الموت الحي الفصل الحادي وستون 61 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : اجيت اروح وحسيت بي يلزم ايدي ، انداريت عليه

هاا هارون محتاج مني شي؟

هارون : ابقي يمي

زبيدة : هاا

هارون : لترحين ابقي هنا

زبيدة : من شفت حالته ما كدرت اكله لا ، هزيت راسي وكعدت بصفه ، مديت ايدي ماسحه على راسه

انت زين ؟

هارون : جؤ لا

زبيدة : تحب تحجي اني موجودة واسمعك

هارون : ميحتاج بس ابقي يمي اليوم

زبيدة : واني ما راح اعوفك ، شديت على ايده هياتني يمك

هزلي راسه بدون ليعلق وغمض عيونه ، ضليت كاعدة ، امسح على راسه شويه واقرأ قران وانفخ على صدره شويه لمن نام ياله هدأت اني

اباوعله غافي وكل شويه يفز وجسمه ينتفض ومن اشد على ايده ياله يرجع ينام

مرت ساعة ، ثنين ، اربعة واني على نفس الكعدة ، ما تحملت اضل كاعدة هيج رجليه خدرن وكامن يوجعني لان متربعه

عاد مديت جسمي وسحبت وحدة من المخاد وخليتها وره ظهري ، مديت رجليه وانتجيت على المخدة

شويه وما حسيت بروحي الا غفيت ، طبعًا من التعب ذبيت روحي ذبه بس الله اليعلم بيها

ما كعدت غير ثاني يوم الصبح ، فتحت عيوني لكيت روحي غافيه ومغطايه ببطانية هارون

صارت عيني على مكان هارون ما لكيته ، باوعت للساعة لكيتها بالتسعة الصبح خرب هاي اني شكد نايمة

وخرت الغطة وخليت اديه على الفراش حتى ارفع جسمي واكعد بس اول ما شلت ايدي غمضت عيوني بألم

ايدي جانت خدرانه وتنغزني كوه كدرت احركها ، مسدت عليه وكمت اطبطب بخفه حتى يروح الخدر

لمن شويه فكت كمت من الفراش متوجهه للحمام ، دكيت الباب عبالي هارون جوه بس ما لكيته

غسلت وجهي وفرشت اسناني ، رحت بدلت ونزلت جوه لكيت الجماعة ملتمين يتزقنبون زهرمان البخاري
ولا كإنما مسوين شي

شنو من نفسيه عليهم دخيل الله عادي ياكلون ويسولفون عبالك السوو بهارون شي طبيعي ومُعتاد يصير

بدرية : صباح الخير حبيبتي زبد يله عمه تعاي تريكي

زبيدة : باوعتلها صفح ومشيت بدون لا اجاوبها

دخلت للمطبخ لكيت العاملات مخبوصات ، ما جان عندي القابلية اسألهن شيحتاجن لو اساعدهن بشي

مجرد صبحت عليهن ورحت طلعت الكهوة وسويتلي كوب وكعدت اشربها على الريگ

نفسي تعلب ومسدوده مالي نفس بشي ، كملت الكوب وكمت غسلته وطلعت متوجه لبيتنه

فتحت الباب ودخلت ، دكيت الباب الداخلي فتحته الي دادا

ام حسن : هلا يمه تعاي طبي

زبيدة : حضنتها بايدي وطبيت جوه ، تلكتني خالة وئام شايله مواعين مبين هستوهم ديتريكون

وئام : هاا حبيبتي زبيدة صباح الخير همزين اجيتي يله كعدي تريكي هستوني صبيت الجاي

زبيدة : كعدت وياهن على الميز ، صباح النور والف عافية اني سبقتكم

طمنني شلونها نور

وئام : سكتي ولج والله كسرتلي خاطري الليل كله تبجي

ام حسن : وهذا موسى الكلب والله صافكها راشدي خطية مطبع اصابعه على وجها ضاربها من كلب الله لا يرضى عليه

زبيدة : كسر بايده كون

وئام : آمين يارب ، خطية كسرت خاطري حتى من صحتلها هسه ما قبلت تاكل

زبيدة : هسه كايمة اصعدلها شنو بكيفها متاكل لتروح تتخربط

وئام : عوفج من نور هسه اني بعد شويه اصعدلها الاكل واجبرها تاكل ما اعوفها لتخافين

وهسه احجيلنا شصار وياج البارحة

زبيدة : سولفتلهن مختصر مفيد عن الصار وهن خطية
ماتن قهر

وئام : همه ذوله بيت جدج مو غريبه عليهم هالسوالف

ام حسن : ورجلج يمه شلون صار

زبيدة : والله ما ادري دادا كعدت ما لكيته

ام حسن : شوف خطية والله حقه رجال شكبره شكده يتقاوون عليه ويستغلون مرضه ويجتفو

اوف يا هارون اوف منو يصدك ذاك الشقاوجي ابو الوكاحه هيج يصير بي من يكبر

زبيدة : ليش دادا انتِ ملحكه على هارون

ام حسن : شلون لعد اصلاً بولادة هيام بي رحنا اني وبيبتج وامها للمستشفى وياها واني اول وحدة شالته بعد الدكتورة من طلعو

زبيدة : هاا يعني من صارت سالفة زهراء جان هارون مولود

وئام : اي والله ليجذبني عمره خمس سنوات مدري اربعة بذاك الوكت

زبيدة : هاا ، تنهدت اييي ، زين اكلجن نور وينها هسه

ام حسن : بغرفتج

زبيدة : لعد اعوفجن اني تتريكن واروح اشوفها خطية البارحة تسرعت وانفعلت عليها وهي مالها ذنب

كمت صعدت فوك لغرفتي ومن وصلت دكيت الباب ولكيتها كاعدة على القنفه وصافنه

كعدت يمها وطكيت اصابعي بوجها ، صباح الخير

خطية فزت وباوعتلي شلون المخترعه ، اباوع لعيونها حمر دم وخشمها احمر مبينه جانت تبجي

نور : هاا زبيدة

زبيدة : ليش تبجين ؟

نور : ليش هو الصار سهل حتى ما ابجي والله صارلي تلث ايام واليوم رابعهن واني دمعتي ما نشفت من سوايه اخويه الجبير الظهر المفروض يسندنا بغياب اهلنا

زبيدة : ميخالف حبيبتي قابل انتِ الج ذنب بالي صار هم حقج لا حول ولا قوة

نور : والله يا زبيدة اني ما جان بيدي شي ، حلكي مكمم لا اني الكادرة ادافع عنه ولا اني الكادرة اتصل على اهلي واشتكيلهم حتى موبايلي سحبو مني حتى لا اوصل لاهلي شي

وداعة بابا ما خليت واحد بيهم اذا ما توسلته بس حتى اصعد اكل نظيف ومي لهارون وهم ما خلوني
حرت شسويت وكلشي ما حصلت منهم

زبيدة : طبطبت على جتفها ، ادري بيج واسفه لان البارحة انبتج على الصار والله ما جان قصدي ولا ادري بالصار وياج كل عبالي انتِ وياهم

نور : لا والله اصلاً اني كرهتهم من شفتهم كلهم صافين ويه عاكف حتى موسى نسى هارون يصير اخو وراح يدافع لعاكف الكلب

زبيدة : اخوج الكلب والله مو بس عاكف

نور : اي والله صدك عاش لسانج

زبيدة : ابتسمت تدرين يانور والله انتِ طلعتي وردة وهاي دموعج خير مثال على انج انظف وحدة بهالمستنقع القذر هذا ، تدرين ليش

لان ما قبلتي على الغلط والانسان الميقبل بالغلط هذا انسان نقي ونظيف والله مبارك بروحه

فكافي بجي ومسحي دموعج وسولفيلي خو موسى ما سوالج شي بعد

نور : اصلاً ما شافني واني هستوني عود كلت اروح اجيب جم حاجة الي من البيت وارجع ابقى هنا منا لمن يرجعون اهلي وبيت جدي ياله ارجع

زبيدة : هذا احسن شي تسوي ، مسحت دموعها وهدئتها ياله كمت ، يله حبيبتي نزلي تريكي والموقف الصار راح ينحل بأذن الله

اني اترخص منج مضطره اروح ومثل ما وصيتج اكلي مو تبقين بدون اكل تمام

عفتها وطلعت اتمشى للاسطبل وبالي يم هارون ، يا ترى وين راح من الصبح واليوم سبت حتى دوام ماكو

وصلت للاسطبل ودخلت لمكان الخيول ما لكيت شي محترك كلشي على حطته نفس ما هو بس المكان فارغ والخيول ما هنه

سألت الحرس ، لعد الخيول وين ؟

: ست السيد هارون نقلهن كلهم للاسطبل الي بالمزرعة

زبيدة : وشوكت نقلهن ؟

: من اول ما صار التماس بالغرفة المخصصه لولادة الفرس

زبيدة : هه كتلي تماس ، زين متعرف هارون وينه ؟

: لا والله ست ، اني شفته من الصبح اجه اخذ سيارته وطلع بس وين بالضبط ما اعرف

زبيدة : هزيت راسي وسألته على مكان الغرفة الي احتركت ودلاني عليها

مشيت باتجاه الغرفة الحجه عنها الحارس ومن وصلتلها

وكفت كبالها اباوع للباب بيضة ومن الحرگ صايره سودة

سميت بسم الله ومديت ايدي فاتحه الباب ، دخلت للغرفة وشلت راسي على السقف الصاير فحم هو والحيطان

اباوع للفراش المحطوط بالغرفة كله منتهي صاير عبارة عن خيوط

والله رغم هاي اول مرة بحياتي اطب لهاي الغرفة بس اول ما طبيتلها انقمت گلبي ومتت قهر ، الله يساعد هارون

همزين ما وكف كلبه من القهر بله لو لايحه النار الاسطبل وكاتله كل الخيول شجان راح يسوي عاكف

وشلون راح يقابل رب العالمين باجر عگبه وبركتبه ارواح كل بالحيوانات

الله ستر وجانت الغرفة فارغة والا لو ميت خيل واحد جان شرب من دمهم هارون ومينلام بيهم لا والله

لا وبيت جدي بدال لا يحاسبون عاكف ويوكفون ويه هارون كامو استغلو النوبة الاجته من القهر وقيدو وحبسو بدم بارد

شنو من عائلة هاي يا ربي الجد تبرى من ابنه ، الخوات وحدة حاقدة على الثانية ، الجناين وحدة تكيد للثانيه ، الاحفاد واحد يكره الثاني

واحدهم يحركله بزونه بحجة الشقه والثاني يحرك الاسطبل والله شنو لان هارون ما قبل ينطي واحد من الخيول

الله يساعدج يا يمه شلون جنتِ عايشة ويه هاي النماذج ومتحمله قذارتهم

تنهدت وباوعت لارجاء الغرفة ، حكيت راسي وصفنت على الحيطان

بوقتها ما اعرف ليش اجتي فكرة غريبة براسي و ترددت اسويها كلت خاف هارون ميقبل ويسويلي سالفة بس يله الحياة تجارب مثل ميكولون خلي اسوي الي ببالي وشيريد يصير خلي يصير

طلعت من الغرفة اهرول ، رحت يم الحرس

اكلكم عندي جم حاجة عادي اكتبها الكم وترحون تجيبوها الي

: انتِ تأمرين ست كولي

: احنه بخدمتج ست

زبيدة : لعد تمام انتظروني اروح اسجل الغراض بالورقة واجيكم

: لحظة ست ميحتاج ترجعين للبيت تفضلي هذا سجل وهذا قلم اكتبي التردي واحنه نجيبه الج

زبيدة : باوعو اريد ، صبغ ابيض ، واريد فرشه صبغ جبيرة ، واسفنجات ودرج وجرايد و...عددتلهم كلشي واني اكتبه

كملت وسديت القلم ، باوعتلهم لكيتهم صافنين بوجهي

شبيكم ؟

: ست اعذريني على التدخل بس هاي الاغراض شتسوين بيهن ؟

زبيدة : دهاك هاي الورقة روح جيبلي الي بيها ومن تجي عود افهمكم كلشي بالتفصيل لان اريدكم تساعدوني

: حاضر ست

زبيدة : راحو تلاثة وبقو سبعة واكفين بالباب ، اني من شفتهم راحو ركضت للبيت وبوجهي لغرفتي بدلت ملابسي لملابس مريحة حتى اكدر اتحرك براحتي

لبست شورت جينز قصير وويا توب قمصير واخذت سكارف وياي حتى اشد بي راسي وما اتوسخ

لبست فوكهن صاية قديمة عندي وفوكاها حجاب ونزلت اخذتلي تفاحة وطلعت كعدت بالحديقة

اكل بالتفاحة وانتظرهم ، طولو هواي بالساعة ياله اجوي

من شفتهم دخلو كمت مشيت باتجاههم ، هااا جبتو كلشي

: اي ست كلشي جبنا بس الدرج موجود بالمخزن هسه نروح نجيبه الج

زبيدة : لعد اخذولي الغراض للغرفة الي احتركت وجيبولي الدرج بسرعة

راح واحد منهم يجيب الدرج واني ساعدتهم بشيل الغراض ، دخلناهم بالغرفة

واني وياهم ركضنا كنسناها وطلعنا كل الوسخ البيها بره وفرشنا جرايد على كبر الغرفة وخلينا الغراض فوكاهن

اجه الولد جايب الدرج خلا الي بوسط الغرفة

ها هي شباب عاشت ايدكم تعبتكم وياي والله ، ينطيكم العافية ان شاء الله

: العفو ست احنه بخدمتج

زبيدة : تسلمون متقصرون والله ، يله اخذو راحتكم وياريت محد يجي لهنا ولا تخلون احد يدخلي لان اريد اشتغل براحتي

هزولي راسهم بتأكيد وطلعو ، من تاكدت منهم راحو سديت الباب ورجعت عليها الكرسي

نزعت الصايه وشديت راسي ، لبست كمامة ورحت خبطت الصبغ الي جابو وحضرت كلشي احتاجه

اني اساسًا اعرف بهاي السوالف لان من تغيرت اوضاعنا وانتقلنا للمنطقة مالت اهل امين هواي رممنا بالبيت حتى يطلع وجهه

واني ما جان يهينلي بأبويه فجنت اضطر اتعلم واساعده بكلشي حتى اخفف عنه وفعلاً تعلمت ومو بس اني حتى دنيا جانت تساعدنا بس ديمة سوده عليه ما جانت تكدر بس ذابه روحها على التنظيف
تنظف ويه امها ودادا وترجع لوره

المهم اخذت الاسفنجه نكعتها بمادة معينه وبديت اجلف بالحيطان حتى اوخر الشحار الي على الحيطان

خلصت حايط واحد وكل ساعة اصعد وانزل على الدرج بس والله متت تعب انوب الدنيا صيف

وجهي كام يقطر من الحر ، الله يساعد العمال و الصباغين والله شغلهم يشك الحلك شك

ضليت اجلف بالحيطان لمن وخرت كل الشحار مالت الحرك ياله كعدت بس شنو الهث والله

وخرت الكمامه عن وجهي وجريت نفسي ، اني عندي حساسية من التراب ومن الروائج القوية كبل اختنك فانجبر البس كمامة

شربت مي بسرعة وغسلت وجهي ورجعت لبست الكمامة ورجعت ظهري على الباب متنهده

باوعت على السكف وبلعت ريكي ، يبو انت شراح يوصلني الك كون اصعد على اخر بايه من الدرج ياله اوصل واني اخاف لا اوكع واتكسر

توكلت على الله وكمت سحبت الدرج ثبته بمكان وصعدت على اخر بايه ، سميت باسم الرحمن وبديت اجلف السگف

طلعت روحي علما كملته عمي والله اني ماكو مني اثنين بهالدنيا ، دكلي تبن زبد اكلي تبن على اساس
انتِ فاتكه الذرة هنه حيطان وجلفتهن عليمن ماكو منج

عشتووو

نزلت من الدرج وكعدت اخذتلي بريك ساعتين علما تنشف الحيطان ياله اكوم اكمل ، والله ساعتين وحر العراق العظيم نشف كلشي

كمت غطست الفرشه بالسطل وبديت اصبغ الحيطان قاط اول

وللامانة صحيح الريحة مزعجة والحر يكتل بس استمتعت احس بشعور حلو من اشتغل

رغم النقاط مالت الكهرباء شويه وترني بس جنت حذره وياهن وحاطه سليشن داير مدايرهن حتى لا اطخهن ومن اوصل الهن استخدم فرشه ناعمة حتى لا ادمرهن

المهم لا اكلكم ولا تكلولي من العشرة الصبح للخمسة العصر ياله كملت حتى الصلاة راحت عليه

والله انكضيت كضي من التعب اريد اجر نفس بعد ما اكدر كمت اشوف الواحد عشره

والحرس خطية مقصرو وياي جابولي ماعون فواكهه مشكله واني ما قصرت من الجوع حتى النوه أكلته

واكفه اباوع للغرفة وعيوني تلمع احس بالفخر على الانجاز السويته حتى لو جان شي بسيط بس اني حيل فخورة بنفسي ومعتزه بيها

احسن من ذولاك الجلاب العافو هارون حاير صار اربع ايام بالجذب ما واحد بيهم راح جابله عمال واجه سوه الغرفة حتى يبرد كلبه ويكسر عينه لهارون

بس مو غريبة عليهم على كوله خالة وئام الحقارة تمشي بدمهم

تنهدت بتعب وكمت لميت الغراض والجرايد كلهن ذبيتهن بالحاوية والاصباغ والغراض الزادن كلت ابلغ الحراس يتصرفون بيهن

غسلت وجهي ولبست هدومي وطلعت صار هارون بوجهي واكف يم الشباك

والنبي من شفته عطت صوت معدل ، بسم الله الرحمن الرحيم متكلي شجاك ناوي تجلطني انت

ما رد عليه ، اباوعله صافن على الغرفة وفاتح عيونه ،

هلاووو الاخ مبين راح ينطحني هنا انوب احد بالاسطبل يعني اذا يدفني هنا محد يدري بيه راحت عليج يا زبيدة

بلعت ريكي من شفته يدخل للغرفة ويفتر بيها وكل شويه يندار يباوعلي شلون الي ممصدك

هارون : انتِ سويتي كل هذا ؟

زبيدة : اي

هارون : صدك يعني كلها انتِ اشتغلتيها

زبيدة : هزيت راسي

هارون : ليش ؟

زبيدة : هاا

هارون : ليش نظفتيها انتِ ما مجبورة

زبيدة : رفعت جتافي ، ما اعرف والله بس حبيت انظفها ونظفتها

اباوعله تقدم وكف كدامي مباشرةً بحيث مجان يفصل بيني وبينه مسافة جبيرة

رفعت راسي باوعت بوجهه لكيته صافن عليه

فجأة شفته ابتسم بوجهي ابتسامة اول مرة اشوفها تزين وجهه وبالذات الي اني

ضليت باهته وما بدرت اي ردة فعل حرفيًا ما عرفت شسوي بهالموقف هذا

والله بوقتها كلت هذا يريد يخنكني بس جاي يمهدلي مثل كل مرة واستعديت حتى اشرد بروحي العزيزة

بس بطلت من شفته يطلع ايده من جيب بنطرونه ويخليها كدامي بشكل مصافحة والابتسامة نفسها مرسومه على وجهه

هارون : شكراً زبيدة

زبيدة : باوعت لايده وباوعتله ، بلعت ريكي وخليت ايدي بايده مصافحته

العفو هارون

حسيت بي يشد على ايدي ويعوفها ، جريتها بسرعه اول ما عافها

رغم هاي مو اول مرة الزم ايده بس مدري ليش بهذا الموقف كلش ترددت واستغربت هذا الوضع

احم وين جنت دورت عليك بالبيت ما لكيتك

هارون : جنت بالمحمية وجبت وياي غراض حتى انظف الغرفة وتفاجئت من لكيتج سابقتني

زبيدة : عادي ما صار شي ، طلعت من الاسطبل تشكرت من الحرس مرة ثانية ومشيت وهو يمشي بصفي

باوعتله لكيت خال اديه بجيوبه كالعادة ويمشي بثبات وهو انتبهلي

هارون : تعبتي مو

زبيدة : تريد الصراحة هلكت مو بس تعبت

هارون : من شوكت بلشتي بيها

زبيدة : من العشرة

هارون : جؤ هواي وكت

زبيدة : بس النتيجة تستاهل

هارون : عاشت ايدج

زبيدة : ابتسمت شكراً

دخلنا لجوه والحبايب كلهم اندارو علينا ، رفعت عيني على هارون لكيته يباوعلهم وملامحه جامدة متعبر عن شي

بيداء : شبيك تباوع علينا هيج تعال اخذلك راشدي ليش تخليها بنفسك

هارون : لو اريد جان سويتها بلحظتها ما انتظر تذكير منج

زبيدة : صعد فوك بعد ما نطق بهالجملة واني لحكته

دخلنا للغرفة ، هو سد الباب واني رحت بسرعة للكنتور طلعتلي دشداشة ودخلت للحمام سبحت وتوضيت

طلعت من الحمام الف بالخاولي على راسي ، لكيت هارون كاعد يرتب الفراش

عوفه اني ارتبه

هارون : ميحتاج

زبيدة : سفط البطانية وباوعلي

هارون : تغديتي ؟

زبيدة : لا وانت ؟

هارون : هم لا

زبيدة : طيب تحب انزل اسويلنا اكل بسرعة

هارون : ليش تسوين اكل شنو الجماعة ما طابخين اليوم ؟

زبيدة : لا طابخين وعمتي بدرية وبيداء هن الطبخن واني ما اقبل لا انت ولا اني ناكل من ايدهن بعد السونه بيك

واكلنا اني راح اضل اسوي منا لمن يرجعون بيت جدي وترجع بيبي تطبخ وهسه خليني اروح اسويلنا شي بسرعة لان اني ميته جوع

هارون : اوكفي ميحتاج لتنزلين هسه راح اخابر المطعم واطلبلنا اكل

شتحبين تاكلين ؟

زبيدة : بيتزا

هارون : خوش

زبيدة : اتصل على المطعم طلب بيتزا الي واله ، عفته يكمل الطلب واني رحت صليت

من كملت كمت فرشت فراشي حتى بس اتغده انام
جهزت فراشي وكعدت اكلب بموبايلي وهو نزل من وصل الطلب

شويه وصعد شايل علاليك وبايده سفرة ، كمت اخذت منه السفرة فرشتها بالكاع

هارون : ليش بالكاع ؟

زبيدة : جسمي يوجعني وما ارتاح من اكل على القنفه اذا تحب انت اخذ اكلك واكل هناك

هارون : ماكو فرق

زبيدة : كعدنا بالكاع كلمن اخذ طلبه وبلشنا ناكل

هارون : سؤال

زبيدة : شربت من الببسي واشرتله ، اسمعك

هارون : ليش تعاركتي وياهم البارحة وسويتي كل السويتي رغم همه ما سوولج شي

زبيدة : شوف اني ما استحي فراح اجاوبك بكل صراحة

صحيح همه ما سوولي شي بس اني تعاركت وياهم علمودك انت ما رضيت بالي سوو وياك ابد

هارون : ليش ؟

زبيدة : اخذت قضمة من البيتزا وجاوبته

باوع هارون بغض النظر عن حقيقة زواجنا وعلاقتنا المتوترة داخل هاي الغرفة لكن بالنهاية انت محسوب عليه

وحتى لو تعاركت وياك ووصلت بيني وبينك للستار تبقى بالنهاية انسان

رغم كل سلبياتك واذيتك الي بس ما اكدر انكر انُ عندك مشاعر وهيج مواقف تأذيك وتجرحك

واني ما اقبل بهذا الشي ، على اي اساس همه يقيدوك ويحبسوك هنا تلث ايام شنو حشاك حيوان ويربطوك بهاي الطريقة

اهل الوصخ عود استغلو النوبة مالتك حتى يسيطرون عليك بس تعرف همه ليش سوو هيج

يدرون بيك اذا واكف بحيلك ميكدرون يمسوك لان تركع راس براس وتشوي البصل على اذانهم واذان
الخلفهم

سرابيت ولا واحد منهم فكر بيك مكالو احتمال تجيك النوبة وبسبب كثرة الضغط تنضرب جلطة لو يروح لسانك

محد بيهم فكر يجي يطمئن عليك او على الاقل ياخذك للحمام ما خافو لا مثانتك تنفجر وتموت

همه صح ما فكرو بس اني فكرت ، انت ان رحت وان اجيت ومهما صار بيني وبينك تبقى ابن عمي ومن لحمي ودمي اولاً وزوجي ثانيًا حتى لو زواجنا
كلاوات

اي لتسويلي نظرة المصدوم اني انسانه صريحة ما راح اكعد اجذب عليك واعيش دور المستحية

هارون : انتِ جريئة

زبيدة : اعرف

رجعت اكمل اكل وهو سد الموضوع وبعد ما سألني شي

كملت وكمت اني ويا لملمنا الاكل الزاد خليته بالثلاجة وهو طلع يذب الزبل

رحت غسلت وعطرت الغرفة حتى تروح ريحة الاكل وبوجهي للفراش شمرت روحي على الدشگ وطبيت كول بالنوم

نمت وما كعدت غير وقت اذان المغرب صليت ورجعت نمت وهيج جريتها للـ1 بالليل ياله شبعت نوم وكعدت

تمغطت وكمت ما لكيت هارون رحت غسلت ولبست روب فوك هدومي ونزلت

دخلت للمطبخ طلعت جبن سويتلي لفه وسويت جاي
اخذتهن وطلعت كعدت على المرجوحة

اكل واباوع بالموبايل لهناك وشفت هارون كاعد على الزرع قريب على البستان ، اخذت كوبي وكمت باتجاهه لان لفتي نسفتها

وصلت يمه لكيته صافن على الزرع وشارد بخياله

هاي ليش كاعد هنا ؟

اباوعله مد ايده بجيبه وطلع صمه مالت حب الشمس واشرلي افتح ايدي

فتحتله ايدي ، خله الحب بيها ونفض ايده

ما كتلي شعندك كاعد هنا والكاع رطبة كوم لتتمرض

هارون : اكلي حب ويه الجاي طيب

زبيدة : عرفته ميريد يحجي شي فعفته على راحته

خليت حباية بحلكي وباوعتله ، تعشيت ؟

هارون : لا

زبيدة : اسويلك لفه ؟

هارون : لا شبعان

زبيدة : هزيت راسي ومشيت حتى ارجع لمكاني

هارون : ابقي

زبيدة : هاا !!

هارون : اذا تردين تكعدين كعدي وجودج ما مضايقني

زبيدة : كعدت كباله وهو قدم ماعون يمي

هارون : ذبي الكشور هنا لتوسخين الكاع

زبيدة : احد كلك جلب اني حتى اكل واشمر

هارون : عليج لسان دخيل محمد شكد زفر

زبيدة : هي بس العدها لساني تكدر تعيش ويه شكولكم

شربت جاي وباوعتله اكول هارون عندي سؤال
عادي اسأل

هارون : لا

زبيدة : مو بكيفك هي انت اليوم سالتني واني جاوبتك فانت هسه مجبور تجاوبني

اي وحدة بوحدة ولتخاف ما راح أسألك سؤال شخصي

هارون : احجي فضيني

زبيدة : من جنه بـ***** وانت وزياد غطستو بنص البحر ليش الحوت ما اكلكم لو تهجم عليكم

هارون : الحيتان متتهجم على البشر الا اذا تهجمو عليها

زبيدة : شلون !! انت مو كتلي حوت الاوركا خطر ودائما يهجم على اصحابه ويغدر بيهم

هارون : صحيح بس هذا النوع مالت الحيتان يختلف

زبيدة : صدك هو الحوت الشفنا شنو اسمه ؟

هارون : حوت العنبر

زبيدة : هاا هو هذا الياخذون من عنده عطر العنبر مو ؟

هارون : بالضبط بس انتِ تعرفين هذا العطر منين يطلعو

زبيدة : منين ؟ من كبده ؟

هارون : لا من القيء مالته

تخيلي القيء مالت هذا الحوت ياخذو ويستخصلون منه هذا العطر الطيب والي يدخل بصناعة اجود واغلى العطور بالعالم

زبيدة : سبحان الله

هارون : فعلاً سبحانه خلق النا كائن متفضل على البشرية كلها وللاسف احنه منستاهل

تدرين سابقًا جانو يصنعون من زيته المكياج وكل مستحضرات التجميل التستخدمنها انتن هسه

زبيدة : ياا

هارون : والله حتى الصابون الاصلي جانو قبل يسوو من زيته وانارة الشوارع باوروبا جانت من زيوته هم

زبيدة : شعجب قبل جانو يدخلو بهاي الصناعات الذكرتها بس شنو هسه بعد ماكو ؟

هارون : العنبر كائن بصعوبة يتكاثر ولهذا السبب انمنع اصطيادة بأي شكل من الاشكال حتى لا ينقرض

زبيدة : الله كمل كمل سولفلي عليه بعد اريد اسمع

هارون : اوكفي خلي اتذكر هاا تدرين العنبر ينام وهو واكف

زبيدة : شلون يعني ، اباوعله سوه ايده بشكل عمودي

هارون : هيج بشكل مستقيم على عكس الحوت الازرق ينام وهو يسبح

زبيدة : يعني من طبينا للبحر ذاك اليوم جان العنبر نايم وكت الصورت ويا

هارون : اي جان نايم

زبيدة : الله شكد حلو

بس تدري كلش حلوة المعلومات العندك

هارون : مو معلوماتي الحلوة هو هذا العالم عظيم والحلو الي بي انج كلما تكتشفين شي جديد عنه تنجذبين اله اكثر

زبيدة : مبين عليك كلش تحب الحيوانات ، اكثر من مرة انتبهلك من تسولف عليهن عيونك هيج تضل تلمع

هارون : اني لوما هذا العالم جان شفتيني مخبل وافتر بالشوارع

الحيوانات هاي هن النقذني من نفسي وحببني بالحياة بعد ما جنت فاقد الامل إني الكه شي بيها يخليني اعيش

هن السلام والسعادة الي بحياتي لو ما هن ما اعرف وين اروح

زبيدة : لهالدرجة تحبهن

هارون : هن الروح بالنسبة الي

زبيدة : ابتسمت على تعابيره اول مرة يصادفني هيج شخص

تدري انت غريب

هارون : وانتِ جريئة

زبيدة : هزيت راسي اايد كلامه

ضلينا كاعدين بدون كلام نباوع لصفاء السماء بالليل
لمن نعسنا كمنا نمنا

ومن يومها انعقدت هدنه روحية بيني وبين هارون ، بطل يصير بيناتنا اي مناوشات

كل واحد بينا منعزل بعالمه الخاص لا هو كام يضايقني ولا اني احتك بي غير السلام عليكم والصباح الخير ما بيناتنا

ناكل سوه ونكعد على نفس السفرة واحد بصف الثاني لكن بدون اي كلام حتى الاشياء الي جنت احتاجها منه ما اكله روح جيبها مجرد اكتبها اله بورقة والزكها على الثلاجة وهو من يشوفها ياخذها يجيب الي بيها ويخلي على صفحة واني من اجي اخذهن

وهيج ماشيه حياتنا ، اليوم رجوع بيت جدي وعماتي مخبوصات من الصبح

واني طول هالفترة ما كمت انزل مجنكله فوك عود من اريد اطبخ الي ولهارون انزل اطبخ واصب واصعد

سديت الكنتور من سمعت الباب يندك ورحت فتحه صارن بوجهي تلث بنات اول مرة بحياتي اشوفهن

باوعتلهن باستغراب ، منو ذني !!

: السلام عليكم

زبيدة : وعليكم السلام

حاجتني وحدة منهن تطلع بكد نوال اخت هارون

: مرت هارون مو

زبيدة : اي

: تستقبلين ضيوف ؟

زبيدة : اي اهلا وسهلا تفضلو

دخلن للغرفة واني رحت قدمتلهن مي وعصير وكعدت اباوعلهن وعيوني كلها استفهام اريد اعرف منو ذني

: حبيبتي ندري بيج متستغربة من وجودنا

اعرفج بنفسي اني افكار مرت حماج الجبير موسى وهاي اختي الوسطانية علياء مرت حماج الوسطاني عيسى وهاي اختي الصغيرة فرات ماخذة ابن عمتج بيداء احمد

جانت والدتنا مريضة وباقين يمها واليوم رجعنا لبيوتنا وكلنا نجي نتعرف عليج

زبيدة : هاا اي أهلاً وسهلاً بيجن ، كمت صافحتهن ورحبت بيهن

افكار : شلونج حبيبتي ان شاء الله مرتاحة يمنا

زبيدة : الحمدلله كلش مرتاحه

فرات : شلونه هارون وياج

زبيدة : الحمدلله

افكار : زين وياج

زبيدة : وردة هارون ماكو منه فدوة لكلبه

اباوع لهاي الاسمها علياء تكلب بعيونها وتباوعلي صفح ، هاي شبيها عشتو

علياء : سمعت عيسى مسافر ويه اخوج مو

زبيدة : هااا افتهمت ليش الست تباوعلي صفح اثاري طلعت السالفة علمود سفر رجلها ويه معين

اي راح ويه اخويه معين

علياء : لعد شعجب ما راح واحد منكم ويا

زبيدة : والله احنه توسلنا بي بس رجلج هو الاصر يسافر ويا

افكر : ماكو فرق احنه واحد

زبيدة : ان شاء الله ماكو فرق

علياء : بشري ماكو شي منا منا

زبيدة : بعد وكت على هاي السالفة

افكار : شنو بس لا ناوين تاجلون سالفة الجهال تره انتو مو صغار

زبيدة : لاحكين على شلاع الكلب خلينا هسه متونسين بزواجنا شوكت ما الله يقسملنا هلا بي

افكار : اي والله صح لسانج

زبيدة : ضلن كاعدات شويه وكامن طلعن

كمت عزلت الصينية وكعدت ، اباوع لهارون دخل للغرفة

هارون : السلام عليكم

زبيدة : وعليكم السلام

راح فتح الكنتور يطلع لروحه ملابس ، شويه واندار عليه

هارون : اكو احد جان هنا

زبيدة : اي نسوان اخوانك واختهن اجن يباركلي ويتعرفن عليه

بس شلون عرفت اكو احد جان هنا شنو شفتهن ؟

هارون : لا بس اكو عطر نسائي غريب بالغرفة لهالسبب سألتج

زبيدة : اي ، يله اني نازله اخذ راحتك

هارون : لحظة اوكفي

زبيدة : هاا

هارون : ليش كلما ادخل للغرفة تطلعين ؟

_______________________________

دنيا : ملتمين بالليل نشرب جاي ودخل حليم كعد يمنه ومبين عليه عنده شي

يحيى : شبيك بويه شنو صاير وياك شي شو احسك مو طبيعي

حليم : يابه اني عندي موضوع وياكم

رميم : احجي يمه شعندك

حليم : يمه اني اريد اتزوج

**************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

حبايبي اعرف البارت اليوم قصير بس وداعتكم الاهل عدهم طبخ اليوم ومع هذا ما كدرت ما اكتب واعوفكم فكتبت هالاكدر عليه حتى لا اعوفكم بدون بارت فأتمنى تعذروني ❤️