الموت الحي الفصل الثالث وستون 63 - بقلم براء الموسوي

مرحبا حبايبي العسل شلونكم ❤️❤️

••••••••••••••••••••••••••••••••••

قال رسول الله ( صل الله عليه وعلى آله وسلم)

" إذا كُنتُم ثَلاثْة فلا يَتناجى إثنان دونَ صاحبهما فإن ذَلك يُحزنه "

صدقَ رسول الله
(صل الله عليه وعلى آله وصحبه أجمعين)

••••••••••••••••••••••••••••••••••

#الموت الحي
#للكاتبة براء الموسوي

زبيدة : شو اشوف وخر ، وخرت الدم عن خشمه ومسحت حلكه بخفه

جؤ جؤ ، شو عزه هاي شفايفك تعورن ، مسحتهن بالكلينسه وتلمستهن داشوف الدم توقف لو لا

لا الحمدلله عرضية ان شاء الله ، باوعتله لكيته صافن بوجهي

هلاووو راح انكبس اليوم ما دام ديباوعلي هيج معناها اكو شي

رجعت شويه واجيت ابتعد قبل ليلكفني ويطيح حظي

ابتعدت شويه وما احس بي غير جرني من خصري بقوة وقيدني بأيده ، فزيت من مكاني لان كد ما جرني حيل انضربت بصدره

اباوعله طير الفراشة ولزم حنجي بخفه ، شبيك هارون شنو هاي التصرفات

عطت بألم كافي هارون اصابعك حفرت خصري تره اذيتني والله

حسيته يشد بايده اكثر عليه ويقرب وجهه عليه ولان جنت شايله راسي واباوعله صار كلش قريب عليه لدرجة اكدر استنشق عطرة

ما انكر انُ هذا القرب ربكني ، هاي اول مرة بحياتي اكون قريبة لرجُل لهالدرجة

هارون : سؤال واحد عندي جاوبيني عليه واعوفج

لو واحد غيري ماد ايده عليج هيج جنتِ راح تسوين ويا نفس السويتي وياي

زبيدة : صدك تحجي مجتفني وحاصرني هالحصرة علمود تسألني هيج سؤال ؟

اباوعله رفع ايده ومسح على شفايفي بأطراف اصابعه

نترت ايده من وجهي ، هيييوووو شبيييك شو استهترت

هارون : جاوبيني

زبيدة : اكيد لا اي واحد يتجرأ ويمد ايده عليه ويتحرش بيه اكيد ما راح اسكتله

اني جسمي مقدس بالنسبة الي ومستحيل اقبل اخلي يتدنس من اي واحد حتى لو بوصف فما بالك اذا واحد فكر يتجاوز ويلزمني غير انعل والديه

وهسه احترم نفسك وعوفني لان صدك بديت اتنرفز من قربك هذا وما اريد اتجاوز عليك

حسيت بي يرخي ايده عني ، ابتعدت وتداركت نفسي بسرعة وباوعتله ، كلش نرفزني تصرفه

اسمع هارون تره تصرفك هذا ابد ما عجبني وايالك بعد تفكر تتمادة وياي هيج لو مهما صار

اني رغم كل السلبيات البيك بس ولا مرة اتلمست بيك انك دوني لو متحرش فلترجع تعيد هالشي حتى لا اغير نظرتي عنك

وبعدين شبيك اليوم اول تالي تتصرف وياي بهاي الطريقة شنو عود دتسويها وحدة بوحدة لان ضربتك كلت خلي ااذيها واغثها

هارون : بالعكس اصلاً حبيت تصرفج

زبيدة : عفواً !!

هارون : عجبتيني لان دافعتي عن نفسج لمجرد انج حسيتي إني جاي اتحرش بيج

تصرفج جان هو الصح ومن لزمتج قبل شويه فحتى اشوف ردة فعلج اذا احد تمادى وياج شراح تسوين لا اكثر

وبصراحة عجبتني ردة الفعل ، صارمة ، قوية ، عصبية ، ضد التمادي وهذا شي تنرفعلج القبعه عليه

زبيدة : صدك تحجي انت لو جاي تستهزء ؟

هارون : لا احجي صدك رغم إني من مديت ايدي على جسمج ما جنت ابد متقصد اتحرش بيج

بس حيل عجبني تصرفج من ما قبلتي على نفسج وشالتج الغيرة على جسمج لدرجة خلتج تتجرائين تضربيني بدون متخافين

ردة فعلج تجاه الموضوع تبين انتِ شكد تحبين نفسج ومقدستها ، عفية عليج خليج دائمًا هيج

زبيدة : بغض النظر عن نفسيرك اللطيف وثنائك الحلو تجاهي بس اتمنى متتصرف بعد بهاي الطريقة

اني مو بنت شارع ياهارون حتى تسويلي اختبارات دتشوفني اذا تعرضت لهيج موقف شنو ممكن اسوي

اي بنية شريفة وعدها غيرة على نفسها مستحيل تقبل بس ردات الفعل تختلف يمكن اني ما قبلت ودافعت عن نفسي بس اكو غيري يستحن او يخافن او مو جريئات فينجبرن يسكتن ويغلسن

فياريت متسوي هالتصرف بعد لانه مثير للاشمئزاز واني ما اريد ارجع اتعارك وياك ونرجع نعيد نفس المأسات من الصفر

هارون : ولا يهمج هالشي ما راح ينعاد مرة ثانية

زبيدة : اباوعله عافني ومشه بعد ما كمل كلامه

للامانة رغم ما عجبني تصرفة بس صفني الكلام السمعته منه

عجبه السويته !! زين اني ضربته وكلش عورته ومع هذا يكلي عجبني تصرفج لا ويثني عليه هم

الوحيد الجان يگلي انُ ردي العنيف هذا تجاة اي شخص يتحرش بيه صح عمو يحيى وهسه داسمعها من هارون

يربي هالكائن الغريب هذا منين طلعلي ، لا وحضرته ديسويلي اختبارات وشلون اختبارات عنده كلها احصرني واحصرك

اباوعله طلع ملابسه من الكنتور واندار عليه

هارون : اريد اطلب منج طلب

زبيدة : شتريد

هارون : ياريت بعد متلبسين هيج لبس بوجودي

زبيدة : عفوًا ؟

اباوعله تقرب وكف كبالي وباوع بعيوني

هارون : صحيح اني مالي حق اتدخل بطريقة لبسج هنا ،ممكن يكون هاللبس مريح بالنسبة الج

اما بالنسبة الي فما ارتاح من اشوفج كدامي هيج ، اني هيج مناظر تضوجني و شخصيًا ما اتقبلها

زبيدة : ليش يعني حضرتك تقنعني من جنت بـ***** ما جنت تشوف اتعس من هالمناظر

هارون : شفتيني هناك باوعت لوحدة منهن ؟ احتكيت بوحدة منهن ؟ نطقت بكلمة ويه اي مرة هناك ؟

الجواب لا

اما هنا اني اريد بغرفتي اخذ راحتي وطريقة لبسج توترني وتأذيني

مو سالفة إني اخاف انثار تجاهج او انجذبلج ، هذا الشي اخر همي في حال لو فكرتي بهذا الاحتمال

كل ما بالموضوع انُ هاللبس وجسمج الي مبين يضوجني واني صارحتج برأيي

وياريت تحترمين رغبتي وتحتشمين بلبسج على الاقل من اكون موجود وياج بنفس المكان

ومن اطلع عود اخذي كل راحتج وسوي اي شي يعجبج محد يتجرئ يكلج ليش لابسه هيج

زبيدة : ماشي

راح دخل للحمام واني رجعت كملت تنظيف ، انوب بطل واهسي يادوب كملت البنكة ونزلت

اخذت ملابس وكعدت انتظره يطلع حتى ادخل ورا ، من طلع دخلت بسرعة سبحت وطلعت ما لكيته بالغرفة

لبست حجاب فوك دشداشتي ونزلت جوه لكيت جدي وعمي عبدالله وصاحب وموسى كاعدين والنسوان كلهن بالمطبخ

دخلت للمطبخ لكيتهن يصبن ، طبعًا ببيت جدي الطبخ على بيبتي وهيام والصب علينا احنه

بيبتي متقبل العاملات لا يصبن ولا يطبخن بس ينظفن ويغسلن مواعين

رحت اساعدهم لكيتهم طابخين سبيناغ ، تفاجئت منين جبتو السبيناغ شنو كام ينزل بالصيف ؟

حمزية : لا حبيية مجمدي بالمجمدة واليوم الجماعة اشتهو فكلت خلي اسوي الهم

هيام : وين طاسة هارون افكار ، ترسيها لوبية تدرين بي يحب اللوبية هواي بالسبيناغ

خلصن صب التمن عيني اريد اطلع لهارون الحكاكة يحبها بعد گلبي

زبيدة : طبعًا انتبهت لهيام مهتمة بهارون بشكل مو طبيعي ومبينه تحبه كلش بس ليش هو حقير وياها ما اعرف

باوعت لبيبتي ، اكول بيبي عادي اصب واخذ لاهلي خالة وئام كلش تحب السبيناغ وتغصته الها ولدادا

حمزية : صدك تحجين ولج دركضي صبي وروحي وبعد لتسأليني ازعل عليج ، بيتج هذا يمه

زبيدة : ابتسمتلها ورحت اخذت جداري صغار عبيتهن تمن ومركة ، خليتهن بصينية وطلعت لبيتنه

وصلت لبيتنا دفعت باب البيت ودكيت باب الصالة انفتحتلي الباب

سلااام يا كيك تستقبلون ضيوف

وئام : هلا بعد روحي هلا ، تعاي طبي

زبيدة : بوستها بالباب وانطيتها الصينية ، هاك حبيب مابيه اطب غير وكت اجيجن

وئام : ولج شنو هذا

زبيدة : بوست دادا وجاوبتها ، اليوم بيت جدي مسوين سبيناغ واشتهيته الجن

وئام : عاشت ايدج بعد گلبي

زبيدة : وايدج يارب ، يله خلي اروح واجيجن العصر دزيتلهن بوسة ومشيت بسرعة لان حارة الدنيا

والساعة بـ2 الظهر يعني الشمس منورة وصامطه ابهات الشعب بحرها حتى اليلبس نعال ويطلع ينجوي

دامشي وشفت هارون واكف بالباب ، شافني واشرلي استعجل بالمشي

وصلت يمه ، هااا شبيك هارون

هارون : شعدج طالعة بهالظهر

زبيدة : رحت اودي اكل لاهلي

هارون : دطبي يله لتجيج ضربة شمس

زبيدة : طابه لتصيح وبعدين اني طلعت لاهلي انت شطلعك وراي

هارون : دطبي شكد تحجين

زبيدة : دخلت ويا لكيت الكل كاعدين وبس اني ويا بعدنا

كعدنا بنفس مكانه وبدينه ناكل ، كبالي عمو عبدالله انتبهت عليه كاعد يبتسملي ، اني هم ابتسمتله

اكلت من السبيناغ وصفنت استطعم الاكل ، اي اني من اريد استطعم شي اصفن حتى احس

هارون : شبيج ؟

زبيدة : همستله السبيناغ ، رد عليه بصوت ناصي

هارون : شبي ؟

زبيدة : مو بي نومي بصرة هواي والسبيناغ هم ممحموس زين ؟

هارون : اني هم هيج حسيت

لازم ينحمس ويه اللحم زين حتى يبين طعمة ويحتاج عظام حتى ياخذ المونه وهم النومي بصرة هواي

زبيدة : ايييي والله هستوني اجيت اكول نفس الكلته

هارون : اي عفية

زبيدة : ابتسمت وقدمت خاشوكتي منه وهو باوعلي باستفهام ، خليلي حكاكة شويه منك

الجماعة صبولك كل الي بالجدر وعافونه صافنين فخليني ابوك منك شويه حتى لتتسمم من ورايه

اباوعله هز راسه وشال ماعونه بدله ويه ماعوني

هارون : اكلي وياي

زبيدة : ابتسمت اوك شكراً

هارون : العفو

زبيدة : ضليت اكل ويا واستمع لنقاشات جدي وعمي عبدالله

عبدالله : صدك يابه نسيت اكلك حاتم راح يجي هو وعائلته للعراق بعد يومين

النوح : وحاتم شرجعه للعراق مو على اساس استقر بره وميريد يرجع بعد

عبدالله : مو تدري بابو صارله سنة متوفي واخوته يردون يقسمون الورث بيناتهم وخابرو حتى يرجع
يشوف شنو الاله

وهو خابرني حتى احجزله بفندق هو وعائلته

النوح : ليش بويه قلة غرف عدنه حتى تحجزله بفندق
اشو غرف الضيوف يمرح بيها الخيل ومجهزة من كلشي

عبدالله : والله يابه كتله بس هو اصر يكعد بفندق يكول ارتاح هناك اكثر بس اني اكدت عليه انُ اول ما يوصل للعراق غدا يمنا

النوح : اذا هيج على راحته وكل الهلا بي والحجية ان شاء الله متقصر بالواجب مو حجية

حمزية : لا ان شاء الله ماكو اي تقصير وهلا باليجي

زبيدة : اكول هارون منو هذا حاتم ؟

مارد عليه ، باوعتله لكيته يباوع لابو وعيونه تجدح من العصبية تالي بدون سابق انذار شمر الخاشوكة وكام من الاكل

حتى الي فززني لان ركع الخاشوكة حيل بالماعون

النوح : ها جدي وين

هارون : ششـ شبعت دايمة

هيام : شنو شبعت يمه كلشي ما اكلت يادوب خاشوكتين خليت بحلكك

هارون : انتِ شعليج تزقنبي ومالج علاقة بيه

عبدالله : لللللك امممممك هايييي هاررررون شلووون تجاوبهااا هيييج

زبيدة : اباوع لهارون طلع من كل البيت بلا ميرد على ابو ولا كإنما اكو احد ديحجي ويا

عبدالله : العفو بايه ، اعتذر بالنيابة عن هارون تدري انتِ وضعه خاص شويه ومرات تبدر منه تصرفات
موحلوة

النوح : اسكت بويه مو جديد عليه هارون حتى تبررلي

موسى : واذا انتو تدرون بوضعه خاص ليش مخلي هنا مكابلنا وكاعد ينكد علينا

ما طلعت عيشه هاي واحد يجي من الدوام حتى يرتاح يجي هذا يطلع سوادينه عليك

عمي ودو لمصح وخلصونه تره بالله الكريم تعبنا منه حتى البيت كرهنا

ولا نكدر نحجي ولا نفتح حلوكنا والله شنو خاف نحجي ونقهره وتجي النوبة ويموت وميموت عسى بالسل

زبيدة : سل اليسل كلبك وعضامك بحق الحبيب محمد ليش تدعي عليه

عمت عينك كون شلون تحجي عليه هيج ، لك انت شنو من بشر

موسى : انتِ شلون تتجرأين تحاجيني هيج

زبيدة : اتجرأ ونص الكاعد تحجي عليه هذا زوجي وما اسمحلك تمسه بكلمه افتهمت لو لا

واذا ماكو واحد هنا يردك فآني الاردك واذا لساني ميفيد عندي ايد تكفي وتوفي

احترم نفسك وطاري هارون متجيبه على لسانك لا بزين ولا بالموزين والا والله اني الي انوب اوكف بوجهك واعلمك شلون تحجي

موسى : اني ما راح ارد عليج بس انت جدي راضي على لسان حفيدتك

النوح : زبيدة كومي صعدي لغرفتج

زبيدة : ليش اني شسويت مو هو البده يتجاوز على هارون والمفروض مني اسكتله وما اتدخل

النوح : كتلج صعدي جدي لتسوين مشاكل

زبيدة : عفت الاكل وكمت صعدت فوك ، فتحت الباب ودخلت بس شنو افور من العصبية

الحقير شلون يدعي عليه يكول عدوة مو اخو من الكبر لهاي الاخوة

ولو هسه عرفت مبين النذل عليمن طالع ، اثاري العرگ دساس وجينات الحقارة شي مشترك بين اهل هالبيت ومبين الجلب

عن حلفة الله اطلع منهم بس بيبيتي ونور ومنال مرت عمي فؤاد وعمي عبدالله

وهارون ، تنهدت وباوعت للساعة الساعة 2 ونص وين راح هذا بهالظهر

اخذت موبايلي داتصل عليه وبطلت حسيت تصرفي سخيف وكلش ماله داعي

بأي حق داتصل عليه وليش احط نفسي بموقف محرج يعني لو اتصلت عليه وكلي شعندج داكه شراح اكله ؟

لالا خلي اكعد واسكت ، شمرت الموبايل وكعدت لازمة راسي ، يا ترى ليش كام من الاكل وطلع من كل البيت

والله مجان بي شي ويتصرف بطبيعية ليش فجأة انكلب وانفعل لدرجة حتى غلط على امه

كمت طلعت من الغرفة ورحت لنور اكعد يمها شويه لان اليوم ما كعدت ويانا على الغدة ولا حتى نزلت كلت خلي اشوف شبيها

دكيت الباب عليها ودخلت لكيتها كاعدة على جربايتها تبجي واول ما شافتني كامت تمسح بعيونها

نور : هاا زز زبيدة محتاجة شي

زبيدة : حبيت اكعد وياج شويه بس اذا مشغولة ارجعلج بعدين

نور : لالا تعاي تفضلي ماعندي شي

زبيدة : اجيت كعدت يمها ، من باب المحبة وليس الفضول اكدر اعرف شبيج

باوعتلي ودموعها رجعت تبلل وجها ، تقدمت حضنتها ليش تبجين حبيبتي منو وياج

نور : بنات عمو فاضل

زبيدة : شسولج هالمسمومات

ابتعدت وباوعتلها احجيلي نور حبيبتي ، صحيح اني ما صارلي هواي هنا بس تكدرين تعتبريني اختج وتسولفيلي الي بكلبج

نور : اخاف احجي وتكولين عني تافهه

زبيدة : وتتوقعين اني وقحة لهالدرجة حتى استهزء بمشاعرج واعتبرج تافهه

اني مو هيج بالعكس اقدر انُ اكو اشياء الناس تشوفها عادية ومتسوه بس هي مؤلمة جداً بالنسبة لصاحبها ولوما واجعته ما جان بجه بسببها فسولفيلي وخليني اشاركج الي بكلبج

نور : زبيدة انتِ تشوفين بيه شي ؟

زبيدة : من اي ناحية يعني ؟

نور : شكلي ، جسمي ، كلشي ، تحسين اكو غلط لو عيب بيه

زبيدة : لا ابد والله اصلاً ماشاءالله عليج تخبلين هي بس عيونج المكحله من الله تاخذ العقل اخلاقج حلوة حنينه وكلبج طيب كلج على بعض تخبلين

جاوبتني وهي تبجي

نور : زين اذا اني مابيه شي لعد ليش بنات عمي دائماً يضحكن عليه

زبيدة : بنات عمي فاضل يضحكن عليج ؟

نور : ايي كل ما اكعد كدامهم يضلن وحدة تشاور الثانية ويباوعلي ويضحكن

واني كلش انقهر بس اسكت ولا مرة حجيت وهن مستمرات كلما يشوفني كاعدة وحدة تكعد يم الثانية ويبدي المشاور والضحك عليه

زبيدة : زين يمكن مو يمجن هو صحيح اني ما ارغبلهن بس مع هذا مالي حق ادخل بنيتهن

احتمال هن دائمًا هيج يسون بيناتهن ومو القصد من تصرفهن الاستهزاء بيج لو الحجي عليج

نور : اني هم جنت اكول مثلج بس من اجوي بيت جدي انعاد نفس الموقف واني كمت من يمهن

ومن رجعت بعدين لكيتهن بالمطبخ ديسولفن ويه نوال اختي ، يعيبن عليه ويضحكن على ملابسي يكولن عليه بيئة وملابسي تخزي ونوال تأيدهن وتضحك وياهن

تكلهم اي هي نور لان تربت ويه الخدم صار ذوقها نفس ذوقهم لا وحنين تكل لنوال احنه نضحك عليها بيناتنه وهي تتبسم عبالها جاي نمدحها متدري
جاي نضحك عليها

زبيدة : هاي اختج شكد حقيرة شبيها مكسحة متلطمهن على حلوكهن وبعدين تعاي انتِ من تشوفيهن يضحكن عليج ليش تتبسمين جنج هبلة

نور : هيج مواقف اضل حايرة بيها وما اعرف شسوي من الاحراج لا اراديًا ابتسم حتى اتدارك الموقف وما ابجي بنص الكاعدين

زبيدة : تعرفين الله ؟

نور : هاا

زبيدة : دحجي لا الطمج على حلكج

نور : اي طبعاً منو الميعرف الله

زبيدة : اقسملج بالله العلي العظيم يإذا ما ضحكتج عليهن مثل ما ضحكن عليج وازود يإطلع اني مو زبيدة وما محسوبة على النسوان

نور : شراح تسوين

زبيدة : الج الصافي حبيبتي ، يله اعوفج تاخذين راحتج

كمت بسرعة راجعه لغرفتي جريت موبايلي ورحت لمكتب جدي

وكفت بالباب وتذكرت اهلي وگبل بجيت ، كطعت البجيه وتنهدت داكة الباب سمعت صوته يسمحلي بالدخول

دخلت للمكتب وطبكت الباب

النوح : هااا زبيدة كولي

زبيدة : كعدت على الكرسي واطلقت العنان لدموعي بجيت من كل وگلبي

تذكرت امي وابوية ، حمودي ابن دنيا ، هاجت عليه كل المواجع ، انوب ما كمت اكدر اسكت صرت اناشع وجدي اخترع وكاملي يركض

النوح : شبيج زبيدة شبيج حبيبتي ليش جاي تبجين
احجي حبيبتي فضفضيلي

زبيدة : جدو اني تعبت

النوح : منو التعبج هارون والله اليوم اللعب بي لعب

زبيدة : هزيت راسي لا جدو مو هارون

بنات عمامي ، دائمًا يسمعني حجي يقهر ويستهزئن بيه وذاك اليوم يعيرني بسالفة الخياطة الي صارت
دوناً عن ارادتي

وحتى تصدكني تفضل اسمع شلون يحاجني باتهام ويتعمدن يضحكن حتى يقهرن كلبي

اني منين اتلاكها يا جدو من المشاكل الي كل ساعة واكعه على راسي لو من سوالف بنات عمامي

تعبت جدو اني تعبت وخفت ارد عليهن لتروح تزيد المشاكل وانت تعرف اني من غير شي الكل يتحسس مني هنا يعتي حسرة عليه احجي

النوح : سهلة بوية سهلة وذني الادبسزيات اني اعلمهن الج دخلي يجن لهنا اليوم ودبارهن يمي

والله خوش كلمن هنا كام يلعب بكيفه ويحلل على راحته شنو تايهه انتِ الهن عبالهن ماكو ظهر وراج
وروح ابويه اذا ما املص اذاناتهن اليوم اني ما طالع
من ظهر طاهر

زبيدة : مسحت عيوني وتشكرت منه ، كمت طلعت من الغرفة وكلبي بارررد

من جهه فرغت الي بكلبي وبجيت ومن جهه ثانية شيشت جدي على ذني الحقيرات

ومع هذا ما راح اضل معتمدة على جدي لازم اسوي شي يبرد كلبي

رجعت دخلت لغرفتي وهم ما لكيت هارون ، كعدت على التلفزيون امضي وقت شويه

العصريات نزلت جوه لكيت الحياية كاعدات حشه بيبتي ، والحياية الصغار بالمطبخ

ايييييه عيد وجابه العباس

كعدت وعيوني على نور الي عيونها مطككه من البجي
كسرت خاطري والله هالبنية من شفتها وشافتني وحيدة وعازلة روحها ودائمًا تذكرني بهارون

هيام : زبيدة هارون ما رجع ؟

زبيدة : لا ما رجع

هيام : ما خابرتي انتِ شفتي وينه

زبيدة : لا عفته على راحته اكيد عنده شغل

هيام : شنو عنده شغل هو هذا منطق غير تخابري بس مسمايه عليه مرة

زبيدة : حاجيتها بهدوء ، لتعلين صوتج عليه تمام

واذا خايفة كلش على هارون اتصلي عليه وشوفي وينه اني بالنسبة الي ما احب ازعجه

افكار : بس مو المفروض انتِ مرته وتخافين عليه
مو تكعدين هيج ببرود

زبيدة : واني غلطت على رجلج وتجاوزت عليه الظهر مو المفروض تاخذين موقف مني ومتحجين وياي بعد احترامًا اله لو اني غلطانه

بيداء : ادري انتِ لازم كلما تكعدين ويانه تسويلج سالفة تموتين اذا متغثين احد يعني

زبيدة : ابتسمتلها اي والله اموت

اباوع للبنات طلعن شايلات صواني مليانه كلاصات وبطالة عصير كزاز ونمنمات

لا ويضحكن مكيفات ، راحت غيداء تركض فتحتلهن الباب حتى يطلعن للحديقة

اني شفتهن تقربن عليه غمضت عيوني وسويت روحي اتثاوب واتمغط وبالخلسه وبدون لا احد ينتبه مديت رجلية ثنينهن بالطريق

واول ما وصلن يمي حتى يعبرن عثرت حنين برجلي ووكعت على وجها واختها طخت بيها ووتبدت الصينية الي بايدها

الكلاصات تكسرت والبطالة وياهن الجبس تبده بالكاع
بالمختصر صارت ليصه

غفران : يمه بناتي اسم الله اسم الله ، خوما تعورتن

شبييج انتتتِ شبيييج غيييير تنتبهيييين

زبيدة : سوري سوري ما انتبهت عليهن جنت اتثاوب وما دريت بيهن راح يعبرن منا كلش اسفة اني

حنين : الله لا يوفقج شوفيييي شسويتييي خربت كعدتنا من وراج

نور : ههههههه عزة هاي شنو ملابسجن

خيال : انتِ انجبيي

زبيدة : جؤ جؤ عندي بسكت بالكنتور اذا تحبن انزله الجن شربن ويا جاي وتونسن

اشواق : مو احنه مجادية لو ما عدنه حتى ناخذ من شكولج

زبيدة : دنكت راسي الله يسامحج جرحتي مشاعري

حمزية : لج انتِ شلون تحاجين زبيدة هيج طايحة الحظ

النوح : عوفيهن حمزية لتعبين روحج وياهن ، امشن طلعن للحديقة اريدجن

غفران : خير عمي شتريد منهن

النوح : لسانج بلهاتج اششش وانتن كدامي يله وبنات فؤاد هم وياهن يله

منال : ليش عمي بناتي شسون

النوح : ماكو شي بوية لتخافين كدامييي يله وانتن تعالن نظفن شبيييجن صافنات

زبيدة : اخذ جدي البنات وطلع والعاملات اجن يركضن ينظفن

اشرت بعيوني لنور وكمت وهي لحكتني ، صعدنا على الدرج وبس اختفينا عن انظارهم اني رفعت دشداشتي وركضت كل قوتي واجر بنور

نور : شبيج زبيدة ايدي

زبيدة : دمشي امشي شكد فاهية

فتحت باب غرفتي وركضت للبلكون ، فدوة لاسمك يارب ما طلبتك ورديتني

وكفة جدي ويه البنات صارت كبال البلكون مالتي بالضبط يعني كلشي داكدر اشوف

اباوع لجدي موكفهن سطر واحد ويحجي وياهن ومبين من نترت ايده حيل عصبي

نور : هاي ليش جدي موكفهن هيج

زبيدة : ابتسمت تابعي بصمت وادعيلي

ضلينه واكفين وهاي كل شويه تكمز من بعيط جدي ، غميتها ورجعت اتابع جدي شلون جر اذان غيداء وهدى

انوب بنات عمي فاضل مدري شكلله وهو طلع موبايله وسمعهن الصوتية الدزيتها اله

خيال انتفضت عليه والظاهر حجت شي ما جان لازم تحجي لان جدي گبل قاطعها وصفكها راشدي

نور : عززززه ضربها راشدي ولج باعي باعي ضرب حنين هم

زبيدة : مسدت على گلبي افييييش ثلج كلبي والله

اباوعله طردهن وهن دخلن جوه يبجن ،ابتسمت وباوعت لنور هاا طيحتلج حظهن وضحكتج عليهن لو لا

نور : عزه زبيدة انتِ تخوفين طلعتي شريرة ممبين عليج

زبيدة : ترديني شيطان تلكيني حاظرة ترديني ملاك اكلج بالخدمة

بس هاا بالحق ما اذي احد اني بدون سبب

نور : صدقة زبيدة والنبي اول مرة واحد يديرلي بال ويدافعلي هيج فدوة والله كلش احبج اني

زبيدة : حضنتني واني بادلتها ومسحت على راسها
من اليوم اي واحد يأذيج تجين تكليلي

نور : ههههه تمام يله اعوفج وانزل اضحك عليهن الحقيرات ذني

زبيدة : ههههه روحي بسرعة

__________________________________

ديمة : خليت الاستكان وكعدت

امين : ليش متعبة نفسج وكاعدة من الصبح رجعي نامي واني من اطلع اقفل الباب وراي

ديمة : لا اريدك تكمل حتى اغسل المواعين وراك ما اريد خالة تكعد تغسلهن خطية

امين : روحي نامي اني اغسلهن

ديمة : لا ميحتاج اني هيج هيج كعدت

امين : زين كعدي اكل وياي

ديمة : ما اشتهي والله

امين : بس شويه كعدي وياي واكلي

ديمة : هسه ليش تلح مو جاي اكلك ما اشتهي

امين : ليش تصيحين

ديمة : مو انت تلح وتلزگ كتلك من البداية ما اشتهي شنو جبر هي اله اكل وياك شسالفة

امين : اسلوبج ديمة تره حيل جاي تدوسين بالحجي

ديمة : اني رايحة للغرفة عود من تكمل اكل صيحلي داقفل الباب وراك حتى اغسل المواعين

عفته وطلعت من المطبخ لكيت بصائر بوجهي بس دتباوعلي بنظرات غريبة

هاا بصائر صباح الخير

بصائر : صباح النور

ديمة : ردت عليه من وره خشمها وصعدت ، هاي شبيها الثانية انوب

دخلت لغرفتي ومن طلع امين كمت للمطبخ لكيته غاسل المواعين

رجعت لغرفتي ونمت ، كعدت على صوت خالة وكمت اساعدها هي وبصائر

شنو هاي الحياة يا ربي ، كل يوم نفس الروتين وشنو الغدة وشنو العشه كل يوم تنعاد عليه نفس الاسطوانة مليت والله مليت

ذبيت الوصلة وتنهدت ، تعبانة اني كلش تعبانة وما طايقة نفسي

اعرف الداسوي ويه امين قمة الحقارة بس ما ادري شجايه من يوم الحسيت قيود راسل وهبه انفكت مني واني ما كمت اطيق امين ازود من قبل

ما اعرف ليش يمكن لان قبل ماجنت احس بظهري فانجبرت اتمسك بأمين وهسه من حسيت بجدي موجود ويعرف إني بريئة هو واهلي كلهم ما كمت اخاف من شي

يمكن حتى لو دره امين اني بعد ما اهتم واتمنى والله صار منى حياتي اطلع من هاي العلاقة السامة واروح
اعيش يم اهلي

اكمل دراستي واعيش حياتي مثل ما اريد

هناء : شبيج دمدوم حبيبتي شو ضايجة اليوم

ديمة : والله خالة مخنوكة وروحي طالعة

هناء : حتى اني ضايجة ، بس يله ميخالف بعد شهر بالزايد عرس بنت اختي واني قبل يومين اخذجن ونروح نبات عند اختي ونتونس شتكولين

ديمة : واني انتظر شهر يا خالة

هناء : زين هاج يمه هاي عشرة اخذها وروحي اشتري من الاسواق شغلات تونس وكعدي انتِ وبصائر بالليل على فلم على اي شي وغيرن جو

لو اوكفي اوكفي ، شتكولين اسوي عشانه ونطلع كلنا اليوم نتعشه بالمنتزه

ديمة : منتزه ؟ لا خالة ما اريد وعلى كولتج راح اطلع اشتري نمنمات واجي

هناء : هاج الفلوس

ديمة : ابتسمت بوجها حبيبتي خالة متقصرين اني عندي فلوس

هناء : ميخالف ولج اخذها خلي اشارك وياجن حتى نكعد سوه خوما تعوفني وحدي كاعدة

ديمة : ابتسمت واخذتها

رحت بدلت واخذت خمسة وعشرين من الدرج وطلعت للاسواق اشتريت هواي شغلات ، دفعت
فلوسهن وطلعت

دامشي راجعة للبيت وشفت تقى كدامي ، ابتسمت اول ما شفتها وهي اجتني تمشي بسرعة

تقى : هلا بالحلوة

ديمة : بوستها هلا بيج حبيبتي شلونج

تقى : الحمدلله وينج ولج مو عزمتج ذاك اليوم يمي ليش ما اجيتي

ديمة : والله التهيت وما كدرت اجي

تقى : ايي شلونج ، شو وجهج اصفر ليش هيج هههه اعترفي خاف حامل

ديمة : هاا لالا يمعودة مو حامل

تقى : ان شاء الله تحملين وتشوفج احلى ماما

ديمة : حبيبتي تسلمين يله من رخصتج

تقى : الله وياج گلبي ومو تنسين بس تفرغين تعاليلي تره اغلب الوقت اني محبوسة بالبيت وما اطلع فكلش اتونس اذا احد اجانه

ديمة : هاهي ان شاء الله بنهاية الاسبوع امرلج

تقى : كل الهلا عيوني

ديمة : راحت هي واني مشيت بس حجايتها تدك براسي

اني حامل ومن امين دخيلك يارب ما اريد ، اذا حملت معناها لازم اضل العمر كله عايشه ويه امين واني فكرة اني اكمل باقي حياتي ويا كلش صعبة عليه

لالا اني لازم الكالي حل

__________________________________

يوسف : شبيج حبيبي شو وضعج ما عاجبني اليوم

دنيا : غطيت تيم واستندت على ايدي مباوعتله

امك تريد تخطب بصائر اخت امين لحليم واني بصراحة ابد ما مقتنعة باختيارها

بصائر بنية بسيطة وفقيرة الى درجة لا طلعة ولا طبه حياتها كلها مكضيتها بغرفتها تقره

شلون راح تتراهم ويه حليم الي شايف وعايف والي طباعة صعبة رغم طيبة گلبه بس مو مناسب الها ابد

بس خفت احجي شي وخالة تزعل مني لو انفهم بغير طريقة ففضلت السكوت

يوسف : اذا انتِ ما مقتنعة باختيار امي فآني هذا الزواج كله ما مقتنع بي

حليم بعده ما متخطي اختج وجاي يفكر بانانية يريد يتزوج حتى يثبت للكل عود هو شال زبيدة من راسه

وتالي تهوره هذا راح يودي للهاوية انوب انتِ جاي تكولين امي تريد اخت امين وتعاي هذا هم ثاني

دنيا : والله يا يوسف اني خايفة على بصائر ، اعتذر منك والله ما احب احجي هيج بس انت تعرف حليم
صاحب علاقات ودربه مو صحيح

وبصائر بنية مثل ما كتلك بسيطة مو ملعبة ولا وكحة حتى تكدر تتعامل ويا ، خايفة عليها لا يظلمها حليم وهي متستاهل

وهمه من الاساس ظروفهم صعبة وكوه ديدبرون العيشة انوب تجي هالمسكينة تطلع من قهر تطب بقهر ثاني

يوسف : كومي تعاي يمي

دنيا : وخرت الغطة وكمت كعدت بحضنه ، دفن راسه بركبتي وباسني

يوسف : خلي ببالج شغلة وحدة لو مهما صار ومهما اعترضنا على القدر بالنهاية الكاتبة الله هو الراح يصير

يعني انتِ هسه جنتِ متوقعة بيوم من الايام ترجعين تملين حضني هيج

دنيا : لا والله

يوسف : شفتي ، الكاتبة رب العالمين محد يعرفه شمدرينا احنه يجوز البنية ببساطتها هاي وطيبة
كلبها تخلي حليم يحبها

وبكل الاحوال البنية صيدلانية وتعبانة على روحها واحتمال جبير اهلها مينطوها كلشي توقعي

دنيا : هم صحيح

يوسف : لتضوجين نفسج هاي السوالف مينشال هم الها وربج موجود

دنيا : والنعم بالله

يوسف : اروح فدوة للايمان اليخبل هذا

دنيا : ضحكت اكعد يوسف مالي خلك سوالفك

يوسف : بشرفج ما مشتاقتلي

دنيا : حضنته لا والله كلش مشتاقتلك

بعد راسه عن ركبتي وباوعلي مغمض عيونه

يوسف : بوسيني

دنيا : بسته من خده

يوسف : ام الطكه ومن الحلك عليج الزهرة

دنيا : ضربته بخفه على وجهه لتجيب طاري اهل البيت بهاي السوالف الطايحظها

يوسف : ميخالف يله بوسيني اني كاعدلج بوضع الاستعداد

دنيا : شكد مستهتر

يوسف : مستهتر بحبج

دنيا : هههههه حلوة هاي

يوسف : لعد شعبالج اني لساني ينكط عسل ، تعاي اثبتلج

دنيا : باسني من شفايفي ، غمضت عيوني وبادلته

جسمي كله سكن بحضنه غبت عن كلشي وركزت بمشاعري بلحظتها

سبحان الله شلون يفجر بداخل الانسان كتله من المشاعر تجاه الي يحبه غير قابله للوصف وحتى لو انوصفت مستحيل تجي ذرة من الاحساس الي يجتاح الشخص بالواقع

ابتعدت وبوسته من شفايفه بوسات خفيفه

يوسف : شفتي لساني شلون ينكط عسل

دنيا : انت كلك على بعضك عسل

يوسف : اااخ بوية اااخ انوب تتغزل بيه

دنيا : هههههه كافي يوسف لتضوجني

يوسف : انتِ تدرين بحضني يكطر حنيه لو لا

دنيا : لا والله هستوني داسمع منك

فزيت من شالني

يوسف : امشينه بغرفة تيم عندي سالوفه وياج

دنيا : يا سالوفه هاي

يوسف : ليلى والذئب لعد غير بالقصة الحقيقية طلع الذئب ما ماكل ليلى

دنيا : لعد شسوالها

يوسف : شال ليلى واخذها للغرفة ووو

لو اكلج امشي امشي خلي اسولفها الج جوه

دنيا : والله انت فد واحد نازعها فرد دور

يوسف : ستوج تدرين اصلاً اني نازع بحبج من زمان

دنيا : هههههه

________________________________

حليم : نايم ، ستوها جاي تشكل عيني واندكت الباب

صحت تفضل ، باوعت لامي طبت وكفتلي بالباب وتخصرتلي

رميم : هاا شو اليوم هنا توقعتك دايح

حليم : كمت وكفت كبالها ، اني اريد افتهم شغلة انتِ هنا مرتي لو امي اشو واكفتلي صفح وتهزين بروحج

ضربتني راشدي ، صكيت اسناني وغمضت عيوني
لا اله الا الله شلون سالفة هاي

رميم : تأدب

حليم : شتردين يمه شعندج اليوم

رميم : اجيت اراويك البنية الكتلك عليها

حليم : يا بنية هاي

رميم : اوهوو يالغبر البنية الراح تتزوجها

حليم : هاا اي تذكرت

تفضلي استريحي ، دخلت كعدت واشرتلي اجي يمها
رحت كعدت يمها

رميم : باوع اني قررت اخطبلك بصائر

لحيم : لحظة اني وين سامع هذا الاسم احسه مو غريب عليه

رميم : شبيك صفنت

حليم : منو بصائر ؟

رميم : اخت امين صديق شبيك

حليم : لزمت راسي دخيلج لتكليلي تردين تخطبين هاي البنية الناعمة الاجت وياهم ذاك اليوم

رميم : اي ، شفتها شلون تخبل

حليم : كمت وكفت كبالها ، على بختج يمه انتِ تردين تخزيني

رميم : ليش ولك شنو يمه صاحلك انت وحدة مثل بصائر ، ادب واخلاق وجمال وفوكاها صيدلانية
اصلاً استبعد تقبل بيك ابو النسوان ابو العرگ

حليم : يمه اني مو على البنية احجي ، كل عقلج حاطة ببالج تخطبيلي اخت امين تردين تخربين
العلاقة بيني وبين صاحبي انتِ

رميم : وليش اخرب العلاقة بيناتكم الا اذا جنت انت ناوي نية موزينة على البنية التريدها وتخاف تخسر امين بسبب السوالف الطايحظها الي ببالك

حليم : لا يمه مو هذا قصدي بس اني امين الله دزلي يا هدية من السما ما عمري رافكت واحد مثله

انسان نظيف وطاهر لابعد حد واحتمال اذا اخذت اخته وما تراهمت وياها اخسر امين واني ما اريد
اخسره

صح ما صارلي اعرفة غير سنتين بس حيل قريب عليه وكلش اخاف لا اخسره

رميم : انت امشي عدل وعامل البنية بما يرضي الله ولتخاف متخسره

حليم : اني ما احزر نفسي وما اعرف الظروف شنو ما اكدر اجازف

غير هيج علاقة العائلتين حيل طيبة الناس يحبونه واحنه نحبهم واني ما اريد العلاقات تخرب بسبب هذا الزواج

رميم : انت ما عليك كتلك امشي عدل والعلاقات ميصيرلها شي

حليم : يمه نقطة على السطر بصائر اخت امين تكنسليها من راسج

رميم : تريدني اخطبلك من بيت عمامك المسمومين لو اخطبلك اخت ابريز ام خشم مرفوع

حليم : شو يمه بكيفج شتردين تسوين سوي بس فكيني

رميم : وين مولي

حليم : اركص

رميم : تعال طايح الحظ شوف صورة البنية

حليم : شوفيها انتِ

________________________________

زبيدة : صارت بـ11 ونص وهارون لسه ماكو يربي خاف اجته النوبة لو تخربط بالطريق

طلعت وكفت بالبلكون وبأيدي موبايلي ، خلي تصير بـ12 اذا ما اجه عود اتصل عليه

تنهدت وضميت اديه ، بس لو افتهم شعنده لسه بره
ضليت واكفه ، شويه وشفته يدخل ويشمر سويجة
على الحرس

اباوعله راح كعد جوه الشجرة شلون ذاك اليوم ، دخلت لبست حجابي ونزلت اهرول

فتحت الباب وطلعت امشي باتجاهه وصلت يمه وكعدت كباله

هارون : اهووو

زبيدة : وينك انت من الظهر لسه ضل بالي يمك عليك ولسه ما نمت من وراك

هارون : وليش ضل بالج يمي

زبيدة : يمكن لان شريكي بالغرفة اعتقد يعني ما متاكدة

هارون : بس هيج

زبيدة : ليش شنو المفروض اجاوبك مثلاً لان زوجي واحبك واموت عليك عيني متاخذ نوم

هارون : كلشي وارد منج

زبيدة : ههههه لا الا هاي ما اسويها

باوعتله وابتسمت ضاربته على رجله ، خزرني ودفع ايدي

هارون : شبيييج

زبيدة : اني ما اعرف شنو الشي الضوجك اليوم على الاكل وخلاك تكوم

بس الاعرفه انك جنت واكف يم الباب وسمعت كل الحجي الي انكال عليك

اباوعله اندار عليه ، ابتسمت بوجهه اي اني ادري بيك دائماً توكف يم زاوية معينه حتى محد يشوفك وتكعد تسمع الكل شيحجون عليك

وادري بيك هم تنقهر وتسوي روحك ممهتم واصلاً مسامع حتى لتبين ضعيف او مقهور كدام احد

بس اوك عادي ممكن مرات الانسان يبين ضعفه ويحجي خوما يكضي العمر كله يكبت بداخله

هارون : وتتوقعين نفسج الشخص المناسب الي ممكن احجيله

زبيدة : رفعت كتافي ما اعرف هالشي جوابه يمك بعد
اني كل الاكدر اكوله إني مستمعه جيدة

هارون : اريد اسألج سؤال

زبيدة : ضحكت انت ملاحظ انُ كل حديث يدور بيناتنه يكون بدايته سؤال

هارون : ملاحظ

زبيدة : طيب شنو السؤال الي ببالك

هارون : انتِ صدك تشوفين اكو ضوه ابيض بداخلي لو جنتِ تحجين هيج كلاوات

زبيدة : اولاً اني ما احجي كلاوات وثانيًا اني لا اجامل ولا اجذب الاحسه تجاهك راح اجي واكوله

وسبق وانت كتلي انك تشوفني جريئة واني ما نكرت وكتلك اي

فبديهيًا المفروض تعرف انُ اني الداكوله عنك هو الداشوفه والحسيته تجاهك بدون مبالغة ولا تزييف

هارون : خوش

زبيدة : خوش

باوعت لايده الموشومه ، مبين عليك تحب العقارب هواي لان واشمهن بمكانين بجسمك

هارون : 3 للتصحيح

زبيدة : وين الثالث ؟

اباوعله قرب راسه مني واندار ، انتبهت للوشم الثالث وره اذانه

لهالدرجة تحبهن ؟

رجع لمكانه وجاوبني

هارون : اي

زبيدة : اشوفك هواي متعلق بالخيول والحيونات المفترسة والبحرية بس مداشوفك موشمهن

هارون : المفضل هو العقرب

زبيدة : شمعنى ؟

هارون : بي صفة مميزة ماموجودة تعجبني

زبيدة : الي هي ؟

هارون : يدلغ امه

زبيدة : هاا !!

هارون : العقرب اول ما يفقس يطلع ويلدغ امه انوب يتغذه عليها وياخذ عافيتها ياله يعوفها وهو الوحيد من الكائنات الي يسوي هيج

زبيدة : وانت كل عقلك تحبه لهذا السبب ؟

هارون : اي

زبيدة : هارون انت تكره امك ؟

هارون : تأخر الوقت لازم اكوم انام ورايه دوام

زبيدة : اباوعله كام ودخل جوه بدون ميجاوبني على سؤالي

بس حتى لو ما جاوبني حتمًا ما دام طلع يحب العقرب لهذا السبب معناها يكره امه

كمت نفضت ملابسي ودخلت جوه ، ثاني يوم الكل جان بالدوامات واني رحت يم اهلي كضيت اليوم هناك ابد ما وصلت للبيت

لان هناك الدنيا مخبوصه بهذا حاتم الي اصلاً ما عرفته شيصير منه وشنو صلة القرابة او المعرفة بينه وبين بيت جدي

ومن اجه يوم جيتهم كعدنا من الصبح وجشنا بالبيت علمود استقبالهم

بيبتي ما خلت شي ما سوته علمودهم وجدي سوالهم ذبيحتين

الظاهر كلش يعزو لهذا حاتم

سديت كنتوري وانداريت على نور ، اكول نور صدك هذا حاتم شيصير منه

نور : ميصير منه شي بس قبل جان جيران بيت جدي وهو بابا اصدقاء الروح بالروح حتى من رادو يتزوجون تزوجو بنفس اليوم

زبيدة : لهالدرجة

نور : اي بابا كلش كلش يحبه

زبيدة : هاا لعد الله يديم المحبة

باعي ياهو الالبسه البيجي لو الاسود

نور : الاسود

زبيدة : خوش لعد حلبس البيجي

نور : ياا

زبيدة : ههههه لا اشاقه وياج حلبس على ذوقج ، بدلت وخليت مكياج بسيط ووكفت اللبس حجابي

نور : ما شاء الله زبد جسمج يخبل

زبيدة : لعد انتِ قاصرة هم جسمج يخبل

نور : اي بس عندي كرش

زبيدة : واذا عندج كرش حبيبي ولا تهتمين مسامعه المثل الي يكول

الي معندوش كرش ميسواش ارش

نور : يعني انتِ هسه متسوين قرش

زبيدة : هههههه طيح الله حظج ، امشي امشي ادبسز رجعت عليه فوك ما امدحها

نزلنا جوه وكعدنا ننتظر الجماعة ، اباوع لهارون دخل وموبايلة على اذنه ديخابر جان لابس بنطرون اسود وقميص ابيض

للامانة طالع كلش كلش شيك

شويه وانطونه خبر انُ الجماعة وصلو ، طلعو عمامي وجدي يستقبلوهم وتفاجئت من شفتهم دخلو الجماعة علينا

ما ودوهم گبل للاستقبال ، اباوع للرجال الي دخل يطلع بگد عمو عبدالله صاحب بنية مليانه ولابس رسمي ويا مرة سافرة واثنين اولاد بنية وولد شباب

انتبهت للكل راح سلم عليهم ما عدى هارون ضل واكف بالباب وابد ما تقدم

فزيت على صوت بيبيتي

حمزية : تعالي زبد سلمي

زبيدة : تقدمت كلت السلام عليكم وهمه سلمو عليه

عبدالله : حاتم فنك تعرف هاي منو

حاتم : منو بس لا بنتك

عبدالله : لا هاي بنت ياسر ومرت هارون ابني

حاتم : ماشاء الله ما شاء الله شلونج باباتي

لك صدك ابنك هارون وينه صار هواي ما شايفه من سافرت جان صغير كلش

عبدالله : ذاك ويا هارون واكف وراك

زبيدة : شفت الرجال اندار على هارون وفتح عيونه

حاتم : ما شاء الله لك عود صدك هذا هارون

لعد وين كرشك واللحم والخدود شعرك الطويل وينه

هارون : راح ومن زمان

حاتم : بس يحفظك الرحمن صاير رجال طول بعرض ولا توقعتك تكبر وتصير هيج

زبيدة : الرجال واكف يجامل هارون ويمدحه وهارون ماكو على ملامحه اي ردة فعل حتى حرج الرجال

عزه العزا شكد يفشل ولا يعرف يجامل كالب خلقته حتى مصافحة ما صافح الوادم

اباوع للجماعة دخلو للاستقبال واحنه رحنه نصب الغدة علمود علما يكملون صلاة يكون كلشي جاهز

صبينا وكملنا وطلعو الجماعة كلمن اخذ مكان والكل كعد يتغدة سوه بس هارون ماهو

نور : زبد كعدي شبيج

زبيدة : هاا ايي اي راح اكعد

كعدت يمها بس ما اكلت ضل بالي عند هارون صارله 3 ايام مو على بعضه واليوم من الصبح كاعد عصبي وروحه بخشمه

كملنا غده وصبينا جاي للناس وضيفناهم ، الكل كاعد ومندمج بين ضحكة وسالفه وولا واحد بيهم افتقد هارون

صار العصر وتبعه المغرب والناس راحو والكل طش لغرفته وهارون ما زال ماهو

اجه الليل وهو ماكو ما تحملت اتصلت عليه ما جاوبني ومن لحيت عليه قفل جهازة

ضليت كاعدة بالصالة الجوه ، الكل نايم وبس اني كاعدة انتظره

شفت صاحب دخل

صاحب : هاا زبيدة شو كاعدة شنو محتاجة شي

زبيدة : لا بس منتظرة هارون

صاحب : ذاك ويا كاعد بالاسطبل

زبيدة : صدك والله

صاحب : اي والله ستوني جنت يمه

زبيدة : هزيت راسي وكمت حتى الحكه بس وكفت متذكره انه ما اجه للبيت اليوم واحتمال ما اكل شي من الصبح

رحت للمطبخ سويت لفتين مالت كباب شوي وصبيتله جاي بالكوب وطلعت امشي للاسطبل

وصلت للاسطبل صار ظهره بوجهي ، جان واكف يم واحد من الخيول وصام ايده لدرجة اوردته مبينه راح تنفجر

اجيت احاجي بس هو سبقني من حاجاني قبل حتى لا يندار عليه

هارون : اريد اكعد وحدي رجعي منين ما اجيتي

زبيدة : خليت الصينية على الكرسي وتقربت منه

مديت ايدي لازمه ايده الشاد عليها ، فتحتها وشابكت اصابعي ويه اصابعه

سحبت ايده عليه وخليته يندار ، رفعت عيوني عليه
اني ما اريد اسولف وياك ولا اجيت ازعجك
بس ممكن تهدئ شويه

مديت ايدي الثانية على فكه ، لزمت وجهه وحاجيته رخي هارون اسنانك راح تتكسر موزين عليك
حباب رخي موزين عليك لتجيك النوبه

اباوعله رفع ايده لازم ايدي الي على وجهه ، همس بصوت خافت

هارون : تعبان اني تعبان

زبيدة : شنو الي متعبك سولفلي

هارون : ياريت ، ياريتني اكدر احجي واطلع الي بكلبي

زبيدة : شديت على ايده طيب مو اله تسولف ، تعال اكل ادري بيك من الصبح لسه مماكل شي

هارون : ما اشتهي

زبيدة : ماكو ما اشتهي لازم تاكل علمود صحتك اذا صحتك متهمك فتهمني اني ما اريدك تتمرض

سحبت ايدي من وجهه وجريته بايدي الثانية للكرسي
يله يله هاك سويتلك لفه وهاي جاي هم

اكل حرام عليك نفسك والله ميصير تبقى هيج متاكل الله يحاسبك

عفت ايده وانداريت ماخذه وحدة من اللفات وباوعتله يله هارون اكل

انتبهت اله صافن بوجهي ، شبيك هارون داكلك اكل تره والله اكل لجدي عليك

شفته اخذ اللفه من ايدي وخلاها بالصينية ورجع باوعلي

شبيك هارون ؟

اباوعله تقرب عليه كلش ولزم وجهي باديه ، عيونه تباوعلي بغموض مداكدر افسر نظراته ابد

هارون : زبيدة

زبيدة : نعم

هارون : انتِ ليش هيج حنينه

زبيدة : اني حنينه ؟

شفت عيونه تدمع

هارون : اي كلش حنينه انتِ ، تدرين من بين الكل الوحيدة انتِ الفكرتي بيه وما عفتيني من كتلج اريد ابقى وحدي

مو مثلهم بس يردون يخلصون مني حتى كلامهم وياي عبارة عن تسقيط فرض لا اكثر ولهالسبب اني اكرهم

زبيدة : لزمت اديه الي على وجهي ، سبق وكتلك اني يمك وما اعوفك واني عند حجايتي ياهارون مستحي اعوفك

غمضت عيوني من سند راسه على راسي ، بلعت ريكي محاولة اهدئ انفاسي

ششـ شبيك هارون

هارون : انتِ منين طلعتيلي متكليلي منين

زبيدة : للـ ليش هارون اني شسويتلك

حرك انفه على انفي وايده تلعب بشعري

هارون : تعبتيني

زبيدة : بس انـ ... قاطعني

هارون : زبيدة اني اسف

زبيدة : على شنـو

هارون : اكرر اسفي

زبيدة : هسه غير افتهم على شنـ .... بعدني داكمل وما احس بي غير يدنك عليه ويبوسني من شفايفي

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

قال رسول الله ( صل الله عليه وعلى آله وسلم) " إذا كُنتُم ثَلاثْة فلا يَتناجى إثنان دونَ صاحبهما فإن ذَلك يُحزنه "

تفسير الحديث
____________

الإسلام يأمر بجبر القلوب وحسن المجالسة والمحادثة، وينهى عن كل ما يسيء إلى المسلم ويخوفه ويوجب له الظنون، فمن ذلك أنه إذا كانوا ثلاثة فإنه إذا تناجى اثنان وتسارّا دون الثالث الذي معهما فإن ذلك يسيئه ويحزنه ويشعره أنه لا يستحق أن يدخل معهما في حديثهما، كما يشعره بالوحدة والانفراد، فجاء الشرع بالنهي عن هذا النوع من التناجي

اذا كان اكو احد بيكم يسوي هذا الفعل ياريت لو يحاول يتركة لان بغض النظر عن انه حرام لكنه يكسر الخواطر ويأذي النفس ويحسس المقابل بالنقص

وهذا الفعل اني شخصيةً شاهدة عليه بهواي امكان
فحبيت من خلال الحدث الي صار ويه نور اوصل الكم رسالة انُ الموضوع هذا جدًا مؤلم ويكسر الخواطر ومن ابشع الافعال عند الله سبحانه وتعالى هو كسر الخواطر فتجنبو هيج تصرفات لطفًا ❤️

.