رواية الموت الحي الفصل السابع 7 - بقلم براء الموسوي

مرحبا حبايبي العسل شلونكم ❤️

عذروني على التأخير والله كاعدة بالموكب وعايفة الزوار وداكتب حتى انزللكم البارت وهاي الساعة صارت بالـ4 واني حتى نوم منمت وضليت كاعدة اكتبلكم البارت ❤️

#الـموت الحـي
#للكـاتبة بـراء المـوسوي

"قراءة ممتعة"

ديمة : انفتحت الباب ودخلت ، خليت الصينية على الميز ودرت وجهي شفت مُعين وراية هلوو معُين شلونـ... ، بعدني ما كملت وما احس غير مُعين يهجم عليه ، ويجرني من ربطتي بكل قوتة ، ااااخ اااخ مُعين
شبيك

مُعين : الساعة بـ 3 ونص الظهر وين جنتيييي ولچ

ديمة : لزمت ايدة الي تعت براسي ، شعري من جوة الربطة تكطع بايدة عوفنيييييي شبيييييك شهالاسلووووب ، رفع ايدة وضربني راشدي  لييييييش ، ليييييش تضربنيييي شسوووويت انييي

مُعين : دوامچ بالكليه صارله ساعتين من خااااالص وين جنتيييي ساق**

ديمة : والله جنت اودي مشمش لبيت جوارينه ، دادا ام حسن دزتنييي كافييي عووف شعري الله ياخذكككك ، ولا كأنما احجي ويا جرني سحل لجوة دهدنييييي شبييييك تسودنتتتتت

وئام : ووولك هاييي ليييش لازمهااا هيج

ديمة : تعاالوااا وخروا عنيييي تكطععع شعريييي اجو كمت اجر بنفسي اريدة يعوفني ماكو مكمش بيه ويصفكني راشديات ، عوووفنيييي جايييي اكووول

مُعين : بت النعال بنية حديثه شعدددج تفترين الظهريات

ديمة : اريد اسيطر على دموعي والشهكة الطالعة مني  ما اكدر وجهي ورم من الراشديات ، وو والله العظيم و والق والقران مرحت لمكان خالة ام ام حسن كل كلتلي اودي فو فواكهه للجيران

دُنيا : هسسسه غيييير نفتهم شكوو ليييش لازها هيييج مخبل انت مخبل

مُعين : انتن يالكـ*** يلي مابيچن وحدة شريفة ، شلون عايفات بنية شابة تفتر بهالظهريات شنووو تردن الزلم تلعببب بيهااا ولمن يوكع الفاس بالراس تجنن تتبكبكن

دُنيا : تاكل تبن وتحترم نفسسسك افتهمتتت لو لا
احنه اشرف منك ومن عشرة بكدك وبالنسة لديمة فبابا الي كال ، خلي تروح وحدة منكم للجيران توديلهم فواكهه

وبعدين اذا انت هيج غيوور يبعد كلبي ومتتحمل عرضك يطلع الظهريات ما رحتتت انت لو بس فالح تجي انت ومرتك تسقطولي الغديات والعشيات هنا

مُعين : داقتچ مرتي راح تموتتتن منها لان شريفة واحسن منچن على الاقل ما خلاها العوز  *****
مثل هالكـ**** الي مدري بيا داهية جانت تفتررر
جيبووو جنطتهااا خلييي اشوف شكددد انطوهااا
بهالساعتين

ديمة : والقرررران محد انطانيييي شييي جيبواا القران احلللف عليه والله مرحت لمكان غير بيت ام امين

اسماء : شجاك مُعين عوف البنية مو هيج اكعد وافتهم منها وين جانت ترة هيج راح تخوفها وما راح تحجيلك الصدك

ديمة : والله العظييييم مداجذب اني ، ولللللج انتتتتتتتتِ شنووو من بشر

اسماء : ياا هاي جزاتي دادافعلچ

وئام : انتِ بالذات تنچبين صارلچ ساعة كاعدة وتحشين براسة ، يا ديمة وين ، يا ديمة شمطلعها الظهريات ، شنو مخلين بنية شابة تطلع بهيج وقت
والمنطقة مو امان لمن شحنتييي ثورچ وهديتييي علينا الله ينتقم منچ

اسمع ولك تعوف اختتتتك لا قسم بذات الله هسسه اخابر ياسررر واخليي يتصرف غيير تصرف وياااك
ولك اني بناتي اشررف من الشرف ، تجي انتِ يا زبالة الزلم يلي ما محسوب لا على مرة ولا على رجال تتهم اختك بشرفهاا يا نذل

مُعين : انتتِ بالذات تسكتيننن محد هيلكهن ودمرهن غيرچ وغير رجلج لا احد يعرف شوكت يطلعن ولا احد يعرف شوكت يطبن هيته صايرتلهن وحقهن اذا انتو عايفيهن على حل شعرهن لمن كامن ميخافن وميحسبن حساب لاحد واحنه بسسس عوزنه بعد نلمع كرونه ونجيبلچن الزباين للبيت

ام حسن : عيب عليك هذا الحجي هذني عرضك وخواتك انت المفروض تحاميلهن مو تحجي عليهن
مع الاسف عليك يا مُعين اذا انت تحجي عليهن هيج
على خواتك شبقيت للغريب واذا على طلعتها لديمة فابوك الي وصانه واني الي دزيتها لبيت الجوارين
ما طلعت من مزاجها

مُعين : انتِ سدي حلكچ ولتدخلين وامشي ولي جوة ما بقى علينه بس الخدم والفكور الي ينظفون حماماتنا يحجون امشي وخليني محترم شيباتچ

ام حسن : رحم الله والديك

وئام : شوف ولك اذا متعوف اختتتك وداعة وسيلة اخابر ابوووك واخلي يسوي بيك سوايه ما سواهااا بشر فتهمت

مُعين : دخابرييي والله ذبحتيني شنووو مخوفتتييي بهالمخرف

دُنيا : اباوع لزبيدة نزلت على صوت الصياح

زبيدة : شكو شبيكم تصيـ.... اباوع لمُعين لازم ديمة من حجابها وشعرها كله طالع وخدودها حمر دم وبس تبجي ، هايييي شمسوي بيها انت مالت السم

مُعين : انتِ بالذات تاكلين تبن ومتدخلين

زبيدة : اسمعني زين والكعبة اذا ما عفتها لاسوي بيك سواية بحياتك ما شايفها

مُعين : هههههه ما بقى عليه بس النسوان تهددني

زبيدة : تقدمت وكفت كدامة ، راح تعوف ديمة بارداتك او غصب عنك واريد اشوف الرجال اليكول لا

مُعين : بله اريد اكول و راويني شراح تسوين

زبيدة : ابتسمت وهمستلة هدها احسلك لان ما اريد اتهور واخلي اسومه تعرف انو البيت الكاعدين بي انتو مو ايجار وانت مشتري ومسجلة بأسمك وعندك بيت ثاني بحي الـ**** ومأجرة هم وهي متدري والقران اذا متعوف اختي افضحك هنا واخليها تسوي عليك عزة كربلاء واريد اشوف شلون تلزكها ساعتها 

مُعين : شكد نذلة

زبيدة : ابتسمت مو انذل منك ، تقربت لزمت ايد ديمة وسحبتها عنه ، خليتها وراية

دُنيا : اباوع لزبيدة تقربت لمُعين ومدري شهمستلة وهو فجأه صار وجهه اصفر وبنفس اللحظة عاف ديمة
يا ترى شكلتلة ، انوب ويه ما عاف مُعين ديمة دخل بابا وشاف الوجوه تتلاطم ضل صافن علينه

ياسر : خيركم شصاير وانتِ دمدم حبيبتي شبيج ليش تبجين

دُنيا : اباوع لزبيدة فجأه كامت تبجي انوب صفتني عليها بندت من البجي وراحت لبابا شبكتة وكامت تنشغ ، يااا هاي شبيها

ديمة : زبيدة سولفت لبابا كل الي صار وهي تبجي ، معقولة هالدموع على مودي ، انوب بابا من شافها تبجي تخبل على مُعين ، خصوصاً كلنه نعرف زبيدة مو على اي شي تبجي الا اكو شي جبير ، يربي
معقولة اطلع ضالمتها وتطلع تحبني ، اباوع لبابا تقدم وصفك مُعين راشدي

ياسر : انت شلون تتجرئ وتمد ايدك على اختك شنوو عبالك ياسررر ماتتت حتى جايي تتقاوه على بناته ، اياك يا مُعين كلشي الا بناتي والله العظيم اشرب من دمك واكلك لحم واذبك عضم ، بناتيييي خط احمر

مُعين : بناتتتتتتك ما مربايات شنوووو بنيييية تفتر وحدهااا بالظهريات انتتتت قبل لا تلومنييي وتمد ايدك عليه على حساب زبببباله مثل ذني جان ربيتهن علمتهن الصح من الغلط حتى لا يجيبن النه العاااار

ياسر : والله ما عار الا انت واخوك ، خواتك مثل النسمة عمررررها الاذية ما اجت منهن دومها الاذية تجي منكم انتو ، انت واخوك العار مو من بناتيييي

بناتي ما ضحكن عليه وباكني مثل اخوك باكني
وبناتي كاعدات يدوسن على نفسهن ومتحملات العوز والفكر لخاطري مو مثلك انت الي ما بالچذب كتلي يابة شمحتاج ، وانيي ادري هوستك هاي على خواتك مو لان ديمة جانت طالعة ، خواتك دومهن يطبن ويطلعن على مزاجهن ما فديوم واحد بيكم شالته الغيرة وحجة بس كول ما صرفك كلامي وكت الكلت المحل الي اشتريته وراح اسجلة بأسم خواتك هلي اجيت لهنا حامي وطلعت حركتك بهالمسكينة

مُعين : انتتت دومك تفررق بيناتنه مو غريبة عليييك طوول عمرك واحد تعاملنه معاملة تختلف عن معاملة خواتي دووومك حاطهن من اولى اولوياتك واني بالذات طزززز بيه حتتتى المحل الي ماعندك غيرة هسسسه اتحسفنتتتت تذكرني بي وتريد تسججلة لذني الحقييييرات 

واذا انت تكول مُبين ضحك عليك وباكك فأنت لوما
مضحكة وزوج ما چان ضحك عليك مُبين فبطل تلوم مُبين لان لو ما انت غبي ومتعرف تتصرف وتثق بياهو الچان ، ماچان صارلك الي صار وهاي انت هسه صفيت فلس متسوة

دُنيا : اباوع لبابا صفكة راشدي حييل بحيث من قوة الراشدي حسيت طبلة اذانه لمُعين راحت بس يستاهل

ياسر : من اليوم انت مو ابني ، الابن الي روحة تنطي يتطاول ويتشمت بأبو هذا مو كفو الواحد يعترف بي ، روح يا مُعين انت من اليوم ميت بالنسبة الي مثل ما مات اخوك من ناحيتي و وصيتي يا مُعين متوكف بجنازتي ومن هاليوم اني ما اريد اشوف وجهك

مُعين : اني اصلا ميشرفنيييي اوكف على بجنازة واحد مثلك هه خلي نشوف تاليتها من تموت منو يشيل تابوتك بناتك ، يله اسماء احنه مالنه كعدنه بهاي المزبله ييييييله

اسماء : اي عيني اي بس اجيب جنطتي

دُنيا : اخذ مرتة وجهالة وطلع وركع الباب حيل ويمشي ويغلط على بابا

زبيدة : شلون حطلع اشك حلكة ابو كذلة ابو الدهن

ديمة : اباوع لبابا كعد ومبين علية صاير عصبي نار
باوعلنه وكال

ياسر : اسمعن ولچن من اليوم تنسن عدجن اخو اسمة مُعين الي يحجي على خواتة ونفسة تطي يحجي عليهن هالحجي مو كفو يتسمى اخو ، الاخو سند وانتن من هاللحظة ماعدجن سند غير رب العالمين وغيري

زبيدة : احسن قرار تاخذة بابا هيج نماذج متستاهل الواحد ينطيها مجال وانت ما قصرت ويا شعلتله العشرة شمع بس هو مو وجه نعمة

دُنيا : همستلها كافي زبيدة لتزيديها على بابا

وئام : ياسر اصبلك غدة ما تغديت انت

ياسر : لا ما اشتهي رايح انام و رجاءًا بلا صوت اريد ارتاح وانام بدون هوسة

وئام : على راحتك حبيبي

دُنيا : راح بابا لغرفتة واحنه صعدنه فوك ، دخلت للغرفة اباوع ديمة ركضت ذبت روحها على زبيدة

ديمة : ياحبيبتي يا زبيدة والله طلعتي طيبة وحبابة وكلبچ طيب ما توقعتچ راح تكونين هيج حساسة وتبجين عليه جنت ضالمتچ والله يا عيني يا زبيدة سودة عليه طلعتي مثلنا تحسين

زبيدة : مثلنا تحسين ؟ دفعتها دوخريييي شنو بس لا عبالج من بجيت جوة علمودچ

ديمة : يا عيني يا عيني لتكابرين صارحيني بمشاعرج ادري بيج تحبيني

دُنيا : اباوع لزبيدة تدفع بديمة الي حاضنتها ومتقبل تعوفها ههههه

زبيدة : ولج وخري والعباس ما بجيييت عليج ولللج دُنيا تعاييي وخريها عنييي ولج ايييييع لتبوسيني تلعب روحييي .... وخرتها عني دولي والله مابجيت عليچ

ديمة : لعد عليمن بچيتي

زبيدة : تذكرت الي صار وياية اليوم واستهضمت

دُنيا : والله عرفت دموعج مو خالية

ديمة : غميتها اهمداج عبالي علية واني مكيفة اكول زبيدة كامت تحبني بس ذيل الكلب عمرة ما انعدل

زبيدة : امشي ولي امشييي

دُنيا : اباوع لديمة نزلت جوة ، حبيبتي وجها راح من التصفك الي اكلته

زبيدة : كسر بأيدة كون شوهلها خدودها

دُنيا : ما كلتيلي شهمستي لمُعين

زبيدة : سولفتلها

دُنيا : وانتِ شمدريچ

زبيدة : ورود المعاونه زوجها يشتغل بالسجل العقاري واجتي كلتلي اخوچ مشتري بيتين

دُنيا : بس غلط متكلين لمرتة

زبيدة : اني شكو فلوسه لو فلوسي اصلا اني مالي حق اتدخل بس لان شفتة هيج سوة ويه ديمة تنرفزت وما ردت امد ايدي عليه وتكبر المشكلة فكلت اهدده بهالسالفة

دُنيا : هزيتلها راسي ورحت تمددت على فراشي ، اخذت موبايلي فتحته صارت صورة حمودي بوجهي
ابتسمت يروحي هالضحكة اروحلها سبع فدوات ، فتحت الفيس اكلب واضيع وقت بس بدون واهس

مدري ليش اجاني فضول ادخل على حساب يوسف ، سويت بحث عن حسابة مالكيتة ، استغربت كل مرة اكتب اسمة ويطلعلي بالبحث ، دخلت على حساب زبيدة هي متابعته وهو هم ، بس هم ما لكيتة ، رحت على الانستگرام ونفس الشي ، فتحت حسابي الثاني وبس كتبت اسمة طلع ، تفاجئت طلع حاظرني !!
ومن كل البرامچ حتى واتساب وفايبر منطيني حظر منهن يا ترى ليش ... زبيدة

زبيدة : نعم

دُنيا : يوسف بي شي ؟

زبيدة : ليش تسألين

دُنيا : مجرد فضول

زبيدة : لا ما اعتقد بي شي هستوني شفته نشط على الماسنجر ، ليش

دُنيا : هيج اسأل ، يا ترى ليش هيج فجأة قرر يحظرني

زبيدة : اباوع لدُنيا دارت وجها وغطت راسها بالبطانية
ادري بيها من تضوچ تسوي هيج ، يا ترى ليش سألتني عن يوسف ، غمضت عيوني عشتو شكلها الاميرة حنت لحبيبها الوحش

ثاني يوم الصبح بدلت واخذت الورقة الي كتبت بيها اسماء المدارس الاهلية ، طلعت من البيت واخذت تكسي وكتله انطيك كروة على كد الي تريدة بس ابقى
ويايه ، رحت لاول مدرسة نزلت وسميت بسم الله

دخلت للمدرسة ورحت بوجهي لادارة المدرسة ، سألت على غرفة المدير ، دلوني عليها ، رحتلها ودكيت الباب ودخلت ، عرفت عن نفسي وراويته السيڤي مالتي

المدير : والله السيڤي مالتچ ممتاز ... ست ؟

زبيدة : زبيدة ، زبيدة النوح ، اباوع الملامحة بعد ما چانت مستبشرة انكلبت

المدير : من رخصتچ دقايق

زبيدة : المدير طلع شوية ورجع

المدير : والله يا ست زبيدة انتِ ما شاء الله السيڤي مالتچ يحجي بس للاسف عدنه فائض مال مدرسات
ولو اكو مجال بعيني

زبيدة : طيب عادي مو اله ادرس حتى لو اكون محاضرة واخذ طلاب بالدورات

المدير : والله المكان ميسع

زبيدة : هزيت راسي وكمت تشكرت منه وطلعت برة صعدت بالتكسي وشطبت هالمدرسة ، دليت السايق على المدرسة الثانية ، اوووف يلة زبد لتقهرين عدنه بعد هواي مدارس

نزلت للمدرسة الثانية ، نزلت ولكيت ولد كاعد باستعلامات الادارة ، اجيت ادخل سألني شعدني جاية ، كتلة انُ اني جاية اقدم على وظيفة وانطيته اسمي

: العفو ست المديرة ما موجودة

زبيدة : اوك ماكو مشكلة اكدر اشوف نائبه المديرة ست بسعاد

: هم ما موجودة

زبيدة : اباوع لغرفة الإدارة المديرة ومساعدتها كاعدة يمها ، هزيت راسي وطلعت ، رجعت صعدت وافتريت على باقي المدارس ، والمشكلة انو كلهم من يشفون السيڤي مالتي يكيفون ويرحبون بيه بس من يسمعون اسمي تتغير كل معالمهم ويطلعون حجه يشحتوني بيها

طلعت من اخر مدرسة بعد ما انرفضت للمرة الي مدري شكد ، مسحت على وجهي يربي بس اريد اعرف ليش مدينطوني فرصة رغم المؤهلات موجودة
سمعت موبايلي يدك ، شفت رقم غريب جاوبت الووو

: هاا محد قبلچ مو

زبيدة : منو وياي

: معقولة نسيتيني ست زبيدة ، اني جعفر الـ*** كرم الله وجهي ، عرفتيني مو

زبيدة : اي عرفتك

: شكد كتلچ يا ست لتلعبين ويايه وسمعي كلامي ليش وصلتي نفسچ لهالمواصيل متكليلي هاي تاليتج صفيتي بالشوارع ومحد يقبل يعينچ

زبيدة : اكو رب اسمه الكريم قادر انه يساعدني وميعوفني بمحنتي ، وعلى فكرة الي انطاك هالمنصب وخلاك بي قادر انه يسحب هالمنصب منك وتصفى ساعتها فلس متسوة

: هههههه وحتى لو افترضنا انو ربچ اقالني من منصبي هم ما راح تصيرين احسن مني لج بابا اني احط راسچ وادوسه بأقذر قندرة عندي

زبيدة : اني وياك والزمن طويل ، انت وياك منصبك وايدك الطايلة واني ويايه الله ونشوف منو الي يكسب بالنهاية

: شكد تعجبني ثقتچ بنفسچ

زبيدة : سديته بوجهه ودموعي نزلت ، شلون حرجع للبيت واني ما لكيت وظيفة يربي دخيلك بابا ماعندة فلوس شلون حنعيش

: هاا خوية بيج شي

زبيدة : مسحت دمعتي بسرعة لا اخي ماكو شي ، صعدت بالسيارة ورجعت للبيت وصلت للمنطقة ونزلت للبيت ، دكيت الجرس طلعلي بابا وبس شفته بجيت وحضنته

ياسر : هاا بابا هاا حبيبتي شبيج وشصاير وياج

زبيدة : دخلني جوة وهو يحاول يهدئني ، كعدت وهو سودة عليه راح يركض جابلي كلاص مي

ياسر : هاج بابا هاج يبعد كلبي اشربي واهدي وسولفيلي شبيچ

زبيدة : شربت المي وسولفتلة كل الي صار ما توقعت نفسي انُ ممكن احجيلة بهالسرعة ، توقعت حلكة شغل واكدر اكله شوف بابا اني استغنو عني بهاي المدرسة بس اكو الف مدرسة غيرهم تبنت شهادتي
ونجاحي لكن للاسف صار العكس

ياسر : تحبين اروح احاجي عادل واخلي يرجعچ غصباً ما عليه

زبيدة : لا بابا لا اصلا اني ميشرفني بعد ارجع ادرس بهيج مدرسة تلث ارباع الي بيها مرتشيين وميخافون الله ، بدموع اسفة بابا جنت متوقعة راح الكة شغل واكدر اساعدك بس والله مو بأيدي

ياسر : ولا يهمج يحبيبتي طز بالمدرسة وبالفلوس المهم صحتچ لج بابا قحط الفلوس وداعتچ بس الله يرزقني واكدر اوكف على رجلية مرة ثانية اله ابنيلچ مدرسة لو افتحلچ معرض سيارات شنو تشتهي نفسج اسوي الج المهم هالعيون الحلوة ما اشوفهن يبجن

زبيدة : وبرأيك ممكن هالشي يصير

ياسر : الي كدر يكلب الفلس مليار بأيدي ميكدر يرجع اوضاعنه مثل قبل واحسن

زبيدة : ونعم بالله بس بابا شلون هسة على الاقل راتبي چان يساعد ولو بمصروف البيت هسه حنسوي وراتبك وراتب خالة وئام لو يكفي لو لا

ياسر : يحلها الحلال يبوية وبعدين المحل الجديد اني اشتريته وان شاء الله راح اجهزة خلال هالاسبوع ويارب يكون فالة خير علينه ويجي الرزق منه

زبيدة : مسحت دموعي وباوعتلة صُدك المحل الي حتفتحه مال شنو

ياسر : مواد غذائية

زبيدة : مثل شنو يعني

ياسر : بقوليات ، بهارات ، معجون وهالسوالف مال المطبخ يعني و بيها مكسب خير من الله

زبيدة : زين انت شمعرفك بهالسوالف وانت عمرك كله مكضي بالشركات والاسهم والسيارات

ياسر : اني ياسر النوح ولج مو شوية الفلس بيدي اسوي ذهب وبعدين يابويه الظروف تجبرنه كلشي نتعلم والحمدلله والشكر ربج انعم عليه ورزقني من اوسع ابوابه ، سهلي شغلة المحل واخذته بسعر زين وبنص السوك و سخرلي عامل يساعدني بالمحل وبأجر مرتب وميكسر الظهر

زبيدة : وشبسرعة لكيت عامل

ياسر : اخو امين اسلام چان يشتغل بالمواد الغذائية بسوبر ماركت وعافه لان بعيد وربچ دلاني بي ودلا عليه حتى افيده ويفيدني

زبيدة : ما شاء الله بيت ام امين خوش متقربين منك هالايام

ياسر : والله يا بنتي هالناس رغم معرفتنه القصيرة بيهم الا انهم طلعو فد ناس كلوبهم طيبة وصافية مثل الكطن والله يازبيدة ولد المنطقة عسى لا احتاجيتلي شغلة كلها تركضلي وخصوصاً امين ،
الله يحفظة لشبابة كلما اشوفة ترتاح نفسيتي شنو ادب شنو اخلاق والخجل الشايلة مو طبيعي عود انخا
على شغلة ويكلي لا ابد والله

زبيدة : الله يحفظة ويخلي لاهله ، دنكت بست ايدة ويحفظك ويخليك النه يروحي انت ، شلت راسي اباوع البيت هدوء وصنته ، صدُك الجماعة وين ؟

ياسر : طالعات يفترن كالن ضايجات

زبيدة : بس الدنيا ظهر هسه

ياسر : هم يالله يكفيهن الوكت متدرين بيهن انتِ اذا طبن للسوك بعد ميطلعن ، عوفج منهن وكومي صعدي بدلي ملابسچ وصلي علما احمي الغدة واصبلج حتى تتغدين

زبيدة : لا بابا اكعد اني اسوي انت روح ارتاح

ياسر : دروحي بوية روحي ، اني ماعندي شي وبعدين ياسعدي ويا هناي اذا احمي لحبيبة كلبي الاكل ولج انتِ بنيتي والثمرة البقتلي من اعظم انسانة شافتها عيني

زبيدة : بابا صدُك انت تحب امي

ياسر : هالايام والظروف ثبتتلي يا زبيدة اني طوووول عمري الي عشتة ما حبيت غير وسيلة وللاسف اكتشفت هالشي متأخر حيل

زبيدة : ابتسمت وصعدت فوك ، بدلت ملابسي وصليت على راحتي ، نزلت لكيت بابا محضرلي الاكل وواكف ديصبلي يعمري انت ياريتني متقربة منك من زمان وشبعانه من هالحنيه التجنن

ياسر : يلة حبيبتي تعاي تغدي ، كملي وحطي المواعين بالسنك ، اني راح اروح امدد شوية لان تعبان

زبيدة : على راحتك حبيبي ، كعدت تغديت بسرعة وكملت اكل ، كمت لميت المواعين وغسلتهن ، سمعت الجرس يندك طلعت فتحت الباب شفتهن بوجهي

وئام : هاا حبيبتي زبيدة الله يساعدچ

ام حسن : سودة عليه تغديتي لو بعدچ

دُنيا : شصار بشريني

ديمة : هاي ليش عيونج حمر

زبيدة : يبوووووو شبيييچن ادرييي انفتكتن انطني مجال استوعب اسألتچن واجاوب خبصتنيييي

خالة وئام تسلمين ودادا مشكورة تغديت ودنيا انطاح حظي وبعدين اسولفلچ ليش وانتِ بطلي تركزين هيج

ديمة : يا عشتو فوك ما اسألج عابت اي والله وهاي اني عود رحت وجبتلچ هدية لان ساعدتيني

زبيدة : شجبتيلي

ديمة : جبتلچ دبدوب يخببببل وشبشب وردي اول ماشفته اشتهيته الج

زبيدة : حشا نعمة الله دتحسسيني مشتهيتلي داطلي مو نعال ابو الاصبع ، اباوع كل عقلها طلعت جايبتلي دبدوب ونعال وردي ، لج بابا صدُك تحجين وردي ؟

ديمة : اي وردي كافي شوية غيري من الوانچ الكئيبة حسي نفسج انثى شوية

زبيدة : واللون الوردي حيحسسني انو اني انثى ؟

ديمة : لعد شلون يمليج طاقة إيجابية ويغير شكلچ بدل وجه البومة الي لابستة النه وهااا عندي الج مفاجاة باعييييي شنووو جبتلچ يخبببل صح

زبيدة : اباوعلها طلعت ملابس داخلية لونهن وردي وعليهن بومه بيضه ، هذني المن

ديمة : الج باعي الي بيهن دبدوب الي والي بيهن ارنب لدُنيا والي بيهن بومة الج كونچ تشبهين البومة يعني فحبيت اجيبة الج شنو رأيج

زبيدة : من الله يطيح حظچ على هالذوق الزباله مال الزعاطيط ولج والله استحي اباوعلهن كد ما يفشلن

ديمة : والله العظيم انتِ ميفيد وياچ هيج موديلات يراد اجيبلج بازة مثل الي تلبسهن دادا ام حسن

ام حسن : وشبيها ام حسن متعجب

ديمة : بستها من خدها عسل دادا انتِ عسل

وئام : بنات فدوة لتهوسن البيت لمن كل غراضجن ولغرفتجن ركض هي بس هالصالة عايفيها للكعدة مو تهوسنها ، يلة اني رايحة ابدل واجيجن

زبيدة : كعدت ويه خواتي اشوف شنو جايبات

دُنيا : حزري شنو جبتلچ

زبيدة : اكيد شي بايخ مثل اختچ

ديمة : عيب عليج راعي مشاعري شوية ياعيني يا اني ابوسني شكد حبابة ولطيفة مو مثلچ يا بومة

زبيدة : انجبي الفاهية لا اكوملچ ، اي دنيا شجبتي

دُنيا : جبتلچ مثرامة الثوم الي جنتي تدورين عليها

زبيدة : شو اشوف ياااا اي والله هاي هيي حضنتها يا بعد كلبييي ، اي هي هاي الشغلات التخبل

دُنيا : وجبتلچ قالب كيك على شكل شفايف اتذكر كلتي مرة تردين منه

زبيدة : عليج الزهرة وين لكيتي كلبت الدنيا عليه وما لكيته

دُنيا : ولج السوك الشعبي مالت هالمنطقة يجنننن وكُلشي بي واسعارة مناسبة

زبيدة : اخذت القالب اكلب بي يمه فدوة يخبل اريد اسوي كيكة بي

ديمة : ايييييع كيكة على شكل حلك

زبيدة : دخلي اسوي عليه كيكة وشوفي شلون يطلع يجنن باعن حسوي الكيكة بالككو واخلي عليها كريمة حمـ.... داسولف ومندمجه وما اسمع غير صرخة خالة وئام تجي من الغرفة ... خير ياستار

***********************************

يتبع .

شنو رأيكم بالاحداث؟

شنو تتوقعون حيصير بالبارت القادم ؟

.