رواية الموت الحي الفصل السادس 6 - بقلم براء الموسوي

مرحبا حبايبي العسل شلونكم ❤️

قبل لا ابدي بالبارت اريد اسألكم سؤال ، اني وياكم من 2019 لليوم ، يايوم دورت مشاهدات ورفضت انزل الا توصل الرواية لرقم معين ؟ تجي وحدة تتجاوز وتكلي تدورين مشاهدات وتردين الرواية تصعد ، انتو اغلبكم تعرفوني ، اني اتبع هالاساليب الرخيصة هاي !!! الرواية اذا متشتهر بجهدي وحبكم الها عساها لا اشتهرت , ومن امتنعت عن التنزيل هاليومين فالله يشهد لان نفسيتي جانت تعبانه جدا بسبب الصار ببغداد والخوف والقلق سيطر على اغلب الناس بما فيهم اني والله كلمتين على بعض مكدرت اكتب حتى موبايلي ماعندي قابلية الزمه ،على كل حال اني حبيت انطي سبب لاختفائي بهاي الفترة للمحترمين والمتابعين واعتذر الكم لكن اني بشر مثلكم واتمنى تقدرون هالشي❤️

***********************************

#المـوت الحي
#الكـاتبة بـراء المـوسوي

دُنيا : سمعنه صراخ زبيدة الجاي من فوك ... يبووو عفيييه بيييت كل ساعة مصيبببة , صعدت اركض اني وخالة ام حسن على صوتها ، وصلت لغرفتها واني الهث كوه النفس اجرة مديت ايدي افتح الباب بس متنفتح ! ، وصلني صوتها من ورة الباب وهي تصيح

زبيدة : ولكم ياهووو قافل عليييييه الباب راح يروح علية الوكت

دُنيا : ولج ماكو شوفيها خاف المشكلة من يمچ

زبيدة : لا مو من يمي باوعي منا الباب مقفولة

دُنيا : زين شوفي خاف انتِ قفلتي الباب على روحچ بدون متنتبهين

زبيدة : شنو السالفة ادري هيج ثولة اني ، درينه جنت تعبانه بس مو لدرجة اقفل الباب على روحي وما انتبه

دُنيا : يعني يازبيدة قابل الباب انقفل وحدة خوما انقفل وحدة

زبيدة : يربي شسوي هسه عندي امتحان شامل اليوم وفوكاها ماخذة درس من اللاستاذ الوراية حتى اخلي طلابي يمتحنون على راحتهم اوووف اوووف يربي منين اتلاكها

دُنيا : اهدي زبيدة شبيج تفرفحين ، عادي ظرف وصار لترحين اليوم علما نشوف حل للباب

زبيدة : هذا مستقبل وتعب طلاب كاعدين للفجر سودة عليه ويقرون تالي اركعهم بوري وما اروح شنو ذنبهم خطية وهمه منتظريني ، تنهدت يربي تعبت بعد ماعندي قابلية اتحمل

دُنيا اتذكر اكو مفاتيح احتياط بمكتب بابا روحي دوريهن وجيبهن وتعاي علما اخابر وحدة من المدرسات وادزلها صورة الاسئلة اخاف ما الحك اوصل من وكت اذا طلعت على الاقل خلي توكف عليهم وحدة من الموظفات علما اوصل ، عفية الله يخليج استعجلي

دُنيا : صار بعيني هسه رايحة خاله تعاي ويايه فدوة

ام حسن : جاية يمه جاية امشي بسرعة

زبيدة : ركضت اخذ الموبايل اباوع ماهو شنو السالفة ادريييييي حتى الموبايل وين راااااح والله خليته على الميز تواليت شنو تبخر يربي راح اتسودن والله راح اتسودن ادريييي متقصديني خومااا متقصدينييي

دُنيا : طبينه لمكتب بابا ، اني اندل مكان المفاتيح ، فتحت الجرار ما لكيتهن !! شنو السالفة والله اتذكر بابا دائما يخليهن هنا

ام حسن : هاا يمة ماكو مو

دُنيا : اي والله خالة ماكو

ام حسن : زين خابري ابوج سألي خاف مغير مكانهن

دُنيا : مو خاف اكله وينهبط وهو معايز

ام حسن : لتكليله على زبيدة وبعدين يا حبيبتي اكو هبطه اتعس من الهبطه الي اكلها مُبين لابوچ

دُنيا : لعنة الله عليه دنيا واخرة ، اخذت موبايلي متصلة على بابا فتح الخط ، الوو هاا بابا حبيبي الله يساعدك

ياسر : ويساعدج بنيتي امريني محتاجين شي

دُنيا : حبيبي انت بس ردت اعرف المفاتيح الاحتياط وين

ياسر : ليش شتسوين بيهن ؟

دُنيا : هاا مو مو العاملات اجن وكالن مفتاح غرفتهن مزنجر وميقبل ينقفل عليهن وانت تعرف هنه بنات ويردن ياخذن راحتهن لو يخابرن اهلهن فكلت اسألك على المفاتيح الاحتياط حتى انطي الهن نسخة

ياسر : شعجب مزنجر المفتاح والله شغلة غريبة ، على كل حال تطبين لمكتبي تلكيهن بالجرار الي يم مكتبي

دُنيا : باوعت لخالة ام حسن ، نفس المكان الدورت بي وهم ماكو ، ماشي بابا يله باي ، سديتة شلون بينه هسة هاي الفضيحة الكاعدة الفوك شلون راح نطلعها

ام حسن : ولج خاف احجي وتصير ذمة بركبتي

دُنيا : شنو خالة كولي

ام حسن : اني كلبي لاعب من ديمة ما شفتيها شلون نزلت تركض وحالتها حاله حتى شالها لافته بالاعوج وسالفة المحاضرة هاي ما خاشة بدماغي

دُنيا : عبالي بس اني فكرت بيها ، تعاي خلي نصعد نشوف هالقنبله الموقوته العايفيها فوك ، صعدنه فوك وصلنه لغرفتها ، زبيدة

زبيدة : ادري وين صرتن صارلجن فوك الربع ساعة يله بسرعة فتحلي الباب خلي الحك على الدوام

دُنيا : زبيدة المفاتيح ماهنه حتى خابرت بابا ودلاني عليهن وهم ما لكيتهن  

زبيدة : لطمت على وجهي استغفررررر الله وللللللكم شلووون بيه يا حيييييوان قافل عليه الباب اريييد اداوم منتظريني هنااااك

دُنيا : اجت ببالي ديمة ، تذكرتها شلون طلعت مخبوصة ومستعجلة يربي بس لا هي قافله الباب شيخلصها من زبيدة اذا طلعت هي ، فزيت على صوت زبيدة

زبيدة : وتااااااالييييي ارييييييد اطلع

دُنيا : وجع حتى وجع ليش تصيحين اني شعليه قابل اني القفلت الباب عليج وبعدين مو كتلج خابري المدرسات وانطيهم الاسئلة

زبيدة : ولج موبايلييييي ما هوو

دُنيا : انوب حتى موبايلج ماهو

زبيدة : نكثت الغرفة ماهو والله ماهو ، بس اريد اعرف يا نعال قفل عليه الباب ، ادري الجن خوما الجـ .... لحظة لحظة دُنيا خابري ديمة بسرعة

دُنيا : ليش

زبيدة : كلبي لاعب منها ، خابريها بسرعة لتخليني الجناونه الي براسييي تطلع عليج هسه

دُنيا : هسه اخابرها ، خابرتها اول ما دكيت ما جاوبت ضليت اتصل عليها هواي ياله ردت

ديمة : الووو دنو حبيبي داكة عليه اسفه جنت بالمحاضرة

دُنيا : ديمة اسألج سؤالج وتجاوبيني علية

ديمة : قبل لتسأليني اني القفلت الباب على زبيدة وهي نايمة وموبايلها هم اخذته عندي وهاا لتعبين نفسج وتدورين على المفاتيح الاحتياط لان هم عندي ، خلي اشوف اليوم شلون تداوم وهي عدها امتحان شامل والمدير متحلف بيها هالايام

زبيدة : للللللج نذذلة عاااار البنات كووون الزمچ اله ادميييييج وحق الله

ديمة : هاي يمج وتسمعني طلعت ، كليليها تكول ديمة عبالج راح اسكت على الراشدي الاكلته منج ، اذا عبالها اني حبابة وفقيرة ممكن اسكتلها لا حبيبتي غلطانه خلي تصحى على نفسها شوية وتعرف قدرها زين اني مو قليلة ترة واذا اريد اخبث احقر مني متشوفون

زبيدة : ااااااااالله ياخذج المشكلة بيني وبينچ طلابي شنو ذنبهم هذوووولة وزاري كل دقيقة تفرق بمستقبلهممم حررررام عليييييج اني يطبني مرض بس همه شنو ذنبهم تدررررييييين بيهم للصبح يتراسلون ويقرووون سوووه انتِ شنووو من بشر

ديمة : مشكلتهم هاي مو مشكلتي يلة باي عود من ارجع انطيهم المفاتيح حتى يفتحولج الباب ، هسة الساعة ب8 اصبري للظهر ههههه ياعيني والله انقهرت عليج يله چااووو

دُنيا : قفلته ديمة واني مصدمة حرف مانطقت والله ما توقعت ديمة تتطلع من هالسوالف دائما جنت اشوفها طفلة حتى بتصرفاتها والله صدمتني ، سمعت صوت زبيدة الي كامت تبجي مثل الجهال

طبعا زبيدة كُلش متعلقه بشغلها وطلابها تحبهم بشكل مو طبيعي وهي بطبعها انسانه جدًا ملتزمة وتكره التقصير وخصوصاً اذا الموضوع متعلق بطلابها

ام حسن : كافي زبد حبيبي انت لتبجين حمدي ربج وسكتي احتمال لو مداومة اليوم يصيرلج شي

زبيدة : بدموع تعرفن شنو يعني 80 طالبة صارلهن يومين يقرن ويحضرن لهالامتحانات واني متراهنه وياهن اذا طلعن 100 اعزمهن وكلنه مكيفين على امتحان اليوم وحتى اخذت درس مو درسي على حساب اشجعهم وانطيهم مساحة يمتحنون ويضبطون المادة قبل فترة المراجعة

تالي من ورة هالكلبه نكتت بيهم هسة شيكولن علية مدرستنا ضحكت علينه وعافتنه نقرة للصبح تالي ما اجت ، بعد شلون يثقن بيه انوب من احدد امتحان نصها متقرة على ابو اني ماعندي حجاية وهم راح انكت بيهم وحيقصرون بدراستهم من وراي

دُنيا : اي لحد يستغرب هاي زبيدة تفكيرها دومة بعيد واذا الناس تفكر بالليوم فزبيدة نلكة عقلها يفكر بأحداث ممكن تصير بعد شهور وسنة وعدها طبع تعظم المشاكل على نفسها بس متبين الا ما ندر تنهدت
وكعدت يم باب غرفتها وضليت اهدي بيها وهي ساعة تغلط علية وساعة تشتم الساعة الي انولدت بيها وساعة تتفل علينه من ورة الباب واني حاطة ايدي على خدي وساكته هاي بعد زبيدة اجتها الحالة

زبيدة : اكررررهكم ككككككلكم اكرهكممممم ااااالله ياخذكممممم انييييي مكانيييي مو هناااا عائلة فالتتوووووو

دُنيا : بعد بعد صيحي اكثر وصلي صوتچ لبيت النوح بقو بس همه ما شافو عياقتج

زبيدة : انتِ انجبييييي الفاهية

دُنيا : ضحكت هههه‍هه عابتلچ اي والله حتى اني ما خلصت من لسانچ

زبيدة : اكرهكم

دُنيا : طبج طوب عساچ لا حبيتينا

زبيدة : ما جاوبتها .... اخذت نفس اهدي زبد اهدي نفس عميق اي عفية عفية ورد اي هيج طلعي الطاقة السلبية ، لتهتمين قحط امتحان انتِ زبيدة متأثر بيج هيج مواقف بايخة ، رحت فتحت البلكون مالتي وتمددت لازم اطلع الطاقة السلبية الي بجسمي حتى ما اطك واموت ، مديت ادية ورفعت رجلية باتجاة معاكس وغمضت عيوني هالوضعية تخليني اهدئ

صورة توضيحية 👇🏻

    (ادري ظهركم وجعكم مثل ما وجعني ظهري 😂)

تنجبو تسوون مثل الصورة لان مو اي واحد يكدر يسوي هالوضعية وزبيدة عدها مرونة بالعظام ❤️

____________________________________

ديمة : كاعدة بالكافتيريا وحدي ، ضايجة لان سويت هيج بزبيدة اني ما احب ااذيها بس هي دائما تستفزني  وتنتقص من شخصيتي وتكول اتصنع بس والله اني ما اتصنع وهاي طبيعتي ، كل مرة اغلس عنها بس من ضربتني ماعرفت اسكت وكلت لازم اقهرها مثل ماقهرتني

من كعدت الفجر اصلي سمعتها تسولف وية بابا ودُنيا وكالت عدها امتحان مهم فاستغليت الفرصة وانتظرتها ترجع تنام ولان ادري بيها اذا تعبانه متحس رحت لغرفتي اخذت موبايلها وطلعت وقفلت الباب عليها ورحت نمت وقبل لا اروح للكلية تذكرت المفاتيح الاحتياط ورحت اخذتهن من مكتب بابا وخليتهن بجنطتي وطلعت ردتها تحس بنفس احساسي وشلون اني انقهرت من ضربتني ، تنهدت شايله راسي لكيت راسل واكف كدامي صارلي هواي ما شايفتة

راسل : سلام

ديمة : هلو وعليكم السلام

راسل : ممكن اكعد

ديمة : انحرجت منه هاا اي تفضل

راسل : اي طمنيني شلونچ

ديمة : الحمدلله وانت ، اباوعلة صافن بوجهي شبيك

راسل : اول مرة اشوفج بدون مكياج وعذريني لو كلامي بي تجاوز بس صدكيني وبكل صراحة المكياج چان طامر هواي من جمالچ

ديمة : اباوعلة يحجي وياية وعيونه تلمع اول مرة اركز ويه ولد هيج ، راسل جدًا جميل وشكلة رجولي صاحب طول حلو وجسمة رياضي ومرتب واكثر شي يعجبني بي انه محترم رغم صراحته ويايه

راسل : اني اعتذر لو كلامي كان بي احراج الج ، اعرف انتِ هسة تكولين علية هذا ملطلط وماعندة غيره هلي كاعد يغازل بنات العالم وبوقاحة هم بس صدكيني اني مو هيج وبحياتي ما تجرأت احجي ويه بنية وتكدرين تسألين عليه كل الطلاب الي هنا

ديمة : لعد ليش كاعد تحجي وياي لو اني ولد

راسل : ديمة من الاخير انتِ عاجبتني

ديمة : ارتبكت من كلامة ماتوقعته يكون صريح لهالدرجة ، كمت بسرعة وهو كام وياية

راسل : رجاءًا لتفهميني غلط بس اكعدي واسمعيني خلي اكمل كلامي وعود روحي وصدكيني ما راح اضغط عليج بعد

ديمة : كعدت وادية يرجفن اريد اسيطر عليهن ما اكدر

راسل : يا بنت الناس اني رجال لا احب الف ولا ادور اني من اول ماشفتچ عجبني شكلج ومن كمت اشوفچ اكثر من مرة واسلم عليج و بدون ما انتبة على نفسي كمت اركز على ابسط تفاصيلج ، مشيتج ، طريقتج بالكلام ، وكلشي بيج ديمة اني احبچ

ديمة : ضليت صافنه بوجهه اريد حرف واحد يطلع مني ماكو 

راسل : لتباوعيلي هاي الحقيقة ديمة اني احبج ونيتي وياچ زواج ومستعد اتقدملچ اليوم قبل باجر ، اني رجال مهندس عمري 26 اكبر اخوتي وكاعد اشتغل على نفسي واكونها ومنتظر وحدة اسمها ديمة كاتل روحي عليها بلكي تحن عليه وتحبني مثل ما احبها ، وهسة اني الي اعوفج تفكرين بالموضوع ومستعد انتظرج لحد ما تحبيني

ديمة : عافني وكام بعد القنبله الفجرها بوجهي ، لزمت كلبي يمة كلبي حيوكف اني مو اول مرة تصير وياي ويجي طالب يعترفلي بس هالمرة مدري شبيه احس روحي ماعت كوه سيطرت على نفسي ، اباوع هبه اجتي من بعيد

هبه: شعنده راسل هنا هستوني شفته كام

ديمة : هاا قابل شعندة اجه سلم وراح

هبه : كل هالمده الكعدها هنا وبس سلام ؟

ديمة : شنو هبه هو تحقيق خوما تحقيق ، وبعدين ليش جبتي جاي اني مو كتلچ اريد كهوة باردة

هبه : والله حبيبتي رغم اني عازمتچ بس ماعندي فلوس اليوم قابل ابوية مثل ابوج يزوع فلوس مشي امرج بالچاي

ديمة : عفية هبه عوفي بابا بحاله حاطة عينج عليه كلما حجيتي وكلما كلتي ابوج ، ابوج شنو السالفة ادري كاعدة بمجاعة انتِ وكاعدة وتندبين حظج
كافي عوفي ابوية بحاله مو حتى مرضتي

هبه : هيج صار الحجي ديمة يعني قصدچ اني حسودة ، كل هذا على حساب الچاي ، جيبي لعد خلي اروح اني الظاهر صرتي تتحسسين من وجودي ولو المفروض اعرف هالشي من البداية اني مو من مستواج لهالسبب هيج تعامليني عن اذنج

ديمة : اوكفي هبه يمعودة والله مو هيج قصدي حبابه هبه اوكفي ، اباوعلها عافتني وراحت ، اوووف هسه انتِ اله تحجين شوف شلون جرحتيها ياعيني والله خطية شكد تتحسس

يربي شلون بيه مالي خلك اراضي احد هو احنه البينه مكفينه ، اليباوعلي يكول هنيالها محد يدري بينه فلسنه رحت للقاعة كملت محاضراتي ورجعت للبيت

______________________________

دُنيا : سمعت صوت الجرس يندك نزلت اركض فتحت الباب صارت بوجهي ديمة ... مديت ايدي المفتاح بسرعة

ديمة : وعليكم السلام

دُنيا : فضيها ديمة مو محلها هسه البنية محبوسة بالغرفة وبابا اجه وكلنه غلسنه وما كلناله

ديمة : زين هسة وينه بابا

دُنيا : طلع وراح لبيت عمو يحيى بالـ4 العصر المشية ، جيبي المفتاح بسرعة ،انطتني المفتاح صعدت ركض لغرفة ماما وسيلة الكاعدة بيها زبيدة ، فتحت الباب لكيتها متمدده ... هاا زبد

زبيدة : اجتي ديمة مو

دُنيا : اي لعد شلون فتحتلچ الباب ، تعاي نزلي يله حتى تاكلين شي انتِ من الصبح لسة على لحم بطنچ ، همزين اكو تواليت هنا چان صارت حالتج حالة ، وهاا لتسوين مشكله ترة امي كاعدة بغرفتها على نار واني هم كلنا بالنه يم بابا

زبيدة : لا دُنيا شنو السالفة ميحتاج توصيني قابل ما اعرف

دُنيا : حبيبتي فدوة لعقلج ، اباوعلها هزتلي راسها وطلعت كدامي

زبيدة : استعجلو بالغدة

دُنيا : اي هسه نازله اصـ..... اباوعلها وصلت للدرج ونزلت تركض بكل سرعتها يا شبيج زبيدة ، نزلت وراها اركض اباوع وصلت للصاله وشافت ديمة دنكت نزعت النعال (تكرمون) وشمرته على وجها وجيتت عليها جريتها من خصرها وووولج زبيدة شحجينه
شبيييج تسودنتي

زبيدة : عوفيني دُنيا خلي اطيح حظها

ديمة : سويتلها حنيصة مووتييي قهر بيبي والله اصلا ما اثرت بيه ضربت النعال كد ما فرحانه لان فشلتج وحبستچ صرتي شلون الجريدي تتلوين منا ومنا ومتكدرين تتطلعين وهاا صدُك هذا موبايلچ ، بالمناسبة جنت ضايجة اليوم وكعدت اكلب بي
بس عاشت ايدج طلعتي خوش تركصين شرقي

دُنيا : اباوع لزبيدة وجها صوفر وبطلت تقاوم

زبيدة : بارتباك انتِ منو سمحلج تفتشين بموبايلي وتتعديييين على خصوصيتي واصلااااا بطلي جذب ماكو هيج شي

ديمة : هاا اني اجذب لعد منو اللابس ستريچ اسود وبدي كت احمر ولافلي شال اسود على الخصر وكاعد يهزلي خصرة ، امي ؟ وبالمناسبة الحلق الخالته بصرتچ هم حلو اصبريلي اله اكل لبابا هذا شوكت سويتي ، و اذا تردين هم تنكرين كليلي حتى اسولف الباقي

دُنيا : باوعت لزبيدة ولج هاي شوكت 

زبيدة : اا ااااا هسه اني عليمن امتمت شنو خايفة منچن دفعت دُنيا وخرييي انتِ وبطلووو هالسالفة تسحبوني هالسحبه تكول راح اشرد

الركص جان عاجبني لان ينحت الجسم فتعلمته وجربت اصورة واشوف نفسي ضابطته لو لا ومن كملت حذفته للفيديو كله بس الظاهر اني ناسيه اشيله من المهملات هلي اختج كدرت تسترجعة ، والحلق من سافرنا لدبي قبل سنتين بالعطله عجبني و سويته وكافي يله

وانتِ الثانية عبالج اسكتلچ بسيطة والله لوما هسه بطل واهسي چان سويت بيج العمايل جريت موبايلي الي بأيدها وطلعت سجلت رسالة صوتية اعتذر بيها لطالباتي ورجعت دخلت للمطبخ اخذت تفاحه وصعدت

دُنيا : والغده

زبيدة : انسدت نفسي ما اشتهي ، رجعت لغرفتي وطبيت ، لطمت على خدودي عززززه عززه بعيني كون شافتني واني اتمركص شكددد ايييع اني اكو واحد يصور نفسه وهو يركص شحسيت بساعتها من صدُك اييييع

رفعت التيشيرت مالتي اباوع للحلق الخالته ابتسمت الله ستر وطلعت بس انت مبين واني اتمرن تقربت وكفت كدام المراية مسحت على حاجبي ، الحمدلله ما شافن الثقب الي هنا جان انفضحت لان بابا ميقبل نسوي هالاشياء يعتبروها عيب وبس الغير سوية تسويهن

صحيح كلها تكول عليه معقده بس اني اكو هواي امور تجذبني واحبها ، الركص بس ما احب يشوفني واحب السياقة والخيل واحب سوالف الحلق احس تنطي فد لمسة للجسم تجنن واحب الطبخ عشقييي اموت عليه عندي استعداد اضل يوم كامل بس اطبخ ، ما شاء الله عليك زبد طبايعك شي ميشبه شي

__________________________________

دُنيا : صبيت الغدة وكعدنه نتغدة بس محد اله نفس امي ما اكلت نهائي واني اكلت شوية وبس ديمة دتاكل ، ماما حبيبتي ليش متاكلين وراج دوه

وئام : والله مالي نفس يا امي وداعتچن كوه كملت دوامي اليوم ورجعت متدرن كم استمارة اليوم خطأت بيها وامزك وارجع اكتب ، بالي كله مشغول بابوجن وخايفة من هالكعدة

ديمة : ليش ماما من شنو خايفة هو اكو اتعس من الحال الي احنه بي

وئام : دخيلج ديمة استغفري الله كُلشي ولا هالحجاية الحمدلله على كل حال لنتبطر الله يخليجن هاي اني كدامجن تبطرت على نعمة الله وربنا عاقبني بصحتي فدوة رحتلحن شيصير كولن الحمدلله

دُنيا : جاوبناها الحمدلله ، اباوع لزبيدة نزلت ومسويه شعرها كصايب بعد كلبي سبحان الخلقها تخبل بس لو تبطل اسلوبها الجاف شوية ، درت وجهي لكيت امي مبتسمة بوجها ، شبيج ماما

وئام : زبد صايرة نسخه طبق الاصل من امها سبحانك يا الهي عبالك وسيلة كاعدة كدامي بشبابها

ديمة : تروح فدوة لماما وسيلة وين اكو بجمالها شجابها عليها

دُنيا : لا ولج ترة صدك تشبهلها ، اباوع لزبيدة طلعت من المطبخ وباوعتلنه

زبيدة : شكو شبيكم تباوعولي لزمت وجهي ، وجهي بي شي ، صاحتلي وئام

وئام : تعاي امي تعاي حبيبتي كعدي يمي

زبيدة : استغربت تصرفها رحت كعدت يمها اشو هاي حضنت كتافي وباستني بخدي

وئام : ليش يحبيبتي ما نزلتي تغديتي ويانه صاير وياج شي

زبيدة : هاا لا مو شبعانه واكلت تفاحه

وئام : لا يا امي ميصير ، هاج يله اكلي ولتهملن صحتجن واكلجن ابد بعد عمري انتن ما عندي قابلية بعد اشوف احد بيكم تعبان لو صايرله شي ، يله زبد لخاطري اكل

زبيدة : هزيت راسي ما ردت احرجها واكلت غصب لان شبعانه

دُنيا : كملنا اكل وشلت المواعين وغسلنهن العاملات ، صبيت جاي للكل وكعدنه نشرب احنه وخاله ام حسن طبعا خاله ام حسن احنه عاديها بيبيتنا مو مجرد دادا بالبيت وحتى هي ما متزوجة بس مسميه نفسها ام حسن وعايشة ويانه

ام حسن : خيتي ام مُعين اريد احاجيج بموضوع والله خجلانه

وئام : كولي بعد كلبي ام حسن انتِ من الاهل

ام حسن: اليوم العاملات حاچني ويردن راتبهن

وئام : حقهن والله بس هالتشوفين ياسر كام يسحك ميلحك ، خلي تنفض هالسالفه وان شاء الله ننطيهن رواتبهن قابل ناكلهن وانتِ هم بس اصبرولنه هالكم يوم

ام حسن : على بختج ام مُعين اني شسوي بالراتب اشو عيشه وعايشه وياكم والله اصلا الراتب داخذه على عيوني انتو اهلي قابل من داشتغل ببيتي متفضله عليكم

وئام : بعد كلبي ياريت لو الناس مثلج ومثل طيبة كلبچ ربي يرحمچ يا وسيلة بعمري وحياتي ما راح اشوف لا مثل طيبيتها ولا مثل طيبتج

ام حسن : الله يرحمها برحمتة الواسعة ويسكنها فسيح جنانه هالطيبه المعدله

دُنيا : اباوع لزبيدة من جابو طاري امها استهضمت وبين عليها بسرعة ، انتبهت لشفايفها دتتحرك بدون صوت عرفتها دتقرالها الفاتحة اووف يا ماما وسيلة من وكت الي رحتي وبركة البيت وسعادته راحت وياج ، ضلينه كاعدين على نار لحد ما بابا خابر ماما وكلها خلصت الكعدة وهسة راجعين

زبيدة : اقرن فاتحة لام البنين وكررن سورة الفاتحة 7 مرات بنية الفرج

ديمة : ابتسمت هاي ماما وسيلة جانت تخليني اسويها قبل كل امتحان حتى الله يسهلي واجاوب وفعلا جانت امتحاناتي تتسهل بفضل الله واخذ درجات كاملة

دُنيا : سوينه مثل ما كالت زبيدة ، فترة واجه بابا هو ومُعين اباوعلة كعد ووجها صاير دم من الحر

ياسر : كلاص مي بسرعة بنياتي

دُنيا : ركضت زبيدة جابتله واجت

وئام : طمنه ياسر شصار

دُنيا : ديسولف بابا وقاطعة مُعين

مُعين : اكلكم شنو تغديتو

دُنيا : اي تغدينه شنو انت ممتغدي

مُعين : لا متغدي قابل اسومة تطلعني بدون غدة بس هسه جعت روحي صبيلي وكثيرلي لحم

زبيدة : عوجت حلكي اسومة ، عمت عينك اي والله ولا جنك ما مخلي وحدة بنفسك كل يوم ويه وحدة

دُنيا : بدون متكلي كثري لحم والله اني من ذاتي راح اخليلك ، طبيت للمطبخ وصيت العاملات يصبله وطلعت بسرعة، اتسودن من واحد يحجي بالاكل ويكول حطولي لحم لو كثرولي فلان شغله احسها عيب وبس المشوهه والمشايف يسويها ، اجيت كعدت

ياسر : رحنا والجماعة كوه متحملينا والله لوما شيوخهم جان اكلونه بسنونهم وما الوهم الصار لولدهم مو قليل

المهم كعدتنه وحجينه هواي حاولت ابرر موقفي وابرئ نفسي من الصار لكن محد قبل يسمعني لمن انتهت الكعدة بأني ادفع فصل لاربعتهم

وئام : وشكد الفصل

زبيدة : من سمعت بابا كال الرقم لزمت كلبي يمة كل هذا بس فصل

ديمة: شدعوة بابا على هالحجي كول راحت كل فلوسك

ياسر : يا بوية هذا بس الفصل من غير التعويض مال القروض الماخذيهن الولد والي الراح يطخن ال90 مليون

دُنيا : خليت ايدي على حلكي يعني بابا حتسحب كل الفلوس العدنه على هالحجي

ياسر : هو اخذت جزء من المبلغ اليوم وبعد يومين اخذ الباقي حتى ادفعلهم التكاليف

وئام : وما راح يزود منهن شي

ياسر : لا يزود بس اني راح عن بالي الموظفين العندي بالشركة كلهم ما مستلمين رواتب وعندچ الحرس والعاملات والحدقچي وفادي وام حسن كلهم ذولة استحقوا راتب هالشهر ولازم ادفع الهم وهاي كم مليون طارن من البقن

زبيدة : بابا اذا تعوز فلوس اني عندي كم مليون بحسابي اذا تحب اسحبهن الك هم يفيدنك ، اني ما محتاجتهن وانت كل فترة تخليلي مبلغ بحسابي واني ما اصرفة فأسحبه افضل ما باقي بالبنك

دُنيا : حتى اني بابا عندي كم مليون خلي نروح باجر ونسحبهن

ديمة : والله بابا اني حسابي مصفر ماعندي ولا فلس بس اذا تريد انطيك ذهبي ... اباوعله ابتسم والله بابا لتضحك من صدك انطيك ذهبي بيعه بلكي يفيدك

ياسر : بنيات كلبي كبرن وكامن يعينن ابوهن ، مع الاسف على الظروف الجبرتني بدل ما املي حساباتچن ملايين اسحبهن

زبيدة : فدوة الك الفلوس والذهب وكُلشي ، نفسك حوالينا يسوه الدنيا وما بيها

دُنيا : يروحي انت قحط الفلوس اصلا اني واثقه منك راح تكدر توكف على رجليك مرة ثانية وتجيب عدال هالفلوس انت ياسر النوح مو شوية ترة

ديمة : بابا باوعلنه ودموعة نزلن شلون الي استهضم من كلام دُنيا كمت حضنته يا حبيبي يا بابا فدوة لكلبك الحنين والله اذا تبجي هسه ابجي وياك ترة اني حساسه مثلك

ياسر : هههه شوكت تكبرين ولج

ديمة : ما دامي عايشة تحت جناحك مستحيل اكبر

دُنيا : ابتسمت الله يحفظك ويخليك النه يا بابا ،

مرن اسبوع وراح بابا وية عمو يحيى وسلموا اهل الولد كل التكاليف الصارت عليهم وشكد حاول عمو يحيى يساعدة لكن بابا رفض رفض قاطع اي مساعدة

واكثر شي اثر بي هالفترة معارفة واصدقائة الي ياما تفضل عليها افضال على عدد شعر راسهم من وكع بشدة محد بيهم كلف نفسه يرفع حتى تلفون ويسأل عليه ويشوفه اذا محتاج شي حتى لو حجاية التنكال

السيارات كلهن انباعن بما فيهن سيارتي وسيارة زبيدة وكراج بيتنه الچان مليان ملي سيارات هسة صار فارغ والهوا يمرح بي ، مر الشهر الاول على خير وفلوس السيارات بابا ضمهن حتى يسدد للدولة اقساط القرض واضطرينا نسحب فلوسي وفلوس زبيدة الي بالبنك وانطينا جزء منهن لبابا واخذنه جزء مشينه بي امور البيت

اجة الشهر الثاني وصار موعد الدفعة الاولى والحمدلله كدر بابا يدفعها للدولة بس احنه حالتنا انتكست حيل العاملات ماكدر بابا يدفعلهن راتب هالشهر فاضطر يصرفهن هنه والحرس وحتى كلاب الحراسة العدنه انطاهن بابا للحرس لان هنه كبار وتربية بيت واذا انباعن يموتن لو يأذن الي يشتريهن

بيتنا صار بارد ومو ذاك البيت الدافي الچان يلمنا عبالك بيت ثاني ، زبيدة وامي كامن يجيبن رواتبهن ويمشن بي امور البيت و زبيدة راتبها قليل كُلش يادوب يكفيها لان هي مدرسة بمدرسة اهلية وراتبها مو مثل راتب المدرس الحكومي وبفترها حتى من النادي والقاعات المشتركة بيهن بطلت حتى توفر

واجة الشهر الثالث وبابا دفع اخر ما تبقى عندة من الفلوس وكعدنه على الحديدة وما بقى عدنه على كم مليون من الفلوس الي بابا ضامهن من فلوسة مال البنك وللاسف بهاي الفترة الاشهر مرت علينه عبالك دقايق ولا حسينه بيها

واجه الشهر الرابع وعجز بابا يدبر ولو ربع قسط الشهر وامتنع انو يدفعلهم من الفلوس الضامهن ، يكول لو دفعت الهم هالشهر منين اجيب الشهر الجاي وهمه هيج هيج راح ياخذون البيت ، شكد توسلنا بي نبيع ذهبنه ورفض وحتى تعارك ويانه يكول حتى لو بعتنه منستفاد وميسدد كل اقساط القرض

فزيت على صوت ديمة ، هاا ديمة خرعتيني شتردين

ديمة : بابا يردينا وصيحي لزبيدة وياج لان اني ما احجي وياها

دُنيا : هزيت راسي وطلعت صحت لزبيدة نزلنه لكينه بابا كاعد هو وماما وبيت مُعين بالصالة ، اباوع لبابا شعرة صار كطن ولحيته طولت بهالفترة لو امي الي چان يشوفها ويانه ميصدك هاي امنه كد ما معتنيه بنفسها حتى العمر ما مبين بيها هسة صاير جوة عينها اسود وبشرتها باهته والشحوب ماكلها ، انمرد كلبي على حالهم

ياسر : تعالن بوية كعدن اريد اسولف وياجن

زبيدة : تفضل بابا نسمعك

ياسر : مثل متعرفن احنه هسة جاي نمر بفترة جدًا صعبة والظروف هبت علينه مثل ريح الصحاري منين مندور وجوهنه تجينه ، احنه بعد مو مثل قبل ، الحياة والرفاهية الجنت معيشچن بيها هسه ما اكدر بعد عليها

السفر الجنت كل سنه اسفره الچن وللدولة الي تشتهنها ما راح اكدر علية والذهب الچنت كل شهر اخذجن واشتري الجن هم ما اكدر اوفر فلوسه بعد

اني قبل لا تكبرن اجيت لهالمحافظة وية امهاتجن بطرك روحي وماكو بجيبي غير كم دينار بذاك الوكت يادوب اكدر اجيب بيهن اكل لامهاتكم والكم وهسة رجعت مثل ما اجيت اول مرة لهنا ماكو بجيبي شي غير الفلوس البقتلي من البنك هالبيت الكبرتوا وعشتو بي للاسف بعد مو بيتكم ومجبورين خلال شهر نعوفة

ديمة : وفلوسنا الي بي ما راح ناخذهن ، الدولة مو سعرته وطلع اغلى من قيمة القرض

ياسر : صحيح بس من اطقست على الموضوع طلعت الدولة تعرضة للبيع واي واحد يجي ينطي سعر اله يكفي ما تبقى من المبلغ يبيعو حتى لو بخسارة ميهمهم المهم فلوسهم ترجعلهم

زبيدة : واحنه شنو ذنبنا يبيعو بخسارة واحنه تالي الناكلها

ياسر : يا بوية انتِ عايشة ببلد تلث ارباع الناس البي تصيح يا روحي ، اذا هو اخوچن الماشاف مني غير كل خير باعني شترجى من ناس لا يعرفوني ولا متعاملين وياي

وئام : زين احنه شراح نسوي هسه

ياسر : الفلوس العندي راح ادورلي على بيت بيهن وبلكي الله واهل البيت الكالي بيت مال اوادم نكدر نكعد بي وذهبچ يمكن اخذة ابيعة وافتحلي مشروع على كدي حتى لو اسواق وعدنه راتبج وراتب زبيدة وراتبي نخلي الفلس على الفلس ونعيش ذني بنياتنا باجر عكبة معرسات وشايفات حياتهن ونبقى اني وياج مشروعنا الصغير ورواتبنا تكفينا وزايد

وئام : الحجي سهل يا ياسر بس الفعل صعب احنه منكدر نضغط مستواني المعيشي هيج وحتى لو كدرنه ممكن نتحمل يوم يومين شهر بالزايد سنة مو اكثر اني بله اتحمل بس بناتك شلون

هاي دُنيا عمرها صار 27 سنة دللناها من هي وصغيرة لهالعمر اذا متسافر كل سنة تتسودن ، وعندك زبيدة عمرها 24 سنة بس تكاليف سياراتها والنوادي المشاركة بيها ذاك الحساب وديمة الطبت 20 سنة بس مكياجها ولبسها يرادله راتبين بعد ما عيشناهن كل هالعمر بحياة مرفهى وما خلياهن يحسن ولو مرة وحدة بعازه هسة لازم نخليهن يلزمن ايدهن من كُلشي شلون متكلي شلون

دُنيا : عادي ماما اني سافرت هواي واصلا بطلت ارغب لهالسوالف فكُلش عادي اذا ما اسافر بعد

زبيدة : واني هم كملت كل كورساتي مال التدريب وحتى من جنت اروح للنوادي چنت اروح حتى اغير جو يعني الموضوع مو ذات اهمية وحتى اني بطلت صارلي شهرين ما رايحة لان كمت احسس بملل

ديمة : واني صار عندي كووومه مكياج وملابسي اذا اريد اجمعهن بجنط يرادلي شفل ياله يكفيهن اصلا حايرة وين اودي كل اشيائي يعني عادي ما راح يأثر عليه وضعنا

وئام : يعني هيج صار الحجي كلچن صار عدجن اشباع من كُلشي

البنات : اي

ياسر : وئام سواء رضينا او ما رضينا هالبيت رايح للدولة غصبًا عليه وعليج ونطلع بكرامتنا احسن ما يطلعونه بلاها وكلامي غير قابل للنقاش العاجبة اهلا وسهلا والماعاجبة يتقبل الوضعية غصب عليه وياكل تبن فوكاها احنه ما جاي نلعب ولا جاي نتشاقة احنه فلسنااا افتهمييي فلسنا ماعندييييي اعييييشكم والله ماعندييي

زبيدة : خلص بابا لتصير عصبي فدوتك الفلوس ، احنه شبعانين وعيونه مليانه وانت ابد ماقصرت ويانه من فتحنا عيونه على هالدنيا لهاليوم فلتخاف العينه مليانه متأثر عليه هيج ظروف المهم انت موجود ويانه ونصيح ونمسي على صوتك قحط الفلوس نجيها مرة ثانية هذا اختبار من الله واحنه كده ان شاء

دُنيا : اباوع لبابا حضن زبيدة وبجة

ياسر : ااااااخ يا وسيلة اااخ ولج زبيدة صوتج وريحتج نفس ريحة امج اي والله نفس الريحة يا بوية يا وسيلة وينج عني تعاليلي انكسر ظهري يا بعد روحي المن عفتيني ورحتي المن تعاي قويني اني محتاجج اريد اليطبب عليه ويكلي ياسر كلشي راح يمر على خير ، تعاي مسدي على راسي وغفيني
صارلي هواي ما غافية عيني ونايم النومه الچنت انامها بحضنچ 

زبيدة : بدموع اني موجودة يمج بابا ما راح اعوفك اني قوتك ، حمولك عليه اذا ميشيلهن ظهري احطهن على كلبي ولا اخليهن كاسرات ظهرك

دُنيا : عفتهم وطلعت برة ما كدرت اصبر على نفسي
اني حاسة بشعور بابا ، اصعب شي ممكن يمر بي الانسان لمن ينوخذ منه كُلشي هو يحبة ومهووس بي بلحظة وحدة وبابا فقد كُلشي چان يحبة بسنة وحدة
سنة وحدة اخذت كل غالي ونفيس على كلبه

من يومها واحنه خيم علينا الحزن ، الدولة انتطتنا شهر حتى نفرغ البيت ومرن اسبوعين واجه مُعين كل لبابا انه لكه بيت بنفس المنطقة الكاعدين بيها اهل اسماء وعلى كد فلوس بابا ، راح بابا شافة واجه كال البيت مابي شي بس يرادله تنظيف وشوية شغل ، احنه ما رحنا شفنا واصلا بعدنا ما مستوعبين فكرة انو خلص حنترك هالبيت ، سديت اخر جنطة من جنطي واخذت نظرة على غرفتي

هالغرفة شكد ما اشرح عنها اقصر مارست بيها كل مشاعر راودتني من فرحت جنت بيها وبيوم عرسي طلعت منها ومن جبت بقيت بيها ومن مات ابني بجيت هنا وانهاريت هنا ومن تكرمت ومشيت اول خطوة جديدة خطيتها جانت على ارضية هالغرفة
تنهدت طالعة من غرفتي رايحة لغرفة زبيدة دخلت شفتها صافنة على فراش ماما وسيلة هاا زبد استعجلي شوية لازم نطلع ونسلم المفاتيح جاوبتني وصوتها كوة يطلع

زبيدة : اخذت دشداشة امي ، كملت ماعندي شي بس هالجنطة

دُنيا : زبيدة ما آن الاوان تتبرعين بهدوم ماما للفقرة حرامات ماليات الكنتور ومحد مستفاد منهن

زبيدة : ومنو كلج محد مستفاد منهن ، ليش منو عبالچ ديهون علية هالمشاكل والظروف غير هدومها وريحتها وبعدين اني ما اسمح لحد يطخ هدومها ويغير عطرهن ولتكليلي حرام اني اتحمل الحرام ، سديت الحنطة ورحت عدلت حجابي يلة

دُنيا : طلعنه ونزلنه جوه اجوي ولد عمو يحيى ومُعين نزلوا كل الجنط

حليم : هاي الجنطه الوردية المن

ديمة : مالتي

حليم : ادري حاطة بيها طابوك شنو السالفة

ديمة : ديربالك ترة بيها اجهزة لتتكسر

حليم : اجهزة !! شنو حاطة بيها تلفزيون ؟

ديمة : لا شسواراتي وكاوية الشعر والالات التسوي شعري ويفي وايبادي واللابتوب مالتي ومال بابا ودُنيا

حليم : احلف عليج لو نبيع بس شوية من غراضچ نسدد كل قرص ابوچ

ديمة : صدُك والله اذا ابيعهن اكدر اسدد القرض ونرجع البيت

زبيدة : الذكاء وراثه والغباء موهبة

دُنيا : اباوع لحليم صفن بوجها وهز ايدة ومشى طبعا محد يصدك ديمة فطيرة وهاي طبيعتها

طلعنا برة لكينه بابا واكف برة وعيونة تلمع بالدموع وهو يباوع للبيت ويتحسر ، درت نظري على البيت ، هالبيت مو مجرد اساس بالنسبة لكل شخص عاش بي كل واحد بهالبيت اله قصة خاصة عايشها وية كل ركن من اركان هالبيت ، ياريت الصار حلم ونكدر نكعد منه
ربي ليرحمك يا مُبين دنيا واخرة وعساك بانكس حال
باوعت لعمو يحيى

يحيى : يعني ما راح تغير رأيك وتجي تبقى عندي

ياسر : لا يحيى ما اكدر عندي بنيات وين اوديهن وانت عندك ولد هم يردون ياخذون راحتهم

يوسف : عمي والله اذا شايل هم البنات نعزللكم الفوك حتى تاخذون راحتكم واحنه نحول للطابق الجوة

حليم : اي والله عمي اني حتى للبيت ما الفي يعني وجودكم بالبيت ما راح يقيدكم بالعكس

يحيى : ياسر ولدي ولدك واذا على كولتك جاي تدور راحة البنات فأني عندي بيت روح اكعد بي لحد ما الله يفتحها بوجهك

بابا حضنه وكله

ياسر : لا يخوي اذا مو اليوم اعتمد على روحي فباجر غصب عني هم لازم اوكف على رجلية ، هسة مضطر اودعك وامشي وان شاء الله كلما يصيرلي مجال امرلك ، يله اودعناكم , بابا حبيباتي روحو وية اخوكم واني راح اروح وية سيارة النقل اجيب الغراض وراكم وهم ادلي السايق

دُنيا : اجينه نروح واستوقفنا صوت خالة ام حسن

ام حسن : وين رايحين انتظروني اجي وياكم

ياسر : خالة وين تجين ويانه والله لو عندي فلوس واكدر ادفعلج راتب بعيني بس الله يشهد ما عندي امكانية بعد هلي كتلج روحي وية يحيى

ام حسن: على بختك وليدي ابو مُعين اني صارلي وياكم 35 سنة ماشفت منكم الا كل خير ومن عفت بيت النوح واجيت وياكم واني حالفة ما اعوفك لا انت ولا بزرك الكبرو على ايدي الا واني جثة هامدة

ياسر : ما راح تتحملين العيشة يا خالة خليج ويه يحيى ابردلچ راس

ام حسن: والله ما اعوفكم عسما تنطوني خبزة وبصلة

دُنيا : اباوع لبابا ابتسم ودنك باس راسها ، خالة ام حسن كُلش جبيرة بالعمر وبابا حيل يعزها

ام حسن : هاا اجي وياكم

ياسر : اذا ما شالتج عيوني اخليج على راسي انتِ من ريحة الغوالي ، يله روحي صعدي ويه البنات

زبيدة : صعدنه وية مُعين رايحين لبيتنه الجديد شايلين مصيرنه المجهول ويانه ، ضل مُعين يسوق وطول الطريق يدك اليتيمة ، ماعندي ، الراتب ما مكفيني ، مقصر ويه جهالي ، اريد واحد يعيني واحنه كلنه مغلسين عنه ولا واحد جاوبة ، اباوع لساعتي صارلنه فوك النص ساعة شنو وين راح نروح
اباوع لمُعين يطب بفروع ضيكة وكلها طسات
ضل يطب ويطلع من فرع لفرع لحد ما وصل لمنظقة
صفنتني ، بس لا هنا راح نكعد

وئام : وين جايبينه انتو

مُعين : للمنطقة البيها البيت شبيج يمة متذكرين من اجينه لهنا وكت الخطبنه اسماء

وئام : اتذكر بس ما جانت هيج المنطقة عبارة عن زبل

مُعين : الحياة تغيرت يا امي انتِ جنتي عايشة بعالم ثاني

زبيدة : وصلنا للمنطقة ووكف مُعين السيارة نزلنه اباوع شارع عبارة عن طسات وحفريات والمنطقة مبينه شعبية نوعا ما والجهال كلها حفاي ومصاليخ
هاي شنو

ديمة : عززه بعيني يا ماما هاي شنو باعن هذا كُلشي طالع منه

دُنيا : غطيت حلكي ضاحكة على ردة فعل خواتي المصدومات اني بالنسبة الي ما استغربت لان شايفة هيج مناطق بالتلفزيون بس ذني بزر نستله على كولتهم اول مرة يتطلعن

وئام : من عمى بعيني اي والله من بعد هالسنين اكعد هنا

زبيدة : عيني على طفلة كاعدة تاكل بباب بيتهم بطرك الحفاظة وحلكها كل مرك اباوع للخبزة وكعت بالكاع والوصخ شالتها خلتها بحلكها كزبر جسمي يبووو فوكاها من الكاع لحلكها عفية ذولة ميتمرضون

باوعت لخالة وئام ميخالف خالة شده وتعدي ان شاء الله خلي بابا تمشي امورة ونشيل منا بس خلي تهدئ اوضاعنا هالفترة

ديمة : اكلجن شو ذولة التمو عليه بس لا راح يبسطونه

دُنيا : مو عليج يحظي على سيارة مُعين الرياضية وبعدين لتبالغن كافي يله مصختنها وانتِ زبيدة لتباوعين للعالم هيج عيب نظراتج مو حلوة

زبيدة : عيوني عليهم اسفة والله مو لعبانه روحي منهم بس الوصخ يجبر معاني وجهي تبين هيج عفية امهات دنظفن اطفالجن اعتنن بيهم لو بس حايرات يتزوجن ويجيبن

انت هييي شجاي تسوي يمعودة تعاي وخري هذا ليروح يركع الحجارة الي بأيدة  بسيارة المحروس ويخزينه

: انجبي انتِ تفففف

ديمة : ههههه بعد عمري والله حبيتك

زبيدة : مسحت وجهي وخزرته .. امشي لك لا ابسطك والله بقه عليه بس انت  خاف اني عايزة

دُنيا : اباوع للطفل عافنه وراح مدري شنو شاور واحد يطلع عمرة يمكن اربع سنوات ويأشر على زبيدة ، درت وجهي اباوع للبيت بنائة مرتب تطلع مساحتة 100 متر تقريبا ، بنات البيت مبين حلو شتكو......
صارت عيني على الطفل الشال طابوكة جبيرة وركعها براس زبيدة يااااا عزززززه بعينييي

*************************************

لهنا يكون خلص البارت ان شاءالله يكون عجبكم ❤️
+ لتنسون التصويت والتعليق برأيكم على الفقرات❤️

شنو رايكم بالاحداث؟

شنو تتوقعون حيصير بالبارت القادم ؟

.