الموت الحي الفصل الستون 60 - بقلم براء الموسوي

مرحبا حبايبي العسل شلونكم ❤️❤️

•••••••••••••••••••••••••••

"ولإني شديد الصبر ظنوا إني لا اشعر "

"هارون"
•••••••••••••••••••••••••••

طبعًا اليوم عيد ميلادي والمفروض ما انزل بارت بس گلبي ما انطاني اعوفكم منتظرين واشلع كلبكم شفتو شكد احبكم اني 😁 + تفاعلو اليوم وغيرولي المود ما دام عيد ميلادي صار بمحرم وما اكدر احتفل بي خلي اتونس وياكم 😁❤️

#الموت الحي
#للكاتبة براء الموسوي

هارون : ايييييه على راحتج

رايح اني اجيبلج بطانية

زبيدة : ابتعد عني اندار ديمشي وما احس بي غير رجع عليه مطلني بالكاع ونام عليه عاضني من ركبتي

عطت بصوت من نبت اسنانه بركبتي

لللللك ااااخ ااااخ الله لا ينطيك ركبتييييي

شاغت روحي من الوجع احس نار ووجت بركبتي ، طحتله تدفع وميتحرك من مكانه جنه غول

اخر شي كزبر جسمي وكشت روحي من ملمس حلكة على بشرتي فكمت خرمشته من ظهره ودفعته عني

كمت من مكاني ولزمت ركبتي و ونيت بألم ، الله لا يوفقك انتتت مخببببل

شلووووون تتجرأ تتجاوز عليه هييييج متستحييي هي هاي سوايه تسويها مو عيييب عليك

هارون : العيب عليج انتِ ، اني رجال لا يمج ولا كرباج ، تتحارشين بيه وتذبين روحج عليه ليش

زبيدة : فتحت عيوني واشرت على نفسي ، اني !! اني ذابه روحي عليك !!

هارون : لعد شتسمي هذا ، وين ما اولي الكاج بخلقتي وكل ساعة مسويتلج سالفة حتى تحتكين بيه واني كتلج الف مرة لتحاولين وياي اني مو مال هاي السوالف التعبانه

ساعة عندج سؤال ، ساعة تردين تستفسرين على شغلي ، ساعة تسوين امور سخيفة بحجة تخبثين كافي عيب عليج احترمي كبرتج شويه مو طفلة انتِ ولا مراهقة حتى اني اعلمج

ثكلي شويه وفكي ياخه عني تره والله العظيم اني كوه كاعد ادوس على روحي في سبيل ما ااذيج بس انتِ كاعدة تجبريني أتجاوز

شهالاستهتار هذا تطفين عليه ضوه الحمام ، تسويلي روحج نايمة عود يعني راح تحققين الكوميديا هيج

كافي لزمي حدج وياريت من هاللحظة تخلين بيني وبينج فد مترتين ورجاءًا وهاي اني جاي احجي وياج
برجاء مالج علاقة بيه

هذا مو حايط وراج اعتبريني حايط ، اكو واحد يحجي ويه الحايط يا عمي مالج علاقة بيه بعد

ما طلعت عيشه هاي استغفر الله اني روحي ما متحملها انوب عليه انتِ

زبيدة : انتتتت هييييو منو هاي الذابه روحها عليك انت شايف روحك بالمرايه لو محد كايلك شوف روحك

فچك هاطوله حشه خلقة الله لا خلقه ولا اخلاق عليمن يمه اذب روحي عليك واحاول اتقرب منك

شنو المميز بيك بله !! شنو فاتگ الذرة واني ما ادري اصحى على روحك وهذا الغرور حاول تخفف منه

تره اني من خبثت عليك فلان تجاوزت عليه الصبح مو حبًا بيك ولا حتى اتقربلك لو احتك بيك

وانت منو اصلا حتى اني زبيدة انطي من روحي علمودك يابه والله لو تبقى اخر واحد بهالدنيا يما تحرك مني ذرة تعرف شنو يعني ذرة

وحتى لو كل الزلم انقرضو وما بقيت الا انت وخلص ماعندي خيار بعد غيرك هم ما اقبل بيك

هارون : ما دام هيج خليج كد حجايتج واقطعي اي تواصل بيني وبينج

اصلاً تسوين عليه فضل اذا متعتبريني موجود وياج بنفس الغرفة وتتصرفين على هالاساس

زبيدة : ما رديت عليه انداريت راجعه لفراشي ، تمددت وتغطيت

كلامه يدگ بكلبي ، السافل كال اذب روحي عليه ابو كرعه ما لكه غيري تسوي هالسوالف

بيومها للصبح ما نمت الليل كله اطحن بروحي واسب بجدي ومملحكه هو الشمرني هالشمره من الله لا ينطي

______________________________________

ديمة : واكفه اباوع لامين يبدل الصبح حتى يطلع للشغل

عيني على منظره ، بنطرون جينز قديم ورايح لونه من الغسل وقميص بيجي قماشه تالف

شوازاني واخذتك يا امين شوازاني ، انت وين واني وين

شنو هالمنظر ، لا ترتيب ولا ملابس حلوة ، لا شكل حلو ، بُنيته كلش ضعيفة ، وجهه شاحب والهالات نازله على خدوده حتى شيب براسه اكو

يوم عن يوم اتندم على تسرعي بهذا الزواج ، صحيح امين حباب وحنين بس مو من مستوايه

لا الثقافي ولا المالي ولا الشكلي ولا حتى العائلي اني ويا الفرق بين حياتنا السما والكاع

اني شورطت روحي وليش ذبيت روحي بهالعالم واني ادري بي مو عالمي

ذات اليوم صفنت على خواتي ، كل وحدة منهن لابسه اسوار بأيدها يعمي العين من جماله

لو البيوت الكاعدات بيهن ، ما شاء الله دنيا عايشه ببيت عمو يحيى الي بس واجهته تاخذ العقل و غرفتها تطلع اكبر من صالة بيت امين

واني غرفتي تكول مشبريها تشبر مابيها حتى مكان للكعدة يادوب مكفيه الاثاث

زبيدة اختي كاعدة بجنة مو بيت والعاملات يمشن بي مثل الدود ، رجلها سيارته تشتهين بس تباوعيلها

واني رجلي عنده ستوته مزنجرة وتعبانه كلها تراب وشحالها

اني وين وخواتي وين ليش اني عايشة هالعيشة وهن مرتاحات ما اقصد احسدهن لا والله بس مقهورة على نفسي لان انشمرت هالشمرة

لا اكدر اطلب الاريده ولا اتجرأ افتح حلكي بشي اخاف لا اضغط على امين بس الى متى

مستعدة اصبر شهر ، شهرين ، تلاثة وبعدين راح ابقى جني مجدية ، العالم تسافر وتروح وتجي وتشتري كل الي بنفسها واني اضل اباوع بالوجوه

فزيت من شرودي على صوت امين

امين : يله حبيبتي استعجليلي بالريوك تأخرت

ديمة : تنهدت وجاوبته اي يله ، طلعت طفيت الجاي وخليت الجبن على الطاولة ، اجه هو كعد واخذ صمونه

امين : كعدي حبيبتي ليش واكفه ما دامج كاعدة من وكت اليوم تريكي وياي

ديمة : لا ما اشتهي وحباب امين بعد لتجيب من هذا الجبن بي طعم حليب واضح واني ما احبه

امين : ولا يهمج اليوم اخذت لمركز التسوق واشتري كل الي يعجبج واذا تردين هسه اروح اجيبلج الجبن التحبي من الاسواق

ديمة : اباوعله كام ، اكعد اكعد اني اصلا مو جوعانه ، تريك على راحتك اني رايحه انام

امين : على راحتج حبيبتي نوم الهنا

ديمة : الله يهنيك ، دخلت للغرفة سديت الباب وتمددت

نزلت دموعي اول ما خليت راسي على المخدة ، احس تعبت من التمثيل ، تعبت إني احسب حساب لكلشي

اريد ارجع لحياتي مثل قبل ، اداوم والبس واصرف واطلع واسافر ، اسوي كلشي بنفسي بدون ما افكر
منين وشلون راح ادبر

مشتاقه لديمة الاولانيه ، همها بالحياة شنو تلبس وشنو تشتري وشوكت تسافر

مشتاقة ارجع اضحك واصنف مثل قبل واسمع البنات يتراكضن ورايه ويسعن بس في سبيل انطيهن مجال لمجرد إني بنته لياسر النوح

مشتاقة لبيتنا القديم ولاستقبال عمي فادي اليه بالباب والجكليته الينطيني ياها

احس اني مو اني هاي ديمة الجديدة ابد ما عاجبتني ولا اني كادرة اتقبلها ولا اتقبل حياتها مهما مثلت وحاولت

شديت الغطة على جسمي ، غفيت ودمعتي على خدي
ما كعدت غير بالعشرة الصبح

كمت من الفراش اخذت ملابس ودخلت للحمام سبحت وطلعت لغرفتي بدلت ورحت للمطبخ لكيت خالة كاعدة وكالعادة بصائر نايمة وتكعد الظهر

صباح الخير

هناء : هلا حبيبتي صباح الخيرات

ديمة : ابتسمت واجيت يمها هاا خالة محتاجة شي

هناء : لا بعد گلبي سلامتج

ديمة : شراح تسويلنا غده

هناء : دولمة

ديمة : الله

هناء : هههه ادري بيج تحبيها هاج ضوكي الحشو شوفي شعايز

ديمة : لا خالة على بختج بي لحم ني شلون ترديني اضوكه

هناء : لا يمه الحشو مابي لحم متشوفيني كتلج ضوكي

ديمة : هاا لعد اذا هيج تمام ، اخذت خاشوكة ضكته وهزيت راسي اممم يخبل كلشي ما عايزة

بس شعجب خالة ممسويتها باللحم اني الاعرفه عنكم مو نباتيين حتى تسويها بدون لحم

هناء : الحجي بيناتنه و انتِ بنيتي وما اضم عليج

استحي اكل لأمين اللحم خلص روح جيب وبعده الاسبوع ما خلص كلت امشيها شلون ما جان هالحم يوم منا لمن تجي الجمعة ويتسوكلنا

ديمة : يعني معقولة خالة احنه مضنوكين هالضنكه لعد فلوس امين اليشتغل بيهن وين ديروحن

هناء : كله للبيت ووالله وانتِ ما محلفتني ، سودة عليه هو واسلام كل شهر يكعدون يخلون فلوسهن سوه ويطلعون للمصرف شوفة عينج

الكهرباء تريد والبيت يريد واحنه نريد عبالج هي سهلة يا يمة

هاي وروحه لابويه اجه امين انطاني 300 كلي هذني لبصائر وديمة للجامعة كل وحدة الها 150 وكل شهر راح انطيج بكدهن ضمي هالفلوس الهن حتى منا لحد ما يبدي الدوام اكون لاملي جم فلس حتى يشترن على راحتهن وميتقيدن بحجة ماكو فلوس

وهم اسلام ما جاي يقصر كل الي يحصله يطي للديانة وامين هم يساعده والباقي مخلي مصرف البيت

ديمة : ليش خالة انتو اكو ناس تطلبكم

هناء : لعد شلون يمه ، احنه سبق ووكع الحمام البره علينا من مطرت واضطرو يرجعون يرممون البرة كله من جديد وكلفهم الترميم ذيج الحسبة ولان الولد جماعة امين ما اخذو نقد منه وكام يقسط وينطيهم كل شهر

وعندج هم موبايل بصائر ، امين سوه سلفه واشترى الها هدية لان طلعت الثانية على دفعتها وهم حطي ببالج كون كل شهر يسدد حتى يسد فلوسه

ديمة : والله مو عيشه هاي يا خالة

هناء : لعد شنسوي يا يمة هاي قسمتنا من رب العالمين الف الحمدلله والشكر يا يمة اكو ناس ما لاكيه تاكل ولا عدها بيت يسترها

احنه احسن من غيرنا ، ناكل ونشرب والله ساترنا ببيت ملك ما متبهذلين بالايجارات مثل غيرنا

ديمة : الحمدلله زين خالة شعجب امين واسلام ما دورو على تعيين حتى لو بدائرة اهلية المهم يشتغلون ولا شلاع الكلب هذا

هناء : عبالج ما حاولو سوده عليه طاحت رجليهم لمن ملو وعود امين تذكرت جان عنده صديق ابو واصل بالبلدية ومن راح حاجا طلب على كل واحد منهم عشر ملايين ياله يعينهم

منين يجيبون عشرين مليون عاد بطلو وكعدو واكلو من كدامهم

سكتي ولج ديمة فتحي جروح كلبي واني ما عايزة ولدي كل واحد منهم ربيته بطلاع الروح وشلت راسي بشهاداتهم ووين ما اروح اصيح اني ولدي مهندسين

تالي يا حسرتي الجبير يشتغل عماله والصغير الاول على دفعته يبيعلي عدس وفاصوليا ، يله الحمدلله

اجرهم يم ربهم ان شاء الله

تعاي ساعديني بعد گلبي خلي نلف الدولمة ونخلص منها حتى نكعد براحتنا

ديمة : اي صار خالة

كعدت اساعدها وادردش وياها لمن كعدت بصائر التهيت وياها لمن صار الظهر وتغدينا

من رجع امين صبيتله غدة وكعدت يمه احاجي بالموضوع الي ببالي ، اكول امين

امين : اسمعج حبيبتي

ديمة : ليش متخليني احاجي جدو علمودك وعلمود اسلام

امين : بخصوص شنو ؟

ديمة : علمود يشغلكم

امين : ليش جدج عنده شركة مالت تصميم ؟

ديمة : لا بس يعني اشتغلو محاسبين اي شغل يدبره الكم على الاقل اسمكم موظفين ولا شلاع الكلب هذا

امين : شيلي هالموضوع من بالج

ديمة : ليش شكو بيها

امين : ما بيها شي بس اني اعرف جدج اذا شغلنا يمه ما راح يسوينا حالنا حال الموظفين وراح يراعي كونج مرتي ويبدي شغل الواسطات واني هالسوالف ما احبها

خليني بشغلي والله ساترني ولا منيه احد عليه

ديمة : تره هذا مو منطق ، شنو ولا منيه احد قابل جدو راح يمن عليك اذا عينك انت واسلام يمه

امين : جدج لا بس عمامج وولدهم اي واني ما اريد احط روحي بهيج موقف حتى لا انحرج واحرج اخوي وياي

ديمة : شنو هالسوالف هاي ، منيه شنو بطيج شنو انت عاجبك وضعنا هذا

امين : ليش اني مقصر عليج بشي ؟ مو كل شهر جاي انطيج خمسين مصرف الج وحدج

من غير حصتج انتِ وخواتج من المحل كل شهر توصلجن وفلوسج اسلام جاي يجيبهن ينطيهن الج ما ناقصات ربع دينار فبعد شنو الناقصج

ديمة : امين حتى اكون صريحة وياك اني هاي الفلوس ما جاي تكفيني وكوه كاعدة اضغط على نفسي في سبيل ما احرجك واثقل عليك

امين : بس فهميني ليش كل هالفلوس متكفيج وين جاي توديهن

ديمة : امين تره بس واقي الشمس الاشتري بـ30 الف من غير الامور الشخصية الثانية تكلف ذاك الحساب
والله الفلوس ما جاي تكفيني

امين : هاهي ولا يهمج انوب انطيج 100 بالشهر واشتري براحتج

ديمة : والله السالفة مو بس عليه اني ما عاجبني وضعك شوف نفسك شلون تعبان من الشغل

لزمت ايده ، باوع لروحك هاي ايد واحد شباب ستوه طب الثلاثين سنة ، شوف بشرتك شلون خشنه وتعبانه تكول رجال عجوز

ملابسك كلها قديمة ورايحة ما عدا جم طقم انت مخليهن للطلعة ولازك بيهن

متكلي ليش هيج حالتك ، متحب تلبس ، تسافر ، تشتغل شغل محترم يرفع من قيمتك ويشيل راسك بين الناس

مو ذاك اليوم تدعي الله يرزقك اطفال شلون راح تعيشهم وانت هاي حالتك ، راح تكدر توفرلهم الحياة الي همه يردوها وانت هذا وضعك المادي

عوف من هذا الكبرياء واضغط على روحك شويه وخليني احاجي جدو واشتغل على الاقل يصيرلك راتب محترم وتشتغل شغلة محترمة

بدال الطين والوصخ والدم الانت غاطس بي ، فدوة امين بس هالمرة اسمع مني وخليني اساعدك بهاي السالفة

اباوعله ذب الخاشوكة ومسح على راسه بجزع

امين : هاهي الي تشوفي ولو اني ما مقتنع بس ميخالف ما اريد اكسر بيج اذا عاجبج اشتغل غير هالشغل براحتج

ديمة : ابتسمت وصفكت باديه من الفرح ايييي فدوة لكلبك هيج من البداية اسمع كلامي

لعد باوع احنه نروح لبيت جدو هم نشوف اهلي واني احاجي جدو بخصوص تعيينك انت واسلام حتى لو ميشغلكم بشركاته على الاقل يدبرلكم وظيفة بشهادتكم بالشركات اليعرفها

امين : ميخالف الخميس اخذج من ارجع

ديمة : كرصته من خدة فدوووه لامون الحباب

امين : هههههه كافي ولج يله عوفيني اتغده

___________________________________

زبيدة : داساعد العاملات بالمطبخ ودك موبايلي ، اخذته وطلعت بره

باوعت للشاشة لكيت مكتوب "ميلاد" ، استغربت هاي شذكرها بيه هاي

فتحت الخط ، الووو

ميلاد : الوو زبيدة اني ميلاد عرفتيني

زبيدة : اي عرفتج مسجله رقمج يمي

ميلاد : حبيبتي طمنيني عنج شلونج ، سمعت بيج تزوجتي صدك

زبيدة : الحمدلله ، اي تزوجت

ميلاد : الف مبروك حبيبتي عذرينا ما كدرنا نجي لعرسج تدرين بينا منتحاجة ويه بيت جدج

زبيدة : الله يبارك بيج ، اي ادري بيكم بس اعتقد اكو شي اسمه موبايل جان كدرتو تخابروني تباركولي على الاقل لو داكين على الواتساب ما راح يكلفكم رصيد

ميلاد : حقج والله بس تعرفين الحياة مشاغل والله واحنه بغير محافظة منو يجيبنا

زبيدة : مو مشكلة ، طمنيني خالتي عقيلة شلونها

ميلاد : والله هو اني خابرتج اليوم علمودها

زبيدة : ليش خير شبيها

ميلاد : ما بيها شي بس انتِ تدرين اني وخواتي متناوبين عليها ، كل وحدة منه تروح تبات عدها يوم

زبيدة : اي وبعدين

ميلاد : اي فآني ويه حظي من اجه دوري ابني صار بي ابو صفار واخاف اخذه ويايه ويعديها فمضطرة ابقى ويا اخاف اعوفه وابو وخواته ميعرفوله

زبيدة : اي مابيها شي خلي وحدة من خواتج تروح بدالج

ميلاد : خواتي كلهن طلعن لايران سياحة واذا بيهن جيه بعد اربع ايام

زبيدة : اي والمطلوب مني شنو هسه

ميلاد : تجين تبقين يمها علما يرجعن خواتي لو ابني يتحسن واكدر اجيها

زبيدة : صدك تحجين ترديني اجي من محافظتي للحلة علمود امج

ميلاد : شكو بيها يا زبيدة اعتبريها امج وهي هم خالتج يعني بمقام امج

لتفشليني عليج الله والنبي اني لوما ابني حالته تعبانه فلا اخابرج واكلج تعاي بمكاني الله شاهد اني هسه كاعدة وياها وبالي يم ابني ورجلي خابرني تعارك ويايه

ولوما مضطرة فلا ازحمج بس اني كلت انتِ بنت خالتي الوحيدة واكيد لو اطلب منج مترديني

زبيدة : زين شوكت ترديني اجي ، باجر زين ؟

ميلاد : اي كلش زين وتفضلين عليه والله

زبيدة : شنو السالفة الفضل لله ، يله من رخصتج اروح اگل لبيت جدي حتى باجر الظهر اني يمكم

ميلاد : ان شاء الله ، يله كلبي اخذي راحتج

زبيدة : سديته وهزيت اديه عابت بس بالمصالح تذكرن عدهن بنت خالة

شكد اكره اهل امي ولا يشبهون امي خوالي لهطو ورث خواتهم وقاطعوهن علمود نسوانهم وخالتي عقيلة هاي حدث بلا حرج محد سالم من لسانها

اخذت موبايلي ودخلت جوه لكيت الحباب متجمعات ، وشلون جمعة هي كلها نفاق وحجي على الناس

حمزية : ولج شعدج بره بهالحر

زبيدة : ذبيت حجابي وجاوبتها ، بنت خالتي خابرتني تريدني اروح ابقى يم امها لان ابنها مريض

حمزية : وشيوديج للحلة انتِ

زبيدة : لعد شسوي خوما اعوف المرة وحدها وانتِ تدرين بيها مرة جبيرة مو مال تنعاف خاف يصير عليها شي واضل اني اكل بروحي

هيام : وانتِ شنو قابل مجبورة بيها

منال : شكو بيها الناس لبعضها واجرها عند الله عظيم خصوصاً خالتها مرة جبيرة

بدرية : عليمن ترحين عماتي خلي ندزلها وحدة من العاملات وفضيها

نور : اي والله صحيح كلام عمتي

زبيدة : لا ما اامن ليروح يصير بيها شي ، اني راح اروحلي جم يوم وارجع ما اتأخر

هيام : زين انتِ بكيفج تتصرفين وتقررين ما عندج رجل ترجعيله

زبيدة : لا عندي ومن راح يرجع ويتغده ويرتاح اكعد العصريات اسويله جاي واكله حبيبي عيوني انت تسمحلي اروح لخالتي

زين هيج ؟

منال : اذا تحاجي هيج ما اعتقد يرفض ههههه

بدرية : ليش يتجرأ

زبيدة : خليت شعري وره اذني وغمضت عيوني ، شاغت روحي من طكيت ركبتي

تلمست ركبتي جوه الفك مباشرةً جان الالم ، تذكرت عضة الجلب المجلوب البارحة

حمزية : شبيج يمه عافسه وجهج

نور : خاف عضت لساني

زبيدة : لا مابيه شي ركبتي متشنجه شويه

حمزية : تعاي ادلكها الج

زبيدة : لا بيبي ميحتاج

حمزية : كومي لا اكوملج بالشحاطة

زبيدة : استغفر الله ، كمت كعدت يمها ، لزمت ركبتي من الصفحتين وكامت تدلكها بابهامها

شويه وفزيت على راشدي ينزل على خدي ، فتحت عيوني وخزرتها هاي ليييش

حمزية : كومي سربوته ركبتج متشجنه مو

بدرية : شبيج وياها يمه

حمزية : دبسز هذا هارون مـ*** وجايه هنا تتمجعص يمنا واني مصدكتها وكاعده اقره قران وانفخ عليها عبالي صدك متشجنه

زبيدة : والله يلو يذبحوني ميلكون بيه قطرة دم على الفشلة الي تفشلتها انوب كلها كامت تباوعلي

بلعت ريكي وابتسمت ، ااا اني من رخصتكم اروح اتحضر للصلاة

عفتهن كاعدات وصعدت فوك بس شنو فراره ما بقالي اثر انوب اسمعهن من جوه يضحكن يبووو

والله على الفشلة هاي ما راح ارواي وجهي منا لاسبوع الله لا يوفقك ينعلون الجلب

طبيت للغرفة وركضت لميز التواليت ، اباوع لركبتي صاير بيها طگعه زركة

الله لا يوفقك يا نعلون على هالعملة ، الي يشوفني هسه يكول ماكو ذولة البارحة عاشو ليلة ولا بالاحلام
ميدرون بالجلب المستجلب عضني عضه شلع روحي بيها ابو كرعه

انوب اني الصبح غلست عليها لان جوه فكي ما عبالي احد ينتبه عليها من الكبر طمني ولا محطوطه بهذا الموقف

بيومها ضليت كاعدة بالغرفة وما طلعت ابد لحد ما نور نعلون افندي ، بس شفته اخذت حجابي لبسته ونزلت جوه اساعدهم بالصب

سويت روحي طرشة ولا كإنما نفشلت قبل ساعات عادي شنو اول الناس اخر الناس انكبس بهيج سالفة سخيفة غلسي زبد غلسي

كملنا كلشي ، من وصل جدي نقلنا الاكل وكعدنا نتغده
وكالعادة ما ارتاح بكعدتي يم هارون بس هالمره ما تحملت اريد اتسمم نفس الاوادم ، كمت كعدت من الصفحة الثانية مالت هارون حتى لتطخ ايده بأيدي

النوح : شبيج زبيدة

زبيدة : لا جدو مابيه شي

النوح : لعد ليش غيرتي مكانج

زبيدة : هاا مو هارون يسراوي واني يمناويه فمن نكعد سوه نتضايق بالاكل

حمزية : تدرين وسيلة هم جانت يمناويه وياسر يسراوي وبعد امه جان دائمًا يداهرها على الاكل ويوكع الخاشوكة من ايدها حتى يضوجها وهي تضحك ولا تدير بال

زبيدة : الكل ترحملهم واني احس نفسي انسدت واستهضمت من جابو سيرتهم

ضليت اكلب بالاكل بدون ما اخلي ولا لكمة بحلكي ، تالي من شفت جدي كام كبل صعدت فوك

فتحت البردة وطلعت للبلكون بذيج الظهر ، تنهدت مغمضه عيوني ما اريد ابجي لان ادري بروحي اذا بجيت عقلي راح يبدي يسلط عليه ذكريات اذا استرجعتها ما اسكت بعد

ضليت واكفه لمن حسيت الشمس بدت تحرك وجهي ياله دخلت جوه

صار هارون بوجهي ، تجاوزته ودخلت للحمام غسلت بمي بارد وطلعت اكلب بالتلفزيون

لليل كمت طلعت جنطة مالت سفر صغيرة وبديت امليها بكم قطعة ملابس واحتياجات بسيطة تفيدني هناك

اباوع لهارون كاعد ويباوعلي باستغراب ، سديت الجنطة بعد ما كملت وانداريت عليه

اني باجر رايحة لخالتي للحلة راح ابقى جم يوم هناك كلت انطيك خبر في حال لو احد سألك

هارون : روحه بلا رجعه ان شاء الله

زبيدة : ان شاء الله ، شلت الجنطة خليتها يم الباب ورحت نمت بعد ما بلغت جدي وخالة وئام ودادا

ثاني يوم الساعة بالسبعة الصبح ، كعدت سبحت وبدلت ، حضرت كلشي واخذت جنطتي ونزلت

صبحت على جدي وبيبتي ، تريكت وياهم وكمت

النوح : راح ياخذج هارون

زبيدة : لا السايق راح يوصلني ويرجع

النوح : وشبي هارون مكسح مياخذج هو مو مرته انتِ مسؤوله منه شلون يخليج ترحين وحدج

زبيدة : قبل لا اجاوبه اجانه صوت هارون من الدرج

هارون : هارون عنده دوام والتزامات جدي ما بيها شي اذا السايق وداها ما راح تنوكل

زبيدة : اني من رخصتكم لازم اطلع حتى لا اتأخر

النوح : تعاي ولج اوكفي اخذي مصرف

زبيدة : لا جدو عندي متقصر يله بيباي ، رحت بسرعة لبيتنا لكيت خالة وئام ودادا منتظريني

والله عرفت راح الكاجن كاعدات ، بوستهن اني رايحه ديربالجن على روحجن

وئام : الله وياج حبيبتي من توصلين طمنيني

زبيدة : طبعًا اول ما اوصل اخابرج

ام حسن : هاج زبد هذا دعاء السفر كتبته الج بورقة ، انطيني اخلي بجنطتج اول ما تتحرك السيارة اقري وخلي بجنطتج مو تضيعي بي ذكر الله يحميج ان شاء الله

زبيدة : دنكت بوستها يمه صدقة لليكتبلي ادعيه ، يله اني لازم اروح حتى اوصل من وكت بيباي

وئام : مع السلامة امي ديري بالج

زبيدة : صار صار ، طلعت انطيت جنطة الملابس للسايق وصعدت

فتحت جنطتي طلعت الدعاء ، لزمته لمن تحركت السيارة فتحتها وقريته ، من كملته مسحت على وجهي وفتحت الجنطة دارجعه بيها

كتفت اديه وغمضت بعد ما بلغت السايق من نوصل للحلة يكعدني وصدك غفيت لان اني بيه حالة انعس بالسيارة خصوصاً اذا الطريق طويل

المهم نمت وما كعدت غير لمن وصلنا للبابل ، كعدني السايق واني دليته على بيت خالتي

من وصلني للمنطقة اتصلت على ميلاد وطلعتلي بالباب ، جانت على بعد خمس بيوت مني واني من شفتها ، نزلت من السيارة اخذت الجنطة من السايق ومشيت باتجاهها

ميلاد : هاي منو الجمال ، حبيبي زبيدة شلونج

زبيدة : بوستني ، الحمدلله انتِ شلونج

ميلاد : الحمدلله مشتاقتلج والله ، تعاي دخلي اهلا وسهلا

زبيدة : سحبت جنطتي ودخلت للبيت ، اباوعلها عافتني بالباب ودخلت

شويه وطلعت شايله جنطتها وبايدها مفاتيح

ميلاد : هاج بعد كلبي هذا مفتاح البيت يله مع السلامة

زبيدة : شنو هسه راح ترحين

ميلاد : اي والله بالي يم ابني روحي تلوب عليه ، يله اخذي راحتج تفضلي طبي جوه امي منتظرتج

زبيدة : اخذت المفاتيح منها ودطبگت الباب ودخلت لجوه لكيت كاعده خالتي تگلم بامية وتخوزر بيه

شلونج خالة

عقيلة : لا هلا ولا مرحبا

زبيدة : كلبت عيوني ، بدينا برحمة الله

عقيلة : ما عاجبج الحجي بت باسر مو

زبيدة : اكلج عدي هالجم يوم على خير مالي خلك سوالفج تره

عقيلة : بحالج اني شنو يمه مكسحه لو ما اكدر اخدم روحي امشي ولي رجعي من المكان الاجيتي منه

زبيدة : خليت جنطتي على صفحة وفتحت حجابي ، اكلج اني جايه هنا لخاطر امي مو لسواد عيونج

عقيلة : ادبسزز ومتستحين

زبيدة : بالوراثة وداعتج

عقيلة : امشييي طلعي من بيتي

زبيدة : مديت ايدي اخذت علاكتها مالت الادوية ، اكلج هاي الادوية تاخذينن قبل الاكل لو بعد الاكل

عقيلة : ما عليج

زبيدة : صدك نسيتيني ، كمت جبت العلاكة من المطبخ واجيت

تاكلين ؟

عقيلة : شنو هذا

زبيدة : جمار شفته بالطريق واشتهيته جبت لروحي وجبتلج هم ادري بيج تحبي

عقيلة : مو بعازتج اني

زبيدة : اخذت وحدة وتقدمت عليها ، فتحت ايدها خليت قطعة بيها

دكلي اكلي هذا بلاش يصير طيب

اباوعله اخذتها اكلت منها قضمة وبجت ، هسه غير افتهم عليمن جاي تبجين

عقيلة : حقيرة سافلة عار البنات

زبيدة : رحم الله والديج

عقيلة : بالجذب ما كلتي خلي اشيل موبايل اطمئن على خالتي

كاطعة بس عليمن تطلعين جدج منو هو هذا طبعكم بيت النوح بياعه ومالكم صاحب

زبيدة : والله قبل لتعتبين عليه جان انتِ خابرتيني

عقيلة : اي اني المرة الجبيرة اخابرج اسأل عنج

زبيدة : وشكو بيها يعني قابل شراح ينقص منج اذا خابرتيني

عقيلة : انجبي انجبي

زبيدة ميخالف راح انجب بس كليلي وين اخلي جنطتي وانام لان طفيت

عقيلة : روحي لغرفتي ذيج وياها وراج

زبيدة : ماكو غير غرفة

عقيلة : لا اكو بس اني ما اامن بيج خاف تبوكيني

زبيدة : شريد ابوگ منج هو كل العندج بالبيت تلفزيون وثلاجة وحديقة تارستها كراث وحشيش تكول مربية طليان

عقيلة : انجبي يله وولي لغرفتي ماكو غرفة وحدج كلشي يصير يطفر حرامي عليج ، يحترك البيت على الاقل اذا صار شي نموت اني وياج سوه

زبيدة : لطمت على صدري ، عزززه بيمن طالبتني انتِ

عقيلة : ميخالف الحذر واجب خوما ترديني اموت وحدي

زبيدة : ههههه خرب يومج خالة شهالسوالف هاي على كل حال ماكو اشكال

رحت للغرفة بدلت ملابسي وطلعت غسلت وخابرت خالة وئام وخواتي وبيبي بلغتهم إني وصلت وسديته

باوعتلها كملت البامية وكامت تثرم خضرة ،هاي شتسوين بيها

عقيلة : اثرمها للدجاج

زبيدة : هاي بعدج تربين دجاج

عقيلة : اي شعدي غيرهن بعد روحي هن المونساتني
احسن من وجهج الي يجيب الهم

زبيدة : دهاج شربي مي وسولفيلي شلونج ، اخذت الكلاص شربت وبدت تسولفلي عن احوالها

عقيلة : اكلج صدك سمعت بيج من بناتي تزوجتي واحد من عمامج ابن ياهو اخذتي

زبيدة : ابن عبدالله ، اباوعلها شو هاي بس حجيت شركت بالماي وكامت تكح

كمت بسرعة دكيت على ظهرها ، اسم الله شجاج

دفعتني عنها حيل حتى تفاجئت من تصرفها وضليت صافنه

عقيلة : وخرييي اخذتيي ابن هيام ولج والله عينج صلفه ومتستحين

زبيدة : شسويت ؟

عقيلة : ليش التاخذ ابن هيام هاي شتصير غير طايحة حظ

ولج بعد كل السوته بامج رحتي اخذتي ابنها

زبيدة : ادري جانت محاربتها بس ما اعرف التفاصيل

عقيلة : بنت الحرام هاي جانت مسوية امج خدامة هي وغفران الناقصة ، جانن يكومنها بكتله ويكعدنها بكتله

ما جانن يخلنها تكعد وياهن يعوفنها ويه العاملات بالمطبخ وحتى هدوم رجولتهن وبزرهن بذاك الوكت هي جانت تغسلهن وتجيني تبجي تگلي عقيلة تلعب روحي اغسل ملابس حمويني

تالي فكعت مرارتي منهن وهديت عليهن بالتوثيه كتلتهن كتله نعنعت ضلوعهن وكلت لجدج وطيح حظهن

زبيدة : زين امي ليش جانت تسكتلهن

عقيلة : تخاف من المشاكل ومتريد تضوج ياسر وياريته يستاهل

زبيدة : رجاءاً ما اسمحلج تتجاوزين لهنا وحدج ابويه خط احمر ديربالج تمسي بحرف واحد

عقيلة : والله محد جان سبب الفراگ بيني وبين اختي غيره

زبيدة : ليش شسوالج ابوية عمره ما اذه بشر

عقيلة : اي بس اذه اختي الصغيرة الي هي امج وعرس عليها وما خاف الله بمشاعرها ومن يومها اني حرمت الطبه على بيت جدج وبيت ابوج الا يوم يبعثون بسبب السو بامج

زبيدة : تنهدت ادري سولفتلي امي سبب الخلاف بينج وبين بابا جان زواجه من خالة وئام مو صحيح

عقيلة : اي ولو يرجع بيه الزمن هم اقاطعه ، كسر گلب اخيتي وهي تحبه عمت عيني عليها

زبيدة : مسحت الدمعه النزلت من عيني وتنهدت ، خلي نسد هذا الموضوع رجاءًا

اني رايحة انام من رخصتج

عقيلة : روحي وشعرج تره رطب نشفي قبل لتنامين حتى لتنكعيلي وجوه المخاد ملاتي تصير ريحتهن مو طيبة

زبيدة : عبالي خايفه عليه لا اتمرض

عقيلة : ليش يمه اخاف عليج عشتووو

زبيدة : اي والله صدك عشتوو

________________________________

ديمة : انتظرت يوم الخميس على نار وما عولته يجي حتى اخلي امين ياخذني لبيت جدي

واخيراً اجه الخميس ، تحضرت من الظهر وكعدت انتظر امين يكعد العصر حتى يذبني ويروح لشغلة

امين : يله نمشي

ديمة : ابتسمتله اي يله ماعندي شي ، راح هو طلب تكسي من ذاته وخابرني اطلعله

طلعت وصعدنا بالتكسي متوجهين لبيت جدي ، وصلنا الهم نزلت اني وامين راح لان علاقته مو هالكد بولد عمامي وبيت جدي وميحب يختلط بيهم وكل مرة من يجي يكون وياا لو يوسف لو بيت عمو كلهم لهالسبب اليوم ما قبل ينزل وحده

المهم اني نزلت وحدي ، دخلت لجوه واتصل عليه امين ، خير هذا مو هستوه جان وياي

الووو هاا امين

امين : نسيتي جنطتج يالنادره

ديمة : يووو يله جايه اخذها

امين : خليج اني جاي اجيبها الج

ديمة : سديت الخط وضليت انتظره ، اباوع طلع عمو فاضل من شفته ابتسمت وتقربت اسلم عليه

شلونك عمو تقدمت حتى ابوسه بس تفاجئت من دفعني وطبطب على جتفي

فاضل : هلا بيج شلونج

ديمة : احم الحمدلله ، عمو جدي وينه

فاضل : البارحة اخذ امي وراح للإمارات وراحو وياهن عمج عبدالله ومرته

ديمة : خير خو ماكو شي

فاضل : لا ماكو شي ، الحجي عنده صفقة بالإمارات وامي راحت ويا هي وهيام وعبدالله هم علمود الشغل وهم حتى يغيرون جو

ليش شتردين منه ؟

ديمة : والله ياعمو ردت احاجي علمود زوجي

فاضل : بخصوص شنو ؟

ديمة : علمود يشوفله شغل لو بلكت يكدر يعينه بواسطة عنده معارف هواي وممكن هواي تصير شغلة تعيين اخو اذا توسطلهم

فاضل : ليش عمي منو كلج جدج فارغ يتوسط لياهو الجان

ما بقى علينا بس الفگور والمجادية نسعالهم ونعينهم انتِ تردين تشوهين صورتنا كدام الناس والمجتمع

ديمة : بلعت الغصه الي بصوتي وحاجيته ليش هيج تحجي عمو قابل امين واخو شمسوين حتى يشوهون صورتكم

فاضل : كعدي عمي كعدي شنو ذوله الزبايل المنتفين نتوسطلهم لو نشغلهم ويانا انت شايفه وجه رجلج

وينه وين الوظيفة دخلي يعرف يلبس اول شي وعود بعدين يدورلي وظايف والله يا الله شكول شكول ياهو الاجه وچلب روحه بذيال بيت النوح

ديمة : عمو تره ما اسمحلك تحجي عنه هيج

فاضل : سمحتيلي لا سمحتيلي انتِ والنعال سوه ، يله شو رجعي منين ما اجيتي ولتضلين كل ساعة ناطه علينا انتِ ورجلج

خليج عزيزة ولتجين غير بالمناسبات افتهمتي لو لا المرة مكانها بيت رجلها من دياخة وتخايم هنا وهناك

امشي بويه امشي خابري الثور الذبج هنا تتوسليله على لحمه خلي يجيج وما اوصيج عود كليله عمي يكلك راسك لتطمح تعلي فوك ليروح ينكسر

ديمة : عافني وراح تحت صدمة فضعية ، عمري ما توقعت إني اسمع من احد هيج كلام

كمية استنقاص وتكبر وجحود وغرور بالنعمة عجيب
معقولة اكو ناس هيج عادي عدهم لسانهم ينطق بهالجمل الفضيعة هاي

عمي كعدي وسكتي واكلي من كدامج هاي السوالف عيب رجلج ما استحى يدزج يدورلي واسطات حتى يتعين شنو هذا الطمع

انداريت حتى ارجع منين ما اجيت وانصدمت من لكيت امين واكف على بعد مسافه مني

اباوعله تقدم خله الجنطة بايدي وهمسلي

امين : امشينا نرجع لبيتنا وسالفه التعيين بعد حسج عينج تجيبلي طاريها

___________________________________

زبيدة : غافيه وما احس الا بضربه قويه تجي على ظهري

فزيت من النوم مخترعه شكووو شكووو

عقيلة : كومييي كامتتت روحج

زبيدة : شكو شتردييين

عقيلة : صار الظهر واني جوعانه كومي سويلي ريوووك

زبيدة : باوعت للساعة بـ8 الصبح ، صدددك تحجييين انتتتتِ يا ظهر هذا

عقيلة : اني اتريك من وكت واتغده بـ12 ضبط كومي ريكيني وابدي جهزي الغدة يله

زبيدة : دفرت البطانية وكمت ، استغفر الله شيخلص اليوم وباجر ووالي لبيتي واخلص منج

طبيت للمطبخ واجاني صوتها

عقيلة : وين وين

زبيدة : مو ترديييين ريييووووك

عقيلة : قز القرط روحي غسلي وجهج جنج بسطال عسكري من تكعين

زبيدة : اللهم طولج يا روح ، طبيت للحمام غسلت وجهي وفرشت اسناني وطلعت للمطبخ

فتحت الثلاجة داطلع البيض وشفتها طبت ، انوب تعوف المكانات كلها تجي توكف وراي تحسسني جايه تقبض روحي

والنبي سوت بيه خوفه تمشي على اطراف اصابعها وتوكف ورايه وتخلي اديها على جتافي تخليني
ازوع العافية

عقيلة : شجاي تسوين

زبيدة : ااااخ ولج يمه ، انداريت عليها ولج خالة يعني شجاي اسوي مثلاً قابل ابوك البيض واخذه وياي

جاي اطلعلج بيض حتى اسويلج ريوك مو ردتي تتريكين

عقيلة : ما اريد من هذا روحي للحديقة جيبلي من كن الدجاج بيضه تازه وتعاي

زبيدة : اني امد ايدي على الدجاجة واخذ بيضتها صدك تحجين

عقيلة : اي شكو بيها روحي يله راح يأذن الظهر

زبيدة : بس انتِ دينج وحد يأذنولج الظهر بثمانية وربع

عقيلة : روحي يله روحي

زبيدة : سديت الصخامه وطلعت للحديقة والشمس تسمط سمط

طبيت لمكان الدجاجات دورت على الكن مالتهن لكيته بنهاية الحديقة ، تقربت على كيفي امشي لكيت واحد فارغ اباوع الكه بي بيضه كيفت

مديت ايدي اخذت وحدة وركضت والدجاجات يركضن وراي والنبي حصلتلي نگره برجلي شوغت روحي

سديت الحظيرة وسندت روحي على السياج الهث خرب يومجن ادري طابه اهرب سلاح هي بيضة

بلعت ريكي ودخلت جوه ، لكيتها واكفتلي بالباب لا ومتخصرتلي هم

عقيلة : خذتي بيضة وحدة مو خوما كسرتي البيضات

زبيدة : يا بيضات هي غير هاي علما حصلتها ختمت القرآن بكلبي

عقيلة : دروحي سويلي ياها عيون وصبيلي جاي وانتِ شوفي روحج شتاكلين

زبيدة : طكيتلها بيضتها وخليتها بماعون واني هم سويتلي بيضة عيون صبيت جاي واخذت الصينية وطبيت للصالة

كعدنا نتريك ، اباوعلها تاكل وتخوزر بيه ، اشرتلها شكو ؟

عقيلة : الله لا ينطيج كلتي بيضتي مو

زبيدة : فتحت عيوني لا والنبي

عقيلة : لا اكلتيها هاي البيضه ماصخة مابيها طعم البيض مالت كل يوم

زبيدة : صدك تحجين انتِ

عقيلة : عينج ضاكت على بيضتي ما استحيتي واني مرة جبيرة بكد امج تاكلين حاجتي

زبيدة : شلت ماعوني خليته كدامها واخذت ماعونها ، رجعت اكل واباوعلها تاكل من بيضتي وتهز براسها

عقيلة : ايييي هاي هي بيضتي مالت كل يوم نفس الطعم عمي ماكو مثل التازه

الله يسامحج على نفسج الدنيه ، ابوج لا امج نفسهم طيبه عليمن طالعه انتِ

زبيدة : تعرفين الزهرة يابه على كولة يوسف والزهرة ام الحسن البيضة الجاي تاكلين منها طلعتها من الثلاجة وهاي الكدامي مالت الدجاج مالتج

عقيلة : دنجبي انجبي عبالج عجزت وما كمت اميز بيض الحلال عن بيض السوگ

زبيدة : لا ابد عمي اني العجوز ، اكلت البيضة الكدامي وانجبيت علما كملت كمت شلت المواعين غسلتهن وخليتهن بمكانهن

طلعت لكيتها تثرم خضرة للدجاج عفيه دجاجات مسويتهن طليان كد ما تحشي بحلوكهن خضرة

اكول شتردين نسوي غده

عقيلة : اكو عجينة فلافل بالثلاجة ، طلعيها وسويلنا فلافل

زبيدة : فلافل بالغدة ؟

عقيلة : اي مليت من اللحم والدجاج اليوم مشتهيه فلافل ، كليها زين وخليلي عليها صاص وجيبيلي وياها كوكاكولا

زبيدة : عمت عين البامية شكد تنفخ من شوكت كمتي تعرفين الصاص والكوكاكولا

عقيلة : انجبي وسوي الكتلج عليه

وهاا ماعدنه لا صاص ولا كوكاكولا روحي للاسواق جيبي

زبيدة : ليش هستوني شفت بالثلاجة بطل ببسي

عقيلة : انتِ كلتيها ببسي واني ما احب الببسي وهم مو تجيبين قواطي اريد بطل كزاز

زبيدة : وتتشرطين هم

عقيلة : غصبًا ما عليج وهم انتِ التدفعين

زبيدة : طبعًا اني الادفع بس مو علمود شي حتى اخلص من لسانج

رحت للغرفة فتحت جنطتي طلعتلي هدوم حتى ابدل

بدلت وسحبت حجاب من حجاباتي بس تفاجئت من حسيت بثكل داخل الحجاب

نكثت الحجاب وشفت فلوس توكع منه ، اخذتهن وحسبتهن طلعن 250 الف عرفت نعلون حاطهن

رجعتهن لمكانهن وطلعت للاسواق جبت التريده خالتي ووياهن جم حاجة بما انُ الحجية تتنسى

انوب بالليل مطيحة حظي الليل كله تكرط ساهون واني راسي ينخر من الصوت ومن احاجيها ما احصل غير جملة وحدة

"انجبي وسكتي "

اخذت الغراض ورجعت للبيت سويت الغدة للنفسه علما كملنا غده كمت غسلت المواعين وعزلت البيت

وهيج مرن التلث الايام بين جر وعر بيني وبين خالتي
ماعولت تنطيني ميلاد طك الامان حتى ارجع

وفعلاً الجمعة الظهر اجتي تشكرت مني وضلت يم امها عاد اني من تطمنت على ابنها انه بخير اتصلت
على السايق يجيني

شكد توسلت بيه ابقى بس ما قبلت هو اني ما عولت تطردني ، سلمت على خالتي التفلت عليه قبل لا اطلع شلون راح اعوفها

استقبلتها برحابة صدر وطلعت اضحك ، وطبعًا ميحتاج اكول إني نمت بالطريق وكعدت من وصلنا

جان وصولي بالليل الساعة بـ9 بالليل

نزلت جنطتي من السيارة وسحبتها ، دخلت للبيت لكيت الكل متجمع بالصالة ما عدى عمام ونسوانهم

السلام عليكم ، الكل ردو واجوي سلمو عليه بس مدري ليش حسيتهم على بعضهم

اكول عمه لعد بيبي وين ؟

بدرية : راحت ويه جدج وبيت عمج عبدالله للإمارات

زبيدة : اباوعلهم واحد يباوع بوجه الثانية ، رجعت نظري على عمتي خوما بيهم شي

بدرية : لا حبيبتي راحو يتونسون

زبيدة : هاا اي بالعافية عليهم ، يله اني من رخصتكم اصعد ارتاح شويه

بيداء : كعدي عمه كلشي ما شفنه منج بعد وكت على النوم

زبيدة : لا تعبانه ومحتاجه ارتاح عذروني ، اخذت جنطتي وصعدت فوك

فتحت باب الغرفة ودخلت ، سحبت الجنطة خليتها على صفحة ودنكت انزع حذائي

نزعتها وخليها بالكيشوانية ، مديت ايدي علكت الضوه
وشهكت خاله ايدي على گلبي

هاي شنو !!!

اباوع لهارون كاعد على القنفه ومسلسل بسلاسل كبار واكو يم رجليه ماعون بي تمن وفوكا مرك ما ملموس واكو بطل مي بصفه

اني شفت هذا المنظر وعقل مضل براسي رحتله اركض ، ههـ هاي شنو هارون هاي منو مسوي بيك هيج

اباوعله شال اديه عن راسه وباوعلي ، انتبهت لعيونه حمر دم واكو دم يابس يم حاجبه

لزمت اديه المسلسله ، هارون هاي منو مقيدك هيج احجيلي فدوه گلبي مو راح يوكف و الله منو الكلب الرابطك هاي الربطة

والمفاتيح ويييين احجيلييي وينهن خلييي افتح الاقفال عنك شنو وين كاعدييين احنه

جاوبني بكل هدوء ولا كإنما صاير شي

هارون : مو عندي

زبيدة : لعد عدمن يا خسيس ونذل رابطك هيج

هارون : موسى وولد بيداء

زبيدة : هزيت راسي ، زين شكد صارلك على هالحالة
احجي هارون لتحرك كلبيي

هارون : تلث ايام

زبيدة : عضيت شفايفي زين دتروح للحمام ديجي احد يشوفك من اهل البيت

هارون : لا

زبيدة : من الله لا ينطيهم ، بسيطة اني الهم گلي هسه متعرف المفاتيح عند منو منهم

هارون : عند موسى

زبيدة : خوش ، اصبرلي هسه راجعتلك ، عفته ونزلت اركض

لكيتهم كاعدين عبالك جانو منتظرين ، اول حطيت رجلي بالصالة عطت بيهم

ولللللكم انتوووو شلوووون تتجرأون تقيدون هارون هيييج منووو انتوووو منننن تكونوووون وتتعاملون ويا بهاي الطريقة

شنووووو حييوووان هووو مو حرام عليكمممم متخافون من اااالله انتو

شادي هاي الشده ومطفين الاضويه عليه ، لييييش هيييج ليييييش ولكم مو من دمكم ولحمكم هووو

انتتتتن يالعمات يالمصليات والصايمات ويييينها صلاتجن وينهاااا

بدرية : افهمي يمه والله احنه سوينا هيج لمصلحته خاف يأذي روحه

زبيدة : لج يا مصلحة هايييي يا مصلحة ، ما تحمت الغصه گبل نزلت دموعي شنو من بشر انتو شنو

ولكم تلث ايام عايفي على هالكعدة لا اكل بي حظ ولا تواليت ولكم لييييش لييييش

متخافون ربكم انتووو صلاتكمممم كلهاااا باطلة وااالله باطلة

ويييينه هذااا الخسيس اليخسى يسمه اخو ويييينه
موسسسسى موسسسسى

اباوعله نزل من فوك يركض

موسى : شكووو شكوو

زبيدة : للللك تفففف علييييك من بيييين الاخوة شلووون تربببط هارووون شلوووون يا كلب

فرفحت روحي خصوصاً من شفتهم شادين اديه ورجليه واكله كد ما قديم ملتم عليه الذبان متت قهر

والله مو بشر احنه مو بشر وحوش

موسى : انتِ كد هذا الفعل

زبيدة : وراسك ادوسه باوسخ قندرة يلبسها هارون ، ولكممم كلكم انتوووو ترحوله فدوووة

جلااااب رجال شكبره شكده وفوكاها مريض تشدو هالشده لييييش ما خفتو تزيد عليه النوبة وينكطم لسانه من شد الاعصاب

باوعت لنور الواكفه تبجي وتفلت عليه ، تفففف عليج من بين الخوات لج اخوج صارله تلث ايام ما داخل للتواليت ما خفتي مثانته تنفجر لو يسويها على روحه

هان عليييج تشوفيييي بهالمنظر شلووون هان عليييج لج هذا اخوج دمج ولحمج ليييش ساكته عنه كل هالايام واني العباليييي انتتتتِ الزينة بهالبييت

موسى : كافييي لج لتضلين تمسلتين والله العظيم اني ساكتلج لخاطر هارون اكول عيب امد ايدي عليج وانتِ مرت اخوية

زبيدة : لللللك تخسسسى انتتت تنحسب على الاخوان
طاحظ الاخوة اذا انت تنشمل بيها

وئام : شكووو شكوو خير يمه زبيدة شبيج ليش هيج تبجين

زبيدة : وخريييي عنيي ليييش ما سولفتيلي على وضع هارون مو كل يوم اخابرج اني

ام حسن : ليش يمه اسم الله شبي هارون

وئام : اذا قصدج على حرگ الاسطبل فوالله ما انطاني گلبي اكلج واقهرج

زبيدة : رجف كل جسمي من سمعتها ، ششـ شنو الاسطبل احترگ ؟

بدرية : اي يا عمه صار اكو تماس كهربائي واحتركت غرفة الولادة المخصصها هارون للفرس

ومن احتركت الغرفة تخبل هارون وطب يركض طلع الفرس هي والمهر مالتها وهجج الخيول كلهن من الاسطبل ليلوحهن نار

حتى ما انطه مجال للاطفاء يجون تخيل علينا وعلما اجو الاطفاء وطفوها للغرفة هارون انهار واجته النوبة وما عرفو الشباب يسيطرون عليه فشدو

زبيدة : على هاي جتفتو تلث ايام !!

بدرية : اي عمه

زبيدة : اباوع لنور انهارت بالبجي وكامت تصرخ بمكانها

نور : لا زبيدة عمتي جذابة هارون عرف عاكف ابن عمي هو الحرگ الغرفة لان ما قبل ينطي واحد من الخيول هدية لجماعته

ومن هارون دره بي كتله وهمه حتى يمنعو من ذاك الجلب شدو وسلسلو بالغرفة حتى ليطلع ويضرب
عاكف

وذاك ويا هارون صارله 3 ايام مقفولة الغرفة عليه واني من ردت اطبله كتلني موسى ومنعني اوصله

حتى موبايلي اخذه حتى لا اخابر ابويه واكله

وهسه قبل لتصعدين انطاني موسى المفتاح واشرلي اروح افتحها واني تعمدت اعوف هارون على حالة حتى تشوفي وتكلين لجدي

لان ذوله كلهم جذابين ومحد بيهم راح يحجي ويطمطمون السالفة

زبيدة : ضليت باهته يربي هاي احنه وين عايشين وشنو من كائنات هاي الي الله نازع من كلبها الرحمة والانسانية

فزيت من شفت موسى هجم على نور ملخها تملخ ، ركضت اني وخالة وئام ودادا كوه جرينا عنها

دفعت نور على خالة وئام ، اخذنها وياجن لبيتنا وانتووو حسابكم ويايه انييي الرجال البيكم خلي يسويها ويمد ايده عليه

مديت ايدي المفاتيييح فوراً والا قسمًا بالله هسه اخابر جدي واسويهااا علييييكم عزززاء

المفاتيييح يييييييله ، خمس دقايق عدكم اذا ما انطيتوني المفاتيح راح انزل الدريل وافتح القفل اني وساعتها تحملو الراح يجيكم من جدي

بدرية : ولج يمه زبيدة استهدي بالله

زبيدة : انتتتتِ ولاااا كلللللمة الله لا يرضى عليج على الجذب الجذبتي

المفاتيييح يييييله ، اباوع لبيداء الجلبه ركضت جرت المفاتيح من موسى وانطته الي

اخذته وركضت فوك ، دخلت للغرفة لكيت هارون كاعد على حطته

ركضت كعدت يم رجليه ، فتحت الاقفال مالت رجليه ، اباوع داير مداير رجليه صاير ازرك ، تنهدت بقهر وفتحت اديه

اباوعلهن نفس الشي صايرات زرك والدم محصور بيهن

لزمتهن على كيفي ومسحت عليهن بخفه ، يوجعنك مو

هارون : لا

زبيدة : شديت على اديه وكومته ، حاوطت خصرة وخليت ايده وره ظهري ومشيته لان من الكعدة رجليه خدرانات وما جاي يكدر يوكف

ذب ثكلك عليه هارون لتخاف ، حضنت خصرة بقوة ودخلته للحمام ، كعدته يم البانيو وركضت طلعتله ملابس

هاي ملابس اسبح وبدل واني راح انظم الغرفة خوش هارون حباب مو تتاخر اريد اسويلك اكل حتى تاكل

طلعت وسديت الباب ، رحت شلت الماعون هو والاكل البي ذبيته بالزبل لان جان ملموم عليه ذبان وكله دود

حتى البطل طلعت شمرته عليهم من المحجر ودخلت

نظفت الغرفة وكنستها كلها ، رغم ميته من تعب الطريق بس الصار اخذ عقلي نساني حتى نفسي

شلت السلاسل وغمضت عيوني ، الله يساعدك يا هارون شلون تحمل جسمك ثكلهن اني وعود العب رياضة بدنية وكوه كدرت اشيلهن

طلعتهن للبلكون ودخلت متوجهه للحمام ، دكيت الباب

هارون كملت ادخل ؟

ما اجاني جواب فتحت الباب لكيته مبدل وكاعد على الكرسي

تقدمت خليت ايدي على جتفي ، حسيت بجسمه يكزبر

هاا هارون تمشي ؟

بدون ميرد عليه مشه كدامي وهو يعرج برجله ، اباوعله راح كعد على الجرباية ورجع ضم راسه باديه

ترست كلاص مبي وكعدت بمستوا ، هارون ؟

شال راسه وباوعلي

هارون : نعم

زبيدة : قربت كلاص المي من شفايفه الي مفطرة من قلة المي شربته مي واخذت ايده خليها على الكلاص

وعفته براحته ونزلت جوه متجاهلتهم كلهم ، دخلت للمطبخ وبوجهي للثلاجة طلعت دجاج غسلت وخليته على النار

كلت اسوي تشريت دجاج اصفر وتمن علمود هارون لان طول هالايام مداخل بمعدته شي غير شويه مي

حسيت باحد يدخل للمطبخ ، باوعت لكيتها عمتي بدرية

بدرية : زبيدة حبيبتي

زبيدة : اجتي تلزمني رفعت ايدي عنها

وخري عني وابد لتفكرين تلزميني من اليوم شالت وانتهت وياج

بدرية : والله يا عمه اني مالي علاقة بس ما ردت تصير مشاكل

زبيدة : متردين تسوين مشاكل بس مو بمعناها تصيرين مصلحة اجتماعية على حساب هارون وتخليهم يربطو ويضربو هيج

بس تره اني ما الومكم من تگابلتو عليه تدرين ليش لان اني لو ما مربطي جان شوه البصل على اذاناتكم ويسويها

ميحتاج اكلج هارون ما عنده لحية مسرحة

وهسه رجاءًا وخري عني لا احجي كلام مو حلو بحقج

عفتها ورحت وهي من شافتني مابيه مجال للتفاهم عافتني وراحت

ضليت كاعدة لمن استوه الاكل كمت صبيت واخذت الصينية وصعدت فوك ، فتحت ودخلت لكيته يشرب مي

باوعت للدولكة لكيتها كلها خلصانه ، متت قهر عليه لعد شكد عطشان حتى شاربها كلها

الجلاب جانو حاطيله مي حار بهذا الجو والله ولا ينشرب

تقربت خليت الصينية على الجرباية ورحت بسرعة جبت طبله خليتها كدامه وشلت الصينة حطيتها فوكاها

كعدت يمه يله اكل

هارون : ما اشتهي

زبيدة : شنو متشتهي قابل بكيفك هي ، لتباوعلي هيج صحيح اني وياك منتحاجة بس اليوم عوف كلشي على صفحة واكل

اخذت الخاشوكة خليت بيها شويه تمن وتشريت وقربتها منه

يله حباب اني الاكل سويته علمودك حرامات ينذب الله ميقبل

اباوعله هز راسه واكل من ايدي ، ابتسمت من شفته ياكل ، رجعت عبيت الخاشوكة وكمت اوكله وهو ما عارض بالعكس اكل كل الاكل الي بالصينية

هاا شبعت لو اصبلك بعد

هارون : الحمدلله

زبيدة : بالعافية ، كمت شلت الصينية نزلتها جوه بس غسلت المواعين مالته وصعدت

لكيته متمدد ، تقربت غطيته وخليت ايدي على راسه داشوفه خاف مصخن لان ذاك اليوم هو گلي اليتعرض لموقف صعب ويخترع لو ينقهر بسرعة يصخن فكلت اتاكد والحمدلله ما طلع بي شي

ابتسمتله الحمدلله حرارتك ما مرتفعه يله اخذ راحتك تصبح على خير

اجيت اروح وحسيت بي يلزم ايدي ، انداريت عليه

هاا هارون محتاج مني شي؟

هارون : ابقي يمي

**************************************
لهنا يكون خلص البارت ان شاء الله يكون عجبكم ❤️+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.