رواية الموت الحي الفصل التاسع 9 - بقلم براء الموسوي

مرحبا حبايبي العسل شلونكم ❤️❤️

ولو متأخرة بس كل عام وانتم بالف الف خير يارب تكون سنة خير وبركة عليكم وعلى عوائلكم جميعًا وان شاء الله تكون سنة مليئة بالسعادة والخير والفرح والتوفيق عليكم حبايب قلبي العسل ❤️

٠٠٠٠٠٠٠٠٠٠٠٠٠٠٠٠

‏ظن إخوة يوسف أنهم أوقفوا مستقبله لكن الله استخدمهم لبناء مستقبله وظن فرعون أنه قتل موسى فإذا هو يؤيه ، ‏لا يمكن لأي شيء أن يمنع ماقدره الله لك ، ‏تأكد بأنك لست تحت رحمة الظروف أو الأشخاص لكن ربما هناك رأيً اخر للرحمن

٠٠٠٠٠٠٠٠٠٠٠٠٠٠٠

#الموت الحي
#للكاتـبة براء الموسوي

زبيدة : كاعدة ومطلعة كل ملابسي داريد ارتبهن لان هسوته واصله للضالين ، البجامه من الحجاب متنعرف بي عود اني هم حاسبة روحي على البنات يبعد كلبي

كمت اخلي حجاباتي بالخانه الفوگ وصارت عيني على صندوق مرفوف على جهه ، ابتسمت ومديت ايدي واخذته ، تربعت وخليته بحضني ، فتحته وصارت كدام عيني اشياء امي اووف متكلي شطلعك كدامي هسه اني عايزة

اخذت مشطها الخشب وكماشاتها ، ابتسمت مسترجعة ايام زمان هالمشط من سنين جان عدها وما جانت تقبل تمشط غير بي لان تخاف على شعرها الطويل ليتضرر ويتقصف

اتذكر ظفيرتها شكد جانت طويلة وكثيفة وريحة شعرها فد طيبة بشكل ومن كد ما جانت معتنيه بي كبرت وشيبت وهو بنفس طوله وثخنه

باوعت للكماشات هههه هالكماشات الاربعة بابا صاغهن الها ذهب من جابتني وذاك يوم ولحد ما توفت وهي غيرهن متخلي بشعرها تالي السرطان الحقير وكعلها شعرها وحرمها من مشطها وكماشاتها التحبهن

رفعتهن وشميتهن حيل اوووف يا يمة يابعد روحي شكد مشتاقتلج ومشتاقه احضنج وادفن راسي بركبتج واشتم ريحتج الطيبة اااخ يروحي اااخ
حيصير فوگ السنة واني لا حاضنتج ولا شامتج

ما تحملت بجيت والله هواي مشتاقتلها وعاجبني اشوفها وافضفضلها الي بكلبي ما جان عندي غالي بهالدنيا غيرها تالي ربنا اخذها وعافني وحيدة

بلحظتها دعيت رب العالمين من كل كلبي انُ ميخليلي اعز احد مثل ما جنت اعز امي لاني لو عزيت احد مثل ما جنت اعز امي وعافني يمكن اموت لاني مو حمل فراگ بعد

وشكد اني احب بابا وخواتي واموت عليهم همه ودادا ام حسن بس لو نجي للصدُك ولا واحد بيهم وصل لمكانة امي بكلبي وما اعتقد ممكن يجي احد ويوصل لمكانة امي عندي ابد

سمعت صوت موبايلي يدگ تنهدت ومسحت دموعي باوعت لكيتها خالة رميم خير ان شاء الله شجابني على بالها اليوم ، جاوبتها الوو

رميم : قبل السلام والكلام كليلي فارغة

زبيدة : استغربت لهجتها ، ما فهمت شتقصدين

رميم : فارغة يعني عندج شغل لو لا

زبيدة : لا ماعندي بس ليش

رميم : لعد زين سمعي بيج حيل تطبخين لـ30 نفر

زبيدة : شنو !!

رميم : استغفر الله شبيج يمه جاي اكلج تكدرين تطبخين لـ30 نفر طبخ طبخ يعني اكل

زبيدة : فهمتج والله بس ليش جاي تساليني

رميم : عندي عزيمة السبت كل المدراسات وصديقاتي هنه وبناتهن فاريدج انتِ تتكفلين بكلشي وطبعًا باتعابج

زبيدة : شبيج خاله يا اتعاب هاي ، اني من شوكت ادور وياج هالسوالف ترة عيب هالكلام

رميم : انجبي ولج انجبي هذا شغل مابي مجاملات اني مخابرتج حتى افيدج واستفاد منج يعني ما مجملتج بشي اني

وبعدين انتِ تعرفين الوضعية بالبيت شلونها كلهم ملتهين مرت علي مكضيتها دياحه ومتلفي للبيت مرت كريم ملتهيه بجهالها ومرت جياد سودة عليه ترجع من عيادتها شحالها ميهينلي بيها بالعطلة اصخرها

وتدرين ما استنظف اكل للعاملات يطبخن فگلت ليش اضل اطلب من المطعم نفس الاكل الي مابي نفس وهم ما معروفة مصادرة خو اكلج الج هم نظيفة واكلج يخبل ويرفع الراس

وهم انتِ بعدج ببداية مشروعج وتحتاجين تشتغلين هواي حتى الناس تعرفج فليش ما تطبخيلي وهم تفيديني وافيدج ، هم تشتغلين وتكسبين وهم بلكي تستفادين عن طريق صديقاتي وينفتحلجن انتِ والبنات باب رزق على ايدهن بواسطة هنه فايخات لا يطبخن ولا يعرفن شنو مطبخ

زبيدة : والله ما اعرف شكلج بس والله احسها عيب وفشلة يعني عفت الدنيا كلها اجي اخذ منكم

رميم : ديله اليسمعج يكول تكتين مستحه ولج زبد شو صايرة خجولة ومؤدبة ما متعودة عليج هيج ام فليس من شوكت صايرة صاحبة اصول لهالدرجة ما عرفتج والله

زبيدة : ياا خالة شبيج شو طلعتيني صفر

رميم : وشبابه بعين العدو شبيج يمة والله اني ماجاي اشاقه وياج وخاف عبالج عمج گلي ترة الله يشهد ميدري وهسه من يجي اكله واخلي يورق ههههه هسه ولج كليلي تجيني عگب باجر لو لا ترة فتيتي كلبي

زبيدة : ضحكت تمام بس كليلي انتِ شنو عاجبج اطبخ ، تمشيت اخذت ورقة وقلم وبديت اسجل وهي تردلي ، ضليت اسجل واسجل وكفت ، شنو السالفة خاله شدعوة هالگد ادري عازمتمن حتى كل هذا تردي

رميم : ولج كل مديرات المدرسة صديقاتي والمدرسات وبناتهن واريد سفرة مرتبة تليق بيه لان ما معقولة اقدملهم شلون ماكان

زبيدة : طيب شنو مناسبة العزيمة

رميم : راح اطلع تقاعد واريد اسويلي عزيمة وحفلة بسيطة اودع بيها خدمتي

زبيدة : ضحكت والله ياخالة سوالفج ، رجعت اسجل وياها ماشاءالله ماخلت شي ما خلتني اكتبه من مروكات للدولمة للمعجنات للحلويات اشكال والوان

تذكرت وئام والله جانت تسوي حفلات وعزايم ببيتنه مسودنه حتى منظمات جانت تجيب بحيث تصفن الوادم على عزايمها وترتيبها ، ابتسمت سبحان مغير الاحوال بعد ما چنه من اترف الطبقات المخملية بالمجتمع هسه صرنا نطبخ ونخبز للناس بس في سبيل نحصل الفلس

منو يصدك زبيدة النوح الجانت كل سنة تبدل سيارة شكل وموديل شكل وشرط موديل السنة الجديدة ومتمر عليها سنة اذا ممسافره بالقليل 3 مرات من غير النشاطات الثانية الجانت تسويها هسه صفت بيها الدنيا مطردوه ومحد يقبل يشغلها بشهادتها ولا كامت تشتغل طباخة هم ضحكت الله عليج يا دنيا

سديت الدفتر ورجعت كملت ترتيب كنتوري ، كمت بدلت ملابسي ورفعت شعري ، سمعت صوت الجرس
اكيد هاي لو دُنيا لو ديمة ، نزلت بسرعة افتحلها الباب لان بس اني ام حسن ومعين بالبيت و وئام دوامها ظهري اليوم

نزلت بسرعة وفتحت الباب صارت بوجهي دُنيا ، اباوعلها عيونها حمر دم مبين عليها باجية ، حاجيتها بلهفه شبيج ليش هيج عيونج ، صاير وياج شي ؟ احد مسويلج شي ؟

جاوبتني وهي تمسح عيونها ومبينه دتحاول تتهرب مني

دنيا : شبيج زبيدة اكلتيني وشربتيني مابيه شي بس شفت موقف بالطريق وتأثرت شويه لتخلين ببالج ، ما كلتيلي بابا وديمة اجوي

زبيدة : جاوبتها بشك لا بس هسه على جيه

دنيا : لعد خوش اني رايحة اسبح واصلي شويه وخري

زبيدة : دفعتني عنها ودخلت هاي عليمن دتضحك عبالها هالكلاوات تشمي عليه ، ادري بيها حساسه بس مدري ليش مداكدر اصدگها واحس اكو شي ثاني بس كالعادة هي منغلقه ومتحب تحجي

سديت الباب واجيت ادخل واستوقفني صوت الجرس عفيه باب ولا يسكت تكول باب حفافه
طلعت فتحت الباب

دخلت ديمة بس شنو الخدود حمر والعيون تلمع لا وحاضنتلي السجل المشبوه مالتي وتغني ، دفعتني حيل على الباب ودخلت ، لزمت الباب بسرعة هاي شبيهم اليوم مستلميني تدفع الكبر اي والله

اباوع للانسه تفتر بروحها وتغني ليلة الالبسلك الابيض
وطايرة عبالك باجر عرسها ، هزيت ايدي عائلة مال مخابيل والله فلا اكو واحد عاقل بهالبيت غيري

اجه بابا وتغدينه بس اني ويا وام حسن ومعين الافنديات بقن فوگ محد قبلت تنزل تتغدة مدري شبيهن اليوم وحدة وجها يضحك والثانية وجها يلطم

_________________________

دنيا

دنيا : كعدت من النوم ، اباوع للغرفة ظلمة وبس ضوه التيبلامب الخفيف مشتغل وخواتي نايمات هنه وام حسن شنو السالفة بيش الساعة هسه ، جريت موبايلي اباوع للساعة بـ1 بالليل حيييل هاي اني هالكد نايمة

يبوو فوكاها راحت عليه صلاة المغرب استغفر الله اعوذ بالله منك يالشيطان اول تالي ااخر صلاتي هيج

كمت من فراشي لبست روب فوك تراكي لان الجو بارد
طلعت من الغرفة ورحت بسرعة توضيت وصليت
كملت صلاة وكعدت اسبح ، اباوع لغرفة معين كالعادة
ضواها مشتغل خطية طول الليل ديضل كاعد ابد مجاي ينام عدل

لميت سجادتي وكمت حتى انزل اكلي شي بس كلت خلي اسأله اذا جوعان حتى اسويله اكل ويايه ، دكيت بابا غرفته ودخلت لكيته كاعدة ومنتچي براسه على الحايط وصافن بالفراغ واصلا محس بيه من دخلت
حمحمت حتى ينتهلي ، باوعلي ابتسمتله ابتسامة صغيرة سلام

معين : و عـ عليكم السلام

دنيا : شعندك كاعد لسه الوقت متأخر وموزين عليك السهر

معين : شبـ شبعان نوم

دنيا : هاا ، زين اني حروح اسوي اكل تاكل ويايه مدامك كاعد

معين : لـ لا شكراً بالعافية

دنيا : هزيت راسي واجيت اروح بس وكفت ، بيك شي ؟

معين : مابيه اا انتِ بيج شي ؟

دنيا : لا لتخلي ببالك مابيه شي عفته وطلعت بس استوقفني صوته

معين : حلمت باولادي وكعدت ممـ مخنوگ وما كدرت ارجع انام بعد وانتِ

دنيا : درت وجهي عليه وتنهدت

معين : اذا تحبـ بين تحجين اسمعج

دنيا : اجيت كعدت يمه ، راح احجيلك بس الموضوع يبقى بيناتنه 

معين : اكيد

دنيا : تذكرت الصار اليوم الظهر

* عودة  *

دنيا : عفته واجيت اطلع وما احس بي غير يجرني عليه بحيث كد ما جرني عليه بقوة انضربت بصدره

يوسف : هاي ويامن هالحجي ولج

دنيا : بعصبية ، وياك كافي حاط گورك من گوري متستحي شنو طفل لو مراهق انت ، اني وياك انتهينا كافي يا اخي حاط بالك يمي عوفني بحالي تره والله طلعتها لروحي

يوسف : لج انتتتتِ فد قندرة واحط بالي يمج خاف عبالج ميت عليج لو مكطعها لروحي علمود شكولج الج**** ترة حق ربج لعبانه روحي من وجودج ولوما صداقة ابويه وابوج واكفه بعيني والله لاهجم هالشركة على راسج بس الواكف بعيني همه وما اريد
صداقتهم تخرب بسبب انسانه تافهه مثلج

دنيا : والله التافه يعرف نفسه منو وبعدين هاي ابوك وابويه واكفين بعينك وهيج دتسوي بيه لو ما واكفين بعينك شتسوي

يوسف : يابه والزهرة ام الحسن يلوما همه جان ركعتج ميت چلاق وطردتج منا لان اشكالج المريضه ميشرفني تشتغل ويايه بنفس المكان بس من لا چارة متحملج

دنيا : هه على اساس هي بأيدك وتطردني ، وجودي هنا يتحكم بي عمو يحيى وكفائتي بالشغل ولا انت ولا عشرة بگدك يكدرون يطردوني منا افتهمت

يوسف : ههههه صدك والله

دنيا : اي ، اباوعله ابتسامته اختفت ودفعني متوجه لمكتبه ، فتح جرار بالمفتاح واخذ فايل طلع منه ورقه  واجه شمرها بوجهي

نزلت اخذتها وبديت اقرا ، كان مضمون الورقة انُ كل اولاد عمو يحيى الهم نص الحصة بالشركة والنص الثاني لعمو يحيى ، بلعت ريگي وباوعتله يعني كلامه صحيح طلع فعلا عنده اسهم هنا ويكدر يطردني

يوسف : هاا ما كلتيلي طلعت اگدر اطردج لو لا ؟

دنيا : سكتت ما جاوبته مدري ليش احس لساني انباع وما گام ينطق  ، اباوعله ضم اديه وباوعلي بنظرة غامضة ما فهمت مغزاها

يوسف : الراح احجي هسه مو حتى ابررلج ولا حتى اقنعج هم بس يمكن انتِ من اكثر الناس اليعرفوني ويعرفون اخلاقي وإني مستحيل اسوي حرام واتحمل ذنب غيري لاي سبب من الاسباب خصوصا اذا كان هالشخص رخيص مثلج

والشغل الدزيته الج ما كان الا اختبار لقدراتج بالشغل حالج حال اي موظف جديد يتعين هنا لان مثل متعرفين احنه هنا شركة رصينة متستقبل ياهو الچان

نفس الفاشلين امثالج ومثل ما جنت متوقع من اول ضغط عمل اجاج تفرعنتي ومديتي لسانج الي اطول من النعال بدل ما تكملين شغلج على اكمل وجه وتحطين اصابعج بعيني وتسدين حلگي

لكن كالعادة انتِ مو حمل مسوؤليه واقل ضغط يصير عليج يخليج تنهارين بهالطريقة لا وتذبين الصوج على الدازلج الشغل وتطلعي مستقصدج وكأنج محور الكون وماكو غيرج نفكر بي

دنيا : كلامك قمة بالتناقض اذا هالضغط مو الغرض منه تطردني لعد شنو اختبار مثل متكول !! استحالة لان لو ناسي اذكرك تهديدك وتوعدك الي قبل كم يوم شلون كان

يوسف : ما انكر إني ما طايق وجودج هنا ولا طايقج كلچ على بعضج وفعلا اريد اليوم قبل باجر اسلمج الباب ومنتظر اقل ثغرة تبدر منج حتى اطردج واني مرتاح

لكن لو ما حصلت هالثغرة مستحيل ابيع مبادئي واطردج بدون سبب مو اني الي افكر بهالطريقة هاي،
لا تربيتي ولا مبادئي تسمحلي اتحمل حرام لا ولخاطر منو لخاطرج انتِ !! شنو مسودن

واصلا مَن تكونين انتِ مجرد حشرة لا وجودج يضيفيلي ولا عدمه ينقصني انتِ لا شيء بالنسبة الي مجرد موظفة تشتغلين عدل تبقين تقصرين تلزمين الباب حالج حال اي موظف هنا وتره احنه ناس منمشي بالواسطات وانتِ تدرين

دنيا : كلامه خلاني استهضم والدمعة صارت بطرف عيني ، عمري ما توقعت إني ممكن اسمع منه هالكلام ، جاوبته ترة انـ .... قاطعني

يوسف : اش اش كافي لغوة زايدة انطيتج هواي من وقتي تره ، عندي شغل وما فارغ للكلام التافه والنقاشات المالها داعي ، لمي الفايلات يله و روحي كملي الساعة بـ3 اني اطلع عندج ساعة ونص  استعجلي يله اريد الفايلات قبل ليخلص وقت الدوام

دنيا : عافني وراح كعد يكمل شغله ولا كأنه سمعني كلام ينهش الروح نهش ، رحت لميت الفايلات ودموعي تنزل عشره عشره حيل تأثرت بكلامه
ولاول مره احس نفسي ذليله وانسانه بلا قيمة لدرجة تخلي المقابيل يحاجيني بهالطريقة بدون ميتهم لمشاعري وكإني جماد ومياثر بيه الكلام الجارح

كملت لمهن ورحت فتحت الباب واخذتهن وطلعت متوجه للقسم الاشتغل بي ، لاكني جياد بالطريق واول ما شافني اجاني بسرعة

جياد : اوكفي خويه دنيا ، هاي ليش شايله كل هالفايلات وحدج خاف لا سامح الله توكعين وتتكسرين بدون متنتبهين جيبيهن اني اشيلهن

دنيا : اخذهن كلهن من ايدي ، جاوبته بصوت مهضوم شكرًا ، باوعلي وفتح عيونه

جياد : بيج شي دنيا هاي ليش عيونج حمر هيج ؟

دنيا : ابتسمت بوجهه لالا مبيه شي بس احتمال صار عندي تحسس من الجو ، اباوعله هزلي راسه بدون ميجاوبني

جياد : بلا زحمه عليج تعالي افتحيلي الباب خلي ادخلهن الج

دنيا : فتحتله الباب ودخل كدامي واني ورا

جياد : وين مكتبج خلي اخليهن عليه

دنيا : باوعت لجيهان وست راشدة اول ما حاجاني رفعن حواجبهن وباوعلي بنظرة غريبة ، اشرت لجياد خلاهن وابتسملي وطلع ، رحت طلعت فايلات بيض واسمع واحس بهمسهن وتأشيرهن عليه

اخذتهن وكعدت على مكتبي اسويهن وهنه مستمرات يبسبسن ، شلت راسي وحاجيتهن بجزع اكووو شي

جيهان : وانتِ منو يمج ليش هالتحسس

دنيا : خزرتها ورجعت اكمل عبالهن ما ادري ديحجن عليه ، اباوع لعواطف دخلت بس شافتني عگدت حواجبها

عواطف : هاي شدتسوين

دنيا : جاوبتها بنتره دابدل الفايلات لان الاستاذ طلع رايدهن بلون ابيض مو ازرگ واصر اله ابدلهن وهالتشوفين كاعدة اشتغل ، اباوعلها تنهدت واجتي كعدت يمي ومسحت على ظهري

عواطف : لتضوجين تره استاذ يوسف شديد شويه ويحب كلشي بالشغل يتم حسب الاصول فلتاخذين على خاطرج تره هذا اسلوبه ويانه كلنا مو بس وياج هو شويه جاف بس والله حباب وكلش محترم

دنيا : هزيتلها راسي متنهده ما ضايجة حبيبتي لتخلين ببالج بس تعبت شويه لان ممتعوده على الشغل

عواطف : اكيد ؟

دنيا : حاولت ابتسمتلها اي اكيد

عواطف : يله لعد يا سباعيه اعوفج تكملين واني هم اروح اكمل حتى منتأخر

دنيا : كامت وعافتني واني رجعت اكمل بس كوه مصبره على نفسي احس روحي مختنگه وكوه داجر النفس

دائمًا الكلام الي نسمعه من الاشخاص الي نحبهم يكون تأثيره قوي بروحنا مهما كان نوع الكلام سواء سلبي او ايجابي يطبع بالروح ولو يفرحها لو يكسرها

اليوم كلام يوسف كسر شي بداخلي ولاول مرة احسه شخص يختلف عن الانسان الي اني حبيته ولا كإنه ذاك الشخص الماكان يذكرني الا باحلى الالقاب والصفات ما مصدگه هذا الكرهه والكلام يطلع منه هو
اخر شخص جنت متوقعه انه يجرحني هو يوسف
بس الظاهر مع تغير الزمن احنه الكمنه نتغير وتتغير ويانا كل طباعنه بحيث نصير اشخاص مختلفين عن قبل اختلاف جذري

كملت الفايلات وكمت صحت للعامل اجه شالهن ويايه وطلعنه متوجهين للمكتب وصلنه ، دكيت الباب ودخلت والعامل ورايه لكينا ديخابر ، اشر على المكتب
خلينا الفايلات كدامه ، اجيت اروح واشرلي اوكف وصرف العامل

ضليت واكفه وهو ديخابر ومبين ديحجي ويه بنية من طريقة مبينه هاي مرته

يوسف : لاحبيبتي تغدي لتنتظريني احتمال اتأخر شويه تدرين بعد بالحمير الي بالشركة اذا ما واحد يوكف على راسهم ميسوون شغل عدل ، يله اخذي راحتج في امان الله

دنيا : سد الموبايل وبده ياخذ الفايلات واحد واحد واني واكفه يمه بس ولا كأني موجودة ، ضل بالربع ساعة صالبني واني ساكته ما نطقت بحرف احس من الصار اليوم بعد مالي خلگ اقاوم او اعترض على اي شي

يوسف : هسه كلشي تمام ، تكدرين تاخذين الفايلات

دنيا : دنكت شلتهن من كدامه ورفعت راسي لكيته مغمض عيونه وبس ابتعدت فتح عيونه واشاح بنظره عني بسرعة

عفته وطلعت ، صحت للعامل يساعدني رجعت الفايلات لـلوكرات اليمنه واخذت جنطتي وطلعت اخذت فورتات ورجعت للبيت 

عودة للحاضر

دنيا : هذا كل الي صار اليوم

معين : تردين رأيي بـ بصراحة

دنيا : اي

معين : انصحج تتجنبي وتكملين ششـ شغلج على الساكت افضل

دنيا : تدري اني فكرت اگل لعمو يحيى على تصرفاته ويايه بس مدري ليش تراجعت

معين : ما انصحج لان حتى وان عمي يحيى وكف وياج ممـ مستحيل بالنهاية يخرب علاقتة بابنه علمودج واحتمال المشكلة تكبر و ويـ مكن بحالة تهور من يوسف او مـ منج يوصل الكلام للحجي وتخرب علاقتهم بسبب المشاكل

دنيا : تنهدت اني تعبانه ... حسيت بأيدة تطبطب على ايدي

معين : هونيها حبيبتي وحاولي تتقبلين هالوضعية واذا شفتي نفسج مو ( اخذته نوبه سعال ) اذا ششـ شفتي نفسج مو كادره تتحملين هالضغط استقيلي لان ممـ ماكو شي يسوه تأذين نفسج علموده

دنيا : لا لا ما اريد استقيل كلشي ولا استقيل اني ماعولت اعتمد على نفسي ويصيرلي شغل خاص بيه تالي استقيل لو اموت ما اسويها

معين : لعد خلص ركزي على شغلج وحاولي تتجنبين يوسف حتى لو احتك بيج

دنيا : هيج رأيك

معين : اكيد

دنيا : تنهدت شكراً معين لان سمعتني جنت كُلش محتاجه افضفض ، لزمت ركبتي جنت احس نفسي مختنگه ومن سولفلتك ارتاحيت شويه ضحكت تدري بالعادة اني بالعادة اسولف لزبيدة بس هالمره مدري ليش مكدرت اسولفلها واجيت سولفتلك شكراً لاستماعك ، ابتسمت ابتسامة صغيرة

معين : اني دائما موجود واسمعج ببـ بأي وقت تحتاجين تفضفضين راح تلكيني منتظرج

دنيا : من انتبهتله شلون يحجي بحنيه و يتأتأ بحيث كوه ينطق استهضمت وبدون شعور بجيت وحتى هو خطية تفاجئ من ردة فعلي

معين : شبيج للـ ليش بجيتي اني ااا اسف اذا كلت شي خطأ

دنيا : هزيت راسي ومسحت دموعي لا لا اني الي اسفه للي صارلك والله حاسه بيك وادري شكد متألم ودتدفن الوجع بداخلك

معين : تدرين الصارلي يا دنيا خلاني اتيقن مليون بالميه انُ كل انسان بينه يخطأ ولو خطأ بسيط بحق اي شخص حتى وان كان هالشخص نفسه راح بتعاقب عليه واني ارتكبت ذنب يهز عرش الرحمن فـ استاهل الصارلي

بس والله لو اني المتأذي ولا ولدي تخيلي ساعات افكر همه شلون كدروا يتحملون حرارة النار واحنه اذا انجوينه جويه بسيطة تشيط رواحنا لعد همه عمت عيني عليهم شكالت رواحهم وهمه يعالجون حتى يطفون لسعات النار التاكل برواحهم 

دنيا : مسحت على كتافه ودموعي تنزل لتضل تتذكر الحادث كل ساعة هيج دتأذي نفسك

معين : ليش اني نسيته للحادث حتى ابذل مجهود واتذكرة تدرين دنيا اني السبب بموتهم والله العظيم اني السبب

دنيا : استغفر الله ميجوز تحجي هيج هذا يومهم انت شعليك قابل انت الحركتهم لو انت الي تسببت بالي صارلهم

معين : اني لوما عاصي ربي ومتطاول على ابويه ما جان هذا الصار بيهم چان بعدهم يلعبون داير مدايري واكعد اني اكحل عيوني بشوفتهم بس اني السبب الله ينتقم منييي الله ياخذنييي

سودة بوجهي عليهم كل وجع حسوا بي چان سببه اني بطيشي واستهتاري الله حرمني منهم حتى يأدبني ويگلي شوف طغيانك وجشعك وين وصلك
حرمك من اغلى الناس على كلبك

والله يا دنيا اني شكد جنت حقير بس والله العظيم اموت على ولدي جانوا همه راحتي بهالدنيا تالي اني الصرت المهم وسبب موتهم 

دنيا : طول ميحجي هو دموعه تنزل ويحجي بحرگه كلب ، تقدمت وحضنته واني ابجي ويا ، خله راسه على كتفي وكام ينشغ ويشد على كتفي بوجع

معين : والله لو اني المحترگ ولا همه كسرولي ظهري يا دنيا موتوني والله موتوني ونينهم ينخر براسيييي ما اگدررر انام صوت صياحهم معلگ بأذاني ومن اتذكر حركتهم صارت بالشتا ورواحهم شلون تلوب وجروحهم تصل عليهم ويه برودة الجو روحي تطلع شلون تحملوا يبعد روحي يابويه عساها بيه ولا بيكم

دنيا : ما جان عندي جواب اله غير الدموع ، مسحت على راسه واني اقره قران حتى يهدئ ، ضليت كاعدة حتى اواسي واهدي ضل يبجي لا ساعة ولا ثنين لمن روحه خارت وتعب ياله سكت وابتعد وهو يمسح بدموعه النكعت وجهه وهدومي

معين : ااا اني اسف كأبتج وضوجتج

دنيا : بالعكس اني الي اسفه لان ذكرتك بيهم

معين : ما ناسيهم حتى تذكريني

دنيا : طبطبت على ايده يله تنام ، هزلي راسه ، كمت غطيته ، حسيته حينام بعد ما تعب وهو يفرغ الي بكلبه ، طفيت الاضويه وطلعت

اباوع للساعة بالخمسه الصبح تنهدت معقوله صارله فوك ال3 ساعات يبجي الله ينطيك من صبر سيدنا ايوب ( عليه السلام ) يا معين وينطيني من صبر السيدة زينب ( عليها السلام)

____________________________________

ثاني يوم

امين : خلصت شغل يم ابو البيت ورجعت للبيتنا سبحت بسرعة وتغديت حتى اطلع لشغلي ، يربي دخيلك سهل عليه

كاعد امشي بالستوته وما احس الا سيارة تكسر عليه بالشارع ، وكفت الستوته بسرعة الله ستر وما صار حادث ، نزلت اباوع للسايق المطي المدري منين طلعلي ، عطت شبييييك ما شاييييف شارع

اباوع نزلت مرة ركزت بوجها هاي صدك تحجي لاحكتني لهنا ، استغفر الله يربي اني عايز شكول تعبانه

: شلونك امين

امين : خاله رحمة للحمزه انتتتتتِ شترديييين مني والله زهكتيهاااا لروحي شترديييين مني متكليلي

: ما اريد منك شي بس نكعد بأي مكان ونحجي

امين : عمي شعندي وياج اعرفج تعرفيني حتى اكعد واحجي وياج كافي خاله عوفيني بحالي والله اني ماعايز مشاكل اني مو من هالنوعية عتقيني في سبيل الله رحمة للكعبة

عفتها ومشيت حتى اروح ناقصني عطلات اني عايزني حرام انوب هي الحياة عوجه وياي واني ماشي سيدة انوب انعوج حتى الله يطيح حظي

اجيت احرك وشفتها وكفت بطريقي تنهدت شلون سالفه هاي اركع راسي بالگاع هسه واخلص من هالدنيا وارتاح

: امين شبيك والله بس نص ساعة احجي العندي واذا ما اقتنعت خلص اعوفك بحالك ومتشوف وجهي بعد والله ما اراويك وجهي وهاي حلفت بالله

امين : استغفر الله وين تردين نحجي

: بأي مكان

امين : اكو حديقة قريبة منا فضيني عندي شغل

: ماشي ، يله تعال

امين : عطت بيها وييييين اجي امشييي روحي واني الحكچ من الله ياخذ عمري واخلص ، راحت بسيارتها واني لحكتها وكفت الستوته ونزلت لكيتها كاعدة على ميز بالحديقة ، كعدت احجي بسرعة اريد اروح

: انت ليش هيج تتعامل ويايه والله اني احبك

امين : خالة خافي ربچ انتِ مرة متزوجة هاي اولًا وثانيًا اني بگد ولدج شنو هالنفسية الشايلتها انتِ وبعدين رجلج انسان قمة بالاحترام حرام عليج الجاي تسوي بي

: اني مو خالتك كافي تكبر بينه وبالنسبة لزوجي فأني ما ذامته بس الحب مو بأيدنا واني ما احب رجلي رغم زين ويايه وما مقصر عليه بشي بس والله ما احبه مو بأيدي والله يا امين اني غيرك ما حبيت متشوفني ذاله روحي واركض وراك من مكان لمكان بس حتى احصل ولو نظرة منك

امين : تره بكلامج هذا جاي تثيرين اشمئزازي وتأكديلي انج وحدة رخصية وبلا كرامة هم

: اسمعني امين اني مستعدة اطلگ من رجلي وعندي كيلوات ذهب اخذهن وابيعهن ونتزوج اني وياك ونشتري بالذهب بيت وهاي سيارتي اسجلها بأسمك بس اقنع و انطيني فرصة اتقرب منك

امين : شقنع انتِ شبيج عجيب والله شكد مقرفة لج جان وكفت بعينج العشرة حتى لو متحبين رجلج شنو من بشر انتوا دمرتوا المجتمع ونزلتوا غضب الرحمن علينا عمي اني رجال صايم ومصلي ومخلي الله بين عيوني تالي اجي اعصي ولخاطرمن لخاطر وحدة زبالة مثلج عمي روحي ذبي بلاچ على غيري

عفتها وكمت واني قسم بالله اريد اتقيئ كد ما مشمئزه نفسي من كلامها عجيب هالناس شيطنيها الله بعد وتركد يعني رجلها قاضي وصيته واسمة المحافظة كلها تحجي بي ومنطيها ولد قمة بالادب والاحترام وهي كاعدة تراهق وحظي الاغبر خلاها تراهق عليه

: اوكف امين وين رايح بعدني ما كملت كلامي

امين : درت وجهي عليها وحاجيتها بتحذير ، اذا بعد تتعرضيلي وداعتها لامي اگل لرجلك وولدج وهمه عود يتصرفون وياج عوفيني بحالي احسلج

: تهددني

امين : فكي ياخه عني حتى انساج لان اذا بعد شفتح حتى لو صدفة ما راح اسكت ، عفتها ومشيت متوجه لشغلي

_________________________________

ديمة : كاعدة اسولف ويه راسل واستفسر عن اخبارة بس حسيته مو طبيعي وباله اصلا مو يمي وكل شويه يصفن ، لزمت ايده شبيك حبيبي

راسل : هاا مابيه شي وياج

ديمة : اذا وياي گلي بله شجنت احجي ، اباوعله تنهد

راسل : اسف صحيح بالي ما جان يمج

ديمة : سولفلي صايرلك شي

راسل : ظروف لتخلين ببالج

ديمة : وشنو نوع الظروف

راسل : تجين نمشى شويه ونكمل سوالف وبعدين ناكل عود

ديمة : باوعت للساعة عندي استراحة هسه وطلعت من الكلية ويه راسل واجينه كعدنا بمطعم وبعد نص ساعة عندي محاضرة باوعتله مو مال اگله لازم اروح وهو مبين عليه تعبان اليوم ميهينلي اعوفه واروح

جاوبته خلي اروح للحمام والحگك ، عفته ومشيت بسرعة خابرت صديقتي الووو بسمة عفية سجليلي حضور اي ما اكدر ارجع للكلية بعدين عود نحجي اوك يله باي سديته منها وطلعت لكيته منتظرني

حضنت ايده ومشينه چنه كاعدين بمطعم بي حدائق تجنن ضلينه نفتر بالحديقة ونسولف ، اي سولفلي شجنت رايد تحجي

راسل : اريد اسألج سؤال واريدج تجاوبيني عليه بكل صراحة

ديمة : تمام

راسل : لو فرضًا بيوم من الايام دريتي إني عنده شي موزين او صفه سيئة يعترض عليها المجتمع هم راح تبقين وياي وتقبلين تتزوجيني لو تعوفيني

ديمة : صفة موزينة مثل شنو يعني

راسل : يعني على سبيل المثال لو طلعت حرامي

ديمة : يااا يمة لووو اموت

راسل : هههههههه بذاته هاي هيج گبل بعتيني

ديمة : هههه والله لعد شنو اتزوج حرامي يوكلني حرام غير اموت بس جديات انت مو حرامي وجنت تتشاقة مو ؟

راسل : على بختج حرامي وكاعد ادرس ماستجير وسيارتي اخر موديل خبله انتِ بس هيج جنت اتناقش وياج ردت اعرف لو عندي صفة سيئة راح تتقبليها لو لا

ديمة : كعدت على المسطبة وسحبته كعدته يمي باوع اني مستعدة اتقبل كُلشي بيك ومنك بس المهم ميكون شي مؤذي الي لو لاطفالنا بالمستقبل

راسل : من عمت عيني كون اذا بيوم اذيتج

ديمة : احبك ، اباوعله دنگ عليه وتقرب لوجهي دفعته هااا سالمين شبيك راسل اني مو كايلتك ما احب هالتصرفات اباوعله ابتعد وهو يمسح بوجهه

راسل : اسف والله العظيم ما متقصد

ديمة : اريد ارجع للكلية

راسل : ديمة حبيبتي والله اسف

ديمة : تنهدت بعد لتسويها

راسل : صار

ديمة : خليت راسي على كتفه ، اسفه لان صيحت عليك بس انت تدري بيه ما اتقبل هالامور

راسل : اعرف والله وكتلج ما متقصد بدون شعور بدر مني هالتصرف واصلا ما قابلها على نفسي بس انتِ جنچ خمر من اكعد يمج اسكر وما اعرف اوزان بتصرفاتي

ديمة : يعني ما زعلت مني

راسل : لا ما زعلت

ديمة : اكيد

راسل : اكيد

ديمة : مديت ايدي كدامه بوس ، باس ايدي وهو يضحك ابتسمت

يله كوم وصلني خلي احضر هالمحاضرة ليحس الدكتور ويخزيني ، كام دفع حساب الكهوه الشربناها وطلعنا ، اگلك صُدك لعد سيارتك وين شو اليوم اخذتني بتكسي اباوعله مدري ليش حسيته متوتر

راسل : هاا عطلانه وموديها للتصليح

ديمة : هاا لعد يله تعال خلي نروح دالحگ على المحاضرة ، وصلني للكلية وراح دامشي وشفت هبه طالعة من النادي بس شافتني اجتي تركض حضنتني
دفعتها ولييي مزاعتلج

هبه : هيج كلبج ينطيج تزاعليني

ديمة : هو ياهو البده

هبه : اني واستاهل كلبه بت كلب وعلى راسي انتِ بس فدوة لتزعلين كافي والله الدوام كله اباوعلج وانتِ لابستني وحتى بالكوز اليوم جفصت لان ما كاعدة يمج

ديمة : احسن رسبي حتى تبطلين تغشين مني

هبه : كافي دمدم لتضلين مطنكرة تره شكلج يصير كيوت وتسوين واحد يعضج

ديمة : ابتسمت ودرت وجهي عنها كافي يله

هبه : يمة صدقة للخديدات

ديمة : ضحكت كافي انجبي وبعد لتعيدها

هبه : خلص توبه

ديمة : حضنتها وابتسمت هواي احب هبه ماعندي صديقة مقربة غيرها ، ابتعدت وباوعتلها بس استغربت جانت لابسة ملابس جديدة ومبينه غالية وبركبتها كلادة ذهب ومبين مثقال مو قليل

ولج شنو هالكشخه والجمال شنو منيلج شنو البابا مالتج طگ لو طلعلج ورث

هبه : هااا شبيج يحظي هاي هدوم اختي وهاي الكلادة برازيلي مو حقيقه

ديمة : لزمت الكلادة اباوعلها والله ذهب اني كد ما جنت غرگانه بالذهب وكلسا اشتري كمت اعرفه من نظرة ، ولج عليمن تضحكين انتِ هذا ذهب تعلميني بي

هبه : هاا والله تره لحيتي تعاي تعاي حتبلش المحاضرة

ديمة : رحت وياها كملت محاضرة وطلعت راجعة للبيت وصلت لكيت زبيدة كالبه البيت كلاب بالهوسه
كعدت تسولفلنه على عزيمة خالة رميم عگب باجر وخابصتنه واني خذاني الواهس وياها وبما انُ عندي جمعة باجر عفت الدراسة وكعدت اساعدها

وام حسن فدوة لكلبها هي وبابا ويانا بس دنيا مدري شبيها كالبه وجها هي وامي وما تدخلن كملنه تجهيز اللوازم حتى نباشر يوم السبت ونكمل كلشي

كملت وصعدت فوگ هستوني تمددت حتى انام وما اسمع الا صوت الباب والجسر يخبص البيت لزمت كلبي وباوعت لخواتي يا رب استر

نزلنا نركض ونسمع صوت مرة تصرخ ، طلع بابا يركض للشارع واحنه وكفنا بالباب نشوف شكو
كل الجوارين ملتمه ومنعرف شكو بس يوصلنا صوت الصياح

زبيدة : باباا شصاير

ياسر : طبببببن بوييييه لتباووووعن

ديمة : لفت نظري الصوت الجاي يصرخ هاي مو خالة ام امين ، اباوع للزلم شايله ولد وجهه مليان دم ركزت بي هذا امين بس صدرة متهشم تهشم بالرصاص ووجهه مينعرف من الدم

من شفت منظرة بادن رجلية ووكعت مايعة روحي من هول المنظر

زبيدة : دييييييمة

*************************************

لهنا ويكون خلص البارت ان شاءالله يكون عجبكم❤️
+ لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

ملاحظة 1 : حبايبي ترة اختفائي الفترة السابقة كان بسبب حساسية قصبات مدري منين اجتني وربي يشهد ضليت فوگ الشهر اعاني منها ولحد الان ما طبت وكون افتحلكم بث واسمعكم صوتي شلون رايح بسبب السعال المستمر ومن ما نزلت فلأن جنت مريضة وتعبانه كُلش والا لو اني زينه انزللكم واني الممنونه بس مكدرت والله

ملاحظة 2 : التنزيل راح يكون حسب قدرتي شوكت ما احس نفسي گادرة اكتب انزللكم ، مرات اكون زينة وفارغة بحيث انزللكم اسبوع كامل يوم ورة يوم ومرات اكون تعبانه وما اگدر انزل غير بارتين او بارت واحد بالاسبوع فاتمنى تقدرون هالشي لان والله هذا اقصى ماعندي وهم لان گلبي مينطيني اترككم متلهفين على الرواية واعوفكم

وأخيراً الي يحس نفسه ميگدر يكمل الرواية خلي ينتظرها تكمل ويرجع ينورني ويقراها واكيد حكون سعيدة بتواجد الحميع وارجع اكرر ربي يشهد عليه واليوم ليلة جمعة يالوما جنت مريضة وتعبانة وهم الظروف عكست ويايه ما اتاخر عليكم ولو يوم واحد

احبكم ، اختكم براء ❤️