رواية الموت الحي الفصل الخامس 5 - بقلم براء الموسوي

مرحبا حبايبي العسل شلونكم ❤️

#المـوت الحـي
#للـكـاتبة بـراء المـوسوي

زبيدة : اباوع لوئام وية ما سمعت مُعين وكعت

ديمة : ماماااااااا .... وكعتتتتت بابااا وكعتتتت الحكولهاااا بابااا راح تموت

زبيدة : ركض بابا ومُعين ودُنيا شالوها واخذوها للمستشفى ، اباوع لديمة انهارت وبس ترجف تقربت منها وحاولت احضنها بس ما كدرت اسيطر عليها ملخت روحها ، خلص خلص اهدي ولج راح تموتين

ديمة : راااااح تموووت متشوفييين ، عوفينييي الله ياخذك يا مُبين من وراك راح تروح امي مثل ما راحت مامااا وسيلة كافيييي شهاللعنه الاجتنه ادريييي مسحورييين خوما مسحوريييين ليش من دون الناس احنه لييييش

زبيدة : مسحت على راسها متنهده ، حكمة ربچ بعد ، حبابة ديمة ترة البيه مكفيني احير اواسيج لو اواسي روحي ، اهدي حبابة لتتخربطين

ديمة : تعبت زبيدة تعبت من المشاكل والله تعبت منين اتلاكها من موت ماما وسيلة لو من خساراتنا لكُلشي لو من مصيرنا المجهول الي منعرف شيحيصر بي ، اني ما متعودة على هذا الشد من الاعصاب ما اكدر اتحمل كل هالمشاكل ، هاي كدام عينچ انكلبت حياتنا من هدوء وسكون لعاصفة دمرت الاول والتالي

زبيدة : صفنت وما عرفت شنو اجاوبها ، اصعب لحظة يمر بيها الانسان لمن يكون كلبة مليان كلام وينزف وجع بس ما عندة القابلية ينطق حرف واحد يعبر عن الي بداخلة وللاسف اني داعاني من هذا البرود الذاتي
بداخلي الم يخليني من الوجع اسوي اشياء متخطر على بال احد بس الجمود الي بأعصابي يمنعني

ضليت كاعدة اهدئ بديمة لحد ما من البجي غفت ، رحت جبت لحاف غطيتها وصعدت لغرفتي ، خابرتهم ولا واحد بيهم يرد ، تنهدت اوووف الله يكومچ بالسلامة يا خالة وئام ، صحيح اني مو هالكد احب هالمرة بس ما اكرهها وبحياتي كلها ما اتذكر انها فرقت بيني وبين اخواني بأي شكل من الأشكال
جانت تعاملني وكأني بنتها بس اني ما اكدر اتقبلها
كلما كلبي يحن عليها اتذكر امي واقسى اكثر

___________________________________

دُنيا : نقلنا ماما بسرعة للمستشفى ، الطريق كله اني خالتها بحضني وابچي شكد حاولنا نكعدها ومتكعد
يربي دخيلك طز بالفلوس وبكُلشي اهم شي امي
يربي احفظها واحميها دخيل اسمك الاعظم يارب

مُعين : ااااخ يا مُبين النذل بس كون الزمك اااخخخ

ياسر : كافيي اسكت ولتجيب اسمة بعد كدامي اني من هاللحظة مات مُبين بالنسبة الي ويحرم عليه كلبي يرف عليه بيوم من الايام ، اما الراح فخليه وقف لابا الفضل العباس وهو وابو الفضل بعد اني ما عليه

مُعين : يعني انت راح تسكت ما راح تشكتي عليه

ياسر : انت حمار شأشتكي وشكول ؟ اروح اكلهم ابني اشترى اسهم خسرانة وشراح يكلولي ؟؟ تريد تضحك الوادم عليه منو يسجن واحد مشتري اسهم خسرانة هسة يكلك صوجك انت محد كلك اشتري اسهم ما مضمونه ومحد كلك عوفك حلالك سايب

مُعين : بس يابة الفلوس

ياسر : من *** بالفلوس خلي نحيييييير بااااامك هسه ابن الكلب ذبحتني بالفلوس

مُعين : يابة انت كدرتك بس عليه ، مُبين الي يبوك ويشرد وتوكع براسي اني والله يا الله صدك لا كالو
حالي مثل السمچ مأكول مذموم

دُنيا : عطت بي ، دكااافييي يا مُعين متشووف بابا اعصابة تلفانه ومابي حيل نقاش ليييش تزيد الطين بله هوو عايز الله يخليك اسكت

مسحت على راس امي مابيج غير العافية يعمري يربي اخذ من عافيتي وانطيها ، وصلنه للمستشفى اجوي المسعفين بسرعة اخذوها منه ، ضلينه احنه كاعدين برة وبابا لسانة يلج بالدعاء ، اباوع لعمو يحيى طب يركض هو وولدة بما فيهم يوسف وامه
الي اجت تركض وحضنتني

ام علي : حبيبتي دُنيا شلونچ

دُنيا : مو زينة خالة مو زينة

ام علي : لتبجين يعمري ان شاء الله عدها العافية وبعدين انتِ القوية تحملتي الاصعب متتحملين ماما تتخربط شويه عادي يا امي كلنه كبرنه وعادي نتمرض 

دُنيا : دموعي جانت الجواب على كلامها ماعندي جواب بالي كله يم امي

يحيى : ها ياسر سلامات سلامات ان شاء الله خير ، شبيها ام مُعين

ياسر : وكعت ولا من ايد ولا من رجل وشوفة عينك جبناها ركض للمستشفى

يحيى : شنو السبب

ياسر : الشركة

يحيى : شبيها الشركة ، ياسر لتكطم بالحجي جنك ابوك احجي موتت كلبي

ياسر : يحيى مُبين اشترى اسهم خسرانة من شركة (.....) اي لتفتح عيونك هاي الشركة النصابة الي محد بالسوك يعبرها اجه ابني المصون اشترى اسهمهم الخسرانة بسعر لو تسمعة تلطم على وجهك واخذ عمولتة وطفر وام مُعين من سمعت الخبر وكعت وجبناها لهنا

علي (ابن يحيى) : تتتتتف على شاربة النكس والله النغ* اشرف منه 

حليم(ابن يحيى) : عمي لعد مُعين شنو شغلة مو هو و مُبين لزمو الشغل من بعد وفاة خالة وسيلة ، معقولة ما راجع الحسابات ورا شنو رجل كرسي خالي هناك خوما رجل كرسي

يوسف : حايرلي بس يفترلي على الملاهي ويذب الفلوس على الكح** وم*** الشغل

مُعين :بعصبية احترموووا نفسكم شنوو جايين هنا عون لو فرعون ، ثمنوا كلامكم لا اعرف شلون اتصرف وياكم انتووو اصلا شكو وجايين تتدخلون

حليم : ط*** خوفتنا تمشي منا لا ادوس ببطنك هي خنيثة اخوك باك الفلوس وطفر وانت واكف حلكك يسبل جنك جلب كاعد وتلهث وين جنت لو بس حايرلي بس تكعد وتندب حظك لو بيك خير جان حافظت على فلوس ابوك بس انتو ولد عمي ياسر مع احتراماتي اله كلكم عارات

يحيى : كافييي حليييم كافييي نعييييل احترك ابيك اسكتتت مالنه خلك المشاكل احنه بمستشفى مو بالبيت الزم لسانك شوية

حليم : استغفر الله اللهم طولج ياروح

يوسف : كافي حليم اسكت رحمة للكعبة

دُنيا : اباوع لمُعين زعل وعافنه وطلع من المستشفى وبابا كالعادة كاعد وماعنده اي ردة فعل ، شوية وطلعت الممرضة كالت انطوها علاج وصارت زينة بس تحتاج تضل نايمة هسة والطبيب يريدنه بغرفتة
رحنه ورة الطبيب

ياسر : خير دكتور طمني شبيها

الطبيب : الظاهر المريضة متعرضة لصدمة شديدة خلت سكر الدم عندها يرتفع لهالدرجة وللاسف هالنسبة من الارتفاع سببتها اصابة بداء السكري

دُنيا : لا يربي كُلشي ولا السكر ، زين دكتور اذا هبط سكرها يروح المرض لو يبقى

الطبيب : اكيد ميروح مزمن بنتي بس لتخافون تكدرون تتجنون ارتفاعه بالادوية الي راح اكتبها لحضرتها وهم لازم تركزون على وضعها النفسي وتحاولون قدر الامكان تدارون نفسيتها وهم تديرون بالكم على اكلها ، بس لتخافون وضعها حاليا مستقر واني خليتهم ينطوها ابرة مهدئه بسبب الانهيار العصبي الي صارلها فلتخافون شوية وتكعد

ياسر : الحمدلله على كل حال دكتور ياريت تكتبلي كل التعليمات الي لازم نتبعها وياها حتى نسيطر على مرضها

الطبيب : تمام 

دُنيا : بده الطبيب يشرح لبابا واني عفتهم وطلعت ماكدرت اسيطر على دموعي ، سكر !! سكر مرة وحدة يربي هاي امي الي كضت عمرها تعتني بروحها ومدارية نفسها مثل المي الي بالصينية بس حتى متتمرض وتكبر هسة تنصاب بالسكر

طلعت كعدت برة ما كدرت اوكف على رجلية بعد ، يربي منين دتجينه هالمصايب وليش هيج وحدة وره الثانية نزلت علينه منلحك نستوعب الاولى حتى تجي الثانية توكع على راسنه وتلحكها الثالثة والرابعة تهد حيلنه ، لو بابا الله يعينه لبابا منين يتلكاها من ماما وسيلة الماتت وكسرت ظهرة لو من مُبين الكلب الباكة عينك عينك لو من تعبة وكدة الراح كله هدر وبدون ذنب ... حسيت بأحد يحط بطل مي كدامي شلت راسي لكيتة حليم

حليم : شربي ماي واهدي شوية وخلينه نسولف وهاج هذا كلينس مسحي دموعج 

دُنيا : اخذت المي شربت ومسحت دموعي متنهده ، اني تعبانة واحس راح اموت من القهر

حليم : والله يا مرت اخوية الغالية متنلامين حقج اي واحد بمكانج راح يسوي مثلج ويمكن اتعس منج

دُنيا : اني مو مرت اخوك

حليم : يعني انتِ عفتي كل هالحجي وركزتي بس على اول جملة

دُنيا : لان فعلا اني مو مرت اخوك ... اباوعله صفن بوجهي شويه وجاوبني

حليم : ولا راح تكونين ، دُنيا ترة يوسف متزوج هسة خاف متدرين

دُنيا : من كال هيج احس بغصة انحشرت ببلعومي ما كمت اعرف شحجي

حليم : وجهج مبين عليه متفاجى ، صدك عود متدرين ؟

دُنيا : هزيتلة راسي نافية ، من شوكت

حليم : راح يصيرله سنة ، لتلومي دُنيا ترة يوسف هواي عانه من بعدج ما اكدر اشرحلج شصار بي وحتى لو اريد ما اعرف منين ابدي يوسف تدمر بكل ما تحمل الكلمة من معنى ، لحد هاللحظة يتخربط وننقله للمستشفى بسبب انهيار يجي فجأه حتى زواجة ما غير من نفسيتة بالعكس دمرة اكثر

دُنيا : مسحت الدمعة الفرت من عيني بسرعة وسألته ليش ؟

حليم : ما متفاهمين هو ومرتة وكل يوم كابة العيطة بيناتهم ما شفناهم ولو يوم واحد متصافين ، دُنيا ترة يوسف لسة يحبچ ويمكن عيب احجيها بس ذاك اليوم مشكلتة هو ومرتة صارت من وراج

دُنيا : بسببي اني !! ليش اني شعلية

حليم : طابة مرته عليه لاكيتة العفو منج حاضن دشداشتج وهدوم حمودي وغافي وهي شافتة منا وكلبت علينه البيت گلاب

دُنيا : بعصبية لعد هو اذا ما كادررر يتزوج ليش يظلم بنت العالم وياا هو لعب خوما لعب

حليم : يعني هسه انتِ تقنعيني كاتلج القهر عليها لو لان الاخ بعدة يحبج ومو كادر على فراكج ، وترة الصوج منج انتِ اي لتباوعيلي هيج انتِ تخليتي عن يوسف بأصعب لحظات حياتة ، تدرين بي من فقد النطق وضل سنتين ساكت تالي من حجة نطق باسمج
انتِ وبس يبجي ويصيح جيبوها الي

دُنيا : بدموع كافي حليم سد الموضوع رجاءًا ولتهيج عليه المواجع مناقصني ترة ، الله يوفقه بحياتة

حليم : يا عمي اذا هالدعوة طالعة من كلبج اله اخلي جلاب الحراسة تب** عليه

دُنيا : بعز دموعي وضحكت اييع على كولة زبيدة شكد مقرف انت ، اباوعلة ارتبك وكام يمسح على شعرة

حليم : احم على طاري زبيدة يا ترى شلونها

دُنيا : تنهدت بعدك تحبها

حليم : لعد اني المن باقي اعزب لهالعمر متكليلي ، اوووف يا دُنيا خليني ساكت وعوفيها بالكلب احسن

دُنيا : انت تعرف زبيدة شكد تعزك بس هي متعتبرك غير اخ

حليم : زبيدة لا تعزني ولا تعز غيري اني وياج ندري عدها عقدة من كل الزلم ، وما اريدها تعتبرني اخوها لان ادري بيها تكرهه اخوتج العارات

دُنيا : اباوعلة اخذ بطل الماي وشربة وضل يحوص

حليم : زين اكلج هي بعدها تلعب رياضة

دُنيا : اي بعدها

حليم : احم وبعدها حلوة مثل قبل ، يعني صارلي خمس سنين ما شايفها هلي جاي اسأل

دُنيا : ضميت ادية بعدها حلوة

حليم : زين جسمها بعده م.....

دُنيا : هاااا حليم مو كأنك رحت رونك سايد شنو السالفة شعليك بجسمها انت ، وبعدين اصلا انت وين شايف جسمها اذا هي اربعة وعشرين ساعة مكبعة وحجابها ميوكع من راسها كدامكم

حليم : بارتباك اعتذر والله ما متقصد بس تدرين بالساني تكول لسان جلب دومة مفشلني ، يي يلة تعاي ندخل نطمن على امج

دُنيا : هزيت راسي وكمت دخلت وياا صار بوجهنه يوسف

يوسف : وين جنتو

حليم : كاعدين برة

يوسف : روح جيب جاي على العدد

حليم : متروح انت

دُنيا : اباوع ليوسف خزرة

حليم : بدينة برحمة الله رايح 

دُنيا : راح حليم وعافنه درت وجهي لكيتة خازرني

يوسف : روحي كعدي يم ابوج لتضلين تفرفرين هنا مستشفى هاي مو متنزهه

دُنيا : وانت شكو

يوسف : شوفي ترة انطيتج اكبر من حجمج احترمي نفسج وثكلي شوية وبطلي هالسوالف مو طفلة انتِ طحشة شكبرج عمرج 27 سنة لتتصرفين مثل الجهال

دُنيا : احترم نفسك انت ومالك علاقة بية ، شنو عمي خالي ، ابن عمي ، مالك دخل بيه التهي بروحك احسن الك ... اباوعله صفن بوجهي وتقرب و دنك عليه

يوسف : بهمس متتخلين شكد مشتاقلچ وميت على لسانچ هذا اليرادلة كص

دُنيا : غمضت عيوني من استنشقت عطره ووصلي صوتة الجان دوم يهزلي كل خلية بجسمي ، تنهدت مبتعدة عنه وماشية بسرعة ، رفعت ايدي على كلبي لكيتة يدك عبالك يريد يطلع من مكانة ضربت عليه
شبيك انت شنو نسيت شسوة بمحمد وازيدك ترة هو
هسة رجال متزوج فكافي هدء من روعك

وصلت لغرفة ماما دخلت لكيتها كاعدة وصافنة بالفراغ تقربت بسرعة بست راسها وايدها الحمد لله على سلامتج يعمري طمنيني بشنو تحسين .. اباوعلها مترد عليه ، باوعت لبابا وبوجهي علامة استفهام

ياسر : صارلنه ساعة نحجي وياها مترد ، عوفيها على راحتها احتمال ماعدها قابلية تسولف وية احد ، ام مُعين تحبين نطلع ونعوفج ترتاحين

وئام : ياسر

ياسر : امريني عيني انتِ شتردين

وئام : اني صدك صار عندي سكر

ياسر : بأسف اي بس الحمدلله مو مرحله متقدمة نكدر نسيطر عليه

وئام : وصدك مُبين خسرنه الشركة

ياسر : ليش انتِ متعرفين يا وئام

وئام : جاوبني ياسر صدك مُبين خسرنه الشركة لو اني جاي اتوهم

ياسر : اي اشترى اسهم خسرانة وخسرت الشركة

وئام : ليش

ياسر : شنوه الليش ؟

وئام : بدموع ليش سوه هيج

ياسر : بحسرة لو اعرف جان جاوبت نفسي قبل لا اجاوبج

دُنيا : اباوع لامي صافنة ومتخلي عينها بعين احد وتسولف ويه بابا وبس دموعها تنزل ، امي حبيبتي لتبجين موزين عليج ، وبعدين لتخافين هالمرض ويه العلاج راح نسيطر عليه صدكيني ، لتخافين احنه وياج واذا على الفلوس فطز انتِ عدنه بالدنيا

وئام : اذا اني مو وياي انتو شلون حتصيرون وياي ، تدرون احس عقلي ما جاي يستوعب ، معقولة هيج كُلشي بلمح البصر راح ، ابني ، فلوسي ، بيتي ، صحتي كلها هيج ودعتني وراحت ، ليش شسويت ؟ منو اذيت ؟ اشو كافية خيري شري

يحيى : خوية هذا اختبار من رب العالمين كولي يا الله

ام علي : اي والله ما فد يوم نخينه الله وردنه انخي يساعدج ما راح يعوفج يا حبيبتي لتيأسين من رحمة رب العالمين ، لا يأس من رحمة الله

دُنيا : اباوع لامي ابتسمت ودموعها تجري على خدودها المخرمشة والي صايرات زرك من كد ماضاربتهن

وئام : بابتسامة وكت الصارت شغلة القرض والولد بلحظتها تبطرت على الله وكلت مستحيل يكون اكو اسوء من الوضع الاحنه بي ورفضت اشكر نعمتة وفضلة تالي على حجايتي هاي الله صدك وصلني لاسوء حال وهاي احنه كدامج يا ام علي صدك صرنة باسوء حال

ياسر : هونيها يا عيني هونيها كلشي واله حل

دُنيا : ضل بابا يهدئها لحد ما غفت عفناها وطلعنه ، اباوع لعمو يحيى واكف يحجي وية بابا والولد واكفين يم خالة ام علي ويمي ، حاولت اركز وية عمو وبابا حتى اعرف شديسولفون وسمعتهم

يحيى : اسمعني ياسر هسة راح اطلع للبنك اسحبلك 50 مليون واحولهم لحسابك حتى تسدد بيهم قرض البنك بعد شهرين واذا معوز للفصل اني ركبتي سدادة
شتردين وشتحتاج اني بخدمتك ، لو اكلك هاي بطاقتي اخذها و روح اسحب المبلغ الي تحتاجة 

ياسر : لا خوية خيرك سابق كلشي ما اريد منك بس وكفتك وياىة تسوه الدنيا

يحيى : شنو كلشي متريد بكيفك هي ، دهاك البطاقة على الاقل اخذلك ولو بس 50 مشي امورك بيهن علما تبيع سياراتك نسيت الفصل باجر ومنعرف شكد لازم ننطيهم هاي من غير التعويض

ياسر : لا لتخاف اليوم اجه صديقنا ابو المعارض واخذهن كلهن وكتلة بيعهن الي باسرع وقت

يحيى : وباعهن

ياسر : لا للاسف ما باعهن هو اليوم الصبح اخذهن

يحيى : وتالي ياسر ترة باجر الكعدة

ياسر : راح اسحب كل فلوسي الي بالبنوك واشوف شكد الفصل اذا ماكفن للفصل والتعويض اشوف شسوي حتى لو اعرف ابيع السيارات بخسارة المهم افتك من سوالف العشاير والفصول تدري بيه اتخبل منهم

يحيى : وانت ليش تسحب كل فلوسك خبل انت ، غير تنتظر الكعدة وتشوف الجماعة شكد يطلبون

ياسر : ميخالف يحيى اني حسبتها اذا همه اربعة اكيد ماراح يكون الفصل شوية هاي من غير التعويض الراح ادفعة لاهلهم بسبب القروض الماخذيها الولد والطامة الكبرى انو اقل واحد بيهم ماخذ قرض ب15 مليون والباقين اصعد بيهم على مزاجك

يحيى : لعنة الله على ابنك النذل الخسيس ادري حتى لو عدو ميسوي هيج ، ااااااخ كون الزمة اله اشرب من دمة ، هسة ما كفاك القرض اليهد الحيل تدمر الشركة وتدمر جماعتك ليش هييي خسييييس

ياسر : يا خوية من بعد الصار تيقنت انو المثل اليكول "الفلوس تغير النفوس" صحيح هاي ابني باعني وعرض حياة خواتة واهلة واصدقاء عمرة للخطر وطفر بجلدة بس علمود فلسين فلوس

يحيى : الله يصبرك ويعينك ياخوية ، زين تعال تتوقع فلوسك الي بالبنك راح يكفن

ياسر : اكيد يكفن واحتمال حتى يزودن بس هسة خلي تنباع السيارات حتى اكدر اسدد للبنك الدفعة الاولى بعد شهرين

يحيى : وتتوقع السيارات العندك تكدر تغطي تكاليف القرض

ياسر : ولا يجيبن حتى 40% من المبلغ الماخذه منهم

يحيى : زين وتالي المن بايعهن لعد

ياسر : اذا ما انطيت الهم ولا دفعة راح ياخذون الاموال المنقولة والغير منقولة يعني حتى القميص اللابسة كدامك يعتبرو ملك للدولة وينزعو الي فاريد ادفعلهم ولو دفعتين او تلاثة حتى لو ياخذون البيت مياخذو كله واكدر استفاد من المبلغ الراح يطلعلي منه بلكي احصلي بيت وافتحلي مشروع حتى لو صغير  المهم اكدر اعيش بنياتي وامهم وما اخليهم بوضع تعبان

يحيى : متكلي انت متوزاي وتاخذ هالمبلغ والله حتى صعب الواحد يلفظة لفظة وحدة على اللسان ، صارلنا عمر بالتجارة عمرنه ما اخذنه هيج مبلغ من البنوك وهاي احنه عود نلعب بالفلوس لعب وما تجرأنا بذاك الوكت نسويها ، متكلي شجاك هسه يا ياسر

ياسر : شسوي يا خوية عبالي صدك راح يصير مشروع العمر ويستاهل اخاطر واخذ هالمبلغ من الدولة حتى احقق حلم ابني تالي فعلا صار مشروع بس مو مشروع العمر لا مشروع تدمير حياتي وكل البنيته

يحيى : اني ما راح اعوفك ومو بكيفك ما اكدر اشوفك خسران كلشي وواكف تباوع بالوجوه ، ياسر ترة انت ساعدتني باصعب ايام حياتي لتتخيل ممكن اعوفك بنص الطريق

ياسر : يحيى كتلك ربع دينار ما اخذ منك ، المشكلة الصارت بسبب غبائي وحبي المفرط لولدي وهالشي خلاهم يستغلون اول فرصة تجيهم ويطعنوني بظهري والمفروض كل الصار اني اتحمل مسؤوليتة لان اني الغلطان

يحيى : ياسر عوفك من عزة النفس وكبريائك هذا الطيح حظك ، انت مستوعب ترة انت راح تصفي كل املاكك وتطلع ايد ورة وايد كدام اذا على البيت بله تدبرة بكم المليون الراح يطلعلك من البيت بس شلون منين تعيش بناتك المتعودات على حياة الرفاهية والعز والترف

ياسر : ما راح اخليهن بعازة شي لو اعرف اصفى على الحديدة ، ابدي من الصفر ومن جديد حتى لو اكعد ابيع علج بالشوارع ولا اخليهن معتازات

دُنيا : اسمع كلام بابا ودموعي تنزل عشرة عشرة معقولة هاهي خلص احنه خسرنة كُلشي وحتى على كولة بابا لو تريد تزودلنة كم مليون شنريد نسوي بيهن واحنه عايشين بمحافظة العيشة بيها حيل غالية
انتبهت لبابا وعمو اجوي قريب علينه مسحت دموعي بسرعة

اجة بابا وكف كبالي

ياسر : عليمن هالدموع يحبيبتي اذا على امج فنص الشعب العراقي بي سكر والناس عايشة ومتعايشة ويا لتخافين عليها واحنه كلنه حواليها وراح ندير بالنه عليها

دُنيا : هزيتله راسي محاولة ابتسم ما اريد ااذي فوك ماهو متأذي ، مرت كم ساعة وخلص مغذي امي واستقر وضعها كتبلنه الطبيب خروج ، راح بابا يخابر مُعين ، مُعين غالق جهازة تنهدت يعني محل تمزعل هسه احنه بيا حال .. هاا بابا

ياسر : خلي يولي هسة اوصي على تكسي بحاله اني

يحيى : ولك انت صدك متسحتي لعد احنه الواكفين هنا شنو غير مرئيين ؟

ياسر : خوية انت عندك شغل ما اريد اعطلك اخذ الولد وام علي ورجعوا اني ادبر امري

دُنيا : بابا من النوع الجدًا خجول حتى من عدنه يستحي وهالشي مسببله هواي مشاكل لان خجله يخلي اغلب الاحيان يدوس على نفسة بس في سبيل ميكلف احد .... اباوع لعمو يحيى صار عصبي

يحيى : لو ما بنتك هنا جان غلطت عليك غلطة اخليك فاهي ومتعرف تحجي ، تعال حليم وصل بيت عمك للبيت واني اروح اشرف على الشركة وارجعلك ما اتاخر

يوسف : يابة خلي حليم يروح وياكم اني اوصلهم ماعندي شي

يحيى : انت اسكت ولتضل تحوص محتاجك بالشركة خلي اخوك يوديهم يلة تعالو

دُنيا : اباوع ليوسف همس لعمي بصوت شبة مسموع

يوسف : يابة لسانك شوية عيب احنه مو بالبيت

يحيى : ديلة يلة هو اني كدامن حاجي هو عمك وحتى من طهروك شايفك بعد عليمن هالمستحه

يوسف : يابة رحمة للكائنات كافييي

دُنيا : بابا ضحك على سوالف عمو رغم ماله خلك واني متت من الخجل وحليم انتبه عليه

حليم : هههههه يله لتستحي خوية ماكو احد غريب كلها من الحبايب

دُنيا : درت وجهي عنهم طبعا عمو يحيى ما شاء الله عليه لسان مو طبيعي شلون هو وبابا اصدقاء الروح بالروح وهمة شخصياتهم متناقضة هيج ما ادري

طلعنه ماما وخذانه حليم بسيارتة والطريق كلة يحاول يهدئ ببابا وماما ويطمنهم كونه محامي ويعرف بالامور القانونية التخص القرض والفلوس
وصلنه للبيت

دكينه الباب محد يفتح وبابا ناسي المفاتيح بالبيت يربي وين راحن العاملات صُدك جذب ، اباوع لحليم دك الباب بمفاتيح السيارة حيل ، سمعنا صوت زبيدة الي يلعلع

زبيدة : اييييي كلنه ايييي لزكتوووو خوما لزكتووو فتهمنا ... فتحت الباب لكيتهم اجوي ، هاا بابا الله يساعدكم بشرني شلون صارت خالة

ياسر : وين صرتي يا بابا صارلنه ساعة ندك بالباب وعمج فادي وين ليش مافتح الباب هو

زبيدة : اسفة بابا جانت ديمة نايمة بالصالة علما كعدتها حتى تصعد واخذت ربطة واجيت وعمو فادي استأذن وراح عندة شغل .. تعالو تعالو دخلوا

ياسر : تعال وليدي حليم ادخل

دُنيا : اباوع لحليم فاصل وعيونة على زبيدة الي اصلا ما لاحظت وجوده ، بابا عاط بي ياله انتبه

حليم : هاا عمي هاا اامرني

ياسر : تعال ابني ادخل لتوكف برة

حليم : لا عمي عندي شغل لازم اروح يلة استودعكم

ياسر : ميصير حبيبي صارلك هواي ما جاينه تعال ادخل اشربلك ولو استكان جاي

حليم : لا عمي خيرك سابق رحم الله والديك لازم اروح عندي شغل

زبيدة : اباوع هذا حليم ابن عمو يحيى اجه وياهم حيل صارلي شكد مشايفته من توفى حمودي لليوم ، بابا سلم عليه وتشكره ودخلو كلهم اجيت اسد الباب واستوقفني صوتة

حليم : ولج ليش متسلمين

زبيدة : ولاچة بضلوعك ليش تجاوز

حليم : هههه عفية شلون لسان شايلة ، شلونچ

زبيدة : الحمدلله

حليم : ما سألتيني شلوني

زبيدة : مبين عليك زين ليش اسأل

حليم : اشتاقيتلج تصدكين

زبيدة : ابتسمتلة تشتاقلك العافية ، تدخل لو اسد الباب

حليم : وتالي زبيدة

زبيدة : وتالي شنو ؟

حليم : عود ليش تغشمين نفسج

زبيدة : حليم اذا جاي تنوهه على الموضوع الي ببالك فاني كتلك الف مرة برأيي وانت اكثر واحد تعرف رأيي بخصوص هالموضوع سواء وياك او ويه غيرك

حليم : يعني تقنعيني راح تضلين طول العمر بدون زواج

زبيدة : و انت منو حتى اقنعك وترة انت تدري بيه رافضة فكرة الزواج رفض قطعي فليش تعيد بنفس الموضوع ترة السالفة مضى عليها 5 سنين وانت بعدك تحجي بيها

حليم : كلبي اغبر وما راضي يستوعب

زبيدة : انت اعرف بنفسك بعد

حليم : تدرين اتمنى اشوف الراح يكسرلچ هالخشم منو

زبيدة : للاسف امنيتك ما راح تتحقق ولا بيوم من الايام فأسفي عليك والله

حليم : واذا تحققت

زبيدة : ابتسمت يا عمي ساعتها تعال واتفل بنص وجهي ومعتب اليكلك ليش خوش 

حليم : من عمت عينة اليتفل بوجهك زبد

زبيدة : تنهدت ما عرفت شنو اجاوبة ، حليم اني لازم ادخل ترة زحمة هاي الوكفة الواكفتها وياك من رخصتك يا تدخل يا تروح

حليم : رايح يلة باي يحلو

زبيدة : لا هلا ولا مرحبا ، سديت الباب ودخلت ترديلك رجال ثكيل ماكو اووف ، فتت لجوة لكيت بابا واكف وخازرني يمة هاي ليش هيج يباوعلي

ياسر : شعندچ واكفة برة وية حليم

زبيدة : جان ديسلم علية وفشلة صارلي هواي مشايفتة واستحيت احرجة وادخل

ياسر : بابا ميصير وكفتچ ويا ميجوز لو مهما يكن يبقى غريب وانتِ بنية حبيبتي ، ولتنسين هو خطبچ وانتِ رفضتي فزحمة توكفين ويا ، اني لوما اثق بيج كان الي غير تصرف وياج بس ثقتي بيج تخليني اسكت لان ادري بيج شكد مؤدبة وميطلع منچ الشي الموزين

زبيدة : لا حبيبي ولا تخلي ببالك مجرد الولد سلم علية من باب الذوق وراح ، تقدمت بست راسة ومشيت صحيح اني وكحة بس هاي المواقف تربكني
رحت لغرفة دُنيا لكيتها هي وديمة يبجن رحت كعدت يمهن .... شبيجن ؟

دُنيا : سولفتلها الصار وية امي

زبيدة : بأسف ، استغفر الله يلة الحمدلله على كل حال سكر ولا غير شي المهم تكون موجودة بيناتكم وحسها داير مدايركم

ديمة : بدموع الله ينتقم منك يا مُبين والله هاي اول مرة ادعي على احد بس من صُدك كد ما محترك كلبي على الصار بينه دعيت عليه من كل كلبي عساها بأعز ما عندة دمرنا لا خلالنه فلوس ولا سمعة ولا صحة

دُنيا : تدرن اليوم دريت من حليم يوسف طلع متزوج وصارله سنة

زبيدة : و وجه البومة هذا ميعرف يسد حلكه

دُنيا : يعني انتِ تدرين ؟

زبيدة : اي اكيد ادري عمو يحيى سولفلي من زمان وحتى كلي هو ما مستقر وية مرتة ودائما بس مشاكل وحتى بابا يدري بس احتمال ما حب يضوجج ويكلج 

دُنيا : بدموع توقعته بعده يحبني وما نساني 

ديمة : شكد حقير لعد معقولة بهالسرعة نساچ واتخطاچ

زبيدة : هو صح اني اكرهه الزلم بس خلي نكون واقعيين ، دُنيا يوسف شكد حاول وياچ ، كم مشية دز الج وانتِ حتى رفضتي تشوفي وتحجين وياا ، اني ما الومج بس ما دامچ انفصلتي عنه ورفضتي تنطي حتى امل انو ممكن ترجعيلة فمالچ حق تبجين او حتى تعترضين على زواجة

ديمة : بس حتى لو هو شلون كدرت نفسيته تتقبل وحدة غيرها لعد وينة يحبها ويموت عليها وكتل روحه ياله خذاها

زبيدة : المسأله مو مسأله نفسية اساسًا هو تزوج حتى يطلع من الحالة النفسية الزفت الي جانت ملازمته ومع هذا هو ما اتقبلها لدرجة عمو يسولفلي يكول حتى مينام يمها بنفس الغرفة

دُنيا : بدموع وهو اذا ما كادر يتقبلها ليش تزوج وشنو ذنبها بنت الناس تورطت وياا

زبيدة : هوب هوب ترة يوسف تزوج بنت عمة سرى واكيد هي تعرف وضعة ونفسيته شلونها يعني ما انجبرت عليه كُلشي صار بموافقتها و رضاها

دُنيا : فتحت عيوني شنووو ، سرى !!

ديمة : مو هاي بت عمة الطبيبة النسائية الجانت تراجع عدها دُنيا وهي حامل بحمودي

زبيدة : اي هي

دُنيا : انصدمت من كلام زبيدة ، زين شلون وسرى من الاساس رافضة فكرة الزواج هي بلسانها جانت تكلي انو هي مدلله ومتكدر تتحمل مسؤولية زواج ورجل شلون قبلت لعد

زبيدة : والله علمي علمچ  ، اباوعلها تنشغ هسة متكليلي عليمن ناصبة هالمناحه ، دموعچ راح تغير شي قابل ؟

دُنيا : بدموع ما ادري والله ما ادري

ديمة : يا عيني يا دُنيا شكد رقيقة انتِ الله يعوضج بفارس احلام احسن منه وبعدين لتخافين انتِ تجننين والزلم يوكفولچ طابور بس تكولين بلي

زبيدة : استغفر الله يربي ، يعني الحياة بس رجال ترة تكدر تكون ناجحة بحياتها وتحقق هواي من احلامها وتكون سعيدة بدون الرجال

ديمة: زبيدة رجاءًا اذا انتِ عندج عقدة من الزلم فلتحاولين تعقديها وياج وبعدين الرجال والمرة ميكتملون بدون بعض و وجودهم سوة شي ضروري بالحياة

زبيدة : ليش انتِ ناقصة حتى يجي الرجال يكملچ ليش هيج تفكرن انتن ، عفية اذا المرة تشوف نفسها ناقصة بدون الرجال مينلام المجتمع اذا احتكر حقوقها وهانها 

ديمة : يووو يا زبيدة راح نبدي بمحاضراتچ الي متخلص الله يخليج كافي بس تتفلسفين

زبيدة : اتفلسف لو لان كلامي صح ميعجب ؟ ولو اني ليش اتعب نفسي واتناقش وياج ، اذا انتِ من تعتب رجلچ باب البيت يرتفع عندچ هرمون التصنع وتتقمسين شخصية اصلا مو شخصيتچ بس حتى تثبتين للمقابل انتِ انثى وكيوت ومن هالخريط
مال بنات هالوكت

دُنيا : هيوو هيوو شبيجن بنات تسودنتن بيا حال احنه وانتن كاعدات تتناكرن

ديمة : لحظة دُنيا من رخصتچ ، منو هاي التتصنع ترة مو بمعناها اذا انتِ مسترجلة وتتصرفين مثل الزلم كون كل البنات يصيرن مثلچ وترة اذا نصفن عليج نلكاج رجال بجسم مرة ومو بس هيج انتِ تعيبين على الزلم وبكُلشي تقلديهم ، سياراتچ ، صوتج ، ستايلچ ، حتى الرياضات الي تمارسيها مو مال بنات فليش تكولين عني متصنعة وانتِ اول الناس التتصنع

دُنيا : اباوع لزبيدة صارت عصبية وكامت

زبيدة : اولا اني ما اتصنع وثانيًا ولج منية المسترجلة اني اسوه راسج وراس هذولة الچلاب اهل الغرائز الحيوانية والـ******

ديمة: انتِ مسترجلة شأتي ام ابيتي وبالعلامة روحي باوعي للمراية وشوفي نفسچ انتِ حتى صوتچ بي خشونة مثل الزلم لو باعي لجسمچ تكولين رجال وصاير مرة ، والله لوما تضاريسچ الي واضحة يصير مشكوك بأمرچ

دُنيا : كافي ديمة ترة تجاوزتي هواي واحنه اصلا چنه نحجي بموضوع وانتِ رحتي لموضوع ماله اي علاقة بالچنه نحجي بي

ديمة : ما تجاوزت بس هي مصختها ، متشوفيها دومها مطلعتنه ماعدنه كرامة وضعيفات وبس هي الناصرة لحقوق المرآه وبس هي القوية وبس هي التفتهم ولو ندور جواها نلكاها ذرة شخصية ما عدها ، كافي بطلي هالمثالية كل الحواليچ كاموا يكرهوچ بسبب شخصيتج السخيفة هاي ، كاعدة وتتفلسفين على خلق الله دكافي بطلي 

دُنيا : اباوع لزبيدة صفكتها راشدي ، جريتها لا زبيدة لا شلون تتجرأين تمدين ايدج عليها ترة زودتيها شنو عبدة عندچ هي حتى تضربيها متستحين شلون تسوين هيج

زبيدة : رفعت اصبعي واشرت عليها اسمعيني زين هالمرة سمحتلج تتجاوزين حدودچ وياي المرة الثانية اذا سمعتچ تكولين عليه مسترجلة اراويچ المسترجلة شتسوي .... الظاهر بأخر فترة اني صرت حبابة وياكم زيادة عن اللزوم بس الظاهر النماذچ المثلج مينعطون وجهه

وعناد بيج راح اضل مثل ما اني ومستحيل اتغير وراح اضل احب نفسي واقدسها وخليج انتِ منتظرة الرجال الي ان شاء الله يجي ويدمغ بيچ ويسويچ وصلة مسح لان انتِ هذا دواج ام الزلم .... عفتهن وطلعت

دُنيا : درت وجهي لكيت ديمة صافنة وخدها انطبعت عليه اصابع زبيدة

ديمة : سمعتيها شكالت اني ام الزلم

دُنيا : ترة انتِ كلتي عليها مسترجلة وهي مو هيج

ديمة : لا هيج ،  والله العظيم اني اراويها على هالراشدي اني بابا بحياته ما مد ايده عليه تجي هاي تضربني بسيطة يا زبيدة انتِ البديتي واني اعلمچ

دُنيا : خليت ايدي على راسي يربي بهالبيت ماكو واحد يحس على دمه ويكول احنه واكعين بمصيبة مو مال مشاكل زيادة ... عفتها بغرفتي ورحت ورة زبيدة فتحت باب غرفتها لكيتها مطلعة اشيائها وتريد تتمرن

زبيدة : طلعي برة

دُنيا : انتِ تنجبين و ولا كلمة شلون تضربين ديمة

زبيدة : يطبها مرض اصلا بختها اني ضربتها باليمنى مو باليسرى جان فلشت سنونها مرة ثانية

دُنيا : والله ما اعرف شكلج عود هاي اختنه الصغيرة والي المفروض نحاميلها ونعلمها الصح من الغلط مو نضربها وبعدين انتِ من شوكت هذا اسلوبج بالتعامل

زبيدة : ما اريد اتناقش بالموضوع ، طلعي يلة اريد اتمرن

دُنيا : طالعة بس اجيت احذرج ترة ديمة ما راح تسكتلچ على هالضربة

زبيدة : روحي دُنيا فتحي كنتوري حبابة

دُنيا : باستغراب ليش

زبيدة : نزليلي بطانية وتعاي غطيني تدرين بيه ارجف وخاصة من لولو كاتي تجيني ام الركب

دُنيا : غميتها وطلعت سادة الباب ، بيت مال مخابيل

رحت لغرفتي حتى ارتبها واكفة داعدل الخانات الفوك مال كنتوري ولفتت نظري جنطة جبيرة ، فتحتها ولكيتها مليانه البومات صور ، اخذتها وحبيت اطلع برة اغير من نفسيتي شوية بدل هالكائبه الماليتني 

الدنيا جانت ليل والبيت كله سكون بس اني كاعدة وبالي يشتغل باجر الكعدة مال الولد ، الله يستر والله ميتة خوف لتوكع على راسنه مصيبة اكبر من القبلها

تنهدت فاتحة الجنطة ومطلعة اول البوم كان مكتوب علية خطوبتي ، فتحتة وباوعت لاول صورة چانت بيوم خطوبتي اني ويوسف ، جنت بيومها لابسة فستان نيلي شمواه طويل وفاتحة شعري على طولة
ومسوية مكياج يبرز ملامحي ، جنت طالعة كُلش حلوة شكلي قبل يختلف هواي عن هسة

كلبت على الصورة الثانية ، ما حسيت نفسي الا وابتسم واني اشوفها جانت صورة عفوية اخذناها اني ويا بعد ما خلصت حفلة عقدنة وبقينه اني ويا بالاتسقبال وحدنه ، صفنت على ايدي و ابتسمت راجعة بذاكرتي لقبل 7 سنوات

عودة الى الماضي
____________________________

دُنيا : خلصت حفلة العقد وعافوني اني ويا وحدنه بالاستقبال واكفة واحس رجلية كومة حاملاتني ، حسيت بي يوكف ورايه ، غمضت عيوني من حسيت بانفاسه يم اذاني

يوسف : بهمس الف مبروك

دُنيا : جاوبته واحس راح اوكع من طولي ، الله يي يبارك بيك ، حسيت بي يديرني عليه ، اباوعله اخذ ايدي مخليها على صدره وحضن خصري مقربني عليه

يوسف : شو دنيتي رفعي عيونج وباوعيلي ابد لتغمضين خليني امتع عيوني بشوفة عيونج وتفاصيلچ الاموت عليها

دُنيا : رفعت عيوني مباوعه لوجهه عيونة الخضر البيهن سحر شكد ما اوصفة اقصر لو تقاسيم وجهه التجنن ، شواربه المرتبة ، فكه المابي لحيه وزيانه البسيط ، كُلشي بي ياخذلي عقلي

ابتسمت من تخيلت خلص بعد هالانسان صار الي واني مرته اي اني مرتة ، حسيت بأيده تمسح على خدودي بخفه ، تنهدت وكأني ذبيت كل هموم الدنيا من لمسني

يوسف : متتخيلين شكد اجت باحلامي هالخدود وشكد تحسرت عليهن واشتهيت ابوسهن

دُنيا : بست باطن ايدة هامسه ، احبك ، بدون ميجاوبني دنك واخذ شفايفي بقبله قاسية وحنينه بنفس الوقت بلحظتها كل الحسيت بي إني حرفيا داطير واغيب عن الدنيا

ما اعرف شكد مر وقت واحنه بهالوضع لحد ما حسيت بلمساته بدت تتماده فزيت و دفعته عني رافعة ايدي مصعدة دلعة الفستان الي نزلها الافندي ، سلامات خوما ماكو شي

يوسف : شنو حلالي انوب تحرميني من حلالي  وبعدين طعم حمرتچ فدشي سوالي واهس فوك ما اني جاي مفول 

دُنيا : بخجل كافي يله حتى لو حلالك ميصير هاي بالعقد وهيج لعد بالعرس شتسوي ، اباوعله عضلي شفته وسوه حركة سخيفة بوجهه

يوسف : اووووف لو اسولفلچ شمخطط وشرايد اسوي بذيج الليلة

دُنيا : ضربته على صدرة ولي يله لتمصخها وبطل هالحركة البايخة مالتك ترة والله تفشل وتخجل الواحد

يوسف : هههههههه دتعاي خلي نكعد اريد اسولفلچ سالفة

دُنيا : كعدت بصفة وابتسم چني اول مرة اشوف رجال كبالي ، اباوعلة لزم ايدي وباسها

يوسف : تدرين اني ناذر نذر ولازم انفذه

دُنيا : نذر !! وانت من شوكت تنذر ؟

يوسف : ولج شو انتِ ماخذه مو خوش نظرة عني

دُنيا : ابتسمت لا بس تفاجئت

يوسف : المهم اني ناذر نذر ولازم انفذه باسرع وقت واليوم

دُنيا : افتهمت بس شنوه النذر ؟

يوسف : نذرت لو الله خلاچ من نصيبي وحلالي اله الزم هاي الحلوة واعضها

دُنيا : اباوعلة رفع كم ايدي ، باستغراب شتعض ؟ بعدني داسأله وما احس عليه الا دنك ولكطني عضه بأيدي خله روحي تفرفح ، جريته من شعرره وللللك ايدددي خرب بلييييسك لا يوسف لا ايديييي حباب

يوسف : ههههههه ولج اوكفي خليني اتونس شلون لحم مربرب يييييمه افيييش يييييمه

دُنيا : دفعته واني اضحك عابت هالنذور اي والله ، باوعت لايدي وضربته دباوع شسويت بأيدي ، اباوعله يتمضحك ووجهه صار دم ضحكت على ضحكتة

يوسف : بشرفچ خلي ناخذ صورة لهالحدث الجميل لان احتمال هالعضه بعد ما احصل مثلها 

دُنيا : طلع موبايله وكومني كعدني بحضنه وباسني من خدي وسوه علامة النصر وبفترها چانت هسوتها طالعة مودة علامة النصر بالصور ، تره درينه بيك ضابط 

يوسف : غصبًا على خشمج الافنص ضابط وافتخر يله خلي ناخذ الصورة ولج لتطب علينه العصابة وتخرب اللحظة

دُنيا : ضحكت اني رفعت ايدي ابين العضة واخذنه الصورة واحنه نضحك

__________________________________

الحاضر

دُنيا : رفعت صورتنه وحضنتها واني ابچي ، الله ينتقم من الي چان السبب ببعدي عنك ، دمرتوني الله يدمركم ، خسرتوني اغلى ثنين على كلبي ، ابني وحب حياتي وهياته يوسف تزوج وشاف حياته

واني الباقية اكل بروحي واتحسر على الماضي الحلو الچنت عايشته ، يربي لو يبقى اخر يوم بحياتي بس اريدك تراويني عذابك بالي دمروا حياتي وحرموني من زوجي وابني وخلوني عايشة على الذكريات

تنهدت موخرة الصورة عن صدري وضليت اكلب بالصور، اباوع لصورة يوسف وقت الي ترقى وصار نقيب دنكت بستها بقوة والله احبك واموت عليك بس ما اكدر اتقبلك مثل قبل ، كلما اشوفك اتذكر الانذال شسوو بيه واتذكر شغلك چان سبب من الأسباب الي حرمتني من ابني واكرهك

ضليت كاعدة للفجر اكلب بالصور ساعة اضحك وساعة ابجي هالليلة چانت ليلة غرييييبة فتحتلي جروح قديمة وذكرتني بأحداث ما جنت اغفى الا واني متذكرتها ومبتسمة

اذن الاذان كمت كعدتهم ورحت اصلي اباوع لبابا الي ديصلي بالصالة ويه كل ركعة يطول بالسجود وكأنه يناجي رب العالمين حتى يخفف من الهموم المتكدسة بكلبه وعلى كتافه ... تقدمت وكفت كدامة وره ما خلص هاا بابا شلون تحس نفسك

ياسر : الحمدلله نحمده ونشكر فضله على كل حال ، انتِ شمكعدج يحبيبتي بهالوقت وشعندچ بره هم كابوس

دُنيا : لا بابا اني اصلا ما نمت ضليت كاعدة عيني متاخذ نوم

تنهد وجاوبني

ياسر : حتى اني شكد حاولت انام ما كدرت

دُنيا : شحتسوي هسه

ياسر : راح اطلع اتمشى شويه علما يكشف الجو حتى ارجع ابدل واروح للبنك اسحب الجزء الاول من المبلغ

دُنيا : ما اعتقد راح يسمحولك تسحبهن كلهن

ياسر : اعرف لهالسبب راح اجزئهن ما اسحبهن بنفس الوقت

دُنيا : طيب تحب اسويلك ريوك تاكل قبل لتطلع

ياسر : لا بنيتي كلشي ما اشتهي

دُنيا : درت وجهي شفت زبيدة تنزل وهي مغمضة هاي متخاف توكع على وجها

زبيدة : صباح الخير ... هاي بوسة الك بابا تعذرني ما اكدر اتدنه بعدني ما مغسلة وجهي

ياسر : دمشي عدل بويه راح توكعين على وجهج

زبيدة : لتخاف مسيطرة

دُنيا : زبد بابا راح يطلع يتمشى تروح ويا

زبيدة : لا وين اكدر هستوني غفيت ماصارلي حتى ساعة من خلصت الاسئلة اليوم عندي امتحان شامل فضليت كاعدة ، يله باي اروح انام حتى اكعد بالسته ابدل ، دادا فدوة كعديني بالستة لتروح عليه نومة ويطيح حظي

ام حسن: صار حبيبتي

دُنيا : رجعت زبيدة لغرفتها واني كعدت ويه خاله ام حسن حتى نتريك شوية ونزلت ديمة تركض 

ديمة : صباح الخير

دُنيا : صباح النور شبيج تركضين من الصبح

ديمة : عندي محاضرة ولازم اروح من وكت يله باي

دُنيا : بعد وكت ولچ حتى ما تريكتي شلون حتفتهمين وانتِ كُلشي ما ماكله وبعدين انتِ من شوكت ترحين للجامعة بدون مكياج ، اباوعلها مرتبكة ومو على بعضها

ديمة : هاا مو مالي خلك اليوم وعلى عيوني رايحة يله بيباي اندعيلي

دُنيا : الله وياچ بالتوفيق ان شاء الله ، رجعت اكمل ريوكي واسولف ويه خالة ام حسن ، اخذتنه السوالف وما حسينه بالوقت الا لمن سمعنه صراخ زبيدة الجاي من فوك ... يبووو عفيييه بيييت كل ساعة مصيبببة
صعدت اركض اني وخالة ام حسن على صوتها

************************************

لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️❤️

شنو رايكم بالاحداث ؟

شنو تتوقعون حيصير بالبارت القادم ؟

.

.