رواية الموت الحي الفصل الثالث 3 - بقلم براء الموسوي

مرحبا حبايبي العسل شلونكم ❤️

ملاحظة : اتمنى من الكل عدم التجاوز على عمو ياسر بالتعليقات لان عيب ولو مهما يكن محد يقبل الاساءة لاهله فرجاءًا حبايبي الي يعلقون لتكونون سبب بتوقف الرواية ، اقدر تفاعلكم وحماسكم للرواية بس اتمنى شوية تلزمون اعصابكم وتحياتي ❤️

الحي
براء الموسوي

دُنيا : صعدنه كلنه نركض على صوت ديمة الاجة من غرفة ماما وسيلة ، اباوع لبابا يريد يشوف دربة ميكدر وصلنة لفوك ، كلها طلعت من غرفها تركض حتى زبيدة اجتي تركض بازار الصلاة ... فتح بابا غرفة ماما وسيلة ودخلنه لكينه ماما وسيلة واكعة بصف باب الحمام وديمة واكفة كبالها ووجها اصفر كركم ... رحنه لماما نركض بابا بسرعة شالها

ياسر : اسم الله اسم الله شوصلج يم الحمام خوما بيج شي

زبيدة : احجي يمة بيج شي صارلچ شي ، تعبتي من شي اصلا شلون كدرتي تكومين

وسيلة : اااا احتاجيت حمام والممرضة خط خطية راحت تحاجي اهلها فحاولت اكوم بس زلكت رجلي ووكعت هههه عادي تصير لتخافون

زبيدة : والزفتة الممرضة اذا تريد تخابر اهلها غير تكل لواحد بينه يجي يبقى يمچ وانتِ الثانية مطي انتِ من شفتيها وكعدت ما اجيتي كومتيها لو مكسحة حضرتج لو بس شاطره تصرخين بصوتج العايق هذا وتوكعين كلوبنه

وسيلة: زبيدة لتحاجين اختج هيج ، شنو ذنبها هي ، سودة عليه هي حتى مجانت هنا

دُنيا : اباوع ماما وسيلة من تحجي تبلع بريكها هواي شلون العدها غصة ومتريدها تبين بصوتها

ياسر : لعد اذا مجانت هنا المن صرخت هالصريخ بابا ديمة عليمن صرختي

ديمة : بارتباك بابا ماما وسيلة جاي تجذب عليك اني اسولفلك ااا اني جنت دادور على شالي وسألت الخدم كالو يمكن صار وية ملابس ماما وسيلة احم فاجيت ادور بالغرفة ما ادري بيكم مطلعين ماما وسيلة والله ، دخلت للغرفة حتى ادور ومجان اكو احد دادور على شالي وحسيت احد يلزمني من ردت وجهي شفت ماما وسيلة بس والله بابا ما عرفتها لان شكلها متغير وشعرها كله واكع فاخترعت ودفعتها حيل عني وكعدت هلي سمعتوا صوتي اصرخ اخترعت من شفتها ، بدموع والله اسفة ماما ما جان قصدي ادفعج تنكسر ايدي لو جنت متقصدة

دُنيا : كلنا صارت عيونة على ماما وسيلة ، من الخرعة الاكلناها ما انتبهنه على ماما طالعة من الحمام بدون كبوس وراسها اصلع ، من يوم الي انصابت وكامت تاخذ كيمياوي ولحد هاليوم محد بينه شايفها بدون غطة على راسها غير زبيدة وهاي اول مرة نشوفها ، يحبيبتي راسها مبي ولا شعراية ،

وسيلة : بتعب شبيكم تباوعولي هيج ، وانتِ ماماتي دمدم ليش تبجين يكلبي ترة عادي والله اي واحد بمكانج يشوفني اول مرة حتكون هاي ردة فعلة ، هههه اصلا اني ساعات من اشوف نفسي بالمراية بدون شعر وحواجب ورموش هم اخترع فعلى شنو تتأسفين وتبجين يا امي ولا يهمج حبيبتي

زبيدة : رحتلها لزمت اديها واني كوة مسيطرة على نفسي ، شكد صعبة علية اشوفها شلون مستهضمة وتكابر ، لا ماما لتحجين هيج اصلا انتِ تجننين والله
بشعر وبدونة دنكت بوست ايدها مو خالة امي تخبل
اصلا المرض ممغير منها شي

وئام : اكيد منو اليكدر يباوع لجمال وسيلة ويشيل عينة والله احنه وشعرنه و رموشنة نروح فدوة لصوتها

دُنيا : اباوع لديمة عافتنه وطلعت تركض وبابا لحكها ، رحت وراهم شفتهم طبو لغرفة ديمة وكفت بالباب شفت بابا حاضن ديمة التبجي

ديمة : كسر بأيدي كون بابا كسر شلون دفعتها هالدفعة لو شلون بنظراتي حسستها انو اني خايفة ومتقززة منها ياترى شكد انوجع كلبها وهي تشوفنة من المرض ما كمنه نعرفها ونميز شكلها من الناس يا ترى بشنو دتحس هسة وهي تشوف نظرات الشفقة بعيونه

ياسر : خلص بابا خلص حبيبتي انتِ ما متقصدة واكيد لو تدرين بيها موجودة بالغرفة اكيد ما راح تكون هاي ردت فعلچ

ديمة : ابتعدت عنه لا لا بابا السالفة مو سالفة إني متقصدة او لا ، الموضوع اكبر من هيج انت ما شفتها من وكعدت صدمتني بابا ماما وسيلة من وكعت جانت تحاول تكوم تسند اديها على الكاع وتحاول
تكوم ومتكدر ترجع توكع ، واكفة بمكاني مصدومة من منظرها ، هاي الجانت تشيلنه واحنه صغار حمال باشي على ظهرها وتفتر بينه هسة متكدر تسند روحها ؟ لعد السرطان شكد ناهش عضامها لدرجة
متكدر توكف على رجليها

ياسر : شاء الله وما شاء فعل ، الحمدلله على كل حال بابا امج احسن من هواي غيرها والمهم هسة هي نفسها بيناتنه واذا متكدر تمشي احنه نصيرها رجلين
واذا تعبت احنه علاجها انتِ اكيد تدرين بيها شكد تحبنه وترتاح بوسطنه مو

ديمة : اكيد بابا اكيد مو بس رجلين الها نصير والله العظيم بابا حتى شعري مستعدة ازينة صفر وانطي الها المهم تكون زينة ومرتاحة

ياسر : يا بعد كلبي انتن يابوية شكد حنينات يا بخت وسيلة لعد شكد تحبنها

دُنيا : عفتهم ومشيت راجعة لغرفتي ، فتحت الباب ودخلت ، كعدت على جربايتي ولميت رجلية ، اول مرة انتبة مرض ماما وسيلة شكد مدمر نفسية كل البيت من صغيرنه لجبيرنة ، كل واحد بينة يحاول يقدم اقصى ما عندة في سبيل يكون سبب بمساعدة ماما وسيلة ولو بشي بسيط

يمكن اليشوف تاثرنه بمرضتها وتعلقنه بيها يكول ذولة يبالغون ، بس لا كل واحد بهذا البيت ماما وسيلة عايفة بصمتها بداخلة كل واحد بينة حقق هواي امور جان يتمنى يوصللها بسبب ماما وسيلة ، ابد ما انسى مواقفها ويانه

مُعين اخونه الجبير اتذكر جان غثيث بطفولتة ومياكل اي شي وچان يتخبل من خبز البرة واله ياكل خبز بيت ، فماما وسيلة جأنت تكعد بايام الشتاء بالبرد والجو يكرص الفجريات تعجن وتخبزلة بس في سبيل مينحرم من الريوك ويتريك

مُبين لحد هذا يومنه عندة حساسية موسمية كل صيف تجي لان يتحسس من الحر والعرق فيطكع جسمة ووجهه فجانت ماما تسويلة خلطة النشأ مالتها حتى تبرد جسمة وتخليلة الكريمات الكاتبها الة الطبيب وتكعدة بمكان بارد وتغسل رجلية بثلج وماي حتى تخفف عنه الحكة والوجع اليجي لحد متنهي الحساسية وتروح

اني وقت الحبيت يوسف امي رفضت رفض قاطع انو اتزوجة لان ضابط وخافت لا الصار وياها باستشهاد عمي (زوجها الاول) يرجع يصير وياي وبابا كان مأيدها بس ماما وسيلة وكفت ويانه وقنعت بابا وماما بيوسف وتزوجتة وبيوم الي انقتل محمد من صدمتي بمحمد تكرمت

جانت هي تجي تنام يمي وتشبكني ومجانت تقبل احد يسبحني غيرها ، حبيبتي جنت لان سمينة تخاف عليهم لا واحد ميكدر يشيلني مدري شلون جانت تشيلني وتسبحني ابد ما انسى من جانت تسبحني تقرة على المي ايات وتديره على راسي
ومن اطلع من الحمام تنشف شعري وتمشطلي وتغطيني وتضل يمي لحد ما انام ياله تطلع تكمل شغلها ابد متكدر تكعد اربعة وعشرين ساعة تفتر

زبيدة جانو الطالبات يكتلنها بالمدرسة وترجعلنه معضعضة وقميصها مشكك وكلها تراب وبس تبجي
بيوم الجانت تجي هيج وضعها جانت ماما تروح للمدرسة وتكلب المدرسة على المديرة لان مجاي تخلي حد للطالبات وصلت زبيدة للمتوسطة وهي
شخصيتها ضعيفة رغم لسانها الطويل من شافتها هيج ماما اتفقت هي وبابا وخلو عمو يحيى لان ملاكم سابق جان بشبابة يدربها وياخذها وياا ويعلمها شلون تدافع عن نفسها حتى محد يكدر يمد ايدة عليها وفعلا زبيدة تغيرت هواي وصارت قوية وتكدر تدافع عن نفسها ولحد هذا يومنه هي رياضية وتتدرب

اما ديمة جانت من كد ما حلوة متقبل ماما وسيلة تطلعها من البيت واغلب الوقت حاطتها بحضنها وتمشطلها لو تلبسها تكول لعابتها ومن هي وصغيرة
جانت تدلع وتتنعوص وجانت ماما وسيلة تتخبل على سوالفها لدرجة ديمة اول ما نطقت كلمة ماما كالتها لماما وسيلة ، وحتى بالسادس ديمة طلعت معدل لان ماما جانت تدرسها وطول فترة امتحاناتها تراجعلها وتنام يمها وتروح وياها للمدرسة وتبقى كاعدة برة بالحر تنتظرها لحد ما تطلع وتجيبها وتجي

ولهذا السبب من انصابت ماما وسيلة بلوكيميا الدم ديمة رفضت تشوفها لان متتقبل فكرة انو الانسانة القوية الجانت سبب الضحكة ببيتنه كاعدة على سرير والأجهزة داير مدايرها ، هاي الفكرة ديمة ليومنه هذا رافضة تتقبلها

اااه يا ماما يا ريت المرض بينه ولا بيج ، ويجي واحد يكللنه ليش تبالغون بحبكم الها ، شلون منحب ونهتم لهيج انسانة ، ماما وسيلة من البشر النسبتهم ضئيلة جدا بالدنيا ، امي جانت مغركتنة بافضالها ولا يمكن نكدر نجازيها قيد شعرة

رغم امي وئام ما قصرت ويانة بس جان اغلب وقتها بالدوام ومنشوفها ونكعد وياها هواي غير بس بالعطل الصيفية لان بالدوام ترجع تعبانه وتنام وتكعد لو تصحح لو تلتهي ويه بابا
وتنظيم امور البيت بينما ماما وسيلة كانت مكرسة كل وقتها النة رغم ماما وسيلة واصلة ودارسة ومتخرجة بس تخلت عن الوظيفة لخاطرنه اااااووووف ياربي شافيها وعافيها دخيل اسمك

______________________________

زبيدة : كلها طلعت من غرفة امي ما عداي اني و وئام والممرضة ، اني نايمة بحضن امي وشابكتها وكل شوية ابوسها و وئام كاعدة تلبسها جواريب والله غريبة علاقتهن لا جنهن ضراير

وئام : ها وسيلة هاي الجواريب وصيتلج عليهن من احسن مكان حتى مينغزن رجليچ مرتاحة بيهن لو البسج غيرهن

وسيلة: وئام هاهي روحي ارتاحي والله مابيه شي اني والجواريب هاي يمي زبد تلبسها الي

وئام : راحتج هي راحتي بعد عمري وبعدين شنو قابل اكو فرق بيني وبين زبيدة احنه كلنه واحد ونخدمج بعيونة

وسيلة : حبيبتي ما قصرتو ربي ينطيكم العافية

وئام : عافيتنه هي انتِ ، صيري زينة واحنه نصير بنص الخير ، يلة اروح اجيبلج العشة سويتلج صدر دجاج بس شنو يجننن كُلش راح يعجبج وسويتلج وياها شوربة عدس تخبل هسة اروح اصبلج انتِ وزبد واجي

زبيدة : طلعت وئام مستعجلة ، تنهدت حاضنه امي بقوة عود ليش ريحتج هيج تخبل ، اباوعلها ابتسمت
خليت راسي بركبتها ادري بيها تجزع روحها دفعتني وهي تضحك بتعب

وسيلة : ولج كعدي كشت روحي طاحظج

زبيدة : ههههه اخذت ايدها بستها اموت عليج يا احلى شي صار بحياتي

وسيلة : واني احبج يا فرحة عمري ونبض كلبي

________________________

دُنيا : مر اليوم واليوم صار يومين واليومين صارن اسبوع والاسبوع صار اسبوعين وماما وسيلة وضعها من سيئ الى اسوء كامت متتقبل الاكل رجعناها للمستشفى والطبيب كال وجودها مابي فائدة بالمستشفى ورجعناها للبيت زبيدة منهارة عليها
لان حتى الشوربة الجانت تشربها هسة ماعدها قابلية
حتى تبلع الاكل مكضيتها على المغديات وكادرها مال الاطباء بابا جابهم وخصصلهم جناح بالبيت بس حتى يديرون بالهم عليها بس ماكو فائدة كل ساعة تغيب عن الوعي وناخذلها كم ساعة فاقدة الوعي وترجع تصحى حتى الاطباء كالو ماكو فائدة من وجودنه وراحوا

وصلت بينه من كد ما كمنه نخاف عليها كل ساعة نقرب اصابعنه من خشمها حتى نشوفها تتنفس لو لا تدمرنه كلنه وكل البيت كاعد ومكابلها محد يقبل يداوم زبيدة طلبت اجازة وما قبل المدير ينطيها لان تاخذ تاخذ ثالث وطلابها وزاري وبالواسطة ولان يعرف بابا كوة انطاها 3 ايام وديمة هم سوت اجازة مرضية لخاطر ماما كلها كعدت حتى اخوتي كعدو

كمنه كلما نشوف الممرضات يطلعن من الغرفة مالتها نلزم كلوبنة لو بابا ووسيلة الكامو ينامون يمها زبيدة متسودنة ومتقبل حتى تروح للحمام وتعوفها
وبابا نفسيتة متدمرة وهي يشوف ماما وسيلة كوة تجر النفس

اما اني فوك ضيمي على ابني اجاني ضيم امي الكمت اشوفها تموت كدام عيوني وترجع تحيا والله بهالاسبوعين شفنه الضيم منعرف شنسوي
الها وشلون نكدر نخفف المها ، ابد ما انسى كلام بابا وهو يكول والحسرة مبينه بعيونة وهو يباوع لماما وسيلة شلون غايبة عن الوعي كدامنة

ياسر : يا ريت لو الصحة تنشرى جان بعت الفوكي والجواي واشتريت عافيتها ، شكد عندي فلوس وملايييني تارسه البنوك وهم ما كادر اعالجها

زبيدة : لتحاول الصحة الشي الوحيد المتكدر تشتري
ولتنسى احنه حتى للهند سفرناها وهم ما تعالجت ورجعلها الورم بمكان ثاني بدال ما تتشافى

ياسر : اخ حرت وما اعرف شسوي اول مرة بحياتي احس روحي ضايع لهالدرجة

زبيدة : هه طبعا مو خزان الهموم الجنت تذب حملك علية انملى هسة وما عاد كادر يتحمل همومك اكثر

ياسر : والله يا زبيدة اني مالي علاقة لتحمليني الذنب الله يخليج يا بوية اني ما ناقص

زبيدة : لا انت السبب بسببك انت هيج صار حال امي
اعرف المرض ابتلاء من رب العالمين واحنه البشر مالنه علاقة بي بس انت جنت العامل الي سرع انتشار المرض ، ببرود تدري ؟ كل مرة اتخيل السرطان شلون ينتشر بدمها اكرهك ، رفعت عيني علية الله ليسامحك كل الصار بسببك لو دايس على نفسك ومشاعرك وما كسرتها هالكسرة الي ليومنه هذا هي تعاني منها ما جان صار بيها الي صار ، متتصور شكد اكرهك وبكل لحظة تمر وامي تتوجع بيها شكد يزيد كرهي الك ، عفتهم وطلعت

دُنيا : مسحت على ظهرة حبيبي بابا معليك بزبيدة تدري بوضعها شلون منهارة على ماما المرض شي من رب العالمين يبابا وانت مؤمن والمؤمن مبتلى يا بابا
رب العالمين جاي يختبرنا بمرض ماما والله يا بابا
انت مالك كل علاقة مو هياتك منهار عليها لو جنت انت السبب كان صار هذا حالك

ياسر : لا كلام زبيدة صحيح اني السبب يمكن كثرة سكوت وسيلة وعدم تذمرها خلاني ما انتبة انها بشر مثلي وعدها مشاعر وطاقة تحمل ، يمكن قهرها مني وصلها لهالحالة الي هي بيها ابد ما الوم زبيدة على كلامها وحقها بس يا بنتي الظاهر الانسان يتندم ويكتشف غلطة هووواي متأخر ... احم يلة تعاي نعوف امج مو زين عليها الصوت العالي

دُنيا : مسحت دموعي هازة راسي وية مدنطلع سمعنه صوت ماما وسيلة الكوة تحجي

وسيلة : دُنيا ماما روحي صيحيلي زبيدة

ياسر : هاا حبيبتي كليلي الي محتاجة شي

وسيلة : لا بس صيحيولي زبيدة وخلوني وياها وحدنة رجاءًا

ياسر : صص صار بعيني بابا دنيا ركضي دوري على اختج وصيحيها بسرعة

دُنيا : ماشي طلع بابا واني طلعت ورا ادور على زبيدة رحت لغرفتها لكيتها فارشة سجادتها وكاعدة تبجي زبيدة

زبيدة : مسحت دموعي احم ها دُنيا

دُنيا : ماما وسيلة تريدج وكلتلي اصيحلج

زبيدة : كمت بسرعة نزعت الجادر ورحتلها فتحت باب الغرفة ودخلت عيوني عليها وزنها بهالاسبوعين صار 40 كيلو لان مداتاكل عيونها تعبانة وجها اصفر وشفايفها بيض ، الممرضة وين اني مو كلتلها انطمري هنا ولتطلعين

وسيلة : اني طلعتها اريد ابقى اني وياج وحدنه

زبيدة : اباوعلها فتحتلي اديها

وسيلة: تعاي حبيبتي اريد اشبكج واسولف وياج شوية

زبيدة : مشيت على كيفي نمت بصفها وحضنتها على كيفيها خالة راسي على صدرها وصلت لدرجة من الخوف عليها اخاف احضنها لا تنكسر عضامها

وسيلة: ترة من جنتي تسولفين وية ابوج اني جنت كاعدة واسمع كلامچ

زبيدة : ماما ان...

وسيلة : اشش سكتي كُلشي لتحجين ، اني هالمرة اريد احجي خليني على راحتي ، زبيدة امي اكو هواي اشياء عن علاقتي اني وابوج انتِ متعرفيها

ترة ابوج ماله اي علاقة بمرضي والبجي الكضيتي عمرج تشوفيني ابجي كل يوم فعلى ابوج مو منه اي حبيبتي ترة سبب زواج ابوج من وئام اني ، اني الجنت السبب بهذا الزواج ، اني القدمتة على صحن من ذهب لوئام

وقت الي استشهد عمچ الله يرحمة جانت وئام صغيرة وحامل بالشهر الثاني جدج راد واحد من عمامج يتزوجها ويستر عليها وبيوم العلن جدج النوح الله يذكرة بالخير هالخبر نسوان عمامچ التمن على وئام وملخنها وجونها حتى لا تقبل بواحد من عماج وصلت بيهن حتى مددنها وكامن يدفرن بيها حتى تطرح

اني من شفتهن هيج يسون بيها وهي يادوب عمرها 19 او 18سنة بهالحدود جانت ما تحملت اني انسانه اخاف الله ما تحملت اشوفهن هيج يسون بيها واضل ساكتة وجنت متيقنه انو لو اتركها بيدهن يدفننها وهي عايشة ويسونها وبنفس الوقت وماجان اكو احد بالبيت وما اكدر ادافع عنها وحدي

فكللتهن انو ياسر يتزوجها بس عوفنها لتطرحنها وفعلا وخرن عنها وهي تنزف بساعتها ركضت خابرت ابوج من التلفون الارضي واجاني يركض اخذناها للمستشفى ربج راد انو الطفل مينزل من رجعنه للبيت وهي ويانه صارحت ابوج بالموضوع وبيومها تخبل
لا خلة غرفة ولا خلة خلا مواعين الا وكسرهن جان رافض فكرة الزواج منها رفض قاطع

زبيدة : ليش ؟

وسيلة : جان يكلي هاي مرت اخوية شلون تتقبل نفسي اتزوجها وهم مستحيل نفسيتي تتقبل مرة غيرج

زبيدة : تالي

وسيلة : الخبر وصل لجدچ وكيف لان ياسر الراح ياخذ مرت اخو وبيومها ابوج تعارك وية جدج وكله انو اني حاجية من وحدي وهو رافض الفكرة تالي جدج من شاف كل ولدة رافضين كل لوئام راح اخليج هنا لحد ما تجيبين وناخذ ابنه وعود انتِ روحي شوفي حال سبيلج ابوج تسودن بعد عمري من قبل جان يخاف الله وميقبل بالظلم وقتها انجبر يتزوجها والله يا يمة بيوم زفتة منها رجعلي ودنك على ادية يبوس بيهن ويبجي ويكلي ما اريد مرة غيرج

زبيدة : لهالدرجة جان رافضها

وسيلة : واكثر يا يمة واكثر رغم زواجي من ابوچ جان زواج رسمي لا اني جنت واعية بي ولا هو تزوجتة واني عمري 14 سنة وهو 18 سنة جنه نقرة سوة وناكل سوة جنة عبالك توم منتفارك ابد حتى من ننام واحد يلزم ايد الثاني
نجح ابوچ من السادس وطلع معدل عالي ودخل كلية الهندسة والدنيا انكلبت تدرين من نجح بچة من الفرحة وحضني الي قبل لا يحضن امه

زبيدة : اباوعلها وهي تحجي دموعها تتسابق على خدودها .... دمرتكم وئام الله لا يوفقها

وسيلة : لا يا امي ترة وئام هم ضحية ، خطية جانت يتيمة وعايشة عد عمتها الي جانت باقيتلها من اهلها
والي ورة زواجها من عمج بفترة توفت فصفت وحيدة وماعدها احد وفوك كل هذا حامل متكليلي وين تروح وهي صغيرة وشابة وببطنها طفل

زبيدة : اااااه يا امي بقصتج مينعرف منو الضحية ومنو الظالم ، المهم كمليلي شلون ابوية اعترفلج انه يحب وئام

وسيلة : ورة زواج ابوج من وئام كام النوح يفرض علية يقسم الايام بيني وبينها ما اجذب عليج واكلج ما جنت انقهر بس جنت ارتاح من اتذكر انو ابوج ميحبها وتزوجها على حساب ابن اخو وعلى حساب متنذب بالشارع ، المهم بديت بعد فترة انتبة على ابوج يتجنب وجود وئام بأي مكان وحتى اني من يجيني ميباوع بعيني جنت اسألة ، وميجاوبني او يتهرب ويغير الموضوع ، كمت اشوفة شلون مهموم

كام يرجع من شغلة وهو دومة ضايج طبعا ما غير معاملتة الي ابد بالعكس جان مدللني دلال حتى اتذكر اول راتب استلمة من تعين راح جابلي بي كلادة ذهب بيومها ابد ما انسى فرحتة طبعا هذا الحجي قبل ليتزوج وئام المهم بيوم من الايام الدنيا جان صيف وتموز وادور علية بالبيت ما لكيتة اخر شي شفتة كاعد الظهريات بالشمس وهاي عادة عندة لليوم يحب يكعد بالمطر والشمس ليش ما اعرف

زبيدة : هاي العادة هم عندي

وسيلة: اعرف يروحي انتِ هواي بيج طباع من ابوج

زبيدة : احم كملي شصار بعدين

وسيلة : اتذكر بيومها كد ما جنت الشمس قوية اخذ ضربة شمس ونام بالفراش وصارت حالتة حالة ولان ابوج يسولف وهو نايم كام مدري شيرطن وهو غافي لمن كلها طلعت من غرفتي بدة صوتة يوضح واسمعة يسولف ودموعة تنزل بس ما اعرف عليمن يبجي بس يكول اسمي ويبجي ومن طاب اجاني وكلي اريد احاجيج وكلعادة ياسر وراد مني شي رحتله ركض وبيومها اعترفلي

زبيدة : طول متتسولف امي علية عيونها صافنة بالفراغ وساعة تبجي وساعة تبتسم ومن وصلت لهالجزء دموعها زادت ودموعي نزلت وياها ، كملي

وسيلة: بدموع جان يبجي وهو يكلي وسيلة اني احس روحي واحد حقير وخاين ومثل اي مرة تحب رجلها حاولت اخفف عنه واعرف شبي ساعتها كلي هو بدة يميل لوئام ويفكر بيها دائما واكو مشاعر غريبة يحسها تجاها ابد ما انسى شكلة وهو يسولفلي ويبجي شلون المسوي ذنب مينغفر ، ساعة يعتذر مني وساعة يحضني وساعة يبوس بادية حتى كلي انو حيطلكها وياخذني ونطلع ونعيش بغير مكان بس في سبيل يبتعد عن وئام

زبيدة : وشكلتيلة انتِ

وسيلة : رفضت

زبيدة : ليش يمة ليش مو الرجال راد يبتعد ويعوفها لخاطرج

وسيلة : ماكدرت اشوفة مقهور ويتحسر عليها مو بأيدي ما اكدر اشوف كلبة يوجعة على وحدة ويحبها وتالي يعوفها على حسابي اني مو انانية ما اكدر اشوفة دموعة وحسرتة لان ميكدر يدنالها وهي مرتة لخاطري اني احبة وسعادتة هي سعادتي حتى لو جنت راح ابقى العمر كله ابجي علية المهم هو ميبجي انتِ متعرفين ياسر شنو بالنسبة الي ياسر عيوني الاشوف بيها ولو ينعاد بية الزمن هم ارجع اسوي السويتة وترة لتنسين يمة اني ما جنت اكدر اجيبله جهال

خوما احرمة من حب حياتة وهم احرمة من انو يصير اب تدرين يا زبيدة رغم جنت اني ميصير عندي اطفال بس بقى وياي ابوج 7 سنوات و ولا يوم طالبني بطفل ومن جانوا يحجون علية لان باقي بدون اطفال ، جان يتعارك وياهم على حسابي ويجي يكلي يولون اني اريدج الج شسوي بالبزر والله يا وسيلة ابوج عيشني ايام بحياتي ما راح انساها جنت ملكة واني ويا حتى من تزوج وئام بقيت اني الملجى اليحتضن تعبة كل يوم

زبيدة : زين هو شلون قبل يعوفج ويكمل ويةووئام وهو رافض حبه الها

وسيلة: اني بديت اقربهم من بعض خصوصا من وصلت وئام للشهر الخامس وطرحت ابنها وضلت هيج ومن سمعت الدكتورة تكل لوئام انو رحمها نظيف وتكدر تحمل مرة ثانية حسيتها اشارة من ربج حتى تبدي بداية جديدة وية ابوج وفعلا بديت اسولف وية ابوج واحاول قدر المستطاع اقربة منها رغم كلبي جأن بنزف دم بس مجنت اكدر اشوفة يحبها ومبتعد عنها من وراية ... وصار وابوج فعلا تقرب لوئام وحملت وئام وجابت معين اني سميتة رفض ابوج هو ووئام اي واحد يسميكم وكلكم اني سميتكم بس انتِ
ابوج سماج

زبيدة : صدك انتِ مو كلتي متجيبين اطفال لعد شلون جبتيني

وسيلة: ضليت سنين اعالج لخاطرج واني اصلا رحمي متضرر وحذرتني الطبيبة من حملت بيج بس اني ماعولت احصلج انتِ الشغلة الوحيدة التربطني بياسر

تصدكين من جنت اتخيل انو اني حيصيرلي طفل من ياسر ، ياسر الانسان الي جنت وما زلت مستعدة افدي بروحي متتخيلين يا زبيدة اني شكد احب ابوج ومتعلقة بي وبيج وحتى اخوتج وخواتج كلكم اموت عليكم احسكم العوض الدزة الي رب العالمين على القهر الشفتة بحياتي وحتى من جبتج وشالو رحمي جنت بقمة سعادتي لان حصلتج اني طلعت بيج من الدنيا ، تدرين شيصير بيه من يأشرون عليج ويكولون هاي بت وسيلة احس كلبي يريد يطلع من مكانة من الفرحة

زبيدة : حضنتها بقوة وبجيت بحضنها ، اني احبج ماما ، الله يخليج لتموتين وتعوفيني وين اروح بلياج منو الي لو رحتي ابوس رجلج لترحين وتعوفيني حبابة يمة لتعوفيني

وسيلة: يايمة اني الي ما اريد اعوفج شايلة هم لو متت شلون راح اتحمل ما اشوفج كل يوم بعد الله يعلم بكل صلاة شكد اندعي ، الله يطول بعمري بس حتى اشبع منكم ما اريد اموت بعدني ما شبعت منج ، بعدني ما صرت بيبية ، ما عرستج ولا شفت جهالج

زبيدة : اباوعلها تبوس بادية وتبجي دنكت بست ايدها ، وضميتها حيل شبكيني حيل ماما كسري ضلوي خليني اشبع من ريحتج اخاف يشاء ربي ويمنعني عنج وبعد ما احصلج

وسيلة : لتعوفيني زبيدة لتعوفيني اخاف اموت وانتِ مو يمي

زبيدة : بدموع ما عوفج والله ما اعوفج .... وخرتني عنها وكامت تبوس بخدودي وراسي

وسيلة: اسمعيني زين وسوي الراح اكولة اني اليوم مشتهية انزل للمطبخ اي اريدج تاخذيني وياج و تطبخيلي برياني من ايدج التخبل وتحطيلي بي كفتة ما اريد اي شي مسلوك واي شي من الاكل الصارلي سنتين اكله لا اليوم اريد اكل الاكل الاحبة

زبيدة : كمت عنها بس هيج عيوني انطيها الج مو بس اطبخلج يلة تعاي هسة نسوي باوعت للساعة ب7 المغرب ، شلتها وحاولت اضغط على نفسي وابتسم شوفي بنتج شلون قوية وشالتج ... اباوعلها مسحت على خدي وكالت

وسيلة: شكول على الوكت الوصلني لهالحال اني الجنت اشيلج يبعد عمري هسة صرت حمل ثكيل وانتِ التشيلي ينبض كلبي

زبيدة : اروحلج فدوة اني وكلشي بيه يا ريتني اكدر افتح كلبي واضمج بي وما اطلعج منه ابد ... مشيت خليتها على الكرسي المتحرك اخذت الغطه مغطيه رجليها عدلت الكبوس مال راسها وبست ايدها فتحت الباب وطلعتها صار بابا بوجهنه

ياسر : ها وين

زبيدة : ماما حابة تغير جو فكلنه ننزل نكعد بالمطبخ علما اسويلها عشه اليوم الحب مشتهي برياني

ياسر : شنو برياني !! موزين عليها ماكو

زبيدة : اشرتله بأيدي ميعلق واني كوة مسيطرة على نفسي ... بابا شنو رأيك تجي ويانه للمطبخ نغير جو سوة

ياسر : اي ليش لا شفايتلي واكعد وية اغلى انسانة بحياتي

وسيلة: شفتي زبد بابا شلون يحبج

ياسر : بس اني ما اقصد زبيدة اقصدج انتِ ، انتِ اغلى انسانة بحياتي وسيلة

زبيدة : اباوع لامي تباوعلة وعيونها تلمع بالدموع ، احم يلة ننزل بس بابا انت نزل امي واني اشيل الكرسي واجيبه وراكم ، اجة بابا شالها ونزلها واني صحت للعاملة تساعدني انزل الكرسي نزلنا بسرعة
وكعدنه ماما علية دفعتها للمطبخ دخلنة لكيت البنات ووئام كاعدات

وئام : هاا حبيبتي وسيلة شنزلج

وسيلة : ضجت بغرفتي حبيت اكعد وياكم جوه

وئام : اي حبيبتي بيتج هذا واحنه خطارج وين متحبين تكعدين كعدي

زبيدة : دفعت كرسيها خليه يم القنفات اشرت لبابا ، بابا تعال هنا اكعد ، اشرت للعاملات عيوني اليوم استراحة الجن اخذن راحتجن اني راح اسوي العشة
اباوع لخواتي كعدن يم امي ويبوسن بأديها وهي انطلقت تسولف وياهم .... ركضت للمخزن طلعت الاشياء الاحتاجها وبديت اسوي وكل شوية ادور وجهي عليها الكاها تسولف وياهم ومنطلقة حبيبتي
عيوني صارت على بابا الفصل عن العالم وعينة عليها
والي انتبهت علية كل شوية ينزل ايدة ويكرص برجلة حتى انت تكابر ومتريد تبجي تنهدت راجعة اكمل شغلي ، شوية واجت دُنيا و وئام

دُنيا : حبيبي زبد اساعدج بشي

وئام : انطيني البصل حبيبتي اني اسوي لتصير بيج ريحة بصل

زبيدة : سحبت ايدي منهن بسرعة لااا ا ان اني اريد اطبخ لامي روحن كعدن ما محتاجة مساعدة ، كمت اشتغل عين على الطبخ وعين على امي ، اباوع من صارت عينها عليه دزتلي بوسه بالهوى ابتسملها ودرت وجهي وبسرعة بجيت

همزين داثرم بصل ، كملتة كُلشي مثل ما تحبة امي ، شوية واخذها بابا تصلي واني هم ركضت صليت ورجعت اتاكد من كُلشي ركضت سوتلها حمص بطحينة لان تحبة ... ورة فترة كملت

ديمة : ها زبيدة محتاجة شي

زبيدة : لا كملت كُلشي روحي كعدي يم امي لتعوفوها وحدها واني اكمل كُلشي واصيحلكم ... ركضت صبيت وسويت ماعون امي وطلعت رتبت السفرة وصحتلهم اباوع طلعوها من الهول ، يله تعالو صار العشه ، طبعا ااحنه مناكل تمن بالليل بس اليوم لخاطرها سوينه العشه برياني

وسيلة : ياسر لعد وين مُعين ومُبين مو كتلك خابرهم

ياسر : مُبين اجة بس صعد لغرفتة يبدل ويجي وهاي الجرس اندك اكيد هذا مُعين

زبيدة : اباوع دخل مُعين الجوعي هو ومرتة الحية وجهالهم اباوعلة راح حظن امي وباسها هو ومرتة اكرهه اخوتي بس الشي الوحيد المرات يشفعلهم بكلبي هو حبهم لامي لان من صدك يحبوها
كعدنه كلنة وكالعادة مُعين ابو نفس الدنية لكط من كل ماعون كفتاية شكد عينة فارغة الچفن

ماردت احجي لخاطر امي ، كعدنه واني عيوني على امي الكوة تشيل الخاشوكة اجيت اساعدها وبابا سبقني وكام يوكلها ، اباوعلها شلون تغمض بعيونها مستلذة غصت اللكمة بزردومي سودة علية صارلها سنتين محرومة من هالاكل

وسيلة: عاشت ايدج حبيبتي فدوة لنفسيج الطيبة

زبيدة : الف عافية يروحي ، ابتسمتلها يلة يلة اكلي اليوم استغلي بابا وخلي يوكلج

وسيلة : لا لا خطية ياسر كمل اكلك اليوم كلة التهيت انت وزبيدة وياية اني ادبر روحي

دُنيا : اباوع لبابا شال عيونه علية شلون يكلي ساعديني ما اريد ابجي ، وحقة نبرة صوتها من حجت هيج مردتلي كلبي

ياسر : احم لا اني مو جوعان اكلي انتِ واعتبريني ماكل

زبيدة : محد بينه اكل بس هي خلصت كل ماعونها اااا اص اصبلج بعد ؟

وسيلة: اي صبيلي جوعانة

زبيدة : ااا اي ب بب بعيني اخذت ماعونها وكمت ركض للمطبخ صبيتلها واجيت خليتة كدامها الف عافية يلة اكلي ، اباوع رجع بابا يوكلها وهي تباوعلي كل شوية وتبتسم لميت شفايفي لتبجين وتنغصين عليها حبابة ضلينه كاعدين لحد ما كملت اكل كمت اني وخواتي لمينة السفرة

وسيلة : زبيدة

زبيدة : عيونها

وسيلة : حبيبتي سويلي چاي وحطيلي بي شكر مو تجيبي مر

ياسر : وسيلة ترة اليوم هواي خربطتي بالاكل

وسيلة : رجاءًا ياسر عوفني على راحتي ... هاا زبد تسويلي ؟

زبيدة : ابتسمت طبعا اسويلج يروحي اذا الج ما اسوي المن اسوي ، رحت للمطبخ اسوي الها وابجي
كلبي ممرود على حالها وما اعرف شسوي اشتغل ولساني منشغل بالايات واردد ربي احفظها ربي احفظها ، ربي احميها ... سويت الجاي وعفتة يتخدر على نار هادئة مثل متحب لمن كمل صبيت ووديتلها انطيتها استكانها لان متحب تشرب بالكلاص

وسيلة : الله صار شكد مشاربة جاي عاشت ايدج حبيبتي

زبيدة : ابتسمت وكعدت يمها ، كملت جايها وباوعتلنه كلنه كل واحد بينه تاخذلها صفنة علية وتعبر على الورا ... شوية وحجت

وسيلة : اريد اطلب منكم طلب

الكل : امري

وسيلة : اني هسة بديت انعس واريد اصعد لغرفتي فاريدكم تصعدون وتبقون وياي لحد ما انام ، عادي ؟

ياسر : اي اكيد يلة شباب تعالو شيلو الكرسي مال امكم وانتن بناتي صعدن لغرفة امجن واني جايبها وجاي ، وئام جيبي وياج ماي حتى وسيلة تشرب دواها

وئام : صار

دُنيا : صعدناها فوك وكلنة التمينه بغرفتها زبيدة وبابا واني على الجرباية مالتها كعدنه زبيدة بحضنها نايمة وبابا لازم ايدها واني كبالها والباقين توزعو بالغرفة

وسيلة : متتخيلون شكد مشتاقة لهاللمة

وئام : ولا يهمج كل يوم نكابلج ونكعد هو جم وسيلة عدنة

زبيدة : اباوع لامي ابتسمت ومدت ايدها لوئام ، اجت وئام يمها

وسيلة : مشكورة ورحم الله والديج لان جبتي هالورود وخليتيني اعيش شعور الامومة وياهم اكثر من مرة

وئام : بدموع يعمري عليمن تشكريني همه جهالج وانتِ امهم مو اني ، اني الجبتهم بس انتِ الربيتي وكبرتي ، انتِ السهرتي وما نمتي لخاطرهم وانتِ الدرستي وتعبتي مو اني انتِ امهم

وسيلة : فدوة رحتلهم لو يطلبون عيوني هم اشيلها وانطيها الهم ، ماما مُبين افتح الكنتور العالي و جيب البومات الصور مالاتي خلي نغير جو شوية مدامكم سهرانين يمي اليوم

مُبين : صار يمة

دُنيا : راح مُبين نزل البومات الصور مالات ماما واجة انطاهن الها كلنة التمينة داير مدايرها وهي صارت بنصنه حتى نشوف وياها

زبيدة : فتحت امي اول البوم چان كُلش قديم طلعت صورتها بالبدلة البيضة جانت الصورة بالابيض والاسود جانت طالعة تجنن بالصورة

وسيلة: شوفي زبيدة هنا طالعة اشبهلچ

زبيدة : شجابني عليج تخبلين انتِ

دُنيا : ضلت ماما تكلب بالصور ، طلعت صور زواجها هي وبابا جانو طالعين يخبلون طبعا هالصور احنه شايفيها الف مرة قليل ومن نرجع نطلعهن عبالك اول مرة نشوفهن

ياسر : شوفي وسيلة هنا شسمنج من حملتي بزبيدة ما جنتِ تكدرين توكفين من سمنج

وسيلة : قبل ما جنت اكدر اكوم من السمن وهسة ما كمت اكدر اكوم من الضعف

دُنيا : من كالت هيج صفنتنه عليها ومحد بينه عرف شيجاوبها ، هي هم شلون الي انتبهت لنفسها وضلت تكلب بالصور

ديمة : هههههه باعو هنا مُبين ومُعين شلون محنايين ياا هاي مو خالة ام حسن

ياسر : سوالف امج بعد

مُعين : باع مُبين شلون يبجي بالصورة

مُبين : يعني ولد ومجتفي وجابري يحط حنه شيسوي قابل يبووو والله ايام اروح للمدرسة وشعري صاير برتقالي وايدي وكصتي مدمرة تكول واحد بي ابو خريان

زبيدة : ههههه لا واحنه الزوج جنه ننام بيها حتى من نكعد ونغسلها تصير حمرة ونروح للمدرسة مكيفات بيها ايييع شكد جنه سخيفات ... ضربتني امي

وسيلة : انجبي ولج والله يخبلن جانن حتى جنت اسويلجن وردة وتطلع حلوة

وئام : تذكرين وسيلة من جنتي بالصيف تحصرينة وتحنينه حتى تنسحب الحرارة من اجسامنه

وسيلة: لعد شلون اعوفكم بالصيف كاتلكم الحر

دُنيا : ركزت بالصورة ياا هذا مو بابا هههه عزة حتى انت ماما محنيتك ... اباوعلة جرها من ايدي

ياسر : كافي فضايح خربتو برستيجي لعنة الله على بليسكم ... وانتِ خو ارتاحيتي طلعتي فضايحي

زبيدة : اباوع لماما كامت تضحك وورة ما سكتت باوعتلنة وبجت

وسيلة : يربي ما اريد اموت ما اريد اعوفكم

دُنيا : من كالت هيج كلنة حضناها وبجينة وهي بندت كامت تنشغ

وسيلة : شلون بيه لو متت بوجهمن اصبح ما اكدر بلياكم والله انتو فرحتي بهالدنيا شلون بيه واني بعيدة وما اكدر التقي بيكم ولا احضنكم بعد

دُنيا : اسم الله عليج ماما عمرج طويل ان شاء الله
اباوع لبابا عافنة وطلع ... طلعت ورا لكيتة واكف برة
اباوعلة يبجي بس شافني حضني وكام ينشغ ... بابا ميصير تعوفها وتطلع هي طلبت نبقى يمها

ياسر : ما اكدرت دنيا ما كدرت كلامها سهم وينخر بكلبي ، خايف تصير صدك وامج تسويها وتموت

دُنيا : بدموع والله مدري شكلك يا بابا اني نفسي محتاجة اليواسيني هسة

ياسر : الله ياخذني قبل لياخذها اذا عافتني وراحت وين اروح اني هاي اختج الجوه اذا راحت امها تتسودن ، وسيلة عمود هالبيت بلياها هالبيت ينهدم واول ظهر ينكسر هو ظهري لو ماتت

دُنيا : بدموع اااه يا بابا مو بس ظهرك الي حينكسر لو راحت امي ، ما انكر هالليلة كانت اصعد ليلة تمر علية من بعد موتت محمد ، احس بليلتها اوجاعي كلها تجمعت بكلام ماما وسيلة كل بوسة تطلع منها لواحد منه اليوم تنهش بالكلب

ضلينه كاعدين يمها صارت الدنيا فجر يالة غفت ، بابا نايم بالكاع يم رجليها وزبيدة بحضنها واني والباقين فرشتة بالكاع ونمنه
او شبة نمنه بهالليلة كل احنه طار من عيونة النوم

اذن الفجر وماما وسيلة كعدت وطلبت تطب تسبح دخلت امي وزبيدة سبحنها وطلعو الولد حتى نبدل الها كملت وطلبت تصلي

وسيلة: بناتي حبيباتي اريد اصلي على الكاع مو على الكرسي بس ساعدني اكعد

دُنيا : رحنه اني وزبيدة كعدناها بالكاع وجبنة مخاد خليناهن بالكاع الها حتى تكدر تخلي التربة وتدنك
كعدت تصلي واحنه نباوعلها خاف توكع لو يختل توازنها وهي تصلي

زبيدة : طول اليوم واني لازمة كلبي امي جانت حيل غريبة بس مع هذا مشيت الوضع وسويتلها كُلشي هي تريدة اخر شي طلبت تصلي من طلبت تصلي عبالك واحد وكلي امچ انعدمت ضليت لازمة كلبي واني اباوعلها ... صلت اول ركعة وسجدت اباوعلها كامت الحمدلله والشكر ، يلة كملي صلاة يروحي

بكلبي جنت احثها حتى تكمل بلكي ميطلع الشعور البكلبي صح . بدت ركعتها الثانية وسجدت ، يلة يلة يمة يلة كومي حبابة ... طولت بالسجدة الثانية لا لا الله يخليچ لا

ديمة : ماما وسيلة تسمعينة حبابة كومي سلمي يلة

زبيدة : مشيت الها لزمت ظهرها يمة حبابة لا الله عليچ خوما رحتي اباوع اختل توازنها بسرعة لزمتها وصارت بحضني اباوعلها مغمضه عيونها ومبتسمة بكل هدوء
يييمه لتعوفيني ، شلت راسي عليهم لكيتهم يبجون
بابا تعال شوفها بس لا ماتت الله عليك تعال

دُنيا : بابا فصل عن العالم وصافن عليها حتى ما رمش ، من شفتها اجة على بالي ابني احس ساعتها الحادث انعاد كبالي ما حسيت روحي الا وكمت اصرخ لاااااا يمة لااااا مو حتتتتتتتتتتتى انتِ مو حتتتتى انتِ .... ديمة لج ديمة عفييية بس ماتت بس لااااا ماتتتتتتتتتت

زبيدة : يربيي ليييش بسسسس هاي عندددي ليش اخذتها احتاجهااا اني احتاجها ... حضنتها بقوة وشميتها متتتتتتي بعد ما اشم ريحتتتج بعدددددد ماكو ريحتج مااااااكووو ولج يمة على بختج هيج تعوفيني بعدني ما انفطمت من حنانج لتعوفيني يا روحي انتِ المن اروح وبحضمن اشمر روحي يا حبيبة يايمة المن عفتيني

ديمة : حادثة موت ماما وسيلة ابشع شي يمر على بيتنه من بعد موتت حمودي ابن دُنيا ، هاي الليلة عمرها ما راح تنمحي من ذاكرتنا ، لا اعرف شلون اوصفها او بأي طريقة ممكن اشرحها
بدُنيا الي انهارت وشلعت شعرها وخرمشت وجها
لو زبيدة الي من صدمتها ما ناوية لسة تصدك ومتقبل تطلع وتشوف احد
لو بابا الي سكت وبعد ما حاجة
لو اني الي من صدمتي كل شوية اطب لغرفتها على امل يطلع حلم واشوفها بس ادخل واشوف بس دشداشتها وقرآنها على الجرباية اتقدم واشم بعطرها وابجي ما مستوعبة خلص راحت لرحمة ربها

بيومها اخذوها ركض للمستشفى ومن وصلو بنفس اللحظة كلهم الطبيب مسلمة روحها لله ، اخذناها للمغيسل وغسلناها وزبيدة اجت ويانة بس تباوعلها
جملة وحدة كالتها وبعد سكتت ماحجت

زبيدة : طلعن برة اني اغسلها امي تستحي واحد يشوف جسمها

ديمة : شكد كللنها النسوان انتِ بعدج ممزوجة ميصير تغسلين الميت ولا دارتلهم بال واصرت تبقى هي تغسلها حتى خالاتها طردتهن

طلع الكل وبقت بس هي من تأخرت طبيته اني وامي لان دنيا من شافتها بالمغيسل تخربطت وماعت روحها ونقلوها اخوتي للمستشفى

دخلنة وشفنه زبيدة حاضنتها وتبجي وتكللها مودعة بالله ، الله وياج يروحي ديري بالج على نفسج وتعالي زوريني مو تعوفيني اشتاقلج ، بيومها تكطع كلبي عليها واني اشوفها شلون تنشغ بحضنها ... كملنة غسلها واجوي اخذوها يزوروها وطلعنة للنجف ندفنها

ابد ما انسى منظر بابا وهو يباوع لتباوتها ويبجي ويسولف وياها ويكلها

ياسر : الله وياج يا صديقتي وحبيبة روحي الله يشهد جنتِ احسن بشر يمر علية ما شفت ولا اشوف مثلج ولا مثل حنيتج بامان الله يا احلى هدية قدمها الي رب العالمين وعذريني لو قصرت وياج بيوم من الايام ترة والله ما جنت متقصد

ديمة : زبيدة واكفة وتباوع لبابا ولتابوت امها وساكتة بدو يدفنوها واني بكلبي اكلهم على كيفكم وياها ترة ماما متتحمل وتكرهه الظلمة شلون راح تتحمل ظلمة الكبر وشلون حتنام بالبرد وبدون غطة وهي متحب البرد

رجعنه للبيت وتاركين كلوبنه بالنجف وبدينه نقيم العزاء على روحها ... سوينة اليوم الاول مال الفاتحة
وكلها اجت حتى دنُيا طلعت من المستشفى بس منهارة على ماما وكل ساعة تتخربط هي وامي
خو امي من اللطم وجها كام ينزف مرت ايام الفاتحة 3 ايام وكلوبنه تنزف وياها واليوم هو اليوم الأخير اباوع بالوجوهه ماكو زبيدة رحت ادور عليها ما لكيتها

رجعت صعدت فوك ودورت هم ما لكيتها انخمط كلبي خاف مسوية بروحها شي نزلت ركض دنيا دنيا زبيدة ماكو

دُنيا : شنو ماكو ؟ خاف بغرفة ماما

ديمة : لا ماهي دورت عليها بكل البيت اني والعاملات ماهي

دُنيا : ماما شفتي زبيدة

ديمة : دعوفي امي مستحيل تنتبهلچ تعاي وياي ندور عليها برة ... طلعنه ودورنه هم مالكينه ماكدرت اتحمل رحت ركض لبابا الواكف بالشارع بابا زبيدة ماهي بالبيت

ياسر :

____________________________________

لهنا ويكون خلص البارت ان شاءالله يكون عجبكم❤️

اعتذر لو هالبارت فتح جروح قديمة عديمة او ذكركم بأشياء متحبون تتذكروها بس صدكوني وسيلة كد ما اثرت بيه ما كدرت ما اخصصها جزء من الرواية وانطي حقة واكتب عنها ، بالله العظيم ما اعرف شلون كتبت هالبارت متتخيلون شكد اذاني

الاتمنى منكم تقرولها الفاتحة ، وان شاء الله الرحمة والغفران لامواتكم وامواتنا جميعًا واعتذر مرة ثانية لو هالبارت تسبب بنزول دموعكم 🖤