رواية الموت الحي الفصل الثاني عشر 12 - بقلم براء الموسوي

مرحبا حبايبي العسل شلونكم ❤️

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

احيانًا يأتي العوض على شكل صدمة لا يخضع لها العقل ولا يستجيب لها المنطق 🖤

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

#الموت الحي
#للكـاتبة براء الموسوي

زبيدة : اباوعلها رفعت النقاب وحاجتني من شفتها احس بلعت العافية وكلبي راد يوكف من المنظر الشفته

يمه هاي شصاير بيها ، اباوع لوجهها المحترگ وجفونها النازله ومكرمشه بحيث ممبين غير الشكل الداخلي للعين مالتها لو بشرتها الي جلدها مگسب

ما انكر بلحظتها خفت ومتت قهر عليها بنفس الوقت گد ما جانت مشوهه والله ما عرفتها لوما صوتها ولهجتها المميزة فلا اعرفها

اسماء : شلونج زبيدة

زبيدة : هاا الحمد احم الحمدلله

ام اسماء : اذا ابو معين موجود صيحي النا

زبيدة : حاجتني بتنتر ، جاوبتها وليش تصيحين شنو كايليج طرشه وما اسمعج

ام اسماء : مالي كلام وياج صيحي ابوج

اسماء : يمه

ام اسماء : وغمه سكتييي وانتِ شبيج واكفه بوجهي امشي صيحي ابوج عندي موضوع مهم ويا

زبيدة : يابه دولي طبكت الباب بوجها ودخلت جوه
عشتو تصيح عليه عبالها اسكتلها متدري بيه ماعندي لحيه مسرحه زايعتها لا استحي ولا اخجل

لاكتني دنيا اشرتلي بايدها وسألتني منو بالباب جاوبتها " مگديه " بس راحت

دنيا : لعد ما انطيتيها فلوس شبيج صايرة فرد مرة ماعندج احساس ، امشي صيحيلها خلي اجيبلها فلوس خطية

زبيدة : داجاوبها ورجع ندگ الجرس مرة ثانية ، اباوع لدنيا راحت بسرعة تريد تفتح الباب بس سبقتها اني ولزمتها ، لتفتحين الباب وغلسي

دنيا : باوعتلها مستغربة هاي شبيها ليش متريدني افتح الباب وانوب الجرس ما سكت ، اباوع طلع بابا من الغرفه بسرعة و ورا امي

زبيدة : طلع بابا من الغرفة يركض بس شو يخزر بيه اشرتله شنو ؟

ياسر : اني اعملج خلي يطلعون العالم اذا ما طيحت حظج اطلع كلب ابن كلب

زبيدة : ليش شسويت

ياسر : بت النعال طابكه الباب بوجهه المره وتكليلي شسويت مسويتلي روحج فقيرة

وئام : شكو شبيكم وزبيدة بوجهمن طابكه الباب متحجون شبيكم

ياسر : بعدين بعدين لاحكين نسولف

دنيا : عافنه بابا وطلع بسرعه وزبيدة وجهها صار احمر من العصبيه خير يا ستار شبيهم

اباوع دخلن ثنين نسوان اول ما شفتهن عرفتهن اسماء وامها ما انكر صدمتي من شفت اسماء وشكلهت شلون صاير لكن ما لحكت اشرح ردة فعلي بسبب امها الي دخلت تصيح وتعد وتصف حتى شدهتنه وياها ، خطية حتى ديمة نزلت تركض من وره صوتها

ديمة : شكو شكو بي شي امين

زبيدة : يا امين انتِ شبيج

ديمة : لعد شبيكم ، اباوع عززززه هاي مو اسماء ياحبيبتي هاي شصاير بيها بس لحظة هاي امها ليش دتصيح

زبيدة : الظاهر مبدله حبالها الصوتية واجتي تجربهن هنا حتى تتأكد اذا يشغلن لو لا

ام اسماء : هيج يا ابو معين بنت تطردنه وتطبگ الباب بوجهنا وهاي عود احنه اهل وعشرة عمر وياكم تاليها هيج تسوي بنتك ويانه بله اني يطبني مرض الا هالمريضة المحروگه شنو ذنبها شمسويتلكم

لا يا ابو معين ابد ما توقعناها تطلع منك يابو الاخلاق العاليه يا ابن الاصول هيج بناتك يعاملنا ليش شمسويلكم بايكيكم ، حاجين عليكم ، طاعنين بسمعتكم حتى تعاملونه هيج

دنيا : اباوع لبابا خزر زبيدة السانده نفسها على القنفه وتباوع لام اسماء باستهزاء ، جاوبها بابا

ياسر : عذريني خويه وامسحيها بوجهي اكيد زبيدة ما جانت تقصد اعتبريها بنتج وتصرفة تصرف صبياني بدون متتقصد ، تفضلي استريحي واحنه بخدمتج

ام اسماء : والله اني لو عليه يا ابو معين ما اطب لهالبيت بسبب سوايتكم بس توكف بعيني اخلاقك واكول ابو معين خوش ابوي معين ميستاهل

وئام : ليش عشتو شمسويلكم احنه يمكم كرباكم

ام اسماء : لعد هي هاي سوايه يا ام معين تدزولنه تبليغ من المحكمه حتى ابنكم يطلگ بنتي ليش شبدر منها لبنتي بشنو اذتكم

ياسر : دستريحي يا خويه وخلينه نتفاهم بهدوء هيج مواضيع مو مال نحجيها على الواكف تفضلي ، استريحي بابا اسماء

دنيا امشي نزلي اخوج وديمة بسرعة ماي للجماعة

زبيدة : راحت دنيا تنزل معين وديمة ركضت جابتلهن مي ،  وهاي ام اسماء اكلت بابا وشربته بلسانها دكت مو اليتيمة لا ابو اليتيمة هم جابته عوزها بس تنعى بس الشهادة لله اسماء ابد ما كان الها صوت خانسة من اجو لسه

اباوع لدنيا نزلت معين وهنه اول ما  الي اول ما حط الكرسي مالته بالصالة منشوف الا اسماء كامت تركض وذبت روحها عليه وكامت تبجي من كل كلبها

بس الفاجئني معين ابد ما انطه ردة فعل ولا اصلا دارلها بال ضل محافظ على ملامحه حتى ما باوعلها ونظره كله لكدام

اباوع لدنيا دنكت عليه مدري شهمستله وهو حرك راسه بسرعة وكأنه معترض على كلامها ومن شافته ام اسماء هيج كامت بسرعة وسحبتها منه

ام اسماء : كومي يمه كومي كافي تذلين نفسج احنه الميريدنه منريدة ، ليش هيج يا معين تسوي بام اولادك الجانت شايلتك بالصلوات ومددللتك دلال

فوگ ما متحمله بزرگ ومكسراتك وكاعدة وساكته حامدة ربها وشاكرته تالي شحصلت منك ومن بزرك غير الالم والاذيه وهياتها كدامكم مشوهها خسرت صحتها وجمالها بسبب منو مو بسببك وبسبب جهالك تاليها هسه جاي تريد تلطگها

معين : اولا جهالي مالهم اي علاقة لتجيبهم بالطاري وثانيًا موضوع الطلاك محسوم وما منه رجعة

ام اسماء : ليش غير نفتهم شمسويتلك وينك يابو معين متحجي ويه ابنك

ياسر : معين اكعد ويه مرتك وتفاهموا عسى ولعل توصلون لنقطة تفاهم

معين : بعصبيه عمييييي ما ارييييدها هيييي كوه

ام اسماء : هسه كمت متريدها بعديش بعد ما خذتها وردة مفتحه وهسه ذبيتها علينا مشوهه لامن ايد ولا من رجل

وئام : كافي لهنا وحدج شبيج طبيتي علينا مثل القضى المستعجل اكلتينه وشربتينه ، يختي الزواج مو اجبار ومو اول ثنين همه ينفصلون ولا اخر ثنين

وليش تذبين اللوم على ابني شنو قابل هو الحرگها لو هو الوصلها لهالحال خافي ربج ولتضلين تذبين بلاج علينا ابني خلص قرر ينفصل عن بنتج شنو جبر تردي يتراجع عن قراره

وبعدين انتم هستوكم تذكرتو عدكم نسيب وين جنتوا الشهور الفاتت بجذب ما واحد منكم رفع تلفون وكال خلي اسال على نسيبي شبي مابي ميت عدل منين جاي يدبر علاجه واهله بهالحال ، بله مرته ما عليها عتب نكول جاي تمر بظروف صعبة والله يساعدها ويصبرها

الا انتوا يالاهل وينكم عن نسيبكم والي بمقام ابنكم لا تخابرون ولا تسألون عنه لو بس يعرف رجلج المصون هو وولدج بداية كل شهر يحركون الموبايلات علينا حتى ندز مصرف وفلوس لعلاج بنتكم

بمصالحكم تتذكرونا بس وكت الشده والسؤال محد يندل بيتنه وين ولا ارقام موبايلاتنا شنو ، ناس متستحي بس وكت المصلحة تعرف اوادمها

ولج احنه بعز شدتنا وابنه تگرم وخسرنا احفادنا وميمر علينا يومين اذا مو احنه يمكم حتى نطمئن على بتكم وانتو بالجذب كلاص مي ما واحد بيكم احترمنا وجابلنا

وسودة عليه ام حسن اذا اجتكم محمله تفتحولها الباب وتدخلوها واذا اجتكم ايدها فارغة تشوفوها بالكامرات وتغلسون عليها لمن تروح وهي عمت عيني عليها توكع اديها لمن تأيس منكم ياله ترجع

خاف عبالج احنه منفتهم لو منعرف اوادمنا شنو جايتني هسه عشتو تعاتب ولسانها شطولة عبالها تاخذنا بصوتها العالي شلون ناس 

زبيدة : يمه وئام شسوت بأم اسماء خلتها بعد متعرف تحجي والنبي بلحظتها ردت ابوسها لان فشلتها فشلة تسوه حياتها

ولو نجي للامانه كلامها صحيح معين صارله شهور طويلة من تگرم وصار بهالوضع ولا واحد من اهل مرته رفع موبايل وسأل عنه بس وكت اليحتاجون فلوس يخابرون على بابا هم مو على معين

ام اسماء : ابو معين انت راضي على اتهامات ام معين النا قابل تحجي علينا هيج ؟

ياسر : والله يا اختي السالفة اخذت اكبر من حجمها بهواي المفروض لا انتِ ولا احنه نتدخل بالهالموضوع الا لو سمحولنا اصحاب الشأن نتدخل ومثل ما جاي تشوفين معين مصر على موضوع الانفصال

واني بالله ما بأيدي شي ولو اكدر ااثر عليه ما اقصر بس شوفة عينج الولد مصر وماخذ قرارة ومتمسك بي فما بأيدنا شي غير ان نطلع بالمعروف مثل ما دخلنا بالمعروف

ام اسماء : واني بنتي متريد تتطلگ

معين : بعصبية وداعة جهالييييي الكسرو ظهري يلو يبقى اخرررر يوم بعمري ما اخليها على ذمتيييي والله والله لو مو متقبل لو يشرحوني هم اطلگها

ام اسماء : اذا هيج طايبة نفسك منها ميخالف طلگها بس بالاول انطيها كل مستحقاتها وانوب عود طلگها براحتك

ديمة : من حجت ام اسماء كل احنه صفنه وواحدنه كام يباوع للثاني وكأن افتهمنا هالهوسه والبجي على شنو واصلا الغايه من هالجيه انعرفن ليش وعلمود شنو

وئام : مستحقاتها من اي ناحية بلا زحمه

ام اسماء : اني بنتي متريد تتطلك وابنكم يريد يطلكهت رغمًا عنها وهو الي بده فالمفروض ينطيها مؤخرها كامل هذا حقها بالشرع والقانون

وحسب الشرع والقانون عقدها جان مكتوب بي انُ لو حصل طلاق مؤخرها يكون بيت ، فاذا تردون تطلكون طلكوها بس انطوها البيت

وئام : ههههه يابه وداعتها لوسيلة الما فديوم حلفت بيها جذب يعرفت جيتجن لهنا علمود المؤخر بس جنت ساكته ومنتظرة هالتمثيله تخلص وتنطقنها للدره

ها ياسر اني شكتلك من جنه بالغرفة مو كتلك هسه يطلعن مخابراتك علمود المؤخر يردن البيت يبعد گلبي

ديمة : همست لزبيدة ليش معين منطي مؤخر لاسماء بيت

زبيدة : اي الظاهر الحماس جان ماخذة بوقتها ودبس روحه بهالسالفة

ام اسماء : والله يا ام معين احنه ما طالبين شي عيب ولا شي حرام شرع الله والقانون ويانه واذا تردون نطلع بالمعروف اي ليش منطلع نطلع واحنه الممنونين بس نستلم حق بتنه بالاول

معين : واني موافق انطيها كل مستحقاتها بس جفوني شركم

وئام : انتتتت مخببببل ولك شنو موافق 

ام اسماء : ابو معين يالنشمي خليك موضع خير واحجيلك كلمة حق تقبل مرتك تحرض ابنك على طليقته حتى مينطيها مستحقاتها

وئام : عشتووو انوب صارت طليقته مو قبل شويه خبصتينه واهئ اهئ مرته وتريده لعد شو هسه سويتيها طليقته

ام اسماء : يعني ابنج اذا ميريدها شنسوي نحب الايادي لو نمشيلكم عشاير يمة

دنيا : اباوع لام اسماء الي اجتي متحامية واستلمتنا بقال الله وقال الرسول وحجت صلة الرحم وكالت الاخلاق والخ من المثاليات المصطنعه هسه نفشت ريشها لا وكامت تحجي معلگ ويانه لا وترد على امي بصلافه

واني العبالي صدُك متريد معين يطلگ بنتها اثاريها جايه ومتعشمه بالبيت

ياسر : خلاصًا للحجي وفضًا لهذا النزاع المبين ماله حل يفضل انُ يتم الانفصال بين ابنا وبتكم حسب الاصول واكيد احنه ناس نخاف الله ولا يمكن ناكل حقها لتخافين خويه توكلي ومن باجر بقوة الله راح نمشي بالمعاملة ونسجلة باسمها واعتقد بهالطريقة احنه طلعنا من خاطرها لو شتكول معين

معين : هاهي حجي كلامك عين العقل وشتكول اني وياك

ياسر : هاهي خويه اعتقد لهنا احنه اتفقنا وما بقى الا نمشي بالاجراءات الرسمية

ام اسماء : بعد روحي يابو معين من رحتلك سبع فدوات متقصر يغالي بس اسمحلي اضيفلك معلومة ترة بالعقد مكتوب الغايب مالتها بيت ومثل ما تعرف يا ابو معين من بعد الحادث الصار البيت احترگ وصار حاله حال العرصة والغايب يا عيوني بيت مو عرصة
وانت اعرف بهالسوالف بعد

زبيدة : هزيت راسي وضحكت عجيب شكد شفت ناس صلفه وطماعة بس هيج ناس والله ما شفت

دنيا : باوعلي معين وكأنه يريد يوصلي الفكرة الي بباله واني هزيتله راسي مأيدته وهو تنهد وجاوب ام اسماء

معين : ومنو كلج اني راح انطيها هالبيت لتخافين الخير هواي والحمدلله عندي بيت ثاني كامل مكمل خدش مابي وان شاء الله راح احوله باسمها المهم عندي ننفصل باسرع وقت

وئام : معين

معين : رجاءًا لحد يتدخل اني حاسم الموضوع من زمان واذا البيت يخليني ابتعد عن هالناس واطلع من هالعلاقة السامة فاني موافق

دنيا : اباوع لام اسماء الضحكة ملت وجها ولفت نظري اسماء الي من اجت ما وكفت دمعتها بس سمعت انُ معين عنده بيت ثاني و راح يحوله باسمها استبشرت ملامحها

ما انكر إني انصدمت من موقفها يعني اليشوفها وهي تبجي قبل شويه ميشوفها وهي هسه تضحك ومبينه الضحكه طالعة من كلبها ، معقولة الفلوس هيج مهمه وتنسي البني آدم احبابه ، لعد اني ما نستني ضناية الفلوس ؟

فززني صوت ام اسماء

ام اسماء : يله خويه احنه نترخص لازم نرجع لان اجينه بدون علم الحجي واذا دره بينه اجيناكم يكلب الدنيا واحنه هسه على اتفاقنا مو ؟

ياسر : اكيد

ام اسماء : لعد هاهي متفقين ، يله من رخصتكم نرفع الزحمه لان تاخر الوقت وهاا تره يابو معين اني لو عليه فلس احمر ما اخلي بنتي تاخذ بس هالتشوف حالتها واحنه ماعدنه نعالجها على الاقل بفلوس المؤخر مالتها بلكي نسفرها تتعالج وعسى ولعل ربك يكتبلها بداية جديدة

ياسر : ان شاء الله

زبيدة : طلعت ام اسماء هي واسماء و وئام استملت معين لعبت بي لعب بس هو ابد ما انطى ردة فعل مجرد رجع راسه على الكرسي وتنهد بصوت عالي
راحت دنيا صعدته فوگ ، هالايام صايرة هي ويا حبايب على غير العادة

واني ابد مو استغلاليه من شفت الوضعية متوترة طفرت فوگ حتى ليلكفني بابا ويطيح حظي ، طبيت للغرفة وكعدت على الجرباية ، اباوع للساعة خرب شبسرعة صارت الدنيا ليل وفوكاها باجر عندي كومة شغل ولازم اكعد من الفجر في سبيل الحگ

اباوع لدنيا دخلت وسدت الباب ، اجت ونامت على رجليه ، مسحت على راسها ، شبيج ؟

دنيا : انقهرت على معين سودة عليه سنة وحدة خسرته الفوگه والجواه لا بقاله ضنا ولا مرة ولا فلوس حتى صحته خسرها

زبيدة : لعد شعبالج الله غافل ، اللهم لا شماته

دنيا : معقولة زبيدة انتِ ابد متعاطفتي ويا ؟

زبيدة : بصراحة اني متعاطفة ويا بنسبة 0.1 % علمود عمار وايثار سودة عليه وما متعاطفة ويا بنسبة 99.9 %

دنيا : عفيه شكد قاسية انتِ

زبيدة : احسن الطيب بهالزمن ميعيش

دنيا : اي والله بهاي صدقتي

زبيدة : داحجي ويه دنيا بس سكتت من دخلت ديمة للغرفة بايدها موبايلها ، تفتر وتحجي مدري ويامن

دنيا : هاي شبيها تفتر دوختنا

زبيدة : علمي علمج

ديمة : دادا شوكت تجين ، ها يعني باجر تجين ، طيب امين شلونه صار زين لو بعده ؟ يا عيني ياعيني شوف المسكين زين اكل لو لا ياعيني خطية والله ميستاهل

وخالة ام امين وبصائر شلونهم ، سلميلي عليهم وكليلي ديمة تكول الله يصبركم ويكوم امين بالسلامة وان شاء الله اول ما يطلعوا راح اخلي زبيدة تسوي من الكيكة مالتها واجيبها الهم بمناسبة سلامة امين

زبيدة : تقرر بكيفها وجه النعال تريد تصير صاحبة واجب براسي

دنيا : هههههه هاي بعد ديمة وسوالفها مو غريبة عليها هالطلعات ، اباوعلها غلقت الموبايل واجتي كمزت على الجرباية برشاقه وتنثر بشعرها الاشقر ابتسمت حبيبتي فدوة لكلبها تخبل عيني باردة عليها

زبيدة : اكلج حضري روحج حتى ترحين ويايه باجر من اودي الاكل لبيت عمو يحيى

ديمة : سوري زبيدة ما اكدر اجي وياج

زبيدة : ليش يمة ؟ مو عندج عطلة

ديمة : صح بس داريد انتظر دادا حتى اروح اشوف امين  

زبيدة : رفعت حاجبي متحسين نفسج هواي مصختها بخصوص امين مو احسج مركزة ويه الولد زيادة عن اللزوم

دنيا : بصراحة حتى اني داشوف وضعيتج مو مريحة هالفترة واهتمامج الماله مبرر بامين صار اوفر

ديمة : باوعتلهن هاي شبيجن !! لتضلن تسون افلام من راسجن ترة ماعندي شي ويه الولد بس هو صاحب مواقف ويايه وكُلش لطيف واخلاقة حلوة واني ويا شبه اصدقاء فكُلش عادي انقهر وازعل

زبيدة : شنو يمة ؟ شنو حبيبتي ؟ اصدقاء !! واحنه من يمته مسموحلنه نكون صداقات ويه الجنس الاخر شنو بابا يسمح بهالشي واني ما ادري ؟

ديمة : والله مو هيج قابل اني ما اعرف بطبع بابا وشلون ميقبل بس اقصد انُ الولد كُلش حباب وهيج كيوت وينكرط كدما لطيف وحنين ولج شايفته شلون يعامل اخته والله من اشوفه شلون يحاجيها اتمنا اخويه حتى يهتم بيه هيج

غير هيج اكثر من مره يصير ويايه شي وهو يجي يساعدني بدون اي مقابل وفوگ كل هذا ميخلي عينه بعيني ولا فد يوم شفته باوعلي بنظرة مو حلوة على عكس الطلاب الي وياي اذا طلبت من واحد منهم ملزمة يضل صافن بوجهي عبالك مشايف بنية على عكس امين متتخيلين شكد جنتل وخوش ولد

ولهالسبب تشوفيني احترمه وانقهر عليه وتره ماكو بيني وبينه حديث غير السلام لهيج اكول انُ احنه شبه اصدقاء مو اصدقاء

دنيا : اباوعلها شلون من تسولف عيونها تلمع وتلعب بشعرها ههههه المعزايه مفصلة الرجال تفصل وانوب دك موبايلها طلعت من الغرفة بسرعة

درت وجهي على زبيدة لكيتها صافنه بالفراغ ، ندستها هاااا زبد شبيج

زبيدة : هاا لالا ما بيه شي بس هاي ديمة متجي ويايه باجر فشلون بيه ما ادبرها اودي كل هالاكل وحدي

دنيا : اذا تردين اني اجي وياج  ، اباوعلها فزت وعاطت بيه

زبيدة : لالا لتجين اني ادبر روحي

دنيا : هاي شبيج تره اذا علمود مرت يوسف فعادي الموضوع ميشكل فرق عندي وبعدين شبيج تبلعمين
قابل اذا رحت وياج شراح اسوي ؟

زبيدة : لا مو هذا قصدي بس ما اريد اضوجج واتعب نفسيتج 

دنيا : لتخافين عليه مو طفلة وما اكدر اسيطر على نفسي ، يله اعوفج واروح يم معين شويه

زبيدة : صايرين حبايب هالايام ، الله يثخن لبنكم

دنيا : للامانه ترة معين هالفترة صاير كلش لطيف لو تتقربين منه راح تشوفين شخص مختلف تمامًا عن معين القديم

زبيدة : لا يشوفني ولا اشوفه چفيني الشر وطلعي وسدي الباب خليني انام ورايه كعده الفجر وهم حسبي حسابج اكعدج ويايه لان ما الحگ وحدي

دنيا: من عيوني

__________________________________

ديمة : جنت كاعدة بالصاله دابرد اظافري واصبغهن ، يمكن احلى عادة عندي من اضوج لو اكتأب اكعد اعتني بنفسي وهذا اكثر شي ايجابي بشخصيتي

اهتز جهازي معلن عن وصول اشعار ، سديت الصبغ وتفخت اظافري حتى ما اوصخ الموبايل ، نشفتهن واخذته لكيت رسالة من هبه محتواها انُ عدها عرس وتريد فستاني الذهبي لاختها بس اختها تريد تشوفه قبل لتستعيره مني

جاوبتها ياهو منهم ؟ جاوبتني

هبه : ولج شبيج هذا اليلمع الشوفتيني يا مرة

ديمة : ولج عندي كومة فساتين بهيج موديل ولون وكلهن ماخذه بيهن صور

هبه : ولج هذا المابي حمالات

ديمة : هاا تذكرته اوكفي خلي ادزلح صورتة ، رحت للستوديو طلعت صورة الي بهالفستان ودزيته الها
كتبتلي

هبه : عمي دباع الفلوس والذهب شلون يحلن طالعة لعبانه الادبسز

ديمة : ههههه انجبي ولج اني جميلة من گاعي فديتني

هبه : ستر الله على المكياج والصبغ

ديمة : من شفت رسالتها ابتسمت بخبث وفتحت شاشه الكاميرا واخذت سيلفي بوقتها جنت لابسه تراك احمر حمالاته رفيعة وجنت شايله شعري كبايه وما خاله مكياج ، اخذت الصورة ودزيتها الها
وكتبت ، اتحداج تاخذيهن مثل هالصورة وتطلعين بجمالي

هبه : عمي شهالكيك اسحب كلامي وين اكو بجمالج انتِ

ديمة : ضحكت ورجعت ادردش وياها شكد نتعارك سوه بس ما انكر مستحيل اكدر اتقبل صديقة غيرها احسها قريبة مني لدرجة اذا تعاركت وياها احس يومي ناقص ، ضلينه نحجي لمن نعست عفت الموبايل وكمت صعدت فوگ حتى انام

_____________________________

زبيدة : جنت نايمة وشفت نفسي بغرفة ظلمة هندس و ماكو غير ضوه القمر الخافت داخللها من الشباگ

كمت من مكاني مفزوعة واني احاول المح شي بهالغرفة الظلمة ، ما جان مبين منها غير حيطانها السودة والمتآكله ، باوعت لنفسي جانن اديه بيض الى درجة الشحوب شلون عبالك المريضة

باوعت لملابسي جنت لابسة دشداشة بيت لونها ابيض باهت بس مو مريحة ومبينه قديمة ، بلعت ريكي ياربي اني وين

تلفتت بارجاء الغرفة عسى ولعل المح شي بس استوقفني صوت كرسي هزاز يتحرك صادر صوت ضجيج مزعج بالمكان درت وجهي بسرعة مفزوعة

شفت كرسي خشب كدام الشباك ومتسلط عليه ضوه القمر ويتحرك بسلاسه وكان جالس عليه شخص ما مبين منه بس خياله

حاولت اتقرب بس ما كدرت احس وكأن الارض مثبتتني ومانعتني من الحركة ، ركزت بنظري على الشخص الكاعد على الكرسي ما كان مبين منه شي واضح غير كف ايدة المرسوم عليه بشكل واضح
عقرب اسود وجبير على طول كف اليد

حسيت نفسي رخيت وكدرت اتحرك ، تمشيت بهدوء متقربة من الكرسي المازال يتهز وما توقف لحظة وحدة واول ما وصلت يم الشخص الراقد على هالكرسي ، دنكت راسي حتى اشوف منو هالشخص واول ما حنيت راسي ما حسيت الا والايد الموشومة ترتفع بسرعة وتخنكني

وعلى اثر هالموقف كعدت من النوم مفزوعه ولازمه ركبتي ، اعوذ بالله من الشيطان الرجيم ، اعوذ بالله منك يالشيطان ، بسم الله الرحمن الرحيم ، ياربي دخيلك شهالحلم هذا

باوعت للساعة جانت الساعة بالاربعة الصبح ، فتحت اللايت اليمي وجهته على خواتي شفتهن نايمات ، تنهدت الف الحمدلله طلع الشفته فعلا مجرد حلم

وخرت الغطه وكمت من فراشي واني اتعوذ من ابليس واحس الرجفة لسه بجسمي ، كعدت دنيا ونزلنا جوه
سولفتلها الحلم

دنيا : احتمال لان تعبانه شفتي هيج

زبيدة : تنهدت واني اثرم البصل ما اعرف دنيا والله ما اعرف بس احس نفسي حيل تعبت بسبب هالكابوس
متتخيلين شكد جان احساسي بي حقيقي لدرجة لحد الان احس بملمس الايد الشفتها على ركبتي

دنيا : تعوذي من الشيطان واستهدي بالله شجاج حبيبتي ، عفت الي بأيدي واجيت حضنتها ، اهدي حبيبتي شبيج ترجفين واديج باردة

زبيدة : ما اعرف بس اول مرة يصادفني هيج كابوس

دنيا : يمكن لان سمعتي اغاني قبل لتنامين صارت عندج طاقة سلبيه وترجمها دماغج بهيج منام

زبيدة : الظاهر هيج ، حاولت اشيل هالكابوس من راسي وفعلا ما مرت ساعة الا واني راجعة لهمتي بالشغل ودنيا ويايه ماكو للتسعة الصبح احنه مخلصين الوجبات الرئيسية وما باقي عدنه غير المقبلات والحلويات مجهزيها بس نشويها

وانوب كعدت ديمة وصارت تشاركنا هي ووئام وهذا الفاجئني انها ساعدتنا على الساكت وبابا راح يجيب امين لبيتهم

زبيدة : تعالن شوفن الحمص بطيحنه هاهي

ديمة : شو ، ضگته اي عاشت ايدج يخبل

زبيدة : خوش لعد ضوگي باقي المقبلات علما اروح اشوف الكليجه والبتيفور شصار عليهن هنه والبقلاوة والبرمه رحت ركض للفرن طلعتهن استشقت افيييييش يمه بعد بس الداطلي دنيا واكفة تغطسه بالشيرة والكيك اني من الصبح خلصته وعفته بالبراد

رجعت اكمل لحد ما صارت الـ11 بدينه نغلف الاكل اني وخواتي ومعين جان كاعد ويانا بالمطبخ ولازم دفتري وكلما نكمل حاجة ونطلعها يشطب عليها حتى مننسى شي

وئام ضلت تغسل المواعين وتصفي المطبخ خطية كربناها كربه من كربه اليوم ، خابرتني خالة رميم تستعجلني وفعلا رحت بسرعة بدلت ودنيا ويايه

كملنا وبدينه نطلع الغراض لبره وهمزين بابا گل لابو كاظم المصلخ يتكفل بينه بواسطة سيارة جبيرة وبكروته ، صعدنه ويا بس فاحطين من التعب ، طلعت بطل مي من الجنطة شربت وانطيت لدنيا

دنيا : اوف يمة هلكنا

زبيدة : اي والله بس ميخالف الفلس يستاهل

دنيا : ضحكت وباوعت لكاظم الي لابس فانيله خضرة وبجامه برتقاليه وحلكه كله دبگ مبين عليه ماكل مصاص او شي حلو ، ابتسمتله حبيبي شحلاته بس حرامات امه هاملته هيج ليش متسبحه وتعتني بنظافته والله يطلع يخبل

اباوعله من شافني ابتسمله خزرني بعيونه واشر عليه

كاظم : ولج شو انتِ تباوعيلي وتضحكين شني شايفتني قرد

دنيا : هههه لا حبيبي حشاك تخبل انت ليش هيج تكول على نفسك

كاظم : مو عبالي حتى العب هذا على راسج

دنيا : اشر على نعاله وابو ضربه راشدي ، بسرعة صارت عندي ردة فعل وعطت بي ، ليييييش تضربه قابل هو يفتتتتهم

ام كاظم : ما شفتي شلون يحاجيج خوية

دنيا : لو شما يسوي متضربه حرام عليك وبعدين الرسول صل الله عليه واله وسلم نهى عن الضرب على الوجهه انوب تضرب طفل حباب بعد لتضربه خطية وبعد تره يتمرد عليك ويضل يضوج منك

زبيدة : طبعا دنيا فشلة ابو كاظم فشلة تسوه حياته بصراحة يستاهل لان ضرب الطفل راشدي صوفرله اذانه خطية

انوب هو عاف ابو وكمز كعد يمنه وره باوع لدنيا وابتسملها لان دافعتله ودار وجهه عليه وتفل بوجهي

كاظم : كل من وراج ام حلگ الاجكم تتتتف

زبيدة : مسحت وجهي وباوعت لدنيا طبعا شكد شايفه سرابيت مثل هالسربوت ما شفت

دنيا : هههههه خرب يومج زبيدة حاطه عقلها وعقل الطفل انوب خطية استلمها الطريق كله يكرص بيها ويتفل عليها وهي متكدر تحجي حتى ابو ميضربه اخر شي زهكت ولكطته عضه بأيده خلته يفرفح الادبسز

زبيدة : ايييع ولك شو ايدك مالحه

كاظم : ههههه اييييي حيييل بيج والله جنت بالحمام وما غسلت تستاهلين ههههههههه

دنيا : اباوع لزبيدة خطية كامت تهوع ونزلت من السيارة وضلت تتقيئ والله رغم الموقف يقهر بس خربني ضحك انوب كل عقلها ضلت تتمضمض وكل ساعة مهوعه شسوه بيها هالكاظم طيح حظها والله
ههههه

وصلنه لبيت عمو نزلت قبلها ونزلتها

زبيدة : اخ يمة ولج متت ، اول ما شافونا الحرس فتحوا الباب واجوي ساعدونا ، دخلنا الاكل من باب المطبخ وتلكتنا خاله رميم بالباب

رميم : هلا بعد روحي هلا نورتني يمه تعالن دخلن تعالن

زبيدة : بوسناها ودخلنه احنه والحرس خلينه الاكل بالمطبخ ، بدينه نرتب الغراض اني ودنيا ودخلن علينا جناين خالة رميم ابريز مرت علي وجمانه مرت كريم وسهير مرت جياد

انتبهت على جمانه وسهير اول ما شافن دنيا ركضن عليها يحضن ويبوسن بيها والله حتى بجي بجن واختي جنها مطي صافنه بوجوهن مجرد بس حضنتهن وسلمت عليهن بس مرت علي ما تقربت

ست ابريگ استغفرالله اني ما احب اتنمر على احد بس مرات اكو ناس غثيثه مثل هاي متنبلع عفيه الله يساعد علي عليها شكد مزعجه ومغرورة لان ابوها وزير سابق عشتو فد قندرة همزين حرامي

اجن البنات سلمن عليه سلام حار وكالعادة جمانه تاكل الواحد اكل بالسلام وسهير مثل النسمة محد يسمع صوتها بادلتهن السلام

وذيج لبستها لبسة النعال حشا السامع لان ما سلمت على دنيا عشتو هم عايزني اسلم على وحدة متسلم على اختي

رجعنا نرتب الاكل وهنه ويانه خطية ما عافنه وللامانه اني لو غير عائله اسلم الطلبيه وادير وجهي واروح بس بيت عمو يحيى يختلفون وبنفس الوقت اني كُلش احب خاله رميم وما اريد اتفشل وياها اليوم بأي شكل من الاشكال

دنشتغل ودخل علينا حليم يبووو اجه سلم علينه وضل يبحوش بالاكل شكد اكرههههه هاي الحالة اتخبل من واحد يمد ايده على الاكل ويلكط بحيث يخرب ام منظرة

حليم : شلونج زبد

زبيدة : اسمي زبيدة وكافي تلكط باللوز خربت منظر  البرياني

حليم : العفو عيني العفو يابه ما ادري بيج متقبلين

زبيدة : باوعتله صفح شكد خفيف ، رجعت اكمل ودنيا وياي بس خنست فرد خنسه ، داشتغل وتذكرت شغله خرب شهالنسوه ، باوعت لحليم واشرتله بعيوني لبره

خالة اني حروح للحمام وتره كملت كلشي بس شيلوا الاكل على كيفكم وانتِ دنيا لترحين لمكان انتظريني هنا بالمطبخ حتى نطلع بسرعة خوش

دنيا : باوعتلها باستغراب هاي شبيها قابل وين اريد اروح مثلا ، ضليت كاعدة بمكاني بس اللفت نظري سرى ما شفتها اجتي ابد ، بعدين تذكرت اليوم سبت واحتمال يكون عدها دوام

زبيدة : طلعت بسرعة وحليم يمشي ورايه وكفت يم الدرج واشرتله يتقرب

حليم : شبيج زبيدة خوفتيني صاير شي ؟

زبيدة : لا ماكو شي بس يوسف وين ؟

حليم : والله ما اعرف اعتقد كاعد بالحديقة الخارجية مالت البيت تدرين بي ميحب الهوسه بس ليش

زبيدة : هيج ، عفته ومشيت بسرعة طالعة برة

دنيا : ضليت كاعدة فوك النص ساعه بالمطبخ وحدي وزبيدة لسه ما اجت ، انوب اخابرها مترد وهذا ابو كاظم خبصني

كمت سألت العامله عليها كالت شافتها بالحديقة ، استغفر الله يا زبيدة اكيد هسه الكاها كاعدة تسولف ويه عمو يحيى ، طلعت بره بس ما اندل هذا بيتهم جديد مو نفسه الجنه كاعدين بي فكلشي ما اندل بي

طلعت من باب المطبخ صارت على جانبي حديقة رحت الها ومن وصلت لمحت زبيدة واكفة هي ويوسف يحجون صحتلها حتى تنتبهلي

بس شفتهم اول ما سمعو صوتي داروا وجهم عليه بس شنو ثنينهم وجوهم صار لونهن اصفر وكاموا يبلعمون

خو زبيدة حتى حلكها صار ابيض ما انكر استغربت الوضعية يعني ليش من شافوني ارتبكوا

زبيدة : هاا دنيا صحتيلي

دنيا : اي ابو كاظم بالباب وكاعد يستعجلنا

زبيدة : اييي اي يله تعاي

دنيا : جرتني بسرعه وطلعنه بس طول الطريق اشوفها متوترة وتحاول تهدئ نفسها ، سالتها شو ما شفتج اخذتي فلوس من خاله رميم

زبيدة : لا اخذتهن اول ما وصلنا لتخافين

دنيا : هزيت راسي وسكتت رجعنا للبيت بوجهنا نمنا وما كعدنا الا بالليل وهم تعشينا وكعدنا شويه ورجعنا نمنا لـ ثاني يوم ، خو اني كوه كمت الساعة بالسته بعد بيه نعاس

بدلت ورحت للشركة واول ما وصلت توالى عليه الشغل وهالمره عمو يحيى ما موجود خابرتني زبيدة وكالت رايح هو وخاله رميم لكربلاء اليوم مو زبيدة الشرقية نيوز خرب يومها ماكو شي متعرفه

بس احلى شي انُ يوسف ماخذ مكانه بالاجتماعات اليوم فخلصنا من نگه ومغثته وهذا شي كفيل يخلينه مرتاحين طول الدوام 

عواطف : حبيبتي دنيا بلا زحمه عليج اذا ماعندج شي عادي تودين هاي الوثيقه لاستاذ حليم لان والله عندي كومه ملفات داكملهن

دنيا : ابتسمتلها اي حبيبتي عادي جيبيها ، كمت بسرعة اخذتها وطلعت متوجهه لمكتب حليم ، طبعا خطية حليم مكتبة اخر مكتب بالشركة عازلي عن كل العالم ومحد يدخله غير بس وقت الاكو شي يتعلق بمسئلة قانونيه تخص الشغل

وصلت للمكتب ، دكيت الباب بس ما اجاني صوت رجعت دكيتها حيل بس الظاهر ما موجود ، خابرت عواطف ، الووو عواطف يمكن الاستاذ ما موجود

عواطف : اي عادي دخلي خلي الوثيقة على مكتبه هو اول ما يوصل راح يشوفها

دنيا : مو خاف ميصير

عواطف : لا حبيبتي شنو السالفة والله عادي

دنيا : اوك ، سديته منها وفتحت باب المكتب ودخلت داريد اخلي الوثيقة بس وكفت بمكاني صافنه

وبدون شعور شهكت لازمه گلبي ، بلحظتها جملة وحدة نطقتها بس جانت كفيله بأن هزتلي كل خليه بجسمي

" يمه حمودي "

**************************************
لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

.