الموت الحي الفصل التاسع وأربعون 49 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

: امممم عزيزتي عندج اكياس كبيرة حول المبيضين وين جنتِ الفترة السابقة ليش هامله نفسج هيج

دنيا : والله دكتورة اني جنت ملتزمة بمواعيد المراجعات الدورية بس صار عندي ظروف والتهيت عن نفسي شويه ، ليش دكتورة صاير بيه شي لا سامح الله ؟

: اي حبيبتي ولازم تسوين عملية باسرع وقت بيج ومتستعجلين

دنيا :بلا زحمه عملية شنو بالضبط ؟

: عملية استئصال للمبيضين

دنيا : ششنو عملية استئصال ، لالا اني ما اريد استئصلهن

: حبيبتي لازم تسوين العملية ، الأكياس جدًا كبيرة واحتمال على ساعة لا سامح الله ينفجرن وساعتها حياتج راح تكون بخطر

دنيا : زين دكتورة ليش متشيلين الأكياس بدون ما تسئصلين المبيضين

: كنا راح نسوي هيج في حال لو كانت الأكياس على المبايض لكن للاسف انتِ الأكياس العندج محاوطة المبيضين وصايره داير مدايرهن منكدر نشيليهن بدون منسئصل المبايض وياهن

دنيا : بدموع ، عفية دكتورة ماكو علاج شي يوخر الأكياس غير العملية فدوة اذا اكو غير حل كليلي عليه واني مستعدة لكافة التكاليف المهم ما اشيل مبيضي

: ماكو فائدة حتى لو انطيتج كورس علاجي و استمريتي عليه لمدة لاتقل عن الثمان شهور هم ما راح يروحن الأكياس من عندج ممكن يصغر حجمهن بس ميروحن

دنيا : زين ليش مو اكو هواي بنات صارت عدهن اكياس وعلى العلاج طابن

: يا حبيبتي الكيس الواحد عندج حجمة بكد الرمانه يعني جبير ولازم نشيله باسرع وقت ، صدكيني لو العلاج يفيد جان انطيته الج قابل اني خسرانه شي
بس اني علمود صحتج

اسألج سؤال انتِ عليمن كاعدة تبجين هسه ، شنو ماعندج اطفال ؟

دنيا : لا عندي ولد واحد

: لعد حمدي الله وشكري هياتج عندج طفل يعني مو ماعندج اطفال للتالي حتى تنهارين هيج

دنيا : مسحت دموعي وباوعتلها ، الحمدلله على كل حال بس دكتورة اني بعد اريد اطفال ، اريد اجيب اخوان وخوات لابني واذا استئصلت المبياض عمري ما راح اكدر اجيب اطفال بعد

: يا گلبي انتِ والله اني لوما خايفة على صحتج من البداية ما ادعم فكرة استئصال مبايضج ومثل مكتلج حتى لو مشينا على علاج راح يصغير حجم الأكياس لكن متروح ومنا للوقت الي يصغرن بي تحتاجين شهور طويلة واحنه منگدر نجازف بحياتج

خصوصاً هسه من سمعتج گلتي عندج طفل ، مو المفروض انتِ الي تكونين مصرة على هالعملية لخاطر ابنج

اعرف اني مالي حق ااثر على قرارج بس انتِ تعرفيني من زمان انظر لمراجعاتي مثل ما انظر لخواتي وبناتي
وصدكيني اختي لو جانت حالتها نفس حالتج جنت راح انصحها بالعملية

لتجازفين بحياتج ولتنسين انتِ جاية متأخرة واكياسج كبرانة وواصله مرحلة تستوجب العملية

فكري بكلامي زين وشوفي عقلج شنو يحكم عليج ، راح اكتبلج مسكنات وادويه التزمي بيهن وهم بيج ومتقللين ملح بالاكل علمود الم ظهرج ميزيد عليج

تفضلي عزيزتي ، معافاة ان شاء الله

دنيا : اخذت الراشيته وكمت طلعت ، شافني يوسف وكام على حيله بسرعة

يوسف : هاا شبيج ، ليش تأخرتي وليش عيونج حمر ، ليش جنتِ تبجين

دنيا : خلي نطلع واسولفلك ، اخذ ايدي ومشه بيه للسيارة صعدت وهو اجه يركض صعد وباوعلي

يوسف : احجي لخاطر محمد تره ضاگ النفس عليه ، شبيج دنيا شطلع عندج

دنيا : اكياس

يوسف : وعلى هاي تبجين !! من الطج على حلكج هسه هم واحد يگلي ليش ، صدك جذب واذا عندج اكياس يعني شنو اول وحدة اخر وحدة

عادي تشيليهم فد معضلة هي

دنيا : يوسف الأكياس صايرة داير مداير المبايض

يوسف : اي وشنو يعني

دنيا : يعني لازم اسوي عملية استئصال للمبايض ياله يروحن ، اباوعله زم شفايفه وصفن بوجهي

من شفت ملامحه هيج گبل بجيت ، اني اسفه والله ادري بيك تحب الاطفال وتريد يصير عدنا غير تيم بعد بس اني ، اني ما راح اگدر اجيب اطفال بعد اذا
شلت المبيضين والله اسفه بس صدكني ما جنت اعرف لو اعرف جان لحكت نفسي وتعالجت

اباوعله اخذ ايدي ودنك عليها باسها

يوسف : شهالحجي هذا حبيبتي على شنو تتأسفين قابل هي بأيدج هذا امر رب العالمين ، لا بأيدج ولا بأيدي

وبعدين تعاي عليمن جاي تبجين شنو قابل احنه ماعدنا جهال ، اشو تيومي ما شاء الله عليه مالي علينا حياتنا فشنسوي بالجهال بعد يا بعد روحي

دنيا : بدموع بس منگدر ننكر يا يوسف إني مو امه حتى لو احبه بس يبقى مو ابني

يوسف : هذا الحجي ما اريد اسمعه بعد ، عيب عليج شنو مو امه ليش هي الام التجيب لو التربي ؟

اسألج سؤال ، خالة وسيلة الله يرحمها شتصير منج مو مرت ابوج ، بداعتي عندج تقبلين واحد يكول عليها مرت ابوج مو امج

دنيا : بدموع هزيت راسي لا

يوسف : خوش يعني متقبلين ، زين ليش ؟ اني اجاوبج لان ربتج وعمرها ما عاملتج على انها مرت اب بالإضافة ان انتِ عمرج ما نظرتيلها غير نظرة بنت لامها

وهسه ويه تيم نفس الشي ، اني متأكد مثل ما شايفج كدامي تيم متعلق بيج ويحبج مثل حب الطفل لامه ويمكن اكثر وبالمقابل انتِ تحبي بشكل محد يكدر يوصفه

دنيا صحيح سرى ام تيم بالولادة بس انتِ امه بالمشاعر ، بالحب ، بالاهتمام ، لج انتِ اذا تيم صاح اخ دربج بعد متشوفي فشلون جاي تكولين هو مو ابنج

ولج والله العظيم يتيم لو عايش عمره گله ويه سرى ما راح يشوف منها الحنان الجاي يشوفه منج

دنيا : بنشغ ، حتى لو مصيرة يكبر ويعرف امه ويحنلها

يوسف : ما راح اسمحله سرى لو تموت ما راح اخليها تطول اظفره لتيم ، من يوم الي تنازلت عنه واشترت سعادتها وطلعت خلص انحرگت ورقتها عندي وعند تيم

دنيا : زين وانت ما راح تزعل لان ما راح اگدر اجيبلك اخوان لتيم بعد

يوسف : ليش ازعل !! بابا انتِ مسودنه ، ازعل على شي لا بأيدي ولا بأيدج شنو مخبل ، لج دنيا انتِ عندي تساوين الدنيا وما بيها

والله العظيم يلو ابقى العمر گله ماعندي بزر وانتِ وياي لاصبح وامسي اصلي شكر لله بس لان انتِ وياي

وبعدين تعاي مو ذوله سهير وجياد صارلهم جم سنة متزوجين ، عشر سنوات وهمه ماعدهم اطفال ، روحي شوفيهم واحدهم ميت على الثاني

ولج والله ذاك اليوم اتوسل بي اگله يمعود ليش متقبل تاكل يگلي لا اريد ارجع اگل ويه سهير ما اگدر اگل وهي مو وياي

تخيلي لعد شكد متعلق بيها ويحبها لدرجة ميهون عليه ياكل وهي ما ماكله وهاي ماعنده اطفال منها

جم مره كلوله تزوج وهو يرفض يگلهم باليوم الي افوت بي مرة لحياتي غير سهير اعتبروني ميت وفعلا هاي راح يصيرلهم اكثر من عشر سنوات سوه وماعدهم جهال شنو ماتوو ؟ قل الحب البيناتهم ؟ ابد ولا بأي شكل من الأشكال

يادنيا اليحب لا يوكف عنده طفل ولا ظروف ولا حجي الناس ولا حتى المرض ، اليحب يبقى يحب حبيبة ومتعلق بي رغم كلشي

شلون اني هسه احبج ومتعلق بيج لدرجة 8 سنين اني متغمضلي عين اذا ما اخلي هدومج بحضني حتى عطرج كمت اجيبه وارشه على الفراش حتى اشم ريحتج واتخيلج بحضني ياله انام

دنيا : بدون شعور ذبيت روحي بحضنه وكمت انشغ من البجي

يوسف : كافي ياروحي كافي يا گلبي انتِ موزين عليج انتِ مريضة يگلبي

دنيا : احبك اني اموت عليك والله

يوسف : اني احبج اكثر ، شو باوعيلي خلي امسح عيونج شهالبجي هذا يا حبيبتي والله مردتي گلبي

دنيا : مسح عيوني وبوسهن وضل بالساعة كاعد ويهديني لحد ما هدأت ياله حرك السيارة وطلع

يوسف : ان شاء الله باجر نرجع للدكتورة ونشوفها شوكت تحدد موعد للعملية ، ما اريد إجازف بصحتج

وهم لتنسين تبلغين اهلج ، لازم يعرفون والا راح يزعلون اذا درو بيج مريضة وما كايلتهم

دنيا : ماعندي طاقة احجي هسه خليني ارتاح ياله احاجيهم

يوسف : على راحتج حبيبتي

دنيا : وصلنا للبيت ونزلنا لكيناهم كلهم كاعدين ينتظرون نجي حتى يعرفون شبيه

يحيى : هاا بويه حبيبتي سلامتج شطلع عندج

دنيا : حجالهم يوسف وهمه خطية كعدو يواسون بيه وخالة من شافتني بجيت هي والبنات لعبن بيه لعب

وعمو سوده عليه حضني ويصبر بيه ، ذكرني ببابا وخاف اني عايزة انهيار ، انهاريت بالزايد

يحيى : هذا امر الله يا بنتي ، بعد ابوج لتبجين انتِ عدنا اهم من الف طفل ، على كيفج حبيبتي ليكعد تيم يشوفج هيج تبجين ويخترع

دنيا : تنهدت وابتعدت عن عمو ، تشكرتهم على كلامهم وياي وصعدت فوگ ، بيومها تيومي ضل نايم بغرفة بيت جده واني من التعب والبجي غفيت وما حسيت بروحي الصبح الا ومصخنه ولازمتني نفاضة بسبب الصخونه

وخطية يوسف من شافني هيج تخبل ، عاف دوامه وگابلني وكعد هو وجمانة مرت كريم ، لا خلو كمادات ولا أدوية حارو وياي وحرارتي متقبل تنزل

تالي دخلوني مستشفى ولمن حطولي مغذي ياله نزلت حرارتي وطلعوني ، بقيت يومين بالفراش وعلى الابر ياله كدرت اكوم على حيلي

وبيومها اتصلت عليه ديمة ومن التعب ما كدرت اضغط على نفسي هواي واحجي اختصرت الحديث على كد السلام ورحت وهي حست عليه وحبيبتي ثاني يوم اجتني واني وصيتهم محد يكلها تمرضت ودخلت مستشفى

اخاف على ديمة لتخترع علمودي وتتخربط وهي سودة عليه ما عايزة وفعلا اجت

قبل عزيمة بيت جدي النه رحت للدكتورة وحددنا موعد للعملية ومن تأكد موعد العملية قررت اسولف
لاهلي من نروح لبيت جدي

لكن الموقف الصار هناك شغل بالي ولهاني عن الموضوع ، رحت ورجعت وما انطيتهم خبر

فزيت على ايد يوسف التشد على جتافي

يوسف : هاا حبيبتي شلون صرتي

دنيا : انداريت نمت على ظهري وباوعتله ، سحبت ايده بستها ، اروح فدوة لايدك عاشت ايدك حبيبي

يوسف : تدللين على گلبي انتِ

دنيا : نمت على صدره وغفيت ، ثاني يوم الصبح صادفت عطلة ، كعدنا سوه نتريك

يحيى : احم ام علي اذا كدرتي اليوم تطلعين للصايغ تشترين شي بناتي مرتب

رميم : شتسوي بالذهب هاا يحيى بس كمت تلبسلي ذهب

كريم : ههههه على بختج يمه صحيح ابويه يلبس وردي بس مو بمعناها يلبس ذهب

جياد : هههههه ولك لعد شبي الوردي قابل بس للنسوان وبعدين الحجي مسموحله يلبس اليريده سبحان الخلقة الله مبدع بي لو بداله اني ما اتحاجه بعد

يحيى :كافي حجي ماله داعي وانتِ رميم سوي الكتلج عليه بدون كلام زايد

جياد : شبيك يابه شو مزاجك اليوم مبين مو شي ، اكو شي غاثك سولفلنا لتضم بگلبك

يحيى : مابيه شي حبيبي انت بس تعبان من الشغل شويه ، كملو اكل انتو الف عافية

رميم : زين يحيى المن تريد الذهب وشنو مناسبته حتى اعرف ششتري

يحيى : الذهب اريده لزبيدة ، جهزو نفسكم عقدها بعد اسبوعين

دنيا : ويه ما حچه عمو الكل اندار على حليم ، اباوعله جان رافع استكان الجاي ديشرب ومن سمع كلام عمو تصنم بمكانه

حليم : عقدمن گلت ؟

يحيى : زبيدة بنت عمك ياسر

حليم : صصـ صدك دنيا

دنيا : هزيتله راسي

حليم : زز زين ممنو راح يعقد عليها

يحيى : هارون ابن عمها

دنيا : اباوعله ضل باهت بوجوهنا وكإنه ممستوعب الاسم السمعة وما الومه اذا اني نفسي لسه ممستوعبة زبيدة حتتزوج هارون

حليم : لحظة لحظة هارون نفسه الشگ راسها ذاك اليوم لو اني مشتبه بالاسماء

يحيى : لا هو نفسه

حليم : زين ليش ممـ ما جاي استوعب والله

ابريز : يجوز البنية تحبه ويحبها ومن صارت بينه وبينها ذيج المشكلة ذاك اليوم فعلمود علاقتهم

دنيا : انتتتِ ليش متحترمين نفسج علاقتيش هاي التحجين عنها !!

ابريز : ليش تتجاوزين شنو قابل الحب حرام مو انتِ قبلها جان عندج علاقة بيوسف وتزوجتي فشنو المشكلة اذا اختج مشت على خطاج

يحيى : كافييي ما اريييد اسمع صوت وانت حليم كوم بوية تعال لغرفتي انت وامك اريد اسولف وياك

دنيا : تنهدت لازمه راسي ، الله يعينك يا حليم والله شكلك كسر خاطري ، باوعت ليوسف هو وإخوانه مصفصفين صح كلهم ساكتين بس عيونهم تحجي

حقهم همه من جان مراهق يدرون بي يحب زبيدة وهمه اول الناس السعوله من راد يخطب زبيدة لكن للاسف زبيدة رفضت

ياربي دخيلك برد كلبه خطية حليم حباب رغم سلبياته بس ميستاهل غير كل الخير

_____________________________________

زبيدة : كاعدة اتمرن بالحديقة وبالي يم الاسبوعين الجايات

لحد الان ما خش بعقلي إني شرعاً بعد اسبوعين راح اكون متزوجة ، اني متزوجة

شلت الثقل ، ااخ يا زبيدة ااخ هاي تاليتج من بعد سنين من الثبات تنجبرين تتزوجين ومنو ؟ واحد من انكس الاوادم بالدنيا

ياربي على الاقل لو هارون مثل امين رجل ديمة على الاقل راح تصير اكو بيني وبينه لغة حوار ومنطق مو هيج ذبيتني بطريق مسدود ويه واحد ما اكدر اتحمله خمس دقايق على بعضهن مو عاد اگابله واكعد

زين اني هذا شلون راح اعيش ويا بنفس المكان ، شلون راح اكدر اتفاهم ويا ، اني ويا مثل النار والنفط
ميصير نجتمع بمكان واحد

اييييه الك بيها ارادة يارب ، ذبيت الثقل وكعدت بالكاع وثنيت رجلية وحدة على الثانية ، شغلت موسيقى هادئة وبديت اسوي يوغا

ضليت نص ساعة على هالوضعية لمن دگ المنبه الي بموبايلي ياله فتحت عيوني

طكيت ركبتي ورفعت راسي للسما شفت الافندي واكف بالبلكون ويباوعلي

هذا شعنده واكف بوجهي شنو ما اخلص منه ، سحبت مطارت المي وكمت على حيلي ، اشرتله بايدي خير عرض مسرحي كدامك وواكف تتفرج ؟

هارون : شعندج يم البلكون مالتي ؟

زبيدة : ههههههه والله ضحكت من كل گلبي ، باوعتله لك بابا انت شوكت تبطل جنون العظمة هذا

بطل لخاطر الله بطل هالغرور الماله ام لازمه ، هذا الدور العايشة اطلع منه منو انت حتى الناس تكابلك وتكعد

يعني اذا كعدت اتمرن بنص الحديقة وصدفت البلكون مالت غرفتك صار گبالي معناها عندي شي هههه صدك الله يشافيك

شلت غراضي حتى اروح لغير مكان مالي خلگه ، دامشي وسمعت صوته

هارون : بجامة التراك مالتج مشكوكه من وره

زبيدة : بدون شعور ذبيت غراضي بالكاع وخليت اديه على ظهري من وره ، صخام الصخمني اذا صدك

تلمست ظهري وما حسيت بأي فراغ بالبجامة كلشي ماكو والله ، انداريت بسرعة ما لكيته بالبلكون

لزمت راسي ، يربييي هالرجال راح يخبلنيي واااالله رااااح يخبلنيييييي

شلت غراضي ومشيت ، شكد خبيث ومسموم الكبر لفه وخلصني منه بحق لا اله الا الله

دخلت للبيت ذبيت غراضي بغرفتي وطلعت اكعد بالصالة ، لكيت معين وخالة وئام ودادا ديتريكون
انداريت راجعة لغرفتي

ام حسن : تعاي يمه زبد تريكي

زبيدة : ببرود ما اريد ، رجعت دخلت لغرفتي ، رتبت غراضي بمكانهن ودخلت سبحت وهم رجعت اكلب بالبجامة وصدك ما لكيت شي

الله لا ينطيك يا غراب البين وكعتلي گلبي

بدلت ملابسي وسمعت صوت موبايلي يدگ ، شفته جدي كلبت عيوني خير اللهم اجعله خير

جاوبته ، الوو

النوح : صباح الخير

زبيدة : بملل ، صباح النوم تفضل

النوح : تعاي اريدج بموضوع

زبيدة : خير ؟

النوح : خير بوجهج تعاي وتعرفين

زبيدة : بس ... سكتت طبگة بوجهي ، اااالله ياخذني ويخلصنييي منكم

سحبت ربطة لبستي ولبست بشت وطلعت من البيت لبيت جدي ، لاگاني عمي فاضل بالباب

يربي هسه الرجال كلشي ما مسويلي بس اني ليش ما متقبلته ما ادري

فاضل : هاا عمي شلونج ، انتِ زبيدة اكيد

زبيدة : اي ، عبرته حتى امشي واستوقفني صوته

فاضل : بشري شلونها الوجبة دسمة مو ؟

زبيدة : عفواً !! لشنو جاي تلمح ممكن تحجي بوضوح

اباوعله تقدم مسح على جتفي وابتسم

فاضل : هارون خوش صيدة بالعافية عليج بوية

زبيدة : صفنت بوجهه شنو خوش صيده هذا شجاي يمسلت

دخلت لجوه شفت بيبتي وابتسمت ، صباح الخير عيني

حمزية : هاا زبد بعد روحي صباحج حلو مثلج ، تعاي كعدي خلي اروح اسويلج ريوك شلون بيضات مبيضات الدجاجات اليوم تازه وداعتج

زبيدة : تقربت بستها من خدها ، اروح فدوة اني ، الف عافية سبقتج اني ، ما كتيلي جدي وين

حمزية : بمكتبة هو وهارون

زبيدة : اهووو هم نعلون

حمزية : انجبي ولج بعد اسبوعين يصير رجلج حرام بعد تغلطين عليه الله يحاسبج

وبعدين ولج انتِ وين تلكين مثل هارون والله باجر عگبه نلكاج كافه جوه جناحاته

زبيدة : ليش هارون عنده جناحات سبحان الله طلع فسيفس واني مادري

ضربتي على ظهري حيل

حمزية : عابت هالحلگ اقصد حضنه يثولة

زبيدة : اني اختل بحضنه !! من اهمداني اي والله

حمزية : طايحة الحظ ميصلح تغمين روحج ، امشي امشي صعدي شوفي جدج شيريد

زبيدة : صعدت فوك متوجهه لمكتب جدي ، وصلت ، دكيت الباب ودخلت لكيتهم كاعدين هو وهارون

النوح : تعاي ليش واكفه

زبيدة : اجيت كعدت ، خير جدي

النوح : حبيت اجتمع بيكم قبل ليصير عقدكم ونحجي بجم شغلة اني وياكم

اسمعوني اني قررت بعد عقدكم بشهر نسوي العرس
وحبيت اخذ رأيكم شنو رأيكم المدة هاي تكفيكم تجهزون نفسكم للعرس ؟

زبيدة : مبدئيًا اني اصلاً ما اريد عرس ، اذا انت ناسي فأبوية بعدها سنته ما دارت على اي اساس تريدني اسوي حفلة وعرس وهو ما صارله هواي من متوفي

النوح : عوفي سالفة العرس هسه بعدين نتفاهم بيها ، خلي نبدي نجهز الاشياء الضرورية الي تحتاجوها

غرفتك هارون لازم تبدلها وتشتري جديدة وافضل لو تطلع انت وبنت عمك تجهزوها على ذوقكم

تشترون غرفة على مزاجكم وتجهزون ثلاجة وبراد وغرفة كوي وهالسوالف كلها تشتروها جديدة

هارون : اني هالسوالف ما الي اي علاقة بيها شتردون تسوون سوو ومن يجي موعد العرس بلغوني قبل بيوم حتى اطلع اشتري قاط والبسه واجي غير
هيج لحد ينتظر مني شي

زبيدة : اباوعله وره محجه كام وطلع من المكتب وجدي كام يصيح ورا وهو حتى مندار كمل طريقة ولا كإنه سمع شي

النوح : ميخالف جدي لتضوجين ومسحيها بيه ابن عمج فالح بكلشي الا بالتعامل ويه النسوان

باجر عگبه تتزوجون ويتعدل على ايدج ويتعلم شنو يعني مرة وشلون ممكن يتعامل وياها لتنقهرين وتاخذين على خاطرج

زبيدة : اني !! لالا لتخلي ببالك ولا زعلت يله من رخصتك اروح لتستفگدني بيبي ، كمزت وطلعت بسرعة حتى ارجع للبيت

ركضت لبيتنا ، الف رحمه على والديك هارون من طفرت وطفرتني وياك ، دخلت للبيت وكضيت اليوم بغرفتي لان ما احجي ويه ولا واحد من الي بالبيت عدى دادا

بالليل متمدده وداقرا رواية على الفيس واجاني اتصال من رقم غريب ، باوعت للساعة ب12 ونص احتركت روحه الاتصل عليه

جاوبت الووو

: السلام عليكم

زبيدة : كعدت مستغربة هذا الصوت مو غريب عليه ، الوو منو وياي

: زبيدة اني حليم

زبيدة : لزمت گلبي هاا حليم خير خوما دنيا لو بيت عمو بيهم شي ؟

حليم : لا مابيهم شي بس اني اريد احجي وياج

زبيدة : خير ، تفضل اسمعك

حليم : الحجي مو مال نحجي بالموبايل

زبيدة : لعد ؟

حليم : اني واكف بره بيت جدج قريب على البساتين اذا تكدرين تطلعيلي

زبيدة : اني ماعندي مانع بس الوقت متأخر حليم لو تخليها الصبح افضل

حليم : زبيدة رجاءًا اقل النص ساعة

زبيدة : ماشي جايه ، كمت بدلت ونزلت جوه ، شفت دادا كاعدة بالصالة

ام حسن : هاا يمه وين طالعة

زبيدة : هذا حليم خابرني واكف بره وعلى اساس عنده موضوع يريد يحاجيني بي گلت خلي اطلع اشوف شعنده

ام حسن : على بختج يمه الناس شتكول عليج اذا شافوج طالعة بهالوقت

زبيدة : شنو السالفة دادا اليسمعج يكول شو شراح اسوي وبعدين لتخافين عليه حليم ما ممكن يتجرأ ويسويلي شي ولو تجرأ اني والحرس نطلع مصاينه من خشمة

اطمئني واذا خايفه كعدي هنا انتظريني اذا تاخرت عن النص ساعة عود تعاي ورايه هو گال راح يوكف يم البساتين الخارجية

ام حسن : خوش وموبايلج علي خاف اتصل عليج

زبيدة : صار ، تقدمت فتحت الباب وطلعت ، وصلت للباب الخارجية لكيت الحرس واكفين ، عبرتهم واجيت اطلع

: وين طالعة ست

زبيدة : اريد اتمشى شويه

: ميصير تطلعين وحدج ست البساتين تخوف بهالوكت خاف يطلعلج ذيب لو حية ، اذا تحبين يرافقج واحد منه حفاظًا على سلامتج

زبيدة : ابتسمت لا شكراً جزيلاً متقصرون بس اني حابة اتمشى وحدي لتخافون ما راح ابتعد هنا يمكم

مشيت طالعه من البيت وعيوني على البساتين ، والله يخوفن بالليل ، تذكرت الغابة الخذاني الها الشفية الله لا ينطي لسه كلما اتذكر الموقف جسمي يكزبر

ضليت امشي وكل شويه اندار اكول خاف يطلعلي شي وراي وارجع اكمل

باوعت اكو لايت مال سيارة مشتغل بنهاية البستان
ادري متوازي واكفلي بتلفات الدنيا

وصلت لسيارته واني انفاسي مكطوعة وهو شافني نزل من السيارة

حليم : شبيج ؟

زبيدة : بلعت ريكي مابيه شي ، احجي حليم شتريد وكعت گلبي بهالليل

حليم : صعدي بالسيارة حارة عليج بره

زبيدة : تنهدت وفتحت السيارة صاعدة ، ضميت اديه يله اسمعك ، اباوعله تقرب فتح الچكمچه وطلع منها فايل

حليم : هاج

زبيدة : مطلعني بهالليل حتى تراويني فايل صدك تحجي

حليم : اقري البي اول شي وبعدين نتفاهم

زبيدة : فتحت الفايل الجان مليان اوراق ، بقيت اگلب بالفايل ، جان عبارة عن اوراق شي يخص الشركة والاسهم التابعة لحليم بيها وشي يخص الحساب البنكي التابع لحليم وهواي اشياء ثانية

بس الفهمته انُ كل الي بالفايل عبارة عن املاك وارقام حساباتات ومبالغ بالبنگ

باوعتله ، قريت الي بالفايل بس ماعرفت ليش ردتني اقرا كل هذا

حليم : شايفه كم المبالغ الموجودة بهاي الاوراق اني مستعد كلهن احولهن باسمج بس عوفي هارون وتعاي وياي نتزوج واوعدج كلشي تردي مستعد انطي الج بس لتعوفيني

زبيدة : ضليت صافنه بوجهه ، انت شجاي تحجي

حليم : انتِ مو وافقتي على هارون مقابل البستان والبيت والقدمهن الج جدج اني جاي اطبلج من نفس الطريق الطبلج بي جدج

هاي الاملاك والفلوس اني كلهن مستغني عنهن في سبيل اكسبج ، وافقي زبيدة وخلي هسه احولج كلشي واخذج نعقد ونكعد بعيد عن كل الناس

زبيدة : لا انت مو صاحي والله والظاهر ماخذ شي هلي كايم تمسلت ، فتحت الباب ونزلت ، گل لعمو يحيى تكول زبيدة طاحظني بعد اذا اسولفلك شي

مشيت عنه بسرعة ،جسمي كله كام يرجف من سمعت كلامه ، اني صوجي حجيت لعمو يحيى وابتليت

لزمني من ايدي ، دفعت ايده وعطت بي وخرررر ديربالك تلزمنيييي

حليم : تره واااالله حرتتتت ويااااج حرتتتت سويت وياج نفس ما سوه جدج وهم رفضتيييي بس فهمينييي لييييش عرض جدج خلاج تقبلين وعرضي خلاج تتخبلييين شنووو الي بهارون وما موجود بيه حتى تفضلي عليه وتقبلين

زبيدة : لك انتتت مخبل ، اني عقدي بعد اسبوعين على يا اساس تريدني اروح وياك ، اني وافقت وانطيت حجاية لجدي شلون تريدني اغدر بي واشرد شراح يصير موقف اهلي اذا اسوي هيج

حليم : زبيدة الله يخليج هذا الزواج راح يدمرج وانتِ هيج هيج راح توافقين علمود الفلوس اكيد مو حبًا بذاك المخبل

عوفي واني انطيج كل الفلوس الي بنفسج بس نتزوج
حتى لو متحبيني اني راح اخليج تحبيني ، زبيدة المثل يگول اخذ اليحبك ولتاخذ التحبه واني احبج زبيدة اخذيني والله اعيشج ملكة

شنو الي بنفسج مستعد احققه الج ، احبج اني زبيدة والله احبج ، صدكيني اذا شفتج صرتي مرة لغيري اموت والله اموت

زبيدة : انيييي ما اسمحلك تحاجينييي هيج ، اني مو چلبه مالت فلوس حتى اركض وره الينطيني اكثر والظاهر انت فاهم الموضوع غلط

تره جدي من قدملي البستان والبيت وانس قبلت بيهن حتى اامن مستقبلي لا اكثر ولا اقل وهارون اني مقتنعة بي

حليم : شبيييي واقتنعتيييي بييي ، شهادة ؟ اني شهادتي اعلى من شهادته ، جمال ؟ اني اگدر اجيب اي وحدة باشارة من ايدي لو ردت فلوس ؟ انيي ما عاييز حب ؟ اني احبج وهو مو بحالج فهميني ليييييش هارون

زبيدة : يا اخي قسمتييي واني راضية بيها الله اكبر ما طلعت سالفة هاييي

التهي بروحك تره والله مليت من سوالفك كافي حليم لخاطر الله اني راح اتزوج واستقر بحياتي لتضل تحوم داير مدايري لخاطر الله

عوفني والتهي بحياتك رجاءا ، وخلي انطيك ياها من الاخير ، حليم انت لو تبقى اخر واحد مستحيل اقبل بيك

حليم : ليش بس فهميني ليش ؟

زبيدة : ما احبك ولا اتخيل نفسي وياك بأي شكل من الأشكال ، اعتقد هذا سبب كافي

اباوع لدموعه نزلن وهزلي راسه بتوعد

حليم : براحتج بس ما اكلج غير الله يحرگ كلبج يا زبيدة مثل ما حرگتي گلبي وعسى اللوعة العشتها بسببج تعيشين الاتعس منها

وحطي ببالج انتِ راح تبقين بنفسي منا لمن اموت وعمرج انتِ وذاك السافل ما راح تتهنون ما دام اني وراكم

زبيدة : اباوعله صعد بالسيارة وشخطها وطلع كبل ، تنهدت يربي شلون بيه حرت شسوي والله حرت

رجعت للبيت والف حسبة ببالي ، دخلت على اساس ادخل لبيتنا بس حسيت نفسي مختنگة كلت خلي امشي للاسطبل

مشيت للاسطبل ، دخلت لجوه اباوع اغب الخيول نايمة ما عدى الخيل الاسود الي ريحة شعرة طيبه

فتحت الثلاجة اخذت تفاحة وتقربت انطيتها اله ، ابتسمت ومسحت على شعره ، وكلته شويه وطلعت اتمشى بالبساتين الداخلية

عبرت على كراج السيارات ، اريد اسوي اي شي في سبيل تخف الخنگة العندي

امشي وما احس بنفسي الا واندفع على السياج بقوة بحيث انضرب خشمي بالحايط بعدني ممستوعبة الموقف وما احس الا واحد يحاصرني ويخنگني

****************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.