الموت الحي الفصل الحادي وخمسون 51 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

دنيا : كاعدين بالصالة وسمعنا الجرس يندك ، راحت العاملة تفتح الباب

سمعنا صوت ضجة جايه من باب الدخول يتبعها حركة اقدام

كمنا حتى نشوف شكو ، اباوع دخلو اهلي بس اللفت نظري دخلت زبيدة من باب المطبخ تركض ودموعها على خدودها

انلزم گلبي من شفت حالتها ، ركضتلها داريد اعرف شبيها بس هي سبقتني من حضنتني وصارت تنشغ

شبيج زبد شبيج يروحي ليش دتبجين ، ابتعدت ولزمت وجها صايرلج شي ؟ اهلي صايرلهم شي ؟ سولفيلي يگلبي شبيج

زبيدة : دنيا صدك الاسبوع الجاي راح تشيلين المبيضين

دنيا : تنهدت اكيد امي بلغتهم ، مسحت عيونها المو راضيه توكف بجي ، كافي حبيبتي ليش هالبجي اليشوف حالتج يكول لا سامح الله عندي المرض الموزين وهيج منهارة عليه

يحيى : صدك جذب زبيدة هو هيج ، والله عبالنا بيج شي موزين قسم بالله ضغطي هبط من وراج

دنيا : انتبهت على ديمة واكفه وحالتها مو احسن من زبيدة فتحتلها ايدي ، اجتي حضنتني وتبجي

رميم : كولو يا الله يمعودين تره هالبجي مو خوش فال على دنيا وهي عمليتها قربت ، ام معين على بختج والله البجي موزين

وئام : اني بس اريد افتهم احنه الى متى راح نبقى معلعلين هيج والله گلبي انمرد من المصايب هاي كل ساعة واكعين بسالفة تگل للثانية اني الاتعس

عمي والله ناهبين وكافرين وقاتلين ميصير بينا الي ديصير هسه تعبنا والله تعبنا

سهير : استغفري ربج خالة شهالحجي ، هذا اختبار من رب العالمين والحمدلله من اجت السالفة بهيج شغلة ولا بشي اكبر اسم الله

احجيلج شي دنيا خطية طمنيهم عليج عبالهم يمكن احنه دنجذب عليهم

دنيا : بوست خواتي وابتعدت حاضنه امي ومعين ودادا ، كعدت خواتي وانطيتهن مي

هاج زبد اشربي واهدي حبيبتي شنو السالفة يا جماعة شجاكم شكول عليج ماما عود هاي اني وصيتج متخرعيهم هيج

زبيدة : نزلت الكلاص من ايدها ، عوفج منه هسه سولفيلي شنو سالفة عمليتج هاي وليش حتشيلين المبايض

يحيى : بوية دكعدو وركدو شويه وتفاهمو وكعتو كلوبنا احتركت رواحكم بهالحر كطعتولي الخلفه

معين : والله يا عمي من سمعنا الخبر دربنا بعد ما كمنا نشوفه خصوصاً من كالت امي العملية خطرة
ما كدرنا ننتظر اكثر ومنجي نطمئن عليها

يحيى : والله يا ام معين هسه الواحد شيحجي وياج انتِ ، منو الكلج العملية خطرة ، الدكتورة طمنت دنيا انُ بعد استئصال المبيضين بشهر او شهرين راح ترجع مثل الورد فليش تفاولين عليها هيج

وانت يا معين شجاك دمعتك على خدك يكول ميتلك عزيز لا سامح الله ، اثبت شوية بويه شنو سالفتك هيج صاير رجيج ما اعرفك هيج

معين : مو بايدي عمي خير ردت اتخبل من سمعت الاسبوع الجاي عدها عملية شلون تريدني اثبت غير هاي اخيتي ووصية ابوية

دنيا : لزمت ايده حبيبي والله ماكو داعي لهالردة الفعل هاي وداعتكم اني كلشي مابيه وان شاء الله عمليتي كلش بسيطة

ديمة : ان شاء الله يارب تكومين بالف سلامة ومنشوف بيج يوم واحد موزين

دنيا : امين يبعد عمري انتِ ، باوعت لزبيدة الكل شويه تندار تمسح بعيونها

حاجيتها بشقه كافي زبد شسالفه عود هاي اني وياج متزاعلين ودتبجين عليه هيج لو ممتزاعلين شتسوين

زبيدة : بدموع ليش أني شعندي غيركم بهالدنيا ، انتِ ومعين وديمة البقيتولي بهالدنيا ولو اكدر انطيكم روحي والله فلا اقصر

يحيى : لك هاي شنو زبد من شوكت صايرلي حنين وكلبك رهيف هيج

دنيا : اباوع لزبيدة صفنت بوجهه ثواني شلون المستغربة

زبيدة : عمو هاي ليش صابغ شواربك هيج

يحيى : هههههه و الله اول ما طبيتي عرفتج ما راح تفوتيها ولازم تعلقين

اي بويه صبغت شواربي وناوي اجدد شبابي واطگ الثانية بحيل الله

دنيا : اباوع لخالة رميم شهكت ورفعت اديها

رميم : ييييمه هيج والله يهديك تعرس وتخلصني منك ومن سوالفك الفاته گلبي

يحيى : رحم الله والديج يا اصيلة عمي هي هاي المرة التوب

رميم : هههههه خو انت كيفت

من رخصتكم خلي اكوم اجيبلكم شي يبرد كلبكم شلون عصير رمان سويت اليوم يلوك لوجوهكم الحلوة

تعاي ريري (سهير) ساعديني خلي نبرد گلب الجماعة سودة عليه اجوي دربهم ميندلو من الهبطة

وئام : ماكو داعي رميم نريد نروح والله لوما اصرار زبيدة وديمة ما جان اجينا بهيج وقت

يحيى : شهالحجي خوية وين تردون ترحون

وئام : نرجع للبيت غير ما دام الجو زين لتصير الظهرية ونتوازة بالحر يله يمه كومو

يحيى : والكعبة الشريفة فلا تطلعون وغداكم هنا اليوم ، عمي والله عيب تجونه ونخليكم تطلعون هيج هو احنه اصلا شنو شفنه منكم

رميم : ماكو طلعه اليوم غداكم يمنا ، بعد روحي يوسف شلون سمجات راح يجيبلنا

وئام : منكدر غير مرة والله

دنيا : اي ماما فدوة ابقو

يحيى : لتتوسيلن بيهم بوية اني حلفت بعد وكلام زايد ما اريد والا ازعل والله

وانتِ عيني شبيج صافنه صفنه المطي كنالج اختج مابيها شي لتكعدين تلطمين تره ما عايزنا كئابه

زبيدة : انت ليش متفك ياخة عني

يحيى : دكلي تبن وكومي سويلنا تمن احمر ويه السمج وكثري للتمن بصل ما اوصيج

زبيدة : مابيه حيل

يحيى : كومي لج كومي مابيها حيل ، راح اغديج شلون سمج اليوم بعمرج ما ماكله منه بحياتج وهم على حسابي شتردين بعد غده وببلاش عسل على كلبج ام فليس

زبيدة : اباوع لخالة تخوزر عمو

يحيى : ليش تخزريني شنو يمه مستحيه منهم بوية اهل احنه شبيج انتِ جنج بومة فاتحتلي كل عين شكبرها

رميم : هههههه بله شحجي وياك هسه ، كومي زبد خلصينا من عمج ولسانه

دنيا : لزمت ادين خواتي وكمت اخذتهن للمطبخ صرفت العاملات حتى يرتاحن واحنه اخذته مكانهن

سهير : زبودة ذاك التمن منكعي احنه خلي اجيبه الج

ديمة : سهير اذا محتاجة شي اني اساعدج

سهير : لعد فدوة سويلنا الزلاطة واني حروح اجهز التمر والبصل

ديمة : تدللين

زبيدة : سولفيلنا شنو سالفة الاكياس هاي ومنين اجتج

دنيا : والله يازبيدة ما اعرف فجأة كام يصير عندي ألم مميت بظهري ومحالبي ( الحالبين ) انوب رجعت اجتني الشهرية وهي ما صارلها غير اسبوعين من كملت

تالي رحت للطبيبة ومن شرحتلها الحالة طلبت مني اسوي سونار ومن سويته طلع عندي اكياس داير مداير المبايض ولازم اسوي عملية اشيلهم

ديمة : زين مينفع تفقسهم الج

دنيا : حاجيتها والله كلتلي ميصير لان حجم الكيس الواحد بگد الرمانه فلازم اشيلهم قبل ليكبرن

زبيدة : يمه اسم الله زين معقولة ما حسيتي

دنيا : والله لا ببالي اصلا انصدمت من كلتلي

ديمة : يله ميخالف حبيبتي لتضوجين اكيد الله يعرف شنو الصالح الج

دنيا : والنعم بالله

زبيدة : بالمناسبة دنيا حسبي حسابج ، ان شاء الله بعد عمليتج تجين تبقين عدنا بالبيت حتى ندير بالنا عليج منا لمن تكومين بالسلامة ان شاء الله

ديمة : اي واني اجي ابقى وياج حتى نتساعد عليها

سهير : لا عيني شنو قابل احنه حنقصر وياها اصلا اني راح اقدم اجازة علمودها وعيادتي راح اسدها اسبوعين حتى اتفرغ واداريها وخالة وجمانه راح يتكفلن بتيم ماكو داعي تطلع من البيت

زبيدة : حبيبتي ميحتاج تحجين احنه ندري كلكم خير وبركة مستحيل تقصرون والله

بس المشكلة من ناحيتنا احنه ، احنه نضل قلقين عليها اذا مو كدام عيونا تصير منرتاخ وهم منكدر نعوف البيت ونبقى هنا فالافضل تبقى ببيتنا

سهير : براحتكم بعد واني اذا تحتاجوني بشي تلكوني جاهزة

ديمة : متقصرين يكيك ، هاا شكلتي دندون

دنيا : خلي اشوف يوسف والله كريم

زبيدة : لا بكيفج ولا بكيف يوسف اني كلت تبقين عدنا يعني تبقين عدنا

دنيا : والله بعد منج ليوسف اني معليه

انداريت شفت جمانة تدخل وبايدها تيم لابس تراك اصفر ولافتله خاولي اصفر ومطبگته اله بعد روحي السابح

شوف ، سوده عليه جمانة فوگ خبصه ولدها انوب بلشتها بتيم ، هي تسبحه وتحفظة وتجيبه الي تخاف اشيله لو اسبحه وااذي روحي

والله البنات ابد ما قصرو ويايه وما اعرف شلون اجازيهم اليشوفهم يكول ذني خواتها وهيج شايلات همها مو نسوان حماها عكس ابريز ولا يمها واني بكل الاحوال مو بحالها

جمانة : السلام عليكم حبايب ، هاج حبي وهاي الامير سبح وصار نظيف ويخبل

دنيا : اخذت تيم منها ، بعد عمري تعبتج

جمانة : يمعودة شنو السالفة قابل تيومي شيختلف عن ويلادي ، شلونجن يبنات تعالن ابوسجن عذرني جنت ملتهيه ويه تيومي

زبيدة : سلمت عليها وباوعت لتيم ، هاا تمتم تعال خلي ابوسك حبيبي

تيم : ولي ما احبج

دنيا : ليش حبيبي هاي خالة زبيدة تحبك هواي

تيم : ما احبها بس تعڤ (تعض)

زبيدة : اني !! يمته ولك عضيتك

تيم : جدابه عڤتيني منا ولي ميريدج

ديمة : اباوعله لازم خده ويعد ويصف على زبيدة ، يمه متت عليه انوب لابسلي اصفر

تقربت منه جؤ جؤ ليش هيج زبيدة مو خطية تيومي ، تعال حبيبي اني حبابه خلي تولي زبيدة

اخذته من دنيا بوسته وهو باسني يروحي شكد ينحب ، شلته وانداريت على زبيدة ، خلي خالة زبيدة تبوسك خطية متعضك والله

تيم : مااا

زبيدة : مديت ايدي بجيبي طلعت جكليته ، طبعا جيوبي مليانه جكليت وحامض حلو زيد ابن عيسى كلما يشوفني ينطيني واني ما اكول لا اجيب واعبي بجيبوبي

قدمت الجكليته منه ، اني اسفه بعد ما اعضك هاك حبيبي هاي الجكليته الك

اباوعله اندار وباوع لدنيا

تيم : ننه اخدها ؟

دنيا : اي حبيبي اخذها من خالة وخليها تبوسك

زبيدة : اخذها مني واني شلته بوسته وفتحتله الجكليته انطيتها اله ورجعته لدنيا ورحت اكمل التمن

داحمس البصل وشفت يوسف يدخل

يوسف : السلام عليكم ، هاي منو عدنا ، اكول ليش البيت يلالي اثاري الحبايب هنا

ديمة : هلا يوسف شلونك

يوسف : بشوفتج بخير

زبيدة : اباوعله تقرب وكف يمي

يوسف : هاا عمي الله يساعدهم

زبيدة : وخر لتحاجيني زعلانه اني

يوسف : والزهرة حقج

زبيدة : زين تدري

يوسف : عوفج من الزعل هسه تدرين جبت ثرب وياي هسه ادري بيج تحبي وهسه اتبله واطلع اشوي الج شوي ما ماكلته بعرس اهلج

زبيدة : ضحكت على سوالفه

يوسف : هههههه اي عمي ضحكي والله ميهون عليه زعلج انتِ من ريحة العزاز

زبيدة : اممم كول هيج ، باوعتله بالمناسبة على طاري العزاز تره دنيا من تسوي العملية تجي عدنا

يوسف : شنو يمه خاف متقبلين !!

زبيدة : مثل ما سمعت والله

يوسف : اي مو تدللين

زبيدة : لا جديات يوسف والله اذا متخليها تجي عدنا والله بعد صدك ازعل عليك

يوسف : هسه الله كريم منا لاسبوع نشوف شلون تصفى

دنيا : اباوع ليوسف وره ما صالح زبيدة خله السمج على السنك وغسل واجه

يوسف : هاا حبيبي شلونج خوما بيج شي

دنيا : ابتسمت لا مابيه شي والله

يوسف : تصالحتي ويه زبيدة مو

دنيا : اي الحمدلله

يوسف : الحمدلله يله لعد خلي اروح اتبل السمج واشوي حتى تاكلين وتاخذين علاجج

دنيا : راح يوسف والولد يشوون وزبيدة كملت التمن واجتي كعدت يمي هي وديمة

اكلج شو اشوفج كاعدة ما بقى شي على عقدج وانتِ كاعدة ومصفطة

زبيدة : جنت داختار الفستان بس هسه لا راح ااجله

ديمة : ليش تأجلي ؟

زبيدة : أولا عندج عملية دنيا وثانيا سفر معين

دنيا اذا سوت العملية متكدر تحضر العقد واني ما اريد وحدة منجن ما موجودة ومعين ما بقى لسفره شي اقل الشهر ويسافر فلازم اجهزله كلشي يحتاجه

ديمة : زين معين منو راح يروح ويا لاميركا علمود العملية

زبيدة : راح يروح ويا عيسى

ديمة : زين خلي اروح ويا اني خاف عيسى ميكدرله

زبيدة : ميصير لان معين اقل شي راح يبقى هناك ست شهور وانتِ بعد عطلة الجامعات لازم ترجعين تقدمين اوراقج وتداومين حتى لتروح عليج السنة مرة ثانية

ودنيا مريضة واني جدي ميخليني فالافضل واحد من الولد يرحون وعيسى هو الكايل لمعين اروح وياك تدرين باخر فترة هواي تحسنت علاقة عيسى بمعين والظاهر اكو ميانه بيناهم ومعين مرتاح ويه عيسى

دنيا : هيج ومعين يرجع يمشي غير اطير طيور

زبيدة : ان شاء الله ، الطبيب كال نسبة شفائه بره عاليه ، العلينا احنه نسوي والتسهيل من رب العالمين بعد

ديمة : بس تدرن جدو شكد طلع حباب يعني رغم قلة الفترة الي التقينا بيها ويا ورغم المشاكل ما عاف معين ودفع كل هاي التكاليف علمود يساعده

دنيا : اي والله ما توقعته هيج طيب اااخ لوما سالفته ويه بابا جانت حتكون اله معزة جبيرة بكلوبنا

زبيدة : هزيت راسي متنهده والله لو تعرفن هالطيب شسوه

قبيلة رب العالمين على السوا بيه وبذاك الميسمى شكول عليه شبچ شعيط بمعيط لا شعيط يطيق معيط ولا معيط يكدر يتحمل شعيط ، حسبي الله عليك يا جدي

ضلينا كاعدين علما كملو الولد واحنه كمنا صبينا وكعدنا نتغدة رغم كل الي صار والهبطة الاكلناها علمود دنيا بس فرحنا من شفناها مرتاحة عد بيت عمو هيج

واكثر شي جان مفرح بالنسبة النه من كالت دنيا انها تصالحت هي ويوسف ورجعت العلاقة بيناتهم مثل
اول

يحيى : اي معين شصار على سفرتك جدك خابرني قبل جم يوم وسولفلي ، خلص ان شاء الله نوبت

معين : اي والله عمي ان شاء الله خلال هالفترة تكمل اجراءات السفر والسكن وعود نسافر

جياد : بيها الخير خوية الله يكومك بالسلامة ان شاء الله

كريم : امانه اي شي تحتاجة ليردك الا لسانك

معين : رحم الله والديكم متقصرون والله

يحيى : ما كتلي بعدلك شكد وتسافر

معين : تقريباً شهر

يحيى : لعد خوش همزين كتلي حتى الحك اكمل شغلي واجي وياك

دنيا : كلنا صفنا على حجاية عمو

يحيى : شبيكم صفنتو بوجهي جنكم هنود عايزكم بس تبديل زي

معين : العفو عمي بس ما استوعبنا قصدك ، شنو تجي وياي ؟

يحيى : شنو الما استوعبته من كلامي ، جاي اكول راح اكمل شغلي واسافر وياك احجيها الك بالفرنسي خاف لغتك العربية ضعيفة

معين : بس عمي انت عندك مسؤوليات وشغل متكدر تعوفهن لفترة تتجاوز الست شهور

وهم ماله داعي اني عيسى ابن عمي عبدالله راح يجي وياي يعني ما راح اسافر وحدي

يحيى : وإن بويه اني هذا واجبي تجاهك يعني هسه لو واحد من ولدي صارله حادث واضطر يسافر بره يسوي عملية هل من المعقول اعوفه وحدة يسافر لو ادز ويا ابن عمه

بويه انت ابني حالك حال علي وكريم وجياد ويوسف وحليم متفرق عنهم قيد شعره ولان انت متفرق عنهم بشي ميصير اعوفك تسافر وحدك

معين : ميخالف عمي انت حجايتك سيف على راسي وركبتي

بس صدكني ماله داعي غير هيج اني من راح اسافر راح يتحمل مسؤوليتي كادر كامل يعني ما راح احتاج احد وعيسى من راح يسافر وياي فعلمود لا ابقى وحدي وامل لا اكثر ولا اقل

وتره جدي من هسه تواصل ويه المستشفى جهز كلشي هناك حتى الكادر حجزه الي فميحتاج والله اني لو يحتاج ما استحي منك اول الناس اكلك

وهم حط ببالك عرس زبيدة احتمال يصير وره ما اني اسافر وانت بمقام ابوية والمفروض انت التسلمها لرجلها خوما اني وانت ما موجودين

يوسف : لعد اني واخوتي وامين وين رحنا شبيكم سويتوها كلش

معين : والنعم منك ابو تيم انت والشباب بس انتو تدرون علاقتنا ببيت جدي كلهم متوترة واني ما استحي احجي كدامكم عمامي وعماتي

عيونهم تنطط شر وما متقبلين وجودنا ويدورون علينا الزله واني الصراحة اخاف على زبيدة وام حسن وامي لان كلشي اتوقع منهم ومن نسوانهن ووجود عمي يحيى مهم حتى ليخلالهم الجو ويستفردون بيهن

يحيى : ادري هسه يا زبيدة متوازية على العرس هسه متأجليها حصرتينا هالحصرة

زبيدة : تره اني لو عليه ااجل العرس ليوم القيامة ، اااخ باوعت لمعين باستفهام ليش كرصتني ؟

خزرني بدون ميجاوبني

معين : عمي زبيدة مالها دخل جدي المستعجل على العرس واني كتله براحتك بس بشرط كون احضر عقدها واامن عليها ياله اسافر وهو ما گال لا

فمثل ما كتلك ميحتاج تجي وياي والله

يحيى : براحتك بويه بس مع هذا اني ما راح اعوفك ، راح اسافر وياك ومن تسوي العملية وتكملها واني اطمئن على صحتك واتأكد انك صرت بخير عود اعوفك تكمل علاجك الطبيعي وارجع غير هذا الكلام ماعندي

معين : هاهي عمي الي تشوفه

يحيى : على بركة الله ربنا يسهل علينا

الكل : امين

زبيدة : ارتاحيت من سمعت بعمو راح يروح ويه معين على الاقل اامن انُ اكو احد ثقة من ناحيتي يروح ويا

ضلينا كاعدين للمغرب كام يوسف واخذنا ، وصل ديمة وانوب وصلنا للبيت

دخلت معين لغرفته ، نيمته على الجرباية وغطيته حتى ياخذله غفه ، عدلت المخده جوه راسه وطلعت

معين : زبد

زبيدة : هاا عيوني

معين : انتِ متأكدة من قرارج ؟

زبيدة : ابتسمت اي متأكدة واتمنى تكونون ويايه وتعوفوني اتصرف براحتي

معين : الي تشوفي حبيبتي اني وياج حتى ينقطع النفس مثل ميكولون

زبيدة : دنكت بست راسه وطلعت ساده الباب ورايه

اباوع لدادا وخالة وئام جاي يتجهزن لصلاة المغرب

ام حسن : وين طالعه حبيبتي ظلمت الدنيا

زبيدة : مختنكة شويه راح اتمشى واروح لجدو احجي ويا على العقد

ام حسن : لتتاخرين ولتتعشين هناك

زبيدة : صار

عدلت حجابي وطلعت ، ردت اروح للاسطبل بس كلت خلي احاجي جدي بالاول

دخلت لبيت جدي لكيت هيام شاده راسها وتون وكاعدة يمها الحنينة بيداء تهدي بيها

طبعا ما استغربت لان تعودت على هالفلم من يوم الحجه جدي وهيام وكعت على اثر الخبر السمعته ودخلت للمستشفى وهاي صارلها ايام تنعى وعمتي بيداء ومرت عمي منال يواسن بيها ومملحكات

والاحلى انُ الباقين مغلسين عليها عبالك متعودين على افلامها

حمحمت وسلمت

حمزية : هلا بيبي وعليكم السلام

زبيدة : جدي موجود

حمزية : اي يمه بغرفتنا صعديله بس شتردين منه

زبيدة : باوعت لهيام وابتسمت اريد اسولف ويا بخصوص العقد

بيداء : عمه شو جنج مفلفلة وما مصدگه حصلتيلج رجل

هيام : اااخ ولج يمه راسي طبعًا تكيف تلكيها ما مصدگه ليش الراح تاخذه شويه

هذا هارون زينة الزلم ، ادب وجمال واخلاق وشخصية بعد طولي وين صاحلها مثله بنت وسيلة العانس

زبيدة : اجيت اردها رد اخليها متعرف تحجي والله بس سبقتني عمتي بدرية

بدرية : خفي علينا يا هيام اني وانتِ ندري بالمستور ، ابنج جمال وشخصية صح بس ما لا ادب ولا احترام
لا عنده جبير ولا صغير ولسانه مثل لسان الحية يندس ويضم راسه

اصلا هو ميطول ياخذ فلگه گمر مثل زبيدة موزين منها راح تقبل تاخذه وهو كل هالسلبيات بي لا وفوكاها مريض منو تقبل بابنج انتِ وكاعدة تتفيكين علينا تطولين بزر وسيلة انتِ

زبيدة : عمتي تحجي واني عيني على هارون الواكف على الدرج

للحظة تمنيتها ما حاجية هيج لان لو مهما يكن محد يقبل على نفسه يسمع هالذم

توقعته راح ينزل يتعارك لو على الاقل يعتب بس فاجأني من نزل ولا كإنما سمع شي

انوب امه شافته كامتله بسرعة والدموع تلالي بعيونها
هاي الثانية رغم حقارتها بس احسها تنگلب شخص ثاني من تشوف واحد من ولدها

هيام : ههـ هاا حبيبي هارون وين طالع الدنيا مغرب

بيداء : اي عمه ميصلح عليك

هارون : ميخصكم

زبيدة : نطق هالكلمة وطلع متجاهل الكل ، صفنت وجهه جان خالي من الملامح معقولة بعد ما سمع كلام عمه بدرية ما زعل

يربي شنو من بشر هذا

بدرية : شفتي الادب والاخلاق الشايلها ابنج كلش يحترم الاكبر منه صدك هنيالج يبنت اخويه

حمزية : كافي حجي ماصخ شبيج بدرية انعديتي وبعدين ايالج اسمع منج هالكلام مرة ثانية هارون خط احمر اذا تتعدي معناها تعديتي عليه اني والله اغضب عليج الى يوم الدين اذا تجيبين طاري بالموزين

بدرية : هارون ابن اخوية واني احبه مثله مثل صاحب عندي الله يشهد بس من امه تكعد تتعيقل علينا وتبيع جذب على بنت اخوية اكلها اوكفي

لهنا وحدج اني العندي زبيدة خط احمر هاي بنت وسيلة واني اليمس بزر وسيلة وياسر مستعدة اكله بسنوني

زبيدة : يربي شهالعائلة هاي كل واحد كاعد للثاني وكلمن مسويله حزب ضد الثاني

عفتهم وصعدت لجدي ، وصلت للغرفة ودكيت الباب ، دخلت بعد ما سمحلي بالدخول

السلام عليكم

النوح : وعليكم السلام

زبيدة : ممكن اخذ من وقتك شويه

النوح : هلا بيج جدي تعاي كعدي

زبيدة : كعدت يمه ، باوع جدو اني اجيت احجي وياك بخصوص موضوع العقد

النوح : اي شبي

زبيدة : اريد ااجله ، بعدني ممكمله كلام وهو كام على حيله منتفض

النوح : شنووو تأجلين العقد بكيفج هو احنه شتفقنا

زبيدة : اني ما كتلك الغي جاي اكول اجله وتره مو بمزاجي جايه عندي اسباب

النوح : وضحيلي اسبابج ست زبيدة

زبيدة : دنيا اختي الاسبوع الجاي عمليتها واعتقد انت تدري فلو سوينا العقد بعد اسبوعين ما راح تكدر تحضر لان يرادلها شهر ياله تكدر تكوم على حيلها واني اريد خواتي وياي بهيج يوم

صحيح اني ما تزوجت على مزاجي وانفرض عليه هذا الزواج بس مو بمعناها راح اخلي يمر هيج بدون ما اعيشه بوسط خواتي وصديقاتي حالي حال اي بنية طبيعية

النوح : يعني استناداً على حجيج تردين العقد يصير بعد فوك الشهر مو

زبيدة : اي

النوح : طيب بس عندي شرط

زبيدة : يمكن هالرجال حتى ربع الدينار الينطي للفقير بالشارع لازم يكون قبله شرط

تنهدت ، شنو شرطك

النوح : اني الجر والعر ميناسبني فاذا اجلنا العقد لحد متكوم اختج بالسلامة فمقابل هذا راح يصير العرس بعد اسبوعين من العقد بالتمام والكمال

زبيدة : واني ماعندي مشكلة ، كمت يله من رخصتك

النوح : لحظة

زبيدة : نعم جدو

النوح : من اليوم ولحد العرس عندج ما يقارب شهر وتلث اسابيع ابدي من هسه جهزي امورج

زبيدة : تمام ، من رخصتك ، طلعت من غرفته ، دانزل ولاكني غيداء وحنين ، سلمت عليهن ثنينهن ما ردن

استغربت خو حنين تباوعلي وتخوزر بيه ، عشتو هاي الثانية انوب شبيها

هزيت راسي وطلعت من البيت متوجهه للاسطبل ما دام نعلون طلع من البيت

تمشيت للاسطبل ، كلش دارتاح هالفترة من اروح للاسطبل ، احس بوسط الخيول بشعور حلو وجانت هاي اول مرة بحياتي اكتشف إني بديت ارغب لهيج نوع من الحيوانات

وصلت للاسطبل ومشيت بحماس حتى ادخل جوه بس وكفت من شفت واحد كاعد بالكاع والفرس الجانت حامل (مُلهمة) ماده كل راسها بما فيهم عنها
ومغطية وجهه الشخص الكاعد وحاضن ركبتها

ما اخذت وقت حتى اتعرف عليه هو نفسه نعلون اولاً بسبب هيئته وثانيًا بسبب صوته

وكفت اسمعه يسولف ويه الفرس

هارون : هاا يروحي شبيج ، شنو المضوجج

زبيدة : صهلت مُلهمه بصوت وكإنها فهمت شكلها

هارون : ادري بيج تعبانه والولادة لسه مأثرة عليج ، ازمة وتعدي حبيبتي ان شاء الله يكبر "مرجان" وانتِ ترتاحين واني ارتاح هي شدتها بس هالجم شهر

زبيدة : ضليت باهته من شفت الفرس تطلع من مكانها وتجي تتمدد على رجليه وهو يمسح على شعرها ويبوس بيها

هاي اول مرة بحياتي اشوف خيل يتمدد مثل البشر

فزيت من سمعت صوت ضحكته المستفزة

هارون : ههههه لك مُلهم تعال شوف مرتك كاعدة تخونك

زبيدة : رد عليه الخيل الاسود الجنت اجي انطي اكل بصهيل عالي خلا يضحك بالزايد

من شفته مطول بكعدته هنا ، انداريت حتى اطلع وارجع للبيت الدنيا ليلت

هارون : اوكفي

زبيدة : يبست بمكاني من سمعته يحاجيني ، انداريت لكيته موخر ملهمه من حضنه وكايم على حيله

اباوعله تقرب وكف كدامي وخله اديه بجيوبه ، رفعت راسي باوعت بوجهه

رغم كمية الهدوء المحيطة بي الا إني دائما احسه عصبي ويريد فرصة حتى يهجم مثل العنده فريسة وكاعد ينتظرها تتقرب منه حتى يأذيها

على رغم لا شكله ولا ملامحه يدلن على شي بس اني احسه هيج ليش ما اعرف بس هالانسان غامض بشكل يفوق العقل

اباوعله حك حاجبة المطبور ، شتت نظري عن الوشم الي بأيده وسألته ، نعم !!

هارون : عندي سؤال واريدج تجاوبيني عليه ، البارحة
من اجتني النوبة شفتج جنتِ موجودة يمي ، احم ردت اسألج هم سمعتيني حجيت شي

زبيدة : وانت ليش تسأل ، شنو ضام شي وتخاف لتكون بلحظة ضعف تكون حجيت بي بدون متحس

اباوعله فتح عيونه على وسعها وخنزر بوجهي

هارون : لتحاولين تستفزيني ، سألتج سؤال طبيعي جاوبيني جواب طبيعي

زبيدة : جاوبته بكل هدوء وبرودة اعصاب ، ليش انت شخص طبيعي حتى اجاوبك جواب طبيعي

هارون : هاهي حصلت جوابي ، روحي يله

زبيدة : رفعت اصبعي بوجهه ، هاي اخر مرة اسمحلك تأمرني اني محد يكدر يأمرني كائن من يكون فاحترم نفسك

هارون : ديله ولي

زبيدة : ولت روحك وورمت جروحك ان شاء الله بعد لتتجاوز حتى اني ما اضطر اتجاوز عليك

هارون : شعرج طالع

زبيدة : بسرعة خليت ايدي على مقدمة ججابي ما حسيت بولا شعراية طالعة

باوعتله لكيته محافظ على ملامحه والله فلا ينعرف اذا يحجي صدك لو يجذب

انت عود ليش تسوي هيج ؟ شتحس ؟

اندار بدون ميجاوبني و رجع للاسطبل ، ضليت مصفصفه بمكاني ، بس لو افتهم هو ليش ديسوي هيج عود يعني ديخفف دم !!

______________________________________

ديمة : من بعد ما دخلت للبيت سلمت على خالة وصعدت اشوف بصائر

فتحت باب غرفتها لكيتها كاعدة تشوف فلم على اللابتوب

بصائر : هاا يحلو شو تأخرت

ديمة : اي والله جنت عند بيت اختي دنيا علمود اطمئن عليها

بصائر : ليش شبيها ؟

ديمة : عندها اكياس على المبايض وراح تسوي عملية تستئصلهم

بصائر : خطية والله متستاهل

ديمة : الحمدلله على كل حال المهم صحتها

بصائر : اي والله

ديمة : ضلينا نتناقش على دنيا بس حسيت بصائر تحوس مدري شبيها

بصائر : احم اكول دمدوم هي اختج هم عدها حمه عيونه ملونه ؟

ديمة : دنيا قصدج هي اصلا كل حموينها عيونهم ملونة بس ليش تسألين

بصائر : هاا لا هيج بس ذاك اليوم الوصلج انتِ وامين
ردت اعرف هاي الدكتورة مرته مو

ديمة : الوصلنا اسمه حليم وما متزوج وهاي الاجتي مو دكتورة معالجة نفسية واسمها سهير وتصير مرت اخو حليم مو مرته

بصائر : هااا يعني حليم ما متزوج ، زين شعجب بعده اعزب مبين عمره مو صغير

ديمة : تنهدت حليم يحب وحدة وللان ميقبل يتزوج علمودها ، اباوعلها بسرعة تغيرت ملامحها

شبيج صوفرتي ؟

بصائر : لا مابيه شي ، زين منو هاي اليحبها وشنو سالفته وياها اذا يحبها ليش ميتزوجها

ديمة : اليحبها زبيدة

اسم الله شجاج هيج شهكتي

بصائر : اختج زبيدة هاي الراح تتزوج ابن عمج الطويل نفسها لو غيرها

ديمة : لا نفسها

بصائر : وليش ما قبلت بحليم شو حلو ما شاء الله عليه يخبل ييـ يعني جعلته اا اخويه حليو

ديمة : هي مو بالجمال يا بصائر هي متحبه شكد حاولنا نقنعها وما قبلت تكول لو اموت ما اخذ حليم

بصائر : خطية وباقي لهالعمر بدون زواج علمودها

ديمة : ولج تره حليم بعده شباب بس هو متعب روحه زيادة عن اللزوم

بصائر : ليش شكد عمره ؟

ديمة : لحظة اوكفي هو اكبر من دنيا بسنة يعني عمره 30

بصائر : يعني اكبر مني بـ8 سنوات

ديمة : شتكولين ؟

بصائر : هاا لالا هيج ، يله تشوفين الفلم وياي

ديمة : لا خطية امين عنده ملابس لازم اغسلهن وانشرهن

بصائر : طلعت ديمة واني سحبت الفيس مالتي ، دخلت على حسابه ، بلعت ريكي واني اكلب بصورة

يعني حليم اكبر مني بـ8 سنوات ، فرق هواي بيناتنا ، هو محامي واني طالبة صيدلة نجحت من الرابعة للخامسة

سؤال وجهته لنفسي بدون سبب ، عادي الصيدلانية تاخذ محامي ؟!!!!

رجعت اگلب بصورة ، ما شاء الله شنو من جمال وقبول عنده ، شكله كلش مريح للعين ، عيونه عبارة عن بحر صافي لدرجة حتى بؤبؤ عينه واضح بسبب صفاء لون عيونه

سديت الموبايل من اجوي اخواني على بالي ، هاي شجاي تسوين بصائر ، صدك تحجين هي هاي الثقة

اخوانج جابولج هذا الموبايل حتى يفيدج ويونسج مو حتى تدورين بي سوالف تعبانه مثل هاي ، سجلت خروج من حساب الفيس وحذفت البرنامج من جهازي
كلشي ولا اخواني ما اريد اسوي شي يضوجهم حتى لو بيني وبين نفسي ما اقبل

ذبيت الموبايل وكمت نزلت جوه لكيت وديمة واكفه بره بأيدها صينية وصوتها جاي من باب البيت

رحت يمها لكيتها واكفه تسولف ويه وحدة

ديمة : اندكت الباب ، طلعت فتحتها لكيتها نفس البنية الي وديت نزلة الهم بمناسبة تاجيرهم لبيتنا

: السلام عليكم يحلوة

ديمة : ابتسمت وعليكم السلام اهلا وسهلا

: شنو ما عرفتيني

ديمة : لا شلون ما عرفتج انتو المؤجرين الكعدتو جديد مو

: اي عفية عليج ، هاي صينيتكم واعذرونا تاخرنا ياله رجعنا مواعينكم بس الوالد اصر الوالدة تسويلكم دولمة والوالدة موظفة وهسه ياله فرغت

ديمة : شنو السالفة والله ما الها داعي ليش هيج زحمتو نفسكم

: تعبكم راحة تفضلي يا حلوة ، صدك شنو اسمج ؟

ديمة : ديمة

: هاا عاشت الاسامي اني اسمي تقى

ديمة : هلوو حبيبتي

تقى : هلا بيج يله اروح اني من رخصتج

ديمة : ابقي ما ضيفناج شي

تقى : غير مره نسير عليكم اني والوالدة

ديمة : اهلا وسهلا بيكم باي وقت ، راحت البنية واني دخلت لكيت بصائر بكفايه

شبيج مالت السم خرعتيني

بصائر : منو هاي ولج

ديمة : جوارينا واجتي ترجع المواعين ، هاج ضوگي دزولنا دولمة

بصائر : ما اريد شكلها ميشهي

ديمة : لتحجين هيج خطية فوك ما دزولنا

بصائر : دضوكيها انتِ وخلي نشوف

ديمة : ضكتها وابتسمت دولي والله طيبة عابتلج عبالي راح تطلع صدك مو طيبة

خليت شويه الي والها بالماعون والباقي ضميته بالفرن علمود امين واسلام وخالة

وكالعادة انعاد نفس الروتين مالت كل يوم ، كلها نامت وبقيت اني انتظر امين حتى اسويله العشه وانام

واكفه دانظف الطباخ وشفته دخل للمطبخ ، هاا الله يساعدك

امين : يساعد الجميع يارب ، ملابسي بالحمام مو؟

ديمة : اي روح اسبح علما اسويلك العشه

امين : عاشت ايدج حبيبتي

ديمة : ابتسمت ايدك العايشة ان شاء الله ، طلعت الكباب عروك كليته هو والطماطة ووكفت اكصص خيار وارتب خضرة بالماعون

حسيت ادين تلتف على خصري واني اشتغل ، ضليت ثابته بمكاني لحد ما حسيت بشفايفه تطخ بركبتي كزبر جسمي

امين : مشتاقلج اني

ديمة : تنهدت وانداريت عليه ، امين اهلك هنا انوب بالمطبخ فشلة ليكعدون ويشوفونه حتى حرام

امين : لتخافين كلها غاطة بالنوم محد يكعد

ديمة : ميخالف حباب وخر ، اباوعله دنك باسني من شفايفي بخفه وابتعد

امين : خوش

ديمة : ضربته على ايده ، صاير منحرف ، طگ ركبته وجاوبني

امين : بالحلال عادي

ديمة : ديله عيني تعال بلش

امين : بيج لو بالاكل

ديمة : عطت بي وتالييي وياااك اليوم

امين : ههههههه

____________________________________

دنيا : مر الاسبوع ركض ركض واجه يوم عمليتي ، كعدت الصبح بدلت وجهزت غراضي ويوسف ويايه

يوسف : هاا حبيبتي ان شاء الله جاهزة ومو خايفه

دنيا : ابتسمت بوجهه رغم خوفي بس حبيت اطمنه ، لا حبيبي ما دام انتو وياي اني ما اخاف

باسني من راسي وحضني

يوسف : ان شاء الله تعدي سلامات يا روحي انتِ

دنيا : امين يارب ، اخذت ايده ونزلت سلمت على الكل وطلعت للمستشفى بعد ما امنت تيم يم خالة والبنات

وصلنا للمستشفى لكينا خواتي واخوية معين وامي ودادا منتظريني هناك

ديمة : هاا دندون صباح الخير

دنيا : صباح النور حبيبتي ، شعدكم كلكم هنا من الصبح مو كتلكم لتعبون نفسكم

زبيدة : عليمن هالتعب ، يله امشي تحضري واحنه راح نكعد بغرفة الانتظار ننتظرج

دنيا : حسيت بيوسف يشد على جتفي ، ابتسمتله ورحت ويه الممرضة جيكت كل تحاليلي وضبطت اموري تالي رحت ويه خواتي بدلت ملابسي لملابس العمليات

اجت دكتورتي سلمت على اهلي وطلبت مني ادخل لغرفة العمليات ، دخلت للغرفة بعد ما بندت بجي على امي الجانت تناشغ كسرت خاطري والله شلون الطفلة جانت تبجي

كل الاتذكره انهم خدروني ونمت ، ما كعدت الا بعد فتره على الم بكل جسمي

الله ليعيد هالفترة عليه كوه مرت عليه الالم لا يطاق احس رحمي وظهري وبطني كلهن يصيحن عليه

اخذ المغذيات اهدئ شويه ومن يروح مفعولهن اضل اصيح من الالم

ويوسف سوده عليه حتى بجي يضل يبجي من يشوفني متوجعه هيج

طلعت من المستشفى وبقيت عد اهلي وخواتي واهلي بما فيهم بيبتي وعمتي بدرية داروني مثل المي الي بالصينية

بيت عمو جانو كل يومين يجوني ويوسف كل يوم يجي يبقى يمي نص النهار ويروح للبيت ميقبل يبات وتيم عفته عد ديمة

شهر كامل مر باتعس ما يكون ، العملية ابد ما مر بسهولة عليه خصوصاً من ناحية تيم لا اكدر اشيله ولا اخلي بحضني كله من بعيد لبعيد علمود العملية لتنفتح بحركة غلط

وهو حبيبي يبجي يريد يجيني واني من اشوفه هيج انهار تالي كمت اخليهم ينيمو على رجليه واضل العب بشعره واسولف ويا علما ينام وتاخذه ديمة

وهيج كضيتها والحمدلله تحسنت وهياتني اليوم واكفه بقاعة الاستقبال مالت المركز اني وكل اهلي

متمركزات بالبداية اني وديمة واكفات ومنتظرات زبيدة تطلع ونشوفها

اي اليوم عقد قرآن اخر وحدة من بنات ياسر ، البنية العنيدة ، الوكحه ام لسان ، وسيلة الصغيرة بالحب والحنان والعطاء وياسر الصغير بالقوة والثبات

ابتسمت

" اليوم هو يوم عقد الموت على الحياة "

****************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

التكول اليوم البارت قصير اطلعلها من الشاشة وابد ما اسويلها شي 🙂🔪😄

.