رواية الموت الحي الفصل العاشر 10 - بقلم براء الموسوي

مرحبا حبايبي العسل شلونكم ❤️

#الموت الحي
#للكـاتبة براء الموسوي

ديمة : اباوع للزلم شايله ولد وجهه مليان دم ركزت بي هذا امين بس صدرة متهشم تهشم بالرصاص ووجهه مينعرف من الدم

من شفت منظرة بادن رجلية ووكعت مايعة روحي من هول المنظر

زبيدة : دييييييمة ، لزمتها واني اصيح دنياااا تعاااي ساعدينييي خلي نشيليها، اجتي بسرعة دنيا ودادا ام حسن شالنها ويايه و دخلنها جوه

انوب شافتها وئام واكعه وكامت تلطم بالباب حتى النا خرعتنا فوگ ما احنه مخروعين

وئام : يمه بنيتي شبيها

زبيدة : خليناها على القنفه واني جاوبتها اغمى عليها من شافت امين دنيا بسرعة مي

راحت دنيا تركض للمطبخ جابت دولگه مي اخذتها منها وغسلنه وجها وهي تون ، ضربتها بخفه على خدودها ديمة يمعودة تسمعيني شجاج متكليلي

ديمة : اااخ راسي راسي

وئام : يمه سودة بوجهي ولجن امشن ناخذها للمستشفى خاف هبط سكرها عمت عيني عليج بنيتي شكول عليك ياسر يا مله هاي الجبتنه يمها

ولجن امششن بسرعة خليييي نتلاحكها لتروح تموت لو يعلگ سكرهاا 

دنيا : اي اي رايحة ااجر تكسي واجي 

زبيدة : عطت بيهن ويييين شعدنه بالمستشفى شنو السالفة تره ماعت روحها ما طبت بيها تريله حتى تخبصن رواحجن هيج

ديمة : فزيت على صوت زبيدة ، فتحت عيوني واسترجعت الموقف الصار ، بسرعة بجيت 

وئام : شبيج امي شبيج حبيبتي ليش تبجين يوجعج شي

ديمة : بدموع ماما امين شفته بعيوني صدرة وجسمه كله دم ياعيني يا امين شكد حباب ليش هيج مأذي والله خطية انقهرت عليه خلص دمه بعد منيله دم  

دنيا : من خوفنه على ديمة نسينا اصلا الموقف الصار بره ، كلشي ما افتهمنا غير انُ امين ابن جوارينا الناس ملتمه ودمه بطوله وامه تملخ بشعرها الطالع من الشيله وتصرخ ورا

حرفيًا المشهد كان يقشعر الجسم الام سودة عليه منهاره وبس تنشغ هي وبنتها والولد مشمور بالكاع ومينعرف راسه من رجليه من كد النزف وكل الناس ملتمه عليه تريد تشيله وهي حاضنته وتصرخ شلون الفاقدة

اباوع لزبيدة شلون الي استوعبت ورجعت طلعت تركض لبره هي وام حسن بس وكفهن بابا الدخل للبيت ومبين عليه مخبوص واديه ترجف

زبيدة : هاا بابا الله يخليك فهمنا شصاير شبي امين ليش هيج حالته

ديمة : كمت بسرعة وكفت كدامه حباب بابا شبي امين وليش هيج كله دم 

ياسر : مو وكت الحجي هسه زبيدة شكد ضامه جوه ايدج ؟

زبيدة : ليش

ياسر : بدون ليش شكو فلس ضامته جوه ايدج ترحييين تجيبي فوررررًا شبيج صافنه بابااا مترحييين

وئام : هسه غييير نفتهم شتسوي بالفلوس والله راح توكف كلوبنا

ياسر : مو وكتها يا وئام والله مو وكت الحجي ، ييييله بوية زبيدة فضينييي اريد الحگ الوادم 

زبيدة : صعدت ركض لفوگ فتحت الكنتور بسرعة طلعت مليونين هنه ذني البقيتهن بالبيت الباقي كله ودعته بحسابي مال البنگ خفت ابقي كل الفلوس بالبيت كلشي يصير

اخذتهن ونزلت اركض انطيتهن اله رغم عدم معرفتي بشنو يريدهن بس متاكده الموضوع متعلق بامين اووف يا دنيا حتى الفقير بيج ما خلصان

ياسر : اني طالع للمستشفى لتقلقون عليه اخاف ما اجاوبكم لتشيلون بال

دنيا : طلع بابا ولحكته ام حسن تركض چلبت بي وراحت وياا

باوعت لزبيدة الي زامه شفايفها ومبين عليها التعجب من الموقف الشافته وديمة بس تبجي بحضن امي وترجف سوده عليه والله اكلت هبطة من هبطة

زبيدة : سمعت صوت معين من فوگ يصيح ، اشرت لدنيا صعديله يمعوده تلكي هو الثاني هم انهبط من صوت الصياح

دنيا : صعدت بسرعه لمعين لكيته خطية وجهه اصفر كركم وصوته رايح كد ما مصيح ومحاول يتحرک وينزل بس ما گادر ، كعدت يمه وحاولت اطمنه انُ ماكو شي

رغم بالي يم الولد امين خطية ميستاهل دائما بابا يمدح بي وبأخلاقة دخيلك ياربي من التايهات والله هالبلد كمنه نشوف بي العجب

____________________________

بصائر : كاعدين بالمستشفى ودموعنا ما نشفت اخويه مدري يا نذل مسوي بي هيج سودة عليه لكوا جوارينا على الشارع العام مشوهين وجهه ومصوبي طلقتين بمكانات متفرقه من جسمه وشامري 

نقلوا الجوارين لمستشفى خاص بسرعة وگالوا الاطباء لازمه عملية فورًا واحنه ماعدنه والزاد الطين بله اسلام مسافر ويه اصدقائه لاربيل وبعد يومين ياله  يرجع ونخاف نخابره خاف يطلع هسه والدنيا ليل وانوب يصير عليه شي 

ما عرفنا شلون ندبر فلوس العملية ولو نص المبلغ ضلينا نتوسل بيهم يستعجلون وهمه اذن من طين واذن من عجين ولا كإنما اكو شخص ديصارع بين الحياة والموت وعنده أهل يردو وخايفين عليه
واحتمال بأي لحظة يتعارض اكثر ويموت

شكد كرهتهم وكرهت جشعهم وعدم انسانيتهم جانوا يحجون بكل برود وحقاره وكأن احنه الطبقة الفقيرة بالمجتمع عباره عن حشرات ومالنا اي قيمه سواء عشنا ومتنا محد بحالنا ولا يكلبنا 

تمنيت بلحظتها عندي سلطة واحرگ هالبلد بالفاسدين الي بي شنو ذنبنا احنه الماعدنه شنو منريد اهلنا لو الاولويه للي عنده فلوس واحنه ميحقلنا نعيش والمفروض ننداس بس لان فقره وما عدنه الفلس اليسد حلوگهم

ضلينه نلوب وامي سودة عليه منهاره لا خلت شعر ولا وجه كسرت كلبي وهي تون بحضن ام حسن وانوب اجتي الشرطة حتى تتحرى عن الحادث الصار والظاهر المستشفى مبلغتهم حتى لتتحمل مسؤولية
الجوارين انطوا افادتهم بس اني وامي جنه منهارين وما كدرنا ننطق ولو بكلمة وحدة

مر ما يقارب نص ساعة وانصدمت من شفت جوارينا كلهم جمعوا همه وابو ديمة فلوس العملية وراحوا دفعوا كل تكاليف العمليات المفروض تتسوا لامين وفعلا باشروا بعملية امين اول ما استلموا الفلوس

واحنه نلوب ولسانه ما توقف عن الدعاء اااخ ياخوية يا حبيبي سودة عليه عساها بيه ولا بيك دخيلك يا الهي طلعه منها بسلامه

ضلينا كاعدين ساعات طويلة وماكو اي خبر تنهدت يارب يا قادر مو صعبة عليك تنجي من هالشده نذرًا عليه لو عاش امين لاصوم شهر كامل لوجهك الكريم

ويه ما ختمت جملتي طلع الطبيب من غرفة العمليات وكان مبين على وجهه انه مستبشر ، لزمت كلبي وغمضت عيوني واني اسمع تعليقه على وضع اخوية

الدكتور : الحمدلله على السلامة ، المريض تعدى مرحلة الخطر  ولله الحمد الرصاص ما كان بأمكان خطره وگدرنا نستخرجه بسهولة ، معافا ان شاء الله من رخصتكم

بصائر : بادن رجليه وبدون شعور سجدت بنص الناس واني ابچي انهاريت بساعتها ما توقعت ربنا يستجيب دعائي بهالسرعة ، شكراً ياربي فدوة لاسمك ما فشلتني

كمت واني احضن وابوس بأمي احس الروح ردتلي من سمعت بأخويه عايش والله فرحتي بهاللحظة ما انطيها لاحد وكإني جنت غرگانه وربنا وفرلي سبيل اعبر من خلاله الف الحمدلله الك يا الهي الف الحمدلله

________________________________

امين : نايم على فراش ناعم ومريح بشكل هاي وين نايم اني معقولة فراشي هيج صار مريح لو هاي لان جاي تعبان احس هيج

بديت اشتم ريحة كلور مركزة تخترق خشمي عفست وجهي اني جم مرة كلت لامي لتنظفين بالكلور واني موجود تلعب نفسي من ريحته ومن اشمه يضل طول اليوم معلگ بخشمي

حاولت افتح عيوني بس ما كدرت احسهن متلازكات شنو بس لاعيني رمده ، تحركت اريد اكوم اغسل بماي دافي بس تحركت شاغت عليه صفاحي وانوب كام كل جسمي يوجعني ما كمت اكدر اميز وين الالم بالضبط

فتحت عيني من الوجع والرؤية صارت كدامي مشوشه شويه شويه توضحت الصورة عندي ، باوعت داير مدايري نايم بغرفة وحدي وماكو احد يمي ، اني وين

صارت عيني على جسمي الملفون حاولت احجي بس صوتي مطبگ شنو السالفة ، صفنت وبديت استذكر الصار ويايه

"قبل ساعات"

امين : جنت بالشغل ، اكص باللحم واسمع وسام الكاعد يشرحلي بطولاتة الجذابيه واهزله راسي ، يله اضيع وگت ولو هو راح يطيرني ويا كد ما جاي يچذب

وسام : وامطلكياها على الجرباية واخليكياها تلطم عبالك ما شايفه زلم تخيل ولك تكلي بحياتي ما شايفه رجال مثلك بس انت تعرف شلون تعامل المره

امين : ايييي وبعدين هم صفنت بعيونك وكلتلك عيونك بيهن نظره غريبة وتقاسيم وجهك ولحيتك وشعر صدرك يوديها لغير عالم مو

وسام : اي والزهرة ستوني اجيت اگلك

امين : شمرت قطعة اللحم على الطاولة وضحكت شلتك الزهرة كون على هالجذب اي والله خرب عرضك شكد جذاب هههه والله ضحكتني خرب يومك

وسام : انجب ولك شنو جذاب عليش اجذب يعني 

امين : باوعتله ورجعت ضحكت يا سبحان الله كل وحدة تطلع وياها يطلع حجيها مثل القبلها ولك دورلك سيناريو جديد مليت من هالسيناريو صارلك تقرا براسي من شفتك وشفتني

وسام : كاتلتك الغيرة مني شلون ميتات عليه وانت محد مگلبك

امين : هههه اي صحيح ، رجعت اكمل شغلي وهذا رجع يرطن براسي واني كد ما ضايج متفاعل ويا وكاعد اسلكله علما اخلص شغلي وارجع لبيتي

وسام : اكلك صدك شخبار الاربعينية شو ما كمت اشوفها تجي لهنا بس لا انطتك الكارت الاحمر

امين : تذكرت الصار اليوم وسولفتله على عرضها السخيف والمنحط مثلها

وسام : ورفضت مو !!

امين : اكيد قابل يرادلها سؤال هم عايزني اقبل ، اباوعله غمني بثنين اديه

وسام : اهمداك يغبر على كولة امي ولك ليش رفضت هاي الفرصة تجي مرة بالعمر بدال ما تستغلها تستمطي وترفض

امين : بس لا رايدني اقبل هي هاي العايزة شنو ما اخاف الله لو ماعندي غيرة واقبل بعرض خسيس مثل هذا اذا انت ترضاها على نفسك اني ما اقبلها على نفسي انعل ابو الفلوس الي تخليني اغضب ربي

وسام : ولك لو قابل مو حبًا بيها حصل منها السيارة والذهب واركعها بميت نعال محد گلك ابقى وياها بس استفاد منها وابدي حياة جديدة عن طريقها وانوب اركنها وعيش حياتك واتزوج تاج راسها شبيك ولك فاهي

امين : رفعت الساطور اذا متسد حلگك والله العظيم ارگع هالساطور براسك واخلي مخگ يدعبل بالكاع يله وليييي منا ناقققص

وسام : الكبر يلفك ويلف الينصحك اي والله

امين : ما جاوبته ورجعت اكمل خلصت ورحت غسلت وطلعت ، خابرت اسلام اتطمنت عليه صارله يومين باربيل راح يتونس هو وجماعته خليته على راحته يتونس خطية خلي يتونس شويه ويرفهه عن نفسه

جاي اسولف ويا وشفت مكالمة ثانية تطلعلي من رقم غريب ، رجعت اكمل كلامي ويه اسلام بس الرقم هواي لح بالاتصال سديته منه وجاوبت الوو

اجاني صوت نفس المره الشفتها اليوم ، عطت بيها انتتتتتِ وتاليييي ويااااج چم مره احظرج وترجعين تخابريني من رقم ثاني تره مصختيها والله كافييي فكي ياااخه عنييي

قاطعتني وهي تحجي بسرعة وتبجي خلتني انصدم من صوتها ورجفتها الي مبينه بالموبايل وصوتها جان يتقطع عبالك جانت تركض ، سالتها شبيج ، جاوبتني وهي تبجي وتحجي بهمس

: اسمع امين هسسسسه تطلع من المحافظة متبقـىىىى بيها رجلي شاف مراسلاتي الك وعرفك ومن الضرب اضطريت اعترفله باسمك وشغلك حتى اخلص نفسي منه اسفه والله بس ما كدرت اتحمل التعذيب الله يخليك اشرد ولترجع للمحافظة لحد ما تهدئ الاوضاع
لان رجلي اندل مكانك وهسه جايك 

روح بسرعة وحتى مصرف اني ادزلك لتخاف بس خلص روحك رجلي نذل وماذي شر الدنيا كلها بي اشرد امين فدوه اروحلك لتحملني ذنبك الله يخليك راح اموت من الخوف وجاي اخابرك من موبايلي الثاني وجسمي كله ينزف  

امين : من الصدمة ما استوعبت شجاي تخرط هاي وين اشرد وليش قابل شمسوي اني ، واكف بالشارع وما احس الا سيارة سودة وعالية توكف كدامي وينزلون منها زلم ملثمين

بعدني حتى ما نطقت وما احس الا يضربوني على خشمي بحديدة بحيث بنفس اللحظة غبت عن الوعي وما كعدت الا على لسعة نار اجتني بكف ايدي فزيت واني اصرخ من الم خشمي وايدي

اباوع كدامي مجموعه مال زلم كلهم مثلمين واصحاب بنية جسدية ضخمه ما انكر خوفي بهاللحظة مو على نفسي لا خفت على امي واختي واخويه اذا صار عليهم شي من ورايه والله اتخبل

ضليت كاعد فترة طويلة واصيح من خشمي وايدي خو خشمي احسه مكسور انوب الدم گله نازل على حلگي لعبت روحي وكمت اتقيئ على هدومي حسيت روحي تطلع من الالم والقرف الي اني بي

انوب همه شافوا حالتي هيج اجو وكاموا يضربوني يمكن لو اكول بساعتها روحي طلعت ما ابالغ من گد الالم الحسيت بي كمت اكلهم كتلوني بس حتى اخلص من الالم

خصوصاً اني بنيتي الجسدية جدًا ضعيفة وهمه كتلتهم العضلية اضعاف اضعاف وزني والتموا عليه ماخلو عضم صاحي لا بوجهي ولا بجسمي وفوگاها مجتفيني وما جاي اكدر اقاومهم ولا ادافع عن نفسي

فقدت وما كمت اكدر انطق بحرف انهالوا عليه بابشع الشتائم والفشار الي ميلفظة غير بس العار والماعنده غيره

وانوب من كثر الضرب كمت اغيب عن الوعي وارجع افز على الضربات التجي على الامكان الصاحية بجسمي

ضليت على هالحال لحد ما فتحو الحبال من عليه وشالوني وشمروني بالگاع واخر شي سمعته قبل لا تغيب الرؤية عني

اسمع لك السيد القاضي تاج راسك وراسي امرني وصلك سلام ورسالة ويگلك الصارلك والراح يصيرلك مجرد جرة اذن الك حتى تبطل تلعب بذيلك وترفع ركبتك لفوك وتحلم احلام مستحيل تتحقق

واني اكلك  الراح يصيرلك هسه هو نهاية كل اليلعب باعراض العالم ويفكر ينتهك حرمة بيت راعي رجال وابن شيوخ

ويه ما كمل كلامه شال سلاحه وكل السمعته صوت طلق يدوي بالمكان وبعدها انعدم كلشي كدامي والدنيا صارت ظلمة وما كمت احس بشي 

٠٠٠٠٠٠٠٠٠٠٠٠٠٠٠٠٠٠

فززني صوت الممرضة وهي تحاجيني باوعتلها جانت تحاجيني واتاشر بايدها كدامي وقبل لا اجاوبها طلعت تركض شويه واجه الدكتور وياها

بده يحاجيني واني اجاوبه بس متألم احس روحي تطلع من الوجع ستوني بديت استرجع كل حواسي وياريتني ما استرجعتها خاف قبل شويه جان عندي الم عادي هسه صار الالم مميت

: شجاي تحس امين

امين : بوجع جسمي كله يوجعني دكتور راح اموت وخشمي جاي يدگ براسيييي راااح اموووت

: طبيعي ابني غير مسوي اكثر من عملية لتخاف هسه اخليهم ينطوك مسكن وتصير مثل الورد بس اهدئ ولتشد على نفسك زيادة حاول ترخي اعصابك ولتتشنج تره تتأذه بالزايد

امين : ما جاوبته بالي كله يم جسمي الياكل بيه من الوجع ضليت الوب منا لمن انطتني الممرضة المسكن ورجعت نمت من حسيت جسمي هدئ وخف الالم عني

ما اعرف شكد نمت بس كعدت على صوت الدكتور وهو يسولف الممرضين عن حالتي ، حاولت اتحمحم حتى ينتبهلي وفعلا انتبهلي واجه حاجاني

سألته بصعوبة دكتور امي عدها علم بوجودي هنا لو لا وين ومنو جابني لهنا

: اهدئ والدتك واختك بره والي نقلك لهنا جوارينكم

امين : زين دكتور عادي تدخلهن اشوفهن

: ممنوع يدخلك اي احد لان الشرطة تريد تجي تاخذ افادتك بخصوص الحادث الي تعرضتله هسه راح ادخلهم حتى من تكمل افادتك اوصي الممرضة تدخل والدتك واختك تمام

امين : غمضتله عيوني كأشارة بمعنى نعم ، شويه ودخل عليه ابو معين و وياه اربع زلم ثنين لابسين مدني وثنين لابسين زي شرطة اللابسين مدني عرفتهم حليم واخو الثاني مدري شسمه 

ياسر : هاا وليدي الحمدلله على السلامة يابه اجر وعافية ان شاء الله متشوف شر

حليم : عندك العافية ان شاء الله

يوسف : الحمدلله على سلامتك

امين : رحم الله والديكم والله يسلمكم

ياسر : وليدي هذولة ضباط اصدقاء اخيك يوسف ويردون يسولفون وياك بخصوص الحادث والاعتداء الصارلك

: تكدر تحجيلنا كل التفاصيل الصارت وياك اثناء الاعتداء عليك وهل تعرف منو الاعتدى عليك بهالشكل الشنيع هذا

لتخاف واحجي الصدگ انت ببلد بي قانون ولا يمكن يضيع حقك وان شاء الله اني والضابط وعندك المحامي مالتك كلنا وياك والقانون هم وياك وان شاء الله حقك نسترده ويتعاقب الفاعل اشد عقاب

حليم : واني ما راح اعوفك واضل وراك لحد ما اخلي السافل الوصلك لهالمرحلة يعفن بالسجن واني حليم وابن ابويه ومثل ما كلك الضابط القانون وياك وراح يشن اشد العقوبات تجاه الفاعل

امين : باوعتله وتنهدت يا قانون هذا اذا اني عايش ببلد حاميها حرامها واصلا لو القانون يدري المعتدي عليه قاضي اليه يحكمني اعدام هاي اذا ما محى اسمي قبل حتى لا انطق باسمة

جاوبته ما اعرف وما شفت منو الضربوني لان جانوا مغمضين عيوني وحاجبين عني الرؤية

: طيب عندك عداوات ويه احد تعرضت مثلا لتهديد اثناء عملك او باي مكان حاول تتذكر وتساعدنا

امين : ماعندي عداوات ومحد مهددني اني اروح بطريقي واجي بطريقي

: زين ما كدرت تميز عدد الاشخاص الخطفوك

امين : لا  ... كملوا تحقيق واخذوا افادتي وطلعوا بس انتبهت طول ما جنت احجي اخو حليم جان يباوعلي بنظرات غريبة

ووقت الطلعوا هو رجعلي وحاجاني بنره هادئه حتى محد يسمعه

يوسف : طبعاً انت جذاب وتعرف منو الاعتدى عليك وخطفك بس رافض تحجي لاسباب الله الاعلم بيها

امين : ما اعرف وما مضطر اجذب

يوسف : ولك ذني الدروب تمشيهن عليه حافظهن وباصمهن بالعشرة اني مو زوج واصدك انك ما كدرت تميز عدد الاشخاص الخطفوك ولو حتى من اصواتهم وبنفس الوقت اذا انت ما شفت عددهم لعد شلون وانت تسولف الموقف كلت وكفت سيارة ونزلوا منها زلم ملثمين ورجعت بعدين لفتها وكلت انهم جانوا
مغمضين عيونك وما كدرت تشوفهم

هالسوالف مشيهن على واحد جديد مو خابز وعاجن هالشغل ويعرف دروبه ، على كل حال براحتك بس نصيحة لوجه الله احجي وحاول تغير افادتك

اذا مو لخاطرك فالخاطر الابرياء الممكن يتعرضون لنفس الموقف الي انت تعرضتله ، سلام ومعافا مرة ثانية

امين : طلع وعافني واني اخذني تفكيري النفس الموقف ما انكر جنت اتمنى احجي واكول الصارلي بسبب فلان من الناس بس ادري لا القانون راح ينصفني ولا العشاير راح تساندني

القانون وكلشي راح يتزور ويطلعوا مثل الشعرة من العجيبة ومو بعيده يطلعوني اني الاتبلى عليه وانوب انسجن اني ببداله

ولو وصلت السالفة للعشاير فبكل بساطة اذا يعترف ويكول السوا بيه بسبب قضية شرف ويكدر يزور ويلعب اشكال والوان وساعتها اطلع اني الغلطان
ويدورون فصول براسي

ليش ادخل نفسي بدوامه مستحيل اطلع منها وبكل الاحوال اني مقرر اذا كمت من هالشده اغير رقمي وحتى مكان شغلي اعوفه واشوفلي شغلة ثانية
متسببلي ولا تسبب لاهلي مشاكل ووجع راس

اباوع طبت امي وبصائر بس شافني اجن يركضن عليه يبوسن باديه وبوجهي وامي حبيبتي دموعها نكعت صدري ، جانت حاضنتني وتنشغ بشوغة

ام امين : يبعد روحي يبعد كلبي عمت عيني عليك كون يمتعوب حبيبي الف الحمدلله على سلامتك بيه الوجع ولا بيك يروح امك وسندها

امين : بست راسها حبيبتي يمه شو باوعيلي وانتِ بصورة يا روحي ليش هالدموع هاي اني كدامجن كلشي ما بيه حادث عرضي وصار

بصائر : كسر بايدهم كون كسر والله يما راح اعوفهم بحالهم واصبح وامسي ادعي عليهم واني ناذرة شهر اصوم اذا صرت زين يابه وداعتك وغلاتك عندي يبكل اذان راح ايدي لرب العالمين وادعي عليهم يصيرون بانكس حال

امين : ابتسمتلها آمين

________________________________

دنيا : جنه كاعدين ودخل بابا ثاني يوم بس سودة عليه كُلش مبين عليه تعبان

زبيدة : هاا بابا بشرنه شلون صار امين

ياسر : لا الحمدلله كلش زين وباجر يطلعوا

ديمة : يعني كعد انت شفته ؟ حجيت ويا ؟

ياسر : اي والحمدلله حتى الرصاص المتصوب بي ما جان عميق وحسب كلام يوسف الضربة مبينه مو ضربة موت وانما كرصة على كولته

دنيا : بس جاب اسم يوسف درت وجهي عليه يا ترى شعنده بالمستشفى

وئام : ليش يوسف شعنده هناك

ياسر : اني خابرته هو وحليم ردته يوصي جماعته بأمين حتى يساعدو ياخذ حقه من هالخسيسين لان تدرون جماعتنه اذا مو واسطة مينطون من نفسهم الا ما رحم ربي وهم حليم كال اني اتكفل بقضيتة بس لسوء الحظ طلع كلشي ما شايف ولا يعرف

وئام : وانتتتت شكوووو حاط روحك النه خلگ المشاكل احنه

ياسر : انتتتتِ شبيج الولد ما عنده احد واني كادر اساعدة فليش اتنحس واجر ايدي

وئام : والله العظيم انت مترتاح اذا متجيب مصيبة على راسنا شلون نعيش مرتاحين لا لازم تدورلك دعسوگه تجيبلنا الهم والمشاكل

ياسر : اهوووو ساعة السودة الكعدت بيها هنا لو جاي كبل نايم اشرفلي

زبيدة : وين رايح بابا ما تغديت

ياسر : ما اريد زقنبوت

زبيدة : باوعت لوئام عفيه شكد مزعجه تموت اذا متنكد عليه هسه انتِ شايفته جاي تعبان عوفي بحالة

دنيا : شجاج يا امي تره هواي كاعده تضوجين بابا

ديمة : اي والله حبيبي شلون انقهر وما تغدة هسه حينام جوعان شبيج ماما على الاقل لو عايفته ياكل وانوب سولفوا

وئام : عمي انتن بنات ابووووجن واااالله مو بناتيييى اكلتني وشربتني شبييييجن ولا چني امجن بس اني ويامن كعد حظي حتى يكعد وياجن من اهمده قسمتي الغبره الماذبتني على بس الغبر

زبيدة : ما راضيه بقسمتها الاميرة ديانا ام بيت المعفط

دنيا : ما اسمحلج زبيدة حتى لو بالشقة لتتجاوزين

زبيدة : عشتووو وعساج لا سمحتيلي طز بيج وبعشرة من امثالج

ديمة : بنات رجاءًا لتتناقشون بأي شي بابا تعبان وامين وضعة صعب واني هم ماعندي قابلية اسمع
عفتهم ومشيت اخابر دادا داطمئن على بصائر وامين

لان دادا بقت هناك وما قبلت تعوف ام امين وترجع

زبيدة : هاي شبيها شدعوة هالكد مركزه ويه الولد تره اوفر شنو السالفه

دنيا : هي ديمة حساسة ومتتحمل اكيد تلكيها متعاطفة ويا

زبيدة : الظاهر هيج ، سمعت صوت الجرس طلعت بره ، صحت منو ، اجاني صوت مرة تكول اني

فتحت الباب شفت نسوان ثنين وحدة طويلة ومبوشه والثانية اقصر بس بدون نقاب ، باوعت بوجها احس نفسي شايفتها وحتى صوتها سامعته
سلمت عليه

وعليكم السلام يس عفوا منو حضرتج

جاوبتني ام النقاب

: شلونج زبيدة

زبيدة : اباوعلها رفعت النقاب وحاجتني من شفتها احس بلعت العافية وكلبي راد يوكف من المنظر الشفته

***********************************
لهنا يكون خلص البارت ان شاء الله يكون عجبكم❤️
+ لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

.