رواية المغتصب حقها الفصل الحادي والعشرون 21 - بقلم زهراء جهاد 🤞

المغتصب حقها
زهراء جهاد
•••••••••••••••••••••••

التفتت علئ علاء ابن عمي فاضل

علياء » علاء روح جيب زهراء

علاء » ليش شتردين منها

حطيت عيني بعينه

علياء » اريد اخذ حقي منها.

علاء » اي حق علياء

علياء » علاء اتروح اجيبها لو ادز غيرك

گام سجاد اخوها گال اني اجيبها كلها تباوع بعيوني بتساؤل ليش دزيت علئ زهراء واني صارلي سنين ما احاجيها صارت عيني بعين فهد احسه يگول سكتي لاتحجين السالفه راحت ونتهت بس لا والله الا اخذ حگي من كل واحد ضلمني هيه سبب كل الصار بيه . دخلو هيه واخوها تباوعلي من فوگ ليجوه باوعت بعيونها بتحدي گعدت گدامي

علياء » اي بنت العم شلونج

رفعت حاجبها وجاوبتني

زهراء »  شتردين دازه عليه

علياء » والله عندي حساب قديم يمج لازم اصفي

راسا انفعلت ووگفت الحيلها

علياء » اي احساب انتي شگاعده تخربطين لا اكيد اتخبلتي مابيها مجال

زگح بيها اخوها قيصر

قيصر » صوتج گصري لو اگص اللسانج ادبسز متستحين تعلين صوتج جدام عمامج  گعدي وخل نفتهم السالفه 

علياء » هاي اشبيج ليش انفعلتي تره بعدنه ماحجينه شي

زهراء » اي وشنحجي بله

» التفتت عليهم وهسه راح احجيلكم شنو سبب قبولي للزواج من كرار. بلرغم اني جنت ارفض ياهو الي يجيني وماجنت اريد الزواج  كلكم جنتو تدرون انهو اني وزهراء جنه اكثر من خوات وكلها جانت تحسدنه علئ صداقتنه وسوالفنه وضحكه جانت اختي وعلي اختي
جانت اقرب الي من مرجان وجيلان  بس بنت عمي ضيعتني بيدها واني متأكده مامتندمه لان خسرتني
وبيوم ماعرف اشلون عرفت فهد جان رايدني او خالني اباله ما متأكده بالضبط المهم راحت وشوهت سمعتي جدام ابن عمي وهو بكل سهوله صدگها وماسمعني ولا افتهم مني اخذ مني موقف وبس
الف مره گتله اسمع مني مثل ماسمعت منها بس ماسمعني  حيل اذاني بكلماته كرهني بروحي والله بجوني دم هذوله الاثنين ضلموني من السمه للگاع

قاطعني شهم

شهم » وشسوت شلون شوهت سمعتج گدامه

رغم السوته بيه بس گلبي مينطيني احجي الي سوته گدام ابوها وخوانها لان ادري ماراح يسكتولها وهمه واحدهم يطلع اللگمه من حلگ السبع ودمهم فاير يموتوها والله اذا درو وراح ينصدمون بيها فا خلي هيج

»  ضلمتني وخانتني شوهت سمعتي گدام ابن عمي وخلتني غصبن عليه ازوج كرار لان هو جان الحل الوحيد الي يخلصني من التهمه الذبتها عليه

عمي ابراهيم » احجي يابه علياء احجي شسوتلج وعلي اگص رگبتها اذا طلعت صدگ عايله بيج

اني سكتت ماجاوبته. هيه حجت

» ختولي يابه هاي دتخربط گامت تشمر بلاها علئ غيرها شنو نسيتو العار الي جابته عليكم

گام علاء كفخها كل حيله بالگوه جره علي ابن عمي حارث وهنا حجه فهد

فهد اوگفي اوگفي عوفها علاء خل احاجيها باعي عليه مو انتي حاجيتيني گلتي علياء عدها علاقات ومبايل وشوفتيني محادثات مو گلتي اريدك توگفها عد حدها لان اني الف مره نصحتها وماسمعت مني جاوبيني صدگ هلحجي لو اني هم دخربط 

هيه نكرت وگامت اتصيح وكل ما يعله صوتها يكفخها واحد من خوانها بعد التحلف والحجي گامت اتخاف لان هيه من النوع الي تخاف من خوانها وابوها ترجف رجف منهم  عاد اعترفت بكلشي

فهد بعصبيه » انتي حاجيتيني لو لااا
جاووووبي

زهراء » اي اي صح اني حاجيتك وشوهت سمعتها گدامك

وهنا ضربها يوسف اخوها راشدي فر راسها فر بالكوه جرو منها وعمي فاضل گام  يصيح عليهم لان كلهم ملتمين فوگ راسها هيه تحجي كلمه يكفخوها وكلها مصدومه من كلامها وافعالها حتئ اني انصدمت اشلون جرئه الي وگفت تحجي هيج  بنص عمامي وولدهم

زهراء » عوفوني عوفوني معليكم بيه اي اني اني الي شوهت سمعتها اني الي خليت فهد يكرها وبوجها ميباوع اني سويت كل هذا علمود تزوج واخلص منها لان اكرها تعرفون شنو اكرها اشوف الدم ع الخبز ولا اشوفها لان من يوم يومكم وكلشي العلياء علياء احلئ وحده بملتنه علياء المحبوبه علياء المرغوبه علياء. المقربه كلشي الها الدلال الطلعه الونسه السوالف الضحك الشقه حتئ فهد الجبير المهيوب الي كلها تخاف منه وتحسبله حساب حتئ هو لو مامسويه السويته جان هم صار الها واني محد مهتملي ولا احد گايلي انتي شنو
وشنو الفرق بينه هيه بت عمكم واني بت عمكم ليش تفرقون التفتت علئ فهد اي فهد اني الي حاجيتك بلسان علياء اني الي خليتك تكرها ومطيقها اني الي شلتها من بالك لان ماريدها اتكون الك

اني ضليت مصدومه واباوعلها معقوله معقوله هاي الغيره هيج اسوي تحرگ الاخضر واليابس معقوله اتشوه سمعتي لان اشوف اهلي يضحكون بوجهي حاسدتني علئ هاي

وهنا شفت فهد الي انگلب وحش بحياتي ماشايفته بهاي الحاله من يمي گمت اخاف  هجم عليها من بين خوانها ملخها ويصيح ويغلط

فهد » ولج انتي تقشمريني انتي  ادبسز اني فهد وحده مثلج وصخه توهمني بهيج شي ولج اني ورده عرفتها مريضه وبأخر ايامها ماتحملت غش اهلها الي وطلگتها وانتي هاي السنين كلها واهمتني بالگوه جرو منها خوانه رائد ومرتضئ اجت اتموت بيده كل ضربه يضربها اگول هاهيه ماتت بس ولا يهمها تگوم تعيط وصوتها رفيع وعالي شال الدنيا سحلوها خوانها سحل من شعرها وطلعوها راحو البيتهم خواني هم لحگوهم ابويه گاللهم روحو وراهم لا يرحون يموتوها فهد هم طلع وهو يكفر ودمه يفور

وره اشويه كلها راحت گمت الحيلي امشي بخطوات بطيئه. طبيت لغرفتي وقفلتها فتحت الشبابيك كفخني هوئ بارد وريحه الاشجار والنهر  اتوجهت للقبله سجدت سجدة الشكر الحمدلله ياربي الحمدلله والشكر الي ضهرت حقي وبرائتي احمدك واشكرك الف مره الي  سمعت دعائي وعبراتي يارب ماكو الطف منك علئ عبادك جنت دائما اردد كلماتك

( أّصٌبِر أّنِ أّلَلَهِ مَعٌ أّلَصٌأّبِريِّنِ )

وصبرت وتحملت كل الضرب والاهانات والذله والشماته ونضرات الكره بعيون اهلي الي الحمدلله الي نصفتني وضهرت حقي ضليت مده طويله ساجده واشكر ربي

••••••••••

صح انه طيحني الوكت
بس ما اصيحن غيبه
الماجابته الغيره وفزع
ارجه الصياح ايجيبه
وصح حيره حرت بشدتي
ومنها الوجه ماديره
بس الله ياوادم تره
ميخلي عبده بحيره
الفزعته بالضيج وشرد
هم لابد يطيحه الوكت
ويگلي انه دخيلك
وساعتها اذكرنه شحجه
من گتله گومني طحت
ويگلي ضل ما شيلك
گلوله من عدها گمت
وارجعت امشي براحتي
صح طولت بس المهم مارخصيت حجايتي الروح اسممها
لون شامت صبح عكازتي
الما شگلي عينه من الدمع.
باجر اذا مات ورحل
ماشگ علي دشداشتي
كلشي البشر يمرگ علي
عوز وسعاده وشده
وذن كلهن يهونن والضيجه هم تتعده
لكن يضل جرح الاخو الماخذله صفنه بوحده
والصاحب اليحجي علي
وبيتي گاعد گعده
والگالي اصبحلك جسر
وبابه لمن صارت صدگ بلوجه كض وسده الگال صاحب نخوه انه
شو طلع صاحب شرده
المهم انساهن هذن
راحو عساهم لا اجو
ماريد منهم رده
بينت خوتهم جذب
خوت نفاهه وكهكه
مو مال ضيج وهده
وانه بشر كلني وفه
العندي بس عشره عمر
ماعندي عشره مده
مرات تفزعلك غرب
ماحاطها انت ابالك
والمشكله من تلتفت تلگه الاخو جتالك وساعتها متأمن تضل
وتخاف ضهرك ينطعن بليل من اخيالك دنيا ورحل منها الوفه
ورحلت منها الزحمه
ولا  صاحب اطويله
اكو ولا اكو صاحب كلمه

( حكيم الفريجي )

•••••••••••

مادري اشصار جوه ولا نزلت عفتهم خل يراجعون نفسهم ويعرفون غلطهم بيا وجه راح يواجهوني اصلا
فرحانه لان ابني راح يرجعلي ومستحيل انطي الهم بعد اصلا لمن كتلهم اريد ابني محد اعترض ولا حجه

فدوه الگلبك ييمه وعلي گلبي طاگ علئ شوفتك ويريحتك
  حيل ارتاحيت لان الله ماضيع تعبي وعذابي واخذ حقي من كل واحد ضلمني يبقون همه اهلي وماگدر اشمت بيهم لو اكرهم 

ارجع احاجيهم ماگدر اگطع صلت دمي بيهم. ارجعلهم بس الاعرفه ومتأكده منه انهو مارجع مثل گبل لان انكسر بداخلي شي جبير والنكسر مستحيل يتصلح بعد ميهمني شي بالدنيا غير ابني راح افني عمري اله اربي  واكبره واعلمه واوصله لاول مره من ست سنوات احط راسي ع المخده وانام براحه وامان شفت بالحلم انهو اني واگفه ابستان ولابسه ثوب ابيض ونسولف اني  وحيدر ثنينه نضحك انطاني ورده خلها بيدي  وراح بعيد يضحك ويلوحلي بأييدي باي

گعدت الصبح افكر بالحلم ياتره شنو معناته وليش هيج حلم زارني بمنامي

باوعت علئ روحي بالمرايه منو اني معقوله اني علياء حيل تعبانه والحزن مبين عليه عيوني ذبلانات من السهر الضعف مدمرني انقهرت علئ نفسي بيا ذنب هيج صرت جنت ورده وزاهيه كلها حاسدتني علئ وجهي البشوش ولاجن توني داخله العشرين عبالك عمري بالخمسين حسبي الله ونعم الوكيل نزلت جوه البنات دينضفن ابويه والولد كاعدين بالطرمه وامي ومرت ابويه بالمطبخ ديسوون غده رحت يم گعدت يم بيبي هيه ومصطفئ الوحيدين الي ما اتغيرو عليه وبقو طبيبعين وياي رغم بيبي كلش قويه وابد متسكت لا ع الجبيره ولا ع الزغيره صبحت عليها وگعدت. سولفنه شويه سوالف عاديه بعدين طلعت ادورعلئ مصطفئ لگيته گاعد بالطرمه ويه ابويه وخواني اليوم جمعه كلها متواجده صبحت عليهم ردولي بدون ميباوعون بوجهي
بهيج حاله هذا التصرف متوقع

علياء » اگول مصطفئ

مصطفى » گولي

» ماحاجيتهم شو ماجابو حيدر

» لا حاجيتهم فد شوي يجيبوه رايح يحلقله

» زين لعد من يجون گلي لتخلي بالي

» انشالله

درت وجهي درجع للبيت صاح عليه ابويه التفتتله صاحلي گعدت يمه

» ها يابه گول

» انه ادري يبنيتي شايله بگلبج عليه

» مو بس عليك ع الكل بس هلشي بعد ميهمني صار عندي هدف واحد بحياتي وهو ابني بس يرجعلي بعد ماريد من الدنيا شي انت ابويه ولو شسوي وياي ماشيل بگلبي عليك تصرفك جان متوقع ولو غيرك جان ذبحني ع القبله بس انت خليتني اتعذب بصدك الي ونضراتك الي لسه تحز بگلبي احساس الضلم يوجع يابه

ع العموم باب الماضي سديته ومستحيل افتحه بعد لو بمجرد حديث بسيط واتمنه منكم متفتحون الموضوع ويايه كل الجنت اريده تضهر برائتي وتصدگون والحمدلله اله التفت الحالي ونصفني ميهمني شي هسه غير ابني وگلبي طاگ علئ شوفته

باسني من جبيبني بحنيه لدرجه دمعت عيوني وحساسي مينوصف من زمان محد متقربلي ومحسسني بحنيته ماگدرت اتماسك حضنته دفنت راسي بصدره حاجيته من بين عبراتي

» محتاجتك يابه محتاجتك مشتاقه الحضنك من زمان ماحاضني وماماسح علئ راسي.

شدني اله اقوئ حسيته راح يبجي شفت خواني كلهم گامو يمكن ماتحملو المنضر لان جان فعلا منضر يكسر الگلب اب وبنته وشتمعو بعتاب وعدكم الحساب
جن مصطفئ رادها فرصه ديلطف الجو

مصطفى » ولج عليوه التفتي وراج

كلنا التفتنه وگفت ولتفتت شفته حيدوري واگف يم الباب ويستحي يدخل رحتله ركض هو حوشنه وحديقتنه شكبرهن من لهفتي ركضه وحده وصلت يمه شبگته بقوه وهو هم شابگني ويبوس بشعري شميته بقوه افييش يالعافيه شلته وضليت افر بي وهو يضحك وصوت ضحكته ردتلي روحي  ضليت بالخمس دقايق شابگته وابوس ماهديته الا گالي ماما اختنگت

» اوووي اتروحلك فدوه ماما  شلونك حبيبي فدوه الله هاي شگد حلو طالع بالحلاقه

اخذه مني مصطفئ وشاله ويبوس بي
شوفته غيرت الاجواء ابيتنه الضحكه مافارگت وجهي وعيوني ماشلتها من عليي گال هليااااء

التفتتله

» يعيونها

» جوعان

» يگلبي سوده عليه هسه اسويلك حبيبي شتريد اسويلك گلي

خله اصبعه علئ حلگه بتفكير ويباوع فوك

» اممم اريد بسكت وجاي

» بس حبيبي هذا شيشيبعك

» معليه اني اريد

» ماشي يعمري تدلل

گمت سويتله وگعدت اوكله ميقبل ايكول اني اكل قابل ازغير اووي فدوه لابني الكبر وصار رجال وميقبل امه اتوكله
خلص اليوم وهوايه جنت مرتاحه وفرحانه بحيدوري ملالي يومي مرح ونساني كل اهمومي وهو هم انطلق ويه ساره بت اكبر تقريبا اعمارهم متقاربه
  من ايد الايد ماوگع للگاع وكل اشوي وكال ماما جوعان نوبه ماما نوبه هلياء مشت الايام اهلي عادي ماقاطعت احد منهم كلهم احجي وياهم حتئ نسوان خواني حاجيتهن بالبدايه محد گدر يبادر ويحاجيني بس اني ابتديت بس هذا ميعني انهو سامحتهم ع السووه وياي هاي الزمن كفيل بيها اذا گدر ينسيني اسامحهم  حيدر بلشت ترجعله صحته ورد دنفش وصار دبدوب واخذناه اني واكبر سجلناه بالمدرسه لان استحق وبدايه سنه دراسيه اشتريناله ملابس مدرسه طلع ايجنن بيهن واخذناله صور علاقتنه ابيت عمي ابراهيم مانگطعت ولا خلينه هلموضوع ايأثر عليها واخبار زهراء وصلتني خوانها مزورگيها من الكتل مانعيها من الطلعه ومن كلشي وعلاء مكسر تلفونها لان لاگي بي محادثات وشغلات وعدها اكثر من علاقة وهسه حابسيها بالغرفه هذا جان جزائها ع العمله الي سوتها بينه اني وفهد مو بس اني جرحتني واذتني حتئ فهد دمه فاير منها لان وهمته بشغلات ماموجوده وخلته يضلمني وسمعت گايل الاكبر والله لمو خوانها زلم وولد عمي واگفين بعيني جان حللت ذبحها بس زحمه من خوانها بس گايللهم لخوانها اذا شفته گدامي عذروني ع الاسوي واذا تردون اجفي الشر لتطلع گدامي  بس رغم هذا ما اسامحه ع السواه ويايه جان لازم يسمعني مو يجي يضربني

طلعت السنه مال جدي وسوينه الحول وعزمنه كل الگرايب وكلها التمت وخبصه وهوسه ورحنه للزياره الحمدلله والشكر هواي ارتاحيت من زرت احس حمل ونزل من علئ امتوني

بيوم جنه ملتمين دنتغده دگ مبايل مصطفئ گال هاي كرار گلبت وجهي

» شيريد هذا وهم اله عين

ابويه » اوگفي يابه خل نفتهم شيريد ايجوز عنده شي

طلع بره ردله وره دقايق جا وستلمناه كلنه شيريد وما شيريد

» يريد ايشوف ابنه يعني شيريد يگول بيبيته خابصه الدنيا عليي

اكثرهم اعترضو وگالو لتخلي يشوفه حرمي من شوفته  مثل ماحرمج منه

وقسم  گالو لو مهما يصير يبقئ ابو واله الحق يشوفه. يعني هو انطاجياه وصارت الوصايه بيدج ليش اتحرمي منه خلي يشوفه ع الاقل بالشهر مره

گتلهم اي عادي ادزه خل يشوفوه ويرجعو همه هم اهله والهم حق بي بعدين اني ادري كلش زين همه شگد يحبوه ومتعلقين بي اذا كرار مو خوش ادمي هذا ميعني انهو اني هم اصير موخوش ادميه هو مريض باجر عگبه اذا مات ضميري ايأنبني لان طلب ايشوف ابنه وماخليته يشوفه
اذا الانسان مو خوش اني اصير احسن منه ردله خبر مصطفئ.العصر  جانو خواني وولد عمي گاعدين بالحديقه  گعدته لحيدر سبحته وكشخته وعطرته فدوه طلع يجنن گرطته گرط. لابس ملابس صيفيه وزنوده طالعات بيض ثلج والعيون زرگ والشعر اشگر يمه يخبل ماخذ مني العيون والباقي من بيت جده
دگ هورن لبسته حذائه صحت ع الولد جا مرتضئ، ابن عمي فاضل سلم عليه ووصيته يگله دير بالك عليي اخذه وراح وصل لنص الطرمه ورجع ركض عليه بوسني من خدودي وگالي احبج هلياء هسه اجيبلج ككو ويايه راح علئ مرتضئ شاله گام يبوس بي اخذه وطلع وهو يشمرلي بوسات دخلت جوه وكت العشه يالت مصطفئ علئ شوكت يرجعون حيدر گال گالو بالعشره بالليل ضليت الوب اروح هيج وارجع هيج گلبي مثل النار مدري ليش ما مرتاحه احس روحي مضيعه شي الساعه اتعدت العشره وهمه ماكو ما جاه كل اشوي اسال مصطفئ تالي عصب عليه ونزلي بلسانه هو وين وقابل عند غربه وهمه اهله وابو وقابل بالمريخ تالي عفته وگعدت انتضر علئ نار صارت بالدعش ونص ماتحملت رحت وجنت ناويه انهد بي لو يخابرهم لو شوف شيسوي وگفت گدامه وتخوصرت توني دحجي جان يدگ تلفوني اشرلي بصبعه اشششش
گام يخابر واني واگفه علئ نار حيلي انهد وني اشوفه يباوعلي ويگول بصدمه

مصطفى. »  لاااا وشصار وهسه وين خمو متاذين انا الله وانا اليه راجعون اي اي اكيد جايين.

قرائه ممتعه

( زهراء جهاد )