رواية الموت الحي الفصل الرابع 4 - بقلم براء الموسوي

مرحبا حبايبي العسل شلونكم ❤️

#الموت الحي
#للكاتبة براء

ديمة : صعدت ويه السايق راجعة للبيت اول ما وصلت فتحت الباب واخترعت ، بسم الله الرحمن الرحيم هايييي شنوووووو

اسماء : شبيج عيني شنو شفتي جني

ديمة : اباوع الصالة مليانه زينة ونفاخ والدنيا مكلوبة ومُعين واسماء واكفين يعلكون بالنفاخ ومشغلين اغاني ويتمضحكون ، هاي شجاي تسوون انتو

مُعين : اليوم عيد ميلاد عمار وكلنه نسوي هنا

ديمة : عيد ميلاد عمار ؟ صدك تحجي انت احنه بيا حال ماما وسيلة صارلها اربع اشهر من متوفية واحنه حال الضيم حالنه وانت جاي تسوي عيد ميلاد ابنك على الاقل يا اخي اصبر خلي تدور سنتها على الاقل وبعدين انت شلون تستغل عدم وجود بابا وتسوي هيج

مُعين : ترة هواي انطيتج مجال شنو انتِ تحاسبيني وبعدين مو اله اكل لابوية هذا بيتي مثل ماهو بيتج وبيت اخوتچ نسيتي لو اذكرج اني الي بهالبيت مثل حقچ وحق خواتچ مرتين

ديمة : اني مكلت مالك حق بهالبيت بس على الاقل احترم وفاة ماما وسيلة ترة ماما ما قصرت ويانة وجانت شايلنه بعيونها اقل تقدير ممكن تقدمة الها انك متسمع اغاني وتحتفل علما تطلع سنتها

اسماء : وشنو يمة افوت عيد ميلاد ابني الحي على حساب الميت الراح 

ديمة : انتِ انجبي ولتدخلين محاجية وياج اني وهاي الميتة ترحيلها فدوة انتِ وعشيرتج واطفالج والي جابوج وية ما حجيت وياها هيج ما احس اله مُعين يضربني بكف ايدة على حلكي ، اباوع اكو شي ابيض وكع بالكاع ، رفعت ايدي بسرعة على حلكي تلمست لثتي العلوية ياااااا اسناني وين

__________________________

زبيدة : كاعدة اشرح الدرس واسمع صوت ضحك جاي من الاخير ، ضربت القلم على السبورة حيل ... رجاءًا انتبهو بنات

: ست عادي تعيدين المثال

زبيدة : حاولت ابتسم حاضر حبيبتي هسة اعيدة الج ، اباوع هاي الطالبة الاسمها لارا ، ضحكت هي والطالبة البصفها ولان سمعي قوي سمعتها تكول على الطالبة السألتني شكد غبية ، انتِ الي بالاخير كومي تعالي هنا

لارا : اسمي لارا

زبيدة : ماشي يا ست لارا بما انو انتِ شاطرة وفلته زمانج وكاعدة تصنفين وتعيبين على زميلاتج تعاي انتِ حليلي المثال وهم شرحي لزميتلچ

لارا : بس ست انـ ...

زبيدة : لا بس ولا شي يا حبيبتي يلة تعالي شرحي الدرس واني حكعد هنا واستمعلج يلة ، اباوعلها اجت اخذت القلم ومثل ما توقعت ماعرفت تحل

اذا انتِ متعرفين تحلين واصلا متعرفين اني بشنو داحجي ليش تستهزئين بزميلتج وتحجين عليها انتِ والكسلانة البصفچ على الاقل هي حاولت تفتهم وتركز بالدرس ومن ما افتهمت طلبت اعيدلها وهذا حقها وتاخذة من عيني واني الممنونة اما انتن شنو كاعدات تسولفن  تتمضحكن بأخر رحلة واني اباوعلچن ، هالمرة تكررت وسمعت وحدة بيكم تستهزء بزميلتها مهما كان سؤالها والله العظيم احرم عليها درس الرياضيات بعد مفهوم ؟

الطالبات : مفهوم ست

لارا : انتِ شنو تحاجيني هيج وترة چنه دنشاقة

زبيدة: الاستهزاء بغيرج ووصفچ لزميلتج انها غبية هاي قلة ادب مو شقة وهسة رجعي لمكانچ وصوتج ما اسمعة

رجعت اكمل الدرس ... حبيباتي باجر عدكم تحضير بهالمادة ومثل ما علمتكم ترجعون تقرون المادة الشرحناها وتحلون الواجبات حتى تضبطوها ترة اني مراضية على درجاتكم السابقة ولازم نشتغل على هالفصل ونرفعها تمام ؟ يلة حبيباتي مع السلامة

طلعت من الدوام اني وضي راجعين للبيت ... اخذت موبايلي ، الوو هاا بابا حبيبي شلونك ، اي هستوني كملت دوامي وطلعت ، انت طمني كملت زيارة ، حترجع تتغدة بالبيت لو انتظرك ، اوك الف عافيه
يلة اني داسوق من اوصل اخابرك بيباي ، سديتة منه

ضي : زبيدة معاملتج لعمو ياسر تغيرت هواي عن قبل

زبيدة : بابا هو الوصية مالت امي فأكيد راح يكون هذا تعاملي ويا

ضي : ما فهمت

زبيدة : بيوم الي طلبت بي امي تدخل تسبح قبل صلاة الفجر ودخلتها اني ووئام سبحناها من طلعت وئام حاجتني بالحمام وكلتلي زبيدة وصيتي ابوج ديري بالچ عليه ولتحسسي بعدم وجودي ترة ابوج ذهب صافي والايام راح تثبتلج هو شكد انسان حباب وكلبة طيب ، وفعلا هذا الطلع ، بابا انسان وبشر مثله مثل اي شخص عادي يغلط وتصدر منه تصرفات غير مدروسة ، الاهم من كل هذا يا ضي ابوية ما چان قاصد يسوي كل هذا وية امي وكسرته عليها بهالفترة ثبتتلي هو شكد چان يحبها ومتعلق بيها

واني بصراحة بعد الي صار قررت اكون متصالحة وية نفسي اكثر ومثل ما بريت بأمي اريد ابر بأبوية ، موتت امي خلتني اتيقن هاي الدنيا شكد صغيرة وانو احنه كلنه رايحين يم رب العالمين ، فرب العالمين هو الوحيد الاشوفة هسة يستحق اني اسعى واكسب رضاتة عني واذا كان بري بأبوية يخليني اكسب رضا الله سبحانه وتعالى ويخلي امي سعيدة فأكيد ماراح اتردد واخلي على راسي وبنص كلبي

ضي : شكد حبابة انتِ يا زبيدة والله قليلين الي مثلچ

زبيدة : ابتسمتلها ، يلة وصلنة نزلنه وفتحت باب البيت ، اباوع لديمة واكفة وحاطة ايدها على حلكها ... ذبيت جنطتي ورحتلها ، شكو شبيج يفاهية شبي حلكج

ديمة : لللللللج زبييييييييييدة مُعيييييين كسر سنونيييييييي

زبيدة : اباوعلها كامت تبجي وتكمز وهي كصيرة حصرتني الضحكة على منظرها ، شو اشوف وخرت ايدها ، لثتها العلوية واكع منها الصفة الاولى مال اسنانها ... هاي ليش مسوي بيج الكلب

ديمة : بدموع على حساااااب مرتة الكلبببببببة وللللج تشوهتتتتتت بعدددد شلووون اداووووم خرررب شكلييييي يربيييي تشوووهت راحن سنونيييي

زبيدة : سمممم ومرض صوووتج وكفت طبلة اذاني من وراچ ، ووين مرتة الساقط*

اسماء : ماكو ساقطة غيرج يعانس يالي فاتج القطار ميتااااات ميتاااات مني لان احلى منچن وعرست قبلچن

زبيدة : استغفر الله شلون بية ويه الدايحات اني ، خالة متروحين منا رحمة للحسين هسة اليسمعچ يكول ماخذة زينة الزلم هو مُعين ابو كذلة كاتلة الوصخ والجرب ومكضيها انتِ ويا تفترون على الكرايب والمعارف تسقطون الغده والعشة بعد عليمن هالتفيك ترة البير بيرنه ونعرف البي

اسماء : انييي اعلمج يالعناس ااااااااله اكل المُعين تعاااال اسسسسمع اختك يمُعين

زبيدة : باوعت للبيت هاي شكو هالنفاخ والاغاني

ديمة : لعد اني اثارلي ( شصارلي) ثاعة(ساعة) احجي غير مثوين (مسوين) عيد ميلاد لعمار واني تعاركت ويه مُعين لان ماما وثيلة (وسيلة) كتلة ثون (شلون) تثوون(تسوون) عيد ميلاد لعمار وماما بعدها ثنتها ،(سنتها) مدارت

زبيدة : سكتي لخاطر الله كوة لازم روحي ترة انتِ وصوتج هذا خاف اضحك وتنجرح مشاعرج اما اخوج الجربان فبهاي الاربع اشهر الظاهر عبالهم زبيدة انكسر جناحها وبعد لسانها اختفى بس اني اعلمة ، انتِ هي مدام نفيخة امشي صيحي لمستر سلطع

ديمة: ههههه والله ثتاقيت لثوالفج (شتاقيت لسوالفج)

زبيدة : ابتسمت هازة راسي دنجبي انتِ وسنوسنج هاي ... شوية وسمعت صوت ملكة الحيوانات اسماء تصرخ وتطلم اوي هاي شبيها

اسماء : وووولج زبيدة متستحين اكووو وحدة شريفة تكول على اخوها كو** انتِ شلووون تتجرأين

زبيدة : اني كلت كو** ، معقولة هيج صايرة حقانية اني واصف الاشخاص الوصف اليستحقوا ...  اباوع نزل المطي يعربد

مُعين : هاااي علليمن ولج ساقط* اليوم اشكة لحلكچ

زبيدة : اني خو مالي علاقة انت وصفتني وكتلي انتِ ساقط* وميعرف الساقط* غير الكوا* اذاً وصف مرتك صح

ديمة : كافي ذبيدة (زبيدة) كافي الله يخليج لتثويلنه (لتسويلنه ) مثكلة (مشكلة)

زبيدة : انجبي انتِ سنونج مكسرة وعندج لسان وتحجين ، اباوع للافندي نزع حزامة ، ركضت اخذت جنطتي وطلعت الموس ، اسمع لك اذا تفكر تمد ايدك عليه اكطعها الك والله خاف عبالك اذا امي توفت يعني انكسر ظهري لا حبيبي اني المصيبة تقويني متضعفني ، فأذا انت رجال وبيك خير مد ايدك علية اني لا ديمة ولا دُنيا ، اني زبيدة الايد التفكر تنمد علية اخليها تتندم انها نمدت افتهمت لو لا

مُعين : والله تربية شارع ، التحاجي اخوها الجبير شتتسمى

زبيدة : ابتسمت والله عاد نماذجكم التعبانه متفيد وياها غير بنات الشارع ولو انتو تعيبون على بنات الشوارع وليلكم تكضو بأحضانهن لا ومو بس هيج تصرفون عليهن سيارات اخر موديلات وبيوت ورواتب وووو ومكعدين نسوانكم ببيوت ايجار

ديمة : طبعا زبيدة كلبت السالفة كلاب خرب يومها شيشت اسماء على مُعين وخلتهم دماية سوة ما احس بيها غير تجرني .. وييييين

زبيدة : وداعت امي الماعندي اعز منها اذا تصيحين بعد اله افلش الصفة الجوانية مال سنونج امشينه للمستشفى بسرعة ومناك نخابر بابا امشييي يلة ليرجع علينه مالي خلك ادمي احد اليوم

ديمة : رحنه للمستشفى ومناك زبيدة خابرت بابا وماما عدها دوام عصري فما خابرتها ودُنيا طالعة اصلا تتغدة وية صديقاتها من ايام الكلية ، وصلنة للمستشفى عالجولي لثتي ونظفوها ، اباوع لبابا وصل

ياسر : هاا بابا شكو شبيكم

زبيدة : باوع ابنك شمسوي

ياسر : مُبين , هذا مبين مسوي هيج والله لنعل والديه اليوم

زبيدة : لا بابا هذا مُعين

ياسر : مُعين ؟ مُعين شعدنه بالبيت اصلا مو المفروض يكون بالشغل هسة

زبيدة : سولفتلة كلشي بالتفصيل ... اباوعلة تنهد

ياسر : استغفر الله بعدني ما متت كاموا يمدون ايدهم عليچن ، لتهتمين بابا هسة اوديج اسوي اسنانج وهذا الكلب عوفو اني اعلمة

ديمة : طلعنه من المستشفى ورحنه لطبيب اسنان سوالي اسناني

زبيدة : خرب يومچ رجعن احلى من قبل

ديمة : صدُك والله ، بابا رجعن مثل قبل مبيبن عليهن انو واكعات وتركب عليهن لو زبيدة كاعدة تضحك علة

ياسر: لا حبيبتي ما مبين نهائيا ، زبيدة بيش الساعة هسة حبيبتي

زبيدة : بالستة

ياسر : خوش

زبيدة : اباوعلة خابر احد ومن ركزت بكلامة افتهمت ديحجي وية عمو فادي ياترى ليش خابرة

ياسر : الوو فادي خوية ، مُعين بدت حفلة عيد ميلاد ابنة لو لا ، هاا خوش اجو اهل مرتة بس وملتمين جوه ،اسمع تطلع كلاب الحراسة وتططبهن جوة البيت ما اريد نفر واحد يبقى بالبيت بس بدون متأذي احد
مالك علاقة بنعال البيت بيتي والحلال حلالي

اني بعدين اسولفلك شسوة ، يلة اجي للبيت مالكة احد ، اي كلهن طلعهن وخلي الحرس يلزموهن كتلك ما اريد احد يتأذة ... هاا هسة شلوني دمدم خو ما راح اخلي يسوي العيد ميلاد ويتونس وانتِ تبجين على اسنانج الوكعهن هاي راح ياكلها مدبسة كدام العالم العازمها ... هاا زبد شبيك تباوعلي

زبيدة : لك فديت العقل الشرير دزيتلة بوسة

ياسر : هههه يلة تعالن خلي نرجع للبيت

زبيدة: رجعنه للبيت لكينة دُنيا كاعدة بالصالة هي وامي ومُعين وجهه احمر وينافخ چنه ثور هايج ومرتة الدايحة كاعدة تتبكبك

مُعين : يابة انت موصي فادي يطبب الحرس والچلاب علينه جوه

ياسر : ايي حتى مرة ثانية تعرف شلون تمد ايدك على خواتك نذل نازعلي الحزام على اختك والثانية مكسر اسنانها چان استحيت على روحك تتقاوى عليهن ، امداك يا اغبر يا عار الزلم تضرب خواتك على حساب مرتك وياريت لو خواتك غلطانات

مُعين : يابة لسانهن طويل وحدتهن ولا عبالك اخوهن الجبير اني

ياسر : لو محترم نفسك ومعاملهن بالحسنى يحطنك على راسهن بس انت مو ادمي شتريد واحد يسويلك ويعدين شلون تستغل عدم وجودي وتسوي حفلة عيد ميلاد لابنك هنا شنو بيتك هووو

مُعين : يابة ترة اني اخذت اذن من امي

وئام : كتلي وكتلك لا وسيلة مصارلها سنة من متوفية شنو تسوي عيد ميلاد وكتلك عاجبك اجرلك مطعم واعزم اهل مرتك احنه هيج هيج منكدر نجي لان حزانة ، كتلك لو ما كتلك متحجي لو هالحجي الحجيته اني نسيته

ياسر : اسمع مُعين انتو ولدي واني احبكم ومعزتكم متختلف عن معزة خواتكم بس قسم بذات الله الي اسمعة بعد ماد ايدة على اي وحدة من خواتة اخلي يكدي بالشوارع لتخلوني اسحب البساط الجوة رجليكم حضرة جنابك البيت الكاعد بي والخبصتته انت ومرتك حتى تأجرو وتكعدون بي ليش ماسويتو عيد ميلاد ابنكم بي

مُعين : يابة البيت صغير

ياسر : مو مشكلتي هاي محد كلك عوف بيت ابوك ، هالمرة صارت وهديت الچلاب عليكم مرة ثانية الي غير تصرف وياكم والزم مرتك وعلى كولة امي الحجية خلي تكرص نفسها وتفك ياخة عن بناتي
احسن الها ، لتخلييين طلاكج يصير على ايدي
اني رجال اخاف الله لتخلوني اتحمل ذنب من وراكم

زبيدة : اباوع لبابا راح كعد سويت لمرت مُعين حنيصة بأيدي ورحت كعدت بصفة وحضنت كتفة ومُعين زعل واخذ مرتة وجهالة وطلع طبعا معين عندة ثنين ولد عمار وايثار ، عشتو روحة بلا رجعة شكول شكول

كعدنه تعشينة وكملنة راحت دُنيا جابتلة چاي واجت كعدنه نشرب چاي شوية ونزل مُبين مبتسم ، اني هالولد ابد ما ارتاحلة احسة مسموم ولو اليشك جفن مرتة هذا ادمي اكيد مسموم وحقير

مُبين : والله يابة متلام اليوم بمُعين حيل مصخها

ياسر : هه شوف منو يحجي ولا چنك طايح لمرتك الفقيرة دك

مُبين : لا يابة اني اليوم رحت اعتذرت منها وجبتلها هدية ذهب وراح احاول اعالجها حتى بلكي الله يرزقنه بالذرية الصالحة يا بوية اني كبرت وداخل على الاربعين شوكت اعيش مستقر وابني لنفسي مستقبل واصير ادمي

ياسر : هاي من شوكت تغيرت مبادئك وقررت تصير ادمي

مُبين : من لزمتني الشغل يابة واني احس نفسي هواي تغيرت هاي الاربع شهور هواي غيرت من نفسيتي واسأل ضي اذا خلال هاي الفترة ماد ايدي عليها

ياسر : مدري شكلك يا ابني الله يهديك ويهدينه جميعًا

زبيدة : ما ارتاحيت لكلام مُبين ابد بس ماردت ادخل بنيته واتحمل ذنب ، بلكت الله يهدي ، خلص اليوم وتوالت الايام والاشهر ورجعت حياة البيت نوعا ما لوضعها الطبيعي ، اكو غصة بكلبي لحد الان تنهش بي على موتت امي بس ما تخيلت انو بابا راح يكون سبب بتخفيف هذا الالم لوما هو كانت حالتي حالة هسة ، الف الحمدلله والشكر امي دائما تجيني بالحلم وهي مرتاحة ولابسة ابيض وبس تبتسم وهذا شي كفيل بأنو يخليني كادرة اكمل حياتي

_____________________________________

ديمة : كاعدة بنادي الكلية اني وهبة ودنسولف

هبة : باعي منو اجة

ديمة : شلت راسي لكيت ارسل داخل للكافتيريا ، چان لابس قميص كابوي ازرك ويا بنطرون اسود ستايلة كُلش شيك ومرتب ... من شافني اجة سلم علية

ارسل : شلونها القصيرة

ديمة : ابتسمت ترة اسمي ديمة قصيرة شنو !

ارسل : ما اعرف احب اصيحلج قصيرة بالمناسبة حبيت اكلچ اي شي تحتاجي اني موجود

ديمة : خزرتة وبشنو ممكن احتاجك يعني ، ترة اني ديمة ياسر النوح ما احتاج احد

ارسل : هههه على كيفج بوية ترة اقصد بالدراسة اي شي تحتاجي او ما فاهمته كليلي علية واني اشرحة الج ترة اني من الاوائل على دفعتي هذا كل ما بالموضوع وترة اني هم مو شوية اني ارسل الطويل

ديمة : ضحكت اوك استاذ ارسل الطويل مشكور ومتقصر اذا احتاج شي اكلك شكراً مرة ثانية ... اشرلي بأيدة يلة باي وراح ... درت وجهي لكيت هبة صافنة وتباوعلي بنظرات غريبة شنو

هبة : انتِ متأكدة ارسل مجرد طالب تيهه و دليتي

ديمة : اكيد هبة لعد شعندي ويا

هبة : ها اوك بس ترة ديمة والله اذا طلع عندچ شي ويا وما كلتيلي والله ازعل وبعد فلا احجي ويأچ

ديمة : ياا هبة شبيج اني وين هالسوالف وترة كتلج سابقا اني جاية ادرس واتونس ويني وين الحب هالسالفة اخر همي وهسة عوفج مني هاچ هاي الجنطة جبتها الچ بيها ملابس جديدة ما خلاتها على جسمي بس اني ضعفت وما اعتقد تصير علية فكلت انطيهن الج لان انتِ اسمن مني شوية

هبة : لا ديمة شكراً ما اريد

ديمة : والله العظيم ما لابستهن ولامرة غير من اشتريتهن من المول بس قستهن ورجعت خليتهن بالكنتور وانتِ تدرين بية اشتري بهالملابس واذب وانساهن وصدفة البارحة داصفط بكنتوري وشفتهن
اخذيهن عليج الله ، حرامات جدد وين اوديهن

هبة : انطيهن لخواتچ

ديمة : والله ميصيرن عليهن دُنيا مدبدبة متصير عليها هاي الملابس وزبيدة جسمها متناسبة هيج ملابس مال باربيات تضاريسها اكبر من راسها

هبة : نيالكم هالكد عدكم فلوس ياريت لو ابوية مثل ابوچ هيج عنده فلوس ويكدر يوفرلي كُلشي

ديمة : ليش هيج تحجين هبة والله ابوچ انسان مكافح وديحاول يعيشكم بأي طريقة وترة اني ويأج نفس المستوى المادي تقريبا بس انتِ ابوج حريص زيادة عن اللزوم مو مثل بابا

هبة : لا ديمة انتِ شچابج علية ابوج يلعب بالفلوس لعب انتِ عندچ سيارة خاصة وسايق خاص جوة ايدج ياخذج للمكان التردي واني اروح بسايق تكسي من الكلية وية البنات الجربانات ذني ، انتِ مكياجج وملابسج كله توصيل من برة وماركات واني ادور يا مكان مسوي تخفيضات اروح اشتري منه

لو خواتچ وحدة مسجلة بنادي و رياضية ومدرسة بأشهر مدرسة بالمحافظة والثانية ابوچ لمجرد انو  نفسيتها تعبانه راح وداها لفرنسا سياحة حتى تتغير نفسيتها واني خواتي كاتلهن القهر وكلهن ما مخلصات دراسة والبزر والرجل شالعين كلوبهم انتِ شتحجين اني وين وانتِ وين ديمة انتِ حتى احلى مني دباعي وجهج يلمع لمع وتخبلين والشباب بس يباوعون عليج واني ياهو الحافي جاي علية شتحجين انتِ

ديمة : برطمت ميصير تحجين هيج حرام والله ، حمدي الله وشكري عندج اهل فوك راسچ ويحبوچ هذا كافي وبعدين السعادة مو بالفلوس بالصحة والله

هبة : لا حتى الصحة تنشرى بالفلوس ، الفلوس كلشي يا ديمة ، وحقج انتِ ما شايفة العازة من يخلص راتب ابوج وتضلون كاتلكم الجوع

ديمة : زميت شفايفي كافي سدي الموضوع اذا موضوع الملابس هيج جرحج فأني اسفة ماعبالي حتجرحين هيج ، جريت الجنطة

هبة : لالا جيبيها ما اردچ تدرين بيه ما احب اقهرج ولو اني عزة نفسي تمنعني

ديمة : ابتسمت ، يلة لعد عازمتچ اطلبي الي يعجبج مدام معدنه محاضرات خلي نضل كاعدين ونغير جو

هبة : لا ما اريد ازحمج

ديمة : اكُلج لتزهكيني ترة اني وياج مو اليوم صديقات من الابتدائيه عليمن منحرجة وعود يمعودة من يستلم ابوج راتب عزميني بس عوفي الاحراج على جهه

هبة : يعني عادي اطلب ؟

ديمة : ابتسمت والله عادي ، اباوعلها طلبت المنيو كله يا عيني شكد خطية يجوز جوعانه واستحت تكلي
كملت اكل وكمنه طلعنه كملنه محاضراتنا ورجعت للبيت ... طبيت لكيت زبيدة مشغلة التلفزيون بالحديقة واكفة على تك تسوي يوغا هلاووو

زبيدة : اشرتلها بأيدي هلو لان ما اكدر افتح عيوني

ديمة :  مشيت على اطراف اصابعي وضربتها حيل وطبيت اركض

زبيدة : السخيفة ضربتني على مكان سخيف مثلها بحيث من الضربة وكعت على وجهي، والله انعل ابو اليوغا ركضت وراها ، تعاي يا ما مرباية ... اباوعلها ركضت ختلت ورة ام حسن عود عبالچ ما الزمج ترة ام حسن اكصر مني يعني اكدر اهمشج منها

ديمة : هههه اسفة ما كدرت الزم نفسي

زبيدة : واحنه نعتب على الزلم نكول ادبسزية دباعي النسوان شيسون والله ميلامون ، حيوانة هالمرة سويتيها مرة ثانية والله اكسر ايدچ

ديمة : اوي شكد حقنة هي ضربة قابل شسويتلج ايييع مو مال شقة

زبيدة : انتِ شفتي روحچ وين ضربتيني هي حيوانة خربتي التمرين مالتي واني صارلي نص ساعة اسوي بي حتى يضبط تالي كلة خربتي

ديمة : دكافي تمارين شتردين بعد فتحت ايدي على كبرها تضاريسچ هيج شتكبرين منهن بعد

زبيدة : وانتِ حاطه عينج علية متلعبين رياضة وتسوين مثلهن ، قل اعوذ برب الفلق من عينچ

ديمة : لا عيني اني احب ابقى ناعمة وكيوت مو مثلج جنچ وحدة من ذني الجايبات عشر مرات

زبيدة : لمن تنطي المايك لمطي ويكعد يتفلسف لج بابا التخلف عشرة مستحيل يصير عدها مثل جسمي والله يا الله اني صارلي 7 سنوات اتعب على جسمي حتى صار هيج وهاي جايتني تتفلسف ، عفتها ومشيت لكيت بابا ، مساء الورد يكيك

ياسر : ههه مساءك حلو يا زبد ، شعندچ برة بهالظهر بابا خاف تتمرضين والدنيا صيف يا حبيبتي

زبيدة : لا لتخاف كاعدة بلفي ، حروح اسبح واجي داصعد فوك وصارت بوجهي خالة وئام بس شافتني لطمت على صدرها

وئام : صخام الصخمني ولچ زبيدة جاية من برة وعركانة والسبلت عليج صاير فوك فوك بسرعة لتتمرضين امي يلة ركض

زبيدة : والله طلعتو الرياضة من عيني رايحة رايحة  ، صعدت لغرفة امي ، اي اني نقلت غراضي لغرفتها وكمت انام هناك ، دخلت سبحت بسرعة وبدلت لبست دشداشة صيفية ونزلت ... لكيت دُنيا كاعدة وحاضنة بابا ، الظاهر تصالحوا لان من يوم الي بابا ضرب بي دُنيا هو زعلان وميقبل يحاجيها والظاهر اليوم تصالحو ... وكفت واشرت على مكاني خير

دُنيا : شنو ؟

زبيدة : مكاني يم بابا ، كومي يلة

دُنيا : لا بله

زبيدة : وداعة عبدالله

ياسر : تعال عبدالله اكعد هنا وعوف اختك

زبيدة : هاي لخاطرك ، كعدت يمة اباوع لديمة الي نزلت لابسة تراك وردي وطوك وردي وشبشب وردي بي ارنب ، هاي شلون متحملة نفسها ، وردي ؟ ايع

ديمة : اووي ماما ميتة جوع خلي يصبون بسرعة

زبيدة : ديمة انتِ شيصيرلچ عمو يحيى

ديمة : صديق بابا ليش ؟

دُنيا : ههههههه لج زبيدة لخاطر الله مو بدينه بسوالفچ
عوفي البنية بحالها

ياسر : صدك شبي يحيى

زبيدة : يحب يلبس ورد... ضربتني دُنيا من جوة الميز احم مابي شي ... خلونه نتغدة يلة خالة خلي نتغدة ميتة جوع اني من الصبح لسة بالچم وستوني رجعت

دُنيا : ليش ماعندج اليوم ؟

زبيدة : لا عدهم سفرة اليوم وتدرين بيه ما احب هالسوالف فاعتذرت وكعدت بالبيت اليوم رحنه اني وبابا وعمو يحيى تمشينه الصبح وتريكنه همه راحو يسوكون واني طلعت للچم كلت استغل الفرصة واشد على نفسي شوية لان صارلي اسبوعين ما رايحة

وئام : زبد حبيبتي اخليج فخذ لو تاكلين صدر صحي اكثر

زبيدة : خالة ترة اني كلشي اكل والله وما احب الاكل الصحي فشتردين حطيلي معدتي تستقبل الاخظر واليابس مو من جماعة الاكل الصحي ... اباوع لمُبين نزل لازم ايد ضي ، عشتوو ولا يكعد راحة عبد الحليم حافظ  ... اجوي كعدو اباوعلة جر الكرسي وكعدها يالة كعد اوي فديت ، هزيت ايدي والله يا الله

ياسر : مُبين شلونة الشغل

مُبين : كلش زين وممتاز اصلا اسهم الشركة هواي ارتفعت هالشهر عن قبل

ياسر : شكد يعني ارتفعت

مُبين : هواي

ياسر : انطيني نسبة

مُبين : تقريبا عشرة بالمية عن اول

ياسر : قليل

مُبين : ليش يابة ترة عشرة بالمية كلش زين ، شنو رأيج يمة

وئام : والله اني اشوف زين

ياسر : بالنسبة الي قليل ، سويلي جدولة بشغل الشهور السابقة اريد اشوفة

مُبين : شنو يابة ماعندك ثقة بيه

ياسر : لا حبيبي بس مو بمعناها اني تركت الشغل عليك وعلى اخوك فرد دور اسحب ايدي هم لازم اتابعكم

مُبين : على راحتك يابة بالمناسبة اذا خلصتو انت وامي عندي موضوع وياكم

ياسر : خير ان شاء الله

مُبين : كل الخير واصلا هو الخير بذاته

ياسر : نشوف

ديمة : همست لزبيدة يا ترى شنو الموضوع

زبيدة : وشمدريني اني متسألي

ديمة : عابتلچ حتى متسوين واهس للواحد يسولف وياج ... كرصتها ام التضاريس

زبيدة : شركت بالاكل وكمت اكح ... اباوع لبابا كام يدك على ظهري

ياسر: اسم الله بابا اسم الله حبيبتي هاج شربي ماي

وئام : على كيفج امي لتشركين بالماي

زبيدة : شربت المي ، احم شكرا بابا حبيبي، كملوا انتو مبيه شي اشرت لديمة اني اعلمج يا مستهترة ... كملنه غدة كمنه لمينه المواعين وية العاملات وطلعنه نشرب چاي .... جان عندي فضول اعرف مُبين شيريد من بابا وخالة وئام ولمن كعد وبلش يحجي تربعت ولزمت كوبي مال الچاي اريد اسمعة بتركيز يا ترى شيريد

مُبين : يابة اني لكيت مشروع العمر ، هالمشروع راح يصعدني لسابع سما ومو بعيدة اصير اغنى واحد بالعراق من ورا

ياسر : مشروع شنو

مُبين : سلسلة مطاعم بس شنو مو اي مطاعم لا مطاعم مجهزة بأفضل الوسائل الترفيهه واحسنها كله نظام اجنبي مثل امريكا ودبي حتى قسم العاب نخلي بيها للاطفال والكبار بحيث السواح اليجون للمحافظة راح يتخبلون علية وراح اوفر طباخين من احسن الدول واخلي الاكل من كل الجنسيات والله لخلي العراق كله يحجي ويكول مطاعم مُبين النوح وبس

ياسر : فكرتك حلوة بس الايرادات منين راح تجيبها  يرادلك كومة فلوس حتى تنجز هالمشروع

مُبين : سهلة اخذ قرض من البنك

ياسر : وشكد راح تاخذ قرض ؟

مُبين : تقريباً *****

زبيدة : صفرت حيييييل وهذا يا بنك يقبل ينطيك هالمبلغ وانت جرد موظف

ياسر : وضيفي على هذا اخوج ماعندة هوية تاجر ولا مسجل على انه تجار ولا نائب ولا حتى مدير شركة فشلون البنك ممكن ينطيك هالمبلغ الضخم وانت مجرد موظف

مُبين : ليش منو كال القرض راح يكون بأسمي

ياسر : لعد بأسم منو

مُبين : مو يابة اني ليش اجيت افاتحك بالموضوع بس غير انت تنطيني مجال ، اسمع اني كوني موظف ما اكدر اخذ هالمبلغ من الدولة وهم هيج مشاريع يرادلها ناس معروفة وانت رجال معروف والك اسمك يعني اكدر اخذ القرض من خلالك وامي هم تكدر تساعدنه

ياسر : ما فهمت مُبين ادخل بالموضوع لتضل تلف وتدور 

مُبين : يابة اني اريدك تاخذ انت القرض من الدولة وتخلي المشروع بأسمك وامي تكدر تكفلك لان راتبها هواي وية الامتيازات التجيها واني هم اكفلك

ياسر : شلون شلون تريدني اخذ هالمبلغ وبأسمي اني وفرضا لو سويتها واخذت المبلغ هذا شنو الضمان الاخلي للدولة

مُبين : احم البيت يابة

ياسر : يا بيت

مُبين : البيت الاحنه كاعدين بي يابة ترة سعرة يجيب فوك هذا المبلغ ولتخاف والله ماراح يصير شي اني سياراتي كلهن راح ابيعهن واسدد كل شهر للبنك من فلوسهن وهم اكو شباب جماعتي راح يساعدوني ويسددون وياي واحنه مجموعة جبيرة كلنه راح نشتغل على هالمشروع يابة هالمشروع حلم حياتي واذا تحقق يمكن كلبي يوكف من الفرحة

ياسر : هذي مخاطرة جبيرة ابني و اني لايمكن اضحي بهالبيت التعبت كل عمري واني اسس بي  ومنو كال اصلا هالمشروع راح ينجح اذا فشل نروح بالحضيض

مُبين : يابة هالمشروع اذا لا سامح الله مانجح ما راح يخسر والله على الاقل راح يرجعلنة كل فلوسنة وبعدين مادامي جاي اسدد اكيد ماراح الدولة تكدر تحط ايدها على بيتنه ، يابة مرة وحدة ولو مرة وحدة ثق بيه خليني اسوي شي وافتخر بي واكول ابوية انطاني ثقته وطلعت كد الثقة

وئام : والله خوش فكرة ياسر خلي مُبين يبلش بهالمشروع وهم بلكي انت يعجبك هالمجال وتغير جو بلكي تتغير نفسيتك واني راتبي ما محتاجته خلي اكفلك وعود راتبي خلي يروح للدولة احسن ما اصمدة كل شهر وما اصرفة ولتنسى انت هم عندك راتبك ما محتاجة

ياسر : والله ما اعرف شكلكم خلوني افكر بالموضوع

مُبين : يابة هذا ملف كامل بي كلشي يخص المشروع تكدر تشوفة ، اوراقي سليمة وأوراق المهندسين الراح يدخلون وياي هم ما عليها غبار وتكدر تروح وتسأل صدكني كل المستثمرين الداخلين بهالمشروع ولد ناس معروفين وواصلين مثلنه يعني يعرفون الكار شنو ، اني خليت الملف يمك اكعد واقرا على راحت
واذا لكيت بي شائبه وحده بهالركبة

ياسر : ماشي حبيبي اشوفة لخاطرك ، اني تهمني سعادتك ونجاحكم عندي بالدنيا بس اخاف عليكم يا بوية من الناس انتو رغم كلشي فقرة وينضحك عليكم

مُبين : مادام انت على راسنه لتخاف

دُنيا : اباوعلة اخذ مرتة وطلعو من البيت ، بابا هاي مخاطرة ممكن تخسرك كل العندك ديربالك تاخذ بحجية ، هاي الفلوس مو لعب

زبيدة : اني هم اكول هيج خو هو اذا يريد ياخذ قرض على كدة ويبلش هو وجماعته من الصفر ليش هالمشروع الضخم والي تكاليفه اضخم وياريت لو واكعة السالفة براسة ، القرض انت راح تاخذة  ولو لا سامح الله صار شي انت الراح تتحمل المسؤولية

وئام : على بختج زبيدة تشكين بمصداقية اخوج

زبيدة : لا خالة مو هذا قصدي بس الاستثمار يخوف خصوصا بالمطاعم لا وزيديها بالعراق هي الناس لاكية تاكل يا خالة حتى تكضيها على المطاعم و ترة اقل غلطة بهيج مشروع تسحب رجل الزباين و تخسر الواحد كلشي

ياسر : والله كلامجن صحيح يا بوية بس خطية اخوجن عمري ماشفته متلهف على شغلة مثل لهفته اليوم ، خلي اخذلة هالقرض وهو اول وتالي وليدي فلوسي رايحتلة ورايحتلكم قابل ماخذ شي وياي اني

ديمة : بابا مو المشروع ما مضمون ومنو كال راح ينجح

ياسر : يا بوية حتى لو لا سامح الله مانجح المشروع على كولة اخوجن ميخسر وترجعلنه فلوسنة واذا على الدولة نسددلها من ارباح الشركة خلي اخوجن يلتهيه بشغلة مفيدة بدل السوالف المكسرة بلكي ينعدل وينصلح حالة ، وعلى كل حال هسة احنه عليمن نتناقش بشي سابق اوانه خلوني افكر على راحتي والله كريم

البنات : بكيفك بابا

زبيدة : اني ما مرتاحة وخايفة ، ويارب بابا ميوافق مر اسبوع وللاسف بابا وافق على طلب مُبين وبيومها مُعين كلب الدنيا وبابا طردة من البيت وبلش هو ومُبين يشتغلون على سالفة القرض وقدم بابا طلب للبنك ورهن البيت واجوي كشف على البيت وسعرو وطلع سعرة اعلى من قيمة القرض بشوية

مشت الامور بسرعة وبعد تلث اشهر وافق البنك على القرض وقررو يسلمو لبابا ومبين الي الكاع ما لامته
وبابا طاير من الفرح على فرحة مبين بيومها رجع بابا للبيت وصله ركعتين شكر بس ايدة فارغة واحنه كاعدين على جمر منتظري يخلص حتى تستفير منه بخصوص الموضوع

دُنيا : هاا بابا وين الفلوس

ياسر : عند اخوچ

ديمة : هذا المبلغ كلة عفته يم مُبين وجماعتة متخاف بابا

ياسر : هسة وين عايف الفلوس يا بابا هو عد ابني قابل ابني راح يبوكني

زبيدة : والله ما ادري يا بابا هالمبلغ يطمع اكبر واحد

وئام : اكلجن ترة مصختنها صارلجن اشهر تاكلن براسنه حتى وكفتن عرضة بالسالفه وراح تخربنها وبعدين اني اخذت استختارة وطلعت زينة كافيي يلة اليسمع يكول دافعات من جيبجن مو من جيب ابوجن واني الكفلت مو انتن

دُنيا : براحتكم ماما احنه غير لمصلحتكم

زبيدة : مر اليوم طبيعي وصعدنه نمنه بيومها مُبين جاب عشه من برة ويركص ويهلهل ويبوس بادين امي وابوية ويبجي

رغم كل هذا احس نفسي ما مرتاحة
حطيت راسي على المخدة بعد ما قريت الفاتحة لحبيبتي اووف شكد مشتاقتلج شوية وغفيت .... ما حسيت على نفسي الا واكعد الفجر على اصوات الطلق الملت البيت بسم الله الرحمن هاي شنو

**************************************
لهناويكون خلص البارت ان شاءالله يكون عجبكم ❤️

شنو رأيكم بالاحداث

وقراءة ممتعة للجميع

.