الموت الحي الفصل الرابع وخمسون 54 - بقلم براء الموسوي

مرحبا حبايبي العسل شلونكم ❤️❤️

~~~~~~~~~~~

بطريقة قاسية ومؤلمة اجبرتني الحياة على التغير
أنا لم اعد أنا

"هَارون"

~~~~~~~~~~~

#الموت الحي
#للكاتبة براء الموسوي

زبيدة : سميت بسم الله وشمرت نفسي بالمي ، اول ما غطست جوه لطمت على وجهي

عزززه بعينك يهارون

يبس الدم بعروكي واني اشوف حوت كدامي وهارون قريب عليه

اباوعله متقرب للحوت لدرجة فضيعة بحيث شويه ويطخ بي وزياد يباوعله من بعيد ولازم كاميرا ويصوره

يربي اني شلون بيه ويه هالمسودن يريد يموت ويموتني وياا ، احترك حظج يا زبيدة على قسمتج الغبرة هاي

انوب زياد شافني واشر لهارون عليه ، شفته اندار عليه وسبح باتجاهي

من وصل يمي جريت ايده حيل وسبحت باتجاه المركب

لزمت الحافة وصعدت ، عيوني انتهت من المي وهدومي كلها تنكعت ، انداريت لكيته بعده بالمي بس
مطلع راسه وعيونه تخزر بيه

هارون : انتِ شنزلج ؟

زبيدة : اقسم بالله العظيم اذا متطلع العبببب بيك جوووله ترييييد تموتتتتنيييي انتتت

هارون : قز القرط وسم

زبيدة : بكلبك ان شاء الله ، اطلع يله رجعني للمنتجع وارجع عسما تذب روحك بحلگ الحوت يطبك طوب
رجعنييييي يييييييله

اباوعله دخل اشر لزياد وطلع صاعد على المركب

كعدت ، اديه وجسمي كله يرجف الله لا يوفقك ولا ينطيك العافية هاليوم وكل يوم

حضرة جنابة جايبني هنا حتى يسودني ، ااااخ بس لو افتهم الحوت ليش ما اكله وخلصني من شره ،
شهالبلاء هذا الوكع على راسي يربي

انتبهتله طلع خاولي وشمره بوجهي ، شاغت روحي ، السافل شلون كطفه بخلقتي

هارون : لفي روحج بي جسمج كله مبين واهدي تره مالها داعي كل هالدراما

زبيدة : اخذت الخاولي لفيته على جسمي اديه وشفايفي يرجفن حتى ما اكدر احجي

دراما شنو لك بابا هذا حوت تعرررررف شنو يعنيييي حوتتتتت يكدر بثانية وحدة يسوينه وذر

جان يريد يحجي وبطل من شاف زياد يطلع من المي ينفض بشعره ويضحك

زياد : على بختج خوية شنزلج لو غرگانه جان رحتي بيها وروحتنينا وياج

زبيدة : ما رديت عليه روحي واصله لخشمي ، هارون حاجي السايق خلي نرجع راح اموت من البرد

زياد : هاج خوية هذا شرشف تلفلفي بي خاف تتمرضين

زبيدة : ما كدرت اكله لا اخذت الشرشف لفيته على روحي وعيوني تباوعلهم بحده

زياد : بعيًدا عن الاكشن السوته مرتك بس خرب عرضك هارون ما توقعتك تسويها والله

هارون : اني حجايتي ما اثنيها كتلك راح انزل واخذ صورة ويا وعن قرب وسويتها

زياد : بس والله صور تفلش ، تعال شوفها تشك شك

هارون : من ترجع لبيتك دزهن الي مو محلها هسه

زياد : ليش ما راح تجون وياي

هارون : لا اليوم جان عندي شغل هواي وجسمي تعبان خليها على باجر ان شاء الله

زياد : هاهي براحتكم

زبيدة : بحده هارون حاجي السايق بسرعة ، حاجة السايق المطي الي اصر ياخذ الاوامر منه ياله يتحرك

عمى بعينه لو مرجعني من البداية ما صار بيه شلاع الكلب هذا

رجعنا للمنتجع ، نزلت واني لافه روحي ونعلون يمشي بمحاذاتي

هارون : على كيفج حفرتي الكاع برجليج

زبيدة : مو گاع ابوك هي معليك

هارون : اهدي تره الموضوع ميستوجب ردة الفعل المبالغ بيها هاي

زبيدة : وكفت وانداريت عليه

انت مستوعب الموقف الخليتني بي ، اني طول حياتي ما اتقرب حتى للبزازين لمجرد انها حيوانات وممكن تأذيني

وانت راويتني العجب ، خيول واسود ونمور وبزازين سودة تكول جنانوه وهسه حيتان

انت تريد تموتني ناقصه عمر يا اخي اذا انت حياتك مو مهمة عندك فهذا شي يخصك اما اني عندي اهل يحبوني وحياتي مهمة عدهم ليش تعرضني للخطر هيج اذا خسرتهم وخسروني الربح بيك

والله شنو حضرتك عاجبك تتصور ويه حوت استغفر الله يشبه النعال حتى ملامح مابي

هارون : لو جنتِ تعرفين الكائن الكاعدة تستهزئين بي شنو هو وشنو قيمته للمجتمع والبشرية كلها ما جان تجرأتي تحجين عنه كلمة وحدة

زبيدة : ما ارييييد اسمع شي جفينيييي شرك وشر حيواااااناتك لخاطر الله

هارون : شكد تلغين دخيل محمد لسانج ميتعب
نعلعلا يومج

شو هاج ويله بوجهج للغرفة بدلي هدومج ونزلي حتى نتغدة ، اخذي الكارت فضيني

زبيدة : اخذته ورحت بوجهي للغرفة ، دخلت بسرعة سبحت وطلعت جففت شعري وصليت الظهر

كملت وكمت طلعتلي بلوفر شتوي بس قماشة مو ثخين لبسته ولبست جينز ويا وحجاب ونزلت

لكيته كاعد بالمطعم وجاي ياكل ، والله يهذا الانسان ذرة ذوق ما عنده واني من شفته هيج رحت كعدت على غير طاولة

هم عوزني اكعد ويا وهو حتى ما كلف نفسه ينتظرني ربع ساعة علما انزل

صحت للكرسون حتى اطلب وشفت هارون رفع راسه باوعلي وقطب حواجبة مستغرب

كام من مكانه واجه وكف على راسي

هارون : ليش كاعدة هنا ؟

زبيدة : ميخصك

هارون : شنو ميخصني اني مو كتلج لتثيرين الانتباه اني هنا معروف وما اريد تجيني حجاية من وراج

زبيدة : باوعت بوجهه ، اريد اتغده براحتي ياريت تعوفني وترجع لطاولتك لان اني هسه متنرفزة
وحفاظًا على اخلاقي يفضل اضل كاعدة وحدي

هارون : يعني ما راح تكومين ؟

زبيدة : اعتقد حجيت بالعربي اني !!

هزلي راسه بتوعد وراح

هارون : بسيطة

زبيدة : بسيطات هم مو بسيطة وحدة ، يله عوفنييي طلبت الاكل وكعدت اكل بدون شهيه

احسني لسه خايفة من الموقف الي صار ، يابه والله لوما شايفه الحوت بعيني جان كلت جذب اكو كائن بهذا الحجم

الحوت جان جبير لدرجة هارون الي چنه غول طالع حمامة بصفه

ذبيت الخاشوكة وغطيت وجهي ، احس الرجفة لسه بجسمي ، الله ستر علينا اليوم وما صرنا وجبة شهية للحوت

يربي انت وين ذبيتني وبيمن قسمتلي ارتبط ، اني عايزة قهر وشلاع گلب يا الهي خاف جان القلق والرعب الي بحياتي ممكفيني هسه اجه اليزيد
عليه

شربت مي وكمت غسلت وطلعت امشي على البحر

الشمس جانت طالعة واني بردانه استغليت الفرصة وضليت امشي حتى اتشمس واتدفه شويه

نزعت حذائي وجواريبي (تكرمون) وضليت امشي على الرمل ، غمضت عيوني من الشعور الي اجتاحني

اخذت نفس بقوة محاولة اهدئ نفسي ، فتحت عيوني وسحبت موبايلي واتصلت على دنيا

مترد

رجعت اتصلت على ديمة ، الووو دمدم شلونج

ديمة : هلاووو زبد حبيبتي ، اني الحمدلله انتِ شلونج

زبيدة : متونسه ومشتهيتكم ويايه

ديمة : شو صوتج ميبين هيج

زبيدة : لا بالعكس بس لان من الصبح طلعت افتر احس بتعب شويه

ديمة : طمنيني شلونج انتِ وهارون خوما سوالج شي لو اذاج والله اني بالي يمج وحيل خايفة عليج

زبيدة : لا اني وهارون كلش زينين ومتفاهمين الحمدلله ودنتونس سوه

ديمة : يعني اموركم زينه وهارون مديضوجج لو يسويلج شي

زبيدة : لا بالعكس اصلا طلع كلش حباب

ديمة : صدك والله

زبيدة : اي وحنين هم

ديمة : والله فرحتيني يله الحمدلله من طلع زين مو مثل ما جنه متصوري

زبيدة : ياريت لو اكدر احجي واكول انه انكس مما همه ميتخلين بالف مرة

احم الحمدلله ، يله حبيبتي اني اروح هارون ديصيحلي

ديمة : اي عيني اي هسه صرنا احنه كُخة وصار حضن هارون مينعاف

زبيدة : ههههه غير زوجي يله ولج ولي

ديمة : ههههه اوك باي

زبيدة : اول ما سلمت عليها وسديته اختفت ضحكتي

زوجي !! نعال احسن

خليت موبايلي بجيبي ورحت اشتريت عصير و وكفت اباوع للموج شلون يروح ويجي

داشرب وشفت خيال يغطي عليه ، انداريت لكيت واحد طويل واشكراني

لفت نظري بي شغلة وحدة ، لابس برمودة لونها وردي !! عمه بعينك على هاللون انوب مو وردي عادي فوشي

باوعتله لكيته مبتسم بوجهي ويروح منا ويجي منا هلاووو الاخ مبين عليه مفول

واشرتله بايدي ، خير !!

گلي هلو بالانكليزي ، افتهمته اجنبي مو عربي ، رديت عليه برسمية وسألته

- Hi , can I help you with something?

- اهلا هل يمكنني مساعدتك بشيء؟

- you are a muslim right?

- انتِ مسلمة صح ؟
- Right, why?
-صح ، لماذا ؟

- Actually, I find you beautiful and would like to get to know you, I hope you don't mind

- في الواقع وجدكِ جميلة و ودت ان اتعرف عليك ، اتمنى ان لا تمانعي ذلك

زبيدة : هزيت راسي ، خاف اني عايزة جماله عليه انت

اااخ يالزلم اااخ تموتون اذا ما احتكيتو بمره ، جاوبته بهدوء لان مالي خلك اتعارك

- Thank you for your compliments, but I don't want to get to know anyone. Bye

- شكرًا لك على اطرائك ، لكني لا أريد التعرف على أي شخص ، وداعًا

عفته ومشيت واسمعه يمشي وراي ويصيح wait
سويت روحي ما اسمعه ، سرعت مشيتي وما احس بي غير يحط ايده على جتفي

انداريت عليه ولويت ايده بقوة ، خاف اني ما زهكانه من نعلون اليوم وطلعلي هذا يتطوطح ويريد يتعرف
براسي

انوب اني الثولة نسيت هو ميفتهمني ونزلت عليه دوسه ونص

هييي ابن الكلب مو كتلك ما اريد اكل تبن شبييك تركض وراي وجهه الچلب ابو شورت الفوشي جمالة عليه انتتتتتت بشورتك هذااااا

كام يصيح ومنا هو مايع عوزه شويه وتجي الشهرية من الانوثة البي ، نترت ايده من شفت 2 من السكيورتي يجون

باوعتله شو هذا تمدد بالكاع وكام يصيح ، شدعوة الي يشوفه يكول طحتله بوكسات مو لويت ايده

هزيت ايدي وغميته اهمداك من بين الزلم اي والله

نزلت البلوز لان طلعت بطني ودنكت اخذت حذائي وكمت ، ابن الزفرة فضحني الله يفضحه

انداريت لكيت هارون واكف بعيد ، جكارته بحلكه يدخن وعيونه عليه

انتبهتله شتت نظرة عني من شافني اباوعله وطلع الجكاره من حلكه مأشر للسكيورتي يشيلو وهمه ما كالو لا كومو واخذو وياهم

ما انكر الصار ابد ما ضوجني بكد ما ضوجتني ردة فعل هارون ، للاسف هالموقف خلاني اكتشف طبع جديد عن هارون وهو انه مو رجال وماعنده غيره

لان هو من البداية جان موجود ومن شكله جان حاضر من الاول بالجذب ما شالته غيرته واجه ساعدني

خلي ننسى انُ اني مرته وبنت عمه ولنفرض اني بنية ضعيفه وما اكدر ادافع عن نفسي ، يصير يشوفني اتعرض لمضايقات مثل هاي ويضل ساكت ؟

مو المفروض تشيله غيرته ورجولته عليه وتخلي يجي يساعدني على الاقل يوخر الولد عني بدون ليسوي مشاكل

بس الظاهر النظرة الاخذتها عنه من البداية انه مو رجال طلعت صحيحة وهالموقف ثبت هالشي

من الخيبة الحسيتها بلحظتها گبل صعدت فوك وذبيت روحي على الفراش ونمت حتى ملابسي
ما بدلتهن

__________________________________

دنيا : سمعت عيطة يوسف تجي من جوه الدرج خلت گلبي يوكف ، يربي دخيلك لا كلشي ولا تيم

ركضنا اني وخالة لجوه الدرج ، جان جوه الدرج جناح العاملات

دخلنا ولكينا يوسف شايل تيم وعيونه تبث نار من العصبية

اني نسيت كلشي من شفت تيم ، ركضت اخذته من يوسف ، ضميته لصدري بقوة وبجيت

يبعد عمري ، يبعد روحي انت ، وكعت گلبي والله وكعته لو صاير عليك شي شسوي اني بهالدنيا بلياك

ابتعدت وبوسنه من كل وجهه وشهكاتي ما راضيه توكف

حسيت بيوسف يحضني

يوسف : اهدي حبيبتي على كيفج هذا ويا تيم كلشي مابي شوفي مثل الورد

دنيا : بدموع لو صاير عليه شي اموت والله اموت ما اكدر اعيش بليا

رميم : اسم الله على عمرج وعمره يمه شهالحجي هذا

كريم : صلِ على محمد خويه هذا ويا تيومي بحضنج
وكلشي مابي

دنيا : باوعت لتيم يرفع باديه ويمسح بعيوني

تيم : لتبجين ننه هو يمج

دنيا : بوست اديه الي على وجهي ، يروحي انت وين جنت خليتنا نبجي عليك عبالنا سويت اوا

باوعت ليوسف وين لكيته وليش صيحت هيج تدري بروحك اجيت تجلطني الف حسبه اجت ببالي والله

يوسف : لكينا اني كريم بجناح العاملات بغرفة الست بالتحديد

دنيا : اشر يوسف على سجى ، باوعتلها جانت مدنكه راسها وتبجي

خير سجى شبيج ليش دتبجين حبيبتي ، جاوبتني وكوه دتحجي من البجي

سجى : والله يا ست اني ما جنت متقصده اخوفكم على تيم

بس شفته وحدة بالصالة وخفت لا يوكع لو يتعور ، شلته وصعدت ادور على غرفة حضرتج ما اندليتها فكلت اجيبه يمي لحد ما يجي احد للصالة واني اطلعه

والله العظيم يا ست ما ردت ااذي لو اسويله شي حتى اذا تردين احلفلج على القران

رميم : اهدي امي اهدي شجاج راح تموتين من البجي

وانت يوسف شمسوي بالبنية مخليها تتراجف شبيك امي البنية امانه هو هيج

يوسف : اني ما كلتلها شي بس ميصير تاخذه بدون متحجي لو تنطي خبر لاحد شمدرينا احنه يمها هو
شنو نشتم كفه ايدنا مثًلا

شهالتصرف الصبياني والغبي هذا والله العظيم زين ما انجلطنا اني ومرتي من وره سوايتج

سجى : اسفه استاذ بعد متتكرر والله

يوسف : اتمنى

امشي كريم نروح يم حليم ، عايزين هبطات بهالزلك
جماله علينا احنه

دنيا : باوعت خالة ليوسف بعتب وراحت طبطبت على جتف سجى

رميم : ميخالف حبيبتي امسحيها بوجهي هو يوسف عصبي وكلش متعلق بابنه هلي تشوفي ينحس عليه

وداعتج هو مو بس وياج هيج ويه الكل ميأمن يعوفه بأيد احد غير دنيا ، فلتزعلين امي انتِ

سجى : لا عادي مدام حقه اني الغلطانة اصلاً

دنيا : ما صار شي حبيبتي انسي الموضوع واعذرينا على اسلوب يوسف وياج

طيبنا خاطرها و طلعنا ، هسه بله هي هاي سوايه يسويها يوسف ما حبيت كلامه ويه البنية شنو يعني اذا عاملة ما عدها مشاعر ومتحس

رميم : ميخالف معذور متشوفين الهبطة الاكلها من غير سالفة حليم الشدتهته هو واخوته سوده عليه

روحي يمه روحي لغرفتج وهسه ادزلج عصير ليمون بايد وحدة من العاملات وجهج صار جنه فلس من الخرعة

دنيا : هزيت راسي واخذت تيم وصعدت ، كل شويه ابوسه واشمه يمه ممصدكه هو بحضني

دخلت للغرفة ، كعدت تيم على الجرباية وتمددت على رجلية

تيم : تنامين ؟

دنيا : اي عادي انام على رجليك

تيم : نامي عبيبتي

دنيا : ابتسمت وجريته عضيته ، اكرطك هسه اكرطك شنو هاللسان يمه صدقة لهالحلك

__________________________________

ديمة : كاعدة انظف غرفتي ، خالة وبصائر طالعات لعرس صديقة بصائر واني بقيت بالبيت وحدي

خطية شكد توسلن بيه اروح وياهن بس اني عليه الشهرية وهاي الفترة بالذات اني اتنحس وما اشتهي كلشي اسوي

خو مزاجي يصير زفت عاد الحمدلله تغير مودي من خابرت معين واطمئنيت عليه الحمدلله وصل وان شاء الله بعد 3 ايام عمليته

بلكت الله تنجح العملية ويرجع يكوم ، حبيبي انشلع كلبه على هالكرسي المتحرك

تنهدت وذبيت الوصله من سمعت صوت الجرس يندك
رحت غسلت اديه وسحبت شيله خاله خليتها على راسي وطلعت

صحت منو ، اجاني صوت بنية ، فتحت الباب صارت بنية بوجهي

: السلام عليكم

ديمة : وعليكم السلام ، تفضلي حبيبتي

: شنو ما عرفتيني ؟

ديمة : لا صغرًا بيج گلبي لا والله معرفتج

: ههههه لا عادي اني تقى جوارينكم الي جبتلكم دولمة ذاك اليوم

ديمة : ابتسمت هااا اهلاً وسهلاً حبيبتي ، عذريني والله بس دايخة شويه هلي ما تذكرتج

تقى : ما صار شي حبيبتي ، تفضلي هاي مسوين ثواب

ديمة : اخذت السفري منها ،حبيبتي ربي يجعله واصل ، تفضلي دخلي ليش واكفه بره حارة عليج

تقى : لا ما اكدر خاف ولدكم موجودين واحرجهم

ديمة : شتحرجيهم ماكو احد بس اني بالبيت تفضلي حبيبتي

تقى : لعد اذا هيج اطب

ديمة : دخلتها للصالة ورحت ركض طلعتلها عصير ومي وضيفتها

تقى : عاشت ايدج يحلوة

ديمة : ابتسمت وكعدت يمها

تقى : تدرين بغض النظر عن جمالج بس احسج كلش لطيفة ما اعرف ليش

ديمة : كرصتني من خدي واني ضحكت ، حبيبتي تسلمين انتِ الالطف

تقى : تدرين اني ماعندي صديقات ابد ولا اهلي يخلوني اطلع فتشوفيني هيج جني ملكوفه اريد بس اتعرف واكون صداقات

اصلا من كتيلي دخلي ما صدكت اريد بس احجي واتعرف عليكم بالمنطقة واكون صداقات وياكم لان مبينين كلش حبابين

ديمة : يا حبيبتي ولا يهمج اعتبريني صديقتج وشوكت متحبين تعاي لهنا اني وبصائر خواتج ان شاء الله

تقى : فدوة طلعتي صدك لطيفة

ديمة : هههههه ، ضليت ادردش وياها

انتِ شمكملة ؟

تقى : والله بطلت من الثالث متوسط

ديمة : حرامات لو مكملة ليش تركتي

تقى : ضليت ارسب اكثر من سنة تالي كلت لابوية خليلي مدرس ووعد انجح وهو ما قصر خلالي مدرس وهم رسبت

تالي من شافني حتى ويه المدرس وكل المصاريف ما دبرتها كتلني وكعدني

ديمة : وشدعوة عليه قحط واذا خسرلج مدرس

تقى : هو هم خطية تره احنه ناس على كد حالنه يادوب جاي نخلي الفلس على الفلس حتى نكدر نعيش غير هيج اني مو وحده

احنه تلث بنات وكل وحده بينه الها مصاريف واحتياجات من غير مصاريف البيت كل هاي السوالف معتمدة على راتب ابوية قابل شيصير الرجال

ديمة : خطية الله يساعدكم ويفتح عليكم ابواب الرزق

سمعت صوت الجرس ، استأذنت منها وكمت

طلعت فتحت الباب طلع امين ، هاا الله يساعدك شو راجع من وكت اليوم خو ماكو شي

امين : لا ماكو شي وراجع للشغل هسه بس اجيت انطيج هاي واروح ، هاج

ديمة : انطاني علاكة جبيرة ، فتحتها لكيتها مليانه نمنمات اشكال والوان

باوعتله باستغراب ، شنو هاي

امين : كلت امي وبصائر طالعات واذا بيهن جيه بالعشرة بالليل واني بالشغل و انتِ باقيه وحدج
فاكيد راح تكونين ملانه

فاخذت اذن من المدير واجيت اجيبلج جم حاجة تتونسين بيها علما نرجع وهاا تره النساتل الجبتهن كلهن ككو مر علمود سكرج فاكلي وانتِ مطمئنه

يله حبيبتي اني طالع لشغلي يادوب اخذتلي ساعة بالكوه حتى اطلع اجيبلج الغراض وارجع

ديمة : ابتسمت و وكفت على اطراف اصابعي بسته من خده ، شكراً امين تعبتك والله

امين : انتِ تعبج راحة يروحي

ديمة : رجع باسني من راسي وابتعد

امين : اني طالع قفلي الباب زين ومو تنسين تحضرين روحج من ارجع اني واسلام نروح نتحمد لحليم بالسلامة خوش

ديمة : صار ، طلع واني سديت الباب ودخلت اضحك

تقى : هاا اجوي اخوانج اكوم اروح

ديمة : اخواني شنو ، الاجه زوجي امين ، اباوعلها وسعت عيونها شلون المتفاجئة

تقى : يعني انتِ جنة ام امين مو بنتها ؟

ديمة : ههههه وشبيج مستغربة اي اني جنتها و مرت امين وبس بصائر بنتها

تقى : هاا والاجه هسه رجلج مو ؟

ديمة : اي

تقى : اكلج خاف الرجال رجع علمودج واني خربت كعدتكم شوف شكد فشلة

ديمة : يمعوده شنو السالفة اصلا هو حتى جوه مطب اجه انطاني علاكه نمنمات ورجع لشغلة

تقى : شكد حلو رجع من الشغل علمودج

ديمة : ابتسمت اي هو كلش لطيف

تقى : بله شكد صارلج متزوجة

ديمة : كم شهر ما صارلي هواي حتى ست شهور ما كملت

تقى : ما شاء الله يعني بعدج عروس وزوجج شيشتعل بله

ديمة : امين مهندس بس ممتعين يشتغل عمال بناء والعصر يطلع يشتغل بمسلخ

تقى : هاا الله يرزقه بس هالشغل مو متعب عليه

ديمة : تنهدت هو هيج خطية يضغط هواي على نفسه علمودنا

تقى : خطية زين انتِ ليش متساعدي

ديمة : والله لو اكدر ما اقصر بس اني طالبة وبعدني ممتخرجة وحتى لو تخرجت ماكو تعيين لان اني هم هندسة وللاسف المثلنا مالهم فرص عمل

تقى : هااا يعني مثل رجلج مهندسة ، زواجج عن حب مو ؟

ديمة : ابتسمت لا مو عن حب زواج تقليدي

تقى : هاا الله يخليكم لبعض

ديمة : تسلمين حبيبتي ، ضلت كاعده شويه وكامت سلمت عليه واصرت تاخذ رقمي واني ما مانعت انطيته الها ووصلتها للباب تالي سديت الباب ودخلت

حضرت ملابس امين مالت الطلعه وحضرت ملابسي وكعدت انتظرهم ، خالة وبصائر رجعن من العرس

ارتاحن وصلن المغرب وراحن يتحضرن حتى من يجون الولد كبل نطلع

اني تحضرت وبدلت ، اخذت موبايلي وكعدت بالصالة

هناء : يمه فدوة هاي بصائر تأخرت واخوتها على جيه صعدي استعجليها فدوة اروحلج

ديمة : صار خالة ، صعدت فوك ، فتحت غرفة بصائر لكيتها كالبه الغرفة كلاب وبعدها ما مبدله

هاي بعدج امين واسلام حيجون وانتِ لسه ممبدلة

بصائر : حايره شلبس ماعندي هدوم

ديمة : لعد هالثواب التخبل المن لامي ، اخذي واحد منهن لبسي ، اباوعلها سحبت ثوب مالت طلعه لونه اسود

بصائر : البس هذا ؟

ديمة : والله يخبل لبسي وعندي ربطة لونها بيجي راح اجيبها الج واجي ، رحت جبتها الها لبستها وانداريت عليه

بصائر : شلوني ؟

ديمة : تخبلين بس شبيج هيج متحمسه لعرس صديقتج ما انخبصتي هيج

بصائر : هاا لا عليمن انخبص بس ما اريد اطلع مبهذله

ديمة : انتِ تخبلين بكل حالاتج گلبي شحده اليكول عنج مبهذله

بصائر : يمه فدوة لمرت اخوية التعززلي

ديمة : ابتسمت ونزلت ، صار بوجهي اسلام

اسلام : هاا الفاهية شلونج

ديمة : فاهية بعينك والله اكل لامين عليك اذا متبطل هالحجاية بعد

اسلام : ههههه اوي

ديمة : سخيف

اسلام : دكومي اكويلي قميصي راح نتأخر

ديمة : لا بله

اسلام : بشرفج باربي والله جاي تعبان ومابيه حيل اكوي واذا اگل لبصائر تحجيلي قصة حياتها ومعاناتها ويه الصيدلة ومن القهر عليها حتى ابطل اروح وياكم

ديمة : يله في سبيل الله راح اكوي ولو انت متستاهل

اسلام : على راسي مرت الغالي

ديمة : ضحكت ورحت اخذت قميصه المغسول ، كويته وطلعت انطيته اله

اسلام : رحم الله والديج يوم الاشوفج نادرة بحق الحبيب محمد

ديمة : مشيت وعفته والله متبلس القميص

اسلام : هههههه تعاي ولج باربي اشاقة وياج والله

ديمة : انطيته القميص

يربي اسلام شكد يتنمر عليه ماخذني تصنيف كلما نكعد يكعد يعيب عليه ويصنف واني اتناگر ويا

بس للامانة هو كلش حباب ومؤدب واني كلش ارتاح من احجي ويا احسه عبالك اخوية وهو ميتمادى ابد وهالشي كلش حلو

رحت كعدت ورمشت على بصائر حتى تنزل ليرزلها اسلام على ابو تأخرت

اباوعلها شويه ونزلت ، شنو السالفة نمتي

بصائر : تره خبصتيني

ديمة : غير على مودج حتى لتترزلين

بصائر : المهم اكول ديمة اريد اسألج سؤال ، وجهي بي اختلاف ؟

هاا حسيتي باختلاف

ديمة : اي

بصائر : شنو هو ؟

ديمة : حافة شواربج ؟

فزيت وعطت لان صفكتني راشدي ، مالت السم عورتيني ليييييش تضربين

بصائر : يعني اكلج شنو المختلف بيه تكليلي حافة شواربج شنو يمه جنت مسويتهن ظفاير واني ما ادري
بروحي

ديمة : اي والله ماكو اختلاف بوجهج فخمنت تكونين حافة شواربج شمدريني بعد

بصائر : الكبر متشوفين حاطة كحلة

ديمة : باوعت بعيونها ، ماكو اختلاف انتِ اصلا عيونج مكحلة فليش خليتي

بصائر : طيح الله حظة اليسألج ويكلج شي خوش

ديمة : عافتني ومشت ضحكت ولج الكبر اوكفي شبيج مسودنه هههههه ام طنكورة ام زعله عابتلج

كعدنا ننتظر علما اجه امين بسرعة بدل وطلعنا لبيت عمو يحيى

وصلنا والحرس كبل دخلونا ، استقبلتنا خالة رميم بالباب

رميم : اهلا وسهلا ، نور البيت والله بعد عمري ام امين
زارتنا البركة

هناء : حبيبتي ام علي فدوة لكلبج البركة بوجودكم

والحمد لله على سلامة حليم والله متنا قهر من سمعنا بي مسوي حادث

ديمة : باوعتلي خالة رميم واني غمضت عيوني الها بتأكيد حتى تطمئن انُ محد من اهل امين يدري بحليم متعمد يضرب روحه بالتيل

خطية شفت ملامحها ارتاحت من درت بيهم ميعرفون

دنيا البارحة خابرتني وكلتلي ما احجي شي لان حليم كايللهم ما اريد امين يدري لان اذا دره يزعل مني

رميم : الله يسلمج بعد عمري ، تفضلو تفضلو

ديمة : دخلنا للاستقبال ، كعدنا واجوي الكل سلمو علينا ، حضنت دنيا وبوستها هي وتيومي

دنيا : بهمس سويتي الكتلج عليه

ديمة : اي طبعًا ، كعدت يمي وكعدنا نسولف ، اكلج صدك زبيدة خابرتج اليوم ليش متردين

دنيا : موبايلي جان عند تيم ، بعدين اخذته وخابرتها

ديمة : والله وحشه عليها

دنيا : اي والله بعد گلبي احسها اخذت الونسه وراحت

ديمة : دا جاوبها وشفت باب الاستقبال انتفتحت ودخل حليم مستند على يوسف

اباوعله ، ما متأذي هواي بس وجهه اكثر شي متأذي جسمه كلشي مابي ما عدى ايده

كمنا كلنا سلمنا عليه وتحمدناله بالسلامة ، كعدت وجريت بصائر الصافنه جنها حمار

ام امين : شجاك امي غير تنتبه من تسوق

حليم : احم والله خالة جنت تعبان وما كدرت اسيطر

يوسف : هو التعب جان مفعوله قوي كلش بحيث يخلي الواحد ميسيطر

دنيا : خزرت يوسف اوووف منك اووف اذا ميذبله حجاية ميرتاح

ديمة : بصائر خالة رميم تحاجيج

بصائر : هااا العفو خالة شنو كلتي

رميم : اسأل عنج حبيبتي شلونج

بصائر : الحمدلله خالة زينه

رميم : عساج دوم يگلبي

ديمة : اباوعلها رجعت صفنت ، كرصتها ؟شبيييج

بصائر : هاا شبيه

ديمة : اباوع لعيونها مدمعه ، هاي شبيهن عيونج

بصائر : الكحلة حركتني

ديمة : دروحي غسلي وتعاي

بصائر : لا ميحتاج

دنيا : ضلو عيال ديمة تقريبًا ساعة وطلعو واني لملمت الاستقبال ويه العاملات وصعدت اني وتيم

بدلت لتيم وجهزته حتى ينام ودخل يوسف

يوسف : السلام عليكم

دنيا : وعليكم السلام

يوسف : وشبيج تحجيها من وره خشمج

دنيا : بغض النظر عن السويته ويه العاملة اليوم بس ليش قبل شويه كمت تسمع حليم كلام مو حلو

يوسف : يستاهل

دنيا : ليش تأذي هو عايز قهر

يوسف : ميخالف خلي يحس انُ السوا مو قليل راد يموت روحه ولو صدك ميت شيگل لربه متت منتحر
وسكران ثنينهن سوه

والله علمود شنو الاحبها عرست وطززز شنو اول واحد اخر واحد

دنيا : ميخالف على كيفك ويا هو هم خطية البي مكفي

يوسف : احاول

دنيا : لا انت اليوم كلش قافل اروح انيم تمتم احسلي
تعال حبيبي يله

تيم : تثبح على هير بابي

يوسف : تعال ولك انت كطف الجكارة هالمره سمعت بيك رايح ويه احد غيري وغير ننه وراح امشيها الك مرة ثانية املص اذانك والله

تيم : اثف

دنيا : اباوع ليوسف حصرته الضحكة وفتح اديه لتيم

يوسف : تعال بعد ابوك ، بعد لتسويها حبيبي والله اخاف عليك خاف واحد يسويلك اوا واني وننه نكعد نبجي عليك فبعد لتروح ويه واحد

كول صار

تيم : ثار

يوسف : عفيه بالورد يله روح نام بس انطيني بوسه وشبيكه ، افييييش بعد روحي

دنيا : ابتعد تيم واجاني بسرعة اخذته نومته وغطيته

طلعت اخذت دشداشة نوم ودخلت للحمام بدلت وطلعت امشط بشعري

انتبهت ليوسف يباوعلي من انعكاس المرايه ذبيت المشط وكمت كعدت بحضنه وحاوطت ركبته

شبيك ؟

يوسف : ضايج

دنيا : مسحت على لحيته سولفلي حبيبي فضفض الي بكلبك اسمعك اني

يوسف : اليوم سواية العاملة حيل غثتني وهم سالفة حليم من البداية قالقتني ، اخاف يرجع يسوي بروحه شي لان اليسوي العملة التافهه هاي مو غريبة اذا يفكر يعيدها

دنيا : اولاً العاملة ما جانت قاصدة واعتذرت ماكو داعي تضل ضايج منها وثانيًا بخصوص حليم فصدكني هو متندم على هالعملة السواها ومستحيل يرجع يعيدها وحتى حلف لخالة على القران انه ما راح يرجع يسوي هيج مرة ثانية

فهون عليك حبيبي ، تره من تضوج تصير موحلو ، وهم تطلعلك تجاعيد وتعجز من وكت واني مرة بعدني حتى بالثلاثينات ما داخلة

يعني بعدني شباب شنو ذنبي اگابل واحد من كد ما يطنكر رايح جماله وجهه مجعد جنه شايب

يوسف : يعني تعترفين اني جميل

دنيا : منيلك هنه عيونك الخضر بيهن شويه جمال

يوسف : بس عيوني ؟

دنيا : لا خشمك هم حلو طويل ومستقيم

يوسف : بس خشمي ؟

دنيا : وجسمك هم عود خلف الله على جينات عمو كلكم طلعت اجسامكم حلو وطوال عليه

يوسف : زين ولحيتي مو حلوة ؟

دنيا : حكيت ركبتي وابتسمت لا حلوة

يوسف : وشواربي ؟

دنيا : ههههه هم حلوة

يوسف : والجوه الشوارب شلونهن

دنيا : ضربته على صدره والله عرفتك ما راح تكعد راحه لازم تطبلي من باب مستهتر مثلك

يوسف : بشرفج جاوبيني صار بنفسي اعرف

دنيا : صفنت بوجهه ودنكت بتردد بسته من شفايفه ، اني كلشي بيك يعجبني واموت عليه

يوسف : احبج

دنيا : بعدني ممجاوبته وغمضت عيوني من حسيت بشفايفه تبوسني

بادلته وحضنت جتافه مقربته عليه ، حسيت بايده تسحب مقدمة الدشداشة عن جتفي وشفايفه تمشي على ركبتي

فزيت على صوت دگه الباب ، ابتعدت عنه ووخرت راسه عن ركبتي

يوسف : ادري مسنتريها خرب عراضهم بعدنا بسم الله

دنيا : ضحكت ورفعت تعلاكة الدشداشة وكمت فتحت
الباب ، شفتها سجى

هاا حبيبتي تفضلي

سجى : ست اني استأذنت من المدام رميم وسويت كيكة وكلت اقدمها الج وللاستاذ على البدر مني اليوم

دنيا : يا حبيبتي ليش هيج مزحمه نفسج ، يوسف تعال سجى تريد تحاجيك

اجه يوسف وكف ورايه وباوعلها

سجى : استاذ اني اعتذر على البدر مني اليوم صدكني مجنت متقصده ، تفضل واتمنى تقبل اعتذاري

يوسف : عاشت ايدج وانتِ هم عذريني اليوم جانت اعصابي تلفانه وصارت عصبيتي بوجهج

سجى : لا عادي استاذ اني خدامتكم

يوسف : العفو خوية شهالحجي هذا انتِ هنا اخيتنا

دنيا : ابتسمت البنيه وعيونها كامت تلمع ، انطتني الكيك وراحت

سديت الباب وخليت الكيكة على الميز وانداريت حضنت يوسف وبسته من ركبته

اموووووت عليك من تصير حباب هيج

يوسف : هههههههه بعد روحي انتِ ، سويلي شبگه مثل تيم بله والزهرة صايره بنفسي

دنيا : حضنته بقوة

يوسف : افيييش اي بويه اي كسريني تكسر هيج اريدج

دنيا : هههههههه

__________________________________

زبيدة : رايحة بسابع نومة وما احس الا شي بارد ثلج ينگعني ويطب بخشمي

كمت من الفراش مخروعه ، يييمه يييمه غرگنا

باوعت لهدومي نصهن متنكعات واني كاعدة على الفراش

شلت راسي لكيت هارون واكف على راسي وبأيدة بطل مي جبير وفارغ ، طبعًا ما اخذت وقت حتى اعرف البطل وين تفرغ

عطت بي هايييييي لييييييش

هارون : صباح الخير

زبيدة : الله لا يصبحك بالخير انتتتتت ترييييد تموتنييييي ليييييش دتخبث وياي هييييج

هارون : هذا عقاب الج حتى مرة ثانية تبطلين تعاندين ومن اكلج على شي تنفذي وانتِ ساكته

زبيدة : تذكرت كلامة البارحة من گلي بسيطة لان ما رضيت اكعد يمه

باوعتله واحس نار تطلع من عيوني ، لااا انتتتت هواي تماديت دتعااال

كمت وكمزت عليه عضيته من جتفه بس شنو والله حطيت حركة گلبي كلها بي والنبي حتى طعم الدم حسيت بي وهم ما شفى غليلي منه

من صدك اذيته بس هو ما بده اي ردة فعل ولا حاول يبعدني عنه ولا كإنما داشلع لحم من جلدة

واني ما قصرت من حسيت بدمه يصير بحلگي ياله ابتعدت ودفعته رافعه اصبعي ، والقران يهارون
هالمرة عضيتك بجتفك المره الجايه اعضك براسك

هارون : خلصتي من هالجتف ، هاج هذا

زبيدة : اباوعله اندار على الصفحة الثانية وانطاني جتفه الثاني

من شفته هيج لزمت راسي ، ربي رااااااخ اتخببببببل انييييييي حتخببببل

طبيت للحمام وركعت الباب ، ضليت افتر واحس روحي داموت من القهر

شلون بيه اني ويه هذااا شلون

سمعت باب الحمام تندگ

هارون : استعجلي اني راح انتظرج بالريسبشن

زبيدة : وليييي ما اجيييي

هارون : معين اخوج بعده ما سوه العملية وفهمج كفايه

زبيدة : فتحت الباب بسرعة وجريته من تيشيرته ، اسمع لك اسلوب جدك هذا مالت التهديد والابتزاز
ايالك تتبعه وياي

نتر ايدي منه بقوة وجاوبني ببرود

هارون : اني مو بطبعي ابتز احد مو حبًا بيج بس هالاساليب الرخيصة مو شغلي

كل ما بالموضوع اليوم الصبح خابرني جدي وگلي ليش زبيدة تاكل بطاولة وانت بطاولة

ومثل ما توقعت عادل الكلب(صاحب المنتجع) خال جلابه ورانه بأمر من جدي

ولهالسبب اني جاي اكلج خلي هالاسبوعين يعدن على خير وخلي اخوج يسوي العملية بدون تشتيت افضل
وهسه اني نازل بدلي ولحكيني

زبيدة : عافني وطلع ، كعدت على الجرباية ، هذا جدي شلون بي حتى هنا ما عاتقنا عوزة بس يطب ويانا لغرفة النوم

تنهدت وكمت كالعادة مثل الخاضعه بدلت ونزلت للمطعم لكيت هارون كاعد على نفس الطاولة

كعدت وطلبت بس كهوة احس راسي يريد ينفجر ومالي شهيه اكل شي

اجت الكهوة اخذتها ورفعت الكوب داشرب وصفنت من مر يمي نفس الولد الي لويت ايده البارحة

اباوع لوجهه صاير عبارة عن خريطة وايده معلگه بركبته واصدقائه ديسندو

هاي منو مسوي بي هيج ، معقولة السكيورتي هيج مأذي بس ميستاهل الموقف

هارون : بردت

زبيدة : باوعتله هااا

هارون : كهوتج بردت

زبيدة : رفعت الكوب لشفايفي شربت وبالي يم الولد هاي ليش هيج حالته وشدعوة الحراس هالكد مأذي

هارون : بس نكمل جهزي روحج حتى نطلع

زبيدة : وين ؟

هارون : للسوگ

زبيدة : اباوعله كمل ومد ايده طلع نفس العلبة السودة واخذ منها شي ما كدرت اميزه لان مدنك ، خلا بحلكه وكام يعلج

كام واشرلي ، عفت الكوب ولحكته ، طلعنا من المنتجع
صعدت بالسيارة وهو حرك

ضليت اباوع للطريق علما وصلنا لمكان مكتض بالناس
صف هارون سيارته بمكان بعيد ونزل

نزلت ورا وضلينا نمشي بحدود العشر دقايق وانوب دخلنا لمكان يجنن

يشبه الاسواق الشعبية مالت العراق الاختلاف هاي تحسها نقية ومابيها هوسه هواي مثل الاسواق بالعراق

اباوع لهارون وكف على محل خضروات ، اخذ بيذنجان وبصل وبتيتة وطماطة وعلبة ورق عنب معلبة ، وانوب وكف اخذ شبنت تازه وخضروات

الله ليجذبني هذا يريد يسوي دولمة

هارون : حامض لو حلو

زبيدة : هاا

هارون : سألتج حامض لو حلو

زبيدة : غير افتهم شنو هو

هارون : جاوبي بدون اسأله

زبيدة : حامض

اباوعله راح جاب ليمون هذا شيريد يسوي يربي

هارون : ورايه

زبيدة : استغفر الله ، لحكته شفته وكف يم مسلخ اخذ كميه جبيرة مالت لحم وطلع

اكدر اعرف شتريد بكل ذني

هارون : ميخصج

زبيدة : من سمعته هيج يحجي عفته ومشيت

هارون : وين

زبيدة : ميخصك

مشيت راجعه للسيارة ، كعدت على الزرع انتظره ماكو شويه واجه محمل غراض

فتح السيارة ، خلا الغراض بالجنطة واجه صعد وحرك

اكدر اعرف وين راح نروح

هارون : لا متكدرين

زبيدة : جديات تره اسلوبك كاعد يستفزني اني جايه هنا حالي من حالك واعتقد من حقي اعرف انت وين تريد تاخذني

هارون : نوصل وتعرفين

زبيدة : ماكو فائدة للحجي وياك

هارون : لعد سكتي اذا هيج

زبيدة : سكتت اريد اشوف وين يريد بيه الشفيه

ضل يمشي بالسيارة لا ساعة ولا ثنين ظهري فركس من الكعدة ومن اسأله ميجاوب

لمن وصل لمكان معين خلاني افتح حلكي لدرجة احس فگي تشنج

ضليت باهته ، يا ربي هاي شنو

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة / راح اخلي بكل بارت صورة حسابي مالت الانستا حتى لتضلون كل مرة تسألوني بالتعليقات عن يوزر حسابي ❤️