رواية المليحة والمهووس الفصل السابع عشر 17 - بقلم Shaqraa

المليحة والمهووس
الجزء الخامس عشر

_ها رضاوي استريح يمنا نسولف..
_ها لا اخذو راحتكم..
راح طلع والسخيفه تباوعله!!
_هالج عينج عن اخوي..
_اوووي عشتو شلونه هسه هو ..
_ماتكدرين تعررضين لان هو الوحيد الينكرط بينا..
دشوفي شعره انعم من شعرج وبشرته ابيض منج..
_ههه منو يحمد العروس غير امها وام الصالون ..
_اي صدك هو عريس فديته يخبل اخوي..
ضليت اداهرها ..
حسيتها عجبها..
وهو هم نظراته مو خاليه..
تمنيت صدك يصير بينهم شي..
وتصير اطياف زوجته لان يستحقون بعض..

خلصنا عشا وطلعنا اني ورضا واطياف..
حسيت حركات رضا وخجله..
يعني امبين عليه ويعدل بالمراية..
ضليت اداهره ساعة واطياف ساعة..
ثنينهم يمتمتون ..
وصلناها واخذني للماركت..
_ها رضاوي نكول ع خير ؟..
_احم ع شنو !
_ليش متخطبها ترى صديقتي واعرفها عشرة عمر..
وانت تريد تستقر مو احسن من الغريبه..
_خرب يومج ماتفوتج شغله..
اي بس غير اعرف رايها بيه..
_معليك خلي الشغله يمي..

قررت الاسبوع الجاي ورا ماتعقد شمس محكمة..
افتح موضوع القضية..
ورا يومين كاعدين نتعشى ودك جلال ع شمس..
كامت واحنا كملنا وكعدنا طالع فلم حاي نباوع..
دزتلي مسج شمس تعالي للغرفه بسرعة..
كمت اني رحتلها خايفه صاير شي..

_شكو ولج خوفتيني..
_لج تعالي شوفي البلوة ربج اخذ حوبتج..
_شكووو؟؟؟
_روية ام الولد سامعها رافد تخابر..
وكاتلها وكايللها منو هذا كايلة منتصر..
وجاي متعارك وياهم ومنتصر ببغداد..
يكول جلال بالكوة سكت وهدا..

_ههه اي حيل كون يلبسوها براسه..
لان واحد لايك للثاني كلش..
هي بيها هوس مال ولد وهو بس هوس مال طيحان حظ..
_هسه ينتظرو يجي من بغداد باجر حتى يحلون المشكلة..
وعبير كاتلها ودازها الهم لان اخته كايلتله عبير حلقة الوصل..
_يووو انكلب السحر ع الساحر..
يلا لعد متكليلي شوكت تعقدون محكمة؟
اخاف يلبسوها براسه ويتزوج وماريد واني ع ذمته ..
حتى لا تشمت بيه عبيره وتكول كسرها بمرة..
لج لا هسه جاي اكلج باجر نروح..
ماشي لعد باجر احاجي امي والولد..

يوم ثاني عقدت شمس محكمة ارتاحيت..
ضمنت سعادة اختي والمشاكل مراح تخرب حياتها..
تجمعنا اني وامي والولد..
كتلهم اريد اتطلك كالو احسن شي تسوي..
احنا نريد هالشي بس كلنا مانضغط عليج..
كال قاسم..
_اني باجر احاجي المحامي ..
وحقوقج كلها تجيج..

اجيت اريد انام فتحت الفون لكيت المسجات هواي من رقم ..
فتحته لكيته منتصر..
يتعذر ويتوسل وحارك الجو حرك..
حذفت المحادثة وانطيته حضر..
يوم ثاني كال قاسم وكلت المحامي..
بس عندي نصيحة حورية..
انت عزيزة قلبي وصغيرتنا..
ماريد شي يضرج..
_كول قاسم شنو؟؟

_افضل يكون طلاك عادي بدون اوراق وبدون ضرب وعنف وتقارير..
_ليش؟؟
اني اعرفك عقلك يوزن بلد ..
بس ليش هالطلب؟؟
_باجر من تتزوجين وزوجج يعرف بقضيتج..
رح يحس نفسه عنده قدره يستضعفج مثل ما استضعفج القبله..
ومن ياذيج وتوكفين بوجهه ..
رح يعيرج مو الاول سوا كذا وكذا وسكتي..
من غير الناس من تعرف ..
رح تضيف من يمها اسباب..
ولو الناس اخر همي بس الاهم المستقبل اقصد الشخص الترتبطين بي..

_مثل متكول عين العقل..
صحيح كلامك..
_ترى اني شفت هالشي انسب..
لان تعرفين قانونه تعبان..
قابل رح ينطيج حق ويسويج قضيه مهمة..
اشو كله رشاوي وخالي كفل عمتي وماشية الامور..
_هذا هو سوي التشوفه صحيح بس المهم افتك منه..

مرت يومين وكالتلي شمس..
_منتصر راجع ومتعاركين هو ورافد..
ويكله اذا ماتزوجها احرككم ثنينكم..
_اوه شوف هذا البطران..
اليوم يرغمه يزوجها باجر يتوسل بي يطلكها..
ع كد متشوف عذاب واهانة..
هو الشريفه يشك بيها مو رواء بعد..
يمكن ينتحر من وراها..
_خلي شبيج طلعت حوبتج بي هالقزم ..
_ههههه عوع ...

مشى المحامي بالمعاملة وصارت الجلسة مااجه منتصر..
ع اساس ببغداد وشغل ضروري ومااجه..
الجلسه الثانية هم ماكو..
اخير شي رضا ماخذ حيدر ورايح لبيتهم ..
مخابر جلال كايله موجود..
لازمي حيدر ورضا مدمي بالكوة جلال و المنطقة فاكتهم..

ماخذي للمستشفى عنده كسور ورضوض..
بس رضا ضاربه بوجهه بسجين ..
خدة مشكوك من يم العين لنهاية وجهه..
مخيطي اله بس متشوهة جهته اليمنى..
مهددي اذا ماطلك يكتلو خلاص..

رزلهم قاسم ع تصرفهم وشلون تسرعو..
بس اني بداخلي مرتاااحه..
احس ثلجو قلبي بكتلته..
عرفت من شمس حيعقد ع رواء..
كتلها اصلا اتمنى هالشي..
شلون جزاء عدل اخذه..
حيتزوج وحدة سمعتها زفت..

ورا اسبوع طلع من المستشفى وطلكني..
اويلييي شكد ارتاحيت..
احس جنت بقفص وانفتح الباب الي..
اجه وقت الاطير بي بعيد..
بعيد عن قذارته وخداعه..
بعيد عن مشاعره المزيفه..
اخته صديقتي وحفرت جوه رجليه..
وهو زوجي وكعني بالحفرة وراد يدفني..
ماانسى طفلي الراح واني انتظره يوم ورا يوم..
ماانسى احساسي من شفت خيانته..
المهم خلصت منه وارتاحيت..

للحكاية بقية
بقلم شقراء(قمر كانون)