الموت الحي الفصل الحادي وسبعون 71 - بقلم براء الموسوي

مرحبا حبايبي العسل شلونكم ❤️❤️

••••••••••••••••••~•••••••••••••••••

قال تعالى

(يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ بِئْسَ الِاسْمُ الْفُسُوقُ بَعْدَ الْإِيمَانِ وَمَن لَّمْ يَتُبْ فَأُولَٰئِكَ هُمُ الظَّالِمُونَ")

صدق الله العلي العظيم

••••••••••••••••••~•••••••••••••••••

مشتاقين هواي 😍❤️

#الموت الحي
#للكاتبة براء الموسوي

ديمة : كاعدة وضامة راسي برجليه ، سمعت باب البيت ينطبك عرفته اجه

تنهدت بشوغه والله ماعندي عين اطلع واحجي ويا ، كلما استرجع الحديث السابق الدار بيني وبينه بودي اختفي

مدري بوقتها شلون لساني كدر ينطق كل هالكلام القبيح الحجيته بحقه ، شجنت احس بساعتها معقولة هان عليه اجرحه بكلامي هيج ؟

جان اكو الف طريقة اكدر بيها اطلب الانفصال ، ياما ازواج انفصلو بكل ود واحترام

ليش اني ما سلكت هذا الطريق ليش رحت جرحته وقللت من قيمته وهو لو طالع بايده يشعلي اطراف اصابعه وميكول لا

باوعت لروحي بالمراية ونزلت دموعي ، للاسف بلحظتها اكتشفت إني دائمًا من اريد ااذي اروح ااذي الناس الاحبهم ، بالاول اهلي بسبب راسل وهبه وهسه امين بسبب جهلي وصداقاتي الفاشلة

تنهدت ومسحت دموعي ، طلعت من الغرفة ورحت للمطبخ لكيت الباب البره مفتوحة وامين كاعد
عالارضية

تقربت منه شفته لازم جكارة بايده ، تفاجئت هاي اول مرة اشوفه لازم جكارة بالعادة هو ابد ميدخن حتى
جداحة ماعنده

تحمحمت حتى ينتبه الي

السلام عليكم

امين : وعليكم السلام

ديمة : احم ليش كاعد هنا ، محتاج شي ؟ تحب اسويلك شي ؟

امين : شعندج طالعة

ديمة : جريت نفس وثنيت رجليه كاعده كدامه ، عادي احجي وياك شويه

امين : لا مو مو عادي ورجاءً طبي جوه ولتغثيني تره البيه كافيني

ديمة : حباب عليك الله لتخجلني ، صدكني ما راح ازعجك ولا اسويلك شي بس احجي وياك واروح

الله يخليك انطيني فرصة اكعد واتفاهم وياك ، امين اني حتخبل انت مدتروح من بالي فكرة إني زعلتك
مني وجرحتك دتمردني مرد

بداعة كل لحظة حلوة عشناها سوه انطيني من وقتك ولو ربع ساعة بس اسولف وياك و والله من بعدها شتريد اسويلك بس خليني احجي الي بكلبي

امين : انتِ ليش مصرة تضوجيني ، ديمة تره اني ما ناقص والله

ديمة : الله يخليك بداعة خالة عليك ، فدوة ربع ساعة مو اكثر

ما رد عليه واني اخذت سكوته على انه رضى ، تقربت كعدت بصفه ولميت رجليه لصدري

تنهدت وبديت اسولف ويا

باوع امين اني اعرف كلامي باخر مرة كلش جرحك واذاك وحقك شما تحجي وياي ، حتى لو متقبل تباوع بوجهي بعد هم اعذرك واصلا مالي كل حق الومك

بس صدكني امين اني مو سيئة لهاي الدرجة المتصورها انت

امين : ههههه لا استغفر الله اني السيء الادور مظاهر وهمي بكل هالحياة الفلوس

ديمة : يمكن الكلام الراح احجي ما راح يعجبك ولا حتى تشتهي تسمعه مني بس اني لازم احجي ما اكدر
اشوفك بهالحال واضل ساكته

اباوعله اخذ نفس من الجكارة وجاوبني

امين : احجي احجي شورانه كاعدين ، انتِ عندج لسان يحجي واني عندي اذن تسمع وگلب يتحمل

ديمة : الراح احجي مو مبرر ابد ولا حجة اضم نفسي وراها بس اني اريد احجيلك عن نفسي من الصفر
عسى ولعل تفهم موقفي ومنظوري للي صار

اني انولدت ببيت وعائلة اكبر همها وين راح تسافر بالصيف وشلون راح تحتفل براس السنة وشلون راح
تبين مثالية كدام الناس

وعيت على الدنيا واني كلشي اريده الكا حاضر ومُجاب بدون لا ابذل اي مجهود

عندي سيارة خاصة تحت تصرفي وين ما اريد الكاها جاهزة تاخذني للمكان الي يعجبني

اكلي وشربي ولبسي حتى صالوني يجيني لغرفتي ما اطلع لمكان الاريده هو يجيني

العودة مجنت احركها من الكاع ، جنت عايشة بعالمي الخاص لا الي علاقة باحد ولا اشوف احد كل الي جنت اسوي إني اتمنى واعيش

ما فديوم نمت جوعانة ولا ضجت لان ما كدرت احصل شي معين ، تعلمت من اني وصغيرة كلشي اريده احصله

وبدون حتى لا اتعب نفسي بكثرة الكلام اكول اريد فلان شغلة وبدون كلام زايد راح تجيني

كلمة لا و ميصير ممسوحة من قاموس حياتي وعمري ما سمعتها غير على الامور البيها مضرة الي

من دون خواتي اني جنت ماخذه الدلال مضاعف ، امي وماما وسيلة وبابا ودادا جانو يحيرون شنو
يسوون الي بس في سبيل اكون راضية

كبرت واني البنية الجميلة ، الحلوة الي الكل يحجي بجمالها وفلوسها وسمعت اهلها

من اني وصغيرة تعلمت إني اشوف نفسي احسن من الكل واعلى من الكل ، مجنت اتقارن باحد و ولا مرة سمعت كلمة فلانه احسن منج ، احلى منج ،
اسعد منج

بالجمال جنت اني سابقة الكل ، بالفلوس هم مجانت اكو بنية عايشة حياتي وحتى لو اكو فما راح تكون
بسعادني حتى بالشطارة جنت اني الاشطر ، الاذكى
والمحبوبة اكثر

نزلت دموعي واني استرجع ذكرياتي وحياتي قبل ، تنهدت ورجعت اكمل لو شكد ما احجيلك عن الحياة الجنت عايشتها ما راح اكفي

ويمكن اوصل بالوصف لدرجة تحسسك إني دابالغ بس صدكني كل الكلام الداحجي صاير بالملي وخالي
من المثاليات والتفاخر او التعالي هي مجرد حقائق داسولفها الك

اني جنت من اسعد الاشخاص بهاي الدنيا ما جنت متخيله بيوم وليلة حياتي راح تتغير هيج وبهاي السرعة هم

فجأة لكيت اهلي مفلسين من كلشي ، اخوية باكنا وشرد وامي وكعت وانصابت بالسكري ، ابوية خسر
شركاته وكعد على الحديدة

الظروف اضطرتنا نتخلى عن كلشي ، حرفيًا عن كلشي
بيوم وليلة ، خسرنا بيتنا ، سياراتنا ، شركاتنا وحتى
علاقاتنا بالناس

انتقلنا لمنطقة عمري وحياتي ما جنت متخيله إني ممكن امر منها مو عاد اعيش بيها

بيت يخنك كد ما صغير ، غرفتي الجبيرة صارت مخزن صغير لمني اني وخواتي والدادا مالتنه

اربع نفرات محصورين بغرفة تشبه القبو متكدر تتحرك بيها منا لهنا

بيت ما بي غير حمام واحد واحنه 7 نفرات نوكف سره حتى ندخله

جنطتي فجأة فرغت واذا انملت فما راح يمليها غير خمس آلاف لو عشرة بالزايد والمفروض إني اقتصد
بيها

بينما سابقًا اني وخواتي كل وحدة منه الها راتب خاص بمبلغ ثابت بابا ينطي النه كل شهر

امين : شكد جان يطيجن

ديمة : مليون ، كل وحدة منه جان هذا مصروفها كل شهر وطبعًا هالمبلغ جان بس مستلزماتها الشخصية بعيدًا عن الأكل والشرب والسفر والخ من الامور

اني مو عيني فارغة ولا مشايفه يا امين بس عشت عشرين سنة من عمري بهاي الحياة مو سهلة عليه
اتأقلم وانزل لهذا المستوى ولا كإنما صاير ويايه
شي

الاشياء الجنت اشتهيها واريدها اضطريت ادوس على نفسي واسوي روحي مشايفتها حتى لا ابويه ينتبه
ويضطر يجيبها الي وهو ماعنده

شهر وره شهر يمر علينا واحنه غير الطماطة التگلا والبيتنجان مناكل بعد ما جان الاكل على حطته نشيله ونذبه بالزبل اذا مو جوعانين

تالي الزمن خلانا نتحسر على هاي النعمة الجنه نذبها ومنعرف قيمتها شنو

تصدك جنت قبل اكول على بعض البنات الي وياي بالكلية انهن معقدات وشايلات خشمهن لمجرد انهن
جانن يرفضن يكعدن بإي جمعة ولا يرضن يطلعن
ويه كروبنا للمطعم

بعدين اكتشفت انُ اغلبهن جان وضعهن مثل وضعي ،
يخافن يثكلن على اهلهن لو يستحن لا ينحطن بموقف
محرج بسبب حالتهن المادية الضعيفة

اني صرت مثلهن كمت اتهرب من الطلعات والجمعات ويه زميلاتي في سبيل ما انحط بموقف محرج بعد ما جنت اني محط استغلال لبعضهن

اي لتباوعلي هيج ادري بيهن جانن يستغلني بحجة
الوالد كريم واحنه نستاهل ، جنت ادري بيهن يستغلني حتى يتونسن براسي

ومع هذا جنت اكيف وما ادير بال ، هه جنت احب منظري واني متفضله عليهن ، موكلتهن ومشربتهن
ومونستهن بفلوسي

امين : يوم عن يوم جاي تصدميني بيج اكثر

ديمة : ما الومك اني هم ساعات جنت اتفاجئ من نفسي وتصرفاتي بس اغلس او احاول اتناسى انُ الداسوي غلط

اعرف اني مو مثالية ويمكن ابين عبدة فلوس وحقيرة مثل مكلت لكن مع هذا اني ما اكدر ازيف مشاعري
شكد احاول ابين قنوعة ومتعايشة واموري تمام التمام بس ما اكدر

الشي الي اني ممقتنعه بفكرته لو مهما احاول ما راح اكدر ازيفه او اتقبله ولا بأي شكل من الاشكال

امين : واذا انتِ تدرين بروحج مو قنوعة ليش قبلتي بيه واذيتي روحج واذيتيني وياج

ديمة : اذا اكلك انت جنت الخلاص بالنسبة الي راح تصدكني ؟

اباوعله نظرلي نظرة استفهام

من اول ما وكعت وانت اجيت ساعدتني وتكررت المواقف بيني وبينك كمت ارتاحلك ، من وقتها واني
كمت اشوفك انسان نظيف

ولا مرة شفتك تباوعلي بنظرات مو حلوة ، دائمًا من جنت تسولف ويايه الكاك مدنك حتى مترفع راسك
عليه

انت جنت بالنسبة الي شي نقي اول مرة التمسه برجال ومن اجيت اعترفتلي بالزيارة وكتلي انك شفت صورتي وضميرك كام يأنبك وتريد تخطبني حتى لتوكع بالحرام اكثر مردتني مرد

ما جنت متوقعه إني التقي بإنسان نظيف وطاهر لهاي الدرجة ، انت من الاشخاص النادرين بهاي الدنيا ومهما صار بيني وبينك اني ما ممكن اغير هاي الفكرة عنك

امين : ولهذا السبب قبلتي بيه يعني

ديمة : حتى اكون صريحة وياك لا مو هذا السبب ، اني جنت امر بأزمة صعبة وانت جنت خلاصي من هاي الازمة ولهالسبب قبلت بيك

امين : وشنو هاي الازمة

ديمة : تنهدت وجاوبته ياريتني اكدر احجيلك الي بكلبي ، ياريتني اتجرئ واكدر انطق بالكلام المحفور بداخلي بس والله ما اكدر

مديت ايدي خليتها على ايده ، ضغطت عليها وغمضت عيوني ، امين اني اسفه على كل الي
بدر مني تجاهك

اني هواي اذيتك وجرحتك علمود مصلحتي ، جنت كلش حقيرة وعديمة احساس مدري شلون انطاني
كلبي اعامل انسان نقي ونظيف مثلك بهاي الطريقة

صدقًا انت متستاهل وحدة مثلي ، انت تستاهل وحدة
نظيفة مثلك تكون مهووسة بالاطباع الحلوة والنقاء
الي بداخلك

وحدة عبدة فلوس مثلي مستحق نظرة من عيونك ،
هذا الحب والاهتمام اني ما استحقه لان هواي
اذيتك

امين : وشمعنى بهالوقت ياله كمتي تحجين هالشكل مو قبل جم يوم جان كلامج غير عن هسه

ديمة : الي صار إني اكتشفت نفسي غبية ومغفلة وما اتعلم من اخطائي واستاهل كلشي يصيرلي

على كل حال اني كل الاريده منك تسامحني حتى لو متكدر حاول الله يخليك حاول انت مو شويه بالنسبة
الي حتى لو ما جنت احبك بس انت صديق مقرب وحنين ما اريد اشوف بعيونك نظرات الخذلان
هاي

ادري طلبي صعب بس لخاطر المشاعر الحلوة الجانت موجودة بداخلك تجاهي حاول

اعوفك ترتاح ما اريد ازعجك اكثر

طبطبت على ايده وكمت داخلة جوه بدون لا انتظر منه جواب على كلامي

________________________________

عقيلة : منو هذا المدگدك ؟

زبيدة : تلقائيًا انداريت على هارون لكيته رافعلي حاجبة

عقيلة : مو جاي احجي وياج هذا منو ؟

زبيدة : فززني صوتها ، هاا اي ، اشرت على هارون وابتسمت اعرفج خالة هذا زوجي

عقيلة : هو هذا ابن هيام مو ؟

زبيدة : اي خالة هو

عقيلة : ما استغربت نسخة من امه تكول زايعته وكايمة

هارون : زايعته !!

زبيدة : احم شنو خالة متسلمين علينه كومي دابوسج مشتاقتلج

عقيلة : شسلم واني شفت هالشوفه المابيها خير ، شسم رجلج كتيلي ؟

زبيدة : هارون خالة اسمه هارون

اباوعلها ذبت السجينة ولزمت راسها عايطة بصوت

عقيلة : عمت عيني كون انوب اسمه هارون الرشيد

زبيدة : على بختج خالة يا رشيد هذا اسمه هارون بس هارون

ما سامعه بالنبي هارون (عليه السلام) همه اهله مسمي على اسم النبي

عقيلة : ولججج اااااخ لعد يا خالة انتِ عنستي عنستي تاليتج صمتي وفطرتي على هذا

مدكدك ومطبرلي حواجبة ولابسلي اسوار وفوك كل هذا اسمه هارون الرشيد عمت عيني عليك يالكاظم
سودة بوجهي عليك

تفففف من طاحظج على هذا الاختيار

زبيدة : انداريت على هارون لكيته ضام اديه وصافن عليها ،ملامحه باردة بس يباوع بصمت

يربي هاي بس لا راح تضل تغرد هيج وهذا هارون ماعنده لحية مسرحة هسه يمطلها هنا ومو بعيدة عالواهس يمطلني وياها

هسه خالة جلبتي بالاسم عوفي لخاطر الله مو جايين احنه ومتعانيين علمودج طحتيلنه رزايل من طبينه لسه

عقيلة : محد جبركم على الجيه والله ، على كل حال ما علينه ، شلونك ولك اهلك شلونهم

هارون : الحمدلله

عقيلة : انت اصغر اخوتك مو

هارون : اي

عقيلة : وشبيك ترد من وره خشمك وگالب خلقتك شنو بس لا مان عليه بجيتك

زبيدة : احم ، لا خالة هو هارون وجهه عزائي من الله

عقيلة : جده منو عشتو كلكم نفس الطينة اعوذ بالله

زبيدة : اني اكول لو نبدل ملابسنا ونرتاح وبعدين نسولف افضل

عقيلة : ذيج الغرفة روحو ارتاحو عيني ، بزر نستله ميتحملون يوكفون هواي عشتو

هارون : استغفر الله

عقيلة : الف مرة مو مرة

زبيدة : ابتسمت بوجها من رخصتج خالة بس بإي غرفة راح نكعد الفوك لو الجوه

عقيلة : ماكو صعدة فوك تنامون جوه بغرفتي

زبيدة : طيب وانتِ وين حتنامين

عقيلة : هم جوه

زبيدة : وين يعني ؟

عقيلة : بغرفتي يعني وين بالمطبخ

زبيدة : تردين ننام كلنا بنفس الغرفة !!

عقيلة : ليش يمه بس لا ما عاجبج

زبيدة : لا طبعًا عاجبني هاهي براحتج خالة

هارون : شنو براحتها انتِ مسودنه شنو ننام سوه ؟

عقيلة : والله هذا الموجود تردون اصعدكم فوك حتى اذا طب حرامي يكتلني وانتو تاخذون حلالي عشم ابليس بالجنة فلس احمر ما الكم

هارون : شهالدراما هاي

زبيدة : امشينا هارون للغرفة بعدين نتفاهم

هارون : اللهم طولج ياروح

عقيلة : تعال ولك تعال شكلت ، صارلك ساعة تخوزر بيه وتدردم عليه عبالك ما اسمعك كتلي الكبر لفج

هارون : اني كتلج هيج !!

عقيلة : اي اني سمعتك

هارون : ما شاء الله سمعتج كلش قوي

عقيلة : قل اعوذ برب الفلق ، اسم الله عينك باردة ان شاء الله تريد تحسدني عمت عينك كون دكول ما شاء الله

زبيدة : ياا خالة على بختج شنو السالفة شهالحجي

عقيلة : انجبي انتِ والله لوما ضيوفي انتو جان طردتكم بس اني صاحبة واجب وما اسويها

يله امشو ولو للغرفة يييييله ما اريد اشوفكم امشو نامو وارتاحو مو بعدين تطلعوني ما موجبة ومقصرة وياكم سرا***

زبيدة : شفت هارون يريد يهد عليها ركضت جريته ومشيت للغرفة ، دخلته وسديت الباب

اباوعله ضام اديه ويباوعلي ببرود

ششـ شبيك ؟

هارون : هي هاي خالتج المريضة المتكدر تكوم منا لهنا ويخافون يعوفوها وحدها !!

زبيدة : بلعت ريكي وابتسمت حاكه راسي ، اي

هارون : صدك والله

زبيدة : والله

هارون : شالج الله

لج ليش تجذبين البارحة سويتيلي خالتج حتى للحمام متكدر تروح تالي متالي طلعت اني المريض مو هي

استلمتنا حاصل فاصل اكلتنا وشربتنا اذا هاي مريضة لعد الصاحي شلون يصير

زبيدة : والله العظيم ما جذبت عليك هي فعلاً مريضة ولتشوفها تحجي تره بس لسان الله وكيلك كلشي ماكو

فدوة هارون تحملها ولتسويها سالفة مرة جبيرة قابل تعتب عليها مثلاً ، اعتبرها بمقام بيبي حمزية وغلس عنها

هارون : اذا عالحجي يمشي بس شلون ترديني انام وياها بنفس الغرفة والله مترهم

اني رجال اريد انزع اصخم اخذ راحتي بنومتي شلون ترديني ارتاح واني متقيد بوجودها وياي بنفس الغرفة

زبيدة : متكدر تحمل هو اسبوع يمضي ونرجع للبيت لتضل تاكل كلبي

مرة جبيرة شنسوي مجبورين نتحملها وانت هم تحمل شويه مو اله تتصلخ وتنام ، اصلا الجو برد مو مال تنام بدون ملابس

هارون : ما اكدر

زبيدة : تنهدت لازمة راسي ، يا حبيبي والله اعرف متكدر واني هم ما اريد ننام وياها بنفس الغرفة بس شنسوي

وتره لتشوف خالتي هيج وعبالك تتعمد حتى تخبث علينا تره خطية تخاف تنام وحدها بس متريد تبين

هارون : شهالكلاوات هاي شنو طفلة هي

زبيدة : مو سالفة طفلة بس خطية قبل سنتين بناتها عايفاتها وحدها وطافر عليها حرامي بايك ذهبها ومن
شايفته وكايمة تصيح راجع عليها مملخها تملخ ومن كد ما ضاربها مخلي دمها بطولها تالي من شافها فقدت عافها واخذ الذهب والفلوس وشرد من البيت

ومن يومها صار عدها رهبة وكامت تخاف تنام لو تبقى وحدها متشوف بناتها متخبلات وميكدرن يعوفنها وحدها خطية اذا بقت وحدها حتى بجي تكوم تبجي تفرفح روحها من الخوف

واني لهذا السبب جاي اكلك خلي نتحملها بس هالاسبوع خطية ما عدها احد وهم نكسب بيها
ثواب

شبيك يا هارون شادها كلش يعني انت تحن عالحيوان ومن توصل لبشر مريض وضعيف تبطل

بسته من فكة تحملها لخاطري ولتتجاوز عليها وتحرجني حباب هو اسبوع يطب منا يطلع منا

اباوعله تنهد ومسح وجهه

هارون : هاهي

زبيدة : ابتسمت لعد يله حطلعلك ملابس حتى تبدل وترتاح من الطريق

هارون : اريد اسبح

زبيدة : طلعتله تراك وخاولي ، تفضل هاي هدومك والحمام بالصالة تلكا على ايدك اليمين

هارون : اكلج صدك ، اني جوعان ، اكو مطاعم هنا حتى اطلع اجيبلنا شي لان نسيت بالطريق اخذلنا اكل

زبيدة : فتحت قميصي وجاوبته ، لا عليمن هسه اسوي شي على السريع ميحتاج تطلع

شلت راسي لكيته صافن عليه ، شبيك تباوعلي هيج ؟

هارون : راح تبدلين كبالي ؟

زبيدة : نزعت القميص وبقيت بالتوب ، باوعتله وابتسمت

شبيك وجهك صار اصفر ، صحيح اني جريئة على كولتك بس اكيد ما راح اوصل لمرحلة ابدل كدامك

اطمئن بعدنه ما وصلنا لهالمرحلة بعلاقتنا اكو حدود ما زلت حريصة إني احافظ عليها

غمزتله

يله اطلع اسبح لبين ما اني اكمل تبديل واطلع اصلي
حتى اعزل المطبخ واسويلنا اكل

طلع هو واني بدلت وطلعت غسلت وتوضيت ، اخذت السجادة من يم خالتي فرشتها وبديت اصلي ، كملت وكعدت شويه على السجادة اريح ظهري

عقيلة : متغدين ؟

زبيدة : لا

عقيلة : اكو واحد يجي بالوحدة وما متغدي

زبيدة : قابل تردين الناس تصير مثلج تتغدين بالـ11 جنج دجاجة

عقلية : اكلي تبن

زبيدة : اشكرج

عقيلة : هلا بيج

زبيدة : بيج اكثر

عقيلة : اكلج

زبيدة : نعم خالة كولي

عقيلة : اني مسوية تمن وبامية ، واكو جاي هستوني مخدرته اذا تردون تغدوا وشربو جاي

زبيدة : لعد اذا طابخة ليش تشلعين گلبي بسوالفج

عقيلة : كيفي والله

زبيدة : ضحكت وهزيت راسي والله سوالفج يا خالة

كمت ولميت السجادة خالتها على صفحة ، دخلت للمطبخ خليت الاكل على نار ناصية وكمت ارتب الغراض بالثلاجة

شويه وشفت هارون دخل للمطبخ ينشف براسه ، هاا حبيبي نعيمًا

هارون : الله ينعم عليج ، تحتاجين اساعدج بشي

زبيدة : لا روح صلي واكعد ، انت الطريق كله اجيت تسوق لازمك راحه واني هسه دقايق واصب واجيك

طلع واني رجعت اكمل ، عزلت المسواك وصبيت الاكل وطلعت لكيته كاعد كبال خالتي ، هو يباوعلها وهي تباوعله

للامانة منظرهم

خليت الصينية وكعدت يمه ، انطيته خاشوكة وبدينه ناكل

عقيلة : اكلك صدك ولك انت شتشتغل

هارون : طبيب بيطري

عقيلة : دكتور مال حواوين يعني

هارون : اي

عقيلة : لعد متشوفلي دجاجاتي خاف مريضات بيهن شي شو صايرات خاملات

هارون : طبيعي راح يجي الشته والحيوانات تهدئ بهيج اجواء

عقيلة : متفحصهن الي بعد روحي حتى اتأكد من سلامتهن ، سودة عليه مالهن غيري ومالي غيرهن
ونيساتي ذني

زبيدة : اباوعلها غطت عيونها بالشيله وكامت تون

هارون : لتشيلين هم حجية افحصهن الج وببلاش هم

عقيلة : وهم عايزلك تفحصهن بفلوس والله حلوة لامته ببيتي ويريد مني فلوس عشتوو

هارون : كتيلي تردين نبقى هنا اسبوع

زبيدة : اي

هارون : وجعي

عقيلة : شكاعدين تبسبسون اذا جاي تحجون عليه ما باريتلكم الذمة تره

زبيدة : لا خالة مو عليج بس هارون ديكول انه نعسان واني كتله بس نكمل غدة نروح ننام

عقيلة : اكو فراشات نظاف بالاستقبال روحي جيبيهن وفرشيهن بالغرفة

زبيدة : تمام ، كملنا اكل واني كمت بسرعة شلت الصينية غسلت المواعين وطلعت فرشتلنا بالكاع

يله حبيب تفضل ، تمدد واني نمت بصفه ، تغطيت وغفيت بدون لا احس على نفسي

ما فزيت غير لمن شبعت نوم ، كعدت ومطيت جسمي ااااخ يمه جسمي تكسر من النوم ، باوعت لفراش هارون ما لكيته

انداريت على جرباية خالتي لكيتها نايمة بشيلتها وتشخر

سحبت موبايلي فتحته لكيت الساعة بالـ2 بالليل اووو حيييل هاي شكد نمت

كمت من الفراش وطلعت من الغرفة ، رحت غسلت و توضيت حتى اصلي ، كملت صلاة وكمت ادور على هارون ما لكيته لا بالاستقبال ولا بالحمام

دخلت للمطبخ هم ما لكيته ، استغربت هذا وين راح ، هستوني داخابر عليه وانتبهت على باب المطبخ مفتوح و مردودة بابه

سحبت الباب وطلعت لكيته كاعد بالحديقة قريب كن الدجاج ولازم بايده موبايله يكلب بي

لزمت كلبي وحاجيته ، هاي انت هنا واني صارلي ساعة ادور عليك خوفتني عبالي بيك شي لو شو وين رحت

اباوعله نزل موبايله واشرلي بايده

هارون : تعاي

زبيدة : تقربت منه وهو جر ايدي كعدني بين رجليه و لف اديه على خصري

لزمت اديه الحاضنتني ورجعت راسي على صدره متنهده براحة

هارون : ستوج كعدتي مو ؟

زبيدة : اي وانت ؟

هارون : بـ12 كعدت شبعان نوم

زبيدة : اممم لعد ليش ما كعدتني وياك

هارون : شفتج غاطه بالنوم ومبينه تعبانة فعفتج على راحتج

زبيدة : رفعت ايدي ومسحت على خده ، تعشيت لو لا ؟

هارون : اكلت جبن وجاي وانتِ اكيد ما ماكله ؟

زبيدة : اي

هارون : اسويلج اكل ؟

زبيدة : ابتسمت لا ما اشتهي

باوعت لموبايله وشفت صورة طفل بالشاشة ، ابتسمت بتوسع واخذت الموبايل منه

يمه صدقة هذا منو بس لا انت ؟

هارون : اي اني

زبيدة : الله هارون شنو هالجمال ، باوعتله ورجعت باوعت للصورة

جانت الصورة لطفل ابيض وسمين ، شعره بني فاتح ولابس تراك شتوي لونه برتقالي ومسوي حركة بوجهه بحيث طالعة أسنانه

يربي كزكزت والله ، هههههه عزه لالا ما اصدك هذا انتتت

باوعتله لكيته مبتسم بدون ليعلق

تصدك ولا عبالك الي بالصورة هو نفسه انت

هارون : مو بس انت مستغربة كل اليشوفني يتفاجئ
وميصدك اني نفسي صاحب هالصورة

باعي هاي الصورة كلش احبها

زبيدة : اخذ الموبايل وطلعلي صورة لابس بيها كلبية ومتشابگ هو ومجموعة ولد ويضحكون

ههههههه فدوة تجنن بس منو ذولة الوياك

هارون : هذولة اصدقائي الجنت اطلع العب وياهم بالشارع

زبيدة : و وين صارو هسه ؟

هارون : كلمن راح لحال سبيله بعد وما التقينه

زبيدة : ما حاولت تدور عليهم او تسأل عنهم ؟

هارون : لا

زبيدة : ليش ؟

هارون : ما اريد التقي بيهم

زبيدة : حسيته ميريد يحجي بالموضوع فعفته على راحته

ضليت اكلب بالصور واضحك ، مجانن هواي صور يادوب 6 او 5 صور ، كملت تكليب وشفت باقي الستوديو مالته عبارة عن حيوانات وأطفال

بالمناسبة مبين عليك تحب الاطفال

هارون : جؤ مو احبهم بس اشفق عليهم

زبيدة : ليش ؟

هارون :يعني من اتخيل ذوله راح يكبرون وتنتلف كل هالبرائة والجمال الشايليها انقهر

هاي الروح الحلوة الجاي تشوفيها تشع من ضحكاتهم راح تتغير وتتحول من روح حية تبث سعادة لروح ميتة تبث سم واذيه

زبيدة : مو شرط

هارون : لا شرط كل واحد بينا هسه جان ورقة بيضة كطن كل خدش ما بيها ومن كبرنا شوفة عينج صرنا كائنات غريبة عجيبة مليانين سم وحقارة

زبيدة : انت ليش دائمًا نظرتك سلبية تجاه كل الناس هيج ؟

هارون : لان هذا واقع منكدر ننكره

كلنا ننولد واحنه بالفطرة نميل للملائكة بطباعنه ، نكبر شويه شويه ونبدي نواجه عقبات الحياة الي تضل تسلب منه هاي الصفة لحد ما تحولنا لكائنات احقر من الشياطين

واول عقبة تواجهنا بحياتنا هي مرحلة الطفولة ، اول ما تفتح عينك وتدرك شنو معنى وجودك تواجهك الناس بعيوبك الي انت اصلا ما منتبه عليها

وهنا راح تنتهي مرحلتك الاولى بفقدانك لثقتك بنفسك وشعورك المستمر بالنقص حتى وانت طفل ويمكن ما واعي ذاك الوعي بس راح تحس

زبيدة : هزيت راسي ، تصدك كلامك صحيح ، اني من جنت بالابتدائية جانت عدنه معلمة اسمها ست ازهار تصيحلي سبرنكة لان جنت كلش ضعيفة

وجانن البنات يضحكن عليه لحد ما تكرر الموضوع اكثر من مرة وكامن كل الطالبات يصيحلي سبرنكة
على حجاية المعلمة

هارون : وشجنتِ تسوين ؟

زبيدة : رفعت كتافي ما جنت اسوي شي بس انقهر كلش

هارون : تدرين اني شجنت اسوي من يتنمرون عليه الطلاب

زبيدة : بشرفك كل هالجمال الشايله وانت صغير وجانو يتنمرون عليك ؟

هارون : اي جانو يصيحولي فلافل لان مدعبل وشعوري مايل للشكار

زبيدة : ههههههههه

هارون : انجبي لتضحكين

زبيدة : ههههه اسفة بس والله اللقب يضحك ، المهم شجنت تسويلهم

هارون : جان عندي علبة مال دعابل ضامها جوه الدرج من اروح للمدرسة اخذها وياي وياهو اليصيحلي فلافل اطلع دعبلة واركعه بيها

واتذكر مرة ضربت ابن المعلم بيها ، اجت بعينه وكلش اذته وراح صاح لابو واجه كتلني بالخشبة

زبيدة : ياا كسر بايده وانت شسويت

هارون : اني اكلت الخشبة منا وصعدت عندي السوادين ، فزيت من مكاني وانداريت على المعلم عضيته من خلفيته

زبيدة : ههههههههههه ايييييييع

هارون : ههههه والله شبيج مدري شجنت احس بس خوما اسكتله

زبيدة : خربت ضحك كلما اتخيل المنظر انتهي ، هههههه نعلعلا بليسك هارون كلبي حيوكف من الضحك

الله يساعد العالم عليك اكول ليش كلها تشتكي منك وانت صغير اثاريك شر وتمشي على الكاع

هارون : شترديني اسوي واني اعاني من التنمر والاستهزاء بس لإني من اصحاب الوزن الزايد لا وهم اكل ضرب بالخشبة عبالك ماعندي احساس

شي اكيد اصير عدواني

مو كتلج قبل شويه احنه من نبدي نكبر ونشوف الناس تعايرنا بعيوبنا راح نتغير وشويه شويه
نتعقد ونصير مسمومين وحقودين ، هو هذا جان قصدي

لعلملج اني جنت بطفولتي اعاني من تنمر على وزني ومن كبرت ودخلك إعدادية وكلية كمت اعاني من تنمر بسبب وضعي الصحي

خو من جانت تجيني نوبة الصرع اسمع الضحك ترس اذاني واشوف الطلاب يسوون حركات بيناتهم بحجة الشقة عود يقلدوني وضحكهم ماله والي

وكإن الشخص الكدامهم صنم لا يحس ولا ينقهر كل عبالهم المريض فرحان بمرضة لو اليعاني من داء
ماله علاج مكيف بروحه

زبيدة : اباوعله كلش انفعل بحيث كام يرجف وهو يحجي خصوصاً من بده يدخل بتفاصيل ويشرح عن معاناته ، متت قهر عليه لان جان ديحجي وكإن هالموقف صاير هسه مو فات عليه سنين

تحركت بجسمي وخليت راسي على ركبة رجله ، صار وجهي مقابيل وجهه ، رفعت ايدي ساحبه ايده وحاضنتها لصدري وهو على حركتي هدئ

شديت على ايده حاضنتها اقوه لگلبي وباوعتله

انت تعرف اني ليش حبيتك رغم انك مكروه ومتنطاق ابد ؟

هارون : لا

زبيدة : باوع حتى اكون صريحة وياك اني اول شعور حسيته تجاهك هو الفضول من اول مرة لحظة شفتك بيها

جنت شي غريب بالنسبة الي اول مرة التمسه بحياتي ، جنت غريب بطريقة مميزة لحد الان ما كادرة استوعب شلون جذبتني

اول لقاء بيني وبينك جان قريب على الاسطبل ، مجنت اعرف انت منو ولا حتى شايفه وجهك

بس جنت دامشي ويه جدي وخواتي ولفت نظري واحد طويل ملثم وجهه وصاعد على حصان ويتحرك
بطريقة احترافية

بيومها لفت نظري اول شي بيك وهو سيطرتك وحركتك الرشيقة وانت تنزل من ظهر الحصان

والي صدمني أكثر انك من نزلت لا سلمت علينا ولا عرفت عن نفسك تجاهلت الكل بما فيهم جدي ومشيت ولا كإنما شفت احد وهالشي زاد فضولي تجاهك اكثر

كلت يا ترى هذا ليش سوه هيج وشنو السبب الخلا يتصرف بهالطريقة الفظة هاي !!

مر الموقف الاول وتوالت المواقف الصارت بيني وبينك والي جانت طبعًا مواقف تعيسة دائمًا تستفزني

والفاجأني اكثر وزاد فضولي اكثر تجاهك هو انك ما سويت ويايه مثل ما كل الزلم المرو عليه سوو

يعني للصراحة اني اعتبر نفسي امرأة جميلة من كل النواحي ومع هذا انت الوحيد الما حسيتك مهتم تتعرف عليه او حتى تنظرلي نظرة الاعجاب المتعودة اشوفها من اغلب الرجال

يعني انت اول واحد التقيت بي ومگلي مثلاً ، انتِ حلوة ، ستايلج حلو ، شخصيتج حلوة والخ من الاطراء الجنت اسمعه

داكمل وشفته صافن بوجهي

شبيك تباوعلي هيج ؟

هارون : امم اسمعج كملي

زبيدة : المهم ضل كل موقف نجتمع بي اني وانت تكون نهايته كارثية مثل هاي ، تلمست كصتي وابتسمت

عزه العزاك لك اني شلون حبيتك وانت فشخت راسي بالطبلة

هارون : درتي طاسة التشريب عليه وتفلتي بوجهي شترديني اسويلج احضنج مثلاً ؟

زبيدة : بشرفك هارون هم تندمت بوقتها لان اذيتني هيج ؟

اباوعله تلمس اثر الجرح الي بكصتي وتنهد

هارون : بوقتها لا بس هسه اي

زبيدة : ليش ؟

تجاهل سؤالي واشر بعيونه على الاثر

هارون : هم كرهتيني من صار هالموقف

زبيدة : هو اصلاً جنت اكرهك اموت منك ، ليش انت السويته بيه قليل لعبت بيه لعب

هارون : ما شاء الله عليج ابد متجاملين

زبيدة : احسن

هارون : زين اذا هالكد جنتِ كارهتني شوكت يعني احم

زبيدة : شوكت شنو ؟

هارون : مو قبل شويه كلتي انج حبيتيني رغم مكروه ومدري شنو بعد ، شلون حبيبتي وانتِ جنتِ كارهتني هيج

زبيدة : فضولي تجاهك خلاني احبك ، جنت ادور على شي وراك بدافع الفضول الكه نفسي مكتشفه بيك شي
جديد يجذبني الك اكثر

خصوصاً من تزوجنا وصرت قريبة منك اكثر ، كمت اكتشف اشياء اكثر وكلما يزيد فضولي تجاهك يزيد اعجابي بيك أكثر

لحد ما كمت احس نفسي انجذب واميل للاشياء الي انت تحبها وبدون لا احس على روحي

رغم إني جنت كارهه الزلم بدون استثناء بس انت جنت بالنسبة الي مختلف

حبك المفرط للحيوانات ، هدوئك الغريب الي للان ما مستوعبته ، وقاحتك ، شخصية الشخص الحباب المتخفي وره الشخص الحقير الشرير والي شكد متحاول تخفي لابد انه يعادنك ويظهر

انت كلك على بعضك مميز على الاقل بالنسبة الي ابتسمت تخيل حتى علاقتك الغريبة بالمكدوس والخبز ومرضك الممكن يكون عائق بحياتك

ريحتك التشبه ريحة الامهات و رفعت ايدي متلمسه حاجبه بابهامي

حتى حاجبك المطبور اني اشوفه شي مميز يخطفلي انفاسي من المحه

كلشي غريب ، متحبه ، يجرحك ، يذكرك باشياء تقهرك اني اعتبره عامل اساسي ساعد بإن يخليني احبك بل اغوص بتفاصيلك الى ما لا نهاية وبدون ممل

هارون اني اموت عليك متتخيل شكد احبك ، اخذت نفس ، حتى الهوى احسه غير من اكون وياك

ما سمعت صوته ، شلت راسي وباوعتله لكيته يباوعلي وعيونه تلمع

شبيـ.... بعدني داسأله وتفاجئت من شفته دنك عليه وباسني من شفايفي

غمضت عيوني من اجتاحني نفس الشعور الحسيته بأول مرة باسني بيها

نزلت ايدي وبدون ما احس خليتها على ركبته وبادلته رغم عدم خبرتي لكن بلحظتها شعوري هو القادني وخلاني اسوي اليملي عليه احساسي

بادلته وايدي تشد على ركبته ، دكات كلبي وكلبه اندمجن سوه لدرجة حسيت گلبي وكلبه حيوكفن من
سرعة النبض

فتحت عيوني وبديت التقط انفاسي من ابتعد عني ، جنه ثنيناتنه نلهث داحاول انظم تنفسي وفاجأني من رجع باسني مرة ثانية

ابتعد وايده تمسح على خدودي وعيونه تمشي على ملامحي

تنهدت من باسني من راسي بعمق وحضني لصدره بقوة ، حاوطته باديه وشبكته حيل

اسمعه يتنهد وكل حسرة يجرها شكبرها ، حشرت راسي بركبته وغمضت وكلما يشد بحضنه الي احضنه بنفس القوة

شويه وابتعد موخر شعري عن وجهي ، بلعت ريكي ومدري ليش من باوعتله استحيت رغم اني ما استحي

احم شنو رأيك نكوم ننام احسن شو اني نعست وبردت هم

هارون : هاا ايي ايي حتى اني كومي كومي

زبيدة : يي ييله

________________________________

ديمة : كعدت الصبح ، كمت غسلت وجهي ودخلت للمطبخ لكيت خالة كالعادة تحضر للغدة

صباح الخير خالة

هناء : هلا امي صباح النور بشري شلون صرتي

ديمة : الحمدلله ، متريكة لو اسويلج ريوك ؟

هناء : لا يمه اني صايمة ، انتِ روحي تريكي سبع عافيات

ديمة : ليش صايمة ، اكو مناسبة ؟

هناء : لا حبيبتي بس اني قسمت بالله راح احجي لامين على سواية بصائر بيج وانتِ طلبتي مني ما احجي واني لخاطرج ما حجيت

ولان ما حجيت راح اصوم 3 ايام كفارة عن القسم القسمته وما التزمت بي

ديمة : شكد ما اني تعبانه بس شكد ارتاحيت من سمعت كلامها

حسيت بشعور كلش لطيف واني اسمعها وبنفس الوقت اجت على بالي نفسي

تذكرت روحي قبل شكد جنت احلف جذب في سبيل اخلص روحي من موقف لو اتجنب رزالة من بابا جان عادي عندب اقسم بالله على شي مصاير واتخطى الموقف بدون حتى لا اصفن واستغفر ربي

ضاق صدري واني استرجع مواقفي ، يوم عن يوم الحياة والظروف دتراويني اني شكد عندي أخطاء وذنوب ما ملاحظتها ولا مفكرة في يوم إني اراجع
نفسي واحاول امحيها !!

فززني صوت خالة مرجعني لواقعي

هناء : هااا يمه ما كتيلي شتردين

ديمة : هاا العفو خالة ما انتبهت عليج شنو حجيتي

هناء : جاي اكلج تردين اسويلج بيض لو تاكلين جبن

ديمة : حبيبتي خالة لتعبين نفسج اني مو جوعانة بس اريد اشرب جاي

هناء : لعد وعلاجج شلون تاخذي

ديمة : من اجوع اخذه واكل لتشيلين هم ، رحت صبيتلي استكان جاي وكعدت اشربه

بالي يم ذيج الحقيرة ، باوعت للساعة شفتها بالتسعة الصبح ، كملت جايي وكمت طبيت لغرفتي بدلت على السريع وطلعت

شافتني خالة وباوعتلي باستغراب

هناء : وين رايحة

ديمة : لتقى

________________________________

دنيا : حاطه الحاسبة كبالي وكاعدة ادخل المعلومات الي بالملفات ولفت نظري وجود ست راشدة كدامي

شلت راسي وباوعتلها جانت لازمة بايد حافظة بيها فطائر وبايد ثانية لازمة كلاص جاي

جاتني والابتسامة مزينه وجها

هااا ست راشدة محتاجة شي ؟

راشدة : لا بس اليوم سويت فطائر وعجبني اضيفج

دنيا : هاا شكراً جزيلاً مجان اكو اله داعي تزحمين نفسج

راشدة : لا حبيبتي بالعكس ماكو اي زحمه انتِ مثل بنتي

سفير : ههههه الله يثخن لبنجن صايرات حبايب

جيهان : اني هم متفاجئة

راشدة : لتسوولكم سالفة اني من البداية احب دنيا وتعجبني لان هادئة وشاغوله

جيهان : صدك والله ؟

راشدة : اي والله ، تفضلي حبيبتي

دنيا : خلت الحافظة كدامي هي والجاي وراحت كعدت بمكانها تكمل شغلها

باوعت لعواطف غمزتلي وتقربت بكرسيها يمي

عواطف : هاي شكو اول تالي الست راشدة تسوي اكل وتجيب الج ، اول مرة تسويها ، صارلي عشر سنوات اشتغل هنا بحياتي ما شفتها جابت وياها صمونة

اموت واعرف شعدها وياج صارلها فترة تدك ناعم وتسوي روحها طيبة وكل ساعة جايه يمج ، مو جانت حاطة كورها من كورج شغيرها

دنيا : تنهدت وجاوبتها ، من تصيرلي فرصة راح اسولفلج وساعتها راح تفتهمين ليش صارت هيج ودودة ولطيفة ويايه فجأة

عواطف : ليش مو هسه

دنيا : ولج الكاع محضورة متشوفيهن يباوعن علينا روحي واذا كدرت باجر امرلج للبيت ونحجي

عواطف : خوش انتظرج مو متجين راح اسويلج دولمة

دنيا : ضحكت ولج ايييي خرب يومج شكد فضولية

رجعت هي لمكانها واني باوعت للأكل ولزمت راسي

والله اني ما ردت احد يعرف بزواجي من يوسف علمود هاي السوالف ، ست راشدة جانت شاده ويايه
من داومت لحد اخر موقف صار بيناتنا

كل يوم تدورلها سالفة في سبيل تغثني وبس عرفت اني مرت يوسف صرت عزيزة يا ام راس البصل واني ولا غيري

واني ادري من بعد هالمحبة الزايدة راح تبدي السوالف التعبانة والواسطات واني للصراحة كلش مالي خلك
هيج سوالف ولا احب اتدخل

اني جايه هنا موظفة حالي من حال اي واحد هنا لا اريد اتعامل معاملة خاصة ولا اريد تصير العين عليه

راشدة : هاا دنو اكلتي لو ما عجبج

دنيا : ابتسمتلها واخذت قطعة اكلت منها ، عاشت ايدج كلش طيبة

راشدة : الف عافية

دنيا : اكلت وحدة وكمت انطيت لجيهان وسفير عواطف ما قبلت تاخذ وطبعًا اني لو منها هم ما اخذ لان هي من البداية ما ضيفتهم وهالشي كلش عيب

داشرب جاي ودگ موبايلي ، شفت اسم ديمة على الشاشة ، حبيبتي والله مشتاقتلها

ابتسمت وجاوبتها بعدني داسلم عليها واجاني صوتها تبجي ، اول ما سمعتها ذبيت الكلاص وكمت طلعت بره بسرعة

هاا ديمة هاا بس اهدي وفهميني شبيج ، ليش جاي تبجين ؟ تردين اشوفج اي اي يله جاييتج بس انطيني العنوان خوش خوش

خلص حبيبتي ربع ساعة واني يمج لا لا ما راح اتأخر
سديت الموبايل وركضت لمكتب يوسف بلغت السكرتير بسرعة وضليت واكفة علما يبلغه

بس گلي تفضلي ركضت فتحت الباب ودخلت ، اول ما شافني يوسف كام على حيله

يوسف : شبيج حبيبتي ليش هيج تلهثين ووجهج اصفر

دنيا : هـ هاي ديمة خابرتني بس تبجي وكعتلي كلبي اتوسل بيها تحجي متقبل انوب كلتلي تريد تشوفني واني اجيت اكلك لازم اطلع

يوسف : اهدي اهدي على كيفج امشي جيبي غراضج واني اخذج بس حاولي تهدأين ، هاج شربي ماي

دنيا : شربت مي واخذت ايده يله يوسف حباب امشي اخذني

يوسف : يله اجيت بس اخذ سترتي

دنيا : راح اسبقك اني ، طلعت بسرعة للمكتب اخذت غراضي ورحت للكراج وهو اجه وراي

شغل السيارة وطلعنا للحديقة الكلتلي عليها ديمة

يوسف : ما حاولتي تفهمين شبيها

دنيا : بس تبجي ومتقبل تحجي

يوسف : خاف متعاركة ويه رجلها

دنيا : لالا ما اعتقد جانت دتناشغ بطريقة مو طبيعية مستحيل تكون دتبجي هيج لان متعاركة ويه امين

يوسف : والله ما ادري شكلج بس وضعية ديمة هالفترة ابد ما عاجبتني كلما جاي اشوفها الكاها ضعفانة وملامحها حزينة على غير العادة

دنيا : حتى اني ملاحظة بس من اسألها سواء اني او زبيدة متجاوب

يوسف : ان شاء الله خير

دنيا : ان شاء الله ، وصلنا للحديقة ونزلنا لكينا ديمة كاعدة جوه على وحدة من المصاطب وتبجي

ركضنالها اني ويوسف وهي بس شافتنا شبكتني و كامت تنشغ

مسحت على راسها شبيج يگلبي ، شبيج يحبيبتي شنو صاير وياج

ابتعدت داباوعلها وفاجأني يوسف من صاح

يوسف : هاي ليش خشمج يصب دم ومنو ضاربج حتى خدج مورم هيج ؟

هاي يا كلب ابن كلب ميتعرضلج احجيييي

دنيا : اباوعلها الحجاب مخربط وطالع شعرها ، جبتها متربة وطالعه بنعال البيت (مكرم القارئ) خشمها بي دم يابس وخدودها حمر

ضليت باهته على منظرها

يوسف : متحجيييين شبيييج امين ضاربج هيج ؟ كليلي حتى اروح اشك حلكه

ديمة : لالا مو امين

يوسف : لعد منو ، احجي ديمة تلفتيلي اعصابي تره

دنيا : باوعتلي ديمة واني افتهمتها ، انداريت على يوسف ، روح انت ارجع للشركة واني راح اكعد وياها ومن نكمل اوصلها واجي

يوسف : وين اروح كل عقلج تحجين ترديني اعوفها بدون لا افهم شبيها

دنيا : اشرتله ميخالف حبيبي خلينه نكعد على انفراد واني من ارجع افهمك كلشي

يوسف : ما اكدر ارجع راح اكعد انتظرج بالسيارة علما تكملن ، اخذن راحتجن

دنيا : راح يوسف واني كعدت يمها ، احجيلي ديمة شبيج يروحي منو ضاربج هيج

بس بطلي بجي وحاولي تفهميني ، اني اجيت علمودج يگلبي ، اريد افهم شنو الصاير وياج سولفيلي ليش
هيج حالتج

جاوبتني وهي تبجي

ديمة : ضربني

دنيا : منو هن من عسى بايدهن الكسر

ديمة : تقى واختها

دنيا : منو هاي تقى ؟

ديمة : جوارينه

دنيا : لحظة لحظة اني مداستوعب احجيلي من البداية هاي منو وشجابج عليها واصلا شلون تجرأت تمد ايدها عليج هيج

ديمة :

طلعت من البيت وتوجهت لبيت تقى ، وصلت للبيت ودكيت الجرس ، ضليت واكفه انتظر الباب ينفتح

انفتحت الباب وطلعتلي بنية اول مرة اشوفها

السلام عليكم

: وعليكم السلام ، تفضلي ؟

ديمة : تقى موجودة ؟

: شتردين منها ؟

ديمة : اني صديقتها ديمة اذا ممكن تصيحيها الي اريد احجي وياها

: ثواني هسه اصحيها اجيج

ديمة : عافتني بالباب ودخلت ، بحدود العشر دقايق وطلعت

: اسفه بس تقى مموجودة

ديمة : ليش مو هستوج كلتيلي حترحين تصيحيها وتجين

: هاا مو اني عبالي موجودة بس الظاهر طلعت طالعة ويه امي للسوك

ديمة : يا سوك هذا اليوم دوام وامكم موظفة فعليش هالجذب ، صيحيها الي ما راح ااخرها لو اخذ من وقت جنابها بس اريد احجي وياها واروح

: شهالاسلوب هذا داكلج ماهي شنو كوه هي ، شبيج حبيبتي شهالملحة

ديمة : داكلج صيحيها خلي تطلع لا قسمًا بالله اني بنفسي اطبلها

امشيييي صيحيهاااا يله

اباوعلها دفعت الباب دتسده ، ذبيت جسمي عليه بحيث صار جتفي حاجز بين الباب والشارع ، عطت بيها

لتسديييي لتسدييي امشيييي صيحي اختججج الحقيرررة الجذاببببة خليييي تطلع تكلي لييييش سوووت هييييج بيه واروح

: يابه امشي روحي شكد لزكه

ديمة : ما اروووح لحد ما تطلععع امشيييي صيحيهااا

بوقتها ما اعرف شلون اجتني القوة والقابلية حتى ادفع الباب عليها وادخل للطرمة

ويه ما دخلت صارت بوجهي تقى واكفه على صفحة يم باب الصالة ومبين انها جانت موجودة وواكفه تتسمع

ابتسمت بوجها هاا شو داشوفج هنا لعد وينها الجانت طالعة ويه امها

تقى : شتردين ديمة احجي بسرعة وروحي

ديمة : الظاهر انتِ تدرين بنفسج شمسويه هلي دتتهربين تواجهيني وترديني اروح بسرعة

اباوعلها كلبت عيونها شلون المعاجبها كلامي

تقى : اتهرب من شنو ؟ ومنو انتِ اصلا حتى اتهرب منج ، كل ما بالموضوع اني ما اريد اتواصل وياج بعد

ديمة : اكدر اعرف السبب ؟

تقى : صراحة انتِ صاحبة مشاكل وكل ساعة جايتني مشتكيه من حياتج ورجلج واني ما عايزة سلبية البيه كافيني فالافضل الي والج انُ نقطع كل تواصل بيناتنا
لان الظاهر احنه مراهم نصير صديقات

ديمة : لا حبيبتي احنه مو مراهم نصير صديقات ، كولي انتِ اختفيني وابتعدي بسبب جذبج وتلفيقج
عليه كلام اني اصلا محاجيته

لج بس فهميني انتِ شنو من بشر ، اني بشنو اذيتج حتى تأذيني هيج ؟

جرحتج ؟ قللت من قيمتج ، سويت اي شي يزعجج
حتى ترحين تألفين عليه كلام اني اصلا مكايلته

اني كتلج امين وصخ وريحته طالعة !! لج انتِ واهلج وعشيرتكم كلها ترحون فدوة لتراب رجليه

: احترمي نفسج

ديمة : انتتتتِ اشششش ، رجعت باوعت لتقى ونزلت دموعي بس فهميني ليش

انطيني سبب واحد يخليج هيج تجذبين ، اني سامعة اليكره احد يلفق عليه حجي مصاير حتى يأذي زين
حتى لو لنفرض انتِ تكرهيني غير اكو سبب لهذا الكره

ماخذه منج شي ؟ ملتقيه بيج قبل ومسويتلج شي حتى تكرهيني وتنوين تأذيني

اباوعلها صافنه وجهي وتتبسم

جريتها من دشداشتها وعطت ، علييييمنننن تتبسميييين علييييمن مسوووويه انجاز يعني
ودتفتخريييين بييييي

لج حقيرة امنت بيييج وعديتج وحدة من خواتي تاليييييها تطعنينيييي هييييج وياريييت ، يارييييت
الحجي الناقلته صحيح حتى اكول فتنت عليه

بس المشكله حجيج كله جذذذذذبب

تقى : بشرفج ديمة شكد دراميه انتِ وتلعبين النفس يعني حتى لو الكلام الحجيته مو صحيح انتِ اول وتالي متحبين امين ولا يهمج

سواء الكلام الطلع صح لو لا انتِ ميفرق عندج قابل راح تهمج مشاعره هو انتِ طيحتي حظه وغسلتي بالطه*** ذاك اليوم

هسه جايتني كاتلتج الحرگه وتعاتبيني ، جان عاتبتني روحج قبل لتحجين

روحي خيه روحي وبعد لتجين لهنا ، صيري حبابه وجفينه شرج ، يله يحلوة توكلي يله يله ما عايزنا
عطلات

ديمة : دفعتني وكامت تدفع بيه واني ما تحملت شلت ايدي وصفكتها راشدي

اني ضربتها وما اشوفها الا تجرني من حجابي وتوكعني بالكاع وتدفرني ببطني ، فزيت من توالت عليه هيج واختها ملخني تملخ

كمت ما اعرف الضرب منين يجيني ، وصلت لمرحلة خدر وجهي وجهي من الضرب والتدفر

اخر شي سحولني من شعري ودفعني بالشارع

اني شفت نفسي واكعه بنص التراب وخشمي ينزف انهاريت ، فوگ الضرب الاكلته ملخت روحي تملخ

اخر شي كمت على حيلي وخابرت دنيا اناشغ من البجي

تنهدت ومسحت دموعي وهياتني حجيتلج كل الي صار

دنيا : بشرفج ديمة !! انتِ متوبين من سوالف الصديقات هاي

هبه ما خلت تتعضين تأمنين بصديقة بعد ، شلون هيج تسوين ؟!

بنية ما صارلج حتى سنة من تعرفيها زعتيلها الاول والتالي تحجين صدك تشاقين

هو منو طيح حظج من البداية ووصلج لهالمواصيل مو هبه وبدال ما تاخذين حذرج بعد رحتي صادقتيلي وحدة انكس من القبلها وانطيتيها ركبتج

لزمت راسي لج انتِ شنو بس فهميني واصلا وين جان عقلج من لقنتج هالكلام السز وقنعتج تحجي لامين

بشرفج شحسيتي ؟ ما استحي على روحج تعيرين الولد بفقرة بس حتى تتطلكين ، ليش هو فقرة بايدة ؟

متشوفي خطية كاسر ظهره ومضحي بصحته وعافيته في سبيل ميقصر وياج

ديمة : الله يخليج دنيا كافي لتضلين تأنبيني والله ما اتحمل ضغط بعد

دنيا : لتزعلين مني بس ما دامج متتعضين ولا تتعلمين من اخطائج فتستاهلين كل الي يصير بيج

اي وحدة ببدالج توكع بنفس المشكلة الوكعتي بيها راح تكوم تمشي بصف الحايط ويمكن من شدة الصدمة حتى تفقد الثقة بالناس

بس انتِ !! ااااخ يا انتِ ولا يفيد وياج مشاكل ولا يفيد وياج طعن ماكو انتِ انتِ لو مهما مر عليج راح تبقين بهذا غبائج وسذاجتج وانانيتج

جاوبتني وهي تنشغ

ديمة : والله ما متقصدة اسوي كل هذا ومجان عبالي راح يصير كل الي صار

دنيا : خو دومج انتِ تسوين سوايتج وتكعدين تصيحين ما جنت متقصده وما ادري وتعالو حلو مشاكلي

تنهدت وجريت نفس ، اباوعلها منهارة وتبجي بحركة گلب ، غمضت عيوني استغفر الله ، الف استغفر الله شجاج دنيا شجاج ، تحسرت و جريتها حضنتها محاولة اهدئها

ااخ منج ااخ والله تعبتينا وتعبتي روحج ، شوكت تكبرين ، شوكت تعقلين

خلص خلص اهدي لتضلين تبجين هيج انبح صوتج ، لتخافين ما اعوفج اني حتى لو صيحت عليج حتى لو رزلتج فمن حرگه كلبي عليج

ديمة : اسفه دنيا والله اسفه

دنيا : كافي حبيبتي اهدئي وصدكيني اني راح احاول احل هاي المشكلة

مسحت دموعها على وبوستها ، خلص يروحي من اروح فدوة لهالعيون وعمت عيني اذا ما اطيحلج حظها هالادبسز البلا تربية

كومي حبيبتي يله كومي خلي نشرب مي ، كومتها ورحت اشتريتلها مي ، شربتها وغسلت وجها ، رتبت ملابسها واخذتها للسيارة

فتحت الباب كعدتها ورحت صعدت يم يوسف

يوسف : هاا دمدم شلون صرتي

ديمة : الحمدلله

يوسف : تحبين اخذج لمكان ، تردين تجين تباتين يمنه تغيرين جو ، اخذي يوم نقاهه واني اخابر امين اقنعه

ديمة : مسحت دموعي وجاوبته ، لا ميحتاج شكراً

يوسف : ميحتاج اكلج اني اخوج واي شي يضرج يضرني ، عمرج لتتخيلين إني ممكن اسمح لشي يأذيج

ديمة : فدوة لكلبك بعد عمري متقصر

يوسف : هاا هسه اخذج لبيتنا ؟

دنيا : لا حبيبي رجعها لبيت رجلها هسه اكيد نلكاهم كاعدين على نار على مودها

يوسف : هاهي براحتجن

دنيا : حرك يوسف ورحنا وصلنا ديمة للبيت ، حتى ما نزلت وياها ما ردت اثير الشك واحسس اهل امين اكو شي

حتى هي نبهتها متحجي اي شي عن الصار واذا سألتها ام امين عن التأخير تكلها طلعت للحديقة اشم هوى وارجع

يوسف : ما ناويه تحجيلي عن حال ديمة ؟

دنيا : هسه من نوصل اسولفلك ماعندي القدرة احجي بعد تعبت

يوسف : بأي وقت تحبين تحجين اني كلي اذن صاغية

دنيا : بست ايده ، حبيبي انت

رجعنا للبيت وخطية خالة لكيناها منتظرتنا وتلوب عبالها صايرلنا شي بس يوسف طمنها وكلها طلعنا نتغدة بره

صعدنا لغرفتنا لكينا تيومي بعد عمري نايم ، هستوني دابدل ملابسي واندكت الباب

طلع يوسف يفتحها ، سمعت صوت عمو يحيى والشباب بره

شويه وفززني صوت يوسف العاط بصوت عالي

يوسف : دخيلك يا ستار

**************************************
لهنا يكون خلص البارت ان شاء الله يكون عجبكم ❤️+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

قال تعالى

(يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ بِئْسَ الِاسْمُ الْفُسُوقُ بَعْدَ الْإِيمَانِ وَمَن لَّمْ يَتُبْ فَأُولَٰئِكَ هُمُ الظَّالِمُونَ")

صدق الله العلي العظيم

هذة الآية ما نزلتها بالبداية اعتباط وانما كان الها ربط مهم بالفقرة المتعلقة بهارون وزبيدة

الاغلب من الناس يعتبرون الاستهزاء بالشكل ، سواء ملامح الوجه ، تفاصيل الجسم فيما اذا كان الشخص يعاني من سمنة او نحافة ، لون البشرة ، طريقة النطق والخ من الامور

البعض يشوفون الاستهزاء ووضع القاب ساخرة على الاخرين شي لطيف ومن باب المزاح

لا يفكرون بمشاعر المقابل ولا يهمهم اذا الكدامهم انجرح او ضاج ، عادي المهم همه يبينون فد شي ومثال على الطرافة بينما الموضوع مؤذي ومابي اي طرافة واصلاً حتى حرام

اولاً هالشي حرام لان هذي خلقة رب العالمين واحنه كلنا منكدر نخلق ريشة مو عاد نعيب على ابداع العظيم جل في علاه

وثانيًا التنمر حرام لان يهدم الشخصية ويدمر الذات ويكسر الخواطر والله سبحانه وتعالى شكد ما هو عظيم وماله مثيل لكنه يستحي يرد عبده اذا دعا حتى ليكسر بخاطره فمنو احنه حتى نجي نكسر بخاطر الناس بدون لنفكر بمشاعرهم

ياما ناس اعتزلو على العالم الخارجي بسبب الاستهزاء والتحقير والتعييب على اشكالهم والعيوب الي كلش طبيعي ينولدون بيها لانهم بشر وطبيعي ميكونون كاملين

اعرف طولت عليكم بس اتمنى كل الي قرأ هاي الفقرة يراجع نفسه اذا كان يتنمر على الاخرين ولو اني اشك انُ ناس باخلاقكم ورقيكم يكونون متنمرين لكن عادي جل من لا يخطأ والمهم الانسان يتعلم من اخطائه

كل الحب ❤️