الموت الحي الفصل الثاني وخمسون 52 - بقلم براء الموسوي

مرحبا حبايبي العسل شلونكم ❤️❤️

~~~~~~~~~~~~~~~~~~

عظم الله اجورنا واجوركم بحلول شهر محرم الحرام ان شاء الله ربنا يعيده علينا واحنه من الموالين والمحيين لفاجعة آل بيت الرسول الاطهار (صل الله عليه وعلى اله وصحبه وسلم ) 🖤

~~~~~~~~~~~~~~~~~~

#الموت الحي
#للكاتبة براء الموسوي

ديمة : واكفه اباوع لزبيدة الطلعت من غرفة التبديل واجزم مليون بالميه انُ عيوني دتلمع من الجمال الداشوفه

احير عليمن اباوع او على شنو احجي

على جمال فستانها الحرير ، الي البساطة والرقة تزينه بشكل ياخذ العقل

متأكدة اي واحد يشوفه راح يكول انه احد فساتين اميرات ديزني

لو على جمال زبيدة ، بمكياجها البسيط وشعرها المموج بطريقة خرافية والي يزينه تاج من الورد الطبيعي الابيض

حرفيًا جانت طالعة اميرة ، انداريت لكيت دنيا تباوعلها ودموعها تنزل بصمت ، باوعتلي وابتسمت

دنيا : تجنن مو ؟

ديمة : ابتسمتلها وهزيت راسي بتأكيد

رجعت باوعت لزبيدة الي رغم جمالها الا انها مخربة كلشي بملامح وجها ، من دخلت وللان هي معبسة وما ابتسمت حتى ابتسامة مجاملة

تقربنا اني ودنيا بوسناها وحاجيناها

ديمة : الف مبروك يروحي شنو هالجمال هذا

دنيا : يمه العين باردة عليج حبيبتي

ديمة : فكيها شوية زبد ميصير هيج گالبه خلقتج

زبيدة : شلون ترديني اضحك واني انفرض عليه اسوي حفلة ، بيت جدجن ناس ميستحون ، ابنهم ما دايره سنته لسه وهمه مسويلي حفلة ويريدون يفرحون

ام حسن : يمه شكو بيها ، ماكو حزن يستمر للابد ولو مهما حزنا مصيرنا نتقبل الواقع ونخلي الحياة تستمر

زبيدة : لج دادا ابوية المتوفي مو دجاجة حتى ما اهتم واحتفل واغني واركص

بدرية : وحزنتي قابل شراح تسوين ، راح ترجعين الميت ماراح تكدرين

وبعدين يايمه ابوج صار تسع شهور على وفاته يعني ما بقى لدورة السنة مالته غير 3 شهور شراح يختلف اليوم عن الـ3 الشهور الجاية

زبيدة : محد راح يفهم الي ببالي ، بس ميخالف هيام مو سوت حفلة وعرس غصب عني ، بسيطة اني الها

تنهدت بعمق ، الاسبوع الفات صارت مشكلة شكبرها بيني وبين ام هارون

جنت كاعدة ببيتنا وطبت عليه تعد وتصف والله شنو شلون متردين تسوين عرس واني ابني صارلي سنين اتمنى زواجه تالي تحرميني افرح بي

المهم حجايه مني وحجايه منها تعاركنا واجوي بيت جدي على أصوات الصياح

والمشكلة من حجيت كلها صفت ويه هيام ، اكلهم ميصير ابوية ماله احترام يكلولي الحي ابقى من الميت واحنه نريد نفرح بعرس هارون مو بكيفج تحرمينا من الفرح

تالي وكالعادة النوح فرض عليه اقبل وما افتح حلكي بكلمة ومن انتفضت گلي راح يلغي سفر معين واني مثل بلاع الموس اضطريت انجب واسكت

بس اقسم بالله اني الهم بسيطة والله بسيطة اذا ما اربيكم واحد واحد اني مو زبيدة

فزيت على صوت دنيا

دنيا : هوني على روحج حبيبتي وعيشي يومج ، صدكيني بابا ما راح يزعل منج بالعكس هو الي راح يعاتبج لان دتحرمين نفسج من هالفرحه بسببه

زبيدة : دمعت عيوني شلون ترديني افرح واني غصته وهو حاضني قبل ليموت متروح من بالي

دنيا : مسحت دموعي ، مجبورين نتعايش يا زبيدة مجبورين

دك موبايلي ، رديت الوو هاا يوسف

يوسف : اني بره استعجلو شويه تره تيم نعل والديه حتى دكم قميصي وكعهن

دنيا : يله اجينه اجينه ، احم ريري گلبي العباية من يمج فدوة

سهير : بعيني

دنيا : اخذنا العباية الي كانت عبارة عن حرير ابيض يحتوي على كبوس مزين بلؤلؤ ناعم

لبسنا لزبيدة واخذناها وطلعنا ، اجه يوسف فتح الباب ، صعدنا زبيدة وصعدن البنات وعمتي وياها واني كعدت بالكدام واخذت تيوني بحضني ويوسف حرك

يوسف : شنو السالفة تاخرتو

بدرية : والله يا خالة المركز مكتض بالناس تدري اليوم خميس وكلها معرسة متنه علما وصل سرانا

يوسف : خير ان شاء الله ، ايي زبد مبروك يوم الولد الصالح

زبيدة : شكراً

دنيا : اباوع ليوسف طول الطريق حاصرته الضحكة وكوه مسيطر على روحه تالي وكف السيارة بنص الشارع واندار على زبيدة

يوسف : بشرفج زبيدة وخري الكبوس خلي اشوفج

دنيا : ياا يوسف شبيك

يوسف : والزهرة ما احرك اذا ما اشوفها تزعلون ترضون

زبيدة : ديله عاد شلون استحيت اني ، رفعت الكبوس وطلعت بس وجهي ، اباوعله شافني وطكها بضحكة

يوسف : ههههههه لج هاي شنو شو طالعة صدك مره

زبيدة : جنت لازمة مهفه اهفي على روحي ، سديتها وضربته على جتفه ، ايييي مو شايفنييي خاطة شاربيييي عييييب عليييك

يوسف : اللهم لا شماته بس اني شمتان وهواي هم الحمدلله الراواني بيج يوم اتشمت واتشفى بيج

يقلد كلامها

ايييع اني اتزوج ما عيب ، شتحسون انتو المتزوجين الناس وصلت للقمر وانتو تفكرون بهالمشروع الفاشل هذا ، ما اعرف شلون الواحد يقبل يشاركه حياته دكليها مدبسة هسه ههههههههه

زبيدة : احس وجهي جمر من القهر ، هاي تاليتج يوسف افندي يتشمت بيج ، حسبي الله عليك يا جدي
دنيا واخرة

دنيا تسكتين رجلج لا انزلج انتِ وياا العب بيكم لعب
لا عبالج لابسه فستان وصايرة انثى هسه اخربه والله وانعل ابو العقد

يوسف : حتى لو خربتي جدج يلبسج جادر ويعقلج ماكو مهرب اليوم لتحاولين

ديمة : هههههههه

زبيدة : ضربتها ووجع

دنيا : ضحكت ، كافي يوسف شبييك لتضوجها

يوسف : سكتي ولج سكتي عوفيني اتشفى بيها ، نسيتي شسوت بينا من جنه مخطوبين طلعت الخطوبة من خشومنا مكابلتنا وكاعدة جنها غراب
تكول حاطيها حرس سرايا علينا

ديمة : والله حقها ليش الجذب انت ودنيا جنتو مستهترين متنعافون سوه شيطانكم كلش قوي

دنيا : انداريت بسرعة خزرتها وعمتي بدرية گبل كرصتها وخزرتها

بدرية : الله لا ينطيج العافية على هاللسان هذا ولج انتِ شنو

زبيدة : اباوع ليوسف تحمحم وانلصم بعد ما حجه حيييل وابو زايد تستاهل

وصلنا للقاعة ، نزلنا ودخلنا من الباب الخلفي على غرفة التبديل مالت العرايس ، ذبيت الكبوس وكعدت اعدل ملابسي اني وخواتي

اباوع طبن خوات الشفيه وامه وخالاته

منال : كللللوووووش حبيبتي زبيدة الف مبروك

زبيدة : الله يبارك بيج

نور : ما شاء الله زيزي طالعة تخبلين

زبيدة : زيزي !! هاا شكراً حبيبتي

هيام : شو اي يعني زوينه طالعه

زبيدة : اجيت اردها بس سكتت ما اكدر احاجيها شي
المعزاية طالعه تخبل ، جنها لعابة ، ساعات اصفن عليها اكول اذا هاي بهالعمر وهيج جميلة لعد من جانت شباب شلون جانت

فوكاها الشفيه نسخة منها بس على رجال وبشرته سمرة مو بيضة مثلها

ديمة : يله زبد كومي المعازيم تنتظرج

زبيدة : هزيت راسي وكمت

دنيا : اخذنا زبيدة ومشينا

اول ما دخلنا تعالت اصوات الهلاهل ، ابتسمت من شفت القاعة وجمالها

المكان كله مزين بورد ابيض نفس الورد الخالته زبيدة على شعرها ومسوين كوشتين منفصلات ومزينات
بنفس نوع الورد

اباوع للطاولات الي على جوانب كوشة العرسان ، مزينه بورد واكو كلاصات زجاج مكتوب عليهن

، زبيدة وهارون وحتى شموع 3D(ثلاثية الابعاد) باسمائهم والذهب مخلي بالوسط

حرفيًا القاعة طالعة تجنن شنو هالجمال والترتيب
خو كيكة العرسان جانت شيك بشكل وطبعاً الدزاين جان كله ترتيب خوات هارون وامه ما شاء الله كلش ذوقهن حلو ومرتب

كعدت زبيدة بمكانها واجتي بيبتي بوستها وحضنتها

حمزية : شنو هالجمال ولج سبحان الصورج وسيلة وكاعدة كدامي والله

زبيدة : الجملة الوحيدة الخلتني ابتسم ، احس بالفخر من يشبهوني بإمي بدون شعور احس وكإني ملكة جمال وبسرعة تتعزز ثقتي بنفسي لان امي جانت مثال حي على الجمال

حمزية : اروح فدوة لهالضحكة ربي يجعل ايامج انتِ وهارون كلها فرح وسعادة وينطيني عمر اشوف جهالكم يلعبون حواليه

دنيا : آمين يارب

اكول بيبي شوكت يعقدون ، اغلب المعازيم جاي يسألون عن وقت بدء الحفلة

حمزية : هسه خابرني جدج ، راح يطلعون من قاعة الزلم هو وهارون والشهود ويجون لهنا ، غطن اختجن بيبي على وصول همه هياتها القاعة تره

دنيا : اي تدللين ، رحت كلت لديمة وسهير ، رحنا جبنا الحوض البي ورد وهيل خلينا جوه رجلين زبيدة ورجعنا لبسناها لزبيدة وابتعدنا من سمعنا بالشيخ راح يدخل

وكفت اني وديمة بصف زبيدة ، انطفت كل الاضواء وتركز الضوء على كوشة العرسان

دخل الشيخ ودخل ورا هارون وجدي والشهود ( معين ويوسف )

الي يشوف وجهه جدي يكول هو العريس كد ما فرحان وطاير من السعادة

كعد هارون بمكانه المخصص ومعين ويوسف وكفو على صفحة يم هارون

بده الشيخ يحجي ويذكر احاديث وايات من القران على الزواج وذكر قصة زواج الرسول (صل الله عليه وعلى اله وصحبه وسلم ) من السيدة خديجة (عليها السلام) وذكر قصة زواج الامام علي (عليه السلام) من فاطمة الزهراء (عليها السلام)

وبعد ختامه لقصصهم الجميلة بده بالعقد الشرعي لهارون وزبيدة ، سأل الشيخ هارون وجاوبه بالموافقة بدون اي تردد

وصل السره لزبيدة ، سألها الشيخ وجاوبته بسرعة مدري شجاها هي وهارون حتى مجال ما انطو للشيخ
مدري شبيهم مستعجلين

زبيدة : نعم انت وكيلي

من جاوبت الشيخ تعالت الهلاهل بالقاعة ، تم العقد واني صرت حرم هارون شرعاً

بعد موافقتي على هالزواج نزلت دموعي بدون شعور
اليوم اني تنازلت عن اول مبدئ بحياتي

اني اليوم ربطت نفسي بآدم من بعد ما جنت سنين احارب نفسي والناس حتى لا اجتمع ويا حتى لو بجملة وحدة تالي هسه شاركته علاقة كاملة وياريت لو جانت اي علاقة زواج مرة وحدة !!

سهير : الف مبروك حبيبتي

زبيدة : ابتسمتلها مجاملة ، الله يبارك بيج حبيبتي ، اجوي الكل باركولي واسمع جدي يبارك لهارون ويحضن بي هو وبيبيتي

النوح : يله يا جماعة تفضلو وانت جدي ابقى ويه مرتك

زبيدة : طلعو معين ويوسف واجتي نوال اخت هارون نزعتني الروب واخذته

انسحب الحاجز البيني وبين هارون ، فزيت على اثر صوت البردات السحبوهن ، انداريت صار هارون بوجهي

حمزية : تعال حبيبي بارك لمريتك شبيك واكف

زبيدة : على كلام بيبي تقدم وكف مباشرةً كبالي ، رفعت راسي وباوعتله لابس قاط لونه نيلي غامق

حاجاني من طرف خشمة

هارون : مبروك

زبيدة : تمنيت اكله الله لا يبارك بيك بس الناس ملتمه علينا مو مال اجفص

رديت الله يبارك بيك

حمزية : شبيك مصفط بيبي ادري من شنو مستحي ، اخذ الحلقات لبس مرتك وبوسها وزين جسمها بالذهب فدوة اروحلك

هارون : استغفر الله

زبيدة : اباوعله گلب عيونه وقدم ايده كدامي ، باوعتله باستغراب

هارون : بهمس فضيها يله

زبيدة : هو اني الالبسك لو انت !!!

هارون : مو يكولون النعال (حشانا) اولاً يلي بلشي

زبيدة : اخذت الحلقة من العلبة وتقربت عليه ، خليت الحلقة بأصبعه وهمستله

احترم نفسك والنعال زين بي شواربك ، تأدب وخليني محترمتك

دخلت الحلقة لنهاية اصبعه وضغطت بأظافري على اصبعه بكل قوتي

باوعتله عضلي شفته وهز راسه مبتسم

طبعاً اليشوفنه نتهامس هيج يكول شهالرومانسيات والغزل هذا ميدري اليدور بيناتنا شنو

هارون : ايدج ست

زبيدة : قدمت ايدي ، توقعته يسوي مثل ما اني سويت بس تفاجئت من شفته سوه الموضوع طببعي ولبسني الحلقة بدون اي ردة فعل

كملنا لبس الحلقات وانطرشت اذاني بالكفلات والهلاهل وكلها تصيح حبها ولك حبها

وهو ما گال لا تقرب لزم وجهي وباسني ، عبالكم الموضوع مر مرور الكرام ، لا مستحيل

هارون تقرب عليه لزمني من وجهي ونزل شفايفه على جبيني واول ما صارت شفايفه على جبيني بدت ايده تضغط بكل قوتها على فكي لدرجة حسيته راح ينكسر

ابتعد وخله شفايفه على خدي وايده ما زالت تشد على فكي

غمضت عيوني بألم ، شاغت روحي من الوجع تالي ما تحملت دفعته والكل عباله من الخجل دفعته ميدرون
الالم الي اجتاحني بسببه شنو

بيداء : شجاك عمه هو هيج شنو ما شايف نسوان هههه

زبيدة : اباوعله ابتسم بخبث ودنگ عليه

هارون : بهمس ، اذا عبالج ابيتها الج تكونين غلطانة ، صيري حبابه حتى لا اضطر اراويج وجهي الثاني واخليج ترجعين تتوسلين بيه

زبيدة : نذل

هارون : بابتسامة وحقير هم

زبيدة : كرصتي من خدي وابتعد طالع من القاعة

اسمع بيبي تحاجي

حمزية : وين رايح لا لبست مرتك الذهب ولا كصيتو الكيك

هارون : لتزهگوني وتخلوني احط راسها بالكيك واكلب هالحفلة عزه عليكم فكو ياخه عني

زبيدة : كعدت ووجهي كام يوجعني ، اعصابي انشدت وكلامه حيل استفزني

اباوع اجني البنات ، غيداء ، حنين ، هدى ، نور ، وخواتي

نور : بشرفج زبيدة شكلج هارون صارله ساعه يهمسلج

ديمة : اكيد كلها طالعه تجننين

زبيدة : اي

غيداء : هارون كلج طالعة تجننين !!!!

زبيدة : وليش مستغربة ؟

غيداء : هاا لا عليمن استغرب من رخصتكم

زبيدة : اباوعلها راحت اخذت حنين وراحن كعدن بنهاية القاعة

اني هالاثنين ما عاجبتني وضعيتهن ابد ولازم اعرف شبيهم وياي وليش حاطات بالهن وياي لهالدرجة

اني مو غبية وافتهم كلش زين اكو بيهن شي وهالشي متعلق بيه اني او يمكن بالي ميتسمى ، الله اعلم

من بعد ما طلع المسموم بدت الحفلة ، بيت جدي ذبو لحم ، والله خواتي ما ركصن هيج

من شفتهن اشتهيت اركص بس والله ولا تحركت اني اركص بهيج مناسبة من عمت عيني كون

داباوع ولفت نظري خالة وئام كاعدة على صفحة وتباوعلي ، من شفت منظرها احس انكسر خاطري

اني هالمرة هواي اذيتها ودست ببطنها وهي الشهادة لله بغض النظر عن زواجها من ابوية الا انها عمرها ما حسستني إنها مرت ابوية

لا فد يوم عاطت بيه ولا حتى فرقت بيني وبين اخواني ولا ضربتني غير مره وحدة بشغلة معين وبمرضة امي شالتها بعيونها وقصرت على نفسها وما قصرت عليها

من شفت وضعها وشلون نسوان عمامي يتنادسن عليها تخيلتها امي وكاعدة هالكعدة ومستهضمة

كمت عناد بيت جدي وعماتي لان يكرهنها وتقربت للطاولة الي هي كاعدة عليها ، كعدت على ركباتي ولزمت اديها مبتسمة

شلون ينطيج كلبج تعوفين بنتج بهيج يوم ، عود هاي امي وصتج عليه !!

شديت على اديها ، يله خالة حبيبتي كومي اريدج انتِ تلبسيني الذهب وتهلهلين الي هم ، اني صحيح امي مموجودة بس ما راح الكه احسن منج تاخذ مكانها
بهاليوم

ويه ما كتلها هيج بجت وحضنتني

وئام : ياروحي يا زبيدة اروحلج فدوة اني وكل اهلي مو بس اصيرلج ام اخليج على راسي واني الممنونه والله

زبيدة : دنكت تبوس ايدي سحبت ايدي واني البست ايدها وحضنتها ، ابتعدت وبستها من خدها واخذت اديها وكمت وهي تبجي واني امسح بعيونها

وكفت يمي وبدت تلبسني الذهب والمُلاية تكول گفلات تخبل حتى اني نستني ضوجتي وخلتني اتونس

دنيا : زبيدة سوت حركة بالعقد حرگت بيها گلوب كل نسوان عمامي وعماتي الي تشمتو بيها وعافوها كاعدة وحدها مثل الغريبة

بيومها دعيت لزبيدة من كل كلبي لان بتصرفها ردت اعتبار امي وبنفس الوقت لبست عماتي ونسوان عمامي وحتى ما عبرتهن

واني وديمة من شفنا الوضعية هيج اخذنا امي وكمنا نركص ونغني و ويانه بيبي وام حسن وام امين وبصائر وبيت عمو يحيى ذبينا لحم وزبيدة تصفك النا وتضحك

يروحي ربي ميحرمني ضحكتج بحق كلمن اله جاه عند رب العالمين وعساني ما اشوفج بيوم تبجين

خلص العقد بوقت متأخر واجه يوسف اخذ اهلي وصلهم للبيت ووراها رجعنا للبيت

وجياد وصل اهل امين ولحكنا وبيومها كلنا بوجهنا رحنا للنوم من التعب

__________________________________

بصائر : كاعدة بغرفتي وبالي مشغول ، يا ترى حمى دنيا ليش ما اجه

معقولة زعلان لان زبيدة عقدت اليوم ، الصراحة حقه
يكتل نفسه عليها ، زبيدة حلوة كلش حلوة الي يشوفها يحسها صدك بنية مو مثلي

كمت باوعت لروحي بالمرايه ، صفنت على نفسي ،
وللاسف بديت اقارن نسيت انُ رب العالمين كل انسان يخلقة بشكل مختلف عن الثاني وكل واحد ينطي صفه خاصة تميزة عن بقية البشر

فتحت شعري ، اني شعري كصير وكلش خفيف بسبب الدراسة صاير كله فراغات وزبيدة ما شاء الله شعرها كلش ثخين وحلو

نزعت تيشيرت التراك وباوعت على جسمي وتنهدت وهاي بسبب كثرة الكعدة والقراية انسى اكل صاير وزني كلش قليل وحتى صدر مثل البنات ماعندي

بينما زبيدة جسمها ممشوق ومتناسق ويه طولها مو مثلي كصيرة وضعيفة

باوعت لوجهي ، اني ملامحي ناعمة بزيادة بحيث شكلي يبين إني طفلة ولا كإنما اني رحت مرحلة خامسة وبس هالسنة واتخرج

وياهو اليشوفني عباله اني خامس لو سادس اعدادي محد يصدك اني بالكلية

لميت شعري ولبست التيشيرت ، يعني خلي اكون صريحة ويه نفسي يعني حليم ابو الطول والعرض والجمال ممكن يباوع لوحدة مثلي

لا وفوكاها جان رايد زبيدة الماكو بيني وبينها اي وجهة مقارنة ، وفوكاها هي ما قبلت بحليم واخذت واحد مو قاصر

ابن عمها هم ماشاء الله شلون شياكة وثكل شايل حتى عينه ما شالها طول ماهو بالقاعة بس اكو فرق شاسع بينه بينه وبين حليم

هذا اسمراني يصيح لامه وابو اني عراقي وحليم حنطي وعيونه زرگ وملامحه مو حادة مثل رجل زبيدة

تنهدت وتمددت على فراشي ، سحبت موبايلي وضليت احوس تالي رحت نزلت الفيس ورجعت سجلت دخول

بحثت عن حسابه ودخلت ، ما لكيته ناشر شي ، رجعت اكلب بصورة ومنشوراته واقره التعليقات
تعليق تعليق واشوف ردودة على الكل

مبين من اسلوبة مريح وبسيط مو معقد مبين شخصيتة مثل شخصية اسلام اخوية

ضليت على هالحال لحد ما وصلت لاخر منشور بحسابه ، مدري شحسيت من دزيتله طلب صداقة

وهو بلحظتها بسرعة وافق ، كمزت من مكاني ، عزه العزاني هاي اني شسويت ، بلعت ريكي عزه خاف عرفني

لالا مستحيل يعرفني هذا الحساب وهمي واني ممتابعة بي غير مشهورين حتى اخواني ومعارفي ممتابعتهم

رحت للماسنجر لكيته نشط الان ، باوعت للساعة صايرة بالوحدة ، ما اعرف شلون تجرأت ادزله رسالة ترحيب

كعدت واحس اديه كامن يرجفن ، اني شجايه تسودنت وين الكالت مستحيل تخون ثقة اخوانها

انتِ بصائر العاقلة الراكزة هيج تسوين ، جان استحيتي على نفسج ، سحبت الموبايل حتى الغي الرسالة لكيته راد عليه

صخام الصخمج بصائر والله اخاف افتح الرسالة
سميت بسم الله وفتحتها لكيته دازلي علامة استفهام
(؟)

عزه هذا شيقصد يعني ، رديت واديه يرجفن ، كتبت هلو

شمرت الموبايل ، شافهااا يربييي شافهااا طاحظج بصائر

شفته يكتب رجعت لزمت الموبايل وگلبي دكاته الف
ضليت منتظرة اشوف شراح يكتب

رد عليه عليه رد صدمني وخلاني باهته

حظرني !!

______________________________________

دنيا : رايحة بسابع نومة وحسيت بايد تهزني ، فتحت عيوني لكيت تيم كبالي

وخرت ايد يوسف عن خصري وكعدت ، فتحتله اديه
لزمت جتافه ماسحه عليهن

هاا حبيبي شمكعدك هسه ؟

تيم : ذوعان

دنيا : سوده عليه حبيبي ، انطيك كيكة وحليب

تيم : لا ، يريد سوربة وعبز (خبز)

دنيا : باوعت للساعة وحدة ونص ، حكيت راسي تريد شوربة وخبز

تيم : اي

دنيا : ابتسمت حاضر تدلل ، تثاوبت وكمت ، شلته كعدته على الجرباية ورحت غسلت ولبست روب على هدومي وحجاب

رحت جبتله شبشب لبسته اله ومديتله ايدي ، يله تعال حبيبي

اخذت ايده واجيت انزل وفززني صوت يوسف

يوسف : خير يا ستار وين مبدلين وتردون ترحون بهالليل ؟

دنيا : ضحكت على ردة فعله ، رايحين اني وتيومي ناكل ونرجع ننام

يوسف : وشراح تاكلون

تيم : سوربة وعبز

يوسف : هسه ؟

دنيا : اي حبيبي راح انزل اوكله وانت ارجع نام احنه ناكل ونصعد

يوسف : سبعين عافية

دنيا : على كلبك يروحي

اخذت تيم ونزلت للمطبخ ، دخلت للمطبخ وتفاجئت من شفت بنية لابسه دشداشة وكاعدة تمسح بالكاونتر
ومنطيتني ظهرها

حمحمت حتى تنتبهلي وهي خطية على اثر صوت اخترعت خرعة ما صايرة

اسم الله اسم الله على كيفج

: العفو مدام العفو

دنيا : باوعتلها بنية شابة وحليوة ، استغربت يا ترى منو هاي

منو انتِ ؟

: سسـ ست ااا انـ اني

دنيا : قاطعتها ، اهدي اهدي وجري نفس ، ابتسمت حتى اهدئها ، شبيج ترجفين شنو جني كدامج

على كيفج اني داسألج لان مشايفتج قبل هنا هلي استغربت وجودج

: ست اني بنت العاملة ام نجاح

دنيا : اي ؟

: اي وامي كبرت بالعمر وكامت متكدر تشتغل بعد واحنه بحاجة الفلوس يا ست فامي حاجت المدام الجبيرة وهي قبلت تشغلني هنا بدال امي وتستمر تنطيني نفس الراتب الجانت تاخذه امي

دنيا : هااا وشنو اسمج

: سجى ست اسمي سجى

دنيا : اهلا وسهلا بيج حبيبتي

سجى : شكراً ست ، امريني ست محتاجة شي خدامتج اني

دنيا : العفو حبيبتي شنو هذا الكلام ما اقبل تحجين هيج

سجى : لا والله ست انتِ شنو تردين اني اسويلج شنو جوعانة اسويلج اكل ؟

دنيا : ميحتاج حبيبتي اني مو جوعانة بس اميري الحلو جوعان ونزلنا اني ويا نسوي سوربة وعبز وناكل

سجى : ابنج هذا مدام

دنيا : ابتسمت ، اي حلو مو ؟

سجى : يخبل ، انتِ هم حلوة

دنيا : عيونج الحلوة حبيبتي وانتِ هم جميلة ، كعدت تيم على الكرسي وباوعتلها

اذا تحبين روحي ارتاحي اني ما محتاجة شي

سجى : لا مدام عندي شغل اكمله ياله اروح

دنيا : لا روحي واذا على المواعين اني هسه من اشتغل اكملهن

سجى : لالا ما عندي شي انتظرج تكملين واغسل المواعين انتِ ارتاحي

دنيا : ما حبيت اضغط عليها عفتها على راحتها

رحت طلعت جدر خليت بي مي وحطيته على النار وكعدت اباوع لتيم ، بعثرت شعره شكول عليك ابو بطون طيرت النومة من عيني

تيم : غير ذوعان يا ننه

دنيا : ابتسمت وبسته يمه صدقة للذوعان يخسى الجوع واني موجودة

شلت راسي لكيتها تباوعلي وتبتسم ، اشرتلها تفضلي استريحي ليش هيجي واكفه

سجى : ععـ عادي اكعد يمكم يعني ؟

دنيا : ياا طبعًا عادي شنو السالفة ، تعالي كعدي

اباوعلها اجت كعدت وكل شوية تباوعلي وتبتسم ، انقهرت من شفتها وانكسر خاطري عليها ، دشداشتها قديمة ورغم جمالها الا انُ الفقر والتعب مبين على ملامحها

فار المي ، كمت خليت العدس وكلبته لان تيم افندي ميحب الشوفان ولا الخضروات اله عدس

رجعت كعدت وسألتها ، شكد عمرج انتِ سجى

سجى : 22 مدام

دنيا : متزوجة ؟

سجى : اي مدام بس منفصلة

دنيا : ربنا يعوضج ويدزلج ابن الحلال اليناسبج ويحافظ عليج

سجى : شكراً مدام ، تدرين انتِ كلش حبابه مو مثل الباقين

دنيا : منو همه الباقين ؟

سجى : اكلج بس عليج الله مو تحجين ، البنات الباقيات كلهن شايلات خشمهن

دنيا : تقصدين ابريز وجمانة وسهير ؟

سجى: اي

دنيا : ليش شنو سون وياج

سجى : ست ابريز صيحت عليه لان شافتني لازمه ابنها وست جمانة تباوعلي من طرف خشمها وهاي الدكتورة حتى من طبت ما سلمت عليه

دنيا : صفنت بكلامها ، بله ابريز مو غريبة عليها بس جمانة وسهير مستحيل

ابتسمت وباوعتلها ، لتخلين ببالج حبيبتي اكيد هنه ممتعمدات

ابريز تخاف على اطفالها خاف يشعبثون لو يسوون شي ويأذوج لهالسبب متخليهم يتقربون من احد لان وكحين

وجمانة متوهمه اصلا كلش حباية بس تلكيها ملتهية باطفالها وبالها مو يمج من الاساس

اما سهير فماكو احن من كلبها ومستحيل تكون متكبرة اني متأكدة هي ما شافتج لو اجت تعبانة وما انتبهت لوجودج

سجى : يمكن كلامج صحيح مدام

دنيا : مو يمكن اكيد ، كمت كملت الشوربة وطلعت خبز حميته وثردت لتيم وصبيتله

كعدت اوكله وهو يصفك بعد عمري لعد شكد جوعان

حبيبتي اذا جوعانه كومي اكلي لتستحين

سجى: لا شكراً شبعانه

دنيا : براحتج ، رجعت اوكل تيم ، كمل وراد بعد كمت صبيتله ورجعت اوكله لحد ما كمل ، كمت غسلتله ورحت اغسل المواعين وهي حلفت وتقسمت ما الزم شي

عفتها براحتها واخذت تيم وصعدت ، لزمت بطنه وسألته ، هذا البطون شبع لو بعده جوعان

تيم : لا ثبع

دنيا : دغدغته من بطنه هم عايزلة ميشبع ، ادبسز فضحنا ضحكته كارثة

دخلت للغرفة بدلت ملابسه ونومته ، بقيت يمه من غفه ياله كمت وطلعت ، ذبيت الروب وسحبت ايد يوسف نمت عليها عليها وغمضت

يوسف : تاخرتي

دنيا : علما كملت الشوربة ووكلت تيم

يوسف : لو مقنعته باي شي ومخليه الشوربة على الصبح

دنيا : لا خطية اشتهاها خوما اخليها بنفسه ، اباوعله ابتسم واخذ ايدي باسها

يوسف : الله لا يحرمنا من حنانج

دنيا : امين يارب ويخليكم خيمة على راسي بجاه النبي

اكول حبيبي هستوني شفت بنية جوه ، ومن سألتها كالت اني العاملة الجديدة

يوسف : اي ادري جنت موجود من ام نجاح اجتي وحاجت اهلي حتى تشتغل بنتها بمكانها

دنيا : زين شغجب خالة شغلت بنية شابه عاملة هنا الاعرفة خالة متقبل بالبنات الصغار

يوسف : هي اصلا امي ما قبلت بس من شافت وضعية المره انجبرت تدرين بام نجاح انتِ مره فقيرة ومالها غير الله واحنه وحتى ابوية من كلها ميحتاج واجرلج راتب رفضت

دنيا : خطية الله يساعدهم

يوسف : ويساعدني

دنيا : على شنو ؟

يوسف : على هالكيك النايم بصفي وما كادر اكل منه

دنيا : ضربته على ايده وانطيته ظهري ،تادب شويه انت متمل ، حسيت بي يحضني من وره ويخلي راسه بركبتي

يوسف : افييش والزهره مستعد اكمل عمري كله نايم بهالركبة ولا امل ولا اكلهم وخروني

دنيا : ضحكت من كام يعض بركبتي ويبوسني ، ههههه كافي يوسف بعدها النومة بعيني خليني انام فدوة

يوسف : ميخالف بس شبكيني

دنيا : ههههه تدلل سحبت اديه من خصري خليتهن على جتافي وحضنتهن ، بست اديه وغمضت عيوني

غفيت وكعدت ثاني يوم صادف جمعة ، اجمعنا و كعدنا نتريك سوه

طول ما اني كاعدة عيني على حليم الي ملامحه متتفسر ، من يوم اعلان خطوبة زبيدة وهو هاي حالته معتكف على نفسه وماله شغله باحد

همست ليوسف ، فدوة يوسف حاول تكعد ويا وتبرد كلبه خطية حالته تكسر الخاطر والله

يوسف : لتخافين بس نكمل ريوك اخذه ونطلع نحجي
وغصباً عنه يطلع من هالحالة وضعيته ابد ما عاجبتني

دنيا : اي زين تسوي ، اخذت استكان الجاي داشرب وشفت سجى تدخل للصالة خلت الخبز على الميز واجت تروح بس وكفتها خالة

رميم : هاي شنو حبيبتي

سجى : شنو مدام

رميم : ليش باقيه بالدشداشه وما لابسه الزي الرسمي مثل باقي العاملات

سجى : مو ماكو على قياسي مدام

رميم : لا حبيبتي اكو اني خالة بغرفتكم الجبيرة كل القياسات اكيد راح تلكين على قياسج

روحي لبسي الزي حبيبتي وبعد لتفترين بالدشداشة ميصير امي

سجى : حاضر مدام

دنيا : راحت البنية وعمو يحيى باوع لخالة بعتب

يحيى : ليش هيج حجيتي وياها وحرجتيها هسه واذا لابسه دشداشة

رميم : ميصير يحيى البيت اله نظام والعاملات كلهن لابسات زي رسمي وملتزمات بي مو مال نفرق بين ناس وناس انوب على واهسها كلها تكوم تلبس دشاديش

جياد : واذا يمه هسه مو انتِ لابسه دشداشة ونسوانه هم

رميم : مالكم علاقة انتو تعرفون شي واني اعرف شي

دنيا : كملنا اكل وكمنا شلنا المواعين وبدينا نخطط علمود عرس زبيدة لان بس هالاسبوعين عدنا ، ما اعرف على شنو مستعجلين بيت عمي

المهم الاسبوعين ركضن ركض كوه لحكنا بين زبيدة وبين العرس وبين معين الي سفره راح يصير ثاني يوم من عرس زبيدة

فزيت على ايد ديمة التسحبني بسرعة

ديمة : تعاي ولج راح تدخل زبيدة

دنيا : اشتغلت اغنية الدخول وانفتحت الباب تعلن عن دخول العروس

ابتسمت من شفت زبيدة داخلة بفستانها الذهبي

اي زبيدة ما قبلت تلبس بدلة بيضة للعرس واختارت بدلة عرس ذهبية بتصميم فخم وملكي مرصعة بكريستال ذهبي

والقاعة كلها بالاضائة والترتيب تتناسب ويه فخامة فستان العروس

زبيدة سوت انتقاله عجيبة ، بعقدها جانت البساطة عنوان الحفلة وهسه تتوجت الحنه والعرس بفخامة
غير قابلة للوصف

ويه دخلتها اشتغلت الاغنية وبديت اهلهل اني وديمة بعلو صوتنا

حبيبتي زبيدة طالعه تجنن صدك عروس ، اباوع دخل وياها هارون وانطاها بوكية الورد واخذ ايدها ونزلو
من الدرج لان دخولهم جان على درج

زبيدة : بهمس ايدي راح تنكسر على كيفك

هارون : هذا المطلوب

زبيدة : الكاميرات كاعدة تصور بكل مكان والمصورة كدامك لتطلع نمارتك هنا

هارون : طز بيج وبيها

زبيدة : الله لا يوفقك ، نزلنا من الدرج لوسط القاعة ، ابتسمت من شفت خواتي وخالة وام حسن واشرتلهن

شغلو اغنية مشهورة بوقتها اسمها ما بعرف

المصورة : ركصو سلو حتى اصوركم يله

زبيدة : اباوعله سحبني عليه ، خله اديه على خصري وخله اديه على جتافه وتحرك

كزبر جسمي هاي اول مرة احد يتقرب مني ويلزمني هيج ، ما توقعت يصير عنده هيج ردة فعل

باوعتله ، شلون راح اعيش وياك واني من هسه مطايقه وجودك يمي ، اتمنى لو اكدر انهي كلشي هسه

فزيت على الم اجتاح جوانبي ، انت ليش هيج جاي تسوي شهالحقارة هاي ثقبت خصري باصابعك

هارون : نزلي ايدج عني راح اتقيء

زبيدة : عقدت حواجبي من سمعت كلامه ، باوعت بوجهه صار اصفر وعرگ رغم الدنيا ثلج بالقاعة

جنت متوقعه كلامه تعبير مجازي بس من شفت وجهه حسيته يحجي صدك

نزلت ايدي بسرعة عنه وهو سحب ايده ، باوعت للكل كام يصفگ ، رجعت باوعتله بده وجهه يرجع للونه الطبيعي

معقولة راد يتقيء لمجرد إني لزمته !!!

فزيت عليه ايده من سحبني واخذني نكعد على الكوشة

اباوعله عدل الكرفته الي على عنقه وصار يتنهد ، يربي بس لا تجي النوبة هنا

كوم اطلع ، باوعلي باستفهام ، كوم اطلع لتجيك النوبة هنا ، الكاميرات جاي تصور ليرحون يصوروك

كام بدون ميجاوبني حتى يطلع بس وقفته المصورة

المصورة : وين وين بعدنا ما اخذنا الصور

هارون : الناس منتظريني بقاعة الزلم

المصورة : لعد خلي ناخذ اللقطات هسه حتى تاخذ راحتك ، يله عروستنا الحلوة كومي

زبيدة : كمت وكفت وهي صارت تعلمنا شنسوي حتى تاخذلنا صور

المصورة : صير وراها ، حاوط خصرها وخلي خدك على خدها وابتسمو

زبيدة : اسمعه يستغفر ، بريئ منك الله

المصورة : هههه شبيكم مستحين يله

زبيدة : تقرب وكف ورايه ورفع ايده حضن خصري وخله راسه على جتفي

المصورة : قرب خدك على خدها

هارون : لا يا بنت النعال

المصورة : العفو !!

زبيدة : ما رد عليها ، مال براسه ولزك خده بخدي ، بلعت ريكي وتوترت من صار وجهه قريب على وجهي لدرجة احس بانفاسه

ورغم كل هذا ركزت على شغلة وحدة ، هو ليش ريحته هيل !!

المصورة : كلش حلو

هسه انداري عليه وخلي اديج على وجهه

زبيدة : باوعتله مقطب حواجبة ورجع وجهه كلب اصفر

يربي خاف صدك يسويها ويتقيء عليه غير احطه واخنكه هنا وانعل ابو هالعرس

هارون : فضينا بعد ما اتحمل اختنكت

زبيدة : تقربت خليت ايدي على لحيته وهو حضن خصري ، اخذنا اللقطة وتكررت بعدها عدة لقطات

المصورة : هاي اخر لقطة ، خليج واكفه باستقامة وانت دنگ بس راسك و بوسها من شفايفها

زبيدة : تفاجئت من جرئة المصورة وهارون هم ما استوعب الكالته ضل صافن بوجهها تالي عاط بيها

هارون : شهالاستهتار هذا

زبيدة : عاط بالبنية عيطة خله القاعة كلها تسمعها ، خطية البنية والله فزت فزه

المصورة : العفو بس هي هاي الوضعيات

هارون : ميحتاج الاخذتي كافي

زبيدة : نتر ايدي وطلع من القاعة ، باوعت للوادم كامو يتبسبسون ، الكبر اي والله ميعولون يلكولهم سالفة يعلجون بيها ، منافقين

كعدت اباوع للحفلة وابتسم واجامل الكل ، الي يشوفني يكول هاي طايرة من الفرح ميدرون البكلبي نار لو اغطس ببحر هم متنطفي

كملت الحفلة بعد عناء طويل ، واجت الزفه طبعا جدي راد العرس هو حنه هو زفه واني مالي رأي العليه ابدل واجي حالي حال المعازيم

لبست العباية واجه الشفيه اخذني وطلعنا للزفة ، حتى اكون صريحة اليوم جان عرس بحق

يمكن لو جنت حاضرة على اني شخص عادي جان وضعي حيكون مختلف ويمكن راح اكون جدا مستمتعه

خصوصاً الزفة جانت فدشي خيال ، الدبكة بالشارع والركص والاجواء تجنن

اشتهيت انزل وياهم كد ما تحمست وتونست على ونستهم

هارون : تحبين انزلج وياهم بلكت تحصليج كرصة لزمة **** تونسج اكثر

زبيدة : انداريت عليه متفاجأة ، انت شكاعد تمسلت

هارون : اشوفج تباوعيلهم وتتحسرين كلت اني الابادر واعزمج ترحين يمهم هم همه يتونسون وانتِ تتونسين

زبيدة : اذا جان كلامك صحيح فمعناها انت **** لان بس الـ**** يقبل على عرضه هالشي واني وإن جنت مو مرتك راح اكون بنت عمك يعني بالحالتين عرضك وشرفك والي يمسني يمسك

واذا فعلا اني طلعت هيج فعار عليك بين الزلم ما دام تدري بعرضك هيج نكس وراضي

ما جاوبني ، هاا شو سكتت ماعندك جواب الظاهر

هارون : كافي سدي حلكج شكد تلغين

زبيدة : اعذرك مبين حجيي لصمك على حلگك وخلاك متعرف تحجي بعد

فزيت من دخلنا بمطب وهو النذل داس بانزين وخلاني انشال وانشمر بمكاني لدرجة انضربت بالسقف مالت السيارة

عطت بي شبييييك

هارون : سكتي كلت

زبيدة : اللهم طولج ياروح ، ما اكول غيرها

رفعت ايدي فركت راسي ، الله لا ينطيك العافية بحق النبي محمد ، طايح الحظ

هارون : يله يالشريفة ام العرض وصلنا

زبيدة : شريفة غصبًا ما عليك ، فتحت الباب واجتي دنيا وديمة ساعدني انزل

دخلنا للفندق وبوجهنا للغرفة والشفية بقى بباب الفندق

دنيا : هاا زبد خوما خايفه

زبيدة : وعلى شنو اخاف

ديمة : يعني ما خايفه من هالليلة

زبيدة : لا ما خايفة قابل راح ياكلني هارون

حمزية : ولج انتِ والله صلفه

زبيدة : تره ما حجيت شي بيبي شنو السالفة مو شرط اكون خايفه شنو طفلة اني

متداركة الموقف واعرف شلون اتعامل ويا

اباوع لدنيا دگ موبايلها ، شالته وجاوبت بس وجها انخطف ، انوب اخذت ديمه وراحن على صفحة

سألتهن شبيجن هيج وجوهجن صارت ، خير خو ماكو شي اسم الله

دنيا : هاا لالا ماكو شي

زبيدة : اكيد ؟

دنيا : اي زبيدة شبيج قابل ليش داجذب عليج

صوت الشباب صار قريب ، يله كلبي احنه لازم نروح
اليوم راح نبات يم اهلي علمود معين تدرين باجر طيارته

زبيدة : ادري وبالي يمه والله ، باجر الصبح اجي من وكت حتى اشوفه

حمزية : يمه انتِ عروس شعندج جايه باجر ابقي ويه رجلج نامو وارتاحو باجر وراكم سفر

زبيدة : بيبي اني مجهزة كلشي ميحتاج انتظر عود اجي باجر اودع معين واسلم عليكم واروح

حمزية : براحتج يمه ، تعالن بيبي يله اجه رجل اختجن

زبيدة : تقربن خواتي بوسني وودعني وطلعن ، اني ضليت كاعدة وافكر باجر شلون راح اسافر واني هالكد تعبانة

سيد الحسن والجمال عنده عرض وسنتر العرس ويه سفرته عشتو عود هم شغل وهم شهر عسل ، شهر بصل على راسك وراس بيت جدك بجاه كلمن اله جاه عند الله

باوعت للباب انفتح ودخل الشفيه بطوله الفارع ، عاب هالطول اي والله

اباوعله شال راسه باوعلي صفح وذب سترته على القنفه ومد ايده يفتح بالكرڤته

هارون : اذا كاعدة ومنتظرة مني شي فلتعبين نفسج وكومي بدلي ونامي

زبيدة : هههههههه اني انتظر منك شي ههههههه صدك ضحكتني

لالا جديات لازم تشوفلك حل بداء العظمة هذا عززه والنبي تفشل انت

ما بقى بس انت اكعد انتظرة اصوم اصوم وافطر على بصله

هارون : لعد كومي بدلي المن كاعدة ومسويه هالاستعراض اذا تريد توصلين رسالة انُ عندج جسم ومفاتن فصدكيني رسالتج وصلت وشفت صدرج

يله توكلي

زبيدة : شكد اني مصادفه ناس سز ومتستحي بس مثل هارون لا والله ما شفت ولا راح اشوف

كمت فتحت جنطتي طلعت تراك ستن ودخلت للحمام ، ذبيت البدلة وسبحت ، كملت وبدلت وطلعت

لكيته لازم موبايله وكاعد على صفحه من شافني طلعت دخل للحمام واني نشفت شعري وكمت للصالة مالت السويت ، لكيت على الطاولة اكل

فتحت العلاكة لكيت اكل وببسي ، طكيت قوطية الببسي وطلعت الاكل وكعدت اتعشى

هم عايزني انتظر الميتسمى عشتو ، ياكل زهرمان البخاري ان شاء الله

بديت اكل وللامانة اكلت من خاطر لان جوعانه وتعبانه وبالمركز ما اكلت غير لفة وكعدت وسكتت واني من النوع الاكيله ما اكدر اعيش على الخفايف

كملت اكل وعفتله اكله على صفحة وكمت حتى اغسل
دخلت للغرفة لكيته لابس فانيلة رجالية بلون اسود ووياها بجامة سودة ومتمدد على الجرباية

غسلت وفرشت اسناني وطلعت ، تقربت على الجرباية حتى اسحب مخدة واروح انام بالصالة بس فاجأني
من مد رجله على المكان الي المفروض انام بي

اباوعله شال ايده عن عيونه وباوعلي

هارون : لتنامين هنا ، تلعب نفسي من واحد ينام بصفي

زبيدة : جريت المخدة ، يابه دولي منو بحالك انت
خشتك يتمزلك عليها فيل

اخذت المخدة وسحبت اللحاف ورحت تمددت بالصالة ولان ماكلة وشبعانه بسرعة غفيت

كعدت الصبح على صوت المنبه تثاوبت وكعدت ، رجعت ظهري وطبكته على رجلية من الخلف حتى تطگ عظامي

رجعت كعدت وطكيت ركبتي ، فتحت عيوني لكيت هارون كاعد كبالي ، مبدل ولازم بايده كوب مبين بي كهوة من ريحة المكان

اباوعله صافن بوجهي وموسع عيونه ، هذا شبي من الصبح استغفر الله

كمت من الفراش ودخلت للحمام ، غسلت وفرشت اسناني وطلعت

رحت الم فراشي

هارون : حضري روحج بسرعة حتى نطلع اخوج طيارته بعد 3 ساعات

زبيدة : رحت بدلت بدون لا ارد عليه ، كملت تبديل وشربت بسرعة كهوة بدون لا أتريك حتى الحك على معين

طلعنا وبوجهنا للبيت ، دخلنا والكل باركلنا وكالعادة جاملنا بدون نفس

رحت سلمت على خواتي وبوست معين ودعته

معين : ديربالجن على نفسجن حبيباتي اني سفرتي مطولة وراح اكون على تواصل دائم وياجن بس مع هذا ديرن بالجن على نفسجن واي شي تحتاجنه خابرني حتى لو موضوع مضوججن اني موجود استمعلجن

وانتِ زبد فدوة اروحلج انتِ هسه تزوجتي وراح تعيشين ببيت جدي ، بيج ومتسيطرين على اعصابج
حاولي تعيشين بهالبيت بسلام وبدون مشاكل على الاقل بس هالكم شهر

لتخلني اسمع اخبار عنجن تقهرني وتأذيني خوش يبعد اخوجن

دنيا : حاضر حبيبي انت روح ولا يهمك

ديمة : احنه بخير لتخاف علينا

زبيدة : روح وانت مطمئن اني راح اتكفل بكلشي وراح اكون كد المسؤولية ان شاء الله

حضنا وودعنا بدل الدموع دم ، حبيبي ربي يسهل طرقيك وينور دربك وترجعلنا بالسلامة بحق الحبيب محمد

طلع معين واحنه طلعنا ويا وصلنا للمطار هو وعمو يحيى وعيسى و ودعناهم ورجعنا

دخلت اني لغرفتي او غرفة الشفية ، جان فصالها تركي ولونها نيلي

اخذت جنطي نزلتهن جوه واجت العاملة نزلت غراض هارون ، خليناهن على صفحة وكعدت لمن صار وقت طلعتنا

رحت اودع خواتي واهلي ، دخلت للبيت شفتهم كاعدين بالصالة يسولفون

دنيا : راح اموت من الخوف عليه والله

ديمة : سهير تكول نازف هواي

دنيا : ياربي تكومه بالسلامة يارب

وئام : ما خابرج يوسف بعد

دنيا : لا والله

ام حسن : هسه بله هاي هم سوايه صدك جذب ، همزين عاد لحكو ونقلو للمستشفى

زبيدة : منو الداخل مستشفى ؟

شبيكم صفنتو بوجهي غييير تحجون وكعتو كلبي

ديمة : اهدي زبيدة اهدي ماكو شي

زبيدة : تحجن لو شلون منووو بالمستشفى ، معين !!! لو واحد من رجولتجن

ديمة : لا والله لتخافين حليم الي بالمستشفى

زبيدة : خير ان شاء الله شبي

دنيا : انتحر البارحة

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة / بارت اليوم جنت ناوية اكتب بي حدث معين حلو وممتع ويضيفلكم معلومات كلش حلوة هم لكن للاسف تواصلت ويه زبيدة وللان ما ردت عليه فما كدرت اسرده لان ناسيته واحتاج منها تفاصيل لكن ارجو من الله يكون سبب اختفائها خير

ملاحظة2/بارت اليوم يعادل بارتين اتمنى يكون عجبكم ❤️

.