الموت الحي الفصل الخامس وستون 65 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : اباوعله انطاني ظهره ومشه كبالي ، بلعت ريكي وصحتله هاروون

اندار عليه وباوعلي مأشر بايده

هارون : نعم

زبيدة : اني احبك

هارون : هاا !!

زبيدة : اني احبك

هارون : تحبيني ؟

زبيدة : خليت ايدي بجيوبي وكمت رافعه كتافي بحيره ، تقربت وكفت كباله وحجيت ، صدكني ما اعرف

بس الاعرفة إني فجأة لكيت نفسي افكر بيك ، احب اباوعلك ، احجي وياك ، احضنك وحتى اتعارك وياك

ما اعرف شنو هالمشاعر الغريبة الي دتجتاحني من اكون قريبة منك انت بالذات دونًا عن الكل

داحس بشي جديد اول مرة التمسه بأحد ، غريب وممتع بنفس الوقت ما اعرف شلون اوصفه الك

باوعت لملامحه وتنهدت كلشي بيك داحسه مميز ومموجود عند غيرك ، عيونك ، طبرة حاجبك ، وشومك ، شخصيتك ،حتى مرضك شي مميز
بالنسبة الي

غمضت عيوني ماخذه نفس ، ريحتك تجنن ، عمري ما شميتها الا بحضن امي

ابتسمت وذاك اليوم من حضنتني رجعتلي شعور الاطمئنان الصارلي سنين فاقدته وضوكتني حلاوة الحضن الجنت احسها بحضن امي لدرجة لو جنت بيومها مكضيه اليوم كله بحضنك مجنت راح امل ولو
لثانية وحدة

اذا جان كل الداحس بي هذا يعني إني احبك فـ إي اني احبك هارون

اباوعله صافن بوجهي وطول ما احجي هو ساكت ما بدر منه اي ردة فعل او تعليق على كلامي

فجأة شفته ابتسم بتوسع وانوب طكها بضحكة كامت ترن بالمكان

هارون : هههههههههههه

زبيدة : ضل يضحك ويضحك لمن تنگ صدرة ودمعت عيونه ياله سكت واني واكفه متصنمه بمكاني مصدومة من ردة فعله

ما طلعت مني غير جملة وحدة "عليمن دتضحك"

هارون : ههههه صراحة ؟ ، على غبائج وسذاجتج وعلى ذكائي وحقارتي هم

تصدكين من اول ما حجيت وياج حسيتج شخصية بس هسه صدمتيني ، ما توقعت لهالدرجة راح تطبين على وجهج

طلعتي سريعة التفاعل والاشتعال ما مبين عليج والله

زبيدة : ممـ ما فهمت

هارون : زبيدة اذا عبالج اني كل هالفتره صاير حمل وديع وياج لان احبج فتكونين اكبر غبية بهالكون

زبيدة : للـ لعد الدتسوي كل يوم من تشوفني نايمة شنو تفسره ؟ وو واحضانك وتصرفاتك هاي ششـ شنو معناها

اباوعله ابتعد عني وكام يفتر كبالي وويأشر عليه

هارون : اني سبق وكتلج لتثقين باحد وعمرج لتتوقعين الزين من احد كلنا البشر يا زبيدة حقراء ومؤوذيين لابعد حد بما فيهم اني

وركزت وشددت على كلمة اني اكثر من مرة

بس انتِ ثولة ومر عليج كلامي مرور الكرام بدون متفهمين الرسالة الردت اوصلها الج بيومها شنو

يا غبية تتوقعيني ساذج لهاي الدرجة حتى اكعد ابوس بيج وانتِ نايمة معقولة يعني ما اجه ببالي ولا مرة انج ممكن تكونين كاعدة وتكبسيني

عوفج من كل هذا احتمال تكون مشاعري مسيطرة عليه ومسويتني مطي وما انتبه

زين اني جنت الزمج وابوسج معقولة توقعتي إني ما احس بجسمج شلون جاي يكزبر من اتقربلج لو ما اللاحظ رموشج تتحرك لو نفسج شلون غير منتظم

هيج دماغي منتهي لدرجة ما اللاحظ كل هالتفاصيل الي تبين بوضوح انج كاعدة

زبيدة : هو يحجي واني واكفه باهته بوجهه ، جسمي كله متخشب ومصدومة من الكلام الداسمعه

فجأة شفته تغير حالة وگلب من شخصية لشخصية ثانية ، فجأة حسيته رجع نفس الشخص الحقير الشفته قبل شهور مو هارون الاشوفه كل يوم

هارون : ههههه والله ضحكتيني يا زبيدة خطية عبالج يعني صدك اني ميت بيج

لا وعايف شغلي وراحتي وكاعد انتظر الليل يجي حتى اكعد يم راسج الطاهر وابوسج بشرفج منو بهالزمن باقي تافه لهالدرجة ويسوي هيج سوالف

يعني اني لو عاجبني ابوسج مثلاً ليش حتى انتظرج تنامين خو گبل اجي وابوسج وانتِ ما راح تمانعين

حالها حال بوسة الاسطبل بستج 3 مرات وما فكرتي ولو مرة تصديني عنج اصلا لوما جنت كايلج انسي الصار ما جنتِ راح تنفعلين وتسوين كل السويتي هناك

بالعكس ما استبعد لو مكمل وكايلج نزعي ما جنتِ راح تترددين واني متأكد من كلامي

زبيدة : من بعد ما سمعت كلامة تكونت غصة جوايه ووجت نار بداخلي لدرجة حسيت نفسي داحترك واني واكفه على رجليه

بلعت الغصة وحاجيته ، زز زين للـ ليش سسـ سويت كل هذا بيه

هارون : اذا تتذكرين انتِ مرة سألتيني على معتز وكتيلي ليش صبرت عليه وما بدرت اي ردة فعل تجاهه بوقتها

واني بيومها رديت عليج وكتلج

زبيدة : نزلت دموعي ، جنت متعمد اصبر حتى انسي السالفة وميشك بيه وكت الاجي وانتقم منه

هارون : عفيه واني هذا الرجعت سويته وياج

جنت موزين وياج وشويه شويه بديت انقص من حديتي وياج لحد ما وصلتج لهاي المرحلة وخليتج تحبيني

زبيدة : اي لييييييش معتز اذاك وانت رديت عليه بس انيييي شسويتلك

هارون : انتِ نسيتي بس اني عمري ما انسى السويتي وياي

ما انسى من وكفتي بنص العالم وتفلتي بوجهي وشلتي طاسة تفور ودرتيها عليه بدم بارد

ما انسى صوتج وانتِ تعيطين كدام كل الناس وتصيحين اني !! اني اخذ هذا المخبل ليش شناقصني

ما انسى انج بعد ما طلعتي كلها كامت تشاور وتضحك عليه هه خو نظرات الشفقة الحصلتها من الكل بيومها
والسبب انتِ لا تُنسى

لو عبالج يعني راح انسى إني سمعتج تكلين لامي وعماتي قبل زواجنا باسبوع انج قيطان لحذائج
تستنكفين تخليني

لو ترديني انسى عمي فؤاد من اجاني يگلي عمي انت ليش متفك ياخة عن بنت ياسر البنية متريدك كافي تقبل الواقع انت مريض المثلك كون يدور علاج مو زواج

اني ما انسى ، ما انسى يا زبيدة وعمري ما سكتت لبشر اذاني واني كايلج إني استرد حقي وارجع الوجع الحسيته أضعاف لصاحبه

وهاي اني اليوم رجعتلج كل حسرة وقهر حسيتها من وراج اضعاف اضعافه

زبيدة : اباوعله تقرب ولزم وجهي باديه ثنيناهن

هارون : خليتج تحبيني وتحسين بالامان وياي وانطيتج امل بأنج تدورين السعادة والحب وياي اني دونًا غيري لكن للاسف اني ما حبيتج وعمري ما راح احبج انتِ اخر وحدة بهاي الدنيا ممكن يرف گلبي عليها

جؤ جؤ هاي ليش جاي تبجين لو اكلج اي ابجي اني اريدج تبجين

زبيدة انتِ كلش حنينة ههههههه يربي الغباء كلما اتذكر الموقف اخرب ضحك

زبيدة : مسحت دموعي بسرعة وانداريت عنه ومشيت بكل هدوء بدون لا اعلق ولو بكلمة وحدة

دخلت لبيت اهلي ودكيت الجرس الداخلي وضليت واكفه بمكاني لمن انفتحت الباب

ام حسن : خير ان شاء خير

زبيدة : شفت دادا طلعت ومن شافتني شهكت

ام حسن : يمه زبد حبيبتي شبيج ، ليش وجهج هيج اصفر وعيونج حمر

زبيدة : بلعت ريكي وجاوبتها ، دادا اني تعبانة شويه واجيت ارتاح هنا بغرفتي

ام حسن : شبيج امي شنو متعاركة ويه رجلج

زبيدة ، بعدين نحجي دادا بعدين ، من رخصتج

دخلت جوه وصعدت لغرفتي ، فتحت الباب ودخلت
رحت تمددت على جربايتي

كلامة يرن بأذني رن ، ما مستوعبه الصار قبل شويه
معقولة اني زبيدة يمر عليه هيج شي بدون ما اللاحظ

خلاني احبه وعلقني بي بدون لا احس تالي طلع يضحك عليه ويريد ينتقم مني

ضليت نايمة بمكاني وصافنه بالفراغ ، دموعي فجأة نشفن بعيني ، ما عندي اي ردة فعل هيج ضليت صافنه بلا هدف

طلع الصبح واني على حطتي نايمة ، لا تحركت من مكاني ولا حتى كمت صليت فصلت عن الدنيا كلها لدرجة اليحاجيني ما اسمعه شيكول

باوعت لدادا فتحت الباب ودخلت عليه هي وخالة وئام

ام حسن : صباح الخير زبد

وئام : هاا حبيبتي زبيدة البارحة كلتلي دادا اجيتي نمتي يمنا خير خوما بيج شي

ام حسن : عوفي الحجي هسه خلي ننزل اول شي نتريك سويتلج مخلمة بيض وطماطة ادري بيج تموتين عليها وشلون جاي خدرتلج يجنن

وئام : اي والله خلي نتريك الريحة شكت خشمي حتى كعدتني من النوم هههههه يله زبد

زبيدة : اذا ممكن اريد ابقى وحدي

وئام : على راحتج يگلبي هسه نصعدلج الاكل لفوك

زبيدة : باوعتلهن ومازلت على نومتي ، كلشي ما اريد واذا ردت شي راح انزل وهسه رجاءًا عوفوني وحدي

ام حسن : هاهي حبيبتي ولا يهمج ، يله ام معين امشينه خلي نعوفها وحدها

وئام : غير نفتهم شبيها اجتي فجأة وهسه مدري شبيها الوجه كركم صاير ومتقبل تحجي شي وكعتلي كلبي والله

ام حسن : ميخالف مصيرها تحجيلنا امشينا يله

زبيدة : اخذت دادا خالة وئام وطلعن واني رجعت لوضعي

اذن الظهر كمت توضيت وصليت ورجعت نمت ، اجت دادا توسلت بيه انزل اتغده وياهم بس مالي شهية ولا عندي القابلية احجي ويه احد او اشوف احد

لمن اجه الليل هدت عليه خالة وئام تصيح عليه لان من الصبح لسه باقية بدون اكل

كعدت على حيلي وباوعتلها ، خالة ما اشتهي اكل رجاءًا لتضغطين عليه وتأذيني فوك ما اني متأذيه

وئام : غير افتهم شبيج يا يمه ليش توجعين كلبي

زبيدة : مابيه شي بس مشتاقه لامي وابوية وشويه مضغوطة من مشاكل بيت جدي واجيت يمكم حتى
اريح راسي شويه

ليش تخليني ارجع لهناك واتأذى بالزايد ، لخاطر الله عوفيني هنا على راحتي تره والله مابيه احجي هواي
روحي خلصانه

وئام : بالي يمج والله

زبيدة : الله يطمن بالج لتخافين والله اني نفسيًا مداكدر اكل لو احجي حبابه فدوة اروحلج عوفيني

وئام : على راحتج

زبيدة : وانتِ دادا حبابة اي واحد يسألج عني كليله انج اسم الله مريضة ودزيتي عليه حتى ابقى وياج غير هذا الكلام لتحجين وما اريدج تصيحلي اذا اجه احد

ام حسن : التردي يصير

زبيدة : رجعت نمت وانطيتهن ظهري وهنه فهمن وطلعن

مر اسبوع واني عند بيت اهلي ، عايشة على المي واذا جعت اكل شويه والاكل ميثبت بجسمي اكله منه اذبه منا

اسبوع كامل اني مكضيته بس نايمة ما طلعت من باب غرفتي ولا حجيت ويه احد 4 مرات اجت بيبتي وعمتي بدرية ما طلعتلهن

لمن اجه جدي بنفسه لبيتنا فاضطريت انزله ، بعد ما اصر يشوفني

كمت من فراشي ، غسلت وجهي وبدلت ونزلت لكيته كاعد بالصالة ويه دادا وخالة يشرب جاي واول ما شافني نزل استكانه واشرلي اكعد كباله

كعدت كدامه وباوعتله

النوح : شلونج

زبيدة : زينه

النوح : بس شو وجهج يحجي غير هيج

زبيدة : لا متوهم اني زينه

النوح : ام حسن وئام من رخصتجن اذا امكن تعوفنا وحدنا

زبيدة : طلعن خالة وئام ودادا وهو اندار عيه

النوح : شنو الصاير بينج وبين هارون

زبيدة : ماكو شي

النوح : جذابة لوما صاير شي ما اجيتي هنا ولا هارون سافر بدون لا يكللنه

زبيدة : انصدمت من سمعته ، ههـ هارون سافر !!

النوح : وطلعتي متعرفين هم لا وتكليلي ماكو شي
ولكم انتو تضحكون على منو هو يصيح ماكو شي وانتِ تصيحين ماكو شي

لعد شنو الممكن يصير اكثر من هيج ، حضرته بيوم وليلة قرر يسافر ومن وصل للمطار بلغنا انه مسافر وغلق جهازة

وحضرتج عفتي البيت واجيتي لهنا بدون متحجين لو تنطين خبر لاحد

لا تقبلين تاكلين لا تقبلين تشربين ولا حتى تشوفين احد عبالج يعني سالفة انُ ام حسن مريضة راح تمشي عليه شايفتني زعطوط حضرتج

احجيلي شصاير بينج وبين هارون حتى هو هج وانتِ اجيتي هنا وحالتج حالة صايرة

زبيدة : ماكو شي وحتى لو جان اكو شي بيناتنا فهاي حياتنا الخاصة وما اعتقد يحق لاحد يتدخل بيها

انت قررت تزوجنا صح بس بعد خطوة الزواج هذا ميحقلك تخطي ، اني وهارون مو جهال حتى من يصير بيناتنا شي تجي انت تحله وتصالحنا

النوح : اعتقد كلامي واضح شنو الصاير بينج وبين رجلج اريد اعرف

زبيدة : واني اريد اتطلك

النوح : شنو شنو ؟

زبيدة : مو انت تريد تعرف شبينا ، واني داكلك إني تعبت من هالزواج واريد انفصل وراح احاجي المحامي يمشي بالاجرائات بأسرع وقت

النوح : اي على راحتج شكو بيها حاجي وتطلكي بس لتلوميني من راح اطلع هسه اخابر الدكتور واوقف علاج معين

زبيدة : انت ليش دتسوي هيج بيه ليييش

النوح : خلص افهميها يا زبيدة يا بنتي انتِ ممكن تنفصلين عن هارون بحالة وحدة بس وهو انج تموتين بس هاي الطريقة عندج

غيرها اني راح انقض الاتفاق البيناتنه بس تفكرين تتطلكين فصيري حبابه وحاولي تعالجين المشاكل البينج وبين هارون او تكليلي حتى اني اساعدج

غير هيج ماكو حل

زبيدة : كمت وصعت فوك ، سمعته يصيحلي وغلست عليه ، دخلت للغرفة وركعت الباب

رحت تمددت ومديت ايدي اكرص باديه ، لتبجين ، لتبجين محد يستاهل تبجين عليه

ما اريد ابجي ما اريد ، ورمن اديه كد ما كرصتهن بس في سبيل ما ابجي

سافر حتى يتونس اي حقه ليش ميروح يحتفل بهذا الانجاز العظيم الي سوا

مو عادي تنجح خطة شهور وبذل مجهود منه حتى يكسرني تالي يخلي الوضع يمر هيج بدون ليحتفل حقه والله حقه اني لو بداله هم جنت راح احتفل

غمضت عيوني ااااخ يا زبيدة ااااخ شسويتي بروحج وشلون خطيتي هالخطوة بدون لتفكرين شلون

انتِ العاقلة الراكزة شلون حبيتي وتعلقتي بي هيج وين راح قسمج وعهدج انج ما راح تحبين احد ليش من عاشرتي تخليتي عن كل اهم بند بحياتج

ليش صرتي مثل الكل ليش

الي صار مو بس كسرني لا خلاني افقد احترامي لنفسي ولاخر يوم بعمري

زبيدة خلص من ساعة النطقت ذيج الجملة ماتت وانتهت ومستحيل ترجع بعد

الله يساعدج يا امي هيج الحب من طرف واحد طلع يوجع

وينج يا حبيبتي هياتني اني داحس نفس الاحساس العشتي لسنين طويلة ، شلون كدرتي تتحملين هالكسرة واني اسبوع واحد ومكدرت اتحمله
لان ياكل بيه

هسه عرفت ليش جنتِ كل ليلة تنامين ودمعتج على خدج ، اثاري الشعور يوجع كلش يوجع

الحب الناقص يسبب الم صعب وغريب ، تحس وكإن اكو الم بس مو بجسمك لا ابدًا الالم يصير بروحك تحس روحك توجعك والمشكلة ما بايدك تسوي شي

واني هسه روحي دتوجعني كلش ، كلما اتذكر كلامه يزيد الالم عليه ومن اتذكر عيونه والله احس لسانه جان ديحجي شي وعيونه تحجي شي ثاني تمامًا

اني تعبانة ، مكسورة ، داخلي ينزف وما كادرة احجي ولو ردت احجي المن احجي ومنو الاله خلگي ويسمعني

من جنت طفلة جنت وحيدة ووجعي بگلبي وهسه من كبرت هم بقيت وحيدة ونفسي متنطيني اسولف واحجي الي بكلبي

وللاسف بهذا اليوم اكتشفت اني نفس امي بالضبط ما اشاركها بس بالشكل لا اثاريني شاركتها نفس الوجع
هي حبت الا الي ميريدها واني حبيت الميريدني

_________________________________

دنيا : تصرفات البنية الاسمها سجى ويوسف ابد ما عاجبتني

وين ما اضيع يوسف الكا واكف يحجي وياها وخصوصاً بالليل

حاولت اركز على تصرفات يوسف وياي جان كلش طبيعي ونفس طبعه واسلوبه وياي و ويه تيومي

رغن إني ممرتاحه ومعاجبتني الوضعية هاي بس مع هذا مكبره عقل وداشوف نهاية اللقاءات الليلة هاي شنو نهايتها

يوسف : دنيا باجر تداومين ؟

دنيا : ليش تريدني اغيب ؟

يوسف : والله ياريت لان اني باجر ماعندي شي وكلت ابقه بالبيت اشبع نوم شتكولين لو انتِ هم باجر مترحين ونطلع اني وياج وتيم نتغده بره

دنيا : ابتسمت ما دام السالفة بيها طلعه اكيف

يوسف : هاهي لعد خلي اروح ابلغ الوالد حتى ليخبصنا باجر الصبح وانتِ طلعيلنا فلم حلو خلي نسهر اليوم ما دام باجر ماكو دوام

دنيا : هههه اوك ، راح هو نزل جوه واني كمت شفت تيومي لكيته نايم ، طفيت التلفزيون وغطيته وطلعت

ادور بالنت على فيلم حتى نشوفه سوه ، طلعت واحد وشغلته على التلفزيون ورحت طلعت نمنمات للسهرة

جهزت كلشي وكعدت انتظر يوسف يصعد بس طول لمن مرت نص ساعة كمت حتى انزل اشوف وين راح
شسالفه كل هذا الوقت يبلغ عمو

لفيت الروح عليه واجيت اطلع بس دگ موبايلي شلته لكيتها امي تفاجئت شعجب امي تتصل بهالوقت من الليل

رديت عليها الووو ماما حبيبتي شلونج

وئام : هلا بعد عمري اني الحمدلله انتِ شلونج خوما نايمة وكعدتج

دنيا : لاماما شنو السالفة منو ينام الساعة بـ11 وحتى لو نايمة اكعدلج ليش جم وئومة عندي

وئام : حبيبتي امي انتِ اريد اطلب منج طلب

دنيا : امريني ماما

وئام : اريدج تجين انتِ وديمة باجر النا للبيت

دنيا : خير خو ماكو شي

سمعت سوتها انكتم وشهكت شبيج ماما ليش تبجين
وكعتي كلبي والله

وئام : دنيا زبيدة ابد موزينه ، صارلها اسبوع عدنا وحالتها حالة ، لا تاكل ولا تشرب وبس تتقيء اتوسل بيها اني وام حسن حتى ناخذها للدكتور ومتقبل

دنيا : سوده عليه شبيها ، انوب اني هالاسبوع ارجع بالاربعة من الدوام وما جاي الحك احك راسي ما سألت عليها ولا على ديمة يادوب داخابر معين

زين ما عرفتي شنو بيها وليش اجتكم شنو متعاركة ويه رجلها لو اكو احد ماذيها

وئام : ما اعرف والله هي متقبل تحجي ولا تنزل جوه صارلها اسبوع حابسة نفسها فوگ وبس من اجه جدج اجت نزلتلها عشر دقايق ورجعت صعدت

ففدوة باجر تعاي انتِ وديمة شوفن شبيها مردتلي كلبي بلكت انتن تفهمن منها شي هي اخيتج اكيد
ما راح تضم عليجن

دنيا : هاهي هسه اخابرها اكلها باجر اني وديمة حنجي وما راح افتح وياها اي موضوع

وئام : اي والله بعد گلبي زين تسوين

دنيا : تمام انتِ روحي هسه واني حخابرها ، سديته واتصلت گبل على ديمة

جاوبتني ، الوو هااا دمدوم شلونج

ديمة : هلو دنيا حبيبتي

دنيا : اكلج باجر فارغة انتِ ؟

ديمة : اذا علمود زبيدة فدادا هستوها خابرتني وسولفتلي على زبيدة حبيبتي كالت كلش مريضة

دنيا : هو اني خابرتج حتى اكلج باجر الصبح اني امرلج ونروح

ديمة : اني خابرت امين وكتله گلي ميخالف فأي باجر متمرين عليه تلكيني جاهزة والله اني هسه من يمي وكمت افور على زبيدة

دنيا : والله حتى اني وهسه اريد اخابرها اكلها باجر راح نجي

ديمة : تمام وعود رديلي خبر وطمنيني عنها حبابه

دنيا : صار ، سديته منها واتصلت بزبيدة ، يطلعلي موبايلها يرن ومتجاوب ضليت الح عليها اكثر من مرة ياله جاوبتني

بس صوتها كلش جان تعبان ومبينه كوه دتحجي

حبيبتي زبيدة شبي صوتج

زبيدة : جنت نايمة

دنيا : سودة عليه كعدتج من النوم

زبيدة : لا اسم الله عليج شنو هالحجي

دنيا : خابرتج داسأل عنج اسفه والله العظيم جنت مشغولة وحتى نوم مداشبع التهيت عنج انتِ وديمة سودة عليه

زبيدة : عادي ماكو اشكال لتتعذرين دنيا

دنيا : طمنيني عنج شلونج

زبيدة : الحمدلله

دنيا : عساج دوم ان شاء الله ، اكلج زبد سمعت من امي انج باقية عد اهلي هاي الفترة شنو رأيج نجي اني وديمة نبات عدكم ونتونس صار هواي مملتمين هيج لمه

زبيدة : اذا خالة لو دادا مخابراتج فماكو داعي ، اني مالي خلك دنيا وماعندي واهس لكلشي خليها على غير وكت حبابه

دنيا : فدوة عليج بداعة ماما وسيلة لتطلعين حجج احنه نريد نجي نغير جو

زبيدة : ليش تحلفيني

دنيا : لان ادري بيج اذا ما الواحد يحلفج ميحصل شي

حبابة والله كلش مشتاقتلجن اني وتيومي يسألني عنجن دائمًا وخاصة انتِ خلي نتلم باجر لخاطري
لتكولين لا

زبيدة : ماشي

دنيا : فدوة اروحلج وهاا من هسه انتِ تطبخيلنا لان مشتاقه لاكلج

زبيدة : ميخالف

دنيا : صدقة للي ميكسر بخواته ، دزيتلها بوسه يله حبيبتي اخذي راحتج واحنه باجر الصبح يمكم

زبيدة : هلا بيجن

دنيا : سديته منها وباوعت للساعة صارت بـ12 ونص ويوسف ماكو ، كمت رحت لغرفة بيت عمو لكيت الاضوية مطفايه ومبين من بره انهم نايمين

غيرت وجهتي ونزلت جوه دورت بالاستقبال والمطبخ ما لكيته ، دارجع فوك حتى اتصل عليه وصارت بوجهي غرفة العاملات

تقدمت فتحت الباب ودخلت لكيت الاضويه هم مطفاية باوعت لكيت واحد من الاسرة فارغ

طلعت بسرعة فتحت باب البيت وطلعت كبل للكراج
انصدمت من لكيت سيارة يوسف ماهي

لا سجى ولا يوسف بالبيت ، صفنت يا ترى وين راحو
رجعت صعدت فوك وكعدت انتظره حتى اتصال ما اتصلت عليه

صارت الـ2 ودخل يوسف شافني كاعدة انصدم

يوسف : هاي بعدج كاعدة

دنيا : دانتظرك تجي حتى نشوف الفيلم

يوسف : اسف حبيبتي حقج عليه والله بس من نزلت جوه تلكتني وحدة من العاملات

دنيا : سجى قصدك

يوسف : اي عفيه البنية جانت منهارة وتكول امها متخربطة من المغرب وهسه سائت حالتها كلش

فما كدرت اعوف البنية بهذا الحال رحت بسرعة اخذتها هي وامها طلعت بيهن للمستشفى

والمرة طلع سكرها مفول خطية ربج ستر وما ماتت
همزين الاطباء لحكو عليها

دنيا : مابديت اي ردة فعل بالعكس سويت الموضوع ولا كإنما اكو شي صاير

هاا اي الله ينطيك العافية حبيبي همزين اخذتها خطية متستاهل والله ام نجاح خوش مرة ذكرني عود باجر اطمئن عليها

يوسف : اي طبعًا حتى لامي گلي خلي تتحمدلها بالسلامة

يله حبيبتي نكعد نشوف الفلم

دنيا : لا حبيبي تأخر الوقت واني نعست خليها غير وقت وبالمناسبة اني اسفة باجر ما اكدر اروح وياك نتغده بره

يوسف : ليش !! اذا على سالفة طلعتي فالله شاهد جنت مضطر علمود البنية وامها ما كدرت اغلس واني اشوفهن هيج يلوبن

دنيا : لا يروحي شنو السالفة قابل اني ما اثق بيك بالعكس كتلك زين تسوي وربي يجعلها بميزان حسناتك

بس زبيدة اختي شويه تعبانه وباقيه عند اهلي واني وديمة دنريد نروح نشوفها ونبات هناك نغيرلها جو

يوسف : شنو شبيها خاف متعاركة ويه رجلها

دنيا : والله ما اعرف باجر اروح واشوف شنو سالفتها

يوسف : اذا هيج لعد روحي زبيدة اولى والطلعه ما طايرة غير يوم نطلع

دنيا : تمام حبيبي لعد اكعدك باجر الصبح تاخذني اني وديمة لو اكل للحرس

يوسف : لا عليمن حرس اني اخذج انتِ وديمة تدللن

دنيا : حبيبي فدوة لكلبك ، بسته ورحت نمت

ثاني يوم كعدت من الصبح حضرت ملابس الي ولتيم وكعدت يوسف ، نزلنا تريكنا وسلمنا على الكل ورحنا
اخذنا ديمة وطلعنا لاهلي

وصلنا للبيت ونزلنا ، عفت تيم يركض لبيتنا وضليت امشي ويه ديمة

ديمة : شبيج تباوعيلي هيج

دنيا : وضعج ما عاجبني

ديمة : ولا وضعج

دنيا : تنهدت خلي نتفرغ لسالفة زبيدة هسه ولكل حادث حديث

دخلنا للبيت وتلكتنا امي ودادا بوسناهن وسلمنا عليهن

وئام : طبين يمه خلن غراضجن بغرفتي وطلعن خلي نكعد سويه

دنيا : فتحت حجابي وباوعتلها لعد زبيدة وينها

وئام : بالحمام هسه تجي

دنيا : خوش ، كعدت واشرت لتيم على كيفك ماما لتوكع وتتعور

تيم : عوفي يلعب

وئام : ههههه بعد گلبي شحلاته صاير

دنيا : وكح وكح

ام حسن : كل الجهال هيج باجر يكبر ويعقل

ديمة : عوفكم من الجهال هسه سولفولنا شبيها زبيدة

دنيا : دتجاوبنا دادا ونزلت زبيدة ، كمنا حتى نسلم عليها وتفاجئنا من شفناها

اباوع وجها اصفر ليمونة الشفايف يابسه وعيونها كلها هالات حتى مشي كوة دتمشي

باوعت لديمة مصدومة ما توقعتها واصلة لهالحالة ، الله يعلم بحالتها شنو وليش صاير بيها هيج

راح تيومي يركضلها وهي كعدت بمستوا وحضنته بقوة

زبيدة : شلونك حبيبي

تيم : ذين

زبيدة : حبيبي ، شلونجن حبيباتي

دنيا : اجتي بوستنا عادي ولا كإنما اكو شي

كعدنا سولفنا بمواضيع عامة بس هي ابد بالها مو يمنا كلما ادور وجهي عليها الكاها لو صافنة على التلفزيون لو على الحايط

لحد ما ديمة صفگت بايدها ياله فزت

ديمة : وين شردتي زبد مو دنسولف وياج

زبيدة : هاا لالا وياجن اني

ديمة : صدك

زبيدة : حكوم اني اشوف الاكل

دنيا : ياحبيبتي احنه ما جايين ناكل جايين نشوفج ونكعد وياج وين كايمة أصلا بعد وكت على الغدة

زبيدة : لا ميخالف ما اكدر اعوف الاكل واريد اسوي لديمة وتيم محلبي ادري بيهم يحبو

ديمة : اي يله خلي نجي كلنا نساعدج

دنيا : خوش فكرة خلي نتونس بالمطبخ وهم نساعدج

كمنا وياها للمطبخ كعدنا نسولف وياها وهي وكفت على الطباخ تسوي محلبي وتجاوبنه باختصار

ديمة : شلونه هارون زبيدة

دنيا : اباوع لايدها وكفت ولمن كررت عليها السؤال ديمة ياله جاوبت بس صوتها مختنك

زبيدة : زين الحمدلله

ديمة : سمعت هسه من دادا انه مسافر شعجب مرحتي ويا

زبيدة : ما عجبني اروح

دنيا : ضلت هي تسوي بالمحلبي وتسولف فجأة شفتها ذبت الخاشوكة بالسنك وتشهك بصوت عالي

كمنا مخروعين عليها عبالنا انجوت لو صارلها شي وكفت يمها ولزمت اديها شبيج زبيدة شبيج حبيبتي

اباوعلها ادارت عليه وكامت تبجي ، وكعت گلبي والله
شبيج ولج

زبيدة : المحلبي فصص دنيا

وئام : فدوة الج يمه قحط تبجين على المحلبي فدوتج يمه

دنيا : كامت تنشغ وكعدت بالكاع غطت وجها وتشاهك من البجي خلتنا صافنين عليها

زبيدة : فصص كله فصص

ديمة : صدك تبجين على المحلبي مخبله انتِ

زبيدة : ليش فصص ديمة ليش

دادا المحلبي كله فصص محد يريده بعد

ام حسن : خلي يولي حبيبتي سوي غيره

زبيدة : بس اني اريده هو دادا اريده

دنيا : جانت تحجي وتبجي بطريقة تمر الگلب مرد اني مشايفتها تبجي هيج غير على ماما وسيلة وبابا

ديمة : حبيبتي زبيدة حتى لو فصص احنه كله ناكله بس انتِ لتبجين

زبيدة : ردته يطلع مثل ما اريد وصدمني من فصص

دنيا : كومي شو كومي خلي اغسلج ، كومتها من الكاع وغلست وجها ، اخذت ايدها طلعتها للصالة واخذت مي صبيتلها وشربتها

اسم الله حبيبتي على كيفج

بس كتلها هيج غصت بالمي ونزلت ايدي ، اباوعلها سندت راسها على القنفه ورجعت تبجي

مسحت على راسها شبيج يروحي ليش تبجين سولفي الي بكلبج يا حبيبتي احنه اهلج واليزعلج يزعلنا
سولفينا ليش تخوفينا عليج

زبيدة : تعبانه

ديمة : اسم الله عليج من التعب حبيبتي زبيدة شنو المتعبج احجيلنا

دنيا : شفتها مسحت دموعها وكامت

زبيدة : اني صاعدة فوك ارتاح ، اسفه ما راح اكل وياكم معدتي مدتستقبل اكل

الاكل كله جاهز والمحلبي ذبو بالزبالة ، من رخصتكم

دنيا : صعدت فوك واحنه ما حبينا نضغط عليها عفناها براحتها

ديمة : زبيدة مو طبيعية ابد شفتوها شلون جانت دتبجي على المحلبي

دنيا : جؤ زبيدة مجانت دتبجي على المحلبي السالفة اكبر من هيج

وئام : اني فكرت كلت يمكن لان رجلها سافر

دنيا : لا زبيدة شخصيتها اقوى واعقل من أنها تضوج
او تنهار بس لان هارون سافر

هو ممكن يكون صاير بينها وبينه شي بس هم شنو هالمشكلة الجبيرة الي تخليها تنتهي بهاي الطريقة

شفتوها انتو شلون صايرة مستحيل الصاير وياها يكون مجرد مشكلة

ديمة : واحنه شلون حنعرف شبيها وهي متقبل تحجي شي شفتيها انتِ هسه شلون تحججت وصعدت فوك

دنيا : ميحتاج تحجي هي

ديمة : لعد شلون حنعرف

دنيا : جريت حجابي وباوعتلهن عينجن على تيم هسه اجي

طلعت بسرعة لبيت جدي ، دخلت جوه لكيت بيبي وعماتي كاعدات سلمت عليهن

حمزية : شلونج بعد گلبي مشتاقيلج

دنيا : الحمدلله بيبي

بيداء : اختج الزعلانة شلونها

دنيا : تحجين وياي ؟ اني ماعندي اخت زعلانة

هيام : ليش زبيدة مو زعلانة

دنيا : لا ابد بس لان هارون ما موجود راحت لبيتنا حتى لتضوج منو گال زعلانة

تحبين اخابرلج هارون تتأكدين منه اذا زبيدة زعلانة لو لا

هيام : ليش هارون فتح موبايلة !!!

دنيا : ضليت باهته ما اعرف شجاوبها الظاهر هارون من اول ما سافر قفل جهازة لهالسبب تفاجئوا من كتلهم حتصل بي

ردت اركعها بس نقذتني نور النزلت من فوك تركض

نور : لك هلا بدندون شلونك گلب

دنيا : هااا هلوو نور حبيبتي رحت بوستها ، الله ينطيج العافية يا نور خلصتيني

ابتعدت وباوعتلها ، شلونج

نور : اسأل عنج حبيبتي

دنيا : ااا نور فدوة عندي مناسبة واريد فستان من زبيدة وكلتلي هي صعدي لغرفتي واخذي اليعجبج
عادي تجين وياي

نور : الغرفة مقفولة بس اكو مفتاح احتياط موجود بمكتب جدو امشي ناخذه مناك

دنيا : ايي اي هي زبيدة كالت يمكن تكون مقفولة

نور : لعد يله امشي

دنيا : صعدت وياها وبحجة داريد افتح موضوع كلت اسألها

اكول نور متعرفين شبيها زبيدة شو احسها ضايجة كلت خلي اسألج خاف متعاركة هي وهارون

نور : خلي اجيب المفتاح واجيج بالاول

دنيا : ضليت واكفه علما جابت المفتاح واجتي

نور : امشي بغرفتهم نسولف

دنيا : فتحت هي الغرفة ودخلنا

نور : نعلعلا بليسك هارون ريحة الغرفة تكتل من الجكاير

دنيا : اباوع للغرفة مهوسه ، بس الجرباية معدلة ، انتبهت لفراش ممدود بالكاع مخربط وبصفة باكيت جكاير الظاهر خلصان ونفاضه مال جكاير

من المنظر مبين هارون جان نايم هنا بس ليش نايم بالكاع ؟

هالشغلة صفنتني ، اكول نور هذا الفراش ليش مفروش هنا

نور : والله ما اعرف اني اول مرة اشوفه احتمال هارون مكادر ينام فغير مكان نومته حتى يغفى هو دائمًا هيج يسوي

دنيا : ممكن

المهم نور اني بصراحة احجيها الج وضعية زبيدة وسفر اخوج ابد ما عاجباتني

نور : ولا اني والله وكلش متوقعه يكونون متعاركين لان زبيدة صبحنا ما لكيناها وزبيدة مو من النوع الي تطلع بدون متنطي خبر لاحد

وحتى اني بنفسي رحت اشوفها وما قبلت تطلعلي كلت لام حسن تكلي انها بالحمام بس اني بيها دتجذب ومتريد تنزل

دنيا : زين باعي شنو رأيج تجين اليوم تباتين يمنا حتى نحجي بالتفاصيل لان هنا اخاف واحد يسمع

نور : لعد هاهي اني بالليل يمكم

دنيا : عشاج يمنا خوش

نور : تمام

دنيا : رحت اخذت فستان شلون ما جان وطلعت حتى لا اطلع جذابة كدامهم

رجعت للبيت وتغدينا بدون زبيدة لليل حضرنا العشه واجت نور

نور : هاا وينها

دنيا : فوك اني صاعدلتها انتِ استريحي

صعدت فوك ، دكيت الباب عليها ودخلت لكيتها نايمة ودموعها تنزل على المخدة

زبد حبيبتي نور اجت ، ما ردت عليه رجعت صحت بصوت عالي ، زبييييدة

زبيدة : ها دنيا

دنيا : نور بنت عمو جوه اجتي حتى تشوفج واحنه عزمانها على العشه

زبيدة : مالي خلك انزل عوفوني فدوة

دنيا : من رحت لبيت جدي اسلم البنية كلتلي انها زعلانة عليج

تكول اجيت داشوفها ودزتلي ام حسن تكلي هي بالحمام شنو شمسويتلها اني ومتريد تشوفني

حتى كامت تبجي خطية كسرت خاطري عبالها انتِ دتكليلها يعني بعد لتجين ما اريد اشوفج وهي خطية حيل متأثرة

بس اني كتلها انُ انتِ ماعندج هيج سالفة وعزمتها على العشه وحتى كتلها انتِ حتتعشين ويانا اليوم
ياله قبلت تجي

زبيدة : لهالدرجة زعلانة

دنيا : اي خطية لتكسرين بخاطرها

زبيدة : تنهدت وكمت يله جايه بس اغسل ، كمت غسلت ونزلت جوه

اباوع لنور بس شافتني كامت تركض ، حضنتني

نور : حبيبتي زبد شلونج مشتاقتلج هواي

زبيدة : الحمدلله اني هم مشتاقتلج والله

نور : والله البيت ماصخ بدونج

زبيدة : ابتسمتلها

دنيا : يله زبد تعاي كعدي اليوم اني سويتلكم بيتزا ضوكوها وانطوني

زبيدة : اني ما اكدر اكل بس حكعد وياكم

دنيا : ادري الدهن ياذيج سويتلج شوربة شوفان حتى تهدئ معدتج يله يله كعدو خلي اطلع البيتزا واجيكم
كومي وياي دندون

رحنا اني وديمة جبنا العشه خلينا على الميز واني ركضت خليت خاولي على ركبته تيم وانطيته قطعته بيتزا باردة وعفته ياكل ويباوع للتلفزيون

رجعت كعدت وبدينه ناكل ، هاا نور شنو رأيج بالبيتزا مالتي

نور : تخبل عاشت ايدج

دنيا : الف عافية حبيبتي

نور : اي زبيدة شلونج بالي كله يمج والله انتِ رحتي منا واني رجعت للضيم منا

زبيدة : شربت مي وباوعتلها منو وياج

نور : سكتي موسى مراويني الويل لسه شاد وياي من وره ذيج السالفة

دنيا : يا سالفة ؟

شرحتلنا نور الي صار بالتفصيل

ديمة : عزه ذوله شكد حقراء

نور : اااخ سكتي ديمة سكتي الله يساعد هارون ولا واحد ببيت جدي عايفه بحاله كل ساعة طالعيله بسالفة الله لا ينطيهم

دنيا : بس عاشت ايده من ما سكت الهم

وئام : اي والله مستاهلها الكتلة ذاك اليوم لعد يقيد اخو ويريد الواحد يسكت عنه حيل بي وابو زايد

ام حسن : اي والله صدك مستاهلها الكتلة

نور : لحظة خالة انتو منو كللكم هارون ضرب موسى علمود سالفة السلاسل

دنيا : لعد ليش ضربة

نور : سألن ست الحسن مدام هارون النوح ليش انضرب موسى

زبيدة : تحجين وياي ؟

نور : ليش منو مدام هارون غير انتِ

زبيدة : حالي من حالهم عبالي العركة الصارت علمود ذيج السالفة

نور : يااا يعني هارون ما كلج انه كتل موسى علمودج

زبيدة : علمودي اني !!

نور : ياا هاي طلعت متدري

لج باعي اني جنت واكفه بالبلكون مالتي وشفت موسى يتلكه هارون بالباب ويعد ويصف عليه

حجة حجي ما صاير انوب لاف عليج وگل لهارون الزم مرتك السايبة حشاج وادبها لان بعد اذا اسمعها تتجاوز عليه وتغلط احطها واكتلها بنص الوادم
ومحد يوكف بعيني ولا انت ولا جدك

هو گال هيج ومطله هارون بالكاع وطاحة بوكسات
وذاك كام يفشر عليج وهارون تخبل ركعه بوكس على حلكة وطاحله تدفر لمن خلا يفقد الوعي وانتِ تعرفين الباقي

زبيدة : انتِ متأكدة من هذا كلامج ؟

نور : والله العظيم اني سمعت الحجي بأذاني لان جانو يصيحون متشوفيني جنت اول وحدة هناك

زبيدة : بس اني سمعت هارون يگل لموسى عبالك افوتها الكم وجان يحجي على موضوع السلاسل

نور : راد يركعها حتى محد يذب اللوم عليج

زبيدة : وشمدريج انتِ

نور : هو اجاني وگلي لتحجين لاحد عن السمعتي بره واني كتله صار

ام حسن : وانتِ ما قصرتي خالة نشرتي السالفة نشر

نور : هههههه ادري بيكم حبابين وما راح تحجون

ديمة : هاي شنو زبد كل هالعركة صارت علمودج اووو شهالرومانسية هاي

اشو اسلام يصيحلي الفاهية وامين ولا مرة كتله علمودي

دنيا : دنجبي انتِ وين اكو مثل عيالج والله يخبلون

ديمة : اي والله فديتهم

زبيدة : احم دايمة ، آني اترخص

دنيا : وين كايمة حبيبتي ما اكلتي غير خاشوكة وحدة

زبيدة : ما اكدر والله والشوربة تخبل عاشت ايدج

وانتِ نور اني اسفة لان محكدر اكعد وياج كلش تعبانه ونعسانه اني

نور : على راحتج حبيبتي

زبيدة : صعدت فوك وكعدت لازمة راسي وكلام نور يتردد عليه

تعارك علمودي ، كل هالضرب الضربه لاخو لان فشر عليه !!

ودي اصدك بس مداكدر ، اباوع للباب انفتح ودخلت نور

نور : اني اسفة لان اجيت لهنا وانتِ تعبانه ومالج خلك بس والله ما كدرت اسيطر على نفسي

شبيكم انتِ وهارون ، انتِ من وحدج اجيتي لهنا وعفتي البيت وهارون خو حالته متتسولف

زبيدة : شلت اديه عن راسي وكعدت عدل

ليش شبي ؟

نور : غير وره ما رحتي ثاني يوم شكلت عنده النوبة
واجته 3 مرات وحرنه بي حتى بيومها جدي نام يمه بالغرفة هو وبيبتي خافو لا يتعارض

وبيبي تكول هاي اول مرة يصير ويا هاي الحالة اخر مرة شافو هيج من جان صغير

انوب تعاي شوفي كوه يقبل ياكل مكضيها يطحن بهالجكاير ويرجع لوره

تالي مدري شلون غافلنا وطلع وما خابرنا الا من وصل للمطار گال اني مسافر عندي شغل وراح اقفل موبايلي
لحد يقلق عليه

وهاي حيصيرله اسبوع مسافر وغالق جهازة محد ديكدر يحصله بس

زبيدة : بس شنو احجي

نور : الحجي بيناتنه وعليج القران مو تفضحيني وتكلين لهارون

زبيدة : احجي نور

نور : باعي هو كل يوم الساعة بـ1 بالليل يفتح موبايله ويتصل عليه يسألني عنج ويسده

زبيدة : يسأل عني ؟

نور : اي والله ، ديخابرني كل يوم يگلي شلونها زبيدة كاعدة تشوفيها ، جاي تطلع بيها شي

زبيدة : وانتِ ما سألتي ليش ديسأل عني

نور : سألته ورزلني رزالة غسل ولبس خلاني اتندم على عمري لان سألته

وهم هاج هذني

زبيدة : اباوعلها طلعت فلوس مشدودة بلاستيكة من جنطتها وخلتها كدامي

شنو ذني ؟

نور : هذني الفلوس عافهن هارون يم صاحب ووصاني اروح اجيبهن منه ومن اخذتهن گلي انطيهن الج واكلج جدي دزهن الج

وحلف انُ اذا دره بيه كايلتلج الفلوس منه يدكني بالنعال

زبيدة : واذا هو موصيج ليش تسوين هيج

نور : زبيدة انتِ وهارون حيل عزيزين عليه وميهون عليه اشوفكم بهذا الحال

وتره ميحتاج تحجون مبين انكم متتحاجون لان لو هارون يحاجيج ليش يخابرني يسأل عنج لا ويعوفلج فلوس يمي هم ويوصيني ما اكلج منه

انتو دتضحكون عليمن تره ادري بيكم متعاركين بس ما راح اسأل عن السبب لان حياتكم الخاصة وما احب اتدخل بيها واصير فضولية

على كل حال اني اجيت اسولف وياج وانطيج الفلوس
من رخصتج انزل يم البنات فشلة هسه يكولن هاي اجت بس على مود مرت اخوها وعافتنا

وهم عليج الله الحجيته لتسولفلي لهارون تره والله يكتلني

زبيدة : لا اطمئني ما راح اسولفله

نور : حبيبتي انتِ

زبيدة : طلعت نور واني باوعت للفلوس ، شلتهن من مكانهن وحركتهن كدام عيوني

اموت وافهمك اموت ، من باب دتنتقم مني وكل السويتة خطة حتى تكسر خشمي ومن باب ثاني
تخابر اختك تسألها عني وعايفلي يمها فلوس

خليتهن على الميز وكمت وكفت يم الشباك ، باوعت للحديقة وتذكرت الصار

هه على اساس اني ناسية داتذكر ، اووووف يا هارون اوف شجاي تسوي بيه وبروحك والمن تريد توصل

تنهدت وفتحت موبايلي داخلة على الانستا ما اريد افكر وابجي خصوصاً خواتي هنا وما اريد اخرعهن

فتحت حسابي وضليت اكلب بالستوريات ، فجأة صارت بوجهي صورة افتكار وزياد واطفالهم

اتذكر اني هي اخذت حسابي من جنه هناك تابعتني وتابعتها وكمت اتواصل وياها بين فترة وفترة

باوعت للصورة جانو طالعين وهي ماخذه سيلفي وناشرتها ومسويه تاگ لزياد

ضغطت على حساب زياد ودخلتله ، اباوع لحسابه كله عبارة عن سباحة وحيوانات

اول مرة اعرف انه يشتغل نفس هارون ، دخلت على الستوري مالت وطلع هارون بوجهي

بسرعة طلعت وجسمي كله كام يرجف عبالك شافني ، رجعت كعدت على القنفه وجريت هيتفوناتي لبستهن ورجعت دخلت على الستوري

رجعت على الستوري القبلة ، سمعت زياد يحجي ومخلي الكاميرا على هارون واكو هواي شباب
كاعدين وياهم

الظاهر ذوله اصدقائة لان الدنيا ليل ومبين كلهم ملمومين سوه

زياد : وهسه نصو اصواتكم وخلو العاشق الولهان يعزفلنا ويطلعلنا مشاعرة الجياشة

هارون : اكل تبن

زياد : هسه ناكلك حبيبي

: دسكت زياد رحمة للكعبة احنه ما عولنا نقنعه

: عمي انجبو وخلو ابو العكارب يعزفلنا والله مشتاقين

زياد : يله ابو الرون راوينا ابداعك ونظفلنا الطبلة

زبيدة : اباوعله شال الكلانيت خلا بشفايفه وبده يعزف موسيقى حزينة

اباوع لملامحة شلون تغيرت من بده يعزف والكل سكت ديستمع اله بإنصات

جان ديعزف موسيقى كلش مشهورة اسمها طمني عليك

واني بس سمعته بدون شعور بجيت ، احس الموسيقى هاي انعزفت بطريقة جديدة وكإني اول مرة اسمعها

انهالت عليه كل كلماته الزينة والموزينه ، انتهيت وعيوني ما كمت اشوف بيهن من البجي

مسحتهن بسرعة ورجعت اباوعله شلون يعزف وگلبي ممرود

لمن خلص فتح عيونه والكل كام يصفكله وهو ساكت حتى ابتسامة ما ابتسم

زياد : خرب عرضك ثقبت گلبي

: عمي اني ما معرس وحسيت بالفقدان شني هاي ولك

: احساسك عالي ابو الرون

: سويلنا اهداء هارون كول اهدي هاي المقطوعة لزوجتي الغالية

هارون : كافي اكلو تبن وانت لتصورني اني مو كايلك ما احب التصوير

زياد : هههههه يله يله راح اسده

زبيدة : خلصن الستوريات وسديت الموبايل مغمضة عيوني

هزيت راسي ، وضع هارون مبين ابد مو طبيعي شكله ابد ما مبين انه مرتاح

هو صحيح ملامحه من الاساس تبين حزينة بس هنا جان وضعه يختلف تحسه مهموم ولا كإنه مكيف او متونس

نزعت الهيتفونات وتنهدت اني ما لازم اسكت وهاي المهزلة لازم الكالها حل

كمت نمت وثاني يوم الصبح خابرت الشركة طلبت تكسي ورحت بدلت

بس وصل واتصل عليه طلعت بره ، لاكوني الحرس بالباب

: صباح الخير ست

زبيدة : صباح النور

: هذا التكسي البره لحضرتج

زبيدة : اي الي

: لو كايلتنا ست احنه نوصلج

زبيدة : لا شكراً جزيلاً ميحتاج ، طلعت بسرعة ركبت بالسيارة وانطيته العنوان بالمضبوط

ضل يمشي بينه واني كمت ارتب افكاري حتى اعرف شنو احجي

لمن وصلني للمكان الاريده ، تشكرته ونزلت واكفه كدام الباب وگلبي يريد يطلع من مكانه

سميت بسم الله ودفعت الباب داخلة لجوة ، طلبت موعد وكعدت

شويه وسمحلولي ادخل ، كمت دكيت الباب وخلت

السلام عليكم

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.