه هذا مصيري اني اختاريت هلطريق واني الي لازم امشي بي بس حيل ضايجه ومبين عليه من وره تصرفات كرار ليش هيج يعاملني برود وليش ميباوع بوجهي المفروض وره منگطع مهر يشوفني واشوفه بغرفه معزوله بعد اني صرت مرته وحلاله وكلها تسال ليش العريس طلع بسرعه وراح المفروض يبقه فضينه العشه الناس خفت كلمن راح البيته اني صعدت من وكت ضايجه وتعبانه ولا جن اليوم خطوبتي والمفروض اطير من الفرح. اتلمست وجهي ناعم من الحفافه صفنت معقوله اني بيه شي يمنع كرار يباوع عليه من كل عقلي گمزت اباوع بالمرايه واتلمس وجهي طبت مرجان

» ها بعدج گاعده

» ميجيني نوم

» شبيج شو معبسه

لزمتها من اديها گعدتها ع الجربايه وتربعت گدامها وقربت وجهي منها

» مرجان الله عليج وجهي بي شي اني بيه شي مامعقوله والله مليت

» يمةة اسم الله مابيج شي حبيبتي جنج العافيه ليش گلبي منيش مليتي

» من التفكير ليش ميباوع بوجهي ليش بارد ويايه معقوله اني بيه شي

» حبيبتي ليش هيج تفكرين احتمال الولد يستحي خجول جريله خلگ وانشالله كلشي يتحسن هسه انتو انخطبتو وصرتي حلاله اكيد هسه يگوم يجي يشوفج اطلعون اجهزون لعرسكم سوه وتتعودون واحد ع الثاني

» ولج اني ماكاتله روحي عليي والله رايده اهتمام منه بس اشياء المفروض هوه يسويها بس يتجاهلها تدرين اليوم شگد فشلني جدام اهلي بسرعه طلع لا حاجاني لا گعد يمي

» حبيبتي انشالله كلشي ينحل وتتعدل الامور لفي راسج ونامي والله كريم

» هو هم هيج ميته تعب يلا حبي تصبحين علئ خير

» بعد عمري ارتاحي وانتي من اهل الخير

ثاني يوم العصر جنت اغسل بالگراج صاحت امي عليه رحتلها للمطبخ جانت تحجي بالتلفون

» ها اي عيني اي انشالله هاج علياء وياج

» منو يمه

» حماتج زبيده

علياء » الو السلام عليكم.

زبيدة » وعليكم السلام هلا عيني شلونج علياء شخبارج

» برحمه الله عيني انتو اشلونكم

زبيده » كلنه بخير الحمدلله نسأل عليج

» تسأل عليج العافيه بعد گلبي

زبيدة » الله يسلمج عمري أگلج اتصلت علمود نتفق نطلع للسوگ ناخذ الذهب والنيشان

» اي حبيبتي براحتكم شوكت متقررون اني جاهزه

زبيدة » جا اذا هيج باجر انروح الصبح اتحضرو وعود نمر عليكم.

» انشالله شوكت بيش الساعه

زبيده » بالتسعه هم يلا نلحك لو شتگولين

» هاهيه لعد باجر بالتسعه نتحضر

نهيت المكالمه منها وتفقنه انروح اني وامي ومرت ابويه خلص اليوم عادي ثاني يوم گعدت من وكت ورحت گعدت امهاتي وتريگنه صعدت اتحضرت ولفيت شالي مكياج خفيف اخذت العبايه ونزلت ضلينه گاعدات جوه ننتضرهم صارت بالتسعه صعدت اگعد مرجان

» مرجان جوجه ولج گعدي عاد

» هممم شكو من الصباحيات ياربي سترك

» گعدي حبيبي گعدي ع البيت راح انروح احنه وبيبي وحدها گومي كافي نوم

» گمت گمت شگد اتلحين عود اوصيج استاذ كرار هم هيج لحي عليي حته بدفره يطلعج من الشباك

» ههههه يلا گومي اني رايحه ديدگون هورن

نزلت لبست عباتي بوست بيبي وطلعنه

امه واخته نزلن سلمن علينه وصعدنه شفت شاب غريب ديسوق بعدين عرفت هذا اخوه عبدالله امه اتعذرت لان كرار ما جا گالت مشغول عنده درس ميگدر ايعوفه والا هو جان لازم يجي گلت ابگلبي هو اصلا كلشي المفروض ايسويه ماسواه بقت علئ هاي نصبر والفرج من الله

قرائه ممتعه

بقلمي✒زهراء جهاد

ملاحضه النشر راح يصير بين يوم ويوم بالليل انطوني ارائكم ياتره علياء غلطت بقرارها بالزواج لو لا