رواية الموت الحي الفصل الثامن 8 - بقلم براء الموسوي

مرحبا حبايبي العسل شلونكم ❤️

وينهم الكالن بعد سنة ياله ينزل البارت ، تعالن عيني البارت نزل قبل لا تخلص السنة 😁❤️

#المـوت الحي
#للكـاتبة بـراء الموسوي

ديمة : دخلت بسرعة لجوة شفتهم واكفين وبابا يتصايح ويه زبيدة ، درت وجهي وشفت معين كاعد على عربانه وملفلف ، دخيلك ياربي هذا شعنده هنا ؟

زبيدة : بابا هاي اخر مرة اكلك اذا هذا يبقى بهالبيت قسم بالله ما ابقالكم هنا

ياسر : زبيدة ترة اخوج مريض

زبيدة : انييي ماعندييي اخوو لتكول اخوج

وئام : انتِ شبيييج ماعندچ احساس اخوج مريض وماعندة احد وييين يروح متكليليييي وين يروح قابل يكدر يعتمد على نفسه حتى نعوفه

زبيدة : انتِ لتدخلين الكلام ما موجه الج ، اني كاعدة احجي ويه ابويه وخاف عبالج الراشدي الضربتي الي راح انسى بهالسهولة وداعتها لامي لوما انتِ مرة جبيرة جان عرفت شلون اردج بساعتها 

ياسر : زبييييدة تأدبي لا اكوم احط النعال بحلگج واااااالله ، ادبسزز شهالاسلوب هذا نسيتيي هالمرة الواكفه تحجين وياها بهالطريقة الوقحة هاي بمقام امج

زبيدة : ماكو احد بهالدنيا بمقام امي وانت سيد معين ياريت توفر شويه من دموع التماسيح الجاي تصرفها
علينا لان خاف تحتاجها بعدين

واذا عبالك بهاي الدموع راح انقهر عليك واقبل تكعد ويانا فأنت غلطان لان اني شبعانه من هالافلام وطالعة من خشمي والله فرحمة للكعبة بطل

ديمة : زبيدة كلامها ويه معين كان جارح جدا ، رغم كل الصار بس منكدر ننسى انُ معين الصارله شي شنيع ، خسر اعظم شي ممكن يملكه الإنسان بهالكون
اطفالة وصحتة

اباوع لبابا راح عت زبيدة حيل من أيدها وكام يصيح عليها لان كلامها كان جدا مستفز بحيث استفز حتى بابا وخلا يصير عصبي

ياسر : وووولج انتتتتتتِ شنووو مالج ردااااد شنووو هو بييييتج حتتتتتى تقبلين لو متقبلييين بوجوده منووو انتتتتتِ اصلاااا حتى تقررين منو استقبل هنا ومنو ما استقبل

ام حسن : ابو معين استهدي بالرحمن مو هيج ايدها راحت

ياسر : متشوفيهاااا انتِ متشوفييين قله ادبهاا ولسانهااا الزفر الي ميطلع منه غير بس الحجاية السم خليييها تصحى على روحها شويه وتخلي عدهااا دم وإحساس ولج شنووو هالوقاحة واللسان الطووويل هذا متكليلييي 

زبيدة : يابه والله العظيم اذا هالنذذذذل بقـــى بهالبيت انييييي اطلع منننننه وانتتتت بكيفك بعددد
لو انيييي لو معيننننن هناااا

ديمة : اباوع لبابا عافها بدون ميجاوبها وراح كعد وغطة وجهه احسه بهالفترة اكتفى من المشاكل وبعد ماعنده قابلية يناقش او حتى يتجادل

درت وجهي على معين الي رفع ايدة الترجف بشكل مو طبيعي ومسح دموعة الجاي تنزل ، تنهد وحجه موجه الكلام لزبيدة 

معين : ااا ان اني اصـ اصلا ما ردت اجـ اجي لهنا بس هـ همه اصروا عليه اا ابقى و ممـ ماكو داعي لهاي العصبية ااني اعتـ اعتذر وهسه راح اروح ، احم حجي بلا امر عليك ياريت بس تأجرلي تكسي اريد ارجع لبيتي

وئام : يا بيت هذا يمه مو بيتك صاير رماد وييين تريييد تروح متكلييي

معين : عندي بيت ثاني اروح اكعد بي

ديمة : اباوعله حرك الكرسي مالته متوجه للباب

معين : اني رر راح اطلع بره اابقى بالطرمه عع علما يوصل التكسي

ديمة : انتبهت عليه ديرفع ايده يريد يفتح الباب بس ايده ترجف ومجاي يكدر يسيطر عليها

تقربت وفتحتله الباب ، حاول يطلع بس الدچه مال الباب شويه عاليه وعجلات الكرسي متساعدة يطلع بسهولة ، رفعت ايدي دافعة الكرسي المتحرك لبرة
خليته بالفي مثل ما راد ودخلت جوه ، استوقفني حديث بابا الوجهه النا كلنا

ياسر : ام حسن بلا امر عليج اطلعي ابقي يمه شوية ولتخلي يطلع من البيت علما احجي ويه بناتي

ام حسن : بعيني ابو معين

ديمة : راحت دادا برة وبابا رفع راسه علينا وبده يحجي

ياسر : اسمعني زين هالكلام الراح احجي ما موجه بس لزبيدة وانما الچن تلاثتجن ، اني حالي من حالكم ما راضي على وجود معين هنا

وئام : ياسر شهالحجي الماله داعي هذا

ياسر : اسكتي وخليني اكمل كلامي وبعد لتقاطعينيي
خلوني احجي لان الحجي مو بس الكم

شوفن ترة اني هم ما راضي على وجودة بس للضرورة احكام وهسه معين جاي يمر بظروف صعبة سواء صحية او نفسية ومثل ما تعرفن ماعندة احد بعد

بيته الاول منتهي وصاير تراب وبيته الثاني اليحجي عليه اكو مؤجرين كاعدين بي واستحالة يطلعون منه بمدة تقل عن الشهر فوين يروح وهو معاق وعنده سكر ؟ ومنو يخدمه ويدير باله عليه ؟ 

اني ما اريدچن تعتبرنا اخوجن لانه ميستاهل هالكلمة
واني وياجن ما مسامحه على السوا بيه بس لو نترك السوا بينا على جهه وننظر للموضوع من زاوية ثانية

خلونا ننسى شوية انُ الكاعد برة هسه اخوجن معين ونعتبرة مجرد ضيف مدة اقامته عدنا تنتهي بهالبيت وقت الي يصير زين ويكدر يعتمد على نفسه

اني هذا العندي العاجبها كلامي وتريد تبقى بهالبيت ومعين موجود بي اهلا وسهلا والما عاجبها الله ومحمد وعلي وياها وين متريد تروح مع الف سلامة بس خلن ببالجن شغلة التخطي رجلها باب هالبيت وتطلع منه خلي تنسى عدها ابو واني غضبان عليها الى يوم الدين

لهنا اني حجيت كل الي بخاطري وهسه اسمعجن طربني

دنيا : اني اعرف الجاي يمر بي معين مو سهل لاني حاسه بأحساسه مو سهله على الانسان يخسر قطعة من كلبه بيوم وليلة وهالشي كفيل يخليني اتقبل وجوده بهالبيت

ياسر : الله يكملج بعقلج يابويه وانتِ ست الحسن ليش تخوزين بيه هيج تعاي اخذيلج راشدي لتخليها بنفسج

زبيدة : العفو بابا شهالحجي تنكطم هالايد قبل لا تفكر تنمد عليك واذا انت مصر على وجود ابنك فهذا شي يخصك و هاهي براحتك بس لحد يجي بعدين ندمان ويكلي والله يازبيدة طلع كلامج صح وياريتنا ما استقبلنا هاي اني داكلكم

ياسر: عود خوش ست زبيدة الله وانتِ دمدم

ديمة : هاا كيفك بابا اني بصراحة وجوده وعدمه ميشكل فرق عندي المهم انت تكون مرتاح وهم هو ميسببلنا اذيه

ياسر : من هاي الناحية لتخافن معين البي مكفي هالفترة وهالتشوفن وضعيته الصعبة ، ما جاي يكدر يعين روحة حتى ايده جاي تشكل واليوم الدكتور كلي صاير عندة مشكله بالاعصاب ويحتاج عنايه ياله يكدر يحرك ايده بشكل طبيعي 

فأمنن هو حاليا ماله سلطة على جسمة فما راح يكدر يسويلجن اي شي خلو هالفترة تعدي على خير وبهدوء لان صدكوني اني تعبت واخاف على ساعة يكتلني القهر واموت واني ما اريد ربنا ياخذ امانته لحد ما اطمئن عليجن فلتعبتي فدوة رحتلجن

: اسم الله عليك بابا

ديمة : طلع بابا هو وماما حتى يحاجون معين وخواتي صعدن فوك ، صعدت وراهن واسمع هبد زبيدة جاي من فوك

عفيه هالبنية حتى الكاع ما خلصانه منها طايحتلها تدفر ، دخلت لكيتها كاعدة وتنفخ چنها ثور

دنيا : كافي اهدي زبيدة مو زين عـ ... صفنت اباوع لديمة راحت فتحت كنتورها وطلعت شال لونه سمائي و وكفت كدام زبيدة وكامت تحرك بي هاي شدتسوي

زبيدة : اباوعلها تطفر كدامي وتسوي حركات بالشال ، هاي شبيها ؟ شيوجعج يمه

ديمة : اني سامعة اللون الازرق ودرجاته تهدئ من اعصاب الثيران فداحاول اهدئج لان اذا نعوفج شوية تكومين تنطحين بينا واحنه ما عايزين

زبيدة : لا اله الا الله  ، ديمة توخرين منا لا وداعة امي اكوم اطيح حظح واخليج تبجين ، ابد مو وقت شقاج التافه وخري منا ولترفزيني

ديمة : ذبيت الشال وكعدت بصفها وحضنت كتفها ، ادري بيج ضايجة من وجود معين هنا بس شنسوي يا زبيدة لازم تنحمل وجوده لخاطر بابا

زبيدة : تنهدت هو اني ما اريدة يبقى هنا حتى ليأذي بابا ترة اني ما نسيت حلك بابا شلون جان ينزف دم ووجهه شلون مورم من البوكسات الي اكلها من هالنذل شلون تردني اتقبله بهالبيت وهو سوه كل هذا بـبابا

ديمة : كلنا ما ناسين بس مثل ميكولون لأجل عين تكرم الف عين خلي نتحمله هالفترة ونسمع كلام بابا ونخلي الامور تعدي على خير علما يصير زين ويروح منا

زبيدة : واذا ما صار زين

ديمة : لا ان شاء الله يصير زين وبعدين لتنسين مرتة اكيد من تصير زينه راح تجي وتاخذة ويرحون منا لو شتكولين دنيا مو صحيح كلامي ؟

زبيدة : درت وجهي على دنيا لكيتها مسافرة وصافنه بالفراغ واصلا بالها مو يمنا ، هاليومين وضعها ما عاجبني جاي تصفن هواي ونص يومها دتضيعة على اللابتوب ما اعرف شعدها

ديمة : كمت لزمت كتفها وحاجيتها دنيا ،  خطية فزت بأيدي ، شبيج دندون وين صافنه

دنيا : هاا لا مصافنه وياجن وداسمع

زبيدة : بله شچنه نحجي يا فلته زمانج

دنيا : اجيت اجابوها وسمعت صوت بابا الي نقذني وهو ديصيحلنا ، ااا تعالن بابا ديصيحلنا ، نزلنا جوه لكيناهم مدخلين معين ، هاا بابا

ياسر : باباتي بلا زحمه عليجن فرغن المخزن ونظفنه حتى باجر اجيب عامل يركب سبلت ومبردة ونرتبه لاخوجن حتى يكعد بي وياخذ راحته

زبيدة : والمونه العدنه وين نوديها ؟

ياسر : خزرها ، بالمكشوفة الي بالمطبخ نخليهن

معين : ممـ ماكو داعي تتـ تفرغون شي عادي ااا اني انام هنا بالصالة

ياسر : لا فوك احسن الك حتى تاخذ راحتك وهم باجر راح اخلي العمال يسوون الدرج حتى تكدر تصعد بالكرسي مالتك وتنزل على راحتك بدون متواجهه مشاكل

وئام : خو عليمن خلي احنه نصعد فوك وهو يبقى بغرفتنا

ياسر : غرفتنا شيصعدها فوك وتعال فك الكنتور والجرباية عليمن المخزن الفوك واسع وجبير وكلش كافي لنفر واحد وهم ابنج يحتاج هدوء وراحة وانتِ شايفه الجوارين الي غرفتهم على غرفتنا شلون ميخلونا ننام بالليل من اصواتهم همه وبزرهم

وئام : شبيك ياسر هسه اني شكتلك

ياسر : سكتي عني وئام رحمه لاهلج بهالظهر ، يله بابا تغدن ورتبن المخزن ولو اتعبچن

ديمة : رحت بس اني تغديت وصعدت ويه خواتي نشيل الغراض الي بالمخزن حتى ننظفه ، جريت كونية التمن يربي شثگلها هاي شيشيلها ، فزيت على ايد زبيدة التجرها مني

زبيدة : جريتها منها وشلتها دجيبييي شكد فاهية

ديمة : اباوعلها شالتها بخفه وراحت تنزلها يااا عزززه بعينج هاي شلون شلتيها هيج ، اباوعلها زلكت من الدرج ووكعت يااا

دنيا : اسم الله اسم الله

ديمة : رحنالها نركض لكينها كاعدة على وحدة من البايات ولازمه ظهرها بس شافتني تفلت عليه مسحت وجهي طاحظج اي والله

زبيدة : من *** بعينچ ليزر خوما ليزر خرب يومج هديتي حيلي ، لزمت ظهري ولج يمه تكسرت ، اجتي دنيا كومتني ، اااخ يمة انكسر حوضي

دنيا : غير تنتبهين يا عيني

زبيدة : شأنتبه اذا اجتني عين ليزرية بس متنلام عينها خضرة تحرك الاخضر واليابس خمسه وخميسه عليه برد شرج ان شاء الله

ديمة : انجبي زبيدة لتحجين على عيوني والنبي اني مو حسودة

زبيدة : اباوعلها برطمت ، دنكت واني لازمه ظهري نزعت نعالي ، چم مرة كتلچ براطم البعير هاي بطلي تطلعيهن علينا

دنيا : هههههههه استغفر الله يربي يعني وتالي وياجن انتن

ديمة : متشوفيها بس تريدلها حجاية عليه

دنيا : عوفيها مزاجها بنفسجي اليوم ، يله ولج خلي نخلص بسرعة ورانه تعزيل المكشوفه

ديمة : ماشي ، رجعنا نكمل وزبيدة كل شوية تلزم ظهرها وتصيح تكول دتطلك

زبيدة : عمت عينك يالحسدتني وكسرتني عمت عينك

ديمة : اهوو والله حتكرعنا اليوم

كملنا كُلشي وفعلا ثاني يوم بابا جاب عمال ركبوا سبلت ومبردة لمعين بالمخزن وجابله كنتور صغير واخذ وحدة من جرابينا خلاها اله ، وخلا العمال يبردون جزء من الدرج حتى نكدر نصعد معين وننزله بدون منتعب

سديت الحنفية ونشفت اديه اليوم المواعين عليه ، اي للاسف زبيدة افندي قسمت شغل البيت علينا كلنا وصار اجباري عليه اكنسر وامسح واغسل مواعين حالي من حالها وحال دنيا ، والله زمن الخلاني اوكف اغسل مواعين ، تنهدت صاعدة فوك

مريت على غرفة معين وتذكرت هالاسبوع كله مر واحنه اصلا ما حاسين انه كاعد ويانه بنفس الطابق وحتى الاكل ، لا يقبل ياكل ولا يشرب كوه ماما تعبي الاكل بحلكه وتشربه المي على مود يكدر ياخذ الادوية مالته والا هو عبارة عن جثه كاعدة بس تننفس

طول الوقت ساكت ، غير صوت النفس ميطلع منه وبس وقت احتياجه للتواليت او من يريد يصلي يصيح احد يساعدة باقي الاوقات ذابها على الصامت
الي يشوفة ميصدك هذا نفسه الي لسانه مچان يدخل لحلگه 

تقربت وفتحت الباب حتى اشوف خاف خلصانه دولكه المي الي يمه حتى اعبيها اله ، دخلت لكيته كاعد على الجرباية ولازم صور اثنين ويباوعلهن بكل هدوء وبس شافني ضمهن جوه الشرشف المغطي رجلية

ااا اجيت اشوف اذا محتاج شي ... تقربت من الميز الي يمه اباوعله عبارة عن علاليك ادويه ، شي للسكر وشي للاعصاب اشكال والوان عبالك صيدلية مو ميز ، لزمت دولكه المي شفتها حارة ، ابدلك المي ؟

معين : لـ لا ششـ شكراً

ديمة : هزيت راسي واجيت اطلع وصادفني بابا ، هاا حبيبي محتاج شي

ياسر : لا حبيبتي اخذي راحتج ما محتاج شي

ديمة : هزيتله راسي واجيت اروح بس وكفت ردت اشوفه شعنده هنا ، اباوعله راح طلع زيت من الجرار واجه كعد على الجرباية بصف معين واخذ اديه وكعد يدلكهن حتى ينشط الاعصاب الي بيهن

ومعين صافن على بابا وشفايفه ترجف وكل شويه يفتح حلگه شلون الي يريد يحجي شي بس يبطل
ما الومه اذا يطلع منصدم لان احنه نفسنا ممستوعبين بابا شلون ديتصرف بطبيعية ويا ولا كأنه مسوي شي

طلعت من غرفة معين وسديت الباب متوجه لغرفتنا ، اجيت ادخل بس استوقفني حديث زبيدة ودنيا

زبيدة : شراح نسوي بهالشهر الراتب مال بابا وامج كله راح هالاسبوع لعلاج معين ومابقى شي لنهاية الشهر منين حنصرف وندبر امور البيت

دنيا : والله ما اعرف والمشكلة المحل مديجيب وارد هالكد

زبيدة : طبعا ميجيب وارد زين اذا نص اهل المنطقة دياخذون من ابوج بالدين وكالعادة الوالد يستحي يكول لا وينطيهم

دنيا : قابل شيسوي يازبيدة و لتنسين هالناس زينين ويانا وكلهم حبابين وبابا الظاهر ميريد يخسرهم

زبيدة : شيخسرهم دنيا انتِ صدُك تحجين يعني اذا زينين ويانا وبابا محترمهم يستغلوا بهالطريقة ، بشرفج هاي ام عبير الي بصفنا دتروح تتسوك من بابا ب200 وكل شهر دتنطي عشرين الف ، هو يصير ؟

دنيا : الناس ماعدها يازبيدة متشوفين وضعيتهم شلونها ولتنسين بابا فاتح محله بنص السوك واكو الف واحد غيرة يبيع نفس بضاعته يعني مو بس هو بالسوك حتى الربح يصير بس اله

زبيدة : والله ما اعرف شكلج ، بس احنه وضعنا المادي كلما بي ديصير بالنازل ولج بابا اليوم الصبح اسمعه يكل لامج نزعي الحجل الي برجلج خليني ابيعه وامشي امورنه هالفترة علما يمشي المحل شوية

وفوك كل هذا الثلاجه فرغت لا لحم ولا دجاج و اليوم اخر شي بقت دجاجه وحده وسويتها مركة للغده ولا
اكو خضروات ولا اي شي بالثلاجه واستحي اكل لبابا ماعدنه مسواك

دنيا : شو اوكفيلي لحظه ، هاج هاي باقي عندي 25 انطيهن لبابا خلي يتسوك النه

زبيدة : ميقبل ياخذهن على اساس متدرين بي انتِ

دنيا : زين اخذيهن وروحي تسوكي بدون ميدري

زبيدة : واذا شافهن وسألني شأكله

دنيا : تكليله رحت تسوكت شنو هي بكيفه احنه لازم نساعده قابل نكعد ونسكت والله شنو بابا يستحي ياخذ منه ولتنسين معين يرادله وحده مليون بالشهر بس ادوية ومراجعات

زبيدة : زين راتبة وينه ؟ خلي يصرف على نفسه من راتبه وهم يقلل الضغط الي على بابا 

دنيا : راتبه اخذته مرته تكول امي خابرته ام اسماء  تبجي وتكله مرتك راح تتخبل ومتقبل تباوع بالمرايه لان وجها كل متشوهه ونفسيتها تعبانه واحنه ماعدنه ومصاريف علاجها تكسر الظهر ومن هالقوانه فكام اخوج انطاها كل راتبه حتى يسد حلوكهم ويخلص

زبيدة : يعني شكد شايفة ناس متستحي بس بالله الكريم هيج صلافه ما شايفه ، ولج ولدج ذاك اليوم ماتوا شبسرعة تخطيتهم وشبسرعة اهلج لحك ينكسر ظهرهم من مصاريفج

هسه اني اكرهه معين وما احبه ورغم صارله اقل الشهر هنا بس داشوفه متدمر ونفسيته زفت لا ياكل ولا يشرب ولوما امج تركض ورا وتنطي علاجه هم مياخذه شنو انكلبت الادوار لو شنو السالفة

دنيا : والله يا زبيدة معين حيل كاسر خاطري رغم كل الي سوا بس الي صارله من صدُك يكسر الظهر ، راحوله ولد بعمر الورد ، كبروا كدام عينه وشحلاة طولهم وسوالفهم ويا ومن يوكفون بصفة ويباوعلهم تكول شايف الدنيا من شايفهم تالي خذاهم الموت وحرمه منهم

زبيدة : تنهدت ، الله يرحمهم ويصبره ويصبرنا ويا ، خلي نرجع للموضوع الرئيسي الجنه نحجي بي

دنيا احنه لازم نلكه حل لان حطي ببالج عدنه معين وعلاجه مثل ما كلتي اقل شي يرادله مليون بالشهر وعندج امج علاج السكر مالتها والضغط هم بالـ200 يكلف كل شهر وديمة ملازمها وبحوثها والالوان ما الوان وهالسوالف الي تصمم بيهن يكلفن وام حسن هم تحتاج اشياء حالها من حالنا ميصير نهملها

وانتِ هم مراجعتچ للطبيب النفسي خليها بحساباتج وعندج فلوس المولدة والوطني ومسواك البيت اكل وشرب وغاز وعندج هم تجهيز المحل كل شهر بالمواد هم يكلف ذاك الحساب وبعد شهرين بالزايد يبدي الجو يكسر ويجي الشتاء ولازم نشتري نفط يعني كل هالاشياء تكلف ويرادلها كومه فلوس

دنيا : حييل هاي كل ذني يحتاجن صرف

زبيدة : لعد شعبالج ، دنيا احنه چنه عايشين بغير عالم هلي جاي نتفاجئ من الدنشوفه تصدكين ذاك اليوم طلعت ويا بابا للاسواق بس اشتريت منظفات وشوية نمنميات للبيت والله من اجه بابا يحاسب وطلع الحساب 50 الف ضليت صافنه

يعني عملاق على كلور ومعطرات جو واجباس على لبن وكهوه وهالسوالف ذبينه 50 الف لعد على السوالف الجبيرة شنريد نذب 

ديمة : واكفة وره الباب وداسمعهن ، ضليت صافنه على كلامهن معقولة وضعنا المادي وصل لدرجة خواتي كامن يستحن يكولن ماعدنه مسواك يخافن لا يضغطن على بابا واني اليوم الصبح كلت لبابا عدنه سفرة واريد 150 الف اطلع اشتري ملابس وهو سودة عليه ماكلي ماعندي

فتحت الباب ودخلت بس شافني سكتن ، ليش ميحجن كدامي ، دومهن عازلاتني عنهن وميسولفلي شي عبالك بيه جرب لو فتانه ، ليش سكتن من دخلت

دنيا : هيج يكلبي مو يمج ، تعاي بدلي ملابسج تشيرتج منكع لتتمرضين

ديمة : رحت اخذ تراك واباوعلهن يتبسبسن ، اخذته ونزلت بدلت بالحمام وذبيت ملابسي بالغساله وصعدت 

زبيدة : اكلج دادا وين

ديمة : مسيره يم ام امين

دنيا : ما رحتي وياها تغيرين جو ، لو الي خلك جان رحت وياها لان ذاك اليوم كُلش تونست وياهم ام امين درة مالت الله ولجن طبينه لبيتهم فد دافي تحسين براحه نفسية من تدخليلهم وهاي ام امين فد نفسيتها طيبة بشكل

رغم همه حالتهم الماديه مبينه حيل تعبانه واتعس منه بأضعاف بس من دخلنالهم راحت المره طلعت العدها والماعدها خلته كبالنه

وركضت للمطبخ سوتلنا حلاوة شعرية تخبل شلون الي تسويها ماما وسيلة عمت عيني عليها واجتنا بنتها بصائر كعدت ويانا شنو نزاكة شنو جمال الله يحفظها ويخليها الهم 

ديمة : ياهو الاحلى اني لو هي

زبيدة : شوف البطرانه

دنيا : ههههه لا طبعا انت يكيك وين اكو بجمالك

زبيدة : شلون كيك اخضر وابيض تكول علم السعودية مو كيكه هههه

ديمة : كاتلج الغيرة والنبي شلون اني احلى منج وبعدين حبيتي انتِ لو ما تضاريسج محد يكلبج ، عزه بعينج ان شاء الله ماخذه حقج وحق العالم ما عايفه للبنات شي

زبيدة : والله ذبحتيني بالتناعيل عمييي تعاييي اخذييييهن وفكيني كرهتيني بيهن والله

ديمة : ما جاوبتها ، رحت تمددت وفتحت موبايلي لكيت اشعار جايني من راسل ، فتحت الرسالة لكيته دازلي شعر ، بديت اقرا واني مبتسمة

يُسائِلُني القلبُ ما أذهلكْ
فهلاّ أذِنْتَ بأن أسألكْ؟
على وجنتيكَ احمرارُ الورودِ
فقُلْ لي بِرَبّكَ من قَبّلكْ؟
ومن سكبَ الليلَ في مُقلتيكَ
ومن ذا على الناس ِقد جَمّلكْ؟
فللّهِ في خَلقِهِ ما يُريدُ
ولِله ِدَرُّكَ ما أجْملَكْ !"

زبيدة : اباوعلها مدري شجاي تشوف وشاركه حلكها ، على كيفج حلكج حينشك

ديمة : شلت راسي وباوعتلها ما عليج انتِ

دنيا : اكول ديمة مدامج تعرفين بالموبايلات ، اريد اسالج اذا اكو حساب دتدورين عليه من كل البرامج وميطلعلج حتى من الرقم معناها هالرقم حاظرج مو ؟

ديمة : اي اكيد صاحب الحساب حاظرج بس هذا يا ادبسز حاظرج كليلي خلي اروح ارزله

دنيا : لا محد حاظرني بس داسأل

ديمة : اكيد ؟

زبيدة : وفرضا كلتلج اي بله شحتروحين تكليله هلاووو شونك عيني شون صحتك بله ليش حاظر اختي مو حرام عليك تجرح مشاعرها اوووي شهالقساوة

ديمة : تستهزين حضرتج

زبيدة : ههههه لا استغفر الله

ديمة : ما راح اجاوبج لان مزاجي عالي هسه من تجيني العصبية واحضر رد قوي اجيج ، اباوعلها غمتني وتمددت على رجلين دنيا

رديت على راسل ... يجنن

شافها ودزلي ...  اني لو الشعر ؟

جاوبته واني اضحك .. الشعر اكيد

رد عليه ... احبج

ابتسمت وضميت الموبايل لكلبي يييييمه فدوووه ، شلت راسي لكيت خواتي يباوعلي ، غلست ورجعت اكلب بالفيس

شفت مقترح مال محل حلويات اباوع للكيكة مال اعراس جانت عبارة عن طوابق ، ابتسمت واجه على بالي راسل ما اعرف ليش معقولة ممكن اني ويا يصيرلنا نصيب سوه ؟ من اتخيل انُ ممكن هالشي يصير واقع جسمي كله يكزبر

دخلت على التعليقات داشوف بلكي كاتبين سعرها ، شفت وحده كاتبة بالتعليقات سائلتهم وكايليها بـ300
شدعوة ؟

ولجن تعالن شوفن هالكيكه بـ300 الف وياريت لو تسوه وبيها فد شغل غريب حتى صغيرة ، خلي يجون يشوفون الكيكة الي سوتها زبيدة بعرس مبين ، خلت كل المعازيم صافنين على جمالها وكلها اجت تسأل امي منين موصيتها

اباوع لزبيدة من سمعتني كمزت من فراشها واجتي جرتني من هدومي حتى الموبايل وكع من ايدي من الخرعة ، شبييييج

زبيدة : شكلتي ولج

ديمة : دنيا اجت تجر بزبيدة المتقبل تعوفني ، هاي شبيها المسودنه ، بخوف شبيج والله ما كلت شي فوك ما امدح بيج

زبيدة : اني كيكتي سألوا عليها كل المعازيم بعرس مبين ؟

ديمة : ولج يمه هاي شبيها حتتحول ايييي والقرآن حتى سألي ماما

دنيا : اباوع لزبيدة دفعت ديمة وضلت تفتر بالغرفه

زبيدة : اني اعرف اطبخ ايييي لج حمارة انتِ تعرفين تطبخين

دنيا : شبيج زبيدة فهميني بشنو دتفكرين خرعتينا والله

زبيدة : كعدت ، تعالن كعدن كدامي داريد اسألجن سؤال ، وجاوبني بكل صراحة اني طبخي طيب لو لا والكيك مالتي بس شكل لو هم طعم وابد ابد لتفكرن تجاملني

دنيا : اكلج يخبل ومو بس اني اكول كلها تكول نفسيج تخبل على الاكل

ديمة : والكيكة مالتج رغم الصرف الهواي التذبي عليها بس طعمها فدشي بعيداً عن شكلها الخرافي

زبيدة : درت وجهي على صوت الباب ، شفت دادا ام حسن ، كمت ركض جريتها من ايدها تعايي دادا تعاي عندي سالفة وياج

ام حسن : شبيج يمة

زبيدة : كعدتها يم خواتي اسألج سؤال

ام حسن : جواب بعد روحي

زبيدة : شنو رأيج بطبخي سواء اكلات عادية او حلويات وكيك

ام حسن : كله يخبل

زبيدة : يخبل شويه لو هواي ؟

ام حسن : لا والله هواي

دنيا : زبيدة شبيج ؟

زبيدة : مسحت على حاجبي ، اصبروا بعدين اسولفكم ، اخذت موبايلي وكراسة من كراسات ديمة وطلعت من الغرفة ، رحت للسطح ، كعدت بالكاع وفتحت موبايلي سويت بحث عام عن محلات الطبخ والكيك ، شفت ترتيب الحسابات وعدد المتابعين ما شاء الله كومه مشاريع اكل اكو على الفيس الله يرزقهم ويزيدهم

سديت الفيس ورحت على الانستگرام ، سويت سيرچ هناك ما لكيت هواي حسابات طبخ مثل الفيس لان بفترتها مچان الانستگرام هالكد مشهور ومو كل الناس تسوي لان الاغلبيه جان توجهم للفيس اكثر ويعتبرون الانستا برنامج صعب ليش ما اعرف

اخذت الكراسه وبديت ارسم خطه واسطر اسماء اكلات واكتب مكوناتهن وكل اكله اكتب بصفها شكد تكلف وشكد يحتاجلها مواد

رجعت للفيس اخذت حسابات تخص الطبخ وتواصلت وياهم حتى استفسر عن اسعار الاكلات الكاتبتها كدامي وشلون ممكن اربح من المبيع وشكد اكسب
ما خليت شي ما سألت عنه

والله ينطيهم العافية ، البعض خابرني اتصال وكامن يشرحلي بالتفصيل الممل شنو اسوي وشلون ممكن استفيد اذا فتحت مشروع صغير

والبعض الثاني كامن يكللي مابي مكسب ومتستفادين شي ، بأختصار شحتني وحتى اسلوبهن ما جان حلو عبالك داگدي المعلومه منهن كديه ، وحسيت كأنهن ميردن يفيدني عبالك حانافسهن على رزقهن ولا گان الرزق على الله

اما الفئه الثالثه فأنطوني حظر بدون حتى ليجاوبوني ولد الكلب ، زمن الخلاني اجي احاجي شكولكم الطايح حظها بس ميخالف كُلشي لخاطر بابا يهون

رحت اكلب بكروبات الطبخ المنضمة الها على الفيس لان اني من زمان تستهويني هالسوالف واحبها ، رحت حاجيت مسؤولات الكروبات الي اعرفهن وخطية ما كالن شي بالعكس هنه تطوعن وكالن اذا فتحت مشروعي حيسوي دعم ومجاني هم 

ضليت كاعدة اخطط وارسم وكل شويه اضيف فكرة جديدة ماحسيت بالوقت الا لمن صاحتني دنيا على الاذان ، شلت راسي لكيت الدنيا صايرة ظلمه حييل
هاي كل هالوقت كاعدة هنا ومحاسه

كمت لميت غراضي ونفضت هدومي ، رحت للصالة ضميت الكراسة بكنتوري واجيت كعدت ، شلون حفاتحهن بالموضوع ويا ترى حيقبلن يساعدني لو لا
تنهدت ورحت صليت و وكلت امري لله

نزلت سويت العشاء ، ولان ماكو مسواك سويت بيذنجان وبتيته تكلا وياهن طماطه وشوربة شوفان لمعين لان ميصير ياكل دهن بالليل ... حطينه العشا وكعدنه وكالعادة ست ديمة لازم تچفص

ديمة : هم بيذنجان وبتيته والله لعبت نفسي

زبيدة : كرصتها وهمست ....انجبي

ديمة : شبيج تكرصين هسه اني شكلت

زبيدة : خزرتها نصي صوتج عود تردين تسمعيهم

ياسر : زبيدة بابا شجاج وياها حقها متريد تاكل بيذنجان لتاكل هو جبر ، حبيبتي اذا ماعاجبچ العشا خابري المطعم وطلبي الي تشتهي

ديمة : تذكرت كلام خواتي والنبي نسيت بابا ماعندة ، احم لا بابا جنت اتشاقه ويه زبيدة ، جريت الصمونه شبي البيذنجان يخبل والله

زبيدة : حسيت بابا ضاج واستهضم لان مديكدر يوفر كُلشي مثل قبل بس ابتسم حتى مبيين النه ، من شفته ضايج حتى نفسيتي انسدت ، ذبيت الصمونه وكمت للمطبخ اسوي جاي

ما احب احس الكدامي منحرج وخصوصا هاي الابتسامة الي تكون مليانه خجل والم تمردلي كلبي مرد لان اعرف وراها اكو هضمه وبچيه تشك الكلب

اجن خواتي شايلات الاكل والسفرة ، اباوع لديمة اجتي وكفت يمي وتلعب بشعرها

ديمة : زبيدة اني اسفه والله نسيت بابا ماعنده والكلام طلع مني بدون قصد

زبيدة : ديمة حبابه بعيدًا عن الشقه الله يخليج ديري بالج على لسانج شوية وحاولي متطلبين اي شي من بابا واذا احتاجيني شي تعالي كليلي الي او لدنيا لان بابا مضنوك هالفترة ومن ديشوف نفسه مقصر بحق البيت هواي ديتأذه

ديمة : والله اسفة مو قصدي

زبيدة : طبطبت على كتفها ما صار شي ادري بيج ما متقصدة ، رجعت اصب جاي وبالي كله يم سالفه المشروع ، اخاف اسوي واتورط لو اخسر بس بنفس الوقت ما اكدر اشوف وضعنا هيج واضل ساكته

اريد اساعد بابا ولو بشي بسيط على اقل تقدير اريدة من يخلي راسه على المخده ميفكر شلون حيدبر عيشة الشهر الاحنه بي ... كملت صب وطلعت اوزع الهم ، وصلت لمعين ، خليت الكوب كدامه

معين : شكراً

زبيدة : هزيتله راسي ورحت كعدت بصف بابا ، اباوع لخاله وئام تشيل الكوب تريد تشربه وهو يدفعه بكل هدوء عنه بدون ميجاوبها انتبهتله حتى على الاكل كوه اكل كم خاشوكه شوربة واكتفى

وكل شوية يرفع ايده الترجف ويمسح بعيونه الي من اجانه لليوم ما شفتهن نشفن ، مدري شكول الله يعينه ويساعدهز

كملوا جاي كامت ديمة غسلتهن وصعدنه حتى ننام ،
الليل كله ما كدرت انام احس التفكير مطير النوم من عيوني ، شلت راسي لكيت ديمة كاعدة تدرس وتصمم ودنيا فاتحة لابتوبها وهم تبحوش بمدري شنو ودادا كاعدة على السجادة تصلي صلاة الليل

شويه واندكت الباب مال غرفتنا ، صاحت دنيا تفضل ،اباوع لبابا دخل ولازم بأيده كيس

ياسر : خوما نايمين

زبيدة : كعدت لا بابا حبيبي تعال كلنه كاعدين

ياسر : شجاي تسوين دمدم

ديمة : هاا حبيبي كاعدة اصمم تجي تشوف ... اباوعله تقرب يمي وخله كدامي كيس ، شنو هذا ؟

ياسر : ااا اني شفتج ما تعشيتي فرحت هسه جبتلج لفة همبركر ادري بيج تحبيها

ديمة : ابتسمت وانقهرت من نفسي ، كمت حضنته حبيبي بابا ليش زحمت نفسك

ياسر : لا شدعوة قابل شمسوي اني

زبيدة : اباوعله شلون ضايج ، بابا حبيبي شبيك ليش ضايج ، جاوبني واكو غصه واضحة بصوته

ياسر : يعني لان ما جاي اكدر اوفرلچن الي تشتهنا بكل وقت مثل قبل ، اني اسف حبيباتي ادري بروحي مقصر وياجن بس والله العظيم ماعندي

ديمة : دنكت على ايده بستها لا يعمري والله انت ابد ممقصر وادري بيك لو بأيدك تشلع عيونك في سبيل متقصر ويانا بابا حبيبي ابد لتنقهر وتضوج هاي ازمه وتعدي ان شاء الله ، احنه كلنا وياك

دنيا : لتبجي بابا دموعك غاليه علينا كلنا والله يا بابا هالدمعة التنزل من عينك تسوه ابو الفلوس والذهب والجاه انت عدنا بالدنيا ومابيها

زبيدة : ضلن خواتي يطيبن خاطرة وهو حاضنهن
ويبوس براسهن ، اجه باس راسي وحضني ابتسمت وابتعدت بايسه ايده ،ان شاء الله هالفترة الصعبه تنتهي ونرجع مثل قبل واحسن ، وخلي ببالك شي انت احن واعظم بهالدنيا

ياسر : يمكن لان انتن بناتي

زبيدة : ابتسمتله ، سلم وطلع هالموقف الصار هزني هز واخاف جان اكو تردد بداخلي من سالفه هالمشروع بس هسه لا اني مستعدة كُلشي اسوي في سبيل انجح واساعد بابا واعوضة عن كل التعب التعبه والضيم الي شافه بهالسنة

ديمة : كعدنا ثاني يوم الصبح صادفت جمعة وبابا بالمحل وبس احنه بالبيت ، الفاجأنا زبيدة كالت تريد تحجي ويانا ، كعدنه كلنا بالصالة حتى معين ويانا جان كاعد وهي كاعدة كبالنا

زبيدة : عندي موضوع وياكم وما اريد بابا يدري لحد ما يتم كُلشي بيناتنا

دنيا : خير ؟

وئام : شنو ياسر بي شي ؟

ام حسن : شمسويه زبد ؟

ديمة : هسه غير تحجي ؟

زبيدة : اول شي وحدوا الله

: لا إله الا الله

زبيدة : اني عندي قرار واريدكم توكفون ويايه بي وتساعدوني

: شنو هو

ديمة : اباوع لزبيدة كامت على حيلها وضمت اديها وكأنها تريد تلقي خطاب

زبيدة : في ضل هذة الظروف العصيبة اني قررت افتح مشروع واصير طباخة

دنيا : هااا ؟

وئام : تخبلتي انتِ ؟

ام حسن : منيلچ فلوس حتى تفتحين مشروع ؟

ديمة : يايييي يعني حتصيرين مثل منال العالم ؟

زبيدة : اولاً وجعا ، ثانياً اني في كامل قواي العقليه والا ما چان اخذت هالقرار ، ثالثاً سؤالج وجيهه وهسه اجاوبج عليه ، رابعًا ديمة اكلي تبن .. زفرت وكعدت

شوفن بخصوص هالمشروع كلكم تعرفون اني مبدعة بالطبخ وهاي الحقيقه وبشهادتكم وعندي قابليه اجهز كميات ضخمه وجبيرة من الاكل ومتأكده راح يعجب الكل

دنيا : اي وبعدين ؟

زبيدة : خليني اكمل ، باعن هالمشروع ممكن ينجح بس بحاله وحدة فقط اذا كلكم ساعدتوني بي 

دنيا : وشلون تردينيه نساعدچ

زبيدة : شوفن احنه محتاجين بالمطبخ طباخ واني موجودة ومحتاجين مبتكر اشكال وخصوصاً بسالفة الكيك وعدنه ديمة رسامة ماهرة والتصميم لعبتها وهم محتاجين محاسب يجردلنه كُلشي سواء مورد او مصاريف وانتِ خريجة ادارة واقتصاد وتنظيم الفلوس ملعبچ

وام حسن خبازه ينحلف بأسمها وبابا بالسانه جان يكول النوح ما چان ياكل الخبز الا من ايدها واحنه نشهد انها خبازه ماهرة وتنافس الخبازين بشغلها

ام حسن : يا بعد روحي هاي اني خبزتي هيج طيبة

زبيدة : هههه دادا هو هذا الشي الي شدچ بكلامي

ام حسن: لعد شلون

ديمة : زين زبيدة وامي

زبيدة : رفعت حاجبي خالة وئام اهم عنصر لنجاح هالمشروع

وئام : اني ؟ شلون !

زبيدة : انتِ صاحبة علاقات وعندج معارف بكل مكان سواء بالمشرفات او بطبيبات التجميل ونسوان التجار الي بالمحافظة كلهن صديقاتج فراح تفيدينا وتخليهن يسون النه اعلان وهيج اسم مطبخنا يرتفع ونكدر نستفاد

وئام : انييي اني وئام اروح اطلب من هالحثاله يسون اعلان لبناتي وعلى شنو على طبخ ؟ انتِ تخبلتي

زبيدة : وشنو يعني قابل بايكين لو دنبيع اكل اكسباير مو انتِ نفسج جنتِ تتوسلين بيه اسويلچ اكل بالجمعات حتى تغورين صديقاج الميعرفن يطبخن وتكليهن هذا طبخچ وتكعدين تعيبين عليهن لان جايبات من المطاعم ،  شنو الي اختلف هسه 

وئام : الي اختلف هسه بسوايتج هاي راح تخربين مكانتنا الاجتماعية بين الناس وبعد محد يحترمنا وبعدين شنو نسيتي نفسج انتِ وابوج منو ، تردين تخزينا ، والله ما اخليج تبيعين اكل لو اموت شنو تردين تصخمين وجوهنا انتِ

زبيدة : هوووو شنووو اضخم وجوهكمممم ادررييي داطبخ لو فاتتتتتتحة ملهى ، بشررفج شتحسين كاعدة تدوريلي برستييييج واحنه بهالزللللللك

وئام : ما يعيني ما ، ما اخليج والله

زبيدة : هه انصحج ترحين تدفعين كفارة لان سواء قبلتي او لا راح اسوي هالمشروع

وئام : متسوييي افتهمتييي لو لااا وبعدين تعاييي فرضاً وافقنا كلنا منييييلج فلوووس واحنه عالحديدة كاعدين

زبيدة : عندي فلوس

دنيا : منيلج هيج مبالغ تسدلج مشروع مثل هذا ؟

زبيدة : احم ذهبي وذهبچن

وئام : شلوووون شلووون

زبيدة : هسسسه انتِ شعلييييج ذهبج لو ذهبهن  انييي وخواتييي ننجاز ... باوعتلهن اسمعني ادري صعبة عليجن تخاطرن بالذهب العدچن بس صدكني بابا يستاهل هالمخاطرة

تدرن اني حسبتها ببالي ، جريت الكراسة خليتها كدامهن ، شوفن هاي الخطه ، بديت اشرحلهن بالتفصيل الممل شنو ببالي

دنيا : اباوعلها شلون تشرحلنا ، ضليت صافنه هاي شوكت لحكت تخطط وتحسب كل هالحسابات المعزاية حتى الاكل مسعرته ومسويه منيو كامل
حلويات واكل غربي واكل عربي وكيك للمناسبات  اشكال والوان

ومجهزة حسابات على الفيس والانستگرام هم
والمشكلة طريقة شرحها تخلي الواحد يتحمس
بحيث هي تعيط وتشرح واحنه الحماس اخذنا وكمنه نعيط وياها  

زبيدة : ومثل متشوفن اذا توقفنا بالمشروع وتعبنا عليه بظرف سنة وحدة حنكدر نغير هالبيت ونشتري احسن منه ونوسع محل بابا وهم نقلل من مصاريف البيت ونكدر نتنفس بعد سنة جبناها تعب

ديمة : عزة العزاج اي والله

زبيدة : وعزاج ان شاء الله ياچلبه بيش طالبتيي

ديمة : ولج مو قصدي بس تحمست

زبيدة : باوعتلهن متنهده وهسه شنو رأيجن

دنيا : المشروع ممتاز بس ما مضمون ينجح لان كومه اكو مشاريع طبخ هسه بالعراق وبالذات بالمحافظة الي احنه كاعدين بيها

زبيدة : صح اني وياج اكو هواي مطاعم ومشاريع طبخ بس مو كلها تعرف تطبخ مثلي

وئام : الثقه الزايدة بالنفس تدمر الواحد فديري بالج وتهدي بالرحمن

زبيدة : بنات بس اسمعني بابا خاطر بحياته وبصحته وعافيته وراحته بس في سبيل يوفر النا الحياة الي نتمناها تتذكرن چم مرة احنه مسافرين وجم مرة مخسرين بابا احنه لفينا نص دول العالم بسبب بابا ، المليون والاثنين والميه جان يصرفهن علينا وهو يضحك ولا داير بال بس في سبيل يشوفنا مرتاحين ومتونسين

لو انتِ دنيا اني وياج مو سيارتنا بابا جابها النه من الوكالة وصعدناهن زيرو محد صاعد بيهن قبلنا وذب كومة فلوس عليهن بس في سبيل ميكسر بينا

لو مبين النذل الي سوه عرسين واحد بالعراق وواحد بتركيا وبابا راح يورق هنا وهناك لخاطرة من غير التذاكر الچان يحجزهن لجماعته قبل ليتزوج حتى يسافرون ويا

يجماعه ترة بابا ما قصر ويانا فيستاهل نخاطر بكُلشي حتى نشوفه سعيد وحتى لو فشلنا نكوم على حلينا ونرجع نحاول مرة وثنين وعشرة لحد ما ننجح
وترة احنه حنشتغل شغلة شريفة وبنية صافية لا راح نغش احد ولا نخدع احد وراح نطبخ بكل طيب نفس واكيد رب العالمين حيوفقنا ويوكف ويانا

فكروا بكلامي زين وخلوا عدكم بعد نظر للمستقبل يمكن هالمشروع يغير كل حياتنا للافضل ، هاا شكلتن شكيتن حلكي بصفناتجن

ام حسن : اني وياك للوحه زبد

زبيدة : ههههه بعد عمري

دنيا : امري لله ، وياج

زبيدة : تاج راسي والله

دنيا : هههه طايحة الحظ هسه صرت تاج راسج جنتي مهزقتني

زبيدة : يله ميخالف امون ، باوعت لديمة وانتِ

ديمة : شبيج تباوعيلي اكيد موافقه قابل حعز ذهبي على بابا

زبيدة : ابتسمت وحضنتها شكرا

ديمة : بادلتها وضحكت عفوا

وئام : اني ما موافقه

زبيدة : موافقتج هسه صارت متشكل فرق مدام دادا و خواتي قبلن واذا على الاعلان فربج الرزاق مو انتِ ، انتِ سديتي باب الله حيفتح مليون باب
بس صدكيني انتِ الي حتتندمين بالنهاية

وئام : اكل لياسر والله

زبيدة : كليله شنو مسوين مكسورة احنه حتى نخاف واصلا اني هيج هيج راح احاجي من يرجع وراح يوافق وتشوفين

وئام : يا امي يا حبيبتي هالذهب الباقي هو كل ما تبقى عدنا اني كل ذهبي انطيته لابوجن وماعندي بعد قشاية جوه ايدي ، فكعدي راحة يا امي متعرفين الدنيا شبيها خاف نوكع بمصيبة وماعدنه اليشيلنه منها

زبيدة : لعد الله وين راح ؟

ام حسن : خو انتن ليش تتعاركن ، سون استخارة الامام الصادق (عليه السلام) وشوفن شيطلع

زبيدة : شلون يسووها هاي

ام حسن : امج الله يرحمها جانت اذا عدها حاجة مستعصية وحايرة بيها ، تروح تفتح كتاب اسمة استخارة الامام الصادق ، تنوين النيه الي بكلبج وتقرين الفاتحة ويا دعاء قضاء الحاجة وتفتحين الكتاب الي هو عبارة عن ايات قرآنيه والايه الي تطلعلچ وياها تفسيرها راح تعرفين من خلالها اذا الاستخارة زينه او لا

زبيدة : الكتاب لونه ابيض؟

ام حسن : اي عفيه هو هذا 

زبيدة : موجود بغراض امي حروح اجيبه واجي ، ركضت للصالة الفوك ، طلعت غراض امي ولكيته اخذته ونزلت اركض ، انطيته لدادا ، شلون اسويها

ام حسن : امشي توضي وتوجهي للقبلة

زبيدة : توضيت ولبست جادري وكعدت باتجاه القبله فتحته نويت وسويت مثل ما مكتوب ، ختمت دعاء قضاء الحاجة

ام حسن : افتحي الكتاب وشوفي الايه الي راح تطلعلچ

زبيدة : غمضت عيوني وفتحت الكتاب ، يربي لتخذلني اني مؤمنه بيك اوكف ويايه يارب انطيني آيه وكلي هالمشروع بي اذيه النا لو لا ، فتحت عيوني وباوعت للاية الكدامي

دنيا : هاا زبيدة شطلع

ديمة : زينه لو لا

ام حسن : اقريلنا التفسير يمه

زبيدة : ايها السائل ابشر الامر الذي نويت عليه خير ان شاء الله فأقدم بعد التوكل على الله فأن عاقبته محمودة ، وتوجب سعادة

غمضت عيوني ودموعي نزلت الحمدلك يارب ، فدوة رحتلك الهي جنت متخوفة وهالرسالة بردت كلبي

ام حسن : كلش زينه الاستخارة كلش زينه

زبيدة : درت وجهي على خالة وئام ، خالة الله يخليج ساعديني ولتوكفين عرضه بالسالفه ، انتِ مو تكولين امي عزيزة عليج ، عليج بداعتها اذا تحبيها ساعدينا وهاي كدامج حتى الاستخارة طلعت زينة

وئام : اذا مساعدتي تخليج سعيدة انتِ وخواتج هاهي حبيبتي اني وياج

زبيدة : ابتسمت شكراً الج ؤ درت وجهي على خواتي يله جيبن ذهبجن واني هم رايحة اجيب ذهبي ، رحنه ركض جبنه ذهبنه وفرشنا بالكاع

ديمة : هذا كل ذهبي ، رفعت ايدي نازعه التراجي من اذاني وهاج هذا الزوج هم اكيد يفيدنا

دنيا : هاج زبد هذا كل ذهبي ، بس ذهب حمودي الشحم ولحم والجرس والحزام اسفة ما اكدر ابيعه  

زبيدة : اني اصلا مستحيل اخليج تبيعي الي حنبيعه بس ذهبنا لا ذهب امي ولا ذهب حمودي حنتدناله

ام حسن : اني ماعندي بس هالبتوت والخاتم صح قليلات بس وداعة الحسين بس هذا العندي

زبيدة : لا دادا شنو هاي صدُك تحجين ، ذهبج الج شنسوي بي

ام حسن : لا خلني اشارك وياجن ولتكسرن بخاطري لو اني ما استاهل تخلني شريكة وياجن

زبيدة : كمت حضنتها وبستها فدوة لكلبج دادا ياريت لو كل الناس طيبة ونظيفة مثلج ، اباوعلها نزعت البتوت والخاتم خلته على ذهبنا ، بست ايدها ان شاء الله نتوفق ونكدر نشتريلج عدال هالذهب

ام حسن : عندي ضحكتجن وراحة ابوچن تسوه الدنيا وما بيها

ديمة : اووووي دادا تعاي ابوسچ

دنيا : بعد عمري خاله وين اكو مثلج انتِ

زبيدة : بنات ذهبنا اذا انباع فخير من الله نكدر نجهز لكُلشي والحمدلله البارحة سألت وكلولي الذهب صاعد وصاير نار فلازم نبيعة بسرعة قبل لينزل سعرة

دنيا : عاشت ايدج لعد اليوم نحاجي بابا حتى ياخذنا نبيعه

ديمة : واذا ما قبل

زبيدة : يقبل ان شاء الله عوفنا عليه

دنيا : يله زبيدة لمي الذهب وخلي عندچ

زبيدة : اوك ، دنكت وكمت المه واخلي بالعلاكة ، دالمه وحسيت بشي ثكيل يوكع على ايدي ، اااخ ايدي ،شنو هذا ، شلته اباوع ساعة رجالية ذهب ، شلت راسي صار معين بوجهي

دنيا : كلنا درنا وجهنا على معين الي ذب ساعتة ذهب على الذهب مالتنه

ديمة : شنو هاي ؟

معين : ااا ا عع عـ عادي اشـ اشارك وياچن

البنات :

**************************************
لهنا يكون خلص البارت ان شاءالله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالاحداث ؟

شنو تتوقعون حيصير بالبارت الجاي ؟

ملاحظاتكم ؟

..

..