الموت الحي الفصل الخمسون 50 - بقلم براء الموسوي

مرحبا حبايبي العسل شلونكم ❤️❤️

'''''''''''''''''''''''''''''''
ليست ملاك
مُجرد فتاة عَادية
ذَات شَكل عَادي
ومَلجأ صَغير
حَاجبين جميِلين
وعَينان بُنيتان نَاعِستان
ذات مَزاج حَار
عُرق يَديِها بارزه
صوتها عَادي جداً
ليست مَلاكَ هي مُجرد وَردةٌ ...

زبيدة 🖤

'''''''''''''''''''''''''''''''

#الموت الحي
#للكاتبة براء الموسوي

زبيدة : عبرت على كراج السيارات ، اريد اسوي اي شي في سبيل تخف الخنگة العندي

امشي وما احس بنفسي الا واندفع على السياج بقوة بحيث انضرب خشمي بالحايط بعدني ممستوعبة الموقف وما احس الا واحد يحاصرني ويخنگني

حاولت اقاوم وادفع الشخص المحاصرني ومداگدر بسبب الضغط المحاوطني من كل الجهات ، بوجهي حايط وبظهري الشخص الخانكني

ضليت اقاوم وانتفض بجسمي حتى افلت نفسي بس وكفت من سمعت صوت اللازمني

: بهمس حركة ثانية واقسم بالله ادفنج بالحايط واخلي جثتج تجيف جوه ومحد يلكاج

زبيدة : بادن رجليه من سمعت الصوت ، ايي هذا هارون ، اكدر اميز نبرة صوته من بين آلاف الناس بس حدة النطق وخشونة الصوت العندة

ثبت جسمي عن الحركة وبدت خلايا جسمي ترتجف من الخوف ، اي خفت اخاف يعيد بيه السوا قبل

غمضت عيوني بألم من حسيت باطراف اصابعه تضغط على بلاعيمي بكل قوة ، اجتاحني الم مميت ما كدرت اسيطر عليه ، كمت ارفس برجليه

روحي تعلگت بركبتي اريده بس يعوفني حتى اجر نفس ومو كادره

دقايق مرت مثل الموت واني اصارع جوه ايده وهو كلما يشوفني اقاوم يزيد بضغطة على ركبتي ، من بلشت احس الهوه ضاق عليه بدت عيوني تنسد وحدها

وقبل لا اغيب عن الوعي حسيت بي يعوفني ، وكعت بالكاع وضليت اكح وامسد على ركبتي ، الله ليراوي بشر الشعور الحسيته بلحظتها

عطت بوجع من حسيت بي يلزمني من فكي بقوة

هارون : شعندج طالعه بهالليل ، ما عرفتي تكرصين روحج بهالليل لو اله تفوخين *** فطلعتلي لحليم
يردلج الروح

ليييش هيج قذرات انتن مو عقدددج بعد اسبوعين ما كدرتييي تلزمييين روحج متوازييه بالسياااارة ، يا فاجرة بالسيارة ما خفتي واحددد من الحرس يلكفج ويصوررررج ويفضحنا

زبيدة : ضليت باهته بوجهه ، انـ انت شدتحجي

هارون : اشششش حسسسج ما اسمعه انييي ، انييي شفتج بعينييي رحتيله وصعدتي ويا وهو طفه اللايت وكعدتووو نص ساعة والسيارة تهتز بيكم

زبيدة : بصعوبة حجيت واني لسه ممستوعبة السمعته منه ، لك انت شكاعد تمسلت من الله يطمك وويه انكس خلقة يحشرك

ليا مرحلة من القذارة واصل لدرجة عقلك النكس يوهملك اشياء مالها اي صلة بالواقع

فزيت من صفگني راشدي

هارون : اششش اششش انييي شفتتتتتج شفتتتت السيارة تهتزززز وانتتتتتِ وياااا جوووه لتجذبييين لتجذبييين

زبيدة : اشتعل خدي من الحرارة لدرجة حسيت بخدر على جانب وجهي

وعلى اثر الالم الي اجتاحني رفعت رجلي وضربته على منطقته بكل قوتي ودفعته

اباوعله وكع وتكور على نفسه يون من الالم

من شفته التهى بروحه كمت بسرعة اركض بس سبقني الچلب من جر رجلي ووكعني على وجهي دفرته ورجعت كمت اركض

انداريت حتى اشوفه اذا كام وراي ، لكيته بعده متمدد بمكانه بس ماله صوت وجسمه يتحرك بطريقة غريبة

الظاهر جانت الضربة قوية وما گدر يتحملها اييي حييل وابو زايد والله متشمته بي

رجعت امشي مداگدر امشي من دفرته تأذيت والله اني اعلمه اذا ما اگل لجدي عليه هالمرة لو اني لو هو

واحد مريض وفوك المرض شكاك وعقله عقل مطي يجيب ويلزك ، الله لا يوفقه والله العظيم اليسمع نبرة صوته وهو يحجي يكول صدك السيارة جانت تهتز
واني استغفر الله ، الف استغفر الله

دامشي وتوقفت متبسمره بمكاني ، تذكرت مره نور كالت هارون عنده نوبات مال صرع تجي فجأة وتشنج كل جسمه

انداريت ورجعت اركض عزه العزاج زبيدة هسه يصيرله شي ويجون يذبوها براسج خاف هو مو عزيز اذا صاح اخ النوح يگلب البيت علينا عزاء

وصلت لنفس المكان شفته على حطته نفس ما عفته ، ركضتله لكيته متمدد ويرجف وعيونه مگلوبه

متت خوف من شفته هيج بلحظتها عقلي غاب عني ، اي واحد بمكاني جان گام صاح للحراس يساعدو بس اني من الرهبة الاجتني ما كمت اگدر اجمع

زين اني شمدريني النوبة هاي ما صرع لو لا واني اصلا كلشي ما اعرف عن هالمرض غير انُ المصاب بي ميصير من تجي النوبة يتركون حلكه بدون ميخلون بي شي حتى ليكطع لسانه

كعدت يمه وبسرعه فتحت حجابي وسحبت الكب مالتي طبگته وفتحت حلكه حتى اخلي بين اسنانه بس هو يقاوم بسبب الرجفه العنده مديخليني اسيطر

خرب يومك حتى نوباتك غثيثة ومزعجة مثلك ، حاولت اكثر من مره وياتالي بعد اسنانه وعضني من ايدي ، اااخ اشتعلت روحك اي والله

والله العظيم شاغت روحي من الوجع ، احس سچينه ونبتت بلحمي ، بالف يا الله ياله كدرت ادحس بحلكه الكب واسحب ايدي

باوعت لايده الترجف ، يربي شسوي ويا هذا خاف اروح اكعدهم ويذبوها براسي واني ما عايزه

تذكرت من اجته نفس النوبة بس بشكل اخف بالمطبخ ومن لزمت ايده هدئ نوعاً ما وكدر يسيطر على اعصابه

ترددت الزم ايده بس من شفت وضعه تجاهلت ترددي ولزمت ايده وبديت امسح عليها بهدوء ، حسيت بي يشد على ايدي بقوة

عطت بي على كيفك يمعود راح تطگ اصابيعي بايدك

تنهدت وباوعت لوشم العقرب على ايده ، تلمست رسمته بخفة اصابعي ، يربي بس لو اعرف ليش جنت اشوف ايد هارون تخنگني من انام

رغم بفترتها اني اصلا ما شايفته لهارون ولا مرة بحياتي ، وهم ما اصدك انُ الموضوع صدفة لان حتى البُنية الجسدية للرجال الجنت اشوفه بالكابوس اذا اريد اقارنها ببُنية هارون راح تكون متشابهه

حرت واني احاول افسر معنى اني اشوف هيج كابوس و ويه شخص عمري وحياتي ما شايفته
وبقدرة قادر طلع نفسه ابو الكوابيس نعلون

حسيت برجفته تتوقف ، تركت ايده وباوعتله مغمض عيونه ، سمعته يون ويهذي بكلام ما مفهموم

هاك استلم كام يمسلت وهسه يبلع لسانه ويذبوها براسي خاف اني عايزة مصايب

سكتت من شفت عيونه تذرف دموع وهو مغمض ، ياا هذا شبي دخيلك يارب

حاولت اركز ويا حتى افتهمت شجاي يحجي وكدرت اسمع طراطيش من الهذي مالته

هارون : ليش ، للـ ليش سويتي هيج مو حرام عليج

زبيدة : شبيك تبجي ولك نعلون شجاك صدك جذب

هارون : ككـ كسرتيني ليش

هارون : مشتاقلج اني والله مشتاقلج

اريد اشبكج وما اكدر ليش ولج ليش سويتي بيه وبروحج هيج ليش كرهتيني بيج ليش

زبيدة : ضليت صافنه عليه ، هذا ما جاي يحجي وياي والظاهر على اثر النوبة كام يهذي ويطلع السوالف الضامهن

كل الي افتهمته من كلامه أنه جاي يعاتب بنية والظاهر انها حبيبته ما انكر صدمتي لان المثل هذا مستحيل جنت بيوم من الايام اصدك انه عنده مشاعر وممكن يحب

بس للامانة حتى ما اطلع جذابه ، ابد ما انقهرت عليه
رغم شفته يبجي ويحجي بعتاب ومبين عليه متأذي من شي الله اليعلم بي

بس للصراحة اني بطبعي مو عاطفية ومو من النوع الي انقهر على اي شخص خصوصاً الشخص الي يأذيني لو اشوفه يموت ميرف گلبي عليه

وهارون من الناس الي ابصم بالعشرة إني مستحيل يرف گلبي عليهم في يوم من الايام لو مهما صار وياهم

وخلي اليسمع يكول عني حاقدة ميهمني اني انسانة مو مثالية وهاي الصفة هي احد عيوبي الما اكدر اغيرها

نفضت هدومي وكمت رحت للحراس بلغتهم بوضعه ورحت لبيتنا والف سؤال ياكل بالي

وصلت للبيت دفعت الباب ودخلت لكيت دادا ، خطية اول ما شافتني كامت وضربتني على ايدي

ام حسن : وينج ولج صارلج ساعة بره كسرت الموبايل عليج ومتردين وكعتي گلبي جنت شويه واكوم اكعد اخوج

زبيدة : لتخافين دادا ماكو شي بس اختنكت وكمت كعدت بره شويه

ام حسن : شبي صوتج يمه شنو باجية وليش هدومج هيج كلهن تراب

زبيدة : ركض ورايه چلب ووكعت على وجهي من ورا وتتربن هدومي وصوتي من الصياح تشحرج

ام حسن : يمه سودة بوجهي عليج وخوما سوالج شي

زبيدة : لا ركعته بالحجارة وشرد

ام حسن : اشوه الحمدلله ما سوالج شي ، تعاي كعدي سولفيلي شراد منج حليم بهالليل

زبيدة : كعدت وسولفتلها كلشي ، اباوعلها لطمت على صدرها

ام حسن : صخام بوجهه هالسربوت شنو ششايفج يمه ويحاجيج هيج صدك ميستحي تفف على الشوارب الي بوجهه

زبيدة : والله يا دادا شكلي بعد الموقف الصار اخر شي فقدت احترامي بعيون الكل وصرت بنظرهم مادية ومستعده اسوي كلشي علمود الفلوس

ام حسن : اكص لسانه اليكول عليج مادية ، انتِ زبيدة ام نفس الطيبة والعين المليانه لاهمه ولا عشره بكدهم يكدرون يكولون عنج مادية

اني الاعرف شنو زبيدة وهم متأكدة موافقتج على هارون صارت نتيجة ضغط عليج من جدج السالفة لا يم الفلوس ولا گرباها

والله اليعلم شلون گدر جدج يلزمج من ايدج التوجعج وجدج يسويها ، لا يفكر بدين ولا يفكر بعيب اهم شي عنده يمشي حجايته عسى ما يدوس على الكل واحد واحد المهم متنكسر حجايته

زبيدة : حضنتها بدون ما احجي شي ، جنت محتاجة واحد يحاجيني هيج ، جنت اتمنى اخوتي يسمعوني هالكلام لكن عبث

تنهدت وابتعدت بوست اديها ، ربي ميحرمني منج دادا متتخيلين شكد جنت محتاجة اسمع هالكلام

وانتِ نزلتي بحجاياتج هاي مثل المي البارد على گلبي

ام حسن : اروح فدوة اني لطولج الحلو ولج انتِ ثمرة العزاز احطج بروحي لو ضاكت عليج الدنيا وناسها

زبيدة : ابتسمت ورجعت بوست اديها وكمت صعدت لغرفتي ، دخلت بوجهي للحمام سبحت ، داغسل بوجهي وطخيت خشمي ، شاغت روحي

ابتعدت عن الدوش ووكفت كدام المرايا ، اباوع لخشمي صاير احمر ويوجعني من الزمه

كسر بيدك يالمتسمى كون حرامات ساعدتك لو عايفتك تكطم لسانك وبعد منسمعلك صوت من عاب لذاك الصوت المطبگ

رجعت للدوش شطفت جسمي وسميت بسم الله ولفيت جسمي بالمنشفة وطلعت بدلت ونمت

_______________________________

ديمة : حاضنه الكوشة مالت الجرباية وكاعدة اكش ذبان مثل ميكولون

من يوم سالفة زبيدة و اني وامين منتحاجه ، جنت متوقعته زعلان من كلام زبيدة عني بس طلع زعلان لان اني واخواني زعلنا زبيدة

وبيومها كبت العيطة بينا للستار وجانت هاي المرة الاولى الاشوف بيها امين عصبي ويصيح بوجهي

گلي انتو متستحون وموخوش اخوه وانطيتو باختكم كدامي اني ويوسف وحرجتوها وجرحتوها بكلامكم

تالي حجايه مني وحجايه منه انتهى بينا اليوم متعاركين وهاي لليوم احنه منتحاجه

لا اني احاجي ولا هو يحاجيني حتى من اصبله غده من يجي ميقبل ياكل والعشه اذا دره بيه اني المسويته يعوفه على حطته ويكوم

شكيته لخالة لان تصرفاته نرفزتني وتلفت اعصابي اني ما اتحمل احد يحاربني نفسيًا هيج اتخبل وبيومها خالة كشفتلي احد طباع امين الي مجنت اعرفها ولا ملاحظتها

امين بطبعه كلش نحس اذا تعارك ويه احد لا يقبل يحاجي ولا يكعد ويا بنفس المكان حتى الاكل اذا هو جايبه لو مسوي ميمد ايده عليه لو يتگطع ويضل گالب خلقته وماله اي شغلة وكإن هالشخص اصلا مموجود كدامه

واني هياتني صارلي ايام حرت شلون اتعامل ويا وماكو نتيجة ، سمعت الباب يندك ، كمت فتحتها طلعت خالة هناء

هناء : هاا يمه خوما نايمة

ديمة : لا خالة كاعدة

هناء : بيها مجال اكعد اسولف وياج شويه ؟

ديمة : طبعًا خالة صدك تحجين اني عيوني انطيها الج ، تفضلي تفضلي

كعدت على القنفه واني كعدت يمها ولزمت ايدها ، كولي خالة حبيبتي محتاجة شي امريني

هناء : صدقة للسانج الحلو هذا ، لا يا امي ما محتاجة شي بس اجيت احجي وياج علمود مشكلتج انتِ وامين

والله استحي اتدخل بيناتكم بس شفت الوضع زاد عن حده بينج وبين امين وهاي راح يصيرلكم 3 ايام متتحاجون

ديمة : لعد شبيدي اني يا خالة مشفتي شسوه بيه حتى من حاجيته فشلني وما رد عليه الي يشوف ردة فعله هاي يكول كاتلته عزيز

هناء : ميخالف يمه هو امين طبعه صعب شويه وميحب الغلط بس والله العظيم گلبه ابيض ثلج ويحبج يموت عليج وصدكيني يتمنى يحاجيج بس راسه المحجر هذا ميخلي

ديمة : لعد شنو هو عنده كرامة وميحاجيني واني المفروض اتنازل عن كرامتي واحاجي شنو معندي شخصية لو بايعة كرامتي

هناء : حشاج يمه بس المره والرجال ما بيناهم هالسوالف همه ستر وغطة على بعض يا امي وبعدين حاولي تعذري لامين تدرين بي انتِ مضغوط وطول يومه بالشغل واعصابه تلفانه ميتحمل حجاية

عبالج سهلة عليه رجال شكبره شكده يجي اليسوه والميسوه يهينه ويعيط بي شلون الزعطوط وهو المفروض منه يسمع ويسكت حتى يحافظ على لكمه بيته

ميستاهل تبادرين انتِ بالصلح وتفرحي شويه ، حسسي زعله جبير عندج وميهون عليج تضلين انتِ متزاعلين

ديمة : اني اصالحه !! لالا خالة

هناء : شبيج ولج انتِ هم على كيفج ويه وليدي تره هذا حبيب گلبي ما اقبل عليه ولج والله امين خوش امين ومو لان ابني جاي اكلج هيج

امين هواي تعب بحياته ياديمة يستاهل تكون عنده لعابة مثلج تداري وتهتم بي

تعوضه عن التعب العاشه بحياته وصدكيني يا امي ومالج عليه حلفان والله امين يحبج وصارله 3 ايام يلوب عليج وكل يوم يجي يسألني عن علاجج ويگلي روحي سألي ديمة خاف محتاجة شي لو تريد اجيبلها شي حتى اجيبه الها بس لتكولين اني الجبته

ديمة : والله يا خالة بدون متحجين اني ادري بأمين وردة وماكو منه بس خالة عصبي شكد هو هادئ بس من يصير عصبي اخاف منه والله ذاك اليوم كمت ابجي من ورا

هناء : ههههه بعد روحي شنو تخافين ولج قابل يسترجي يسويلج شي غير اكطعه

ديمة : ابتسمت ، عفيه خالة شكد حبابه انتِ شو تعاي ابوسج

هناء : ههههه اني الابوسج يبعد روحي

ديمة : ابتعدت واني مبتسمة بوجها

هناء : هاا هسه مثل ما حجيت وياج من يجي امين كعدي ويا وتفاهمو وعسى ربي ميشوفني بينكم يوم موزين

ديمة : امين خالة

هناء : يله اني رايحة امدد شويه انتِ لتنامين امين على جية تلگي وتغدو سوه ما دامج ما اكلتي ويانه

ديمة : صار خالة ، طلعت خالة واني صفنت بكلامها

هو من ناحية زعله فما اكدر اكول انُ مو حقه يزعل اني ودنيا ومعين وامي هواي مصخناها ويه زبيدة

مدري شجانه تسودنا عليها واحنه صدك ما معصومين بس هم هي ميصير تعيرنا ولوما الله ساتر وحاجيه بشكل مبهم جان امين افتهم قصدها وصارتلي مشكلة بس ربنا يگدر يحلها

اوووف يا زبد اوووف والله الصار كله من البداية غلط بغلط البدر منج غلط والبرد منا غلط

باوعت على اظافري ، صارلي يومين ممصبغتهن ، شبيج دمدم شجاج صايره مهملة والله عيب عليج

وبعدين شنو هالهوسه الي بالغرفة عود هاي انتِ ام الترتيب والنظافة تاليها غرفتج مبعثرة هيج

كمت نظفت الغرفة وخليت فرشة وردية وتلبسية للميز وللبراد بلون وردي هم

من كملت كمت فتحت الكنتور حتى اشوف شريد البس ، عجبني البس شي احمر

طلعت فستان بيتي لونه احمر شمرته على الجرباية ودخلت للحمام جلفت روحي وسويت جسمي شكد اتمنى اسوي ليزر بس ميصيرلي لان شعر جسمي اشقر وماكو ليزر للشعر الاشقر

كملت وطلعت ، فرشت غراضي على الجرباية ، بالبداية بردت جسمي بالثلج حتى ميطلعلي حبوب وتبقى بشرتي تلمع ولازمه نفسها (مشدوده)

رطبت جسمي ورتبت اظافر رجليه واديه ووصبغت اظافري بلون احمر وتمكيجت مكياج خفيف بس خليت حمرة بلون اظافري ولبست حجول برجليه
وسرحت شعري وكعدت متنهده

اوووووف اي هسه ارتاحيت ، باوعت للساعة امين على وصول ، باوعت لروحي مو مال اطلع هيج واذا البس حجاي يتخربط شعري ، اتصلت على بصائر تنزل تحمي الاكل ما دامها خلصت امتحانات خلي استغلها

اندكت الباب ، اباوع دخلت بصائر ضحكت من شفتها حنه ولافه راسها بعلاكة

بصائر : شنو هالجمال الخاتل هنا عمي

ديمة : انجبي لتخجليني

بصائر : اييي عيني هاي كلها لامون عمي لو هيج الصلح لو مينراد ياريت كل الناس تتصالح هيج

ديمة : نزعت الشبشب من رجلي ، اذا متسكتين ابسطج والله

بصائر : دباع الشبشب ههههههه ولج انتِ وين تلكين هالسوالف

ديمة : باوعت للشبشب جان لونه احمر وعلى شكل فراوله

شبي والله حلو

بصائر : هو من ناحية حلو فحلو بس غريب ، ولج انتِ سوالف الزعاطيط هاي شوكت تبطليها

ديمة : معليج وهسه فدوة امشي حمي الاكل وانتظري علما يجي امين صبي وانطي الصينية حتى يتغدة فدوه

بصائر : تدللين انتِ وامين

ديمة : اروحلج فدوة صيدلانيتنا ، طلعت واني كعدت ارتب مكياجي على ميز التواليت

شويه وانفتحت باب الغرفة شفتها بصائر ، هااا بصورة

بصائر : اريد اطلع ملابس لامين حتى يسبح

ديمة : عقدت حواجبي باستغراب ، ليش مو اني محضرتله تراك وعايفته اله بالحمام هو والمنشفه

بصائر : ما اعرف والله بس هو صاحلي گلي روحي جيبلي ملابس حتى اسبح وانام

ديمة : تنرفزت يعني حتى الهدوم ميقبل يلبسهن والله شنو لان اني الطلعتهن اله ، ميخالف امين اني اعلمك

رحت انطيتها غير ملابس وخاولي وهي اخذتهن وطلعت ، ضليت كاعدة لحد ما فات

من شاف الغرفة ضل صافن ، يباوع بالغرفة ويهز ايده باستهزاء

اباوعله راح كعد على الجرباية وينشف بشعره انداريت وحاجيته ، الله يساعدك ، ما رد عليه واصلا
من طب ما باوع بوجهي

ذبيت العطر من ايدي وكمت وكفت كباله ، مو كافي امين متحس الموضوع زاد عن حده وتحول من سالفه تافهه لسالفة عويصه تغث

حباب كافي والله نفسيتي تعبت من المشاكل واني مريضة مابيه اتحمل بعد والله على ساعة من القهر يرتفع سكري واموت تقبل اموت ؟

امين : اسم الله عليج شهالحجي الماصخ هذا

ديمة : كعدت كدامه ولزمت اديه ، اني اسفه ما قصدي اضوجك والله

امين : هاي الكلمة مو المفروض تكوليها الي انتِ ما سويتيلي شي ولا غلطتي بحقي بس غلطتي بحق اختج وحجيتي وياها حجي يوجع

اني لان احبج وحاسب اني وياج واحد ما اقبل تغلطين لان الغلط اليبدر منج معناها بدر مني
وياج

وهم اختج يا ديمة متستاهل كل الكلام السمعته منكم بالنهاية هي بهالزواج ما راح تضر غير نفسها

لا راح تجيبلكم سمعة مو حلوة ولا راح تاذيكم اذا تزوجت هارون فمالكم حق تسوون كل السويتو وياها

ديمة : والله احنه علمودها منريدها تتزوج وتنسگم ويه واحد مثل هارون وهي سوده عليه صارلها سنين مشلوع كلبها انوب يجي هالزواج چماله عليها

امين : وإن اكو شي اسمه اسلوب مو كلشي بالعرك والحجي اليدگ بالعظم مو بس بالگلب حرام عليكم كسرتو بخاطرها وهي بحاجتكم قابل شعدها غيركم هي من بعد امها وأبوها انتو الي بقيتولها بهالدنيا

ديمة : والله كلامك صحيح بس هي هم ما قصرت

امين : انتو البديتو فتستاهلون الطلع منها تجاهكم يعني عادي انتو تغلطون بحقها بس هي حرام ترد عليكم بنفس الطريقة السخيفة الحجيتو بيها وياها

ديمة : هزيت راسي اني اسفه

امين : كتلج اني ما محتاج تتأسفين الي اذا تردين تعتذرين روحي اعتذري من اختج وتصافي وياها ،

انتن خوات وحدتجن المفروض تصير سند للثانية الدنيا خلصانه يا ديمة وكلشي بيها يتعوض غير
الاخوة

وانتو خوتكم خوش خوة يا عيني حريمة
تخربون علاقتكم الحلوة هاي علمود هيج موضوع

ديمة : ابتسمت خلص اني باجر الصبح راح اروح لزبيدة واعتذر منها على البدر مني وان شاء الله تقبل تصالحني

امين : عفيه بيج هذا المتوقعه منج من البداية

ديمة : هسه خلصنا من موضوع زبيدة نجي لموضوعنا ، ما راح تصالحني

اباوعله ابتسم وحرك اطراف اصابعه على خدي

امين : اصالحج واني الممنون بس انتِ كليلي شلون حابة اصالحج واني خادم

ديمة : عجيب شكد يتغير شكلك من تصير هادئ صراحة متنطاق من تصير عصبي

امين : اكره الغلط وما احب الناس المتفكر قبل لا تحجي

ديمة : بس ماكو بشر ميغلط

امين : صحيح ولهالسبب لازم كل انسان يتعاقب على اخطائه حتى يتعض وميرجع يخطأ مرة ثانية

ديمة : يعني انت كمت متحجي وياي عود يعني دتعاقبني لان غلطت بحق اختي

امين : بالضبط

ديمة : ضحكت شنو واثق إني احبك لهالدرجة حتى ما اغلط بعد علمود لتزاعلني

امين : ليش منو الگال انتِ تحبيني ؟

ديمة : بهت وجهي من سمعته شكال ، اباوعله ابتسم وهز راسه

امين : شبيج تباوعيلي هيج اني تره ادري بيج متحبيني

ديمة : ششـ شهالحجي امين

امين : ليش تنكرين اني وياج ندري انتِ ماعندج مشاعر حب تجاهي ومتحبيني بقدر واحد بالميه من حبي الج

تره مو طفل اني ياديمة ، الكدامج عاش ظروف وعاشر ناس خلته يفتح كل عين هالكد حتى يكدر يعيش

فمو صعبة عليه من بعد هالعمر اميز المره العايشه وياي تحبيني لو لا

بس تدرين اني ما زعلان منج لان ماعندج مشاعر تجاهي بالعكس اصلا اني عاذرج

لان بحكم كونج ماعندج اختلاط ولا حشاج صاحبة علاقات سابقة فطبيعي تحسين بصعوبة بتقبل هالعلاقة البيناتنه بسهولة واي وحدة مؤدبة مثلج راح تسوي مثلج

ديمة : اباوعله اخذ اديه بوسهن وخلاهن على ركبته وحاوط خصري باديه

امين : بس وعد عليه يا ديمة مع الايام انتِ من ذاتج راح تحبيني مثل ما اني احبج ويمكن اكثر

ديمة : ليش واثق هيج ؟

امين : لإني حبيتج بنية صافية وعمري ما نظرتلج نظرة موزينة حتى من جنت انام وتجين على بالي احاول اشتت تفكيري عنج حتى لا بلحظة ضعف
يوسولي الشيطان واتخيلج بحضني وانتِ مو حلالي

اني هديت حبج الي بگلبي لوجه الله وكتله ياربي اني حبيت عبده من عبادك واريدها بس بالطريقة الي ترضيك ومتتعارض ويه قوانينك

وهو سبحانه مدري شلون خله كل الظروف بصالحي
شلون نطق لساني وخلاني اعلنلج عن الي بگلبي ما ادري ، تالي بفضل الله انتِ وياي وكاعدة يمي

فما اتوقع الحب الحبيته الج بنية صافية ما راح يرجع عليه من ناحيتج بالاضعاف

ديمة : حضني واني بادلته بس بدون لا انطق بحرف واحد ، كلامه عگد لساني لدرجة ما كدرت ارد عليه والمشكلة إني بلحظتها بديت احس نفسي حقيرة

امين : يله حبيبتي كومي كعدي واني اروح اجيب الغدة واجي نتغدة اني وياج ، بصائر كلتلي انتِ ما متغديه

ديمة : تصنعت الابتسامة حتى لا ابين شي ، راح هو جاب الغدة واجه كعدت ويا بس كلشي ما اكلت يادوب بس تنقيش

كمل هو واخذله ساعة نوم وطلع واني ضليت طول الليل مزوهرة وحجيه يدك بكلبي بيومها نمت بدون ما انتظرة

احس كمت استحي اباوعله واني ضاحكة عليه ومسويه نفسي ملاك واني المسويته كفيل يخليني انزل من عينه للابد

تنهدت خلي احل مشكلتي ويه زبيدة هسه وبعدين عود اتفرغ لمشكلتي العويصه هاي

______________________________

زبيدة : متمدده بالصالة اگلب بالبيجات كلتلي بيبي طلعي اشتري فستان للعقد واني مالي خلگ روحي مو عاد اطلع بهالحر اشتري جرود

فكلت اشتري من النت واخلص ، داگلب ووكفت عند فستان ابيض حرير موديله قصير وردانه طويلة تول منقش بورد بسيط وياخته طويلة و قماشه هم تول

حرفيًا الفستان جان ياخذ العقل والتفاصيل البي كلش ناعمة وبسيطة

رغم اني ما احب الاشياء البسيطة ودائما انجذب للملابس الي تصاميمها فخمة والوانها حادة مثل الاسود والالوان الجاية على سواد مثل الاخضر المسود والاحمر المايل للاسود هالالوان دائما تجذب نظري واحسها توالم جسمي

بس ما اكدر انكر هالمرة انُ بساطة هالفستان اخذت گلبي ، راسلت اصحاب البيج داسأل عن سعره وسمعت الباب يندك

ذبيت الموبايل وكمت فتحت الباب ، صارت بوجهي ديمة لازمة قالب مالت كيك ووجها يضحك

ديمة : صباح الخير

زبيدة : باوعتلها صفح وعفتها بالباب ودخلت

ديمة : مو دنكول صباح الخير

زبيدة : اهلج مو هنا وبس اني بالبيت روحي لبيت جدج صبحي عليهم

ديمة : خليت الكيكة على الميز وباوعتلها ، بس اني مجايه علمود اهلي اني جايه علمودج

زبيدة : من رخصتج البيت بيتج اني صاعدة بغرفتي اتمنى متزعجيني

ديكة : شفتها تريد تروح جريتها من ايدها ، شبيج هيج نحسه مو داسولف وياج ، تعاييي وتعاييي لتقاوميني اريد اسولف العندي واروح

زبيدة : نترت ايدي منها وخري اني مالي حجي وياج
رجعت جرتني عليها وحضنت ايدي يبوووو شكددد لزگة دخيل الله عوفيني

ديمة : ماا اله نحجي

زبيدة : وخريييي جنج علج لزكتي ، لتبوسيني ايييع حلكج رطب

ديمة : والله ما اعوفج

زبيدة : راح اتقيئ لتبوسينيييي

ديمة : حبابه خلي نكعد نسولف والله العظيم اني جايه علمودج لتكسرين بخاطري

زبيدة : ميخالف بس عوفيني ، عافتني عدلت هدومي وباوعتلها بعد ما مسحت خدي ، احجي شتردين

ديمة : اني اسفة على الصار ذاك اليوم

زبيدة : اي وغيره

ديمة : شبييج زبيدة لتصيرين نحسه مو هياتني اجيت اعتذر منج وداكول اسفة

زبيدة : واعتذارج ما مقبول

اباوعلها كامت تطفر بمكانها ، هزيت ايدي بله هاي هسه متزوجه وباجر عكبه تصير ام

ديمة : حبابة زبيدة والله هسه ابجي فدوة صالحيني وعد بعد ما اضوجج وحتى سالفة زواجج ما اتدخل بيها انتِ بكيفج شتردين تسوين سوي واني اول الناس اخلي ايدي بايدج

حباب زبد اعرفك كلبك طيب وجبير ، ابو التضاريس بداعة جسمك الحلو هذا ترضى تصالحني ، حتى باوع
اليوم كعدت من الصبح وسويت كيكة لاول مرة بحياتي علمودك

زبيدة : باوعت للكيكة وبدون شعور ابتسمت

ديمة : هاا راح تصالحيني والله انتِ وردة وعمرج ما شبهتي مبين الگلب يروحلج فدوة ذاك المعفن

رفعت اديه هاا احضنج ونتصاحب

زبيدة : ضحكت وهزيت راسي ، تعاي عابت لهالطول ، حضنتها وهي بادلتني بقوة ، ابتعدت واني البستها هالمرة

ديمة : لك هاي شنو عيني من شوكت ست زبيدة تبوس بينه

زبيدة : ابتسمت ليش اني شعندي غيركم بهالدنيا

ديمة : شديت على ايدها ولا احنه عدنه بهالدنيا شي اغلى منج ، انتِ الظهر القوي الكمنه نستند عليه من بعد بابا نحبج هواي احنه زبد

زبيدة : اني هم احبكم

ديمة : ما راح تضوگين كيكي والله سويتها من كل كلبي الج واتمنى تطلع طيبه لان اني اول مرة اطبخ وما اعرف اذا حتطلع كيكتي طيبة لو لا

زبيدة : لا مبين من شكلها طيبة عاشت ايدج

ديمة : حروح اجيبلج ماعون وسجينه حتى تضوكيها

زبيدة : راحت للمطبخ واجت تركض ، اسم الله اسم الله شبيج لتوكعين وتتعورين

ديمة : وخري خلي اكصلج قطعة ، قطعت الكيكة ، باعي هالمرة اني كلت خلي اسويها كيكة عادي مخليتلها لا كريمة ولا حشوة حطيت بس جوز عادي

زبيدة : طبعاً عادي ، تعيشين وتسويلي عيني

ديمة : مو تدللين اني عيوني الج

زبيدة : ضحكت دكصي ام لسان

ديمة : تفضلي ضوگيها وانطيني رأيج وعليج الله اذا تجذبين وتجامليني

زبيدة : دجيبي صارلج ساعة تلطمين هي لو مسوية باجة شتسوين

ديمة : فوك ما اسويلج بس هو مو صوجج

زبيدة : هههههه لا اشاقة وياج عاشت ايدج والله

ديمة : اباوعلها اكلت وهزت راسها ، هاا ؟

زبيدة : تخبل ولج

ديمة : والله

زبيدة : والله كلش طيبة ، هاج ضوكي وكلتها

ديمة : ولج صدك طيبة هههه هاي شنو ما توقعتها تطلع هيج طيبة

زبيدة : لان سويتها من كل كلبج ونيتج صافيه طلعت وياج طيبة

ديمة : صفنت متذكره كلام امين

زبيدة : شبيج دمدم ليش انكلب وجهج

ديمة : هاا لالا مبيه

زبيدة : باعي حروح اسوي جاي لان كيكتج ناقصها استكان جاي مخدر عدل وتصير روعة

اداريت داروح بس توقفت من شفت دادا دخلت تدفع بمعين بس عيونها حمر شلون الباجية ومعين مو احس حال منها

انوب طبت خالة وئام تمسح بعيونها ، منظرهم وگع كلبي

ديمة : خير ماما شبيج ليش دتبجين

وئام :

****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.