الموت الحي الفصل الثاني وستون 62 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

هارون : لحظة اوكفي

زبيدة : هاا

هارون : ليش كلما ادخل للغرفة تطلعين ؟

زبيدة : تنهدت وتقدمت وكفت كباله

باوع هارون اني وحدة بأخر 3 سنوات شفت عذاب انت متتخيله

الظروف والمشاكل جبرتني اسوي اشياء عمري ما جنت متخيله اسويها

وصلت لمرحلة صار عندي اشباع من المشاكل ومن اجيت لهنا زاد الطين بله عليه

انجبرت اگابل ناس ما اطيق سيرتهم وهم انفرض عليه اعيش وياهم علمود وصية ابوية

وكمل فوكاها سالفة زواجي منك ومساومتي على اهلي الي اشوفهم بصيص الامل الوحيد الباقيلي بحياتي

المهم خضعت للامر الواقع وانجبرت عليك مثل ما انت انجبرت عليه وهاي السالفة خو بحثًا اخر

لا انت عفتني بحالي ولا اني الكدرت اسكت على اذيتك ، واحدنا يجر والثاني يعر

طيب والى متى !! اني وانت نعرف انُ سالفة زواجنا ما منها مهرب على الاقل هاي الفترة

لا اني اكدر انفصل عنك ولا انت ، زين وبعدين راح نبقى هيج بس عرك ومشاكل وقال وقلت

انت راح تتعب واني راح اتعب فليش نحط نفسنا بهيج مواقف ونتأذى الافضل نمشي برأيك وكل واحد بينا يعتبر الثاني ما موجود بهاي الغرفة حتى نرتاح

هارون : يعني هذا هو السبب ؟

زبيدة : حتى اكو صريحة السبب الاول هذا مثل ما كتلك اني تعبت ومحتاجة شويه هدوء ما اريد بعد مشاكل وهذا السكون الي صار بعلاقتنا كلش مريحني

اما السبب الثاني هو موقفك وياي اخر مرة

اني جنت اشوفك انسان سيء بالدرجة الاولى لكن من بعد ما صار ويايه حادث الخياطة وشفت خوفك ولهفتك على مساعدتي سحبت كلامي

انت بشر طبيعي حالك من حالي وحال اي شخص عندك سلبيات وعندك ايجابيات بس انت متحب احد يشوف الجانب الابيض منك وهذا الشي اكتشفته من معاشرتي القليلة الك

هارون : جؤ متوهمه انتِ

زبيدة : لا هارون اني ما متوهمه ، الانسان السيء عمره ميفكر انه ينقذ واحد على خلاف ويا

الانسان السيء ميتخربط لمجرد انه سمع انُ الحيوانات العنده تعرضت حياتها للخطر

الانسان السيء ميتختل ويطلع ينطي فلوس للفقرة لتحاول تبرر الموقف ني شفتك والموضوع ما ناسيته

الانسان السيء يا هارون ميحس بالمسؤولية ويجيب فلوس ويحشر بجنطة انسانه يكرها لمجرد انها تسمى مرته وعلى رغم كل الخلاف الي بينه وبينها مينسى انها بالنهاية احد مسؤولياته

الانسان السيء مينطي فلوس بالخفية للعاملات والحرس فوك رواتبهم ويوصيهم انُ ميحجون

اني كل هذا لاحظته عليك ، انت مو سيء يا هارون صحيح الجانب السيء الي بشخصيتك طاغي

لكن مع هذا لا اني ولا انت نكدر ننكر انُ اكو ضوه ابيض بداخلك ساعات يقاومك ويطلع وهالشي انت متكدر تخفي مهما حاولت

لذلك اني برأيي انسان مثلك يستحق إني اعلن السلام ويا لكن بشرط انه ميتعرضلي ولا يأذيني

اعتقد جوابي جان كافي ووافي بالنسبة الك اتمنى اكون رضيت فضولك وزدت عليه حبة مسك مثل ميكولون

وهسه اسمحلي لازم انزل لان بيت جدي على وصول واريد استقبل بيبي من ترجع

عفته وطلعت من الغرفة ، جريت نفس ، صحيح اني ما متعوده ابرر لاحد شي ولا ابين إني لطيفة لهالدرجة بس اني شخصيةً احس تعبت وماعندي قابلية بعد للمشاكل

________________________________

حليم : يمه اني اريد اتزوج

يوسف : تتزوج ؟

حليم : اي ليش حجيت شي غلط

جياد : لا حبيبي حقك هذا مابيها شي بس يوسف حاله حالنا تفاجئ من سمعك بواسطة انت جنت رافض فكرة الزواج

حليم : انت كلتها جنت وهسه قررت خلص بعد راح يصير عمري واحد وتلاثين سنة

هم ياله ابدي افكر بمستقبلي وعائلتي خوما اضل طول عمري اعزب ، ما دامني بعدني بعمر مناسب للزواج خلي اخذ بنت الحلال واستقر

رميم : والله هذا احسن شي تسوي بعد روحي حيل حيل فرحتني بكلامك والله لو بأيدي هسه اكوم اخطبلك التريدها

حليم : لا يمه اني ماكو احد ببالي ، انتِ خطبيلي الي تعجبج المهم تكون مؤدبه وبنت ناس هذا كل الاريده

رميم : ما دامك تريدها على اختياري هاهي يمه ابشر

والف الف مبروك مقدمًا يبعد امك تعال ابوسك ، يييمه حبيبي ما مصدكة والله فدوة رحت لطولك الحلو

حليم : هاا اشوفكم صافنين ما راح تباركولي

علي : الف مبروك تستاهل كل الخير انت

جياد : مبروك حبيبي الغالي

يوسف : مبروك

كريم : الف مبروك خويه

حليم : وانت يابه شو اشوفك ساكت حتى ما علقت على الموضوع

يحيى : اني طالع للحديقة الحكني

حليم : صار يابه طلعت ورا ، اشرلي اكعد كباله ، كعدن وباوعتله

خير يابه احجي ، مبين عندك حجي هواي

يحيى : بالحقيقة اني ما عجبني كلامك وهاي جاي اكولها بوجهك

حليم : ليش يابه شنو الما عجبك بكلامي

يحيى : حليم تره اني مو غشيم ولا عاطفي مثل امك وبحجايتين تكدر تضحك على عقلي

اني ادري بيك تحب زبيدة ولحد الان ما تخطيت فكرة انها تزوجت ولا راح تتخطاها بهاي السهولة

فاكبر غلط تسوي هسه تفكر تتزوج لان هيج انت راح تعالج الخطأ بالخطأ

من تفكر انك تتزوج حتى تتخطى زبيدة تكون جاي تجرم بحق البنية الراح تتزوجها قبل لتجرم بحق نفسك

بنت الناس شنو ذنبها تجي تاخذ واحد مثلك ومكيفه وما سايعتها الدنيا لان راح تبدي حياة جديدة

متدري انت ماخذها جسر تحاول تتخطى من خلاله حبك الاول واحتمال جبير انك متتخطى او تتخطى لكن بعد عذاب طويل ما راح يحس بي غير البنية

ليش تظلم بنات العالم وياك ، الغي هالفكرة من راسك وراجع طبيب نفسي صدكني راح يساعدك هواي

وشكد يريد يطول الموضوع وياك ، شهر ؟ سنة ؟ مو خسارة

على الاقل تنظف داخلك من كل الامور السلبية الي بيك حتى من تقرر هيج قرار مصيري تكون كده ومستعد اله مو تشلع كلب بنت العالم وياك وتتحمل
خطيتها بلا ذنب

حليم : يابه تره انت مكبر الموضوع ، اني لا اول ولا اخر واحد بهاي الدنيا ما اخذ اليريدها

روح شوف هاي العالم نصها تزوجت زواج تقليدي ومشت حياتها وعين الله عليهم مرتاحين ومستقرين

من وصلت يمي صارت السالفة معقدة وحرام ومتصير

يحيى : اني اريد مصلحتك يا بويه ليش تأذي روحك

المرة يا ابني تحتاج حنية ، معاملة حلوة ، كلمة تطيب خاطرها ، حضن يحسسها انها مرة ، بوسة ايد ، فضفضه تحسسها انها قريبة منك وشريكة حياتك بحق

انت اذا بعدك تحب زبيدة وحاط بالك يمها شلون راح تكدر تعامل مرتك بهاي الطريقة

يا حليم الزواج مو جنس ، مو مبارك بس تعرس وتطي مرتك حقوقها الزوجية اكو امور اهم من هاي السالفة
بهواي

حليم : يابه انت كلامك على عيني وراسي وادري بيك من حرصك عليه وعلى حياتي جاي تحجي هيج

بس صدكني اني جدي بهذا الموضوع وما اتخذت هذا القرار بتسرع لا بالعكس اني صارلي فترة كلش طويلة افكر بهذا الموضوع ولوما حاس بنفسي مستعد اخطي هيج خطوة ما جان اجيت وكتلكم اريد اتزوج

اني قررت ومسؤول عن قراري والاتمنى منكم متعارضوني وتوكفون وياي بهاي الخطوة

يحيى : يعني انت مصر ماكو امل من الكلام وياك

حليم : لا يابه ماكو امل وياريت تعوفوني على راحتي اقرر بالنهاية هاي حياتي واني ادرى بيها

يحيى : ما دامك هيج مصر اييي على راحتك ما يسعني اكول غير الله يوفقك ويارب يكون قرارك صائب ومتتندم عليه بعدين

حليم : لتخاف ما راح اتندم ، يله من رخصتك

كمت ودخلت جوه ، صعدت لغرفتي بدلت ملابسي ونزلت

تلكتني امي بالباب ، هاا يمه تردين شي

رميم : وين رايح

حليم : طالع اغير جو ليش تسألين

رميم : هاا حليم رجعنا لهاي السوالف

حليم : يا سوالف يمه شبيج انتِ

رميم : انت تعرف اني شجاي اقصد ، لك امي انت شوكت تعقل وتبطل الدرب الاعوج الماشي بي

مو راح تتزوج وتبدي حياة جديدة خوما تبقى هيج طريقك كله غلط باجر عكبه الله يحاسبك على عمرك الكضيته بالحرام مو حتى صلاتك التصليها ما مقبولة

حليم : ما اعرف شجاي تحجين ولشنو جاي تلمحين على كل حال اني مستعجل واريد اطلع فرجاءًا خلي نأجل هذا النقاش لبعد ما ارجع

رميم : متطلع منا وارجع لغرفتك يله

حليم : يمه وخري من طريقي تره والله مالي خلك

رميم : ما دامك رايح للمكانات النكسه المتعود تروحلها متطلع منا

حليم : ومنو كال اني رايح هناك

رميم : لعد وين طالع

حليم : اوووف رايح اشوف امين مختنك واريد اسولف ويا زين هيج

رميم : ما اصدكك اني

حليم : تردين اخابره الج حتى تتاكدين ؟

رميم : لا هاهي صدكتك وعود من ترجع جيب وياك كيلو لحم بعظم

حليم : صار يله من رخصتج ، رحت للكراج اخذت سيارتي وطلعت

بعد مرور ما يقارب النصف ساعة وكفت سيارتي ونزلت مسلم سويجي لواحد من الشباب حتى يصفوها

دخلت للمكان وداعب اذاني صوت الاغاني الصاخبة يتبعه اصوات الضحك واتطام نخب الكؤوس المليئة بالمشروبات الروحية

اخذت طاولة وكعدت ، طلبت احد مشروباتي الكحولية المفضلة وكعدت اباوع للنساء الكدامي

بهالمكان اكو ما لذ وطاب من النساء ، مختلف الاشكال ، مختلف الاعمار ، مختلف الجنسيات والاجسام

وصل طلبي واجت وحدة من بائعات الهوى كعدت يمي ، صبتلي كاس وقدمته الي

اخذته منها مبتسم ، رفعت كاس السعادة مرتشف منه وعيوني تراقبها

تتمايل وتضحك بغنج ، صاحبة جسم خرافي ، شكلها جميل ومغريه

بس مالي نفس بيها ببساطة ما اشوف زبيدة بولا وحدة منهن

سنين واني هالمكان ملازمني ، لاشفت نفس شكلها ولا حتى شخصيتها دورت هنا حتى على نبرة صوت تشبه صوتها وهم ما لكيت

: شبيهن عيون البحر صافنات

حليم : ارتشفت من الكاس وباوعتلها عندج شي اليوم ؟

: حتى لو عندي اتفرغلك

حليم : صكيت الكاس وذبيته ، شلت البطل واشرتلها يله كومي

اخذتها وطلعت لاحد البيوت المتعود اقضي حاجتي الجسدية بيها

وصلت ونزلت ماخذ ايدها ، فتحت الباب ودفعتها لجوه

تقربت حاوطت خصرها وبدت ليلتي الحميمة وياها

كملت منها وكمت دخلت للحمام سبحت وطلعت صبيتلي كلاص مشروب وانداريت عليها لكيتها تباوعلي وتضحك

شربت ومديت ايدي بسترتي طلعت صمة فلوس وشمرتهن عليها

كومي لميهن ورجعي منين ما اجيتي بسرعة اريد اطلع

اباوعلها بسرعة لمت الفلوس من الكاع وطلعت من البيت حتى بدون لا تسبح

كملت كاسي ورحت بدلت وطلعت بسيارتي ، بالطريق وتذكرت امي تريد اجيب لحم واذا ما جبت راح تسوي عليه عزة كربلاء وتفتح وياي تحقيق اله اول ماله اخر

رحت للكصاب الدائمًا ناخذ منه وهو نفسه اليشتغل بي امين

فتحت الجكمجه اخذت معطم الفم وطلعت العطور عطرت ملابسي ، خاف اشوف امين هناك ويكعد
يخبصني واني مالي خلك محاضرات

وصلت للكصاب ، نزلت ومثل ما توقعت لكيت امين موجود ومنغمس بالشغل حتى ما انتبهلي

وكفت كباله ، حاجاني وهو مدنك يسلفن الطلب

امين : تفضل اخي

حليم : هاا ولك شو بعدك هنا الشفت مالتك مو خلص

رفع راسه عليه وابتسم

امين : هههه بقالي نص ساعة واطلع ، شعدك هنا اليوم

حليم : الحجية تريد لحم بعظم واجيت اجيبلها

امين : تجيبلها بالقاط

حليم : كلت اتأنق الك

امين : ههههه متقصر

حليم : شبيك شو احسك ضايج حتى ضحكك كلاوات

امين : لا مابيه شي بس تعبان شويه ، المهم شكد تريد اللحم ؟

حليم : الله يساعدك ، خليلي كيلو بلا زحمه عليك

امين : اي تدلل

حليم : خلالي ووكف يغلف ويحاجيني

امين : طمني شلون صارت ايدك

حليم : لا الحمدلله رجعت مثل اول واحسن

امين : الحمدلله ، هاك

حليم : شنو هاك كول تفضل

امين : دنجب واخذه وروح العالم وراك تنتظر

حليم : ضحكت واخذت الكيس من ايده وطلعت راجع للبيت

وصلت للبيت ودخلت للمطبخ لكيت وحدة من العاملات واكفه تمسح الكاونتر

شمرت اللحم على الميز وحاجيتها ، وينج هذا اللحم خلي بالفريز مو تعوفي بره وينعدم

سجى : صار

حليم : صعدت فوك ودخلت لغرفتي ، نزعت سترتي ورباطتي شمرت روحي على الجرباية ونمت

________________________________

ديمة : صارت الساعة بالـ2 وامين لسه ما رجع ، ضليت الوب هذا وين صار انوب ادك عليه ميرد

طبعًا اني وامين حيل علاقتنا توترت بعد الموقف الصار عندي بيت جدي ، بيومها رجعنا للبيت وامين ما علق على الموضوع بحرف واحد غير انه ميريد يسمع اي شي بخصوص بيت جدي بعد

ولليوم هو كالب وجهه ودومه ضايج صحيح يحاول ميبين وتصرفاته عاديه ويايه بس احس اكو توتر صار بيناتنا

اباوعله دخل للغرفة

لزمت كلبي وكمت ، وين جنت لسه كلبي ضل يمك والله وخالة سألتني وكتلها طالع ويه جماعته حتى لتضل قلقه عليك

امين : ونامت لو بعدها كاعدة ؟

ديمة : لا نامت من زمان ، باوعت لكمام قميصة منكعه
ما كتلي وين جنت

امين : بالشغل وين يعني

ديمة : ليش انت المسلخ التشتغل بي لسه يفتح

امين : لا

ديمة : لعد وين جنت ولبش اكمامك هيج كلها مي

امين : جنت اشتغل ويه واحد صديقي

ديمة : شتشتغل ؟

امين : اغسل مواعين ارتاحيتي

ديمة : اباوعله عافني وراح نزع قميصه وباوعلي

امين : هاا نسيت انتِ تلعب نفسج اذا ابدل هنا ، اسف نسيت

خلي اروح اسبح لتتوسخ الغرفة

ديمة : حتى ما انطاني مجال اعلق راح للحمام سبح واجه ينشف براسه

اكدر افتهم شنو سالفه غسل المواعين هاي

امين : صديقي يشتغل كابتن بمطعم وطلبت منه يحاجيلي مدير المطعم حتى اشتغل ويا وشرحله ظروفي

والمدير ما قصر وكله خلي يجي وره شغله يدخل للمطبخ من الباب الخارجي ويساعد الشباب بغسل المواعين بالشفت الليلي واني وافقت

ديمة : ليش انت مو عندك شغل ؟

امين : انتِ مو تحسيني مقصر وياج واكو هواي احتياجات ما جاي اكدر اوفرها الج

خلص اني راح اشتغل شغل اضافي وشيجيني من هذا الشغل اجمله على الميه الراح انطيها الج كل شهر حتى تصرفين براحتج

زين هيج ؟ يله تصبحين على خير

ديمة : بس امين اا

امين : كافي ديمة رحمة لذاك الابو الطيب اني تعبان واريد ارتاح عوفيني انام على راحتي حبيبتي انتِ

ديمة : اباوعله تغطى وانطاني ظهره ، زين امين انت ما تعشيت

امين : اكلت فلافل

ديمة : اي بالعافية

امين : الله يعافيج

ديمة : اجيت تمددت بصفه وتغطيت ، حاولت انام وما كدرت ضليت اتكلب وحتى هو حس عليه لان اسمعه يتنهد

شويه وشفته اندار عليه

امين : شبيج ديمة صارلج ساعة تحوصين

ديمة : مابيه شي ، انداريت منطيته ظهري

حسيت بي يتقرب يحضني من وره ، تنهدت من دنك باسني بركبتي

امين : احجيلي شنو المضوجج

ديمة : انكلبت وصرت بوجهه ، لزم خدي وكام يمسح عليه

امين : لتزعلين مني بسبب اسلوبي اني هالفترة شويه تعبان واعصابي والله ما جاي اكدر اسيطر عليها

ديمة : بالعكس اني الاحسك زعلان مني

امين : ما زعلان منج زعلان من الموقف الصار عد بيت جدج

صدكيني اني لوما اعرف بيت جدج شنو طينتهم جان من البداية اني الباردت ورحت حجيت

عبالج اني مكيف بهاي المرمطه بس شسوي عندي اضل هيج متعوب ولا اطخ راسي لاحد واقبل الاهانة لنفسي ومع هذا ما كسرت بخاطرج واخذتج لبيت جدج

وانتِ بعينج شفتي الرد من عمج شنو وحتى تكونين على علم باقي عمامج وولدهم ردهم جان راح يكون نفس رد عمج فاضل بالضبط

ديمة : زين امين انت ليش متحجي ويه عمو يحيى بلكت يشغلك ويا بالشركة

امين : قبل لا احجي من البداية اول ما تعرفت عليه وصار بيناتنا كلام ، اثناء الحديث بيني وبينه الولد شكالي وكال صاير عدهم فائض بالموظفين وابو
شغل اثنين عرف من جماعته

فشلون ترديني ارجع اكله شغلني وياكم ، واذا انتِ خايفه من المستقبل

فاطمئني اني كاعد اشتغل باديه ورجليه في سبيل ما اقصر عليكم

واي شي انتِ تحتاجي ، من عيوني الاثنين اجيبه الج واني الممنون هم

بس اصبري عليه شويه

ديمة : ما عجبني كلامه كالعادة وعود واعذار ، هاهي امين الي تشوفه مناسب سوي

اباوعله ابتسم و سحب وجهي عليه وباسني من شفايفي ، ضل يبوسني وايده محاوطه خصري بقوة حتى ما اكدر اتحرك

ونيت بألم من جرح شفايفي ودفعته ، كعدت خاله ايدي على حلكي ، اباوع لصابعي صار بيهن شويه دم
من شفايفي

باوعتله ، صدك بله جذب تحجي هو هيج الواحد يبوس مردت شفايفي مرد

باوع لروحك شسويت جرحت شفايفي ، حباب انوب على كيفك من تبوسني مو هيج شوهت حلكي وخلينه ينزف

امين : شو اشوف

ديمة : مد ايده على شفايفي ، نترت ايده عوفهن لتلزمهن متشوفهن كامن ينزفن من وراك

كمت من يمه طلعت من الغرفة غسلت حلكي وتمضمضت ورجعت دخلت رطبت شفايفي واجيت نمت يمه

راد يحجي واني قاطعته ، امين فدوة نام انت وراك دوام باجر ، استغل الوطني ونام احسن

تصبح على خير ، انطيته ظهري وغفيت

________________________________

زبيدة : بيت جدي تاخرو والكل ضل منتظرهم لحد ما اجوي

تحمدنالهم بالسلامة وعفناهم يرتاحون والي استغربته عيون الكل جانت على هارون طول ما جان جدي كاعد ومنتظري يحجي لو يفتح الموضوع

ومثل ما توقعته غلس وما نطق بحرف واحد سوه الوضع طبيعي كلش وضل كاعد لمن صعدو بيت جدي واهله ديرتاحون ياله هو صعد

واني اخذت موبايلي وطلعت اتصلت على معين ، طبعًا حبيبي حيل فرحان لان عمليته نجحت واني داخابره كل يوم حتى لو خمس دقايق اطمئن عليه ياله اكدر اكمل يومي

اتصلت عليه وهو شويه ورد عليه لان عنده صبح هسه فاتعمد اني ادك بالليل حتى ليكون تعبان او نايم

معين : الوو

زبيدة : الووو هاا حبيبي شلونك

معين : فتحتي الكاميرا ولج مشتاقتلج ميفيدني الصوت

زبيدة : كعدت عدل فتحت الكاميرا وهو هم فتحها
بس شفته دمعت عيوني

هاي اول مرة احاجي مكالمة فيديو من سافر لليوم
حبيبي شكد مشتاقه اله

هااا حبيبي شلونك ، جاوبني والغصه مبينه بصوته

معين : حبيبتي زبد مشتاقلج اني

زبيدة : مسحت دموعي وابتسمت امشيي يا زبد هاي المشتاقلها وانت كاعد بنص الامريكيات

معين : هههههه لا والله ولج اني بيا حال اصلاً بالي مو يمهن

زبيدة : ادري حبيبي اشاقه وياك ، طمني شلونك ، شنو اخابرك بالي يمك والله

معين : لحظة زبد اوكفي

زبيدة : اباوعله دار الكاميرا وسحب الغطة عن رجليه وصاح لعيسى

معين : تعال عيسى دغدغ اصبعي الصغير

عيسى : طاحظ كبرتك اي والله

معين : دتعال شكد تلغي

زبيدة : اباوع لعيسى اجه دغدغ معين من اصبعه الصغير ومعين ضحك

معين : شوفي زبد شوفي اليوم جسمي كزبر يعني جاي احس

زبيدة : صدك والله

معين : والله زبد والله ، صحيح الاحساس مو قوي مجرد شي خافت بس جاي احس والدكتور كلي هذا مؤشر زين

وان شاء الله مع المراجعة راح اكدر ارجع امشي

زبيدة : ان شاء الله يارب ان شاء الله هيج واشوف طولك الحلو كبالي

معين : ان شاء الله ووعد بس امشي على رجليه اله اشيلج وافرفج

زبيدة : رفعت راسي ومسحت دموعي ، راح تمشي والله واله اخليك تفرني ساعة

معين : ههههه ساعة ثنين عشرة ميخالف بس خلي امشي

زبيدة : تمشي ان شاء الله تمشي اني عندي ثقة بالله ومتأكدة ما راح يكسر بخاطري وخاطرك

معين : حاشاه يكسر بخاطر عبد من عبادة ، سولفيلي انتِ شلونج رجلج شلونه البارحة نسيت اسألج عنه

زبيدة : لا الحمدلله زين

معين : عسا دوم

زبيدة : حبيبي انت يله اخذ راحتك اني اروح وباجر هم اخابرك

معين : تمام حبيبتي تصبحين على خير

زبيدة : تلاكي الخير يگلبي ، سديت الخط وكمت دخلت جوه

اجيت اصعد فوك وسمعت صوت عمتي بيداء تصيحني ، انداريت عليها نعم ؟

بيداء : تعاي اريدج

زبيدة : نزلت ورحت يمها ، خير ؟

بيداء : هارون ما حجه لجدج شي مو

زبيدة : هه ليش تتوقعين لو هارون حاجي لجدي شي جنتِ راح تكونين واكفه هنا لا وماخذه راحتج هم

بيداء : تأدبي من تحجين وياي

زبيدة : انتِ الي استحي على وجهج بعد سوايه ولدج السزز الماعرفتي تربيهم ويه هارون

بيداء : هسه صار هارون زين مو جان كُخة

زبيدة : تخيلي إني رغم اشوفه كخة بس جان عندي استعداد اشرب من دمكم علموده ، لعد لوما اشوفه كخه شجنت راح اسوي بيكم

بيداء : شكد خسيسة ولج توكفين ويه ابن هيام على حساب عماتج خوات ابوج الي من دمج ولحمج

زبيدة : وابن هيام رجلي ، يعني زوجي يعني ماي هازبند يعني السول واللونك ( الروح والرية *الرئة)

بيش كيلو انتِ وغيرج ، وخاف عبالج اني ما ادري انتِ وغفران وام الماي هازبند شسويتن بأمي

بس بسيطة ، وحق السماني زبيدة لادفعجن ثمن كل دمعة وكل كتله حصلتها امي من وراجن

بيداء : اني مالي علاقة وكلشي ماسويت لامج لتضلين تذبين تهايم عليه

زبيدة : سودة بوجهي اوكفي خلي اتفل بزيكي ، فقيرة انتِ والبزون ياكل عشاج من عمت عيني عليج كون

بيداء : اكلي تبن واحجي عدل ادبسز

زبيدة : اني جاي احجي عدل بس انتِ السمعج اعوج

عفتها ومشيت صاعدة فوك ، فتحت باب الغرفة ودخلت ما لكيت هارون

هذا الرجال وين يروح جنه الرجل الخفي على ساعة يختفي وعلى ساعة يظهر

نزعت العباية ورحت اخذت دشداشة قصيرة ، اموت على الدشاديش القصيرة هيج عشق عشق

اخذتها ودخلت للحمام ، من اخر موقف صار كمت اخاف ابدل خارج الحمام

بدلت وطلعت لكيت هارون بوجهي ، لزمت كلبي بسم الله

هارون عليك الله انوب سوي صوت من تطب للغرفة تره حيصير بيه سكته من وراك

هارون : شلون يعني اسوي صوت ؟

زبيدة : تحمحم مثلاً حتى احس عليك

هارون : ماكو اشكال شويه وخري

زبيدة : سويتله مجال يدخل للحمام ورحت تمددت على القنفه واخذت الريمونت ، راح يبدي المسلسل الي متابعته اسمه دلع بنات

خليته على القناة وكعدت انتظرة يبدي لان هسه وقته
طبعًا اني كلش احب المسلسلات المصرية واتابعهن

اباوع لهارون طلع وتوجه للثلاجة طلع خبز لبناني ومكدوس سواله لفه واجه كعد على القنفه الثانية وبايدة موبايله

خرب يومه شكد ياكل مكدوس ، ادري يتنسى خوما يتنسى كل يوم حاطة وكاعد

رجعت عيوني من بدت اغنية المسلسل ، خليت الكوشه وره ظهري وضليت اسمع الاغنية

حلوة اغنية المسلسل

كمت ادندن وياها وادك باطراف اصابعي على الطبلة

اللي تاخدك من أسى الدنيا بحنان
واللي ضحكتها بتديك الامان
هى دى اللي تدارى برموشك عليها
هى دى اللي تشيلها فوق راسك كمان
دلع البنوتة دلع قولها اللي في قلبك طلع
وارمي هم الدنيا وسلم
دى اللي بتحنن وتطبطب
واللي احلى واجمل واقرب
لو تسيب يوم حتة تظلم
دلع البنوته دلع

كملت الاغنية واني مندمجة بيها واردد دلع البنوته دلع

حرفيًا ابد مجنت منتبهه وداتصرف بكل تلقائية ، شويه ودرت وجهي لكيت هارون موكف اكل ويباوعلي

بلعت ريكي ووكفت اصابعي عن الطبلة ، احم شبيك تباوعلي محتاج شي

هارون : مو يمج

زبيدة : اممم هزيت راسي ورجعت اكمل المسلسل

انوب وترني كلما اندار عليه الكا يباوعلي بطرف عينه ومن تصير عيوني بعيونه كبل يدور وجهه

ما طلع مسلسل عليه والله حتى كلشي ما افتهمت من الحلقة

ساعة كاملة اني اباوعله وهو يندار ويرجع يباوعلي وارجع اني اندار عليه و هيج لمن صار حول بعيوني

_________________________________

دنيا : كاعدة اكلب بموبايلي وطب تيم يركض

اباوعله صعد على الجرباية وذب روحه عليه ، كمشته بسرعة وحضنته

اني جم مرة كتلك لتكمز هالكمزة وتشمر روحك لو متعور هسه يا حبيبي

تيم : اشش ماما ثكتي راح يجي بابي يعڤني

دنيا : صفنت بوجهه ورجفت شفايفي شـ شكلك حبيبي

ما افتهم عليه ، تميم حبيبي منو معلمك تكول ماما

تيم : بيبي

دنيا : شو ارجع كولها

تيم : ماما

دنيا : هههههه منو ماما

تيم : اتي

دنيا : يمه صدقة بهالحلك شحلاتها بحلكك يبعد روحي

حضنته ودمعت عيوني ، حيل اثرت بيه الكلمة ، صحت بيه شعور مشتاقتله من سنين

ضليت ابوس بي ، كول ماما حبيبي كولها هواي اريد اسمعها بعد

تيم : ثبيج ننه

دنيا : لتكول ننه اريدك تكول ماما بعد فدوة تيومي صيحلي ماما يله كولها

تيم : ماما ننه

دنيا : هههههه يييييمه افيييش ابوس هالحلك لج يوووم ابوسه

تعال اللعبك اليوم اكلك اكل على هالحجاية ، كمت نزلت من الجرباية وجريته نزلته من الجرباية وفريته من الغرفة وهو يضحك

وكلما اصعده لفوك يضل يصرخ ويضحك سوه ، نزلته وشبكته حيل يمه شكد احبك الف الحمدلله الرزقني بحياة جديدة وياك ياروحي انت

تيم : اني هم احبج عبيبتي

دنيا : شكد تحبني

تيم : بكد البيت

دنيا : ههههه فدوة لهاللسان ، ضليت العبة لحد ما دخل يوسف وتيم صرخ مخترع ولبد بظهري

يوسف : وينه هذا السربوت وينه اليوم اله اعضه

دنيا : تعض منو ما سمعت !!

يوسف : هاا شو وكفتيلي سجينة خاصرة

دنيا : تخصرتله ، اسمع عيني اذا تطخ تيم لو تعضه تنزل تنام يم اهلك

اباوع لتيم مد راسه من ورايه

تيم : اييي يم اهلك

يوسف : هاا اشو صارت احزاب

دنيا : اي عيني لعد شعبالك اني وابني احزاب من زمان

يوسف : انتِ تعرفين ابنج المصون شمسوي

دنيا : لو شما يسوي يوسف جديات عليك ابد لتعضه متشوف خدوده من وره عمامه شصاير بيهن

يوسف : لج ابن علي الصغير امي حطته بحضني وكامت مدري شتجيب لابويه واني عود صحت للعينتين حتى يشوفه

تالي كعد يمه وصفكلج الطفل راشدي خلا يفرفح من البجي

دنيا : انداريت على تيم وكعدت بمستوى ، حاجيته بتانيب ليش هيج حبيبي ضربت الدادا مو خطية

طفل صغير ويحبك هسه خطية كام يبجي وصارت عنده اوا

تيم : ماحبه ولي

دنيا : ليش حبيبي متحبه

تيم : هدا بابي يهت الدادا بحڤنه ( يحط الدادا بحضنه ) وبعد ميحبني

دنيا : من حجه تيم باوعت ليوسف ولأول مرة ننتبه لتيم كام يفتهم ويغار انوب من سولفلنا كبل كام يبجي

اجه يوسف شاله وكام يبوس بي

يوسف : حبيبي انت لتبجي والله بعد ما اشيله خلص
بعد روحي لتبجي يبعد ابوك تنكسر ايدي كون يمه هذا المناشغ كله علمودي

دنيا : اباوعله شابك يوسف ويبجي من كل وكلبه

يمه هاي اول مرة اشوف تيم هيج ، والله كسر گلبي وبيومها سوده عليه صخن واني ويوسف اخذنا للمستشفى وخليناله كانوله وحماله ياله انخفضت حرارته ورجعنا بي

واني الطريق كله ابجي عليه ويوسف حار بيه وبي ، وصلنا للبيت لكينا بيت عمو كاعدين خطية

يحيى : هاا بشر ان شاء الله نزلت حرارته

يوسف : اي الحمدلله نزلت

جياد : الف الحمدلله والله بالي ضل يمه حتى ماكدرت انام لا اني ولا سهير

سهير : زين هو شرفع حرارته

يوسف : يغار

جياد : صدك تحجي

دنيا : اي والله سوده عليه لان شاف يوسف شايل ابن علي تخبل وكضه الليل علينا شابك يوسف وبس يبجي تالي صخن

رميم : ليش هو مو صوجكم وصوج دلالكم خبلتو الطفل مكابلين وكاعدين جنكم مخابيل

سهير : خالة الطفل بهيج عمر يبدي يفتهم وطبيعي يغار على اهله خصوصاً اذا جان الاهتمام اكثر شي متمركز عليه

من يحس انُ اي احد ممكن يشاركه هذا الاهتمام ينهار ويخاف لا اهله يحبون أحد اكثر منه ينهار وهو طفل طبيعي جهازة المناعي ينخفض اذا انقهر وبسرعة يتمرض

لتخافون عليه اخذو نيمو هسه وباجر ان شاء الله انطوني يا اني اعرف شلون اتصرف ويا

يوسف : رحم الله والديج خوية متقصرين ، يله دنيا

دنيا : صعدنا فوك وبيومها نيمنا يمنه ، ثاني يوم الصبح كعدنا تريكنا ونزلنا ودينا تيم يم سهير وطلعنا للدوام

ومن رجعنا لكينا كاعد يلعب بالمكعبات ويه سهير واولاد عمامه واصلا ما منتبه النا

سهير : الله شوفو اجوي اهلكم كومو ركض يله سلمو على جدو

دنيا : اباوع لتيم ركض ويه ولد عمامه سلم على عمو وانوب اجوي سلمو على عمامهم وتقدمو النه

سهير : يله تيومي روح بوس بابا وماما مثل اولاد عمامك مو بست ابوهم انت بسرررعة يله ليسبقوك ويفوزون قبلك

دنيا : شفته ركض وياهم دخل اول واحد بحضن يوسف واجوي الولد بوسونا

ابتعدنا وتيم بوسنا ورجع يلعب وياهم ، ابتسمت حبيبي شلون مكيف

سهير : هاا شلونكم

دنيا : الحمدلله ، شلونه تيومي

سهير : لتخافين يتأقلم العافية بالتداريج ، يله روحي بدلي ونزلي حتى نتغده بسرعة خاله تريدنا

دنيا : صعدنا فوك بسرعة سبحنا وبدلنا ونزلنا

اباوع لسهير شايله ابن علي وخالته بحضن تيم

سهير : الله شوف تيومي هذا الددادا شلون حلو مثلك

تيم : حباب ؟

سهير : اي كلش حباب ويحبك يكول تيومي يحبني واني احبه

يله بوسه وكله شكراً

دنيا : بوسه تيم من خده وكله شكراً انوب شافني وابتسم

سهير : يله تيومي صيح لماما تجي تبوس الددا

تيم : لا ولي

سهير : ليش خطية انت مو بست عمو علي وهو قبل ليش انت متقبل ماما تبوسه خطية تره يزعل وهو يحبك يكول احب تيم بكد البيت

تيم : تعاي ماما ننه بوسي ددا

دنيا : تقربت بست الطفل واخذت ايد تيم بستها من فوك الكانوله ، سوده عليه بيه ولا بيك حبيبي

اخذت سهير الطفل لاهله واني شلت تيم حضنته وتنهدت

تيم : تعبيني عبيبتي

دنيا : بسته اموت عليك حبيبي اني وبابا هيج نموت عليك اكثر واحد بالدنيا نحبه انت

ضحك وضم روحه بحضني ، صار الغده وكعدنا نتغده

كملنا وكعدنا بغرفة خالة ، هاا خالة شنو جنتِ رايده منه

رميم : مو حليم البارحة گال يريد يتزوج

جمانة : اي وكلج اريد على ذوقج مو

رميم : اي ولهالسبب اني حاطة وحدة ببالي وكلت اخذ رأيجن

سهير : منو ببالج خالة

ابريز : من هسه خالة خاف حاطه ببالج اختي تره اهلي مينطوها

رميم : واني مسودنه اخذ اختج لابني فلگه الگمر
هذا

ابريز : ليش خالة شبيها اختي

رميم : مابيها شي بس مو ذوقي ولا ذوقه والا هي اربعة وعشرين ساعة هنا لو عاجبته جان گلي عليها

ابريز : شقصدج خالة يعني اختي لزگه

سهير : صلِ على محمد ابريز شنو السالفة تره والله خالة متقصد لتضوجين حبيبتي

ابريز : لا عيني عليمن اضوج تعلمت على سوالفها

رميم : لا اله الا الله المهم عيوني

اني حاطة ببالي وحدة بس شنو ولجن تخبل تخبل من اول ما شفتها واني حاطه عيني عليها واريدها
شنو ادب شنو جمال شنو شهادة كاملة والكامل الله

وهم اهلها خوش ناس واوادم ينحطون على الجرح تكول مرهم ويطيب

دنيا : الله الله شنو هالمديح الظاهر البنية كلش عاجبتج

رميم : كلش كلش متخبلة عليها

جمانة : هههههه حمستينا منيه هاي المخبلتج

رميم : بصائر اخت امين صديق حليم

_____________________________________

زبيدة : طفيت القوري وشلت الجاي وكمت اصب بالاستكانات

كملت وشلت الصينية وطلعت ، وزعت عليهم وكعدت يم هارون وبدينه نتريك

النوح : طمني هارون شلونها الاوضاع بغيابي

هارون : زينه

النوح : زينه لو زييييينه

هارون : لا زينه الاولى

النوح : خوش الحمدلله زين وسالفة الغرفة الخاصة الي بالاسطبل هاي شنو قصتها

هارون : مثل ما بلغوك الحرس تماس كهربائي

النوح : عاد زين لحكتو وما احتركت الغرفة

هارون : ومنو گال ما احتركت ، لا احتركت والخيل كله وديته لاسطبل المزرعة منا لمن نصلح الكهربائيات

النوح : شلون محتركة اني شفتها كلشي مابيها الا انت مرممها

هارون : للتصحيح حفيدتك مو اني

النوح : ياهي منهن

زبيدة : اكلت وجاوبته ، حضرتي

النوح : انتِ ؟

زبيدة : هزيت راسي ايون ( * اي)

النوح : وشلون سويتيها

زبيدة : شرحتله السويته بالفصيل

النوح : ولج انتِ والله كفو

زبيدة : هستوك تدري

حمزية : كلش متواضعه بعد روحي طالعه على جدج

النوح : هاا حجية شو بدينا بالبسامير

حمزية : هههههه زين تدري بروحك

هارون : سفرة دايمة ، من رخصتكم

زبيدة : اباوع لبيبتي تأشرلي ، شبيج بيبي متحجين احد كلج اني افهم لغة الاشارة

حمزية : امشي وصلي رجلج يغبرة شبيج

زبيدة : وليش اوصله شنو اغو لو ميندل

حمزية : كومي ولج كومي ، سلمي عليه ووصلي وطبي هي هاي الاصول

النوح : سمعي كلام بيبتج يبنية

زبيدة : اوووف ، كمت من مكاني وطلعت وره هارون ، صحت اوكفففف يمعود

اندار عليه مقطب حواجبه

هارون : شبيج ؟

زبيدة : وصلت يمه ، بيبتك تريدني اودعك واوصلك للباب اليكول رايح تحرر القدس

هارون : وهي شعليها

زبيدة : مدريني ، مشيت ويا بصمت

اكول هارون عندي سؤال

هارون : عفية اسأله متخلص

زبيدة : هاهي غلس ماكو شي

هارون : سألي اسمعج

زبيدة : ما اريد اسأل ، اباوعله وكف واني هم وكفت ويا

ليش وكفت ؟

هارون : سألي

زبيدة : ما اريـ..

رفعت عيوني عليه من تقرب عليه صارت عيني بعينه
عزه العزاك هارون على هالرموش

تفلت على روحي بداخلي هسه انتِ بيا حال صدك جذب

شبيك هارون تره وراك دوام وتأخرت

جاوبني بصوت خافت

هارون : سأليني زبيدة

زبيدة : عززه هذا اسمي ليش طالع غريب هيج بصوته

احم باوع هو سؤال ماله داعي يعني عود ردت اسألك عماتي وولدهن واخوتك ليش هيج ناس حاقدة على ناس

رجع يمشي واني امشي ويا

هارون : جاوبي على سوالج عبارة عن معادلة راح اشرحها الج

عمتج بيداء تكره عمتج بدرية لان جدي مسلم صاحب ابن بدرية الاستيراد كله مالت السيارات

وعمتج بدرية تكره امي لان جدي مسلمني كلشي بالشغل وحسب كلامهم اني الاقرب اله من بين كل الشباب

واخواني يكرهوني لان امي تحبني اكثر واحد بيهم ودائمًا مفضلتني عليهم ومن الصغر

وامي تكره ابوج لان ماقبل ياخذ اختها

عمج فاضل يكره ابويه وعمي فؤاد لان الله انطاهم ولد وما انطا وبالتالي كرهني اني اول واحد لان الشغل بأيدي

وتستمر هالمعادلة وناس تكره ناس

زبيدة : اباوعله طول ما يمشي يحرك ايده على الورد ، انتبهتله شلع وردة حمرة وصم ايده عليها

هارون : فتحي ايدج

زبيدة : فتحت ايدي وشفته خله الوردة بيها

شنو هاي ؟

هارون : وردة لكيتها بجيبي حرامات تنشمر بالكاع اخذيها

زبيدة : بس اني شفتك شلعتها

هارون : متوهمه

اي المهم افتهمتي المعادلة لو لا

زبيدة : وصلت ويا لباب الخروج وباوعتله ، افتهمتها بس من بين كل الذكرتهم ماذكرت نفسك

انت تكره منو

هارون : اكرهج الج

زبيدة : اني هم ما احبك

هارون : لتحبيني

زبيدة : اي

هارون : اي

يله طبي جوه راح اطلع اني

زبيدة : دخلت جوه وبده الروتين القاتل مالتي

ساعة اخابر خواتي وساعة انزل اساعد بيبتي تالي من الملل صعدت انظف الغرفة

وسويتها صدك وطحت للغرفة تنظيف حتى الهدوم طلعتها ورجعت صفطتها مرة ثانية

كملتهن ورحت اكنس بالغرفة الصايرة زبالة من الوصخ المدلل يتعمد يمشي ويهوس واني اعزل ورا
جنه زعطوط يشمر هنا وهناك

واني اكعد انظف ورا والله لوما اتعقد اني من الهوسة والوسخ جان غلست بس ما اكدر

كملت ورحت سحبت الدرج قريب على البنكة حتى امسح البنكه ، صعدت ولزمت الوصله دانظفها

جنت ماخذه راحتي بالغرفة لابسه بنطرون جينيز قصير وتيشيرت علاكات لونه احمر ورافعة شعري حتى اخذ راحتي بالتنظيف وكمامتي على وجهي حتى ما اتحسس من التراب

دانظف ومندمجه بس وكفت من حسيت اكو عيون تباوعلي ، نزلت راسي لكيته واكف بالباب مالت الغرفة ويباوعلي بنظرات غريبة وعيونه متركزة على رجلية

رفعت ايدي واشرتله ، شكو ؟

جاوبوني بدون اهتمام حتى يتلافه سؤالي

هارون : ليش لابسة كمامه ؟

زبيدة : باوعتله صفح وجاوبته عندي تحسس من التراب

هارون : الحساسية فهمناها زين وهذا لبسج شنو معنا ؟

زبيدة : ذبيت الوصلة ونزلت وكفت كباله ، شبي لبسي ؟

هارون : مقتنعه بي انتِ سيقانج ززنودج كلهن طالعات

زبيدة : ليش سيقاني وزنودي اثرت عليك بشي ؟

هارون : لا طبعًا

زبيدة : طيب تحملت حرام من شفتني بهذا المنظر انت ؟

هارون : لا

زبيدة : لعد ليش تعلق وبعدين اني هذا لبسي من زمان وتره مابي شي بنطرون وتوب

هارون : الي لابسته اسمه شورت جينز مو بنطرون هذا

زبيدة : وإن !! ضميت اديه ، شبيك هارون اني مو البس دشداشة قصيرة كدامك شو ولا مرة سمعتك علقت شنو الي تغير اليوم

هارون : ما تغير شي على راحتج

زبيدة : رجعت اخذت الوصله وصعدت على الدرج

هارون : ديربالج لتوكعين

زبيدة : ما اوكع ، اباوعله اجه وكف يمي ولزم الدرج

هارون : كملي فضيني اريد اروح ابدل واسبح

زبيدة : كتلك ما اوكع روح وعوفني انظف براحتي

هارون : لا خاف توكعين

زبيدة : امسح بالمروحة واحاجي ومن شوكت يمه انت تخاف عليه

هارون : ما اخاف عليج بس اخاف لا توكعين وابتلي بيج

زبيدة : والله عرفتك

ضليت انظف وهو واكف ورايه ، شويه وحسيته بايده تلزم فخذي

فزيت وانداريت مخنزره عليه وبدون شعور دفرته برجلي على وجهه

اباوعله ارتد لوره و دنك لازم وجهه ، نزلت بسرعة من شفت ايده تنترس دم

عزه بعيني يمه ، انوب شفته اشرلي على ايده انتبهتله لازم فراشة بايدة الثانية ، افتهمت ليش لزمني

عزه العزاج زبيدة عزه العزاج اليوم شحيسوي بيج

ركضتله اسفه اسفه والله عبالي دتتحرش بيه والله اسفه

جريت ايده لكيت خشمه وحلكه يصبن دم حتى قميصة تدمر دم صخام الصخمني

اخذت بسرعة كلينس وخليته على خشمة ومسحت حلكه

اسفه هارون والنبي ما ادري

هارون : ما صار شي

زبيدة : شو اشوف وخر ، وخرت الدم عن خشمه ومسحت حلكه بخفه

جؤ جؤ ، شو عزه هاي شفايفك تعورن ، مسحتهن بالكلينسه وتلمستهن داشوف الدم توقف لو لا

لا الحمدلله عرضية ان شاء الله ، باوعتله لكيته صافن بوجهي

هلاووو راح انكبس اليوم ما دام ديباوعلي هيج معناها اكو شي

رجعت شويه واجيت ابتعد قبل ليلكفني ويطيح حظي

ابتعدت شويه وما احس بي غير جرني من خصري بقوة وقيدني بأيده ، فزيت من مكاني لان كد ما جرني حيل انضربت بصدره

***************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة : حبايب الي يشوف الرواية طويلة ، موحلوة ، داماطل بيها ، متعجبه ، متناسب ذوقه الرفيع خلي يتفضل ويحذفها ويخلصني بدل لا يضل يعلق تعليقات تافهه حشا الزينين واعتذر على ذكر هالمفردة بس السالفة مصخت وطلعت من ماعونها واني بعد ما اكدر اسكت ❤️